MAADHIMISHO ya mwaka mmoja tangu kifo cha aliyekuwa Waziri Mkuu Raila Odinga yamegeuka kuwa uwanja wa mapambano ya kisiasa huku wanasiasa wakitumia jina lake kujipigia debe kuelekea uchaguzi mkuu wa 2027.

Raila, aliyefariki Oktoba 15, 2025, alikuwa mmoja wa wanasiasa mashuhuri zaidi nchini na mwanzilishi wa chama cha ODM.

Chama hicho kimeandaa shughuli za kisiasa za mwezi mzima za kumuenzi, huku viongozi mbalimbali wakijitahidi kujitambulisha na itikadi na sifa zake.

Baadhi ya wanasiasa tayari wameanza kuchapisha na kusambaza bidhaa za kampeni zenye picha ya Raila pamoja na kauli-mbiu zao za 2027.

Shughuli hizo zinaonyesha jinsi kumbukumbu ya kiongozi huyo imekuwa muhimu katika vita vya kutafuta ufuasi baada ya kifo chake.

ODM inapanga kufanya mikutano Siaya, Kakamega, Garissa, Mombasa, Kajiado, Turkana na Nairobi.

Ingawa mikutano hiyo imepewa jina la kumuenzi Raila, inaonekana pia inalenga kuimarisha ngome ya chama na kuhamasisha wafuasi kabla ya uchaguzi wa 2027.

Chama hicho pia kinataka kutumia maadhimisho hayo kuonyesha mafanikio ya serikali ya muungano kati ya Rais William Ruto na ODM.

Rais Ruto, ambaye alishirikiana na Raila katika Serikali Jumuishi baada ya maandamano ya Gen-Z ya 2024, anatarajiwa kuhudhuria hafla kuu ya kumbukumbu mjini Bondo.

Hata hivyo, maadhimisho hayo yameibua pia vita vya urithi wa kisiasa wa Raila.

Nairobi, Mbunge wa Embakasi Mashariki Babu Owino aliendesha hafla tofauti ya kuwasha mishumaa katika uwanja wa Jacaranda huku ODM na washirika wa serikali wakiongoza hafla ya Uhuru Park.

Seneta wa Nairobi Edwin Sifuna, ambaye ameanzisha The Equitable Party, (TEP) pia alisema Oktoba ni mwezi muhimu kwa sababu Raila alifariki wakati huo.

Bw Sifuna na viongozi wengine wa Linda Mwananchi Movement wanajiandaa kushiriki katika kinyang’anyiro cha 2027.

Ndani ya familia ya Odinga, suala la mrithi wa kisiasa pia limejitokeza.

Binti yake, Winnie Odinga, alitambuliwa na baadhi ya wazee wa jamii ya Luo kama mrithi wa kisiasa wa baba yake. Mama yake Ida na dada yake Rosemary walihudhuria hafla hiyo, huku Raila Odinga Junior akikosekana.

Gavana wa Siaya James Orengo naye anatumia kipindi hiki kujipanga kwa uchaguzi wa 2027 na ametangaza nia ya kuwania urais.

Kwa hivyo, badala ya kuwa tukio la kumkumbuka tu Raila, maadhimisho yake yamekuwa jukwaa la kujipigia debe, kujenga ushawishi na kutafuta urithi wake wa kisiasa kuelekea uchaguzi wa Agosti 2027.