Dimba

Kenya yalenga historia dhidi ya Afrika Kusini leo dimba la kufuzu AFCON 2027

Na CECIL ODONGO November 17th, 2026 Kusoma ni dakika: 2

TIMU ya taifa Harambee Stars itakuwa na nafasi nyingine ya kuandikisha historia itakapomenyana na Afrika Kusini katika mechi ya marudiano ya kufuzu kwa Kombe la Afrika (AFCON) 2027, uwanjani Nyayo, Nairobi, leo jioni.

Kenya itakuwa na hamu ya kupata ushindi wake wa kwanza dhidi ya Bafana Bafana katika muda wa kawaida wa mchezo baada ya timu hizo kutoka sare ya kusisimua ya 2-2 mechi ya kwanza iliyochezewa mjini Soweto, Ijumaa iliyopita.

Stars walionyesha ukakamavu mkubwa kwa kurejea mchezoni mara mbili licha ya kujifunga kupitia Amos Wanjala dakika ya tisa.

Nahodha Michael Olunga alisawazisha kupitia penalti dakika ya 44.

Relebohile Mofokeng alirejesha Afrika Kusini uongozini dakika ya 77.

Lakini Ryan Ogam, aliyeingia kipindi cha pili, alinyamazisha mashabiki wa Soweto kwa kusawazisha dakika ya 89.

Kenya, ambayo tayari imefuzu moja kwa moja kwa AFCON 2027 kama mmoja wa mataifa wenyeji, ilivuruga mipango ya Afrika Kusini ya kutwaa nafasi pekee ya kufuzu katika Kundi D.

Stars wamepata nguvu zaidi baada ya beki Zak Vyner, anayesekatia Wrexham nchini Uingereza, kujiunga na kikosi hicho jijini Nairobi.

Mchezaji huyo mwenye umri wa miaka 29 anatarajiwa kucheza mechi yake ya kwanza ya kimataifa akiwa na Stars.

Vyner, ambaye anaweza kucheza kama difenda au kiungo mkabaji, anatarajiwa kuimarisha safu ya ulinzi ya Kenya katika mechi hiyo muhimu.

Kwa upande mwingine, kocha wa Afrika Kusini Pitson Mosimane atategemea ubunifu wa Oswin Appollis, Mofokeng na kiungo Teboho Mokoena kuongoza mchezo.

Mshambulizi Lyle Foster anawania nafasi ya kuanza kikosi cha kwanza akicheza pamoja na Iqraam Rayners baada ya kuingia kama mchezaji wa akiba katika mechi ya kwanza na kusaidia bao la Mofokeng.

Nahodha Ronwen Williams ataendelea kulinda lango la Bafana Bafana.

Katika mechi tano zilizopita kati ya timu hizi, Kenya haijawahi kuishinda Afrika Kusini ndani ya dakika 90, ikipata sare mbili na kupoteza tatu.

Afrika Kusini inahitaji ushindi ili kuimarisha nafasi yake ya kufuzu, lakini haitakuwa rahisi dhidi ya Stars ambao watakuwa wakicheza mbele ya mashabiki wao na italenga kuwaburudisha pia.

Kama ilivyokuwa katika mechi ya kwanza, mashabiki wanatarajia mabao mengi katika pambano hili la Nyayo.