MIILI tisa ya waumini wa Kanisa Katoliki la St Mathias Mulumba, Mikindani waliofariki katika ajali ya barabarani eneo la Salama, Kaunti ya Makueni, imesafirishwa hadi Mombasa kuhifadhiwa huku mipango ya mazishi ikianza.

Miili hiyo imehifadhiwa katika mochari ya Hospitali ya Jocham, Mombasa, baada ya kuwasili saa chache baada ya usiku wa manane kuamkia Jumatatu.

Waathiriwa hao walikuwa miongoni mwa mahujaji waliofariki baada ya gari walilokuwa wakisafiria kupata ajali kwenye barabara kuu ya Nairobi-Mombasa Jumamosi, ambapo watu 17 walipoteza maisha.

Walikuwa wakisafiri kuelekea Madhabahu ya Subukia, Nakuru, kwa ajili ya Siku ya Kitaifa ya Maombi.

Bw Martin Obwaka, aliyeongoza jamaa na marafiki walioenda hadi Salama kuchukua miili hiyo, alisema waliwasili Mombasa mwendo wa saa kumi usiku wa kuamkia Jumatatu.

Bw Obwaka alisema walihakikisha miili hiyo imehifadhiwa ipasavyo kabla ya kuondoka katika saa kumi na mbili asubuhi.

Rekodi za hospitalini zinaonyesha kuwa, miili hiyo iliwasili ikiwa katika magari matatu ya kusafirisha maiti.

“Nilirekodi magari haya matatu ya kubeba maiti. Yalileta miili ya waathiriwa wa ajali ya Salama,” alisema mfanyakazi wa hospitalini.

Baadaye msafara ulielekea hadi Kanisa Katoliki lililo Mikindani kwa ajili ya sala.

Miili hiyo itasalia katika chumba cha kuhifadhi maiti cha Hospitali ya Jocham huku familia na kanisa zikiendelea na maandalizi ya mazishi.

Mbunge wa Jomvu, Bw Badi Twalib, alisema Rais William Ruto alimpigia simu baada ya ajali hiyo na kuahidi kusaidia familia zote zilizopoteza wapendwa wao katika maandalizi ya mazishi.

“Rais Ruto alinipigia simu binafsi kama mbunge wa eneo hili kufuatia msiba huu. Pia ameahidi kusaidia familia zote 17 zilizopoteza wapendwa wao katika ajali hiyo ya barabarani. Baadhi yao watasafiri hadi Nyanza, Ukambani na eneo la Kati, kwa hivyo tunamshukuru Rais kwa msaada wake. Huu ungekuwa mzigo mkubwa kwa familia, na tunamshukuru Kiongozi wa Nchi,” alisema Bw Twalib.

Akizungumza katika Kanisa Katoliki la St Mathias Mulumba, Mikindani, Jumapili, Bw Twalib alisema Rais alimpa Katibu katika Wizara ya Mambo ya Ndani, Dkt Raymond Omollo, jukumu la kuhakikisha familia hizo zinapata msaada unaohitajika.

Alisema Dkt Omollo anawasiliana na Kamishna wa Kaunti ya Mombasa, Mohamed Noor, ili kuratibu maandalizi hayo.

Bw Noor alithibitisha kuwa serikali ya kitaifa itasaidia katika maandalizi ya mazishi ya mahujaji wote 17.

Viongozi wa Mombasa waliungana kuwafariji familia zilizopoteza wapendwa wao katika ajali hiyo.

Gavana wa Mombasa, Bw Abdulswamad Nassir, alifichua kuwa mwili mmoja pekee kati ya 17 ulikuwa bado haujatambuliwa kufikia Jumapili.

Bw Nassir alisema anashirikiana na gavana mwenzake wa Makueni, Bw Mutula Kilonzo, kuratibu uchunguzi wa miili yote.

Alihakikishia familia na kanisa kuwa serikali ya kaunti pia ingewasaidia katika mchakato huo.

“Msijali kuhusu chochote. Tutagharimia kila kitu. Mungu awapunguzie maumivu yenu,” alisema.

Spika wa Seneti, Bw Amason Kingi, alitaka uchunguzi wa kina ufanywe kuhusu ajali hiyo, akisema waliohusika kuisababisha wanapaswa kuwajibishwa kisheria.

Aliwataka maafisa katika mamlaka husika kubaini chanzo cha ajali hiyo na kuhakikisha familia zilizofiwa zinapata haki.