KATIKA ulimwengu wa mahusiano, mjadala kuhusu wanaume wanaojiita “wazuri” unaendelea kushika kasi.

Kwa mtazamo wa wengi, upole, unyenyekevu na moyo wa kusaidia ni sifa bora.

Hata hivyo, kwa baadhi ya vipusa, sifa hizi hazitoshi kuvutia, hasa wanapohisi kuna jambo linalofichwa nyuma ya taswira hiyo.

Wataalamu wanasema kuwa mara nyingi wanaume wapole huficha nia na tabia zao halisi. Badala ya kusema wazi wanachotaka, huzunguka kwa maneno na vitendo visivyoeleweka kwa hofu ya kukataliwa.

Kulingana na mtaalamu wa mahusiano Esther Perel, “uwazi wa kihisia ndio msingi wa mvuto wa kweli; unapojificha sana, unajinyima nafasi ya kuunganisha hisia zako na mpenzi kwa dhati.”

Hali hii huwafanya vipusa washindwe kusoma msimamo wa mwanaume, jambo linalopunguza mvuto.

Aidha, tabia ya kuweka maslahi ya wengine mbele imeonekana kuwa changamoto.

Wanaume wenye tabia hii hujitahidi kupendeza kila mtu, wakihofia kuhukumiwa au kukataliwa.

Hata hivyo, kama mwanasaikolojia Jordan Peterson anavyoeleza, “mtu asiyeweka mipaka ya kusaidia hujikuta akipoteza heshima, hata kutoka kwa wale anaotaka kuwafurahisha.”

Hii ina maana kuwa kutoa kupita kiasi bila kujithamini kunaweza kuwafanya vipusa waone mwanaume hana msimamo.

Wanaume wapole pia hujikuta wakifanya mengi kupita kiasi ili kuwavutia wanawake.

Hutumia pesa na muda mwingi kuwafurahisha, wakitumaini kupata mapenzi au kuthaminiwa.

Tatizo ni kwamba mara nyingi hawasemi wazi matarajio yao. Hali hii hujenga uhusiano usio na uwazi, na baadaye huleta maumivu wanapokosa kile walichotarajia.

Kwa mujibu wa mwanasaikolojia Brené Koki, mahusiano yenye afya yanahitaji mipaka na uaminifu.

Tatizo jingine ni ukosefu wa kujiamini. Wanaume hawa huweza kushikamana na mwanamke si kwa sababu ya mapenzi ya dhati bali kwa sababu ya upweke.

Wanapopata mtu anayewapa umakini, hushikilia kwa nguvu bila kujali kama uhusiano huo unafaa au la. Hali hii huwafanya vipusa wahisi kubanwa au kukosa uhuru.

Zaidi ya hayo, wanaonekana kuwa rahisi sana kueleweka na hata kudhibitiwa.

Ukosefu wa msisimko na msimamo huwafanya wapoteze mvuto kwa baadhi ya wanawake wanaotafuta mtu mwenye dira na uamuzi thabiti.

Wataalamu wanasisitiza kuwa mvuto hauko tu katika wema, bali pia katika kujiamini na kujua unachotaka maishani.

Licha ya kujionyesha kuwa watulivu, wanaume wapole mara nyingi hukandamiza hisia zao.

Badala ya kueleza hasira au huzuni, huzificha hadi zinapolipuka ghafla au kujitenga kimya kimya.

Tabia hii huleta mkanganyiko mkubwa katika mahusiano kwani wenzi wao hushindwa kuelewa chanzo cha mabadiliko hayo.

Wataalamu wanasisitiza kuwa kuwa “mzuri” hakumaanishi kujificha, kujinyima au kukubali kila kitu.

Kuwa mwanamume kweli kunahusisha uhalisi, kujiamini na kuweka mipaka.

Mahusiano bora hujengwa na watu wanaoweza kusema ukweli wao bila hofu, kuheshimu nafsi zao na za wengine, na kuonyesha hisia zao kwa njia ya wazi na ya heshima.