Na CHRIS ADUNGO

MSHAMBULIAJI Andy Carroll, 31, na beki Javier Manquillo, 26, wamesajili kandarasi mpya na Newcastle United.

Carroll alirejea Newcastle kutoka West Ham mwishoni mwa msimu jana na amerefusha mkataba wake kambini mwa Newcastle kwa mwaka mmoja zaidi.

Kwa upande wake, Manquillo ambaye ni mzawa wa Uhispania, alijiunga na Magpies kutoka Atletico Madrid mnamo 2017. Amerefusha muda wake kambini mwa Newcastle kwa miaka minne zaidi.

Kiungo Matty Longstaff pia amekubali kandarasi ya muda mfupi hadi mwishoni mwa msimu huu kwa pamoja na Nabil Bentaleb na Danny Rose ambao wamerefusha mikataba yao ya mkopo kwa msimu mmoja zaidi.

Longstaff, 20, alipokezwa mkataba mpya baada ya kuanza kuhusishwa na uwezekano wa kutua kambini mwa Udinese inayoshiriki Ligi Kuu ya Italia (Serie A).

Kwingineko, Valentino Lazaro ambaye ni mzawa wa Austria, ameafikiana na usimamizi wa Newcastle kuondoka uwanjani St James’ Park na kuingia katika sajili rasmi ya Inter Milan, Italia.

Kati ya wanasoka wengine ambao wataondoka Newcastle baada ya mikataba yao kukamilika mwishoni mwa Juni ni Rob Elliot, Jack Colback na Jamie Sterry.