Vuguvugu la Linda Mwananchi linaloongozwa na Seneta wa Nairobi Edwin Sifuna limepiga hatua baada ya wajumbe wa chama cha The Equitable Party (TEP) kuidhinisha kibadilishwe jina, rangi, nembo na makao makuu ya chama hicho.

Hata hivyo, maswali kuhusu uhalali wa mabadiliko hayo na uwezo wa chama kukamilisha taratibu za kisheria kabla ya uchaguzi wa 2027 bado yanazua wasiwasi.

Katika mkutano wa kitaifa wa wajumbe (NDC), uliofanyika bila wanahabari, wajumbe waliidhinisha pia marekebisho ya katiba na kanuni za uteuzi wa wagombeaji, pamoja na mazungumzo ya kuunda miungano na vyama vingine vyenye misimamo inayofanana.

Hata hivyo, mkutano huo haukufanya uchaguzi wa viongozi wapya, baada ya chama kuhakikishia Jopo la Kutatua Mizozo ya Vyama vya Kisiasa kuwa hakungekuwa na uchaguzi Novemba 13.

Ahadi hiyo ilitolewa kufuatia kesi iliyowasilishwa na mwanachama James Onyango Nyangor, aliyepinga kufanyika kwa uchaguzi wakati wa mkutano huo.

Jopo liliruhusu mkutano kuendelea baada ya kutupilia mbali ombi la kuusimamisha. Iliacha malalamishi kuhusu uteuzi wa wajumbe na mabadiliko ya chama yasikilizwe kikamilifu, huku ikihifadhi mamlaka ya kubatilisha maamuzi yatakayopatikana kuwa yalifanywa kinyume cha sheria.

Wanachama Paul Kiragu Gachoka na Pamela Achieng Simwata walikuwa wamepinga mkutano huo, wakisema chama hakukuwa na baraza halali la uchaguzi la kuchagua wajumbe. Pia walidai Baraza la Kitaifa la Uongozi halikuwa limeidhinisha ajenda na chama hakikuwa na bodi ya uchaguzi iliyoundwa ipasavyo.

Maswali mengine yanahusu kubadilishwa kwa ukumbi. Chama kilikuwa kimetangaza kuwa mkutano ungefanyika katika hoteli ya The Luke jijini Nairobi, lakini baadaye ukafanyika sehemu nyingine. Sheria ya Vyama vya Kisiasa inataka tarehe na mahali pa mkutano wa wajumbe vitangazwe.

Msajili wa Vyama vya Kisiasa John Cox Lorionokou amesema kuhifadhi jina la Linda Mwananchi Movement hakumaanishi kuwa chama hicho kimesajiliwa rasmi kwa jina hilo. Bado hakijapewa cheti cha usajili wa muda.

Alieleza kuwa mabadiliko ya jina yanahitaji maombi rasmi, stakabadhi zinazohitajika na ushirikishaji wa wanachama pamoja na wadau.

Baada ya kuhifadhi jina, chama hupitia usajili wa muda kabla ya kupata usajili kamili. Kipindi cha kukamilisha masharti ya usajili kamili ni siku 270 baada ya kupata cheti cha muda.

Lorionokou alisema ofisi yake itachunguza maazimio ya mkutano ili kubaini kama katiba ya chama ilifuatwa. Ikiwa hakutakuwa na pingamizi, itatoa cheti kipya baada ya taratibu kukamilika.

Changamoto nyingine ni muda. Tume Huru ya Uchaguzi na Mipaka (IEBC) ilisema vyama 105 vilikuwa vimewasilisha kanuni za uteuzi kufikia Novemba 6.

Hivyo, bado haijabainika iwapo Linda Mwananchi itachukuliwa kama chama kipya au chama kilichobadilisha jina, jambo linaloweza kuathiri ushiriki wake katika uchaguzi wa 2027.

Pia kuna swali kuhusu nani atakuwa na mamlaka ya kujadiliana na vyama vingine na kutia saini mikataba ya miungano, ikizingatiwa kuwa viongozi wapya hawakuidhinishwa na wajumbe.