Siasa

Achana na koti langu wewe, tuambie ajenda yako kwanza, Ruto ajibu Sifuna

Na VITALIS KIMUTAI November 16th, 2026 Kusoma ni dakika: 2

RAIS William Ruto Jumapili alimjibu Kiongozi wa Linda Mwananchi Edwin Sifuna, kuhusu madai kwamba mavazi aliyovalia kwenye harusi ya bintiye Charlene Chelangat Tanzania yaligharimu mamilioni ya pesa.

Kiongozi wa nchi alisema wakosoaji wake wanapaswa kuacha mambo madogo na kujadili sera na mipango ya maendeleo ya taifa.

Akizungumza katika ibada ya kanisa mjini Narok Jumapili, Rais Ruto alitetea mtindo wake wa mavazi akisema ni uamuzi wake binafsi na kwamba yeye humakinikia kila jambo analofanya, ikiwemo jinsi anavyovaa.

“Kwa nini wanalalamikia mavazi yangu? Hilo linawahusu nini?” akauliza Rais Ruto.

Alisema baadhi ya wakosoaji wake wamezidisha makadirio ya gharama ya mavazi aliyovaa kwenye harusi ya bintiye iliyofanyika Mwanza, Tanzania, Novemba 6.

Rais aliongeza kuwa watu wanaotaka kuleta mabadiliko duniani huanza kwa kujipanga katika mambo madogo ya kila siku.

“Watu wanaobadilisha dunia huanza kwa mambo madogo kama kutandika vitanda vyao asubuhi,” akaongeza.

Alitumia fursa hiyo kuwashambulia wapinzani wake kwa kuangazia mavazi badala ya kujadili masuala muhimu yanayokabili nchi.

“Kuna tofauti gani kati ya wanaolalamikia fulana na wewe unayetoa maoni kuhusu koti, saa na viatu? Tuachane na mambo madogo na tukabiliane kuhusu manifesto, sera na mipango ya kuisukuma nchi mbele,” akasema.

Seneta Sifuna alikuwa amedai kuwa baadhi ya mavazi ya Rais kwenye harusi hiyo yalikuwa na thamani ya Sh80 milioni. Alidai koti alilovaa liligharimu Sh20 milioni, saa Sh30 milioni na viatu Sh20 milioni.

“Ruto anapotembea, ni kama Hazina ya kutoa mikopo,” akasema Bw Sifuna.

Seneta huyo, ambaye ametangaza azma ya kuwania urais 2027, pia alijibu madai kwamba hupendelea kuvaa fulana badala ya mavazi rasmi.

“Wanasema napenda kuvaa fulana na kwamba hakuna mtu anayeweza kwenda Ikulu akiwa na fulana. Lakini vijana wamesema wakati huu watamchagua mtu aliyevaa fulana kuingia Ikulu,” akasema.

Harusi hiyo ilimwonyesha Rais akiwa amevaa koti jekundu lililochanganywa na rangi nyeusi, lililotengenezwa na kampuni ya mitindo ya Italia ya Stefano Ricci.

Alikamilisha mwonekano huo kwa kofia nyeusi, shati jeupe, tai, long’i nyeusi na viatu vyeusi, pamoja na fimbo ya kutembelea.

Hata hivyo, thamani halisi ya mavazi hayo na aina ya saa aliyovaa haijathibitishwa.

Mjadala huo umeibua upya maswali kuhusu mtindo wa maisha ya kifahari wa viongozi wa serikali, huku baadhi yao wakikabiliwa na ukosoaji kutokana na saa, magari na mavazi ya gharama wanayotumia.

Awali, Rais Ruto alikuwa amemkosoa Gavana wa Nairobi Johnson Sakaja kwa kuvaa mavazi yasiyo rasmi alipohudhuria hafla katika Ikulu, akisema wageni wanapaswa kuzingatia kanuni za mavazi kulingana na hafla wanazohudhuria.