Raila ataja sera atakayofuata akiibuka mshindi mwaka 2022

Na JUSTUS OCHIENG

KIONGOZI wa ODM, Bw Raila Odinga amependekeza kuwa wafanyakazi wazembe wa umma hawafai kupandishwa vyeo, kuongezwa ujira kwani ni mzigo kwa serikali.

Katika kile kilichoonekana kama ruwaza yake kuhusu utumishi wa umma unaohitajika nchini, Bw Odinga pia alipendekeza kuwa wafanya wasiojitolea kazini wanafaa kufutwa badala ya kuendelea kulipwa mishahara.

Hii ni sehemu ya msururu wa mwongozo ambao anatarajia kutekeleza nchini endapo atachaguliwa kuwa Rais katika uchaguzi mkuu ujao.

“Taifa hili linapaswa kuwa na mfumo maalum wa kuhakikisha kuwa wafanyakazi wa umma wanalipwa mishahara na marupurupu kulingana na utendakazi wao ili sekta hiyo ivutie wafanyakazi wengi wenye ujuzi mkubwa,” Bw Odinga akasema kwenye taarifa.

Akaongeza: “Hii ndiyo njia ya kipekee ya kuhakikisha wanauma na wanawake wenye ujuzi mkubwa wanajiunga na utumishi wa umma. Baada ya hapo, tunaweza kufanya ukadiriaji wa utendakazi wa sekta ya umma kwa kuwahakikisha wafanyakazi wote wanatia saini mkataba wa utendakazi.”

Wafanyakazi walioangukia ‘manna’ waamrishwa wairejeshe

Na GEORGE ODIWUOR

WAFANYAKAZI 3,000 wa Kaunti ya Homa Bay walipigwa na butwaa baada ya kulipwa mshahara wa Sh0 huku wenzao wakipata ‘nyongeza’ ya asilimia 200 ya mishahara yao.

Wafanyakazi ambao huwa wakilipwa Sh30,000, kwa mfano, walipata mshahara wa Sh150,000. Serikali ya Kaunti sasa imewataka wafanyakazi waliolipwa ‘mshahara mnono’ warejeshe sehemu ya fedha hizo huku ikisema kuwa palikuwa na hitilafu katika mfumo wa malipo ya mishahara ya Juni.

Mkurugenzi wa Usimamizi wa Wafanyakazi, Omondi Auma alisema kuwa hitilafu hiyo ilitokea katika benki mbili.

Bw Auma amewatumia barua wafanyakazi wote akiwataka waliopata fedha zaidi katika mishahara yao kuzirejesha mara moja.

Alisema kuwa wafanyakazi watakaokataa kurejesha fedha hizo wataandikiwa deni na kukatwa mishahara yote kuanzia mwezi ujao hadi wamalize kulipa.

“Lengo la barua hii ni kuwasihi waliopokea mishahara mikubwa kuliko kawaida, kuzirejesha pesa za ziada katika akaunti ya benki ya serikali ya Kaunti ya Homa Bay na kisha wapeleke risiti kwa meneja wa mishahara. Watakaokataa kuzirejesha wataandikiwa deni na kuanzia mwezi huu watakatwa mishahara yao yote hadi pale watakapomaliza kulipa,” akasema.

Baadhi ya wafanyakazi waliambulia patupu kwani walipokea mishahara sufuri huku wengine wakipata nusu.

Serikali ya kaunti hiyo imewataka wafanyakazi ambao hawakupata mshahara na wale waliopata fedha ndogo kuwa wavumilivu kwani watapokea mishahara ya miezi miwili Agosti.

Serikali ya Kaunti pia ililazimika kuwaomba msamaha wafanyakazi walioambulia patupu.

Mwenyekiti wa Chama cha Wafanyakazi wa Serikali tawi la Homa Bay, Tom Akech alisema kuwa wafanyakazi 3,000 walilipwa Sh0 na hao ndio walioanza kulalamika baada ya kuona wenzao wakisherehekea.

“Nilipokea malalamishi kwamba mishahara ya Juni ilicheleweshwa. Baadaye ilibainika kuwa waliokuwa wanalalamika hawakupata mshahara na wenzao walikuwa wamelipwa fedha nyingi kuliko kawaida,” akasema Bw Akech.

Alisema hitilafu hiyo imesababisha wasiwasi miongoni mwa wafanyakazi waliokosa mishahara yao.

“Mishahara ya wafanyakazi wa serikali ya Kaunti ya Homa Bay imekuwa ikicheleweshwa mara kwa mara na sasa mitambo ina hitilafu,” akasema.

Wafanyakazi wamepanga maandamano wiki hii hadi kwa afisi ya Gavana Cyprian Awiti kuwasilisha malalamishi yao.

Bw Akech alisema kuwa wafanyakazi wa kaunti wamechoshwa na kucheleweshwa kwa mishahara yao kila mwezi.

Sancho sasa atambulishwa kwa mashabiki

Na MASHIRIKA

FOWADI Jadon Sancho amesema kujiunga kwake na Manchester United “ni kujibiwa kwa ndoto yake kitaaluma”.

Nyota huyo raia wa Uingereza amerasimisha uhamisho wake kutoka Borussia Dortmund hadi Manchester United kwa kima cha Sh11.3 bilioni.

Anakuwa mchezaji wa pili ghali zaidi kutoka Uingereza ambaye amewahi kusajiliwa na Man-United baada ya beki na nahodha Harry Maguire aliyetokea Leicester City mwishoni mwa 2018-19.

Sancho pia ndiye mchezaji wa pili ghali zaidi kuwahi kutua Old Trafford baada ya kiungo Paul Pogba kusajiliwa na Man-United kwa kima cha Sh12.4 bilioni kutoka Juventus mnamo 2016.

Chini ya kocha Ole Gunnar Solskjaer ambaye ni raia wa Norway, Man-United waliweka mezani kima cha Sh11.2 bilioni ili kumshawishi Maguire kuagana na Leicester.

Licha ya kufuzu kwa kipute cha Klabu Bingwa Ulaya (UEFA) mnamo 2021-22, Dortmund walikuwa na ulazima wa kuagana na baadhi ya wanasoka wao wa haiba kubwa msimu huu ili kupunguza gharama ya matumizi kutokana na athari za janga la corona.

Ili kuzamisha maazimio ya Man-City na Chelsea kuendelea kumfukuzia Haaland, Dortmund wamefichua kwamba bei mpya ya fowadi huyo wa zamani wa RB Salzburg nchini Austria ni Sh19.6 bilioni. Man-City waliokuwa waajiri wa zamani wa Sancho sasa watatia kapuni bonasi ya Sh1.5 bilioni baada ya Sancho kufanikisha uhamisho wake hadi Man-United.

Sancho alianza kusakata soka ya kulipwa ugani Etihad na alikataa ofa mpya ya Sh4.2 milioni kwa wiki na kuhiari kuyoyomea Ujerumani akiwa na umri wa miaka 17. Hofu yake ilikuwa ni kukosa uhakika wa kuunga kikosi cha kwanza cha Man-City chini ya kocha Pep Guardiola aliyekuwa ametokea Bayern Munich wakati huo.

Kufikia sasa, Sancho amfungia Dortmund mabao 50 kutokana na jumla ya mechi 137. Anajivunia kufungia timu ya taifa ya Uingereza jumla ya mabao matatu kutokana na mechi 18.

Nyota huyo aliyezaliwa katika eneo la Camberwell, Kusini mwa jiji la London, alijiunga na akademia ya Watford akiwa na umri wa miaka saba kabla ya Man-City kumsajili kwa Sh9.2 milioni pekee akiwa na umri wa miaka 14. Uhamisho wake hadi Dortmund ulishuhudia Watford wakipokezwa na Man-City kima cha Sh70 milioni zaidi.

TAFSIRI NA: CHRIS ADUNGO

Kocha wa ndondi adai Okoth alishinda

NA CHARLES ONGADI

KOCHA mkuu wa timu ya taifa ya ndondi Musa Benjamin anaamini nahodha Nick  ‘Commander’ Okoth alishinda pigano lake dhidi ya Erdenebat Tsendbaatar wa Mongoli.

Akizungumza na wanahabari baada ya uamuzi wa majaji uliompatia Tsendbaatar ushindi wa alama 3-2. Kocha Benjamin amesema uamuzi duni uliponza juhudi za Okoth kusonga mbele katika mashindano haya ya Olimpiki yanayoandaliwa katika ukumbi wa Kokugikan Arena, Tokyo nchini Japan.

“ Okoth alirusha ngumi zake vizuri na akapambana vyema akipiga more point punches ila uamuzi wa majaji ukawa ndivyo sivyo, “ akasema kocha Benjamin kwa masikitiko.

Katika pigano hili, Okoth na Tsendbaatar walionekana kuwa nguvu sawa katika raundi ya kwanza la pigano hili ila katika raundi ya Mmongolia akaonekana kulemewa na kulazimika kumshika kila mara Okoth.

Kocha Benjamin amesema kunahitajika kuwa na semina kwa majaji kuhusu namna ya kutoa alama kwa sababu washiriki wanatoka katika mataifa mbali mbali yaliyo na mitindo yao ya kutoa alama.

Hata hivyo, kocha Benjamin amesema wala hawanuii kukata rufaa kuhusu matokeo haya hasa wakizingatia sheria na masharti ya kamati ya kimataifa Olimpiki (IOC) kuhusu mashindano haya.

Aidha, kulingana na Okoth alifahamu barabara kuibuka na ushindi katika pigano hili hasa baada ya kumiliki vilivyo raundi ya pili na tatu ya pigano hili.

“ Mara baada ya kengele ya tamati nilifahamu nimeshinda pigano hili ila matokeo kutangazwa kinyume na matarajio yangu,” akasema Okoth kwa masikitiko.

Licha ya matokeo hayo, Okoth anasema anaamini ndiye mshindi wa pigano hili ambalo ndilo lake la mwisho katika michezo ya Olimpiki.

Okoth hata hivyo amewashauri wenzake wawili waliosalia kinyang’anyironi kupambana hadi mwisho baada ya kushuhudi maamuzi y a majaji.

Aliyekuwa bingwa wa taifa Keneth ‘ Valdez ‘ Okoth amempngeza OKoth kwa kupigana kijasiri katika pigano hili .

Mshidni wa medali ya shaba katika Michezo ya Olimpiki ya Los Angeles, Marekani mwaka wa 1984, Ibrahim ‘ Surf ‘ Bilali amepinga matokeo ya majaji hao akisema yalitolewa kwa mapendeleo makubwa.

Bilali: “ Okoth alishinda katika raundi ya pili na ya tatu lakini nashangazwa na uamuzi wa majaji watano waliosimamia pigano hili.”

Bondia mwingine kutoka nchini Christine Ongare amesalimu amri dhidi ya Manglo Irish wa Ufilipino kwa alama 5-0 katika pigano lililochezwa leo alfajiri .

Matokeo haya yanaiwacha Kenya na mabondia wawili pekee Elizabeth ‘ Black Current ‘ Ongare (welter) na Elly Ajowi (heavy) katika Mashindano haya ya Olimpiki .

Mabondia hawa wanatarajiwa kuingia ulingoni siku ya jumanne kupeperusha bendera ya taifa katika mashindano haya.

Ongare aangushwa kwenye pigano Olimpiki

NA CHARLES ONGADI

MATUMAINI ya bondia Christine Ongare kunyanyua medali katika Michezo ya Olimpiki Tokyo Japan yaliyeyuka kama moshi baada ya kupoteza pigano lake .

Ongare alishindwa na Magno Irish kutoka Ufilipino kwa alama 5-0 katika mrindimano ulioandaliwa katika ukumbi wa Kokugikan Arena .

Majaji wote watano, Mokretarl Sidali kutoka Algeria, Muhiddinov Mansur (Tjk), Anco Bobadilla Miguel (Peru), Campbell Beau (Marekani) na Rahen Carl (Australia) walimpatia ushindi Irish katika raundi zote tatu.

Katika pigano hili, Ongare alionekana kuzidiwa maarifa na Magno aliyeonekana kumakinika na kutatiza juhudi zake .

Ongare alifuzu kuwakilisha taifa katika Michezo ya Olimpiki katika mashindano ya kufuzu ya bara la Afrika yaliyoandaliwa Dakar nchini Senegal Februari mwaka jana (2020).

Matokeo haya yamezima kabisa ndoto ya Ongare kuwa mwanamke wa kwanza nchini kushinda medali katika Michezo ya Olimpiki.

Kushindwa kwa Ongare ni pigo zaidi kwa kikosi cha taifa ‘ Hit Squad’ baada ya nahodha wake Nick ‘ Commander ‘ Okoth kupoteza pigano lake mikononi mwa Erdenebat Tsendbaatar wa Mongolia.

Matokeo haya yamewacha taifa na mabondia wawili Elizabeth ‘ Black Current ‘ Akinyi katika uzito wa welter na Elly Ajowi katika heavy.

Akinyi antarajiwa kupanda ulingoni siku ya jumanne katika jaribio lake la kulipiza kisasi dhidi ya Panguana Alcinda Helena wa Msumbiji.

Panguani amewahi kumshinda Akinyi katika mashindano ya Africa Zone 3 Championship yaliyoandaliwa DRC .

Hata hivyo, Akinyi amejiandaa barabara kumkabili Panguana katika pigano analoamini atalipiza kisasi baada ya kurekebisha makosa yaliyojiri katika pigano lao la kwanza nchini DRC.

Kwa upande wake Ajowi amesema yuko tayari kukabilinana na Cruiz Julio wa Cuba licha ya kuwa bingwa mara nne wa Mashindano ya dunia na pia ya Olimpiki katika uzito wa light heavy.

Hafnaoui ashindia Tunisia dhahabu ya uogeleaji kwenye Olimpiki

Na MASHIRIKA

MWOGELEAJI Ahmed Hafnaoui wa Tunisia aliduwaza wapinzani wake kwa kushinda nishani ya dhahabu ya 400m freestyle kwenye Olimpiki katika ukumbi wa Aquatics Centre, Japan mnamo Jumapili.

Mpiga mbizi huyo mwenye umri wa miaka 18 aliibuka mshindi licha ya kusajili muda wa chini zaidi kwenye hatua ya mchujo. Alimpiku nambari mbili Jack McLoughlin wa Australia kwa kuandikisha muda wa dakika 3:43.36. Kieran Smith wa Amerika aliridhika na nishani ya shaba.

“Siamini kabisa. Hii ni kama ndoto iliyojibiwa. Ni fahari na tija tele kuibuka mshindi. Haya ni mashindano bora zaidi ambayo nimewahi kushiriki,” akasema Hafnaoui.

Ushindi huo ulizolea Tunisia medali ya tano ya dhahabu kwenye Olimpiki na ya tatu kutokana na mashindano ya uogeleaji.

Hafnaoui ni mwana wa mwanavikapu wa zamani wa timu ya taifa ya Tunisia, Mohamed Hafnaoui. Aliwahi kushiriki Olimpiki za Chipukizi mnamo 2018 na akaambulia nafasi ya nane kwenye 400m freestyle na nambari saba kwenye 800m freestyle.

Mnamo 2019, aliambia gazeti la La Presse nchini Tunisia kwamba maazimio yake ni kuzoa nishani ya dhahabu kwenye Olimpiki za 2024 jijini Paris, Ufaransa.

Hafnaoui ataanza kuwania medali yake ya pili ya dhahabu kwenye Olimpiki za Tokyo kwa kushiriki mchujo wa 800m freestyle mnamo Julai 26.

Yui Ohashi, 25, wa Japan naye alishinda dhahabu kwenye 400m medley baada ya kuwapiku Waamerika wawili –Emma Weyant (4:32.76) na Hali Flickinger (4:34.90).

TAFSIRI NA: CHRIS ADUNGO

KDF yaungana na GSU, Kenya Prisons na KPA fainali za voliboli

Na AGNES MAKHANDIA

WANAJESHI wa KDF wamejikatia tiketi ya kushiriki mechi za muondoano za timu nne-bora za Ligi Kuu ya voliboli ya wanaume baada ya kushinda mechi zake mbili za mwisho za msimu wa kawaida ugani Nyayo, Jumapili.

KDF walipepeta Nairobi Prisons kwa seti 3-0 za alama 25-18, 25-17, 25-18 kabla ya kukamilisha msimu wa kawaida kwa kuzaba Polisi wa Utawala 3-0 (25-18, 25-21, 27-25).

Wanajeshi hao, ambao wanatiwa makali na Elisha Aliwa, sasa wanajiunga na mabingwa watetezi GSU pamoja na washindi wa zamani Kenya Prisons na timu ya Halmashauri za Bandari Kenya (KPA) waliofuzu mapema.

Katika mahojiano, Aliwa alikiri kuwa walijinyanyua msimu ukielekea kutamatika, lakini amefurahia kunyakua tiketi ya mwisho.

“Presha ilikuwepo. Tulifahamu fika kuwa timu ya Shirika la Huduma ya Misitu (KFS) na wanabenki wa Equity pia wanawinda tiketi hiyo moja iliyokuwa imesalia. Nafurahia kuwa tumepata tiketi siku ya mwisho, ingawa kazi ya kutafuta mafanikio zaidi ndiyo inaanza,” alisema Aliwa.

“Baada ya kutazama michuano ya wikendi, hasa ile iliyokutanisha GSU na KPA, nimepata picha kuwa mechi za muondoano hazitakuwa rahisi. Tutahitaji kuwa imara zaidi ili kupigania taji,” alisema.

Mchuano kati ya GSU na KPA ulishuhudia GSU ikitoka chini seti moja na kushinda 3-1 (25-15, 26-28, 20-25, 13-25) na kukamilisha msimu bila kushindwa.

Nahodha wa GSU, Shadrack Misiko alisema kuwa wanafurahia sana kumaliza msimu wa kawaida bila kupoteza mechi.

“Lengo letu sasa ni kutetea taji letu. Mashindano yatakuwa makali, lakini naamini kuwa tuna uwezo,” alisema mzuiaji huyo wa kati.

Mshambuliaji Abiud Chirchir alisaidia GSU kujinyanyua katika mchuano huo baada ya kuanza kutumiwa mwisho wa seti ya kwanza.

Chirchir alijaza nafasi ya Kelvin Omuse ambaye alijiunga na GSU kutoka Equity mwaka 2020.

Makombora ya kuanzisha mechi yalisaidia KPA kung’ara katika seti ya kwanza.

Hata hivyo, GSU iliimarisha mashambulizi na pia uzuiaji wake wa makombora ya karibu na wavu ikitawala seti tatu zilizofuata.

Equity pia ilitoka chini seti moja ikichabanga KFS 3-1 (24-26, 25-19, 25-23, 25-19).

Mshindi wa ligi pamoja na nambari mbili watafuzu kushiriki makala yajayo ya mashindano ya klabu za Afrika.

TAFSIRI: GEOFFREY ANENE

DINI: Unayojiambia yatakuinua au kukufifisha, tafakari kwanza kuhusu unayoyatamka!

NA PADRE FAUSTIN KAMUGISHA

MSOMI mmoja aliwahi kusema hivi: “Unayojiambia kila siku yatakuinua au yatakudidimiza. Uwe mwema kwa nafsi yako kwa kuwa unalojiambia linasikika mbinguni. Unalojiambia Mungu analisikia. Unalojiambia linakurudia. Maisha ni mwangwi. Unalojiambia ni mtazamo chanya au mtazamo hasi.”

“Usisahau kujiambia mambo chanya kila siku! Lazima ujipende kwa ndani ili ukue kwa nje, ” alisema Hannah Bronfman.

Katika Biblia, kuna mwanamke aliyekuwa anafuja damu kwa muda wa miaka kumi na miwili, aliamua kumwendea Yesu ili amponye, “Alijiambia, nikigusa pindo la vazi lake nitapona” (Mk 5:28).

Alijiambia maneno ya matumaini, maneno ya mtazamo chanya, maneno ya kujipenda, maneno ya imani, maneno yatiayo mwanga. Yesu alimwambia, “imani yako imekuponya.”

Alimponya. Swali ni, wewe unajiambia nini?Kwanza, jiambie inawezekana. Mwanamke aliyekuwa anatokwa damu kwa muda wa miaka kumi na miwili alifikiria kiuwezekano. Chunga namna yako ya kufikiri.

“Kwa maana alijiambia, ‘Nikigusa mavazi yake tu, nitapona” (Marko 5: 28). Mwanamke huyu kabla ya kuligusa vazi la Yesu aliligusa kimawazo. “Sio pindo la vazi, bali namna yake ya kufikiri iliyomfanya apone,” alisema Mt. Yohane Krisostomu.

Kuna mainjinia waliopewa mtihani wa kufungua mlango bila ufunguo. Walikuwa watatu. Wawili walianza kukokotoa mahesabu.

Mmoja baada ya kupumzika na kutulia dakika tano, alienda na kufungua mlango. Ulikuwa haujafungwa. Alifikiria kiuwezekano.

Tunasoma katika kitabu cha Ufunuo 3:8, “Nayajua matendo yako. Tazama nimekupa mlango uliofunguliwa mbele yako ambao hapana awezaye kuufunga. Kwa kuwa unazo nguvu kidogo, nawe umelitunza neno langu wala hukuzika jina langu.”

Katika maisha, kuna milango ya kazi imefunguliwa, ingia. Kuna mlango wa uchumba umefunguliwa ingia.

“Anayetegemea mazuri yatokee anabadili lisilowezekana liwe liwezekanalo; anayetegemea mabaya yatokee anabadili linalowezekana liwe lisilowezekana,” alisema William Arthur Ward.

Mwanamke tunayemuongelea alikuwa na ugonjwa ambao ulikuwa wa kawaida kwa wayahudi. Tiba yake ilikuwa si rahisi.

Lakini palikuwepo na tiba za kishirikina ambazo zilikuwa ni danganya toto: kubeba majivu kwenye yai la mbuni kwenye nguo ya kitani wakati wa kiangazi na kwenye nguo ya pamba wakati wa kipindi cha baridi; kubeba punje ya shayiri ambayo imekutwa kwenye samadi ya punda mweupe.

Matabibu wengine walitumia toniki na kunyasi (kitu kinachosababisha tishu laini kujikunyata na kubana mishipa ya damu).

Mali yake yote ilimpotea. Kuna methali isemayo: Familia inayoenda kwa mganga wa kienyeji kupiga ramli unenepesha watoto wa mganga. Bila shaka mwanamke huyu alilinenepesha watoto wa waganga wa kienyeji.Pili, unapopatwa na tatizo, jiambie ni baraka katika sura ya balaa.

Mwanamke kutoka damu miaka kumi na miwili kulimkutanisha na Yesu. “Tuinuke na tuwe watu wa shukrani, kama hatukujifunza kitu leo, walau tumejifunza kitu kidogo, na kama hatukujifunza kitu kidogo, walau hatukuugua na kama tumekuwa wagonjwa walau hatukufa,” alisema Gautama Buddha (563 K.K – 483 K.K) mwanzilishi wa dini ya Buddha.

Katika balaa, tutafute jambo la kuleta furaha. Kidole kikiumia mshukuru Mungu kwa kukupa vidole, mkono bila vidole ungekuwa kama kijiko.

Kuna filamu ya Disney iliyoitwa Pollyanna iliyotoka 1960 ina The Glad Game (Mchezo wa furaha). Somo tunalolipata ni kuwa, katika shida, tafuta jambo la kuleta furaha. Katika hasi tafuta chanya.

Katika magumu tafuta jambo la kuleta furaha. Katika Chuo Kikuu kiitwacho Cornerstone University, anafunzi walicheza mchezo huitwao Mchezo wa Shukrani. Unataja ndani ya sekunde tatu jambo ambalo unashukuru bila kurudia alilolitaja mwanafunzi mwenzako.

Badala yake walilalamikia kipindi kigumu cha mitihani, ukosefu wa ada na matumizi, utafiti, tarehe za kuwasilisha kazi kutaja machache.

Mabilioni ya miradi ya serikali ndiyo ‘hutafunwa’ zaidi – Ripoti

Na PETER MBURU

MIRADI inayofadhiliwa na fedha za walipa ushuru ndiyo inayotafunwa zaidi na maafisa fisadi serikalini, ripoti ya Mkaguzi Mkuu wa Hesabu za Serikali imefichua.

Hili ni kinyume na miradi inayoendeshwa na wafadhili, kwani fedha zinazotumika huwa zinasimamiwa kwa njia nzuri.

Usimamizi mzuri wa miradi hiyo huwa unazima nafasi ya fedha hizo kuporwa. Hilo pia limeifanya miradi hiyo kuibuka bora kinyume na ile inayofadhiliwa na serikali.

Ripoti hiyo inaitaja miradi inayofadhiliwa na wahisani kuwa miongoni mwa ile inayofanya vizuri zaidi nchini.Kwenye tathmini iliyoendeshwa katika Mwaka wa Kifedha wa Serikali wa 2019/20, Mkaguzi Mkuu wa Hesabu za Serikali, Bi Nancy Gathungu, alisema hakukuwa na matatizo ya kifedha katika miradi hiyo.

Katika Wizara ya Afya, wakaguzi wa matumizi ya fedha walibaini tofauti kubwa za kifedha kwenye stakabadhi zilizowasilishwa kwao na idara mbalimbali.

Wataalamu wa masuala ya kiuchumi nchini wanasema kuwa hali hiyo inaonyesha mianya na mapungufu yaliyopo serikalini, ambako fedha zilizotengwa huporwa ama hutumiwa vibaya kutokana na ukosefu wa taratibu zifaazo katika kufuatilia matumizi yake.

“Kanuni kali ambazo huwepo katika usimamizi wa miradi inayoendeshwa na wafadhili huwanyima nafasi maafisa fisadi kupora fedha hizo.

“Sababu kuu ni kuwa wanajua wataitwa kueleza walivyozitumia. “Hata hivyo, hali ni kinyume kwa miradi ya serikali, ambapo kuna mianya mingi ambayo hutumiwa na maafisa waporaji kufuja fedha za umma,” akasema Bw Noah Wamalwa kutoka Taasisi ya Masuala ya Kiuchumi (IEA).

Hali imekuwa kama hivyo katika miaka ya awali, ambapo miradi iliyofadhiliwa na wahisani huwa inafanya vizuri katika ubora wake na matumizi ya fedha.

Kwenye ripoti ya kukagua matumizi ya fedha za serikali ya 2018/19, zaidi ya nusu ya miradi 188 inayoendeshwa na wahisani iliorodheshwa kusimamiwa kwa njia nzuri.

Miradi hiyo ilipata alama za juu sana kuhusu usimamizi wake.Kati ya miradi 10 bora nchini, saba imekuwa ile inayoendeshwa na wafadhili.

“Ripoti hizo ni muhimu sana ili kuhakikisha tunaendelea kupata ufadhili kutoka kwa wahisani. Hilo ndilo suala kuu ambalo wafadhili wengi wamekuwa wakizingatia,” ikasema taasisi hiyo.

Masaibu yalivyomwandama Jaji Muchelule kwa miaka 14

Na RICHARD MUNGUTI

JAJI wa Mahakama Kuu, Aggrey Muchelule amekuwa akikumbwa na masaibu tele kwa zaidi ya miaka 14 iliyopita.Jaji Muchelule amekuwa akikumbana na vizingiti chungu nzima kutoka kwa serikali.

Mbali na kutoapishwa mwezi uliopita kuwa Jaji katika Mahakama ya Rufaa, sasa Jaji Muchelule amejikuta katika dhiki ya kuchunguzwa na maafisa wa Idara ya Uchunguzi wa Uhalifu (DCI) kwa madai ya kushiriki ufisadi.

Alhamisi, maafisa wa polisi kutoka kitengo cha DCI walimvamia jaji huyo katika afisi yake kisha wakamtia nguvuni ili kumhoji.

Masaibu ya Jaji Muchelule yalianza mnamo 2006 wakati Rais Mstaafu Mwai Kibaki alipokataa kumteua pamoja na majaji wengine wawili. Hii sasa ni mara ya pili tangu 2006 mwanasheria huyo kujikuta katika hali ya sintofahamu.

Jaji Muchelule pamoja na majaji wengine 40 waliteuliwa na Tume ya Huduma za Mahakama (JSC) kujiunga na Mahakama ya Rufaa.

Lakini Rais Kenyatta alikataa jina lake pamoja na majaji wengine watano akidai palikuwa na madai ya ufisadi.Mnamo Desemba 2006, Jaji Muchelule alikuwa anahudumu kama hakimu mkuu katika mahakama ya Nairobi alipoteuliwa kuwa Jaji wa Mahakama Kuu.

Pamoja na aliyekuwa hakimu mkuu katika mahakama ya Eldoret wakati huo Bi Florence Muchemi, waliteuliwa kuwa majaji katika mahakama kuu.

Wakati huo huo, vilevile, tume ya JSC ilimteua Jaji Ali Abida Aroni kuwa jaji katika mahakama ya kuamua kesi za mizozo ya wafanyakazi na waajiri (ELRC).

Watatu hao; Jaji Muchelule, Jaji Muchemi na Jaji Aroni walijivika mavazi rasmi kisha wakafululiza hadi Ikulu ya Nairobi kula kiapo.Wakisubiri aliyekuwa Bw Kibaki, ghafla hafla hiyo yao ya kiapo alifutiliwa mbali.Bw Kibaki hakuwaapisha majaji Muchelule, Aroni na Muchemi.

Katika muda wa miezi miwili Bw Muchelule alihamishwa kutoka mahakama ya Nairobi na kupelekwa mahakama ya Embu naye Bi Muchemi akapelekwa Naivasha kama hakimu mkuu.

Baada ya miaka mitatu 2009 Jaji Muchelule aliteuliwa kirasmi kuwa Jaji mahakama kuu.Rais Kenyatta alikataa kumteua Jaji Muchelule , Jaji Weldon Korir, Jaji George Odunga,Jaji Prof Joel Ngugi na Bi Judith Omange na hakimu mkuu Evans Makori.

Masuala kadhaa yamezuka dhidi ya Jaji Muchelule wakati wa utenda kazi wake hasa alipowaachilia huru aliyekuwa kinara wa ulanguzi wa dawa za kulevya marehemu Ibrahim Akasha 2005 na mwanawe Baktash Akasha anayetumikia kifungo cha gerezani cha miaka 25 nchini Amerika.

Ibrahim na Baktash walikabiliwa na shtaka la ulanguzi wa mihandarati.Watoto wa Akasha aliyeuliwa Netherlands walikamatwa na kusafirishwa hadi Amerika na maafisa wa ujasusi wa Amerika kwa tuhuma za ulanguzi wa mihandarati.

Baada ya kushikwa watoto hao wa Akasha walikiri kushiriki katika visa vya ulanguzi wa mihandarati.Jaji Muchelule na Jaji Said Juma Chitembwe walikamatwa kwa madai ya ufisadi wa Sh5 milioni.

Baada ya kuhojiwa waliachiliwa lakini Mahakama kuu imetoa agizo wawili hao wasikamatwe na kufunguliwa mashtaka hadi kesi iliyowasilishwa na chama cha mahakimu na majaji KMJA isikizwe na kuamuliwa.

Jaji Muchelule ndiye mkuu wa kitengo cha kesi za kifamilia na urithi katika mahakama kuu.Jaji Chitembwe alikamatwa miaka 12 iliyopita na kushtakiwa pamoja na mawakili Edward Muriu Kamau na Stephen Kipkenda Kiplagat kwa kuhusika na uuzaji wa ardhi ya NSSF ya thamani ya Sh1.3bilioni.

Lakini watatu hao waliachiliwa na Jaji Chitembwe kuendelea na kazi.Jaji Chitembwe alikuwa mmoja wa waliowania wadhifa wa Jaji Mkuu na Jaji wa Mahakama ya Juu.

JAMVI: Huenda miswada isaidie Uhuru, Raila kuandaa refarenda

Na DAVID MWERE

RAIS Uhuru Kenyatta na kiongozi wa ODM Raila Odinga wanaweza kutimiza lengo lao la nchi kuandaa kura ya maamuzi hata kama Mahakama ya Rufaa itakataa kuidhinisha ifanyike.

Hii ni kwa sababu Miswada kadhaa ya kubadilisha katiba ya Kenya iliyo na mapendekezo sawa inaendelea kupitia mchakato wa bunge na baadhi yake inapangwa kujadiliwa bunge likirejelea vikao mwezi ujao baada ya likizo ndefu.

Ingawa haina maelezo mengi kama Mswada wa Mpango wa Maridhiano BBI wa 2020, ambao unalenga kubadilisha ibara 70 za katiba ya 2010, Miswada hiyo iliyoandaliwa na wanasiasa kutoka mirengo yote ya kisiasa, inaweza kushughulikia baadhi ya mapendekezo ya BBI.

Miswada hiyo iliundwa kati ya 2017 na 2019, hata kabla ya Mswada wa BBI uliozinduliwa Kisii Oktoba 21, 2020.

Sawa na BBI, Miswada hiyo, iwapo itaidhinishwa na bunge, itahitaji kura ya maamuzi kabla ya kuwa sheria.Baadhi ya yanayopendekezwa kwenye Miswada hiyo ni mawaziri kuwa wabunge na haja ya kutatua hitaji la usawa wa jinsia.

Mingine ni kufanya Hazina ya Maeneo Bunge kuwa hitaji la kikatiba na kufanyia mabadiliko mfumo wa uchaguzi.Pendekezo la mbunge maalum, David Sankok, kufuta hitaji la thuluthi mbili ya wawakilishi kutokuwa wa jinsia moja lilikataliwa na kamati ya bunge kuhusu haki na sheria.

Mnamo Septemba 19, 2019, kamati iliyosimamiwa na mbunge wa Baringo Kaskazini, Bw William Cheptumo ilipendekezea bunge mswada wa Bw Sankok usichapishwe.

Hata hivyo, mwenyekiti mwenza wa ofisi ya BBI, Bw Junet Mohamed, alikataa kusema iwapo Miswada hiyo mitatu itachukua malengo ya BBI kwa kuwa hakujibu maswali yetu.

Lakini kiongozi wa wachache katika bunge la taifa, Bw John Mbadi ambaye pia ni mwenyekiti wa ODM, alisema ana matumaini Mahakama ya Rufaa itafungulia BBI njia huku akisema kwamba chama chake hakikushauriwa kuhusu Miswada iliyo mbele ya bunge.

“Akili yangu iko kwa BBI na matumaini yangu ni kwamba Mahakama ya Rufaa itabatilisha uamuzi wa Mahakama Kuu,” alisema Bw Mbadi.

Waandalizi wa BBI walikata rufaa baada ya majaji watano wa Mahakama Kuu kuzima mchakato wa kubadilisha katiba wa BBI wakisema haukuwa wa kikatiba.

“Kama mambo hayataenda tulivyopanga, kama chama, tutashauriana na kukubaliana mwelekeo ambao tutachukua. Lakini inafaa kueleweka kwamba Miswada iliyo mbele ya bunge iliandaliwa bila viongozi wa vyama kushauriwa. Kwa hivyo, hatuwezi kudandia Miswada ya watu,” alisema.

Mbunge wa Tiaty, Bw Kassait Kamket alikuwa amependekeza marekebisho ya Katiba kubuni wadhifa wa Waziri Mkuu na mawaziri kuteuliwa miongoni mwa wabunge inavyopendekezwa katika BBBI.

Kwenye mswada wake, Bw Kamket pia alipendekeza wadhifa wa kiongozi wa upinzani urejeshwe katika Bunge la Taifa. Tofauti ya Mswada wake na BBI, ni kutaka tarehe ya uchaguzi mkuu iahirishwe hadi Jumanne ya pili ya Desemba kila baada ya miaka mitano.

Kwa wakati huu, katiba inasema uchaguzi mkuu unafaa kufanyika Jumanne ya pili ya Agosti kila baada ya miaka mitano.

Brazil na Ivory Coast kuumiza nyasi leo

YOKOHAMA, Japan

BAADA ya kushinda mechi zao za ufunguzi katika Kundi D kwenye Olimpiki zinazoendelea nchini Japan, Brazil na Ivory Coast watashuka leo dimbani kuumiza nyasi za uwanja wa Yokohama.

Brazil ambao ni mabingwa watetezi, watakuwa na kiu ya kuendeleza ubabe uliowavunia ushindi wa 4-2 dhidi ya Ujerumani mnamo Alhamisi iliyopita.

Kwa upande wao, Ivory Coast watajibwaga ulingoni wakiwa na motisha ya kupepeta Saudi Arabia 2-1 katika gozi la awali.

Ivory Coast walijikatia tiketi ya kunogesha Olimpiki licha ya Misri kuwapokeza kichapo cha 2-1 kwenye fainali ya Kombe la Afrika (AFCON) kwa chipukizi wasiozidi umri wa miaka 23 mnamo 2019.

Chini ya kocha Andre Jardine ambaye amewahi kudhibiti mikoba ya Sao Paulo, Brazil watategemea zaidi maarifa ya wavamizi Richarlson Andrade na Paulinho Bezerra waliowafungia mabao dhidi ya Ujerumani.

Ni mara moja pekee tangu 1976 ambapo kikosi cha Brazil kimeshindwa kutia kapuni medali ya aina yoyote kwenye Olimpiki.

Jardine ameongoza Brazil kushinda mechi tatu zilizopita ambazo zimeshuhudia miamba hao wakijizolea jumla ya mabao 12 na nyavu zao kutikiswa mara nne pekee.

Kwingineko, mabingwa wa 2012 Ufaransa watamenyana na Afrika Kusini mjini Saitana katika mechi ya Kundi A ambayo wana ulazima wa kushinda ili kuweka hai matumaini ya kusonga mbele.

Huku Ufaransa wakilenga kujinyanyua baada ya kupigwa 4-1 na Mexico mnamo Alhamisi, Afrika Kusini watakuwa wakipania kujitoa topeni baada ya kucharazwa 1-0 na wenyeji Japan katika mechi iliyopita.

Chini ya kocha Sylvain Ripoll, Ufaransa ni miongoni mwa timu zinazopigiwa upatu wa kutwaa dhahabu ya Olimpiki mwaka huu baada ya kushindwa kutinga fainali ya Euro 2019 na 2021 kwa chipukizi wa Under-21.

Dhahabu ya pekee ambayo Ufaransa wanajivunia kwenye Olimpiki ni ile waliyojizolea mnamo 1984. Tangu wakati huo, wamewahi kufuzu kwa fainali ya michezo hiyo mara moja pekee – 1996.

Ilivyo, Ufaransa wako pazuri zaidi kushinda mchuano wa leo ikizingatiwa kwamba maandalizi ya Afrika Kusini wanaotiwa makali na kocha David Notoane yametatizwa pakubwa na visa vya maambukizi ya virusi vya corona kambini mwao.

Katika Kundi C, Argentina watachuana na Misri mjini Sapporo Dome. Huku Misri wakijivunia kusajili sare tasa dhidi ya Uhispania katika mechi iliyopita, Argentina waliotawazwa mabingwa mnamo 2004 na 2008, watajitosa uwanjani wakilenga kujinyanyua baada ya kulazwa 2-0 na Australia mnamo Alhamisi.

RATIBA YA SOKA YA WANAUME (Leo):

KUNDI A: Ufaransa vs Afrika KusiniJapan vs MexicoKUNDI B: New Zealand vs HondurasRomania vs Korea KusiniKUNDI C: Misri vs Argentina Australia vs UhispaniaKUNDI D: Brazil vs Ivory CoastSaudi Arabia vs Ujerumani

Waganga waonywa dhidi ya kutibu wasichokielewa

NA KALUME KAZUNGU

MUUNGANO wa kitaifa wa waganga wa mitishamba (NATHEPA), tawi la Lamu, limehimiza wanachama wake waelimishwe dhidi ya kutibu maradhi ambayo si ya kiwango chao.

Muungano huo umeiomba serikali kupitia wizara ya afya kuandaa kongamano ambalo litasaidia kuwahamasisha.

Mwenyekiti wake, Bw Ali Salim, alielezea hofu kwamba baadhi ya wanachama wake wamekuwa wakidai wana uwezo wa kuwatibu wagonjwa wa maradhi kama vile Ukimwi, Covid-19, polio na mengineyo, hali ambayo ni hatari.

Bw Salim alikiri kuwa waganga wengi hukumbwa na kipindi kigumu kutambua maradhi yasiyo ya kiwango chao kwa kuwa hawana njia za kubaini au kutambua dalili za maradhi hayo.

“Zamani tulikuwa hatuna la kuhofia kwani hakukuwa na maradhi ya kiajabu kama dunia ya leo. Kwa sasa kumechipuka maradhi, ikiwemo Ukimwi, polio na Covid-19. Maradhi haya ni vigumu kuyashughulikia,’ akasema.

Pia alihofia kuwa katika harakati za kutibu kile wasichokielewa, baadhi yao huenda wakaambukizwa hasa ikiwa ni maradhi ya kuambukiza.

Waganga hao pia wanaomba serikali iwasaidie kwa vifaa vya kujikinga wanapookuwa kazini sawa na madaktari hospitalini.

“Ningeisihi serikali kutambua sekta hii muhimu ya waganga. Watupe barakoa, glovu na hata magwanda maalum ili tujikinge tunaposhughulikia wagonjwa wetu ili tusiambukizwe,” akasema Bw Mohamed mmoja wa wanachama wa muungano.

Wakazi hasa wale wa visiwa vya mbali na wa msitu wa Boni hutegemea sana huduma za madaktari wa mitishamba kutokana na hali mbovu ya miundomsingi.

Serikali italipa fidia ya Sh14 bilioni kwa walioshambuliwa na wanyamapori – Balala

Na ALEX KALAMA

WAZIRI wa Utalii, Bw Najib Balala amehimiza Shirika la Wanyamapori (KWS), kujenga uhusiano mwema na jamii kwa kuihamasisha jinsi ya kuepuka mashambulizi kutoka kwa wanyamapori.

Hatua hiyo alisema itasaidia kupunguza mizozo kati ya binadamu na wakazi, ambapo visa hivyo vimesababisha vifo na majeraha.

“KWS tafadhalini wekeni juhudi za kuhakikisha kuna uwiano na jamii na muweze kuwafundisha watu wapate kuelewa namna ya kuishi na wanyama,” alisema Bw Balala.

Alisema kwa kipindi cha miaka mitatu, serikali ya kitaifa imetumia takriban Sh2 bilioni kulipa fidia kwa wananchi walioashambuliwa na wanyamapori nchini.

Akizungumza na wanahabari katika eneo la Watamu, Kaunti ya Kilifi, Bw Balala alisema jumla ya fedha zinazostahili kulipwa wananchi walioathirika kutokana na mashambulizi ya wanyama ni Sh14 billioni.

“Pesa zilizopaswa kulipwa kama fidia kwa jamii zilizoathirika na mashambulizi ya wanyamapori ni Sh14 bilioni ila kufikia sasa ni Sh2 bilioni pekee ambazo serikali imelipa fidia kwa wananchi,” alisema Bw Balala.

Aliongeza, “Watu wanaoishi karibu na wanyama wanafaa kuwa waangalifu zaidi ili kuepuka kutokea kwa visa kama hivi. Lazima tuweke mikakati ya kupunguza shida hizo.”

Ni kauli ambayo imeungwa mkono na mkurugenzi mkuu wa shirika la KWS, Bw John Migui Waweru.

Bw Waweru alisisitiza haja ya gharama hizo kupungua huku akidokeza kuwa tayari wanaendelea kutoa hamasa katika jamii ili kuepusha mizozano kati ya binadamu na wanyama.

‘Gharama itapungua na tungependa kuiona ikipungua lakini wale wananchi ambao wanaishi na wanyama lazima waelewe kuwa kuna mbinu zile ambazo wanaweza kuishi,’ alisema Bw Waweru.

Ruto afaulu kunusuru UDA baada ya mzozo kutatuliwa

Na BENSON MATHEKA

MZOZO ambao ulitishia kumpokonya Naibu Rais William Ruto chama cha United Democratic Alliance (UDA) umesuluhishwa.

Hii ni baada ya aliyekuwa mwenyekiti Bw Mohamed Noor kuondoa kesi aliyowasilisha mbele ya Jopo la kutatua mizozo ya vyama vya kisiasa.

Bw Noor alikuwa amepinga ilani ya viongozi wapya wa chama hicho iliyochapishwa na msajili wa vyama vya kisiasa ambaye alitambua washirika wa Dkt Ruto kuwa viongozi halali wa chama hicho.

Akiondoa kesi hiyo, alisema kuwa ameridhika na uamuzi wa msajili wa vyama kupitia ilani aliyochapisha Machi 19 akitambua washirika wa Dkt Ruto kuwa viongozi wa chama cha UDA.

“Mlalamishi ameridhika na uamuzi wa mshtakiwa kupitia ilani katika gazeti rasmi la serikali,” Bw Noor alisema kwenye makubaliano ya kumaliza mzozo huo.

Hatua hii inamaanisha kuwa aliyekuwa seneta wa Machakos, Bw Johnston Muthama angali mwenyekiti wa chama hicho, aliyekuwa seneta wa Kakamega, Dkt Boni Khalwale ataendelea kuwa Naibu mwenyekiti na Bi Veronica Maina atasalia kuwa katibu mkuu.

Watatu hao ni washirika wa kisiasa wa Dkt Ruto ambaye amekuwa akipigia debe chama hicho. Bw Muthama na Dkt Khalwale na washirika wengine wa Dkt Ruto wametangaza kuwa chama hicho ndicho Naibu Rais atatumia kugombea urais kwenye uchaguzi mkuu wa 2022.

Bw Noor alikuwa ameomba jopo kubatilisha uamuzi wa msajili wa vyama vya kisiasa wa kutangaza washirika wa Dkt Ruto kuwa maafisa wa chama hicho ambacho kimepata umaarufu kwa kutambulishwa na Dkt Ruto.

Kwenye kesi yake, aliomba jopo kumrejeshea umiliki wa chama cha UDA.Alilalama kwamba kuidhinishwa kwa washirika wa Dkt Ruto kuwa maafisa wa chama hicho, kulikuwa kinyume cha sheria.

Katika kesi aliyowasilisha mbele ya jopo la kutatua mizozo ya vyama vya kisiasa, Bw Noor alisema kwamba aliyekuwa katibu mkuu Mohammed Sahal ambaye aliidhinisha kubadilishwa kwa maafisa wa chama hicho, ni mtumishi wa umma na kwa hivyo hana mamlaka ya kufanya hivyo.

“Suala hili limesuluhishwa kati ya mlalamishi, mshtakiwa na waliohusishwa na kesi hiyo,” yalisema makubaliano ya kumaliza mzozo huo. Seneta wa Elgeyo Marakwet Kipchumba Murkomen, aliongoza washirika wa Dkt Ruto kufurahia hatua hiyo.

“Suala dogo kati ya Bw Abdi Noor Mohamed na UDA Kenya limetatuliwa kwa amani,” Bw Murkomen aliandika kwenye Twitter.

JAMVI: Gavana Kingi aning’inia kisiasa Muungano wa Pwani ukijikokota

?ANTHONY KITIMO na VALENTINE OBARA

HATIMA ya Gavana wa Kilifi Amason Kingi katika enzi ijayo ya kisiasa inaendelea kuning’inia huku mazungumzo ya kuleta umoja wa wanasiasa wa Pwani yakizidi kuchelewa kutamatika.

Licha ya joto la kisiasa kutanda katika kaunti hiyo kwa miezi kadhaa sasa, Bw Kingi aliyekuwa mstari wa mbele kupigania uundaji wa muungano wa Pwani kabla 2022 amejituliza tuli.

Wiki iliyopita, Bw Kingi hakuhudhuria mikutano ya Kiongozi wa ODM Raila Odinga katika kaunti hiyo licha ya kuwa yeye ndiye mwenyekiti wa chama hicho Kilifi.

Bw Kingi alionekana tu hadharani wakati Rais Uhuru Kenyatta alipozuru kaunti hiyo kukagua miradi ya maendeleo baadaye Alhamisi.

Bw Odinga hakuandamana na Rais kuelekea Kilifi jinsi imekuwa desturi yao kukagua miradi ya maendeleo wakiwa pamoja katika maeneo mengine nchini.

Hotuba nyingi zilizotolewa katika hafla ambazo Bw Odinga alihudhuria zililenga kuwasuta viongozi walioasi chama hicho cha nembo ya chungwa, huku kukiwa na sisitizo kwamba bado kina umaarufu Kilifi.

Kando na ODM, Chama cha United Democratic Alliance (UDA) kikiongozwa na Naibu Rais William Ruto pia kimekuwa kikiendeleza ziara nyingi katika kaunti hiyo kwa nia ya kufifisha umaarufu wa ODM kabla uchaguzi ujao.

“Mnafahamu vyema kuwa Kiifi ni ngome ya ODM. Watu wengi watasema watakavyo lakini mwishowe ODM ndiyo itavuma Pwani. Tunajua nani atakuwa Ikulu mwaka ujao na tuna imani atakuwa ni Raila Amolo Odinga,” alisema Seneta wa Kilifi, Bw Stewart Madzayo, alipokuwa akikashifu kampeni za mapema zinazoendelezwa na UDA.

Jumapili iliyopita, vyama vitano vya Pwani ambavyo Bw Kingi amekuwa akishinikiza viungane vilikutana mjini Voi, Kaunti ya Taita Taveta kuendelea kupanga mikakati yao.

Mikutano hiyo imekuwa ikifanyika kwa muda mrefu sasa ila uamuzi wa mwisho kuhusu mwelekeo utakaochukuliwa bado haujatolewa.

Vyama hivyo vya Shirikisho Party of Kenya (SPK), Kadu-Asili, Republican Congress Party of Kenya, Umoja Summit Party of Kenya (USPK) na Communist Party of Kenya vimeamua havitavunjwa kuunda chama kimoja bali vitaungana kuunda muungano wa vyama vya kisiasa vilivyo na mizizi yao Pwani.

Kwa msingi huu, huenda Bw Kingi atalazimika kuhamia mojawapo ya vyama hivyo ikiwa bado anaazimia kuendeleza juhudi za kuleta umoja wa Wapwani kisiasa ifikapo 2022.

Katika mahojiano na Taifa Jumapili, Katibu Mkuu wa Chama cha Shirikisho, Bw Adam Mbeto, alisema kufikia sasa uamuzi ambao umefanywa ni kuunda muungano wa vyama vya kisiasa ila uamuzi wa mwisho bado haujafanywa.

“Hatutakuwa na chama kimoja bali muungano wa vyama. Mazungumzo bado yanaendelea kuhusu suala hilo,” akasema Bw Mbeto kupitia kwa mahojiano ya simu Alhamisi iliyopita.

Bw Kingi ambaye ni mmoja wa magavana wa Pwani wanaotumikia kipindi cha pili ambacho ni cha mwisho cha ugavana hajakuwa wazi kuhusu maazimio yake ya baadaye kisiasa akilinganishwa na Gavana wa Mombasa Hassan Joho ambaye amekuwa akijiandaa kuwania urais.

Katika Kaunti ya Kwale, Gavana Mvurya ambaye ni mwanachama wa Jubilee pia amekuwa akielezea nia yake ya kujitosa katika siasa za kitaifa wakati atakapokamilisha kipindi chake cha ugavana mwaka ujao.

Bw Mbeto aliambia Taifa Jumapili kwamba vyama vitano vya Pwani sasa vimeunda kamati ambazo zitatoa mwelekeo wa kisiasa kwa Wapwani hivi karibuni.Imebainika kamati hizo ziko chini ya makundi ya Coast Initiative Development Initiative (CIDI) na Coast Political Parties’ Convention (CPPC) ambayo yatashauriana na kutoa mwongozo wa kiuchumi na kisiasa mtawalia utakaowanufaisha Wapwani.

Vile vile, imebainika kuwa mashauriano hayo yatalenga kutoa mwongozo wa jinsi muungano utafaa kuundwa ili kuunganisha manifesto ya vyama vyote tanzu bila kusababisha migogoro.

Miezi michache iliyopita, Bw Kingi alisuta viongozi wanaokashifu uundaji wa muungano wa vyama ambavyo vina mizizi Pwani kwa madai kuwa mpango huo ni wa kikabila.

Alisema vyama vinavyoendeleza mashauriano vimesajiliwa kama vyama vya kitaifa kwa hivyo vina uhuru wa kutafuta vingine kuunda nao muungano.

“Hakuna chama kinaundwa hapa, ni vyama vya kitaifa vimeundwa kisheria vinakuja pamoja kumiliki ngome yao. Kwa hivyo jambo hili lisichukuliwe kikabila,” alisema Bw Kingi.

Bw Joho ambaye pia ni naibu kiongozi wa ODM alisema Pwani itaendelea kuwa ngome ya kisiasa ya ODM na hakuna nafasi kwa chama kingine chochote, kiwe kipo tayari au kinatarajiwa kuundwa, kuchukua nafasi hiyo.

“Tumeona watu wakijaribu kupenya eneo la Pwani na kujaribu kuwashawishi wanachama wa ODM waondoke chamani. Nataka kuwaambia sisi hatulali na tutalinda wanachama wetu. Tumejifunza kutoka eneo la kati ambapo kuna watu waliohamia vyama vingine bila mpangilio,” akasema.

Alisisitiza kuwa chama hicho ndicho kitaunda serikali ijayo kwa hivyo haitakuwa busara kwa Wapwani kuanza kufikiria kuelekea kwingine wakati huu.

Wauzaji pombe Nakuru waonywa

NA RICHARD MAOSI

GAVANA wa Nakuru Lee Kinyanjui ametoa onyo kali kwa wanaoendesha biashara ya pombe haramu kuanzia Molo, Elburgon, Subukia na Lanet.

Akizungumza na Taifa Leo siku ya Ijumaa alisema kuwa ni hali ambayo imechangia utovu wa maadili katika jamii.

“Inasikitika kuona wanawake na watoto wakihangaika nyumbani kwa sababu waume wanashindwa kutekeleza majukumu muhimu ya kifamilia,”akasema.

Aliwaonya wanaume dhidi ya kubugia pombe kupita kiasi, ikizingatiwa kuwa madhara yake ni makubwa kijamii na hakuna mtu ambaye aliwahi kufariki kutokana na kuacha pombe.

Alisema kuwa pombe haramu ina madhara mengi yakiwemo kupofuka na vifo.

Alidokeza kuwa atashirikisha sekta ya kudhibiti vileo, ili kuhakikisha wagema wana leseni za kuendesha biashara ya pombe.

Aidha alieleza kuwa kaunti itaweka mikakati ya kuwafundisha watengenezaji wa pombe za kienyeji namna ya kuandaa vileo safi na salama kwa matumizi ya binadamu mojawapo ikiwa ni Busaa.

Hili linajiri raia raia wakienelea kulaumu idara ya usalama, kwa kushirikiamna na wauzaji pombe ambapo kila mwezi polisi huchukua hongo na kuwaacha waendelee na biashara.

Baadhi yao wamekuwa wakishinikiza maafisa wa usalama kushirikiana na wazee wa nyumba kumi ili kuhakikisha kuwa matumiza ya pombe haramu yanatokomezwa mara moja.

Mitaa ya mabanda ya Kivumbini, Rhonda, Mwariki na Kapkures yanaongoza kwa idadi kubwa ya wafanyibiashara wanaotengeneza pombe haramu ili kujikimu kimaisha.

Kamishna apiga marufuku wakazi kula matangani

Na BRIAN OJAMAA

KAMSHNA wa Kaunti ya Bungoma, Bw Samuel Kimiti, amepiga marufuku kula kwa matanga akisema agizo hili linanuia kupunguza msambao wa virusi vya corona.

Akizungumza na wanahabari ofisini mwake mjini Bungoma, Bw Kimiti alionya kuwa mazishi yataruhusiwa tu kufanyika kwa muda wa saa 72 kama ilivyoamrishwa na serikali.Vilevile, waombolezaji ni 50 pekee kujumuisha jamaa na marafiki wa karibu wa mwendazake.

“Tumepata kuwa nyakati za mlo na densi matangani watu wanatangamana mno, na hilo limechangia ongezeko la maambukizi ya corona nchini,” alieleza.Pia alionya yeyote atakayepatikana nje kuanzia saa moja jioni atakamatwa, ikiwemo waendeshaji bodaboda.

Wanaofanya kazi masaa ya kafyu kuwa watakamatwa na kushukiwa kuwa wezi.Alionya watu kuuchukulia ugonjwa huo tahadhari kwa kuwa wengi wamepoteza wapendwa wao kupitia virusi hivyo.

“Msipuuze ugonjwa huu kwa kuwa wengi wamepoteza wapendwa wao hasa kwa kutojali,” alionya.Alisema pia kuwa watakaohudhuria mazishi na kuleta fujo hasa wanasiasa wanaoleta machafuko kwenye matanga watachukuliwa hatua.

“Ni jambo la kusikitisha ikiwa familia imepoteza mpendwa wao na wengine kuhudhuria mazishi nia yao ikiwa ni kuleta fujo ikiwemo wanasiasa,” alisema kamishna huyo.Kadhalika, alisema kuwa polisi watahudhuria mazishi ili kuhakikisha kuwa Amani imedumishwa na watu kufuata kanuni za serikali za kudhibiti msambao wa corona.

Bw Kimiti aliwaomba wakaazi hao kushirikiana na serikali kwa kuzingatia kanuni zilizotolewa kama vile, kuosha mikono kila mara, kuvaa barakoa na kutokaribiana ili kupambana na janga hilo.Aliwaonya polisi ambao wanachukua hongo kutoka kwa wamiliki baa na kuwaruhusu kufanya kazi wakati wa kafyu kuwa watachukuliwa hatua.

“Watakao patikana wakifanya kazi wakati wa kafyu watakamatwa. Polisi ambao wanachukua hongo kutoka kwa wamiliki baa watakamatwa na kujibu mashaka mbele ya korti,” alisema.Yeyote atakayepatikana nje kuanzia saa moja jioni atakamatwa.

Aliwaonya waendeshaji bodaboda wanaofanya kazi masaa ya kafyu kuwa watakamatwa na kushukiwa kuwa wezi.Katika siku mbili zilizopita, polisi wamewakamata waendeshaji bodaboda pamoja na wamiliki baa wengi waliovunja kanuni za kafyu.

“Wengi wamekamatwa kwa kupatikana nje hasa masaa ya kafyu. Kila mmoja ahakikishe kuwa amefika kwake kabla ya saa moja usiku,” alisema Bw Kimiti.

Uhuru akutana na magavana 5 kupanga ziara magharibi

Na DERICK LUVEGA

MAGAVANA watano kutoka eneo la Magharibi mnamo Alhamisi walikutana na Rais Uhuru Kenyatta kabla ya kiongozi wa nchi kufanya ziara ya kukagua miradi ya maendeleo eneo hilo mwezi ujao.

Magavana hao tayari wameorodhesha miradi kadha ambayo Rais Kenyatta atazindua katika ziara hiyo inayojiri miezi miwili baada yake kuzuru na kuzindua miradi katika eneo la Luo Nyanza.

Baada ya ziara hiyo ambapo Rais pia aliongoza Sherehe za Madaraka Dei jijini Kisumu, viongozi wa Magharibi walilalamika kuwa Rais Kenyatta ametenga eneo hilo kimaendeleo.

Wakiongozwa na seneta wa Kakamega Cleophas Malala, wanasiasa hao walidai eneo la Luo Nyanza limevuna pakubwa kimaendeleo tangu aliporidhiana kisiasa na kiongozi wa ODM Raila Odinga mnamo Machi 9, 2018.Walidai eneo la Magharibi limetengwa licha ya kwamba wakazi wamekuwa wakimuunga mkono Bw Odinga katika chaguzi kadha zilizopita.

Mnamo Alhamisi, Rais Kenyatta alikutana katika Ikulu ya Mombasa na magavana; Wycliffe Oparanya (Kakamega), Sospeter Ojaamong (Busia), Patrick Khaemba (Trans Nzoia), Dkt Wilbur Otichillo (Vihiga) na Gavana wa Bungoma Wycliffe Wangamati.

Ziara hiyo ya Rais Kenyatta eneo la Magharibi inasubiriwa kwa hamu na ghamu na wakazi wa eneo hilo japo limegawanyika kisiasa.

Baadhi ya wanasiasa wanaegemea mrengo wa kiongozi wa ANC Musalia Mudavadi na mwenzake wa Ford Kenya Moses Wetang’ula kwa upande mmoja huku wengine kama vile Waziri wa Ugatuzi Eugene Wamalwa, Katibu Mkuu wa COTU Francis Atwoli na Gavana Oparanya wakiegemea mrengo hasimu ambao ni wandani wa kiongozi wa ODM Raila Odinga.

Mahakama iko msalabani sasa,alalama Koome

Na RICHARD MUNGUTI

JAJI Mkuu Martha Koome amesema kuwa majaji wamekumbwa na hofu kufuatia kunaswa kwa wenzao wawili Alhamisi na maafisa wa Idara ya Uchunguzi wa Uhalifu (DCI) kwa madai ya kuchukua hongo ya Sh5 milioni.

Chama cha Mahakimu na Majaji nchini (KMJA) jana kiliwasilisha kesi mahakamani kupinga kushtakiwa kwa majaji Aggrey Muchelule na Said Juma Chitembwe.

Akikashfu kukamatwa kwa majaji Muchelule na Chitembwe, Jaji Koome alisema “kama mkuu wa idara ya mahakama na mwenyekiti wa tume ya huduma za mahakama (JSC), hakujulishwa na DCI kama majaji hao walikamatwa”.

“Sikujulishwa na DCI kama anawachunguza majaji hao wawili,” alisema Jaji Koome, akiongeza, “Na wala sikufahamishwa watakamatwa.”Hata hivyo, Jaji Koome alisema katika taarifa kwa wanahabari kwamba amekutana na majaji hao wawili na wakamweleza kilichotokea Alhamisi.

Jaji Koome alisema majaji hao walimweleza jinsi maafisa wa idara ya uchunguzi wa jinai walivyowavamia katika afisi zao katika Mahakama Kuu Milimani na kupekuapekua afisi zao lakini hawakupata pesa zozote za hongo walizokuwa wamepokea.

Licha ya kukiri kutiwa nguvuni kwa majaji Muchelule na Chitembwe kumezua kiwewe na taharuki katika idaara ya mahakama, Jaji Koome aliwahakikishia majaji wako salama na kazi yao imelindwa na Katiba.“Msihofu, muendelee kutekeleza kazi zenu bila woga.

Haki zenu na kazi yenu imelindwa na Katiba,” Jaji Koome aliwaeleza majaji wote katika idara ya mahakama.Jaji Koome aliye pia Rais wa Mahakama ya Juu na mwenyekiti wa JSC alisema majaji hao walihojiwa na kuandikisha taarifa kisha wakaruhusiwa kwenda nyumbani.

Mkurugenzi wa DCI, George Kinoti alikiri katika ujumbe aliotuma kwa mtandao wake akisema majaji hao walikamatwa na kuandika taarifa kisha wakaachiliwa.Katika kesi ya KMJA, mawakili Danstan Omari , Cliff Ombeta na Shadrack Wamboi walisema kukamatwa kwa majaji hao wawili kumezua hali ya taharuki miongoni mwa majaji wote.

“Nani yuko salama ikiwa majaji ambao hutunza katiba ya nchi hii wanakamatwa kiholela pasi sababu yoyote maalum,” alisema Bw Omari. Bw Ombeta alieleza mahakama kuwa sheria na haki za majaji hao wawili zimekandamizwa na maafisa hao waliowakamata bila sababu na bila kibali cha korti kilichowawezesha kuwahoji na kupekua afisi zao.

Naye Mkurugenzi wa Mashtaka ya Umma (DPP) Noordin Haji alijitenga na kukamatwa kwa Majaji Muchelule na Chitembwe akisema, “Sikujua sababu zilizopelekea wawili hao kukamatwa na kuhojiwa.

”Katika kile kinachoonekana kuwa tofauti kati ya DPP na DCI katika utenda kazi , Bw Haji alisema afisi yake haijapokea faili za majaji hao wawili za madai ya ufisadi. Katika taarifa, Bw Haji alikanusha kutoa maagizo majaji hao watiwe nguvuni.

Akikanusha madai ya chama cha wanasheria nchini (LSK) kikimlaumu Haji kwa kukamatwa kwa majaji hao, kinara huyo wa afisi ya DPP alisema hajapokea faili kutoka kwa afisi ya DCI akiomba ushauri.

“Katika kesi ya KMJA, mahakama kuu inaombwa ifutilie mbali hatua ya kuwafungulia mashtaka wawili hao kwa kuwa JSC haikufahamishwa chochote na DCI kuwahusu wawili hao iwachukulie hatua,” Mabw Omari, Ombeta na Wambui walisema na kuongeza, majaji watano waliosikiza kesi ya kupinga kushtakiwa kwa Naibu Jaji Mkuu Philomena Mwilu walisema “lazima JSC ijulishwe kabla ya jaji yeyote kukamatwa”.

KMJA inaomba mahakama kuu ikashfu kitendo hicho cha kuwadhulumu na kuwakejeli majaji hao.

Corona: Uhaba wa vifaa vya upimaji nchini

HELLEN SHIKANDA na ANGELA OKETCH

SERIKALI imepunguza idadi ya watu wanaopimwa virusi vya corona kwa siku kutokana na ukosefu wa vifaa vya kupimia.

Idadi ya watu wanaopimwa virusi vya corona imepungua kutoka 8,000 hadi 5,000 kwa siku.Jumla ya watu milioni 2 wamepimwa virusi vya corona tangu kisa cha kwanza kuripotiwa nchini mnamo Machi 23 mwaka jana.

Kutokana na idadi ndogo ya watu wanaopimwa virusi hivyo, vinavyosababisha ugonjwa wa Covid-19, kuna hatari ya uenezaji zaidi wa maambukizi nchini.Taasisi ya Utafiti wa Matibabu (Kemri) ina uwezo wa kupima sampuli 35,000 kwa siku.

Lakini kwa miezi miwili sasa imekuwa ikipima chini ya watu 100 kwani haijapokea vifaa vya kuendesha shughuli hiyo kutoka kwa serikali.“Kwa miezi miwili sasa, sitaki kukudanganya, hatujakuwa tukipima virusi vya corona.

Tunapima tu watu wanaotaka kusafiri, husasan, watafiti wetu. Hatuna vifaa vya kupimia virusi vya corona,” akasema afisa wa Kemri aliyeomba jina lake libanwe kwa kuhofia kuandamwa na serikali.

Afisa huyo alihoji kwamba taasisi ya Kemri imesalia na vifaa 300 pekee vya kupima corona.“Mashine za kupima corona hazina kazi kwani hatuna kemikali na viungo vingine hitajika.

Tunasubiri serikali ituletee vifaa ili tuanze tena kupima wananchi,” akasema.Serikali pia iliacha mpango wake wa kutafuta watu waliotangamana na waathiriwa wanaopatikana na virusi vya corona.

Hata hivyo, Lakini Mkurugenzi wa Afya ya Umma, Dkt Francis Kuria, alieleza kuwa sera ya serikali inasema ni watu tu wanaoonyesha dalili za virusi vya corona ndio wanahitaji kupimwa.Kenya imekumbwa na uhaba wa vifaa vya kupima corona huku nchi ikiwa katika hatari ya kupatwa na wimbi la nne la janga hilo.

Dkt Kuria aliongeza kuwa Mamlaka ya Kusambaza Vifaa vya Matibabu Nchini (Kemsa) ilipokea vifaa 650,000 vya kupima corona Jumatatu, ambavyo vilipelekwa katika maeneo mbalimbali ya nchi siku ya Jumatano.

Alikanusha ripoti kwamba baadhi ya vifaa vimekwama bandarini.“Vifaa vya kupima corona vilitua nchini kwa ndege. Kama kuna vilivyokwama bandarini mimi sijasikia,” akasisitiza.Dkt Ahmed Kalebi, mtaalamu wa matibabu ya virusi, asema hatua ya kupima idadi ndogo ya watu huenda ikazua hatari siku za usoni.

“Inamaanisha kuwa kuna idadi kubwa ya watu wanaotembea na virusi vya corona bila kujua, na kuisambaza zaidi,” akasema.

Ajowi, Akinyi wafuzu kwa raundi 2 bila jasho Tokyo

Na CHARLES ONGADI

HATIMAYE ratiba ya michuano ya ndondi katika Michezo ya Olimpiki imetolewa huku mabondia wawili wa timu ya taifa Hit Squad, tayari wakifuzu kwa raundi ya pili.

Mshindi wa medali ya dhahabu katika Mashindano ya Africa Zone 3 Championship nchini DRC Elly Ajowi na Elizabeth ‘ Black Current ‘ Akinyi wamefuzu hadi raundi ya pili bila jasho.Ajowi anayezichapa katika uzito wa heavy, ameratibiwa kupepetana na Cruiz Julio wa Cuba katika mzunguko wa pili siku ya jumanne (Julai27,2021).

Siku hiyo ya jumanne, Akinyi atakutana na Panguana Alcinda Helena wa Msumbiji kwa mara nyengine baada ya kukutana katika mashindano ya Africa Zone 3 Championship nchini DRC.

Akizungmzia pigano lake, Akinyi amesema amejiandaa vya kutosha na kurekebisha makosa yaliyojiri walipokutana nchini DRC na ana uhakika wa kung’oka na ushindi katika pigano la uzto wa welter.

Aidha , leo (jumamosi) nahodha Nick ‘ Commander ‘ Okoth atakuwa wa kwanza ulingoni kuzichapa dhidi ya Erdenebat Tsendbaatar wa Mongolia katika pigano la uzito wa unyoya.Okoth amesema kwamba wala hatishwi na yeyote kutokana na mazoezi makali ambayo amepata kwa kipindi cha miaka miwili chini ya wakufunzi wake wenye tajriba.

“Nitaonesha uwezo wangu leo na wala sina hofu na lolote lile,” akasema nahodha huyu anayeshiriki Michezo ya Olimpiki kwa mara ya pili.Siku ya jumapili itakuwa ni zamu ya Christine Ongare kumaliza udhia dhidi ya Magno Irish wa Ufilipino katika pigano la fly.

Ongare amekiri kwamba hana habari na mpinzani wake lakini atapata kumfahamu barabara watakapokabiliana jukwaani huku akiwa na matumaini makubwa ya kuibuka na ushindi.

Akizungumza na wanahabari kutoka Tokyo nchini Japan, kocha mkuu Musa Benjamin amekiri kwamba droo iliyofanywa itakutanisha mabondia wake na mibabe ya ngumi duniani.

‘Ili kuwa bingwa ni lazima umshinde bingwa hivyo sina wasiwasi wala hofu kwa mabondia wangu kwa sababu naamini wana kila uwezo wa kushinda mapigano yao,” akasema kocha Benjamin.

Rais abadilisha simu baada ya jaribio la wadukuzi dhidi yake

RAIS wa Ufaransa Emmanuel Macron alibadilisha simu na nambari yake baada ya ripoti kumfikia kwamba analengwa na wadukuzi wa mitandao wa Israeli maarufu kama Pegasus.

Ofisi ya Rais pia ilisema kwamba Macron aliagiza mabadiliko katika mipango ya usalama wake.

Mnamo wiki hii, gazeti la Le Monde liliripoti kwamba mawaziri 14 wa ufaransa walikuwa wakifuatiliwa na wadukuzi wa Morocco.

Maafisa wa serikali ya Morocco wamekanusha kwamba wamekuwa wakitumia vifaa vya udukuzi kutoka Israeli na kwamba madai hayo ni ya uongo wala hayana msingi.

Israeli ina vifaa vinavyoweza kuvizia simu na tarakilishi na kutwaa habari za watu zikiwemo jumbe, picha na barua pepe.

Haikubainika iwapo iliweka kifaa hicho ikilenga Ufaransa na hasa simu ya Macron lakini nambari yake ina orodha ya watu 50,0000 ambao, inaaminika, wanalengwa na wateja wa NSO Group, waliobuni Pegasus mwaka wa 2016.

Kifaa hicho kina uwezo wa kufanya ujasusi wa mtandao kwa kunasa mawasiliano ya simu na tarakilishi.

Imeripotiwa kwamba wengine wanaolengwa ni marais Baram Salih wa Iraq, Cyril Ramaphosa wa Afrika Kusini na mawaziri wakuu wa Pakistan,Misri na Morocco.

Kinara wa upinzani Tanzania akabiliwa na kesi ya ugaidi

Baada ya kumzuilia kwa takribani siku mbili, polisi walisema kwamba kiongozi wa Chama cha Demokrasia na Maendeleo (CHADEMA), Freeman Mbowe anakabiliwa na tuhuma mbalimbali ikiwemo za kupanga njama za kufanya vitendo vya kigaidi na kuua viongozi wa Serikali.

Taarifa ya Msemaji wa Jeshi la Polisi, David Misime ilisema, bila kutoa maelezo zaidi, kwamba kumekuwa na upotoshaji mkubwa kwamba Mbowe alikamatwa kwa tuhuma za kupanga na kuandaa kongamano la Katiba mpya jijini Mwanza, jambo ambalo si kweli.

“Mbowe alikuwa anafahamu fika kuwa tuhuma zinazomkabili zilikuwa zinachunguzwa na wakati wowote angehitajika na polisi kwa hatua za kisheria mara tu uchunguzi wake utakapokamilika.

Hatua hiyo imefikiwa sasa,” alisema Misime.Misime alisema kwamba Mbowe hakukakamatwa kwa sababu ya kuandaa mkutano wa katiba mpya mbali alitaka kutumia mkutano huo kupotosha umma kuhusu kukamatwa kwake.

Chadema kilisema kwamba polisi walifanya msako katika nyumba ya Mbowe jijini Dar es Salaam na kutwaa laptopu yake na vifaa vingine kutoka kwa watu wa familia yake kabla ya kumhamishia kituo cha polisi cha Central jijini humo.

“Tulipokea habari za kushtusha kwamba Mbowe atashtakiwa pamoja na watu wengine kwa ugaidi,” chama kilisema kwenye taarifa kupitia Twitter.Mbowe na maafisa wengine wa Chadema walikamatwa wakiwa jiji la Mwanza kabla ya mkutano wa kushinikiza mageuzi ya katiba nchini Tanzania.

Mkuu wa polisi wa eneo hilo Ramadhan Ngh’anzi alisema kwamba Mbowe atarejeshwa Mwanza kuungana na washukiwa wengine waliokamatwa kwa kuandaa mkutano uliopigwa marufuku.

“Kwa sasa yuko salama katika kituo cha polisi cha Central jijini Dar es Salaam,” aliambia wanahabari.Kukamatwa kwake kulijiri miezi minne baada ya Rais wa kwanza mwanamke wa Tanzania Samia Suluhu Hassan kuingia mamlakani kufuatia kifo cha ghafla za John Magufuli, ambaye utawala wake ulilaumiwa kwa kukadamiza upinzani.

Mnamo Aprili, Hassan aliahidi upinzani kwamba angetetea demokrasia na haki za kimsingi.Kulikuwa na matumaini makubwa kwamba kungekuwa na mabadiliko Tanzania baada ya utawala wa Magufuli.Hata hivyo, kukamatwa kwa viongozi wa Chadema kumelaaniwa na makundi ya kutetea haki na wanaharakati wa upinzani wakisema ni thibitisho serikali ya Hassan haivumilii wanaoipinga.

Shirika la Amnesty International lilitaja kukamatwa kwa Mbowe na viongozi wa upinzani kama tisho kwa uthabiti ambao nchi hiyo imekuwa ikijivunia eneo hili.

“Serikali ya Tanzania ni lazima ikome kulenga upinzani na kujaribu kufifisha demokrasia,” alisema Flavia Mwangovya, naibu mkurugenzi wa Amnesty International Afrika Mashariki.Ilisema kwamba kukamatwa kwa viongozi wa upinzani Tanzania ni upuuzaji wa utawala wa sheria na haki za binadamu ikiwemo haki za kujieleza na kukusanyika.

Kukamatwa huku kunakochochewa kisiasa kunafaa kukomeshwa,” ilisema taarifa ya shirika hilo.Amerika ilisema itathibitisha maelezo kuhusu kukamatwa kwa Mbowe lakini ikasema kunazua wasiwasi.

WANDERI KAMAU: Rais Samia amevunja ahadi yake kurejesha demokrasia

Na WANDERI KAMAU

TANGU enzi ya hayati Mwalimu Julius Nyerere, Tanzania ni miongoni mwa nchi chache barani Afrika ambazo zimejizolea sifa ya kuwa tulivu na zenye uthabiti mkubwa kisiasa.

Kinyume na Kenya, Uganda, Ethiopia na nchi nyingine za eneo la Afrika Mashariki na Maziwa Makuu, Tanzania haijawahi kukumbwa na mapinduzi ya kijeshi.Kenya ilijipata hapo mnamo Agosti 2, 1982, wakati wanajeshi waasi walijaribu kupindua uongozi wa marehemu Daniel Moi.

Uganda imeshuhudia majaribio kadhaa, ambapo viongozi wake wamegeuka kuwa madikteta. Mfano bora ni Rais Yoweri Museveni, ambaye amekuwa akitumia nguvu na ushawishi wake kuendelea kukwamilia mamlakani.

Simulizi ni kama hizo katika nchi zilizobaki.Hata hivyo, inasikitisha kuwa Tanzania inarejea katika mwelekeo iliyokuwa chini ya marehemu John Magufuli.

Kati ya mwaka 2015 na 2020, Tanzania iligonga vichwa vya habari kutokana na sera kali alizoanzisha Dkt Magufuli, akiapa “kulainisha na kunyoosya mwelekeo wa taifa hilo kisiasa, kiuchumi, kitamaduni na uhusiano baina yake na nchi nyingine duniani.

”Licha ya sifa kubwa alizojizolea, Dkt Magufuli aligeuka kuwa kiongozi wa kidikteta.Aliunyamazisha upinzani, kuwahangaisha wanaharakati wa kisiasa na vyombo vya habari.Ni hali iliyotia doa sifa kubwa aliyokuwa amejizolea kama mwanamapinduzi wa kisiasa na mwendelezaji wa tamaduni za Kiafrika.

Magufuli aligeuka kuwa “Musa wa Waafrika” hadi “Msaliti Mkuu wa Demokrasia.”Kwenye hotuba ya kuapishwa kwake mnamo Machi 19, Rais Samia Suluhu Hassan aliapa “kuondoa makosa ya mtangulizi wake.

”Hata hivyo, inaonekana kuwa Rais Suluhu amesahau ahadi alizotoa na badala yake kufuata nyayo za mtangulizi wake.Mnamo Jumatano, kiongozi wa chama kikuu cha upinzani nchini humo, CHADEMA, Bw Freeman Mbowe alikamatwa na polisi katika hali tatanishi.

Baada ya kukamatwa, alipelekwa mahali kusikojulikana kwa kisingizio cha kuvunja kanuni za kudhibiti maambukizi ya virusi vya corona.Licha ya malalamishi kutoka kwa wafuasi wake, serikali imebaki kimya kuhusu aliko kiongozi huyo.

Ingawa ni kawaida kwa serikali kuchukua hatua kuhakikisha sheria na kanuni zilizowekwa zinafuatwa, mwelekeo ambao Tanzania imechukua umeanza kudhihirisha Rais Samia anairejesha katika enzi ya kiimla.

Demokrasia kamili humaanisha kumpa nafasi kila mmoja kujieleza. Si kumtisha anapotafuta nafasi ya kueleza hisia zake.Rais Samia anapaswa kurejelea ahadi yake ya kuondoa makosa aliyofanya Magufuli, ili kuendeleza sifa ya Tanzania kama chemichemi ya demokrasia.

Sheria Mpya: Madume yalitapeli wanawake!

Na DOUGLAS MUTUA

AKUFUKUZAYE hakwambii ‘toka’. Hiyo ndiyo kauli ya wahenga ambayo inapaswa kutiliwa maanani zaidi na vimada, almaarufu ‘slayqueens’, wanaotafuna pesa za matajiri.

Nasema ‘matajiri’ kwa sababu mkono mtupu tangu hapo haulambwi, na tunaelewa walio nazo tele benki si wengi mno, hasa nyakati hizi za janga la corona.Juzi Bunge limepitisha sheria inayosema kwamba mwanamke na mwanamume wanaoishi pamoja bila kufunga ndoa rasmi hawawezi kurithi mali iwapo mmoja kati yao ataaga dunia.

Sheria hiyo inakinzana na Katiba, inayotambua wazi kuwa mwanamke na mwanamume wakiishi pamoja kwa miaka mitatu wanatambuliwa kuwa mke na mume.Iwapo mtu hatakimbia mahakamani kulalamika kwamba sheria hiyo mpya inawapa waliotawaliwa na taasubi ya kiume mshawasha wa kukiuka Katiba, basi itatumika ilivyo.

Na hapo ndipo ambapo vimada walio radhi kuishi kisiri na matajiri wakisubiri miaka mitatu itimie ili wajitangaze wake zao watakapopata taabu sana.Nasisitiza kuwa vimada hao wanapaswa kutafakari sana kuhusu mustakabali wa mahusiano ya aina hiyo kwa sababu wanaume waliopitisha sheria hiyo hawakuwajali.

Madume walipania kukinga mali yao dhidi ya wapenzi wao. Walisema wapenzi wa siri wana mazoea ya kujitokeza na kuwashtaki wajane ili nao wagawiwe mali mara tu mwanamume tajiri anapofariki.Kuna mambo matatu ya kupendeza kuhusu mtazamo wa wabunge wa kiume ambao walipitisha sheria hiyo kinyume na mapenzi ya wenzao wa kike.

Kwanza, walizungumza kana kwamba wana hakika ya aslimia 100 kuwa wanaume walio na vimada ndio watakaofariki kabla ya vimada wao. Kuishi au kufa ni milki ya Mungu.Pili, walizungumza kana kwamba ni wanaume pekee waliojaaliwa nafasi ya hali katika jamii, hivi kwamba ndio tu wanaokuwa wahanga wa kutafuniwa mali wakifariki.

Si siri kwamba kuna wanawake matajiri na jasiri, ambao hawapepesi macho wanapowatongoza wanaume na kuwaweka rumenya. Mwanamke tajiri akifariki je?Tatu, walimsawiri mwanawake kama kiumbe dhaifu, mlafi na mjanja anyemeleaye mali kama fisi anavyomfuata mtu akidhani mkono ni mnofu unaoweza kuanguka akala nyama.

Tunajua kuna wanaume – hasa vijana wa siku hizi ambao ni wavivu kupindukia – wanaolaza damu na kusubiri kutunzwa na wanawake wenye mafedha ya kumwaga.Kimsingi, kwamba Bunge lilipitisha sheria hiyo ni ithibati tosha kuwa wanaume wa Kenya wamekataa kubadilika – wanawatizama wanawake kama kupe wafyonza damu.

Kwa hivyo, kutokana na ubinafsi wao wa kupindukia, wamejipa fursa ya kipekee ya kuchovya asali bila majukumu ya kulitunza buyu au kuuchonga mzinga.Ikiwa Katiba inatambua mwanamke na mwanamume wakiishi pamoja kwa miaka mitatu ni wanandoa halali, manufaa ya ndoa yenyewe ni yepi ilhali sheria hiyo mpya imeyatwaa?

Wanaume walio na fikra kama hizo wanataka kuendelea kutumia wasichana wa watu kama shashi ambayo hutupwa bila shukrani kwenye chumba cha mtu yeyote mstaarabu.Kwa kuwa wanaume matajiri hawadhani wanaume maskini ni watu, hawajali wala kubali ni yepi yatakayowakumba iwapo wake zao wa miaka mitatu, tena matajiri, wataaga ghafla.

Ajabu ni kwamba, kwa kuwa Kenya ni taifa la kibebari linalozingatia sera za uchumi huru, wanaume na ubabe wote huo hawatakosa vimada wa kutumia na kutupa.

Kisa na maana? Wasiotahadhari wana mji wao; watu wanaotafuta mahusiano kwa madhumuni ya kunufaika kifedha bila kujali kitu kingine chochote hawakosekani.Mmoja akishupaza shingo na kudai ana heshima zake, wa pili ataiona hiyo kama fursa na kuitwaa mara moja!Wanataka pesa za haraka wajiendee zao.

Hiyo ndiyo hali ya mahusiano nchini Kenya. Umalaya, biashara isiyohitaji mtaji, umebatizwa majina yanayotamkika vizuri.Ujuaji unaoitwa usasa haupaswi kuthaminiwa kuliko ukale wenye tija.

Namna ufadhili wa ‘Wings to Fly’ulivyokwamua wanafunzi maskini

Na WINNIE ONYANDO

KWA muda mrefu, maelfu ya watahiniwa wa KCPE ambao walifanya vyema lakini wakakosa karo walitamauka na kupoteza nafasi zao katika shule za kitaifa na za mkoa. Wengi walikuwa mayatima na wale wazazi wao wana mapato ya chini.

Hata hivyo hali hii sasa imebadililka tangu Afisa Mkuu Mtendaji wa Benki ya Equity, Dkt James Mwangi azindue mpango wa Wings to Fly mnamo 2010 ambapo watahiniwa kama hao walipata ufadhili wa kuwezesha kukamilisha masomo yao.

Kufikia sasa, watahiniwa zaidi ya 37, 009 wanaotoka katika mitaa mbalimbali nchini wamejiunga na shule za upili.Mwaka huu, jumla ya watahiniwa 10,705 waliofanya mtihani wao wa KCPE, watapokea ufadhili wa masomo chini ya mipango ya Wings to Fly na Elimu Schorlarship.

Kati ya 10,705 watakaonufaika na ufadhili huo, wasomi 1,705 watajiunga na mpango wa Wings to Fly huku wengine 9,000 wakijiunga na mpango wa Elimu scholarship.Mwaka huu, Benki ya Equitly ilipokea maombi zaidi ya 114,765 kutoka kwa watahiniwa mbalimbali nchini ili kujiunga na mipango hiyo mawili.

Benki hiyo hutoa ufadhili wa masomo, kuwanunulia wafadhili vitabu, sare zote, kugharamia nauli ya kumfikisha mwanafunzi shuleni na hata kumpa mwanafuzi pesa za kukidhi mahitaji yake ya kimsingi akiwa shuleni kwa kipindi cha miaka minne.

Katika hafla ya kuwapongeza watahiniwa 1, 283 kutoka kaunti ya Nairobi iliyofanyika Jumanne katika shule ya Upili ya Wasichana ya Pangani, Dkt Mwangi alisema mipango hiyo haifadhili tu elimu kwa watoto bali pia huwapa ushauri na kuwakuza ili wawe viongozi watakaowakuza wengine.

“Elimu ni mchakato wenye nguvu ya mabadiliko. Ukiwafunza vijana, utakuwa umewakuza viongozi wa kuleta mabadiliko kesho,” alisema Dkt Mwangi akiwahutubia watahiniwa. Dkt Mwangi alihimiza ushirikiano wa karibu na serikali kupitia Wizara ya Elimu ili kuwasaidia wanafunzi zaidi hasa wanaoishi na ulemavu na familia ambazo hazijiwezi kifedha.

Mmoja wa walionufaika na mpango wa Wings to Fly mnamo 2016 alimshukuru Dkt Mwangi kwa kumkweza kutoka maisha ya uchochole hadi chuoni.Bi Mariana Wanjiru alikuwa miongoni mwa wageni waalikwa waliohutubia watahiniwa 1,283 waliobahatika kupata ufadhili kutoka kwa benki ya Equity.

Bi Wanjiru, 20 aliwahimiza watahiniwa hao kutumia nafasi hiyo adimu ipasavyo huku akiwasimulia maisha yake ya awali na jinsi ufadhili huo ulivyompa motisha kutia bidii masomoni ili kuinua familia yake kutoka umaskini mitaani.

“Nilizaliwa na kulelewa mtaani. Mimi na familia yangu tulishinda pipani tukila makombo. Hata nyumba hatukuwa nayo. Nashukuru Dkt Mwangi kwa kuimarisha maisha yangu kielimu,” alisema Bi Wanjiru. Aliwahimiza vijana wanaotoka katika mitaa duni kutozingatia hali yao ya uchochole bali kujiamini na kuwa na moyo wa kuleta mabadiliko katika familia yao.

“Usipotumia nafasi yako vizuri utabaki ukijuta. Dkt Mwangi na wenzake wamejitolea kutusomesha. Usimwaibishe kwa kumletea matokeo mabaya,” aliwasihi watahiniwa.Katika mtihani wake wa kitaifa wa KCSE, binti huyo alizoa alama ya A na kuwa miongoni mwa wanafunzi wachache waliochaguliwa kuendelea na mpango huo hadi Chuo Kikuu.

Dkt Mwangi pamoja na kundi lake waliahidi kumpa mwongozo na kuhakikisha ametimiza ndoto yake. “Tutakaa naye karibu na kumpa mwongozo unaofaa. Ikiwezekana atapata ufadhili wa kusomea ng’ambo,”alisema Dkt Mwangi.

Benki hiyo ikishirikiana na Mastercard Foundation, Serikali ya Ujerumani kupitia KfW, Benki ya Dunia (SEQIP), serikali ya Kenya pamoja na wadhamini wengine wamekuwa wakichanga pesa za kutosha ya kuwafadhili wanafunzi kama hao.

Kamati za uteuzi zinajumuisha wanachama kati ya kumi na moja na kumi na tatu na zinaongozwa na Mkurugenzi wa Elimu wa Kaunti Ndogo kwa msaada na uratibu kutoka kwa matawi mbalimbali ya benki hiyo.

Wao hufanya uteuzi kupitia njia ya mahojiano wa moja kwa moja na wazazi au walezi wa watahiniwa na baadaye kuwatembelea nyumbani ili kuthibitisha hali yao halisi.Mwaka huu, Dkt Mwangi alitoa msaada wa sola, redio, taa na betri kwa familia ambazo hazina nguvu za umeme ili kuwasaidia katika masomo yanayotolewa na KICD inayoenda sambamba na masomo yao.

Mtahiniwa ambaye atapata alama ya A katika mtihani wa kitaifa ya KCPE hupewa ufadhili wa Sh4,000 kwa wasichana na Sh3,500 kwa wavulana kuhakikisha wanamudu mahitaji na kuwaweka mbali na uovu wa kijamii.

Dkt Mwangi aliwahimiza watahiniwa watie bidii katika masomo yao ili kuwaondoa wazazi wao katika maisha duni.w

Vyombo vya habari vishirikiane na NLC kuripoti visa vya unyakuzi wa ardhi

Na SAMMY WAWERU

TUME ya Kitaifa ya Ardhi (NLC) imevihimiza vyombo vya habari kuisaidia katika uangaziaji wa masuala ya ardhi na mashamba nchini.

Taasisi hiyo ya kiserikali iliyotwikwa jukumu la kuangazia mizozo ya ardhi ya wananchi na umma, imesema ushirikiano wake na vyombo vya habari utasaidia kwa kiasi kikubwa kuangazia mizozo ya ardhi.

“Wanahabari na mashirika wanayofanyia kazi wawe huru kuwasiliana na NLC kwa kisa chochote kile cha mzozo wa ardhi,” akahimiza Afisa Mkuu Mtendaji wa NLC, Bi Kabale Tache.

“Vyombo vya habari vishirikiane nasi kuangazia mizozo ya ardhi na mashamba nchini,” akaongeza.

Afisa huyo alisema visa vya mizozo vinavyoshuhudiwa vitaweza kuangaziwa na kupata suluhu, asasi za habari zikijituma kuvifichua.

NLC ilibuniwa ili kusaidia umma kupata haki ya mashamba.

Hata hivyo, baadhi ya maafisa wake wamekuwa wakituhumiwa kushirikiana na wahuni wanyakuzi wa ardhi.