Na LAWRENCE ONGARO

VIJANA mjini Thika watanufaika na mpango wa serikali wa kuwaajiri kazi mitaani ili wajikimu kimaisha.

Mbunge wa Thika Bw Patrick ‘Jungle’ Wainaina alithibitisha Ijumaa kuwa vijana wapatao 1,500 kutoka mji wa Thika na vitongoji vyake wataajiriwa.

“Tunapongeza Rais Uhuru Kenyatta kwa kutoa amri ya kuajiriwa kwa vijana hao ambao watajipatia riziki yao hasa wakati kama huu tunapopitia hali ngumu ya homa ya corona,” alisema Bw Wainaina.

Alisema vijana hao watatambuliwa kutoka mitaa duni kama Kiandutu, Kiang’ombe, na mitaa mingine katika eneo la Thika.

Baadhi ya kazi watakazotekeleza ni kuzibua mitaro ya maji, kufyeka mitaani na kazi zingine muhimu watakazopewa.

Alisema hiyo itakuwa njia moja ya kuokoa vijana wengi wanaoendelea kuathirika kutokana na janga hilo la corona.

Aliyasema hayo mjini Thika ambapo alibainisha vijana hao watakuwa wakipokea Sh600 kila mmoja kila siku jioni baada ya kufanya kazi mchana.

Alipongeza juhudi za kampuni ya Broadway Group of Companies (Bakex Ltd), kwa kuchanga takribani Sh12.5 milioni na unga beli 10,000 ili kusaidia kaunti kadha hapa nchini.

“Juhudi iliyofanywa na kampuni hiyo ni muhimu na wahisani wengine wanastahili kufuata pia mwito huo,” alisema Bw Wainaina.

Alisema mwezi mmoja uliopita wakfu wa ‘Jungle’ Foundation ulifanya juhudi na kuchangisha Sh5 milioni za kuingia kwa hazina ya Covid-19.

Wakati huo pia alisambaza zaidi ya mitungi 200 ya kutumika kunawa na sanitaiza ili kupambana na corona.

Kuna gari la Ambulansi la ‘Jungle’ Foundation linalozunguka kila mtaa kutafuta wagonjwa wa corona.

Alitoa mwito kwa serikali kutoa maafisa wa KDF ili kuokoa watu wanne waliosombwa na maji ya mto Athi eneo la Ngoliba, Thika Mashariki mnamo Alhamisi.

“Kuna watu sita waliojaribu kuvuka mto Athi, lakini kutokana na maji hayo kwenda kasi watu wanne waliangamia huku wawili wakinusurika,” alisema Bw Wainaina.

Aliwahimiza wakazi wa Thika na maeneo mengine wafuate mwito wa serikali kudumisha usafi kila mara kwa kunawa mikono, kuvalia barakoa, na kujitenga na mtu kukaa umbali wa mita moja au zaidi baina yake na mwenzake.

“Iwapo kila mmoja atafuata maagizo hayo bila shaka janga hili tutalizuia kwa kiwango kikubwa na kwa hivyo tuweze kuwa wangwana na tujikinge na janga hilo,” alifafanua mbunge huyo.