Magoha akasirishwa na maafisa wake kwa kufeli kucheza video

Na CHARLES WASONGA

KIOJA kilishuhudiwa Alhamisi katika Taasisi ya Kuandaa Mtaala Nchini (KICD), Nairobi, Waziri wa Elimu alipozomea maafisa wake hadharani kwa kutomakinika kazini.

Hii ni kufuatia hitilafu iliyotokea na kuchagia kutochezwa kwa kanda ya video ya kuonyesha ufanisi wa mpango wa serikali wa kutoa msaada wa masomo kwa watoto kutoka familia masikini, maarufu kama, Elimu Scholaship Programme”.

Mpango huo, ulianzishwa mwaka jana, 2020, hulenga kufaidi wanafunzi waliofanya mtihani wa kitaifa wa darasa la nane (KCPE) na kupata alama bora lakini hawawezi kupata karo.

“Nitaanza kwa kusema kuwa sijawahi kuhusishwa na utovu wa mipango ninaoushuhudia hapa asubuhi ya leo. Hali hiyo ikome kabisa! Nilitarajia maafisa wahusika kucheza video hii mapema kuhakikisha ni shwari. Sitakubali radhi zenu!”, Magoha akafoka.

Waziri huyo alisema hayo baada ya maafisa wa wizara yake kuomba radhi kufuatia video hiyo kufeli kucheza.

Lakini Profesa Magoha alisema tukio hilo iliabisha wizara yake wakati wa shughuli hiyo ambayo ilihudhuriwa na maafisa wakuu katika wizara yake na wanahabari.

Shughuli hiyo pia ilikuwa inapeperushwa moja kwa moja katika mtandao wa Facebook na You Tube ya Wizara ya Elimu.

Jumla ya wanafunzi 9,000 walipfanya mtihani wa KCPE ya 2020 walipata udhamini wa masomo chini ya mpango huo. Gharama zao zote za masomo kuanzia kidato cha kwanza hadi kidato cha nne zitalipwa chini ya mpango huo unaodhaminiwa na serikali kuu kwa ushirikiano na Benki la Dunia.

Vipusa wa Zambia wapondwa 10-3 na Uholanzi kwenye Olimpiki

Na MASHIRIKA

TIMU ya taifa ya Zambia ambayo inashikilia nafasi ya 104 kimataifa kwa mujibu wa viwango bora vya Shirikisho la Soka Duniani (FIFA), ilipondwa na Uholanzi 10-3 kwenye ufunguzi wa soka ya Olimpiki miongoni mwa wanawake.

Fowadi wa Arsenal, Vivianne Miedema alifungia Uholanzi ambao ni miamba wa bara Ulaya jumla ya mabao manne huku aliyekuwa mwenzake kambini mwa Arsenal, Danielle van de Donk akicheka na nyavu mara tatu.

Nahodha wa Zambia, Barbra Banda pia alifunga mabao matatu licha ya kikosi chake kubebeshwa gunia la magoli.

Kwingineko, fowadi Marta alifunga mabao mawili na kusaidia Brazil kupepeta China 5-0.

Nyota huyo aliweka rekodi ya kuwa mchezaji wa kwanza kuwahi kufunga katika jumla ya mechi tano mfululizo kwenye Olimpiki. Kwa sasa anajivunia mabao 12.

Kwa upande wake, beki Formiga, 43, aliendeleza rekodi ya kunogesha Olimpiki saba mfululizo tangu soka ya wanawake ianzishwe kwenye mashindano hayo mnamo 1996.

Uingereza walianza vyema kampeni zao za Olimpiki kwa kusajili ushindi wa 2-0 dhidi ya Chile kwenye Kundi E. Walifungiwa mabao yao na Ellen White.

Katika mechi nyingine ya Kundi E, wenyeji Japan waliambulia sare ya 1-1 dhidi ya Canada baada ya kiungo wa Arsenal, Mana Iwabuchi wa Japan kufuta juhudi za Christine Sinclair aliyewaweka Canada uongozini mwanzoni mwa kipindi cha kwanza. Kipa Stephanie Labbe wa Canada pia alipangua penalti kwenye gozi hilo.

Sinclair aliendeleza rekodi ya mfungaji bora wa muda wote kambini mwa Canada. Sasa anajivunia mabao 187 na ndiye mchezaji wa nne katika historia kuwa kuchezea taifa lake jumla ya mechi 300.

Katika mchuano mwingine wa Jumatano, Australia walikomoa New Zealand 2-1 baada ya fowadi wa Chelsea, Sam Kerr kufunga bao na kuchangia jingine.

TAFSIRI NA: CHRIS ADUNGO

ReplyForward

David Alaba achukua nafasi ya Sergio Ramos Real Madrid

Na MASHIRIKA

BEKI David Alaba amesema kwamba hana azma ya kuwa kizibo kikamilifu cha aliyekuwa difenda na nahodha wa Real Madrid, Sergio Ramos uwanjani Santiago Bernabeu.

Alaba ambaye ni raia wa Austria, aliingia katika sajili rasmi ya Real mnamo Mei 2021 baada ya mkataba wake kambini mwa Bayern Munich ya Ujerumani kukamilika rasmi.

Sogora huyo mwenye umri wa miaka 29 sasa amepokezwa jezi nambari nne mgongoni iliyokuwa ikivaliwa na Ramos kambini mwa Real.

Ramos aliyehudumu kambini mwa Real kwa kipindi cha miaka 16, alijiunga na Paris Saint-Germain (PSG) bila ada yoyote. Nyota huyo mwenye umri wa miaka 35 alipokezwa mkataba wa miaka miwili kambini mwa PSG ambao sasa wanatiwa makali na kocha wa zamani wa Tottenham Hotspur, Mauricio Pochettino.

“Ramos alikuwa hapa kwa muda mrefu na alivalia jezi nambari nne mgongoni. Nitajituma ila huenda nisiwe kizibo chake kamili,” akasema Alaba.

Ramos ambaye anajivunia rekodi ya kuchezea Uhispania idadi kubwa zaidi ya mechi, alishindia Real mataji matano ya Ligi Kuu ya Uhispania (La Liga) na manne ya Klabu Bingwa Ulaya (UEFA) akiwa Real.

Kwa upande wake, Alaba aliyetia saini mkataba wa miaka mitano kambini mwa Real, alishindia Bayern mataji 10 ya Ligi Kuu ya Ujerumani (Bundesliga), sita ya ya German Cup na mawili ya UEFA.

Alaba atakuwa chini ya mkufunzi Carlo Ancelotti aliyerejea kambini mwa Real mnamo Juni 2021 kujaza pengo la Zinedine Zidane baada ya kuagana rasmi na Everton ya Ligi Kuu ya Uingereza (EPL).

TAFSIRI NA: CHRIS ADUNGO

Wakenya Hamza Anwar, McRae Kimathi na Jeremy Wahome wawania taji la mbio za magari Tanzania

Na GEOFFREY ANENE

MADEREVA Hamza Anwar, McRae Kimathi na Jeremy Wahome, ambao wako katika mradi wa chipukizi kukuzwa na Shirikisho la Mbio za Magari Duniani (FIA), wamejaa matumaini ya kufanya vizuri kwenye duru ya tatu ya Afrika nchini Tanzania mnamo Julai 23-25.

Wakenya hao wanaodhaminiwa na kampuni ya mawasiliano ya Safaricom na ile ya ndege ya Kenya Airways, walielekea Tanzania mapema Julai 21 kwa duru hiyo ambayo imevutia makumi ya madereva kutoka mataifa ya Kenya, Tanzania, Uganda na Afrika Kusini.

Wahome,22, Anwar,22, na Kimathi,26, walishiriki duru ya sita ya Mbio za Magari Duniani (WRC) Safari Rally nchini Kenya mnamo Juni 24-27. Akielekezwa na Victor Okundi, Wahome alimaliza katika nafasi nzuri ya 16.

Anwar na mwelekezi wake Riyaz Ismail walikamilisha Safari Rally katika nafasi ya 25 naye Kimathi akishirikiana na Mwangi Kioni alijizulu katika mkondo wa 18, hatua chache kabla ya sehemu ya kumalizia mashindano. Wote waliendesha magari ya Ford Fiesta watakayotumia tena nchini Tanzania.

“Nafurahia sana kupata fursa hii kwa sababu ni mara yangu ya kwanza kushiriki mashindano ya Afrika. Ni mtihani mpya, lakini naamini ujuzi niliopata kutoka kwa Safari Rally utanisaidia kupata matokeo mazuri,” alisema Wahome.

Hamza na Kimathi walishiriki duru ya Afrika ya Equator Rally nchini Kenya mwezi Aprili. Hamza alimaliza katika nafasi ya tano akiendesha gari la Mitsubishi Evo X naye Kimathi akakamata nafasi ya nane. Mshindi wa Equator Rally, Car “Flash” Tundo (Volkswagen Polo) pamoja na Aakif Virani (Skoda Fabia) ni Wakenya mwingine walio Tanzania.

MMUST, Kabras kualika Quins and Oilers ugani Nandi Bears

Na GEOFFREY ANENE

LIGI Kuu ya raga nchini itarejea katika kaunti ya Nandi kwa mara ya kwanza baada ya miaka nyingi wakati klabu ya gofu ya Nandi Bears itakuwa mwenyeji wa michuano miwili ya ligi hiyo maarufu kama Kenya Cup, mnamo Julai 24.

Timu ya Chuo Kikuu cha Masinde Muliro (MMUST) itaalika mabingwa wa zamani Kenya Harlequin kutoka kaunti ya Nairobi saa sita adhuhuri kabla ya wafalme wa 2016 Kabras Sugar kukaribisha Menengai Oilers kutoka kaunti ya Nakuru saa nane mchana. MMUST na Kabras wanatoka kaunti ya Kakamega, lakini watakuwa wakitumia uwanja wa Nandi Bears kama wao wa nyumbani hapo Jumamosi.

Mechi nyingine tatu zimeratibiwa kusakatwa jijini Nairobi.

Uga wa RFUEA kwenye barabara ya Ngong Road utatumiwa kwa michuano miwili ambayo ni Strathmore Leos kutoka mtaani Madaraka dhidi ya mabingwa wa zamani Top Fry Nakuru kutoka Nakuru na washikilizi wa rekodi ya mataji mengi Nondescripts dhidi ya wanafunzi wa Chuo Kikuu cha Kenyatta (Blak Blad).

Mabingwa watetezi KCB watakuwa nyumbani katika uwanja wa KCB Ruaraka kuzichapa dhidi ya washindi wa zamani Mwamba. Mashabiki hawaruhusiwi uwanjani katika michuano hiyo yote kwa sababu ya hatari ya virusi vya corona.

Ratiba ya Kenya Cup (Julai 24):

Masinde Muliro vs Kenya Harlequin (12.00pm, Nandi Bears)

Strathmore Leos vs Top Fry Nakuru (1.00pm, RFUEA)

Kabras Sugar vs Menengai Oilers (2.00pm, Nandi Bears)

Nondescripts vs Blak Blad (3.00pm, RFUEA)

KCB vs Mwamba (3.00pm, KCB Ruaraka).

Dereva asimulia jinsi alivyookoa abiria basi lilipovamiwa na magaidi

SIAGO CECE na FARHIYA HUSSEIN

HEBU tafakari kuhusu hali ambapo unakumbana na shambulio la kigaidi ambalo nusura litamatishe maisha yako.

Hata hivyo, lazima utumie njia lilikotokea, kwa kusafiri umbali wa kilomita 300 kila siku. Abdul Abdalla, 41, ni dereva wa basi.

Amekuwa akisafiri kati ya miji ya Lamu na Mombasa kwa muda wa miaka 12.Hata hivyo, hana mipango ya kuacha kazi yake, licha ya kuwa miongoni mwa madereva ambao wamekumbana na mashambulio hatari zaidi ya kigaidi.

Alinusurika kwenye shambulio la basi katika barabara ya Lamu-Witu-Garsen na lile la Mpeketoni mnamo 2014, ambapo mamia ya watu waliuawa.

“Walifyatulia risasi basi nililokuwa nikiendesha mara tano katika kioo kilicho katika eneo la dereva. Ni kama walikuwa wakilenga kuharibu magurudumu. Wakati huo wote, nilikuwa nimeangalia chini. Baadaye, nilianza kupunguza mwendo. Ikiwa singefanya hivyo, wangetuua sisi sote,” akasema Abdalla.

Kwenye mahojiano na Taifa Leo, Abdalla anaeleza kuwa siku hiyo, alikuwa ameondoka Mombasa mwendo wa saa nne asubuhi, akiwa amewabeba abiria 62 katika basi la Kampuni ya Mabasi ya Tawakal. Alikuwa akielekea Lamu.

“Nilifika Malindi mwendo wa saa sita mchana. Baadaye, nilielekea katika eneo la Gamba ambako nilifika karibu saa tisa mchana. Hata hivyo tulipokuwa tukikaribia kufika eneo la Nyangoro, umbali wa kilomita 50 kutoka Mokowe, basi letu lilianza kufyatuliwa risasi katika kioo kilicho eneo la dereva. Ikiwa singelisimamisha, abiria wote wangeuliwa,” akasema.

Alisema kuwa baadaye, vijana wanne waliingia katika basi na kusema walikuwa wakiwatafuta watu ambao si Waislamu.

“Nilijawa na wasiwasi. Niliangalia nyuma lakini sikumwona manamba. Walienda kwa kila abiria na kumwambia kusema ombi la Kiislamu liitwalo ‘Shahada.’ Baadaye walikagua kila sehemu ya basi hilo na kuondoka,” akaelezea.

Bw Abdalla alisema kuwa Wakristo waliokuwepo katika basi walifichwa na abiria Waislamu vichwani mwao, huku wengine wakijificha chini ya viti na kujifunika kwa mikoba yao.

Kwenye mashambulio yaliyotokea awali, watu ambao si Waislamu walikuwa wakiuliwa na wapiganaji wa makundi ya kigaidi.

Alisema kuwa jambo jingine lililowaokoa watu hao ni maandishi ya Kiarabu yaliyokuwa yameandikwa kwenye basi hilo, ambapo wahalifu hao waliyafasiri kuwa basi hilo lilimilikiwa na Waislamu.

Alisema wanamgambo hao walisema hawakumpata yule walikuwa wakimtafuta. Alieleza walikuwa vijana wenye umri wa kati ya miaka 22 na 25.

Mmoja alikuwa akitumia simu kurekodi video huku mwingine akiwa amebeba mkoba mkubwa.“Mmoja alikuja nilikokuwa na kunikumbatia. Alinieleza kwamba tunaweza kuondoka na sipaswi kumweleza yeyote kuhusu yale yaliyotokea,” akasema.

Alieleza kuwa baada yao kusoma maandishi yaliyokuwa yameandikwa kwenye basi hilo, walifasiri kila abiria alikuwa Mwislamu.

Kulingana naye, basi hilo lilipigwa risasi zaidi ya mara nane.“Waliponiambia kuondoka, basi halingeweza kwenda kwani baadhi ya sehemu zake zilikuwa zishaharibika. Hata hivyo, nililizima na kuliwasha tena ambapo nilifanikiwa kuondoka walikokuwa,” akaeleza.

Alisema kuwa wakati gari lilipokataa kwenda, mmoja wa magaidi hao alijaribu kuliendesha japo likakataa.

“Ni kama walikuwa na haraka na muda wao ulikuwa umeisha,” akaeleza.Baada ya kwenda umbali wa karibu kilomita moja, basi hilo lilisimama kwa sababu mafuta yalikuwa yakimwagika.

Kwa bahati nzuri, kulikuwa na dereva mwingine aliyekuwa akimfuata kwa gari aina ya Probox. Alisema hakukutana na magaidi hao. Dereva huyo alikimbia katika Kituo cha Polisi cha Witu kuripoti tukio hilo.

Kulikuwa na ndege aina ya helikopta zilizokuwa zikipaa katika eneo hilo kuwasaka wanamgambo wa kundi la Al Shabaab, waliohofiwa kujificha katika Msitu wa Boni.

Wazazi wa watoto waliouawa wakiri walijua Masten Wanjala

Na MARY WAMBUI

WAZAZI wa watoto waliotekwa nyara na kunyonywa damu na Masten Wanjala, 20, jana walikiri kuwa walimfahamu vyema mshukiwa kabla ya kugeuka kuwa muuaji wa watoto wao.

Wazazi hao waliofika katika mochari ya City jijini Nairobi, wakati wa shughuli ya upasuaji kubaini kilichosababisha vifo vya watoto hao, walisema kwamba, hawakudhani kwamba Masten waliyemfahamu angedhuru watoto wao.

Masten anadaiwa kuua watoto 13 baada ya kuwanyonya damu katika maeneo mbalimbali nchini.Wazazi waliogubikwa na majonzi waliketi nje ya chumba cha upasuaji ambapo Afisa Mkuu wa Upasuaji wa Serikali Dkt Johansen Oduor aliongoza kikosi cha maafisa kutoka Idara ya Upelelezi wa Uhalifu (DCI) katika juhudi za kubaini kilichosababisha vifo vya watoto hao.

Miili miwili iliharibika kiasi cha kutotambuliwa. Moja kati ya miili hiyo ilisalia mifupa tu.Wazazi wa Junior Mutuku Musyoka, 12, na Charles Were Opindo, 13, baadaye walitambua miili ya wana wao.

Wavulana hao walitoweka kijijini Kitui katika mtaa wa mabanda wa Majengo walipokuwa wakicheza kati ya Juni 7 na Juni 30, mwaka huu.

Baadaye, miili yao ilipatikana ikiwa imetupwa vichakani katika eneo la Kabete.Jana, Dkt Oduor alisema wavulana hao wawili walikufa baada ya kunyongwa na walikuwa na majeraha kichwani.

Huku familia hizo zikijiandaa kwa ajili ya mazishi ya wanao, familia ya Brian Omondi aliyetoweka kijijini hapo mnamo Juni 10, mwaka huu, bado haijafanikiwa kupata mwili wake.

Wanashuku kuwa huenda mwili wake ni miongoni mwa maiti mbili ambazo hazijatambuliwa.

Mama yake, Grace Adhiambo alisema kuwa, walifika mochari kutafuta mwili wa mwanawe lakini hawakuupata. “Mshukiwa alipokamatwa, nilipeleka picha ya mwanangu kwa maafisa wa DCI ili wamwonyeshe mshukiwa ikiwa atamtambua,” akasema Bi Adhiambo.

Alisema kuwa maafisa wa DCI walipomwonyesha picha alisema: “Aah ni Brian, huyu nilimuua na nikatupa mwili kwa maji.”

“Hicho ndicho kilitufanya kuamini kwamba mwili wa mwanangu ni miongoni mwa maiti zilizopatikana.”

Moja ya miili ambayo haijatambuliwa ni mvulana na mwingine ambao umesalia mifupa ni msichana.Familia nyingine ambayo haijapata mwili wa binti yao ni ya Halyma Hassan aliyetoweka Februari mwaka huu.

Baba ya Halyma, Hassan Suleiman, 40, alisema kuwa bintiye wa umri wa miaka minane, alitoweka katika hali ya kutatanisha.

Uhuru asisitiza mipango ya BBI bado ipo

Na WAANDISHI WETU

RAIS Uhuru Kenyatta amesisitiza kuwa mpango wa kurekebisha katiba bado upo, huku akiwasuta wanasiasa wanaopinga mipango hiyo.

Urekebishaji katiba kupitia kwa Mpango wa Maridhiano (BBI) ulipigwa breki wakati mahakama kuu ilipoamua ulikuwa haramu, na kuna kesi ya rufaa inayojaribu kufufua shughuli hiyo.

“Mimi sitishwi na mtu. Waseme wanavyotaka. Sisi tunataka kupitisha hii BBI ili tuhakikishe hakuna mtu anaweza kumhamisha mwenzake popote, kuwe na haki na sauti ya kila Mkenya itiliwe maanani kila mahali,” Rais alisema jana akiwa eneo la Rabai, Kaunti ya Kilifi.

Alikuwa katika ziara ya kukagua miradi mbalimbali ya maendeleo na kukabidhi wananchi hatimiliki za ardhi 2,100.

Msimamo huo wa rais ni sawa na ule ambao umekuwa ukitolewa na Kiongozi wa ODM, Bw Raila Odinga ambaye husema kuwa mchakato wa BBI uko katika kipindi cha mapumziko.

Wakosoaji wa marekebisho ya katiba wakiongozwa na Naibu Rais William Ruto wameendelea kudai kuwa mpango huo unalenga kunufaisha wanasiasa wachache wanaomezea mate viti vitakavyoundwa kama vile vya waziri mkuu na manaibu wake endapo katiba itarekebishwa.

Wakati huo huo, Rais Kenyatta ambaye aliandamana na viongozi mbalimbali akiwemo Gavana wa Kilifi, Bw Amason Kingi, aliingilia mjadala ulioibuka nchini kuhusu uundaji wa muungano mkubwa wa kisiasa kabla mwaka wa 2022.

Duru zimekuwa zikisema rais ananuia kuleta pamoja vigogo wa kisiasa waliokuwa katika mrengo wa NASA mwaka wa 2017, ili waungane na wengine katika uchaguzi ujao.

Vigogo hao wanajumuisha Bw Odinga, Kiongozi wa Wiper, Bw Kalonzo Musyoka, mwenzake wa Amani National Congress (ANC), Bw Musalia Mudavadi, Mwenyekiti wa KANU Gideon Moi ambaye pia ni Seneta wa Baringo, na Seneta wa Bungoma, Bw Moses Wetang’ula.

Kumekuwa na sintofahamu kuhusu muungano wa One Kenya Alliance (OKA) ulioanzishwa na Mabw Mudavadi, Moi, Musyoka na Wetang’ula kwa vile inasemekana hawajaelewana kuhusu mwelekeo watakaochukua.

Kuna uwezekano wa muungano huo kumtenga Bw Odinga kwani wenzake waliokuwa pamoja katika NASA wanasisitiza kuwa walikubaliana ataunga mkono mmoja wao katika uchaguzi ujao, msimamo ambao unapingwa na ODM.

“Wale ambao hawataki watu waje pamoja, hao si watu walio na suluhu kwa shida zinazotukumba. Lazima tuhakikishe tumepata njia ambayo viongozi watakaa pamoja, washirikiane kuleta Wakenya pamoja wala si kuwatenganisha. Kutenganisha viongozi kutaleta vita kwa wananchi na tunataka amani. Hiyo ndiyo barabara ninaomba wenzangu wafuate muone hatua tutakayopiga,” akasema.

Ziara ya rais eneo la Kilifi na Pwani kwa jumla imefanyika siku chache baada ya Dkt Ruto kuzuru eneo hilo kupigia debe azimio lake la kutaka kuwania urais 2022.

Ripoti za Anthony Kitimo, Maureen Ongala na Valentine Obara

Majaji wanaswa

STEVE OTIENO na WANDERI KAMAU

MAJAJI wawili wa Mahakama Kuu jana walikamatwa na kuhojiwa katika Idara ya Upelelezi wa Jinai (DCI) pamoja na madereva wao kuhusiana na madai ya kupokea rushwa.

Majaji Said Juma Chitembwe na Aggrey Muchelule walikamatwa na kuhojiwa katika afisi za hiyo wakidaiwa kushiriki ufisadi na kupokea hongo.

Kulingana na wakili Dunstan Omari, anayewawakilisha majaji hao wawili, walikamatwa mwendo wa saa sita mchana jana. Afisi za majaji hao zinapakana kwa karibu.

“Mtu mmoja aliyejifanya mwanafunzi aliingia katika afisi ya Jaji Chitembwe. Baadaye, Jaji Chitembwe aliingia katika afisi ya Jaji Muchelule, aliyekuwa akijitayarisha kutoa maamuzi kadhaa. Hata hivyo, Muchelule hakuandamana na Jaji Chitembwe na mgeni wake,” akasema wakili huyo.

Jaji Chitembwe alikamatwa na maafisa kadhaa wa DCI alipokuwa akiondoka afisini mwake. Baada ya kukamatwa, walirejea katika afisi ya Jaji Muchelule ambapo alikamatwa pia.

Kulingana na Bw Omari, maafisa hao hawakupata chochote baada ya kufanya ukaguzi mkali katika afisi zao. Ni baada ya hilo ambapo walipelekwa katika afisi za DCI, Nairobi.

Jaji Muchelule alihudumu kama kamishna katika Tume ya Huduma za Mahakama (JSC), ambapo aliwakilisha Mahakama Kuu.

Jaji huyo pia ni miongoni mwa majaji sita ambao Rais Uhuru Kenyatta alikataa kuidhinisha uteuzi wao, licha ya kupendekezwa na JSC kuteuliwa kama majaji.

Bw Omari alitaja hatua hiyo kama mwendelezo wa vitisho dhidi ya mahakama.

“Hivi ni vitisho ambavyo vimekuwa vikiendelezwa na serikali dhidi ya Idara ya Mahakama,” akasema.

Wakili Ahmednassir Abdullahi akasema: “Ikiwa serikali inataka kuivuruga Idara ya Mahakama, inapaswa kuimarisha mbinu zake. Kuwatisha majaji kwa sababu wanatoa maamuzi ambayo hayafurahishi serikali na wanasiasa hakufai hata kidogo.”

Jaji Chitembwe anahudumu katika Kitengo cha Kushughulikia Mizozo ya Kiraia katika Mahakama Kuu, Milimani, Nairobi.

Jaji huyo alikuwa miongoni mwa majaji waliotuma maombi kujaza nafasi ya Jaji Mkuu.

Mnamo 2009, Jaji huyo alikamatwa na makachero wa Tume Maadili na Kupambana na Ufisadi (EACC) jijini Mombasa kwa tuhuma za uporaji wa Sh1.37 bilioni na matumizi mabaya ya mamlaka.

Hata hivyo, kesi hiyo ilitupiliwa mbali baada ya miaka mitatu. Aikuwa ameshtakiwa pamoja na mojawapo ya wasimamizi wakuu wa Hazina ya Kusimamia Malipo ya Uzeeni (NSSF), Bi Rachel Lumbasyo. Mahakama ilisema hawakuwa na makosa yoyote.

Mnamo 2017, alimwachilia huru mwanamume aliyekabiliwa na shtaka la kumdhulumu kimapenzi msichana mchanga. Uamuzi huo ulikashifiwa vikali , wakosoaji wakisema hakuzingatia taratibu za kisheria.

Jaji huyo alisomea katika Chuo Kikuu cha Nairobi, ambako alihitimu kwa Shahada ya Masuala ya Sheria (LLB) mnamo 1990.

Baadaye, alirudi katika chuo chicho hicho kusomea shahada ya uzamili kuhusu sheria japo hakukamilisha.

Badala yake, aliekekea katika Chuo Kikuu cha Wessex, nchini Uingereza, alikosomea shahada ya uzamili katika Masuala ya Haki za Binadamu. Amekuwa akihudumu katika Idara ya Mahakama tangu alipomaliza masomo yake katika chuo kikuu.

Alijiunga na idara hiyo mnamo 2009. Amehudumu kama jaji katika maeneo ya Kakamega, Malindi, Marsabit na Migori.

Kabla ya hapo, alihudumu kama katibu katika NSSF kati ya 2003 na 2009. Alianza kampuni yake ya uwakili jijini Mombasa mnamo 1994.

Rais Uhuru Kenyatta amekuwa akilaumiwa kwa kuwatisha majaji tangu Jaji Mkuu David Maraga alipotupilia mbali uchaguzi wa urais mnamo 2017.

Wazimamoto wafaidika kwa mafunzo ya kisasa

Na KENYA NEWS AGENCY

KIKOSI cha Kukabili Mioto cha Jimbo la Minnesota, Amerika, kimeanza kutoa mafunzo maalum kwa wazimamoto katika Kaunti ya Kisii kuhusu njia za kisasa za kukabili mikasa ya mioto.

Kikosi hicho kinaongozwa na Bw Mark Lynde, huku mafunzo hayo yakiendelea kwa muda wa wiki moja.

Akihutubu katika hoteli moja mjini humo, Bw Lynde alisema anaandamana na kundi la wataalamu wenye tajriba kubwa kuhusu njia za bora za kuzima mioto.

Alieleza kuwa wataalamu hao watawasaidia wazimamoto katika kaunti hiyo kuimarisha ujuzi wao katika kukabili mikasa ya moto.

“Idara ya Kukabili Mioto katika kaunti hii huwa inaendesha vituo 24 vilivyo na zaidi ya wazimamoto 400. Lengo la kuwaleta wataalamu hao ni kuwasaidia kuimarisha na kuboresha ujuzi wao,” akasema.

Bw Lynde alisema kuwa kando na mafunzo, watatoa mchango wa vifaa maalum kuisaidia idara hiyo kuimarisha huduma zake.

Hilo ni kufuatia ombi lililowasilishwa kwao na serikali ya kaunti hiyo.Gavana James Ongwae alikubali kiwa ingawa Kituo cha Kukabili Mioto kilicho mjini Kisii ni miongoni mwa vituo vikubwa zaidi katika eneo hilo, hakina vifaa vya kutosha vya kutoa mafunzo.

Pande hizo mbili zimekuwa zikiendesha mpango wa pamoja kuhusu njia za kukabili mikasa kwa muda wa miaka tisa iliyopita.

Sera ya wajawazito kuingia darasani ifutwe, walimu warai

Na CHARLES WANYORO

WALIMU wa shule za upili katika eneobunge la Tigania Magharibi, wameitaka serikali kubatilisha sera yake ya kutaka wanafunzi wa kike waliopata uja uzito kusalia shuleni.

Walisema sera hiyo itachangia ongezeko la visa vya wanafunzi wa kike kupata uja uzito wakiwa shuleni.

Mwenyekiti wa Chama cha Walimu Wakuu wa Shule za Upili (KESSHA) katika kaunti hiyo ndogo Martha Githinji alisema wameshindwa kulaani visa hivyo kwa sababu wamelazimishwa kuwadumisha shuleni wanafunzi waliopata uja uzito.

Alisema wenzake hawako tayari kuwa na wanafunzi wenye uja uzito na wanaonyonyesha na wakaitaka Wizara ya Elimu kubatilisha sera hiyo kama njia ya kupalilia maadili miongoni mwa wanafunzi wa kike.

Akiongea katika soko la Kianjai ambapo walimu wakuu wa shule 50 za upili na wengine 135 wa shule za msingi walipokea matangi ya maji kutoka kwa kamati ya CDF, Bi Githinji alipendekeza kuwa wasichana wenye uja uzito wanapaswa kukaa nyumbani.Matangi hayo ya lita 3,000 yanalenga kusaidia katika mpango wa utekaji wa maji.

“Tunaomba serikali iangalie upya sera hiyo… Wanafunzi kama hao wanaweza kusalia nyumba hadi watakapojifungua. Baada ya hapo wanaweza kurejea shuleni na kwa namna hii tudumishe nidhamu katika jamii. Tusiporekebisha hili, wanafunzi wengine wa kike wataiga mwenendo huo au wao wao wakarudia uovu huo,” Bi Githinji akasema.

Kaunti ya Meru ni miongoni mwa zile ambazo ziliandikisha idadi kubwa ya watahiniwa wa kike wa mtihani wa kitaifa wa kidato cha nne (KCSE) waliofanya mtihani huo wakiwa na uja uzito.

Bi Githinji, ambaye ni Mwalimu Mkuu wa Shule ya Upili ya Wasichana ya Mituntu, alisema wenzake wameshindwa kuwashauri wanafunzi wa kike dhidi ya kupata mimba za mapema.Hii ni kwa sababu wanawaona wenzao ambao wana uja uzito wakiendelea na masomo kama kawaida.

Bi Githinji alisema inaonekana kuwa serikali imeshindwa kushughulikia kero za mimba za mapema shule. Kwa hivyo, alitoa wito kwa wazazi na wanajamii kwa ujumla kuwafunza matineja kuhusu hatari na madhara ya mimba za mapema.

“Wanafunzi hawa huwa hawapachikwi mimba shuleni bali nje ya shule. Tunapolazimishwa kuwadumisha shuleni wanafunzi wenye mimba hadi watakapojifungua, tutashindwa kabisa kuwashauri wenzao kwamba ni makosa kupata uja uzito kabla ya kukamilisha masomo,” akasema Bi Githinji.

BENSON MATHEKA: Serikali haifai kupuuza ripoti ya Human Rights Watch

Na BENSON MATHEKA

Ripoti ya shirika la Human Rights Watch iliyofichua kwamba Sh10 bilioni ambazo serikali ilisema zilitumiwa kusaidia watu maskini kukabiliana na makali ya corona zilinufaisha machifu, jamaa zao na za maafisa wakuu serikalini inaonyesha kiwango cha uozo wa ufisadi nchini.

Serikali ilitangaza msaada huo mwaka jana ilipoweka kanuni kali za kuzuia msambao wa virusi vya corona zilizoathiri uchumi.

Ilisema kwamba pesa hizo zingetumiwa kukinga maskini waliokuwa hatarini hasa katika mitaa ya mabanda mijini.

Kulingana na ripoti hiyo, pesa hizo zilifikia asilimia 4.8 pekee ya waliolengwa kunufaika, kumaanisha nyingi ziliporwa au kuelekezwa kwa watu ambao hawakufaa kuzipata.

Kwa kuwa serikali ilikanusha ripoti hiyo licha ya ushahidi kukusanywa kutoka mashinani, inawezekana kuwa ilidanganya ilikuwa imejitolea kusaidia maskini kukabiliana na makali ya janga la corona ilhali iliwaacha wateseke.

Kwa kila hali, ripoti hiyo inafichua jinsi maafisa wakuu serikalini wanavyotumia raia kupora mali ya umma.

Inaanika wazi mbinu chafu ambazo maafisa wa serikali hutumia kuficha ufisadi wakisingizia wanalenga kusaidia akina yahe.

Sio mbinu geni kwa kuwa imekuwa ikifanya hivi kila wakati mara mikasa au majanga yanapotokea.

Inatumia hali ya ukame na mafuriko kutenga na kuomba misaada ya mabilioni ya pesa ambazo huwa zinaporwa huku waathiriwa wakiendelea kuteseka na hata kufariki.

Sio mara moja serikali imetoa pesa kununua chakula cha misaada ambacho hakifikii wakazi wanaokihitaji huku ripoti za uhasibu zikionyesha mabilioni yalitumika.

Kwa maafisa wa serikali wanaopata mshahara kila mwezi kutoka kwa ushuru unaotozwa umma na kisha kunufaika na pesa zinazotengwa kusaidia wakazi wanapoathiriwa na janga ni kilele cha ukosefu wa utu.

Badala ya kukanusha ripoti ya Human Right Watch, serikali ingeitumia kubaini makosa yalivyotokea, waliohusika na washirika wao.

Kukanusha haraka bila kubainisha ukweli kunaonyesha kuwa kuna kitu ambacho serikali au maafisa wake waliohusika wanataka kuficha.

Kufanya hivi ni kufunika kidonda kinachotoa usaha kwa kitambaa chepesi.Hii ndio sababu imekuwa vigumu kukomesha ufisadi humu nchini kwa kuwa wanaopaswa kufanya hivyo ndio huwa msitari wa mbele kuuficha, kuutekeleza au kukinga wahusika.

Wakifaulu kuuficha huwa wanasubiri kwa hamu janga jingine litokee walitumie kupora mabilioni zaidi kujilimbikizia utajiri huku wanaosingizia kusaidia wakiteseka.

Hivi ndivyo ilivyoshuhudiwa katika kashfa ya mabilioni yaliyotengwa kukabiliana na janga la corona. Huu ndio ukweli uliofanya maafisa wa serikali kukanusha ripoti ya Human Right Watch.

CHARLES WASONGA: Raia wanabaguliwa katika utekelezaji sheria za corona

Na CHARLES WASONGA

NAKUBALIANA na kauli ya maafisa wa afya katika kaunti ya Nairobi kwamba wanasiasa ndio wanachochea ongezeko la visa vya maambukizi ya Covid-19 kwa kukiuka masharti ya kudhibiti kuenea kwa ugonjwa huu hatari.

Katika siku za hivi karibuni, kaunti za Nairobi na Kiambu zimeandikisha ongezeko la visa vya maambukizi mapya kutokana na kampeni za kisiasa zilizoendeshwa na wanasiasa kuelekea chaguzi ndogo za eneo bunge la Kiambaa na wadi ya Maguga.

Ingawa, mnamo Mei 30 serikali ilipiga marufuku mikutano ya hadhara ya kisiasa kwa muda wa siku 60 zaidi, wanasiasa wa vyama na mirego yote wamekuwa wamekaidi marufuku hiyo; ilivyodhihirika katika changuzi hizo zilizokamilisha juzi.

Hii ni dhihirisho kwamba wanasiasa wetu, wakiongozwa na Rais Uhuru Kenyatta, huwa hawajifunzi kutokana na makosa yao ya siku za nyuma.

Inakumbukwa kwamba ukaidi huu wa wanasiasa ndio ulichangia ongezeko la maambukizi ya corona katika kaunti za Nyanza na Magharibi.

Visa viliongezeka katika maeneo hayo baada ya sherehe za kitaifa za Madaraka Dei kuandaliwa jijini Kisumu ambapo wanasiasa waliwahutubia wananchi na kuchochea msambao wa aina ya virusi vya corona ijulikanayo kama, Delta.

Baadaye serikali iliweka masharti zaidi ya kuzuia maambukizi kwa kuongeza muda wa kafyu na kufunga masoko ya wazi, hali iliyowaumiza zaidi raia wa kawaida.

Isitoshe, hivi majuzi kiwango cha maambukizi kilipanda katika kaunti ya Nakuru baada ya mbio za dunia za magari almaarufu, Safari Rally kuandaliwa katika eneo la Naivasha.

Kwa hivyo, inavunja moyo huku wananchi wa kawaida wakiendelea kushurutishwa kuzingatia masharti ya kudhibiti janga la corona, huku serikali ikikosa kufanya chochote kuwaadhibiti wanasiasa wanaokiuka masharti yayo hayo.

Hii ni licha ya wanasayansi kuonya kwamba kwamba Kenya iko hatari ya kuathiriwa na mlipuko wa wimbi la nne la maambukizi ya corona.Ingawa, kwa ujumla, idadi ya maambukizi ambayo yananakiliwa nchini ni ndogo ikilinganishwa na ya mapema mwaka huu.

Kenya ingali ni miongoni mwa mataifa 10 barani Afrika ambayo yanaandikisha idadi za juu za maambukizi na vifo kutokana na gonjwa hili hatari.

Kwa hivyo, serikali inapaswa kuendelea kukaza kamba kwa kuhakikisha masharti yote ya kuzuia msambao wa corona yanazingatiwa na wananchi wote bila kuzingatia matabaka yao.

Kwa mfano, hamna haja ya wanasiasa kuhuruhusiwa kuhutubia mikutano ya hadhara baada ya kuhudhuria ibada za Jumapili katika makanisa mbalimbali nchini.

Wale wanaendeleza mtindo huu, hatari kwa maisha, ni Naibu Rais William Ruto na kiongozi wa chama cha Amani National Congress (ANC) Musalia Mudavadi.Kila Jumapili utawapata wawili hawa wakihutubia mikutano nje ya makanisa bila kujali kwamba hiyo ni mojawapo ya njia kuu za kueneza virusi vya corona.

Kinachoudhi hata zaidi ni kwamba kando na kukaidi kanuni ya kutokaribiana, wanaokongamana kuwasikiliza wanasiasa hao huwa hawavalii barakoa au huzivalia visivyo.

Juzi, kiongozi wa ODM Raila Odinga, naye alihutubia mkutano wa hadhara alipofanya kwenye ziara katika kaunti ya Tana River, akisahau kuwa amewahi kuwa mwathiriwa wa Covid-19.

Ikiwa serikali imeshindwa kuwachukulia hatua wanasiasa wanaovunja masharti ya kuzuia kuenea kwa janga hili, basi iondoe ya masharti yanayowaumiza raia kiuchumi, kama vile kafyu na magari ya abiria kubeba idadi ndogo ya abiria.

Magoha azindua mpango wa kutoa msaada wa masomo kwa watoto kutoka jamii masikini

Na CHARLES WASONGA

WAZIRI wa Elimu Profesa George Magoha Alhamisi aliwazindua watahiniwa 9,000 wa mtihani wa KCPE, 2020 ambao wamefaidi kutoka mpango wa msaada wa  msaada wa masomo unaofadhiliwa na serikali kuu kwa ushirikiano na Benki ya Dunia.

Wanafunzi hao kutoka familia masikini kutoka mashambani na katika mitaa ya mabanda ni miongoni  wa zaidi ya wanafunzi 45,000 waliotuma maombi ya msaada huo.

Akiongea katika hafla ya iliyofanyika katika ukumbu wa Taasisi ya Kuandaa Mtaala Nchini (KICD) Profesa Magoha alisema kuwa msaada huo, maarufu kama, “Elimu Scholars Programme” utagharamia mahitaji yote ya wanafunzi hao kwa miaka minne.

“Msaada huu wa masomo ni kamilifu. Wanafunzi hawa watalipiwa karo zote, nauli na kupewa fedha za matumizi kuanzia kidato cha kwanza hadi kidato cha nne. Hii ni kuanzia mwaka huu wa masomo unaoanza Jumatatu, Julai 26,” akaeleza.

Profesa Magoha ambaye alikuwa amendamana na Katibu katika Wizara hiyo ya Elimu Dkt Julius Jwan alisema kuwa japo idadi ya wanafunzi walioteuliwa ni ndogo ikilinganishwa na wale waliotuma maombi, uteuzi wao uliendeshwa kwa njia huru na haki.

Shughuli ya uteuzi wa wanafunzi hao 9,000, akaongeza, iliendeshwa chini ya mfumo unaozingatiwa chini ya mpango wa msaada wa masomo wa “Wings to Fly” unaofadhiliwa na Wakfu wa Benki ya Equity.

“Kwa hivyo, ningependa kushukuru zaidi Mkurugenzi Mkuu wa Wakfu wa Benki ya Equity James Mwangi kwa msaada waliotupa katika uteuzi wa wanafunzi hawa. Lakini shukrani zaidi ziendee mwenzangu Waziri wa Usalama Fred Okeng’o Matiang’i kwani kupitia msaada wa machifu na manaibu wao tuliweza kuingia vijijini na katika mitaa ya mabanda na kuwatambua watoto wenye werevu wenye mahitaji maalum,” akaeleza Profesa Magoha.

Waziri alisema walioteuliwa ni wale watahiniwa waliopata kuanzia alama 288 kwenda juu katika mtihani huo wa KCPE na ambao wameratibiwa kujiunga na kidato cha kwanza kuanzia Agosti 2, mwaka huu.

Profesa Magoha alisema wanafunzi hao 9,000 ni kundi la pili la wanafunzi ambao kufikia sasa wamefaidi chini ya mpango huo wa “Elimu Scholars Programme”. Kundi la kwanza la wanafunzi 9,000 lilizinduliwa mwaka jana na sasa watajiunga na kidato cha pili juma lijalo.

“Dhima kuu ya mpango huu ulioasisiswa na Rais Uhuru Kenyatta ni kuhakikisha kuwa watoto kutoka familia masikini wanapata nafasi ya kuendelea na masomo. Huu ni wajibu mkuu wa serikali kuu kwa mujibu wa katiba na unaenda sambamba na sera iliyoanzishwa na Rais ya kuhakikisha kuwa wanafunzi wote wanaofanya mtihani wa KCPE wanajiunga na shule za upili,” akaeleza.

Kadhalika Profesa Magoha alitoa wito kwa mashirika mengine kutoa misaada kama hiyo kwa wanafunzi kutoka jamii masikini lakini ambao ni werevu huku akipongeza mpango wa Wings to Fly.

“Nitazungumza na rafiki yangu Mkurugenzi Mkuu wa Benki ya Kenya Commercial Joshua Oigara ili atoe msaada wa masomo kwa angalau wanafunzi 200.Wabunge walitumie sehemu ya Hazina ya CDF kufadhili masomo ya wanafunzi kutoka jamii masikini. Serikali za kaunti pia zisiachwe nyuma katika harakati hizi za kuwasaidia watoto wetu,” akaeleza.

Vijana wahimizwa kubuni ajira wenyewe baada ya kupata ujuzi wa kazi

Na LAWRENCE ONGARO

VIJANA walio na ujuzi wa kozi za kiufundi wamehimizwa kuelewa pia maswala ya biashara na utumizi wa kompyuta.

Pro-Chansela wa Chuo Kikuu cha Mount Kenya (MKU) Dkt Vincent Gaitho, alitilia mkazo jambo hilo na kusema kuwa ujuzi wa aina hizo ni muhimu kutokana na ushindani mkali uliopo wa ajira zama za teknolojia.

Aidha, alisema ni vyema kuwa na msimamo kuhusu ujuzi wa elimu ili waliohitimu wawe na nafasi bora ya kupata ajira.

“Serikali na sekta binafsi zinastahili kushirikiana pamoja ili kufanikisha mpango huo,” alifafanua Dkt Gaitho.

Aliyasema hayo kupitia mawasilino ya kimtandao huku akiwarai wazazi kuwa mstari wa mbele kuona ya kwamba wana wao wanapata masomo ya kiufundi na pia ya kibiashara ili kuwa na mafanikio katika ajira.

Alisisitiza umuhimu wa kuzingatia kwanza biashara za chini kabla ya kufanya zile za juu.

Alitoa wito kwa wanafunzi waliofuzu kuwa na ari ya kujitegemea kwa kubuni ajira wenyewe bila kutegemea sana serikali kuwaajiri.

Alieleza kuwa iwapo kutakuwa na huo mwongozo, bila shaka “tutaonekana kuwa nchi inayoendelea kujitegemea bila kutegemea ujuzi wa kutoka nje.”

Dkt Gaitho aliwataka wazazi wawe mstari wa mbele kuona ya kwamba watoto wao wanafuatilia utaratibu huo kwa makini.

Bw Nick Odhiambo ambaye ni mmojawapo wa wanafunzi waliopata ujuzi wa kozi ya kiufundi, anawahimiza wanafunzi wenzake wafuate mkondo huo ili siku za baadaye wasiwe watu wa kutafuta ajira lakini wajiajiri wenyewe.

“Ujuzi wa pande zote mbili; kuwa na ujuzi wa kibiashara na kuelewa maswala ya kompyuta, ndiyo mwelekeo pekee wa kujiendeleza kimaisha,” alisema Bw Odhiambo.

Mwenyekiti wa Shirika la Sekta Binafsi Nchini – Kenya Private Sector Alliance (KEPSA) – Mhandisi Patrick Obath alisema sekta binafsi pia ina nafasi bora ya kusaidia vijana kuafikia malengo yao ya kupata ajira.

“Iwapo mpango huo utafuatiliwa, bila shaka nchi ya Kenya itatambulika katika kujiendeleza kiviwanda hata ingawa itakuwa ni kwa kiwango cha katikati,” alisema mhandisi Obath.

Alisema cha muhimu ni kwa vijana kujitegemea kwa kubuni kazi wao wenyewe bila kutegemea yeyote.

Raila abaki jangwani

Na BENSON MATHEKA

Kiongozi wa chama cha ODM, Raila Odinga, atalazimika kupanga upya mikakati yake ya kuingia Ikulu kuelekea uchaguzi mkuu wa 2022, baada ya washirika wake katika muungano wa NASA kumtenga, na chama cha Jubilee kusitisha mchakato wa kuungana na chama chake.

Katika hatua iliyomuacha pweke huku vigogo wa kisiasa wanaomezea mate urais wakiendelea kujipanga, washirika wake katika NASA walitangaza kuwa watajiondoa katika muungano huo kuunda mwingine, One Kenya Alliance (OKA), watakaotumia kwenye uchaguzi mkuu wa 2022.

Kwenye uchaguzi mkuu wa 2017, Bw Odinga alishirikiana na Kalonzo Musyoka wa Wiper ambaye alikuwa mgombea mwenza wake, Musalia Mudavadi wa Amani National Congress (ANC), Moses Wetangula (Ford Kenya) na Isaac Ruto wa Chama cha Mashinani( CCM) katika muungano wa National Super Alliance (NASA).

Bw Musyoka, Bw Mudavadi na Bw Wetangula wameungana na mwenyekiti wa Kanu, Gideon Moi kuunda OKA, muungano ambao wanasema utaunda serikali ijayo.Mnamo Jumanne, watatu hao walisema kwamba, ili kusuka rasmi muungano wa OKA, vyama vyao vitajiondoa NASA.

“Kuhusu suala la muungano wa NASA, sisi Ford Kenya, Wiper na ANC tunataka kusisitiza kwamba haturudi nyuma katika kujitolea kwetu kufanikisha One Kenya Alliance kwa kushirikiana na Kanu na vyama vingine vilivyo na maono sawa na yetu,” walisema.

“Tunachojua sasa ni kwamba, NASA ni sehemu ya historia yetu,” walisema.Tangazo la vyama hivyo lilijiri siku moja baada ya chama cha Jubilee kusitisha mazungumzo ya kuungana na ODM kikisema kwamba, kilitaka kujipanga kwanza.

“Kwa sasa, tunapanga chama chetu kiwe na nguvu kabla ya kuzungumzia muungano,” alisema naibu katibu mkuu wa Jubilee Joshua Kutuny.Jana, mwenyekiti wa chama cha ODM, John Mbadi, alithibitisha kuwa mazungumzo ya kusuka muungano na Jubilee yamesitishwa.

Hata hivyo, alisema ODM kitaendelea kujipigia debe kivyake kikifanya mikakati ya muungano kitakaoshiriki.“Kwa sasa tunaendelea kuimarisha chama kote nchini tukifikiria kurudi kwa mazungumzo kuhusu muungano,” alisema Bw Mbadi.

Iliibuka kuwa hatua ya chama tawala kusitisha mazungumzo na chama hicho cha chungwa ilitokana na msimamo wa baadhi ya washirika wa Rais Uhuru Kenyatta wanaohisi kwamba Bw Odinga sio maarufu katika ngome ya chama cha Jubilee ya Mlima Kenya.

Bw Odinga alitofautiana na vinara wenzake katika muungano wa NASA baada ya kuwatenga kwenye mazungumzo yake na Rais Uhuru Kenyatta yaliyozaa handisheki na Mpango wa Maridhiano (BBI) ambao walinuia kubadilisha katiba kabla ya kuwekwa breki na Mahakama Kuu.

Ingawa hajatangaza kugombea urais kwenye uchaguzi mkuu wa 2022, vinara wenzake katika NASA wamekuwa wakiapa kwamba hawatamuunga mkono kwenye uchaguzi huo wakisema aliwasaliti.

Vigogo hao wa kisiasa walilaumu Bw Odinga na ODM kwa kukiuka mkataba wa NASA kwa kutogawia vyama tanzu pesa za hazina ya vyama vya kisiasa na kukataa kuunga mmoja wao kwenye uchaguzi mkuu ujao.Chama chake cha ODM kimekuwa kikikashifu viongozi wa vyama vya Wiper, ANC na Ford Kenya kikidai kwamba, NASA haikushinda uchaguzi mkuu wa 2017.

Bw Musyoka, Bw Mudavadi na Bw Wetangula wamekataa wito wa kufufua NASA ili kuwa na nguvu ya kushinda uchaguzi mkuu wa 2022 hali ambayo wachanganuzi wa siasa wanasema inamuacha Bw Odinga kona mbaya.“Ni kweli taswira iliyopo kwa sasa ni kwamba, Bw Odinga ananing’inia kwa kutengwa na NASA na juhudi za kuungana na Jubilee zikigonga mwamba huku BBI ikipigwa breki.

Nafikiri ni hali ngumu ambayo hajawahi kujipata tangu 2002,” asema mchanganuzi wa siasa Evans Obwaka. Kulingana naye, hiki ni kiuzi ambacho Bw Odinga anaweza kuruka uchaguzi mkuu wa 2022 unapokaribia.

Pigo kwa OKA Kanu ikisema haitaacha kuunga Jubilee

Na JUSTUS OCHIENG

Mipango wa kuhalalisha muungano One Kenya Alliance (OKA) ulipata pigo baada ya chama cha Kanu kusema hakina mipango ya kukatiza ushirikiano wake na chama tawala cha Jubilee.

Vinara wa OKA ni Musalia Mudavadi (Amani National Congress), Kalonzo Musyoka (Wiper), Moses Wetang’ula (Ford Kenya) na Gideon Moi (Kanu).

Kulingana na sheria, hakuna chama kinachoweza kuwa katika miungano miwili kwa wakati mmoja.

Bw Mudavadi, Bw Musyoka na Bw Wetang’ula wamesema kwamba watajiondoa katika muungano wa NASA waliosema ni sehemu ya historia yao.

“Kilichobaki sasa ni hawamu ya mwisho ya kuzika muungano huo ambayo ni kufuatilia matumizi ya pesa,” walisema.

Lakini katibu mwenyekiti wa Kanu,Nick Salat jana alisema kwamba muungano wa chama hicho na Jubilee uliidhinishwa na Kongamano la Kitaifa la Wajumbe (NDC) na ni wao wanaofaa kupitisha kijionndoe.

Bw Salat alisema hayo siku moja baada ya OKA ambao Kanu ni mwanachama kutangaza kwamba chama hicho cha uhuru ni lazima kijiondoe katika muungano wake na Jubilee kabla ya kujiunga rasmi na muungano huo mpya.

“Hauwezi kuwa mwanachama wa miungano miwili kwa wakati mmoja chini ya sheria. Lazima hii ieleweke. Kwa hivyo, Kanu itaacha Jubilee na itatangazwa rasmi,” alisema naibu mwenyekiti wa Wiper

Mutula Kilonzo Jnr aliyesoma taarifa kwa niaba ya vinara wa OKA.

Aliongeza: “Tukiunda One Kenya Alliance, vinara wa vyama vyote vitatu lazima wataondoka Nasa na lazima Kanu iache Jubilee. Kila muungano, ukiwemo wa Jubilee utaisha uchaguzi mkuu ujao.”

Bw Moi alisema kwamba ilikuwa mapema kujadili hatua ya Kanu kujiondoa katika muungano wake na Jubilee.

“Swali hilo halifai kwa wakati hu lakini kuna mazungumzo yanayoendelea,” akasema Bw Moi.

Lakini jana, Bw Salat aliambia Taifa Leo kwamba muungano wa Kanu na Jubilee unadumu hadi mwisho wa muhula wa bunge la sasa na hawana sababu ya kuvunja mapema.

“Kwa sasa, sote tunajipanga kwa uchaguzi mkuu wa 2022 na hatufai kufikirika vingine. Fauka ya hayo, mkataba wetu na Jubilee unaendelea hadi 2022 na tunaweza kushiriki muungano mwingine ikibidi kufanya hivyo,” alisema.

Alisema kwamba Kanu haiko tayari kuacha kushirikiana na serkali.

Eid: Viongozi wavunja desturi ya Kiislamu sababu ya siasa

VALENTINE OBARA na ABDULRAHMAN SHERIFF

ITIKADI za dini ya Kiislamu zilivunjwa Jumatano wakati wa sherehe za Eid-Ul-Adha Kaunti ya Mombasa, ili kuwezesha viongozi wa kike kuwashambulia kwa maneno mahasimu wao wa kisiasa.

Wakati wa sherehe ambayo iliandaliwa katika ukumbi wa Bhadalla, wanawake na wanaume walikuwa wametenganishwa ukumbini jinsi inavyostahili kidini.

Hata hivyo, baada ya viongozi wa kiume waliokuwa jukwaani kukamilisha hotuba zao, Gavana wa Mombasa Hassan Joho alisisitiza baadhi ya wenzao wa kike wafululize hadi jukwaani kuhutubia wageni waliohudhuria.

Kando na Bw Joho, viongozi wengine waliokuwa jukwaani ni kinara wa ODM Raila Odinga, Mbunge wa Kipipiri Amos Kimunya, Mbunge wa Mvita Abdulswamad Nassir miongoni mwa wengine.“Waache si wamevaa hijab wote.

Waje hapa tu shida iko wapi? Hawa ni baba zake na mama zake. Si wamevaa kiheshima wanaweza kuingia, hapa sio msikitini,” akasema gavana huyo, huku manung’uniko yakisikika miongoni mwa baadhi ya wanaume waliokuwa ukumbini.

Alikuwa akiwaita Mbunge wa Likoni Mishi Mboko, Mbunge Mwakilishi wa Wanawake Mombasa Asha Mohamed, mwenzake wa Wajir Fatuma Gedi na Waziri Msaidizi wa Utumishi wa Umma na Jinsia Rachael Shebesh.

Katika hotuba zao, viongozi hao walipiga siasa huku wakimkashifu Naibu Rais William Ruto na kuwapigia debe Bw Odinga na Bw Joho.

“Kuna mtu mmoja naweza kumwita ‘Nyale’. Nyale huyu asema anatupenda sisi Waislamu na Wapwani lakini wanapochagua mawaziri pamoja na Uhuru Kenyatta yeye hachagui Waislamu upande wake. Sisi hatutapelekwa na maneno matupu, tunataka vitendo,” alisema Bi Mboko, akionekana kumrejelea Dkt Ruto.

Bi Gedi alianza hotuba yake kwa kuomba radhi kuhusu hatua ya kuwaruhusu kuingia ukumbini, lakini akasisitiza kuwa wao ni viongozi.

“Tunaomba msahama kidogo kwa vile tumeingia ndani saa zile mmekaa nyote, lakini sisi ni viongozi wala si wanawake, samahani,” akasema.

Baadhi ya waumini wa Kiislamu walisema tukio hilo lilikuwa makosa makubwa kulingana na mafunzo ya dini ya Kiislamu ambayo kunahitajika katika jumuiko lolote lile, wanaume wawe kando na wanawake.

Waliohojiwa na Taifa Leo walisema, hafla hiyo ilihusu sherehe ya Kiislamu ya Eid ul Adha kwa hivyo kanuni za kidini zingestahili kuheshimiwa.

“Ni jambo la kuhuzunisha mno kuona kwamba, ingawa wanawake walikuwa wamekaa sehemu mbali na wanaume, wakati wa hotuba za wahusika kuanza, wanawake waliitwa na kujumuika pamoja na wanaume. Zaidi ya hayo, baadhi ya wanawake hao ni Waislamu wanaofahamu kanuni za dini,” akasema muumini aliyeomba asitajwe jina.

Wakati huo huo, Bw Joho alisisitiza atawania tikiti ya ODM ya urais dhidi ya Bw Odinga na Gavana wa Kakamega Wycliffe Oparanya.

Baadhi ya viongozi Jumanne walikuwa wamependekeza awe mgombea mwenza wa Bw Odinga 2022.

Jumwa aonywa UDA itazima nyota yake

Na ALEX KALAMA

WABUNGE wa chama cha ODM wamemwonya Mbunge wa Malindi, Bi Aisha Jumwa kwamba, nyota yake ya kisiasa iko hatarini kuzima baada ya kuamua kuungana na Naibu Rais William Ruto.

Wakiongea katika eneo la Dabaso, Kaunti ya Kilifi Jumanne, walisisitiza ODM bado ndio maarufu katika kaunti hiyo licha ya Bi Jumwa kusisitiza imepoteza umaarufu.

“Nataka kuwaambia wale viongozi ambao wasema ODM imefifia hapa Kilifi wanajidanganya. Mimi kama naibu mwenyekiti wa ODM hapa Kilifi nina imani kwamba hata 2022 bado serikali Kilifi itakuwa ya ODM. Kwa sababu chama hiki ndicho chenye maono bora, waacheni wapige kelele wanapoteza muda wao bure,” alisema Bw Mwambire.

Bi Jumwa ametangaza azma ya kuwania ugavana Kilifi mwaka ujao kupitia Chama cha United Democratic Alliance (UDA).

Viongozi hao walikuwa katika mazishi ya Japhet Kabenge Mung’aro ambaye ni mjomba wa Waziri Msaidizi wa Ugatuzi Gideon Mung’aro.

Bw Mung’aro ameashiria nia ya kujiunga na ODM kuwania ugavana mwaka ujao, na anatarajiwa kupigania tikiti ya chama hicho dhidi ya Naibu Gavana Gideon Saburi.

Mbunge wa Suna Mashariki, Bw Junet Mohamed alitaka wakazi wa Kilifi wajiulize ni maendeleo gani ambayo Bi Jumwa amefanikiwa kuleta katika eneobunge la Malindi tangu alipoasi ODM, ikilinganishwa na wabunge waliobaki ndani ya chama.

“Wajua huyo Aisha mimi namuonea huruma. Huwezi kuzungusha kiuno bila manufaa yoyote, hiyo ni hasara kubwa kwa watu wa Kilifi,” alisema Bw Mohamed.

Mazishi hayo yalihudhuriwa na Kiongozi wa ODM Raila Odinga pamoja na wanasiasa wengine akiwemo Mbunge wa Mvita Abdulswamad Nassir, Seneta Maalumu wa Jubilee Christine Zawadi miongoni mwa wengine.

Jaji aliyetimuliwa adai alitemwa bila utaratibu

Na SAM KIPLAGAT

JAJI wa Mahakama Kuu, Martin Muya amesema, Tume ya Huduma kwa Mahakama (JSC) ilimsimamisha kazi bila kufuata utaratibu ufaao.

Bw Muya jana aliambia majaji watano wa Mahakama ya Juu kwamba, JSC ilimsimamisha kazi bila mlalamishi kuwasilisha rasmi barua mbele ya tume kulingana na matakwa ya sheria.Wakili wake Philip Nyachoti alisema kuwa, mlalamishi alifika mbele ya Jaji Mkuu David Maraga (ambaye sasa amestaafu).

“Jaji Mkuu baadaye aliandikia barua JSC akitaka ichunguze madai hayo.“Barua hiyo ya Maraga haikuwa malalamishi rasmi kwa JSC kwani Katiba imeelezea wazi utaratibu wa kumtimua jaji,” akasema.

Bw Nyachoti pia alisema Jaji Muya hakupewa fursa ya kujitetea kwa kuwa faili ya malalamishi dhidi yake haikupelekwa mbele ya JSC na jopo lililobuniwa kumchunguza.

“Faili hiyo ilikuwa muhimu kwani ingemwezesha kujiandaa na kujibu madai yote yaliyotolewa dhidi yake. Aliendelea na kesi hiyo kwa sababu alilazimishwa,” akasema.

Jopo maalumu lililoongozwa na Jaji Alnashir Visram ilimpata Jaji Muya na hatia ya utovu wa maadili kutokana na hatua yake ya kuchelewesha kusoma hukumu kwa miezi mitano.Kesi iliyomuweka pabaya ilihusisha benki ya NCBA na duka la Kipsigis Stores.

Benki ya NCBA ilitaka kupiga mnada malori 14 ya Kipsigis Stores ambayo duka hilo lilitumia kama dhamana kuchukua mkopo.

Lakini Benki ya NCBA ilipoenda kupiga mnada malori hayo, ilipata tayari yamepigwa mnada na benki nyingine kuhusu mkopo.

Jaji Muya alizuia Benki ya NCBA kutochukulia hatua duka la Kipsigis Stores bila kutoa sababu. Agizo hilo lilisababisha benki hiyo kupoteza Sh76 milioni.

Bw Nyachoti jana aliambia Majaji wa Mahakama ya Juu; Mohamed Ibrahim, Smokin Wanjala, Njoki Ndung’u Isaac Lenaola na Willian Ouko kwamba mlalamishi alikataa kukata rufaa hata baada ya kuwapa fursa hiyo.

“Mlalamishi alichagua kutokata rufaa ilhali jaji alimtaka kufanya hivyo iwapo hakuridhishwa na uamuzi,” akasema.Jaji huyo pia alidai kuwa alichelewesha hukumu kwa sababu alikuwa akihudumu katika vituo viwili mjini Bomet na Kericho.

Wakili Munene Eredi aliyewakilisha Mwanasheria Mkuu, alisema kuwa Jaji Muya hakuwasilisha ushahidi wa kuonyesha kwamba alikuwa akifanya kazi Bomet na Kericho.

Pigo kwa afisa korti kuunga uamuzi wa gavana kumfuta

Na BRIAN OCHARO

MWANASIASA wa Chama cha ODM amepata pigo baada ya mahakama kukataa kufutilia mbali uamuzi wa Gavana Fahim Twaha kumtema kama mshauri wa kiuchumi wa serikali ya Kaunti ya Lamu.

Bw Shekue Kahale Kombo alikuwa amesimamishwa kazi Machi mwaka huu kwa madai ya kujihusisha na kampeni za mapema badala ya kutekeleza majukumu yake.

Hata hivyo, alielekea katika mahakama ya ajira na viwanda iliyo Mombasa akitaka uamuzi huo ubatilishwe kwa madai kuwa Bw Twaha hakufuata sheria wakati akimtimua.

Bw Kombo alitaka utekelezaji wa uamuzi huo wa gavana usitishwe na nafasi yake isipeanwe kwa mtu mwingine kwa madai kuwa hakupewa nafasi ya kujitetea kabla ya kufutwa.

“Nilifutwa kazi ghafla wakati nilikuwa nikilipia mkopo niliochukuwa kutoka kwa benki,” alisema.

Hata hivyo Jaji Byram Ongaya alikataa kuruhusu ombi ilo akisema kuwa hakuna sababu ya msingi katika ombi hilo.Hii ni licha ya kuwa jaji alikubali katiba haikufuatiliwa wakati wa utekelezaji wa uamuzi huo.

“Licha ya kasoro za kiutaratibu kwa njia ambayo mwombaji alifutwa kazi, hajatoa sababu ya kupinga madai ya kuhusika katika kampeni za mapema,” alisema jaji huyo.

Mahakama ilisema kwa kukosa kubainisha suala kuhusu kampeni za mapema, ilionekana kuwa mlalamishi amekiri madai kuwa alihusika kwa kampeni hizo.

Bw Kombo aliteuliwa kuwa Mshauri wa Kiuchumi katika Serikali ya Kaunti ya Lamu, mnamo Aprili 2019, na mkataba huo unamalizika mwezi huo huo mwaka ujao.

Alikuwa amewania ubunge Lamu Mashariki 2017 kupitia ODM lakini hakushinda uchaguzini.

Hamwezi kuzima hasla, Ruto aambia wapinzani

BENSON MATHEKA NA PIUS MAUNDU

NAIBU Rais William Ruto amewasuta viongozi wa vyama vya upinzani akisema wanajuta kwa kudharau kampeni yake ya kuinua uchumi wa Wakenya wa tabaka la chini, hasla, akisema wameshindwa kuizima.

Dkt Ruto alisema wapinzani wake wamegundua kwamba hawawezi kuzima kampeni hiyo, na sasa wameanza kuzungumzia masuala ya uchumi badala ya mabadiliko ya Katiba.

“Tulipoanza kuzungumza kuhusu raia, walipuuza nilipowaambia kuwa serikali ya 2022 itaundwa na mahasla. Lazima tuanze kujadili masuala ya watu wa matabaka ya chini. Hii ndiyo sababu tulisema kuwa tutabadilisha mjadala kama Wakenya,” Dkt Ruto alisema alipokutana na wachuuzi pamoja na wafanyabiashara wadogo mjini Machakos.

Naibu Rais alihoji kuwa alipoanza kampeni yake wapinzani wake walisema ilikuwa ya kuchochea masikini dhidi ya matajiri; na sasa kwa vile imefaulu, wameshtuka.

Aliongeza kuwa alipokuwa akikutana na Wakenya wa matabaka ya chini kujadili jinsi ya kuimarisha uchumi wao, wapinzani wake walikuwa wakijadili jinsi ya kubadilisha Katiba ili kubuni nyadhifa zaidi za uongozi.

“Sasa wanakutana katika kumbi wakijadili watakavyounda miungano ya kisiasa na kugawa nyadhifa sisi tukisaidia mahasla kuimarisha uchumi ili kuwezesha kila mtu,” akasema.

Dkt Ruto alikuwa akigusia viongozi wa vyama vya Wiper Kalonzo Musyoka, Musalia Mudavadi wa ANC, Moses Wetangula wa Ford Kenya na Gideon Moi wa Kanu, ambao wamekuwa wakikutana kusuka muungano wao wa One Kenya Alliance (OKA).

Chama cha ODM, chake waziri mkuu wa zamani Raila Odinga, nacho kimekuwa kikifanya mazungumzo na muungano tawala wa Jubilee wake Rais Uhuru Kenyatta, kwa lengo ya kuungana kabla ya uchaguzi mkuu 2022.

Hata hivyo, mazungumzo kati ya ODM na Jubilee yamesitishwa kwa wakati huu.Dkt Ruto ambaye amekuwa akipinga mchakato wa kubadilisha Katiba, kupitia Mpango wa Maridhiano (BBI) uliotokana na handisheki ya Rais Kenyatta na Bw Oding, alisisitiza Katiba haitabadilishwa.

“Reggae ilisimama. Ninawahakikishia kwamba hatutabadilisha Katiba, tutabadilisha uchumi,” akaeleza.

Naibu Rais alikuwa ameandamana na mbunge wa Machakos Mjini Bw Victor Munyaka, Nimrod Mbai wa Kitui Mashariki na Vincent Musyoka wa Mwala.

Alisema handisheki na BBI zilivuruga ajenda ya maendeleo ya serikali ya Jubilee.“Mpango wetu wa mwaka 2018 ulihusu ujenzi wa makazi ya bei nafuu, ukuzaji kilimobiashara, afya kwa wote, ustawi wa viwanda na elimu kwa watoto wetu.

“Lakini baadhi ya watu walijiunga na serikali kupitia mlango wa nyuma na kutuambia kuwa mipango hiyo haikuwa ya haraka. Walituambia dharura ilikuwa ni mradi wa kubadilisha Katiba ambao umekuwa ukiendelea kwa miaka minne sasa. Mungu amekuwa upande wetu na reggae imesimama,” akajipiga kifua Dkt Ruto.

Kiongozi huyo anayeegemea chama cha United Democratic Alliance (UDA), amekuwa akisusia hafla za Rais Kenyatta tangu atengwe serikalini kwa kupinga handisheki.Mjini Machakosa alisema baadhi ya viongozi wanagawa Wakenya kwa makabila.

“Nataka kuwaambia kwamba Wakenya wanajua shida yao si makabila, Katiba au nyadhifa. Bali uchumi unaodorora, na ili kukabiliana na hali hii lazima tuanzie mashinani,” akasema.

.Aliwasuta viongozi wa upinzani Raila Odinga na Bw Musyoka akiwataka waombe Wakenya msamaha “kwa kujiunga na serikali kinyume cha sheria.”

Wawili hao wamekuwa wakiunga BBI na wamepatiwa majukumu ya kimataifa.

Desturi ya aina yake kisiwani Lamu inayozipatia mashua ‘uhai’ baharini

Na KALUME KAZUNGU

MAENEO mengi ya Kaunti ya Lamu ni visiwa ambavyo vimezingirwa na Bahari Hindi. Hivyo, usafiri huwa kwa vyombo vya majini ikiwemo boti, mashua, jahazi, mitumbwi miongoni mwa vingine vya asili.

Visiwa kama Lamu, Shella, Pate, Faza, Mtangawanda, Kizingitini, Ndau, Mkokoni, Kiwayu hushuhudia kiwango kikubwa cha usafiri.

Kwa jumla kuna zaidi ya visiwa 35 katika Kaunti ya Lamu.Wakati mwingi wageni katika kisiwa hicho ambao wana jicho pevu hawatakosa kubaini kuwa, boti na mashua wanazotumia zimepewa majina ya mvuto wa kipekee.

Kwa mfano, utapata boti kwa jina ‘Shani ya Lamu’, ‘Lamu Tamu’, ‘Haufungwi’, ‘Samaki Mkuu’, ‘Tusitiri’ na kadhalika.

Hii ni desturi ambayo imekuwepo tangu jadi, ila wageni wengi katika kaunti hiyo huwa hawafahamu ni mbinu gani hutumiwa na wamiliki wa vyombo hivyo kuvitaja majina, wala kama yana maana yoyote fiche.

Taifa Leo imebainisha kuwa, utoaji wa majina kwa boti za Lamu ni sanaa ambayo inahitaji kufanywa kwa makini.

Hii ni kutokana na kuwa wamiliki na wahudumu wa vyombo hivyo wanaamini kwamba ni kupitia majina hayo ambapo boti au mashua yao itawaletea baraka wanapokuwa katika shughuli zao baharini.

Katika mahojiano, baadhi yao walieleza kuwa kigezo cha kwanza ambacho watengenezaji na wamiliki wa maboti na mashua huzingatia katika kupeana majina kwa vyombo vyao vya usafiri wa baharini ni maandhari na sifa za Lamu, imani za kidini au hata mahaba kwa wapenzi wao.

Kwa mfano, kuna mashua ambayo jina lake ni ‘Lamu Tamu’. Hii ina maana ya moja kwa moja kwamba Lamu ni eneo lililo na ladha nzuri ya kuvutia.

Kulingana na Bw Ali Omar ambaye ni msanii wa kutoa majina kwa vyombo vya baharini Lamu, mashua kwa jina ‘Lamu Tamu’ imekuwa ikipendwa na wageni wengi, watalii na hata wenyeji.Kulingana naye, jina hilo hufanya abiria wa chombo hicho waamini litawawezesha kupata utamu halisi wa kisiwa cha Lamu.

“Mashua ya Lamu Tamu niliipa jina hilo kutokana na msemo wa tangu jadi eneo hili wa ‘Lamu Tamu, Atakao Nae’; kumaanisha Lamu ni yenye ladha tamu ya kupendeza na yeyote anayetaka kuja Lamu aruhusiwa.

“Kwa sababu hiyo, mashua yenyewe imeibukia kupendwa na kila mmoja, hasa wageni na watalii wanaozuru hapa. Matokeo yake ni biashara ya usafiri kunoga kila uchao,” akasema Bw Omar.

Boti nyingine ambayo Taifa Leo ilibaini asili ya jina lake la kipekee ni ‘Haufungwi’.Kulingana na msanii mwingine wa majina ya vyombo vya baharini mjini Lamu, Bw Mohamed Mote, jina ‘Haufungwi’ lina maana kwamba mlango wa rehema haufungwi.

Bw Mote anasema manahodha wengi wamekuwa wakitumia mashua hiyo kufanyia kazi zao za siku, kwani wanalinganisha jina lake na imani kuwa Mungu Mwenyewe ndiye hupeana riziki na kwamba hata binadamu akajaribu kwenda kinyume namna gani kuiziba bahati yako, ikiwa bahati hiyo ya Mungu imepangwa kukufikia itakuteremkia tu.

“Haufungwi ni jina linaloleta matumaini makubwa kwa manahodha na hata wasafiri wanaotumia boti hiyo. Inamaanisha Baraka za Mungu hakuna anayeweza kuzizuia. Kama umepangiwa utapata Baraka zake Maulana basi utazipokea tu hata waja wakajaribu kuzizuia au kuziba mlango wako,” akasema Bw Mote.

Ukiwasili katika kisiwa cha Lamu pia utakaribishwa na mashua kubwa kwa jina ‘Tusitiri’.Taifa Leo ilibaini kuwa jina hili halikupeanwa kwa mashua hiyo tu kama pambo bali pia ni ombi rasmi kwa wanaotumia boti hiyo.

Ikumbukwe kwamba wasafiri wanaotumia Bahari Hindi hupitia dhiki nyingi katika safari zao, ikiwemo mawimbi makali, dhoruba na hata ajali.

Kulingana na msanii wa majina Ahmed Issa, jina ‘Tusitiri’ ni ombi ambalo mabaharia wengi huwa nalo mioyoni mwao wanaposafiri, wakimuomba Mwenyezi Mungu kuwalinda na kuwafikisha salama kule wanakoelekea.

“Wanapofika sehemu wanakoenda basi huwa wamesitiriwa kutokana na mikosi ya ajali na zahama za baharini, hivyo jina-Tusitiri,” akasema Bw Issa.

Subira pia ni neno lingine la Kiswahili ambalo limeonekana kwenye mashua Lamu. Subira maana yake ni uvumilivu.

Bw Abdalla Suleiman ambaye pia ni msanii wa majina ya vyombo vya baharini kwenye kisiwa cha Pate anasema msingi wa jina hilo ni jinsi baharia yeyote lazima awe na sifa ya ‘subira’, kumaanisha atavumilia hali ngumu akiwa safarini ili atimize kusudi la kufika kule anakokwenda.

Kwa hivyo mtu mwenye subira hata akabiliwe na changamoto za namna gani baharini atavumilia wala hawezi kufikia kiwango cha kukata tamaa.

Pia utapata boti iliyopewa jina ‘Nuru’ ambayo yamaanisha ‘mwangaza’ au miale.Bw Athman Abdi anasema yeye binafsi hupenda sana kuabiri mashua kwa jina ‘Nuru’ akiamini kwamba safari yake haitaghubikwa na giza hadi kufika pale anapoelekea.

Watengenezaji na wamiliki wa maboti pia hupeana majina kulingana na uwezo au ujasiri wa chombo husika.

Aghalabu utapata mashua kwa jina ‘Samaki Mkuu’. Samaki wakuu baharini ni kama vile nyangumi, papa na wengineo.

Sifa za samaki hao ni kwamba wako na ujasiri, nguvu na uwezo wa kutekeleza jambo.Ikumbukwe kwamba samaki kama vile papa na nyangumi pia huwa na sifa ya kuwa na kasi na uwezo wa kupasua mawimbi na dhoruba kali wanapozunguka bahari.

Bw Hassan Alwy ambaye ni msanii wa majina ya maboti na mashua eneo la Wiyoni, Kaunti ya Lamu anasema jina la mashua ‘Samaki Mkuu’ linadhihirisha jinsi boti hiyo ilivyo na nguvu, uwezo na kasi ya kupasua mawimbi kwenye bahari kuu inaposafirisha mabaharia.

Anasema wasafiri hupenda kutumia mashua hiyo kusafiri wakijua kuwa hakuna changamoto zozote zitakazopatikana baharini ambazo zitazuia mashua hiyo kuendelea na safari baharini.

“Ukiona tu jina Samaki Mkuu wazo litakalokupiga akilini kwa mara ya kwanza ni uwezo alio nao samaki mkuu. Mara nyingi samaki wakubwa hupatikana kwenye bahari ya kina kirefu iliyojaa mawimbi. Hii ina maana kwamba mashua husika iko na nguvu za kukabiliana na mawimbi hayo makubwa baharini na kuendelea na safari bila wasiwasi wowote,” akasema Bw Alwy.

Kuna boti au mashua ambazo pia hubandikwa majina kulingana na upendo ambao mwenye chombo hicho cha kusafiri yuko nao.

Wengine pia huzipa mashua na boti majina ya wanawake au wapenzi wao waliowasitiri moyoni kama mbinu mojawapo ya kuwaenzi au kuwakumbuka, iwe wako hai au wakiwa wamefariki.

Utapata majina ya kuvutia kama vile ‘Tausi,’ ‘Chaurembo,’ ‘Lazizi,’ ‘Sauda,’ ‘Kimwana,’ na kadhalika.

Kulingana na wasanii wanaobandika vyombo hivyo majina, watu hutaka kuvitaja wapenzi wao ili hata wanapokuwa mbali baharini wahisi wako pamoja nao.

WANDERI KAMAU: Waliopigania ukombozi wasipuuzwe

Na WANDERI KAMAU

MAJUZI, nimemaliza kusoma vitabu viwili—Detained: A Writer’s Prison Diary chake Ngugi wa Thiong’o na I Refuse to Die chake mwanasiasa Koigi wa Wamwere.

Ni vitabu vilivyonipa kumbukumbu chungu kuhusu machungu ambayo wapiganiaji wa ukombozi wa kisiasa walipitia nchini katika tawala wa marais Jomo Kenyatta na marehemu Daniel Moi.

Katika tawasifu yake, Ngugi anarejelea kwa kina masaibu yake akiwa mhadhiri wa Fasihi katika Chuo Kikuu cha Nairobi.

Anaeleza jinsi alivyokamatwa na polisi kwa tuhuma za kuwachochea wananchi na wanafunzi kupitia kitabu chake ‘Ngaahika Ndeenda’ (Nitaoa Nikipenda), kilichoangazia jinsi tawala dhalimu zilivyopanga njama kuwahangaisha wananchi kwa kuwanyang’anya mali zao kwa njia za kilaghai.

Baada ya tuhuma hizo, alikamatwa na kufungwa katika Gereza Kuu la Kamiti mnamo 1978 bila kufunguliwa mashtaka yoyote.

Kwa upande wake, Koigi anaeleza kwa kina mahangaiko aliyopitia pamoja na wafungwa wengine wa kisiasa kama Wasonga Sijeyo, Martin Shikuku, Ngugi, Wanyiri Kihoro kati ya wengi katika Jumba la Mateso la Nyayo, Nairobi.Kwa wakati mmoja, anaeleza jinsi wafungwa ‘waasi’ walivyotishwa kwa kurushiwa siafu wakali ama nyoka mkubwa aliyekuwa amefugwa katika jumba hilo.

Bila shaka, simulizi za wanaharakati hao wawili zinaashiria safari ndefu na pevu ambayo Kenya imepitia katika harakati za kutafuta Katiba inayowafaa wananchi wote, bila kuwabagua hata kidogo.

Katika nchi iliyopitia safari chungu kama hiyo, inasikitisha kuwaona wanasiasa wakiichezea Katiba kwa lengo la kujifaidi wao wenyewe.

Ni kosa kubwa kwa wanasiasa kuiteka Katiba na kutishia kuifanyia mageuzi machoni mwa watu ambao walipoteza jamaa zao na nafasi muhimu maishani wakipigania ukombozi wa kisiasa wa taifa hili.

Bw Wamwere ni miongoni mwa wanaharakati waliofungwa gerezani kwa muda mrefu zaidi wakipigania Ukombozi wa Pili.

Kitakwimu, anadaiwa kufungwa jumla ya miaka 13 na tawala za marais Kenyatta na Moi kwa kuwa mwanasiasa “msumbufu.”

Watu wengine ambao wamejitoa kafara kupigania ukombozi wa kisiasa nchini ni kiongozi wa ODM, Raila Odinga, Seneta James Orengo (Siaya), Gavana Anyang’ Nyong’o (Kisumu), Gavana Kiraitu Murungi (Meru), mawakili Paul Muite, Gibson Kamau Kuria, Dkt John Khaminwa, Gitobu Imanyara kati ya wengine wengi.

Bw Odinga amefungwa gerezani jumla ya miaka tisa kutokana na harakati zake za kisiasa. Kwenye tawasifu zake ‘Raila Odinga: An Enigma in Kenyan Politics’ na ‘The Flame of Freedom’, Raila anaeleza kuwa mamake alifariki na kuzikwa akiwa bado gerezani.

Hakufahamishwa alipofariki wala hakuhudhuria mazishi yake.Bila shaka hayo ni baadhi ya mahangaiko ambayo wanaharakati hao walipitia chini ya tawala dhalimu za Mzee Kenyatta na marehemu Moi.

Hata hivyo, inasitikisha kuwa wanasiasa kama Raila wanaonekana kuunga mkono juhudi hizo!Je, wamesahau masaibu waliyopitia kwenye harakati za kupigania ukombozi?K

wa Rais Uhuru Kenyatta na wale wanaoendesha mchakato wa Mpango wa Maridhiano (BBI), wakati umefika wasikilize kauli na sauti za watu waliojitolea kuhatarisha maisha yao kupigania uhuru wa kisiasa.

Kuwatenga ni sawa na kutafuta laana zao kwa machungu waliyopitia.

akamau@ke.nationmedia.com

Mbunge atilia shaka nyumba za Buxton ujenzi wazo ukiendelea kucheleweshwa

Na WINNIE ATIENO

MBUNGE wa Kisauni, Bw Ali Mbogo ametilia shaka mradi mkubwa wa kujenga nyumba za bei nafuu ambao unasimamiwa na mfanyabiashara Suleiman Shahbal kwa ushirikiano na serikali ya Kaunti ya Mombasa.

Bw Mbogo amedai kuwa wakazi wa mtaa huo walidanganywa kwamba majumba ya kisasa yatajengwa kwa gharama ya Sh6 bilioni ilhali hakuna pesa za kutekeleza mradi huo.Mwaka uliopita Bw Shahbal alishinda kandarasi ya ujenzi wa majumba hayo eneo la Buxton na nyumba za zamani zikabomolewa.

Mfanyabiashara huyo amepanga kuwania ugavana mwaka ujao kupitia ODM na kiti hicho pia kimemvutia Bw Mbogo anayeegemea upande wa Naibu Rais William Ruto.“Bw Shahbal alisema yuko na Sh6 bilioni, akabomoa majumba akisema anataka kujenga majumba ya kisasa ya bei rahisi.

Miezi sita tangu awavunjie na kufurusha watu wetu hakuna ujenzi umeanza,” alisema Bw Mbogo.Hata hivyo, Bw Shahbal alipuzilia mbali madai hayo akisema hayana msingi wowote.Akiongea kwenye mahojiano ya kituo cha redio kilicho Mombasa, Bw Shahbal alisema mradi huo unaendelea.

“Hakuna mtu aliambiwa atulipe ndipo tujenge,” alisisitiza Bw Shahbal.Mwaka uliopita, Gavana wa Mombasa Hassan Joho aliunga mkono mradi huo akiwahakikishia wakazi kwamba watapewa kipaumbele nyumba hizo mpya zikiuzwa.

Mwezi wa Machi, wakazi walipewa hundi za Sh240,000 kila mmoja kutoka kwa serikali ya kaunti ili iwasaidie kuhamia kwingine kupisha ujenzi wa nyumba mpya.Rais Uhuru Kenyatta alitarajiwa kuweka jiwe la msingi wa ujenzi huo Mei lakini mpango huo ukasitishwa kwa sababu ambazo hazijulikani.

Naibu wa Waziri anayesimamia majumba na maendeleo ya miji Bw Charles Hinga aliidhinisha mradi huo kwa niaba ya serikali kuu.

Raila amtaka Rais afungue nchi sasa

ANTHONY KITIMO Na VALENTINE OBARA

KIONGOZI wa Chama cha ODM, Bw Raila Odinga ametaka serikali ichukue mikopo zaidi itakayogharamia chanjo ya kuepusha maambukizi ya virusi vya corona ili nchi ifunguliwe.

Alisema hayo jana alipomtaka Rais Uhuru Kenyatta afungue nchi ili uchumi uanze kustawi baada ya kuathirika na janga la corona kwa zaidi ya mwaka mmoja.Akizungumza jana katika Kaunti ya Mombasa, Bw Odinga alisema Kenya iko hatarini kupiga hatua kubwa nyuma kimaendeleo ikiwa baadhi ya masharti makali ya kuepusha ueneaji wa virusi vya corona hayatalegezwa.

Masharti hayo ni kama vile kafyu inayozuia raia kutoka nje usiku na sheria za kuzuia mgusano wa watu ambazo zimesababisha hasara kwa sekta mbalimbali kama vile za uchukuzi na hoteli.“Tunataka zile dawa hata kama zinagharimu pesa ngapi, pesa zitolewe hata kama zinakopwa tukope, hata wabunge wakipandisha kiwango tunachoweza kukopa bora chanjo ije.

Pesa pia ipeanwe kwa mama mboga na vijana wetu, ili wananchi wapate pesa mfukoni,” akasema.Alikuwa akihutubu katika warsha ya kusherehekea Eid-Ul-Adha iliyoandaliwa na Mbunge wa Mvita, Bw Abdulswamad Nassir katika ukumbi wa Bhadalla.

Hafla hiyo ilihudhuriwa na viongozi mbalimbali akiwemo Gavana wa Mombasa Hassan Joho, Mbunge wa Likoni Mishi Mboko, mwenzake wa Kipipiri Amos Kimunya, madiwani miongoni mwa wageni wengine walioalikwa.

Bw Odinga alisema nchi inahitaji kutoa chanjo kwa angalau watu milioni 15 ili ifuate mwelekeo wa mataifa ambayo yameanza kurudia hali ya kawaida, ilhali kufikia sasa ni watu milioni 1.6 pekee waliopokea chanjo hiyo.“Wakati huu tuko na shida kwa sababu ya hili janga la corona.

Corona imeporomosha uchumi na kuna shida nyingi. Biashara nyingi zimekufa, kuna ukosefu wa kazi na njaa. Namshauri ndugu yangu Uhuru Kenyatta achukue hatua,” akasema.Ijapokuwa mamilioni ya raia wanatatizika kwa makali ya athari za Covid-19 kwa uchumi,

Serikali tayari imechukua mikopo mingi ambayo imepita Sh7 trilioni, kwa mujibu wa takwimu za Benki Kuu ya Kenya (CBK).Hii imelazimu wananchi kulipa kiasi kikubwa cha ushuru kwa bidhaa wanazotegemea kila siku ili kuwezesha serikali kugharamia madeni yake kwa nchi za kigeni kama vile China.

Madeni hayo yamewaongeza raia mzigo licha ya kuwa wengi tayari wanalemewa kiriziki baada ya corona kuzorotesha uchumi.Wito wa kutaka masharti yanayohusu Covid-19 yalegezwe ulianza kutolewa na Bw Joho, ambaye alieleza masikitiko kuhusu jinsi biashara kama vile za mabasi ya uchukuzi na matatu zinavyoathirika.

‘Ni wakati sasa tufungue uchumi wa kitaifa kikamilifu ili watu wapate kazi. Mabasi yanafungwa, matatu zinasota. Serikali itafute pesa kila mtu apate chanjo ili kila mtu awe huru kutembea bila wasiwasi lakini uchumi ufunguliwe kikamilifu,’ akasema Bw Joho.

Hivi majuzi, baadhi ya makampuni yalithibitisha kusitisha uchukuzi wa umma kwa sababu ya hasara zinazotokea wanapolazimika kubeba nusu ya idadi ya kawaida ya abiria.Hatua hiyo imesababisha ongezeko la ukosefu wa ajira kwa idadi kubwa ya wananchi waliokuwa wameajiriwa kuhudumu katika mabasi hayo, na wale waliotegemea abiria kwa biashara zao katika vituo mbalimbali barabarani.

Bodaboda wahalifu wadhibitiwe haraka

Si jambo geni kwamba wahudumu wa bodaboda humu nchini wamekuwa kero kubwa.Hii ni sekta ambayo imewapa vijana ajira na matumaini ya kukimu maisha yao kwa njia halali.

Hata hivyo, kuna wale ambao wanatumia fursa hii kuendeleza uhalifu kwa ujasiri wa ajabu, mijini na vijijini. Matukio mengi ya uhalifu yanayoripotiwa aghalabu hutokana na bodaboda wahalifu.Tukio la hivi majuzi lililovuma mitandaoni – ambapo afisa wa polisi alionekana akipokonywa simu aliyokuwa akipiga – ni ithibati tosha kuwa sekta hii ya uchukuzi inahitaji mikakati mahususi kudhibiti wahalifu tele walioivamia.

Ikiwa walinda usalama wenyewe ndio hao wanaibiwa simu na kutendewa visanga vingine mchana peupe, sembuse raia wa kawaida? Ni wazi kwamba hakuna yeyote aliye salama; si mijini, vijijini. Wanabodaboda wahalifu wanafaa kudhibitiwa mara moja kwa njia itakayopunguza uhalifu wanaoendeleza.

Wamezidi kwa wizi wa simu na vibeti vya kina dada barabarani, na pia huvamia mwendesha gari yeyote atakayekinzana nao. Mara nyingi vijana hawa huwa wamefanya makosa, lakini kwa vile ni wengi wanawavamia madereva kwa kila aina ya silaha ili kumlinda mwenzao.

Siku hizi si rahisi kujua bodaboda halali na mhalifu.Hivyo, mamlaka za usalama nchini zinapaswa kuhakikisha wahudumu hawa wote wanajiunga na vyama vya ushirika, kama ilivyo desturi katika sekta ya matatu.

Kisha wapewe mafunzo ya uendeshaji pikipiki katika vyuo anuwai vinavyotoa mafunzo kama hayo. Vibandiko vinapaswa kuwekwa kwenye pikipiki zao ili kuonyesha iwapo wana leseni, wamepata mafunzo wapi na vyama vya ushirika walivyojiunga navyo.

Pia, nambari za usajili za kila bodaboda ziwekwe mahali pake, na zionekane kwa wazi kabisa.Wanahitaji pia mafunzo ya usalama barabarani na namna ya kutumia barabara zao ipasavyo, na kwa kuzingatia usalama wa watumiaji wengine.

Kubuniwe pia kitengo cha polisi kitakachofuatilia wahalifu wanaotumia pikipiki; haswa miongoni mwa bodaboda na kuwatia mbaroni iwapo watahepa. Mikakati hii ikiwekwa, tutakuwa na utulivu barabarani navyo visa vya uhalifu vitapungua kwa asilimia kubwa.

KINYUA BIN KING’ORI: Viongozi wa Jubilee wasipuuze maoni ya wanachama

Na KINYUA BIN KING’ORI

UMAARUFU wa chama tawala cha Jubilee unakabiliwa na tishio kubwa baada ya chama hicho kushindwa katika uchaguzi mdogo wa eneobunge la Kiambaa.

Eneobunge hilo lipo katika ngome ya Rais Uhuru Kenyatta, lakini hali ilivyo, chama kimeendelea kufifia maeneo ya Mlima Kenya, huku Uchaguzi Mkuu wa 2022 ukikaribia.

Kilichojiri katika uchaguzi huo mdogo huenda kilitoa taswira ya hali halisi ya jinsi mambo yalivyo mashinani, hasa kwa upande wa viongozi waliopo Jubilee ambao wamekuwa wakiwasuta wenzao wanaotaka masuala ya kiuchumi na urithi, kuhusiana na eneo la Mlima Kenya kushughuliwa.

Wakazi wa Kiambaa walitoa ujumbe mzito kwa kiongozi wa taifa na chama chake kwamba kuafikia baadhi ya maamuzi muhimu chamani, si wajibu wa kiongozi mmoja au wawili pekee, bali wanachama wanapaswa kushirikishwa kwa masuala yote muhimu kabla ya kutekelezwa.

Kushindwa kwa chama hicho ni sawa na Rais uhuru Kenyatta kupigwa dafrao kisiasa na naibu wake.Maswali mengi yanaibuka baadhi yakiwa ni vipi wananchi ambao wameishi kushabikia chama fulani na kiongozi wake wakubali kukumbatia sera za mgombezi wa chama kingine?

Je, mbona wakazi wa Kiambaa waliotarajiwa kumpigia kura kwa wingi Bw Kariri Njama wa Jubilee, wavunje itikadi hiyo na kumpigia kura mwaniaji wa UDA, Bw Wanjiku? Hayo ni mabadiliko katika siasa zetu 2022 ikiwa viongozi wa vyama vikuu nchini watakosa kusikiliza malalamishi ya wanachama wake na kuamua kufanya watakavyo bila kujali raia watakaowaonyesha makali yao kwa kuwachagua viongozi wa vyama vingine vidogo bila kujali ikiwa anayehusishwa na chama hicho ni nani.

Ushindi huo sasa utaamsha Jubilee kutoka usingizini na kukubali kushughulikia matatizo yanayokumba wanachama na chama kwa jumla.Wanachama wangependa kuhusishwa hasa katika masuala ya uchumi ambao umekuwa mzigo mzito, kutengwa na kudharauliwa kwa Naibu Rais Dkt William Ruto, kushirikiana kwa Rais na kiongozi wa ODM, Bw Raila Odinga.

Pia wanachama wangependa zaidi kuelewa kuhusu ushirikiano wa Rais na Bw Odinga na fununu kwamba atamuunga mkono kiongozi huyo wa ODM katika uchaguzi wa 2022. Licha ya kutumia fedha nyingi, chama hicho kimekuwa kikishindwa katika chaguzi ndogo nyingi ambazo zimefanyika nchini.

Viongozi wa Jubilee wanafaa kuandaa kongamano la kitaifa wajadiliane mustakabali wa chama, umoja wa taifa, usalama, kumaliza ukabila na hali ya kiuchumi inayomlinda mwananchi wa kawaida.