Uchovu wa madereva, mwendo  wa kasi na matumizi ya vileo na dawa za kulevya vinahatarisha maisha ya watumiaji wa barabara kuu ya Mombasa-Malaba, ambako zaidi ya maeneo 200 yametambuliwa kuwa hatari kwa ajali.

Wadau wa sekta ya uchukuzi wanasema kuongezeka kwa malori yanayosafirisha bidhaa katika barabara hiyo, pamoja na msongamano na miundombinu duni, kunazidisha hatari ya ajali.

Wito huo umetolewa Kenya ikijiandaa kuadhimisha Siku ya Kimataifa ya Kuwakumbuka Waathiriwa wa Ajali za Barabarani kesho, Novemba 15, kwa kaulimbiu, “Wekeza katika Usalama, Sio Mwendo Kasi”.

Takwimu za Mamlaka ya Kitaifa ya Uchukuzi na Usalama Barabarani (NTSA) zinaonyesha watu 5,009 walifariki katika ajali mwaka 2025, ikilinganishwa na 4,748 mwaka 2024, ongezeko la asilimia 5.5.

Ajali zilizoripotiwa ziliongezeka kutoka 11,165 hadi 11,638, huku idadi ya waliojeruhiwa ikipanda kutoka 24,245 hadi 24,905.

Afisa wa Polisi anayesimamia Ukanda wa Kaskazini, Beatrice Kiraguri, alisema makosa ya madereva, uchovu na matumizi ya vileo ni miongoni mwa sababu kuu za ajali.

Akizungumza wakati wa kampeni ya siku tano iliyoanzia Mombasa na kuhitimishwa Malaba Ijumaa, aliwataka madereva wa malori, magari ya umma, waendesha bodaboda na watembea kwa miguu kuwajibika.

Kampeni hiyo inaongozwa na Mamlaka ya Uratibu wa Usafiri na Biashara ya Ukanda wa Kaskazini (NCTTCA), kwa ushirikiano na NTSA, KeNHA, polisi na Chama cha Wasafirishaji Kenya.

Katibu Mkuu wa NCTTCA John Deng alisema ajali husababisha vifo, uharibifu wa mizigo na miundombinu, uchafuzi wa mazingira na kukatiza biashara za kikanda.

Wasafirishaji pia wanataka barabara hiyo ipanuliwe kuwa ya njia mbili ili kupunguza msongamano na magari kugongana.

Wadau wanasema juhudi za usalama pia zinatatizwa na uhaba wa magari ya doria. Vitengo vya polisi vinavyohudumia ukanda huo vina magari matatu pekee, licha ya kuwa na vituo tisa vya polisi.

Maadhimisho makuu yatafanyika katika uwanja wa Jaramogi, Kisumu, huku maeneo mengine 12 yakiandaa hafla sawia.