CHANGAMOTO mpya imeibuka kuhusu umiliki wa jina la chama cha kisiasa cha Linda Mwananchi, huku Bw Charles Wanyonyi akidai kuwa ombi lake la kusajili jina hilo lilitangulia lile linalohusishwa na Seneta wa Nairobi Edwin Sifuna kwa zaidi ya miezi mitatu.

Kupitia mawakili wake, Bw Wanyonyi ameandikia Msajili wa Vyama vya Kisiasa akitaka ombi lake lililowasilishwa Februari 24, 2026 lipewe kipaumbele, akisema haliwezi kuondolewa na muombaji aliyefuata baadaye.

Hatua hiyo imejiri siku moja baada ya Jopo la Kutatua Mizozo ya Vyama vya Kisiasa kubatilisha uamuzi wa Msajili wa Vyama vya Kisiasa wa kukataa ombi la washirika wa Bw Sifuna la kusajili jina la Linda Mwananchi Movement (LMM).

Mahakama ilikubali rufaa iliyowasilishwa na Mbunge wa Suba Kusini Caroli Omondi, mwanaharakati Pauline Njoroge na rais wa zamani wa Chama cha Wanasheria Kenya (LSK) Faith Odhiambo. Jopo hilo liliagiza Msajili achunguze upya ombi lao ndani ya siku saba.

Kulingana na stakabadhi za kesi, waombaji hao walikuwa wamependekeza majina sita yanayojumuisha maneno “Linda Mwananchi”. Majina hayo ni Linda Mwananchi Alliance, Linda Mwananchi Alliance of Kenya, Linda Mwananchi Coalition, Linda Mwananchi Party, Linda Mwananchi Party of Kenya na Linda Mwananchi People’s Party.

Barua ya Oktoba 1 kutoka kwa kampuni ya mawakili ya Wanzau, Odhiambo & Associates inaonyesha kuwa Bw Wanyonyi aliwasilisha ombi la kusajili jina la “Linda Mwananchi Party of Kenya” mnamo Februari 24, 2026, ilhali kundi la Omondi, Njoroge na Odhiambo liliwasilisha ombi lao Juni 4.

“Mteja wetu aliwasilisha ombi lake zaidi ya miezi mitatu kabla ya waombaji wengine. Kipaumbele kinachotokana na ombi hilo hakiwezi kuondolewa kisheria na ombi la baadaye lenye jina sawa au linalofanana kwa kiasi kikubwa,” mawakili hao walisema.

Wamemtaka Msajili kushughulikia na kuhifadhi jina hilo kwa niaba ya Bw Wanyonyi, wakinukuu Kifungu cha 4B cha Sheria ya Vyama vya Kisiasa.

Awali, ombi la Bw Wanyonyi lilikataliwa kwa madai kuwa lilifanana na kaulimbiu iliyohifadhiwa ya “Linda Mkenya, Boresha Kenya” pamoja na sababu za maslahi ya umma. Hata hivyo, hakukata rufaa dhidi ya uamuzi huo katika mahakama hiyo.

Katika uamuzi wake, mahakama ilisema Msajili hakutoa maelezo ya kutosha kuhusu sababu za maslahi ya umma zilizotumiwa kukataa ombi la kundi la Bw Sifuna.

Jopo hilo pia lilichunguza chama cha Liberty National Democratic Alliance (LINDA) na kubaini kuwa hakikuwa chama kilichosajiliwa kikamilifu wala kwa muda.

Mahakama ilisema uhifadhi wa jina la LINDA uliisha moja kwa moja baada ya siku 90 tangu ombi lake la Novemba 2025. Pia ikabaini kuwa Msajili hakuwa na mamlaka ya kufufua uhifadhi huo kupitia barua ya Agosti 14, 2026.

Aidha, jopo hilo lilikataa hoja kwamba jina la Linda Mwananchi linafanana na kifupi cha LINDA. Lilisema “Linda” ni neno la Kiswahili linalomaanisha kulinda au kutetea, huku LINDA ikiwa kifupi cha Liberty National Democratic Alliance.

Mahakama iliongeza kuwa hakukuwa na msingi wa kuzuia usajili wa Linda Mwananchi Movement kwa misingi ya kufanana kwa majina. Ilibatilisha uamuzi wa Msajili wa Agosti 7 na kuagiza ombi la kusajili Linda Mwananchi Movement na kifupi chake LMM lichunguzwe upya ndani ya siku saba.

Hata hivyo, barua ya Oktoba 1 sasa imetoa changamoto mpya kwa msajili  kuamua kati ya ombi la awali la Bw Wanyonyi na agizo la mahakama la kushughulikia upya ombi la washirika wa Bw Sifuna.