UNAPOKARIBIA lango la Shule ya Upili ya Wasichana ya Kakenya Girls Dream School, iliyoko Enoosaen, Kaunti ya Narok, unasikia midundo ya taarabu ikivuma.

Muziki huo wenye asili ya Pwani umegeuka kuwa nyenzo ya kipekee ya kufundishia Kiswahili na kubadili mtazamo wa wanafunzi kuhusu lugha hiyo.

Mwalimu Chimoli Bibiana ndiye aliyeanzisha mbinu hiyo, akitumia nyimbo, mashairi na maonyesho ya jukwaani kuwavutia wanafunzi.

Anasema alipowasili shuleni humo, Oktoba 2022, aligundua kuwa wengi hawakupenda Kiswahili kwa kuwa walikichukulia kuwa kigumu na lugha ya watu wa Pwani.

Wanafunzi wengi, ambao wanatoka katika jamii ya Wamaasai, walikuwa na dhana kwamba Kiswahili hakikuhusiana na utamaduni wao.

Hali hiyo ilimchochea Bibiana kubuni njia ya kuwafanya wajifunze lugha hiyo kwa furaha na kujiamini.

“Nilitafuta mbinu ya kuwavutia na kuwafanya waipende lugha hii. Ndipo nilipoamua kutumia taarabu, ambao umekuwa kivutio kwa wanafunzi na jamii inayozunguka shule,” anasema.

Kwa mujibu wake, mbinu hiyo imeboresha uwezo wa wanafunzi kuzungumza na kuandika Kiswahili, pamoja na matokeo yao katika somo hilo.

Pia imeimarisha uhusiano na ushirikiano wao. Tangu aanzishe mfumo huo, ameshuhudia mabadiliko makubwa katika kipindi cha miaka minne, huku wanafunzi wakizidi kutumia lugha hiyo kwa ufasaha.

Mbali na kufundisha lugha, Bibiana hutumia nyimbo na mashairi kuwapa wanafunzi mafunzo ya malezi, nidhamu na kufanya maamuzi yanayofaa.

Anasema jukumu la mwalimu halipaswi kuishia kutekeleza mtaala, bali linahusisha pia kuwashauri wanafunzi, kuwajengea kujiamini na kuwasaidia kutambua uwezo wao.

Anawahimiza walimu kutumia ubunifu, uvumilivu na kujitolea wanapokabili changamoto za ufundishaji. Pia anashauri shule kutenga nafasi na rasilimali za kukuza vipaji kupitia michezo na shughuli nyingine za ziada.

Anasema michezo huwafundisha wanafunzi nidhamu, kufikiri kimkakati na kushirikiana kama timu, stadi zinazowasaidia kukabiliana na changamoto hata nje ya shule.

Katika miaka minne aliyohudumu shuleni humo, anasema amewaongoza wasichana kwa karibu, akilenga kuwaona wakistawi na kuwa viongozi wa kesho.

Anasisitiza kuwa walimu wanapaswa kutambua vipaji vya wanafunzi na kuunda mazingira yanayowapa nafasi ya kuvikuzia, badala ya kuzingatia alama za mitihani.

Bibiana alianza masomo katika Shule ya Msingi ya Likhobero, eneo bunge la Ikolomani, Kaunti ya Kakamega, kisha akaendelea na Shule ya Upili ya St John Museno.

Mwaka 2019 alijiunga na Chuo Kikuu cha Kibabii, Bungoma, kusomea Shahada ya Sanaa katika Elimu, na kuhitimu 2022.

Oktoba mwaka huo, alipata kazi yake ya kwanza ya ualimu katika Kakenya Girls Dream School, ambako bado anafundisha Kiswahili.

Kupitia taarabu, anaendelea kuvunja dhana potovu na kuwajengea wasichana mapenzi kwa lugha hiyo.