Kenya U-20 kujipima nguvu na TZ na Misri kabla ya kuvaana na Rwanda

Na GEOFFREY ANENE

KENYA na Rwanda zitapigania tiketi moja ya kushiriki mechi za raundi ya pili ya kufuzu kushiriki Kombe la Afrika la soka ya wachezaji wasiozidi umri wa miaka 20 nchini Niger mwaka 2019.

Katika ratiba iliyotangazwa na Shirikisho la Soka la Bara Afrika (CAF) hapo Februari 25, 2018, Kenya itaalika Rwanda kati ya Machi 30 na Aprili 1 kabla ya mechi ya marudiano nchini Rwanda kati ya Aprili 20 na Aprili 22.

Mshindi kati ya Kenya na Rwanda atalimana na mabingwa Zambia katika raundi ya pili mwezi Mei mwaka 2018.

Zambia ni baadhi ya mataifa yaliyoingia raundi ya pili bila kutoa jasho baada ya kukosa mpinzani katika raundi ya kwanza.

Mataifa mengine ndani ya raundi ya pili ni Misri, Guinea, Nigeria, Senegal, Gambia, Burkina Faso, Libya, Ivory Coast, Congo, Guinea-Bissau na Sudan.

Awamu ya mwisho ya mechi za kufuzu kushiriki Kombe la Afrika itaandaliwa mwezi Julai ambapo washindi watajishindia tiketi.

Kenya, ambayo iliingia kambini Februari 25, haijashiriki mashindano ya Afrika ya chipukizi kwa muda mrefu sana. Itakuwa makini kuanza kampeni yake vyema na ufahamu kwamba mashindano ya Afrika pia yatatumika kuchagua wawakilishi wa bara hili katika Kombe la Dunia mwaka 2019.

Kabla ya kukutana na Rwanda, Kenya inapanga kujipima nguvu dhidi ya Tanzania mnamo Machi 3 jijini Dar es Salaam na Misri mnamo Machi 19 mjini Mombasa.

Sehemu ya ratiba ya mechi za kufuzu ya raundi ya kwanza:

Kenya vs. Rwanda

Mauritania vs. Morocco

Guinea Bissau vs. Sierra Leone

Algeria vs. Tunisia

Liberia vs. Benin

Gabon vs. Togo

Ethiopia vs. Burundi

Botswana vs. Namibia 

Vipaji vipya vya Gor vyaisaidia kuzima Kariobangi Sharks

Sajili mpya wa Gor Mahia Samuel Onyango (kushoto) katika mechi dhidi ya Nakumatt Fc. Picha/ Maktaba

Na GEOFFREY ANENE

SAJILI wapya Samuel Onyango na Ephrem Guikan wamefungia Gor Mahia bao moja kila mmoja na kuisaidia kudumisha kubwaga Kariobangi Sharks 2-1 kwenye Ligi Kuu, Jumapili.

Onyango, ambaye alisajiliwa kutoka Ulinzi Stars, aliona lango dakika ya 10 kabla ya kipa wa Gor, Boniface Onyango kufungwa bao rahisi kupitia frikiki ya Bolton Omwenga alipokosa kumakinika na kufungwa katikati ya mguu yake.

Raia wa Ivory Coast alihakikishia mabingwa watetezi Gor ushindi alipopachika bao la pili dakika ya 70. Ushindi huu wa Gor ni wa tatu mfululizo msimu huu na pia dhidi ya Sharks.

Walipepeta Sharks 3-1 Machi 12 na kuidunga tena 3-1 Oktoba 17 mwaka jana. Msimu huu, Gor ilivuna pointi tatu kutoka kwa Nakumatt na pia Zoo Kericho kwa kuzipepeta 4-0 na 4-2, mtawalia. Kichapo hiki nacho ni cha kwanza kwa Sharks ambayo ilipiga Nzoia Sugar 1-0 kabla ya kukabwa 2-2 na Vihiga United na 1-1 dhidi ya Chemelil Sugar.

Leopards iliandikisha ushindi wake wa kwanza msimu huu na wa pili mfululizo dhidi ya Ulinzi Stars kwa kuizaba mabao 2-1 uwanjani Thika.

Mathare iilizoa ushindi wa tatu msimu huu kwa kuilima Sofapaka 3-1 uwanjani Machakos nayo Zoo ikatoka nyuma 1-0 na kufuta vichapo vitatu ilivyopokea kutoka kwa Ulinzi, Gor Mahia na SoNy Sugar kwa kulemea Thika United 2-1 ugani Kericho Green.

Bao la kwanza la Ingwe liliwasili baada ya Jaffery Awiti kupokea krosi safi kutoka kwa Brian Marita na kupitisha mpira juu ya kipa wa Ulinzi, Timothy Odhiambo dakika ya 69.

Ulinzi ilisawazisha 1-1 kupitia ikabu ya Oliver Ruto dakika kumi baadaye kabla ya Marvin Nabwire kufungia mabingwa mara 13 Leopards bao la ushindi sekunde ya mwisho baada ya kutokea kizaazaa langoni mwa mabingwa mara nne, Ulinzi Stars.

Mabingwa wa mwaka 2008, Mathare, walizima mabingwa wa 2009, Sofapaka kupitia mabao ya Francis Omondi, Chrispin Oduor na Edward Seda.

Baada ya mashambulizi makali kutoka kwa klabu hizi mapema, Mathare ya kocha Francis Kimanzi ilifanikiwa kuona lango ya kwanza.

 

Penalti

Refa Peter Waweru aliipa Mathare penalti baada ya Rodgers Aloro wa Sofapaka kuangusha Seda ndani ya kisanduku dakika ya 17. Omondi alifuma penalti safi kwa kumwaga kipa Mganda Mathias Kigonya.

Oduor aliimarisha uongozi wa Mathare dakika ya 27 alipochota mpira juu ya Kigonya.

Sofapaka iliendela kuvamia ngome ya Mathare na kufaulu kupunguza mwanya huo hadi 2-1 dakika ya 42 kupitia penalti iliyopigwa na Kigonya. Johnstone Omurwa alinawa mpira ndani ya kisanduku chao na kumpa Kigonya nafasi ya kumfunga Robert Mboya.

Ufufuo wa Sofapaka ulizimwa Seda alijazia Mathare goli la tatu wavuni dakika ya 63.

Licha ya kupiga dakika 28 za mwisho watu 10 baada ya Nicholas Kipkurui kulishwa kadi nyekundu kwa kucheza visivyo, Zoo ilinyamazisha Thika 2-1. Clement Masakidi alifungia Thika katika dakika ya 31 kabla ya Zoo kujibu kupitia Michael Madoya na Geoffrey Gichana.

Matokeo:

Februari 25

Mathare United 3-1 Sofapaka

AFC Leopards 2-1 Ulinzi Stars

Zoo Kericho 2-1 Thika United

Kariobangi Sharks 1-2 Gor Mahia

Februari 24

Tusker 2-1 Nzoia Sugar

Bandari 1-0 Wazito

Kakamega Homeboyz 2-1 Vihiga United

Posta Rangers 1-0 Chemelil Sugar

Nakumatt 0-0 SoNy Sugar

Shujaa waelekea Amerika kwa duru ya tano ya Raga za Dunia

Samuel Oliech wa timu ya Shujaa (aliye juu zaidi) awania mpira na Tavite Veredamu wa Ufaransa katika mechi ya awali. Picha/ Maktaba

Na GEOFFREY ANENE

TIMU ya taifa ya raga ya wachezaji saba kila upande ya wanaume ya Kenya almaarufu Shujaa ilifunga safari ya kuelekea nchini Marekani saa sita kasorobo Jumamosi usiku.

Ndege iliyobeba vijana hao wa kocha Innocent Simiyu ilipitia jijini Doha nchini Qatar kabla ya kuelekea mjini Las Vegas ambapo duru ya tano ya Raga za Dunia itafanyika Machi 2-4, 2018.

Kenya, ambayo inashikilia nafasi ya nane kwa alama 35 ilizopata katika duru nne za kwanza, italimana na Fiji, Ufaransa na Urusi katika mechi za Kundi A.

Mabingwa wa Singapore Sevens mwaka 2016 Kenya wanalenga kumaliza duru zote 10 kwa jumla ya alama 100.

Ina maana kwamba watahitajika kujikakamua vilivyo kutimiza lengo hilo hasa kwa sababu kufikia sasa wako pointi tano nje ya lengo hilo.

Shujaa imeratibiwa kurejea nchini Machi 13 baada ya kushiriki duru ya sita mjini Vancouver nchini Canada hapo Machi 10-11.

Kikosi cha Shujaa – Oscar Ouma (nahodha), Collins Injera, Billy Odhiambo, Andrew Amonde, Daniel Sikuta, William Ambaka, Arthur Owira, Eden Agero, Samuel Oliech (nahodha msaidizi), Jeffery Oluoch, Nelson Oyoo, Eric Ombasa na Sam Muregi.

Ratiba ya Shujaa:

Machi 2

Kenya vs. Ufaransa (3.44pm)

Kenya vs. Urusi (6.45pm)

 

Machi 3

Kenya vs. Fiji (12.36pm)

Nani ataibwaga KCB kwenye Ligi Kuu ya Raga?

Mchezaji wa timu ya Impala Micheal Mugo (kushoto) akabiliana na Nesta Oketch wa KCB katika mechi ya awali. Picha/ Maktaba

Na GEOFFREY ANENE

KLABU ya KCB imedumisha rekodi ya kutoshindwa na Kabras Sugar kwenye Ligi Kuu ya Raga ya Kenya hadi mechi saba baada ya kuibwaga 41-12 uwanjani Ruaraka jijini Nairobi, Jumamosi.

Viongozi KCB, ambao wanajivunia kulemea Kabras mara sita na kupata sare moja tangu Kabras waingie Ligi Kuu mwaka 2014, wamezoa ushindi huo mkubwa kupitia wachezaji Darwin Mukidza, Peter Karia, Nick Ongeri, Brian Nyikuli na Felix Ojow.

Nyota Mukidza aliweka mabingwa watetezi KCB alama 3-0 juu kupitia penalti kabla ya Karia kupachika mguso ulioimarisha uongozi huo hadi 8-0.

Mukidza aliongeza mkwaju uliofanya KCB kufungua mwanya hadi 10-0.

Kabras ilijaribu kushambulia ngome ya KCB, lakini ikajipata chini 17-0 baada ya Ongeri kufunga mguso ambao Mukidza aliongeza mkwaju wake.

Mambo yaliharibikia KCB hata zaidi baada ya Nyikuli kuongeza mguso ambao pia uliandamana na mkwaju kutoka kwa Mukidza.

Penalti ya Mukidza mwanzo wa kipindi cha pili ilishuhudia KCB ikiongoza 27-0 kabla ya Kabras kupunguza mwanya huo hadi alama 20 baada ya kufunga mguso kupitia Mganda Philip Wokorach, ambaye pia alipachika mkwaju.

Ojow alifungia KCB mguso wa tano ulioweka wanabenki wa KCB mbele 32-7. Mukidza aliongeza mkwaju wa mguso huo.

Dakika chache baadaye, Ojow alionyeshwa kadi ya njano na kuwezesha Kabras kutumia nguvu ya kuwa na mchezaji mmoja zaidi uwanjani kufunga mguso bila mkwaju. Mukidza aligonga msumari wa mwisho baada ya kupata mguso na mkwaju.

Ushindi huu umetosha kuipa KCB tiketi ya kuandaa mechi moja ya nusu-fainali. KCB imefuzu moja kwa moja kushiriki nusu-fainali ikiwa imesalia na mechi moja kumaliza msimu wa kawaida wa ligi hii ya klabu 12.

Matokeo (Februari 24, 2018):

Kenya Harlequins 43-17 Kisii

KCB 41-12 Kabras Sugar

Mwamba 34-20 Blak Blad

Homeboyz 123-11 Mombasa

Nakuru 24-11 Nondescripts

Impala Saracens 23-10 Strathmore Leos

Ahmednassir akaangwa na Maraga kwa kutumia lugha chafu mitandaoni

Wakili Ahmednassir Abdullahi (kulia) akiwa katika Mahakama ya Juu . Picha/RICHARD MUNGUTI

Na RICHARD MUNGUTI

MAKABALIANO makali yalitanda katika Mahakama ya Juu Ijumaa wakati Jaji Mkuu (CJ) alipomtaka wakili Ahmednassir Abdullahi aamue ikiwa atakuwa anafanya kesi katika mahakama au katika mitandao ya kijamii.

Jaji Maraga aliyekuwa anasikiza kesi ya raia wawili wa Iran wanaotakiwa kurudishwa kwao baada ya kifungo cha maisha kufutiliwa mbali na mahakama ya rufaa.

Jaji Maraga anasikiza rufaa iliyokatwa na afisi ya mkurugenzi wa mashtaka ya umma (DPP) akiwa na Jaji Mohammed Ibrahim, Jackton Ojwang, Smokin Wanjala na Isaac Lenaola.

Kabla ya kuanza kusikiza kesi hiyo Jaji Maraga alimtaka Bw Abdullahi aeeleze matusi na lugha chafu ambayo amekuwa akitumia dhidi ya mahakama kutokana na maagizo mbali mbali,

Bw Abdullahi aliomba msamaha na kuahidi hatarudia hayo tena.

Katika siku za hivi punde amekuwa akikashifu mahakama kwa maagizo inayotoa.

Blatter ataka Kombe la Dunia 2026 liandaliwe Morocco

Na GEOFFREY ANENE

‘FISADI’ Sepp Blatter anapigia debe Morocco kuandaa Kombe la Dunia mwaka 2026.

Rais huyu wa zamani wa Shirikisho la Soka duniani (FIFA) haungi mkono ombi la Marekani, Mexico na Canada kutuma ombi la kuandaa fainali hizo kwa pamoja.

Anaona Bara Afrika na hasa Morocco inafaa kupewa nafasi hiyo.

Raia huyu kutoka Uswizi alipigwa marufuku ya miaka sita na FIFA kwa ufisadi mwaka 2015 baada ya Marekani kuongoza uchunguzi uliomfanya ang’atuke mamlakani.

Aliandika kwenye mtandao wake wa Twitter hapo Februari 22, 2018 kwamba FIFA ilikataa maandalizi ya pamoja ya kombe hili hadi mwaka 2018 na kwamba Morocco ni chaguo bora.

Baada ya Kombe la Dunia la mwaka 2002 nchini Japan na Korea Kusini, FIFA ilirejelea mfumo wa taifa moja kuwa mwenyeji wa Kombe la Dunia. Hata hivyo, makala ya mwaka 2026 yatakuwa tofauti kwa sababu washiriki watyaongezeka kutoka mataifa 32 hadi 48.

Morocco iliomba maandalizi ya Kombe la Dunia mwaka 1994, 1998, 2006 na 2010, lakini bila mafanikio. Ilishindwa na Marekani kura 10-7 katika ombi lake la mwaka 1994.

Brazil ilipata kura mbili mwaka huo. Mwaka 1998, Morocco ilipoteza kwa kura 12-7 dhidi ya Ufaransa baada ya Uswizi, Uingereza na Ujerumani kujiondoa. Ujerumani ilipata haki za kuandaa Kombe la Dunia mwaka 2006 kwa kuzoa kura 10, huku Afrika Kusini, Uingereza na Morocco zikiambulia kura sita, tano na mbili, mtawalia.

Morocco ilijaribu bahati yake tena mwaka 2010, lakini ombi lake likashindwa na lile la Afrika Kusini kwa kura 14-10. Misri ilipata kura sifuri. Tunisia na Libya, ambazo zilituma ombi moja, zilijiondoa sawa na Nigeria.

Wakenya kujaribu kutwaa taji Nagoya Marathon

Na GEOFFREY ANENE

WAKIMBIAJI Lucy Kabuu, Valary Jemeli na Flomena Cheyech Daniel watashiriki Nagoya Marathon hapo Machi 11 nchini Japan kila mmoja akitafuta kuwa Mkenya wa kwanza kutwaa taji tangu mbio hizi zianzishwe mwaka 1980.

Kabuu, 33, alisomea shule moja ya upili nchini Japan kabla ya kujitosa katika mbio za barabarani, lakini hajakamilisha mashindano ya kilomita 42 tangu amalize Dubai Marathon katika nafasi ya tatu mwaka 2015 kwa saa 2:20:21.

Cheyech, 35, anafahamu nchi ya Japan vyema sana kwa sababu yeye pia aliwahi kuishi humo. Bingwa huyu wa marathon kwenye mashindano ya Jumuiya ya Madola mwaka 2014 alinyakua mataji ya Saitama Marathon nchini Japan mwaka 2016 na 2017.

Naye Jemeli hajawahi kushiriki mashindano ya mbio nchini Japan. Jemeli, 26, anajivunia kutwaa ubingwa wa Prague Marathon katika nchi ya Jamhuri ya Czech kwa saa 2:21:57 mnamo Mei 7, 2017. Aliimarisha muda wake bora hadi saa 2:20:53 alipomaliza Berlin Marathon katika nafasi ya tatu mnamo Septemba 24, 2017.

Takriban wakimbiaji 20,000 wakiwemo wakali kutoka Japan na Ethiopia, wanatarajiwa kushiriki Nagoya Marathon mwaka 2018 .

Muungano wa Ulaya wateta kuhusu upinzani kuteswa Tanzania

Na AFP

NAIROBI, KENYA

MUUNGANO wa Ulaya (EU) umeonya kuwa ghasia zilizoshuhudiwa hivi majuzi nchini Tanzania zinaweza kuhatarisha demokrasia katika nchi hiyo.

“Tunasema kwa masikitiko kwamba matukio ya hivi majuzi nchini Tanzania ni tishio kwa demokrasia na haki za Watanzania,” EU ilisema katika taarifa Ijumaa.

Muungano huo ulisema kwamba unahuzunishwa na kupigwa risasi kwa mwanafunzi kwenye mkutano wa kisiasa wa upinzani jijini Dar es Salaam mapema mwezi huu. Ulitaka uchunguzi wa kina wa vifo vyote vya wanasiasa na watetezi wa haki za binadamu hivi majuzi kufanywa.

“Tunasikitishwa na ongezeko la ghasia katika miezi ya hivi majuzi,” EU ilisema.

Mnamo Ijumaa chama cha upinzani cha Chadema kilisema kwamba afisa wake mmoja aliuawa akiwa kati kati ya nchi hiyo na kutaja mauaji hayo kama mauaji ya kisiasa.

Mnamo Septemba mwezi jana, mbunge wa upinzani Tundu Lissu alinusurika baada ya kupigwa risasi kadhaa akiwa nyumbani kwake jijini Dodoma.

Hivi majuzi, Amerika ilieleza wasiwasi kuhusu ghasia za kisiasa nchini Tanzania.

 

Watu 500 wameuawa katika mashambulio nchini Syria – UN

Na AFP

UMOJA WA MATAIFA

KATIBU Mkuu wa Umoja wa Mataifa (UN) Antonio Guterres amesema kwamba watu 500 wakiwemo watoto 120, wameuawa katika muda wa wiki moja katika mashambulio ya ndege mashariki ya Ghouta nchini Syria na kutaja hali hiyo kama jehanamu ulimwenguni.

Bw Guterres alisema hayo wakati ambao Baraza la Usalama la Umoja wa Mataifa, likiungwa na Urusi, lilipitisha kwa kauli moja amri ya kusitishwa kwa vita nchini Syria kwa siku 30 kuruhusu misaada ya kibinadamu na dawa kufikia waathiriwa.

Azimio la kusitisha mapigano hayo mara moja lilipitishwa wakati wanajeshi wa serikali ya Syria walipokuwa wakiendelea kuponda ngome za waasi eneo la Mashariki ya Ghouta, ambapo mamia ya watu wameuawa katika mashambulio ya wiki moja.

“Tumechelewa kukabiliana na mzozo huu, tumechelewa sana,” Balozi wa Amerika aliambia baraza baada ya kura na kulaumu Urusi kwa kuwa kikwazo kwa kura hiyo.

Azimio hilo linataka kusitishwa kwa vita mara moja kote Syria ili kuruhusu misaada kuwafikia wagonjwa na waliojeruhiwa bila kutatizwa.
Ili Urusi iweze kuunga mkono azimio hilo, ilibidi lugha iliyotumiwa ibadilishwe kufafanua kuwa lingetekelezwa bila kuchelewa badala ya kuwa lingeanza kutekelezwa saa 72 baada ya kupitishwa.

Mabalozi walisema walikuwa na hakika kwamba hatua hii isingefungua milango ya kuahirisha kusitishwa kwa vita, kwa sababu wanachama wa baraza walikuwa wameweka wazi kwenye majadiliano kwamba amri ingetekelezwa haraka.

Mabalozi hao walisema kwamba Guterres ataarifu baraza kuhusu hali ya utekelezaji wa azimio hilo katika muda wa siku 15.

Inasemekana Russia ilikubali kuunga azimio hilo baada ya kuthibitishiwa kuwa halitaathiri mashambulio dhidi ya kundi la kigaidi la Islamic State au Al-Qaeda, pamoja na watu, makundi na mashirika yanayohusishwa na vitendo vya kigaidi.

Hatua hii itaruhusu serikali ya Syria kuendelea kushambulia magaidi wanaoshirikiana na Al-Qaeda eneo la Idlib, mkoa wa mwisho unaodhibitiwa na magaidi nchini Syria.

Kulingana na azimio hilo, mashambulio yatakomeshwa maeneo ya Ghouta Mashariki, Yarmouk, Foua na Kefraya.

Jombi achoma nguo za mke aliyemnyima asali

Na CORNELIUS MUTISYA

KUSYOMUOMO, MACHAKOS

KIOJA kilitokea hapa, polo alipotia kiberiti nguo za mkewe akidai alikuwa amemnyima uroda kwa muda mrefu.

Kulingana na mdokezi, polo alifunga pingu za maisha na mkewe miaka minne iliyopita na wakajaliwa kupata mtoto mmoja wa kiume.

Penyenye za mtaa zaarifu kuwa, wawili hao walikuwa wakipendana kama chanda na pete hadi mama watoto alipojiunga na kanisa moja la kiroho eneo hilo na mienendo na hulka yake ikabadilika kabisa.

“Mama watoto alipoamua kuokoka, alianza kumdharau mumewe kupindukia. Alikuwa akidai alijuta kuolewa na mwanamume wa sampuli yake,’” alisema mdaku wetu.

Inasemekana kwamba, mama huyo alikuwa akishinda kanisani mchana kutwa akisingizia kuomba. Nyakati zingine alikuwa akienda katika maskani ya pasta wake kumsaidia kupiga deki nyumba na hata kumfulia nguo!

Jamaa alishuku mkewe alikuwa na uhusiano na pasta na ndio sababu alikuwa akimkausha tendo la ndoa.

Kalameni alighadhabishwa mno na mienendo ya mkewe na akaamua kufyata ulimi akitaraji kuwa siku moja atabadilika.

Hata hivyo, maji yalizidi unga mkewe alipoanza kulala katika kitanda cha watoto na akamuacha aumizwe na baridi usiku kucha. Hali iliendelea kuwa hivyo kwa muda wa miezi sita na polo akakosa uvumilivu kabisa na akaamua kuchukua hatua.

“Jombi alichukua nguo zote za mkewe na akazichoma mpaka zikawa majivu. Alitoroka na kutokomea kusikojulika,’’ akasema mdaku wetu.

Duru zaarifu kuwa polo anaendelea kusakwa na maafisa wa usalama ili akabiliwe na mkono mrefu wa sheria. Mama watoto alisomba vifaa vyote vya nyumba na akarejea alikozaliwa.

 

TAHARIRI: Mti gani utapevuka kwa miezi mitatu?

Naibu Rais Bw William Ruto. Ameweka marufuku ya siku 90 dhidi ya ukataji wa miti nchini. Picha/ Maktaba

Na MHARIRI

SERIKALI imepiga marufuku ukataji wa miti katika misitu yote nchini, iwe ni ya kitaifa au ya kijamii.

Katika kipindi cha siku 90, Wizara ya Mazingira na Misitu itahitajika kushauriana na wadau wote ili kubuni jopo kazi la kufanyia misitu utathmini, na kuchapisha ripoti baada ya siku 14 kutoa mapendekezo kuhusu hatua zinazofaa kuchukuliwa kuokoa mazingira ya Kenya.

Amri hiyo ya kisheria ilitolewa wikendi na Naibu Rais William Ruto, wakati ambapo athari ya kiangazi inazidi kushuhudiwa katika maeneo tofauti nchini.

Kulingana na Bw Ruto, kiangazi kikali ambacho kimeshuhudiwa kwa karibu miaka mitatu sasa kimesababisha uhaba wa maji mitoni na katika chemchemi za maji.

Naibu Rais anaamini hali hii imetokana na ukataji wa miti kiholela pamoja na jinsi watu wanavyonyakua maeneo yanayotega maji, jambo ambalo limeathiri vibaya uwezo wa nchi kuzalisha chakula cha kutosheleza mahitaji ya umma.

Ukataji wa miti misituni umekuwa ukishuhudiwa sana kutokana na unyakuzi wa ardhi zilizotengwa kuwa misitu, mbali na biashara za mbao, uchomaji wa makaa na jinsi jamii mbalimbali zinavyojenga vijiji vyao misituni.

Miongoni mwa misitu ambayo imeathirika zaidi na ukataji wa miti kiholela ni msitu wa Mau ambao unategemewa kutega maji yanayoingia mito ya Ewaso Ng’iro Kusini, Sondu, Mara na Njoro. Mito hii hupeleka maji kwa maziwa makubwa ya Victoria, Nakuru na Natron.

Mbali na msitu wa Mau, misitu mingine katika maeneo tofauti nchini pia yamekuwa yakiharibiwa kama vile msitu wa Ngong ulio Kaunti ya Nairobi.

Japokuwa nia ya hatua hiyo ni nzuri, inaonekana amri hiyo ilitolewa bila ya kuzingatia mambo ya msingi. Kama lengo ni kuwa na miti ya kutosha, miezi mitatu itasaidia vipi? Wakati huu wa kiangazi, miti mipya itapandwa kutumia maji gani? Je, itapevuka katika muda huo?

Serikali pia haijaweka mikakati ya kisheria wala kuhusisha wadau kama ilivyokuwa wakati wa kupiga marufuku matumizi ya mifuko ya plastiki.

Kwa sababu hiyo, kuna haja ya kufikiria upya na kuwashirikisha wadau wengine, ili mpango huo usiwe ni wa siku 90 pekee, bali utakaoiwezesha nchi kufikia angalau asilimia 10 ya misitu.

 

 

Gichuhi atafaulu kumaliza migawanyiko katika LSK?

Mwenyekiti mpya wa Chama cha Wanasheria nchini (LSK), Bw Allen Gichuhi. Picha/ Maktaba

Na BENSON MATHEKA

UCHAGUZI wa  maafisa wa Chama cha Wanasheria nchini (LSK), ulikiacha kikiwa kimegawanyika zaidi kwa misingi ya kisiasa nchini na kuzua wasiwasi ikiwa uongozi mpya utatekeleza majukumu yake ya kuikosoa serikali ipasavyo.

Mwenyekiti mpya wa chama hicho, Bw Allen Gichuhi, anakabiliwa na kibarua kigumu kuunganisha chama hicho ambacho wanachama wamegawanyika katika mirengo ya kisiasa ya Jubilee na NASA na kwa misingi ya umri.

Japo wadadisi wamemtaja Gichuhi kuwa mwanamageuzi, kuna wale wanaoamini kwamba Bw Gichuhi anaegemea upande wa chama cha Jubilee na LSK itakosa makali ya kuikosoa serikali.

Wanasema kwamba msimamo wa Bw Gichuhi ni tofauti na wa mtangulizi wake Isaac Okero ambaye serikali iliamini aliegemea upande wa upinzani. “Uongozi mpya wa LSK ni tofauti na uliotangulia.

Mwenyekiti Allen Gichuhi anaaminika kuwa na msimamo wa kadiri. Kuna wale wanaoamini kwamba alikuwa kibaraka cha serikali kumzima mpinzani wake James Mwamu anayejulikana kwa kuwa na msimamo huru,” asema mwanasheria mmoja ambaye aliomba tusitaje jina kwa sababu ni mwanachama wa baraza jipya la LSK.

 

Kuzimwa kwa Havi

Kulingana na wakili huyo, kuzimwa kwa wakili Nelson Havi aliyeongoza mawakili vijana ambao ndio wengi katika chama hicho, kulimpa Bw Gichuhi nafasi ya kushinda.

Mahakama ya rufaa ilikataa kusimamisha uchaguzi huo kufuatia ombi la  Bw Havi ambaye amekuwa mstari wa mbele kutetea muungano wa NASA.

Bw Havi alitaka uchaguzi huo usimamishwe baada ya maafisa wa LSK kumzuia kugombea kiti cha uenyekiti kwa sababu ya kutotimiza kigezo cha miaka 15 akihudumu kama wakili.

Akiongea baada ya kushinda kiti hicho, Bw Gichuhi aliweka wazi kuwa uongozi wake hautakuwa wa kukabili serikali ila wa kushauriana nayo, jambo ambalo wadadisi wanasema itakuwa ni kuua jukumu la LSK.

“Hiki ni chama kilicho na jukumu pana la kupiga serikali darubini. Huwezi ukashauriana na serikali inayokandamiza wananchi wa kawaida. Ni lazima LSK ichukue msimamo thabiti kuhusu masuala yanayoikabili nchi.

Msimamo huo mara nyingi huwa wa kuhakikisha serikali imewajibika na si kuidhinisha maamuzi yake,” asema wakili mwingine ambaye pia ni mwanachama wa baraza la LSK.

 

Mwanamwageuzi

Bw Gichuhi alisema si lazima LSK itumie makabiliano ili kuikosoa serikali, kauli ambayo wakili Profesa George Wajackoyah anakubaliana nayo. “Ninamjua Bw Gichuhi kama mwanamageuzi.

Ni mtu anayependa kushauriana kwa upana na atabadilisha LSK,” asema Bw Wajackoyah. Bw Gichuhi mwenyewe alionekana kuelewa kwamba chama kimekumbwa na migawanyiko.

“Ajenda yangu ya kwanza itakuwa ni kuunganisha wanachama wa LSK  ili tuweze kufanya kazi pamoja. Tunataka kurudisha chama katika hali yake ya awali,” alisema Bw Gichuhi ambaye katika kampeni zake wengi waliamini alikuwa mradi wa serikali.

“Ninajua kwamba ninachukuliwa kuwa  kibaraka wa Jubilee na wengine wananihukumu kwa misingi ya kikabila. Hao ni watu ambao hawanielewi. LSK haifai kuunga mirengo ya kisiasa. Siungi mrengo wowote wa kisiasa,” alisema Bw Gichuhi ambaye ni mtaalamu wa sheria za usimamizi mwenye tajriba pana.

Katika kampeni, baadhi ya mawakili walidai kwamba Bw Gichuhi alifadhiliwa na serikali ilhali Nelson Havi alikuwa akifadhiliwa na NASA.

Kinachowafanya mawakili wengi ambao walisusia uchaguzi huo kuamini kwamba Gichuhi anaegemea  upande wa serikali ni jinsi  wanasiasa wa Jubilee walivyomtetea wakiongozwa na kiongozi wa wengi katika seneti Kipchuma Murkomen ambaye pia ni wakili.

Bw Murkomen alikuwa miongoni mwa wanasiasa wa kwanza kumpongeza Bw Gichuhi baada ya kushinda.

 

Hatari

“Japo anaweza kujiwakilisha kama mwanamageuzi na baadhi yetu tunamjua hivyo, kuhusishwa kwake na Jubilee kunaweka chama katika hatari ya kutotekeleza majukumu yake ya kukosoa serikali,” asema wakili mmoja ambaye amekuwa karibu na Bw Gichuhi kwa miaka mingi.

Wakili huyo anakiri kwamba iwapo Bw James Aggrey Mwamu angeshinda uchaguzi huo, LSK ingepata mwamko mpya kwa sababu ya ufahamu wake wa masuala ya kisheria na ujasiri wake wa siasa za Kenya na ukanda wa Afrika Mashariki kwa jumla.

Bw Gichuhi alipata kura 2,675 naye Mwamu akapata 2,145  katika uchaguzi uliosimamiwa na Tume Huru ya Uchaguzi na Mipaka (IEBC).

Katika kile kinachoonwa kama sura  mpya katika LSK, naibu wa Gichuhi ni Harriette Chiggai ambaye aliapa kuungana na mwenyekiti wake kubadilisha LSK bila makabiliano.

Wanachama wa baraza la LSK ni Bi Roseline Odede Maria Mbeneka, Eric Wafula, Aluso Ingati, Boniface Akusala, Bernard Ng’etich, Jane Masai, David Njuguna, Hetrine Kabita, Caroline Kamende na Ndinda Kinyili.

Bw Havi ambaye aliongoza mawakili vijana, ambao awali walitishia kususia uchaguzi, alimuunga Bw Mwamu uamuzi ambao ulizua vita mtandaoni kati yake na Bw Murkomen.

Madiwani 9 kukosa vikao kwa kuzua fujo

Na ANITA CHEPKOECH

MADIWANI tisa wa Bunge la Kaunti ya Kericho wamesimamishwa kushiriki katika shughuli za kamati mbalimbali huku wengine watatu wakitakiwa kuomba msamaha kufuatia vurugu zilizozuka bungeni mnamo Januari 5.

Madiwani walipigana baada ya kutofautiana kuhusu mradi wa Sh100 milioni wa uwanja mdogo wa ndege wa Kerenga.

Kamati ya Nidhamu inayoongozwa na Dominic Rono Ijumaa iliwasilisha ripoti iliyotaka madiwani waliozua vurugu waadhibiwe.

Madiwani Albert Kipkoech (Soliat) na Erick Bii (Maalumu) waliadhibiwa kwa kusimamishwa kuhudhuria vikao 16 vya kamati. Wawili hao wanadaiwa kubeba fimbo ya mamlaka ya bunge na kuitupa nje kupitia dirishani wakati wa vurugu hizo.

Madiwani wengine saba wakiongozwa na Paul Chirchir (Kapsoit) ambaye alipinga vikali hatua ya Gavana Paul Chepkwony kutaka kukarabati uwanja wa Kerenga, walipigwa marufuku kuhudhuria vikao 14 vya kamati zao kwa kupanga na kuchochea vurugu hizo.

Wendani wa Gavana Chepkwony; Collins Byegon (Kapkugerwet), Aron Rotich (Cheptororiet/Seretut) na  Anne  Tanui (Maalumu) walitakiwa kuandika barua rasmi ya kuomba radhi kwa Bunge la Kaunti ndani ya siku tatu.

Adhabu hiyo ilitolewa siku tatu baada ya Spika wa Bunge, karani Martin Epus na mkuu wa usalama kualikwa kwenda kuandikisha taarifa kwa Tume ya Maadili na Kukabiliana na Ufisadi (EACC) mjini Nakuru.

Wengine waliopata mwaliko wa kuandikisha taarifa mnamo Januari 29 ni Naibu Spika Josphat Ruto, Bw Chirchir, Bw Kipkoech na Bw Bii.

Katika mwaliko wake, Mkuu wa EACC ukanda wa South Rift Gilbert Lukhoba alisema madiwani hao wanatakiwa kutoa taarifa kuhusiana na vurugu zilizozuka ndani ya Bunge la Kaunti.

Mzozo huo ulizuka huku Gavana Chepkwony akizindua kamati ya kusimamia mradi huo, ambayo inasimamiwa na waziri wake wa Barabara Charles Birech.

Kamati hiyo itasimamia shughuli ya ukarabati wa uwanja huo.

“Uwanja huo una urefu wa kilomita 1.2 na upana wa mita 18. Upana unatarajiwa kupanuliwa hadi mita 23,” akasema Bw Chepkwony.

Alisema Mamlaka ya Safari za Ndege (KCAA) na Mamlaka ya Viwanja vya Ndege nchini (KAA) zinaunga mkono mradi huo.

Tetesi Kidero atawania ugavana Homa Bay baada ya ushindi wa Awiti kufutwa

Aliyekuwa gavana wa Nairobi Dkt Evans Kidero. Picha/ Maktaba

JUSTUS OCHIENG  na BARRACK ODUOR

HUENDA aliyekuwa Gavana wa Nairobi, Dkt Evans Kidero akawania ugavana katika Kaunti ya Homa Bay.

Aidha, mkakati wa kumrai Dkt Kidero kuwania nafasi hiyo unatokana na uhasama mkali uliopo kati ya Gavana Cyprian Awiti, ambaye ushindi wake ulifutiliwa mbali na mahakama, na aliyekuwa mbunge wa Kasipul, Bw Otieno Magwanga.

Wadadisi wanasema uhasama huo umekuwa ukichangia pakubwa ukosefu wa maendeleo katika kaunti hiyo. Na kutokana na hali ilivyo, huenda ODM ikalazimika kuandaa shughuli mpya ya mchujo ili kuwavutia wawaniaji zaidi, ili kupunguza taharuki hiyo.

Hata hivyo, Katibu Mkuu wa ODM, Wakili Edward Sifuna alisema kwamba hawezi kusema lolote kuhusu mkakati huo kwani ni sawa na “kuzua hali ambazo hazipo.”

“Gavana Awiti alisema kuwa anawasilisha rufaa. Hivyo, suala la uchaguzi mpya lingali mbali. ODM itabaki kuwa chama kinachoheshimu demokrasia,” akasema Bw Sifuna akizungumza na ‘Taifa Leo.’

Duru katika ngome ya Bw Awiti zilisema kuwa ‘hofu’ ya ujio wa Dkt Kidero ndiyo imemfanya kufika katika Mahakama ya Rufaa kupinga uamuzi wa Mahakama Kuu.

Bw Awiti alipoteza kiti chake wiki iliyopita baada ya Mahakama Kuu ya Homa Bay kufutilia mbali kuchaguliwa kwake.

Lakini pendekezo hilo likitolewa, Dkt Kidero amebaki kimya, licha ya juhudi za kumfikia.

Jumapili, mmoja wa waandani wake wakuu hakueleza moja kwa moja ikiwa analenga kuwania ugavana.

“Analenga kuwania nafasi kubwa zaidi ya kisiasa,” akasema.

 

NASA kuwatia adabu wabunge wake walioshiriki kuwapiga msasa mabalozi

Kiongozi wa Wachache katika Bunge la Kitaifa Bw John Mbadi akihutubia wanahabari awali. Picha/ Maktaba

Na SAMWEL OWINO

MUUNNGANO wa NASA huenda ukawaadhibu wabunge ambao walishiriki katika shughuli ya kuwapiga msasa watu walioteuliwa makatibu wa wizara na mabalozi na Rais Uhuru Kenyatta.

Muungano huo ulikuwa umepitisha kauli ya kutoshiriki katika zoezi hilo.

Wanachama wa NASA katika Kamati ya Bunge Kuhusu Teuzi walisusia shughuli ya kuwapiga msasa mawaziri tisa, ambapo pia walikuwa wametoa maagizo kama hayo kwa wabunge wanaohudumu katika kamati zingine za Bunge.

Muungano umesisitiza kuwa haumtambui Bw Kenyatta kama rais halali, hivyo kushiriki katika zoezi hilo ni sawa na kumuunga mkono.

Upigaji msasa wa makatibu na mabalozi ulifanywa na kamati mbalimbali za Bunge, ambapo baadhi ya wabunge wa upinzani walihudhuria.

Na licha ya tishio hilo, ingali kubainika aina ya adhabu ambayo wabunge hao watakabiliwa nayo.

Hata hivyo, uongozi wa Bunge katika muungano huo unatarajiwa kukutana baadaye wiki hii ili kutathmini suala hilo kwa undani.

“Ingawa maagizo kuhusu upigaji msasa wa mawaziri yalikuwa wazi, hali ni tofauti kuhusu upigaji msasa wa makatibu na mabalozi, kwani maagizo hayo hayakutolewa kikamilifu. Hata hivyo, tunaliangazia suala hilo kwa undani,” akasema Bw Junet Mohamed, ambaye ndiye Kiranja wa Wachache katika Bunge.

Kwa upande wake, Kiongozi wa Wachache katika Bunge John Mbadi alisema kuwa atachukua orodha ya wale waliohudhuria shughuli hizo na kuchukua hatua kali dhidi yao.

 

Kukiuka msimamo wa chama

“Ningetaka kujua walioshiriki, sababu kuu ya kukiuka msimamo wa muungano licha ya maagizo hayo kutolewa wazi. Baadhi yao walinipigia simu wakiniuliza ikiwa wanapaswa kushiriki ambapo niliwaambia hawapaswi. Hilo linaashiria walifahamu msimamo wa chama,” akasema Bw Mbadi.

“Msimamo wetu kama ODM na NASA unabaki kwamba hatumtambui Uhuru Kenyatta kama rais, hivyo hawapaswi kuonekana kutambua uhalali wa Bw Kenyatta kama rais,” akaongeza.

Mkurugenzi wa Masuala ya Siasa katika ODM Bw Opiyo Wandayi alisema kwamba hatua ya NASA kutoshiriki katika zoezi ilikuwa wazi kwa kila mbunge.

“Wabunge ambao walikaidi agizo hilo lazima wajitokeze wazi. Ni lazima nidhamu ya vyama vya kisiasa izingatiwe,” akasema Bw Wandayi.

Baadhi ya wabunge ambao walikaidi maagizo hayo ni Caleb Amisi (Saboti), Lilian Gogo (Rongo), Patrick Makau (Mavoko), Justus Kizito (Shinyalu), Ahmed Kolosh (Wajir Magharibi), Wafula Wamunyinyi (Kanduyi), Benson Momanyi (Borabu), Charles Gimose( Hamisi) na Beatrice Adagala (Vihiga).

Wazee sasa wamgeukia Mungu amalize njaa

WINNIE ATIENO na PETER MBURU

HALI mbaya ya kiangazi na njaa imewalazimu wazee wa jamii ya Agikuyu kutoka Kaunti ya Nakuru kumgeukia Mungu kwa maombi, huku watoto wakiwa hatarini kufa kwa njaa kaunti ya Kilifi.

Mnamo Jumamosi, wazee hao walikusanyika eneo la Maili Sita, Bahati ambapo kwa njia za kitamaduni walifanya matambiko wakimlilia Mungu kumaliza janga la kiangazi.

Maombi hayo yalifanywa huku shirika la Msalaba Mwekundu likisema watu 241,000 wanahangaishwa na njaa, hasa katika kaunti za Kilifi, Tana River na Taita Taveta.

Ziara ya Taifa Leo katika Kaunti ya Kilifi ilionyesha Mto Sabaki umebadili mkondo wake, huku mabwawa manne pekee kati ya 25 yakiwa na maji ambayo yanang’ang’aniwa na mifugo na binadamu.

Meneja wa shirika la Msalaba Mwekundu eneo la Pwani, Bw Hassan Musa, alisema kuwa huenda hali hiyo ikawa mbaya hata zaidi kutokana na hali ya anga isiyotabirika.

“Katika Kaunti ya Taita Taveta takriban watu 77,000 wanakabiliwa na njaa, Tana River ni 35,000 na Kilifi 129,000. Kilifi ndiyo imeathiriwa zaidi haswa eneo la Magarini ambapo watu 51,000 wanapata taabu kwa sababu ya uhaba wa chakula na maji. Bamba-Ganze ni watu 41,000, Kaloleni 20,000 na Malindi 10,000,” Bw Musa alisema.

Waziri wa Maji, Misitu na Mazingira katika Kaunti ya Kilifi, Bw Kiringi Mwachitu, alisema kuwa wakazi wengi hujihusisha na biashara ya kuchoma makaa kwa sababu ya umaskini.

Katika kaunti hiyo, maeneo yaliyoathiriwa zadi na ukame ni Magarini na Malindi.

“Kwa sasa wakazi wa Bamba wana maji. Hata hivyo kuna changamoto za maji katika eneo la Magarini na Malindi na tunazishughulikia. Katika eneo la Ganze tumewekeza mno katika sekta ya maji,” akasema.

Hata hivyo Bw Musa ameitaka serikali kuwaelimisha wakazi kuhusu upanzi wa miti.

“Kiangazi cha muda mrefu kimefanya maji kuwa machafu. Wakazi wanatumia maji ambayo hayajatiwa dawa na pia wanalazimika kutumia maji hayo na mifugo,” akasema.

Hali hiyo ya kiangazi ni mbaya mno, kiasi kwamba baadhi ya wakazi wameanza kuathiriwa na ugonjwa wa ngozi, unaotokana na utapia mlo.

 

 

 

joho

Joho achemsha Wiper kuhusu kiapo

BONFACE MWANIKI na BENSON MATHEKA

Kwa ufupi:

  • Bw Joho amtaja Bw Musyoka na vinara wengine wawili wa NASA kama waoga kwa kutohudhuria kiapo cha Bw Raila Odinga
  • Bila kutaja majina, Bw Musyoka awalaumu wanasiasa wa ODM kwa kumuita mwoga
  • Bw Wambua asema matamshi ya Bw Joho ni madharau kwa Bw Musyoka na vinara wengine wa NASA
  • Wiper yasema haitakubali wabunge, magavana na hata madiwani wa ODM kuwatusi vinara wa NASA

NYUFA katika muungano wa NASA zinaendelea kupanuka huku wanasiasa wa chama cha Wiper wakimshutumu Gavana wa Mombasa Hassan Joho na chama cha ODM kwa kile wanachosema ni dharau dhidi ya kiongozi wa chama chao, Bw Stephen Kalonzo Musyoka.

Seneta wa Kitui, Enoch Wambua (Wiper), alimlaumu Bw Joho na viongozi wa ODM akisema kwamba wanachama wa Wiper hawatakubali mtu yeyote kumdharau kiongozi wao.

Akihutubia mkutano wa baraza kuu la ODM jijini Nairobi Ijumaa iliyopita, Bw Joho alimtaja Bw Musyoka na vinara wengine wawili wa NASA, Musalia Mudavadi na Moses Wetang’ula kama waoga kwa kutohudhuria kiapo cha Bw Raila Odinga.

Bw Musyoka na Bw Mudavadi walihudhuria mkutano huo kwa mwaliko wa kiongozi wa chama hicho Raila Odinga.

Akihutubia wajumbe katika mkutano huo, Bw Musyoka aliwataka wanasiasa wa vyama tanzu vya NASA kuheshimu vinara wote. Bila kutaja majina, aliwalaumu wanasiasa wa ODM kwa kumuita mwoga.

 

Madharau

Bw Wambua alisema matamshi ya Bw Joho ni madharau kwa Bw Musyoka na vinara wengine wa NASA ambao hawakuhudhuria mkutano wa kumuapisha Bw Odinga kuwa “rais wa wananchi” katika bustani ya Uhuru Park mnamo Januari 30.

“Kama chama, hatutakubali matusi kutoka kwa viongozi wengine waliochaguliwa chini ya muungano wa NASA. Kuwatusi vinara wetu kunafaa kuwa kitu cha mwisho kutoka kwa viongozi. Mimi mwenyewe siwezi kuthubutu kufanya hivyo,” alisema Bw Wambua.

Aliambia chama cha ODM kwamba Wiper ina mbinu nyingi za kutumia iwapo wanasiasa wake wataendelea kumdharau Bw Musyoka.

“Kama wenzetu katika ODM wanafikiri tumekwama NASA, wajue Wiper ina mbinu nyingi na tuko tayari kufuata mojawapo tukilazimishwa kufanya hivyo. Wanafaa kuwa waangalifu sana,” alionya Bw Wambua.

 

‘Hatutakubali matusi’

“Hatuwezi kukubali hali ambapo wabunge, magavana na hata madiwani wana ujasiri wa kuwatusi vinara wa muungano wetu,” alisema Bw Wambua.

Seneta huyo alisema vyama tanzu katika Muungano wa NASA ni sawa na vinafaa kuheshimiana.

Akiongea eneo la Mwingi, Bw Wambua alisema kuwa Wiper inaendelea kuweka mikakati ya kujiimarisha ili kuhakikisha Bw Musyoka anashinda urais mwaka wa 2022.

“Tutatangaza mikakati mipya ili kuhakikisha ifikapo 2022, kiongozi wa chama chetu Kalonzo Musyoka atakuwa rais wa Kenya kwa manufaa ya wote,” alisema.

Bw Wambua alisema Wiper kinajiandaa kusajili wanachama wengi kote nchini kama njia moja ya kukiimarisha.

Wiper pia kimekuwa kikilaumu ODM kwa kutwaa nafasi za kamati za bunge ambazo zingegawiwa vyama tanzu.

 

JAMVI: Sababu ya Uhuruto kufurahia ukaidi wa Raila kwa urais wao

Na MWANGI MUIRURI

Kifupi:

  • Moses Kuria asema “sisi hatuna presha kwa kuwa Odinga anatumalizia mambo yetu ya 2022.”
  • Upinzani wa Odinga huwaweka wafuasi wa Jubilee wakiwa chonjo kwa kila hali na ambapo bora tu anaendelea kubishana, huwa anasaidia ngome muhimu za Jubilee kujitokeza kujisajili kama wapiga kura
  • Mlima Kenya hufurahia juhudi na uaminifu wa Ruto kwa Uhuru Kenyatta, na ndizo humwezesha ‘mtu wao’ kujinasua katika mtego wa Odinga
  • Bw Odinga angekuwa na wa kumshauri vilivyo, angetambua hawa wawili walio mamlakani kwa sasa, “lakini azidishe njama zake za kuangazia ufisadi ambao ni utamaduni wa Jubilee

WANDANI wa Jubilee wameelezea furaha yao kutokana na harakati za kinara wa chama cha ODM, Bw Raila Odinga za kutotambua urais wa Uhuru Kenyatta kwani kwa kufanya hivyo anaendelea kumjenga Naibu Rais William Ruto katika urithi wa Ikulu 2022.

Furaha yao inatokana na ukweli kuwa Jubilee imejengwa katika msingi wa makabila mawili yanayosakini ngome mbili kuu; Mlima Kenya (Gema) na Rift Valley (Kamatusa) ambapo katika kutotambua kwake Rais Kenyatta, upinzaani unazidi kuimarisha umoja wa ngome za Rais na naibu wake.

Katika hali hiyo, mchanganuzi wa siasa kutoka Mlima Kenya, Peter Kagwanja anasema “ukitaka taifa lote lilegeze misimamo mikali ya kuegemea Jubilee au muungano wa Nasa, itambidi Waziri Mkuu wa zamani atambue urais wa Kenyatta.”

Anasema kuwa hilo litawatuma wafuasi wa Nasa nje ya siasa za ukaidi na uasi huku nao wafuasi wa Jubilee wakiingiwa na mtazamo mpana wa kuanza kudai huduma bora kutoka kwa serikali yao badala ya kuitetea hata inapokosea.

Waziri wa Kilimo Mwangi Kiujuri akiwa katika hafla ya kikazi katika Kaunti ya Laikipia alifichua kuwa “wacha Odinga aendelee kupambana na UhuRuto akisema hawatambui lakini sisi kimyakimya tunajua kwamba anatujenga kwa kuwa anatupa ile motisha ya kuikinga serikali yetu”.

Kiunjuri alisema kuwa hadi sasa ni bayana kuwa mrengo wa Nasa uko katika hatari ya kusambaratika na harakati za Odinga ni mojawapo ya vichocheo hivyo vya uhasama ndani ya vyama tanzu ndani ya muungano wake.

“Akiendelea hivyo na akose kuelewana na vyama tanzu ndani ya Nasa, ina maana kuwa uchaguzi wa 2022 tutaingia tukiwa na uwezekano mkubwa wa kuwa na mrengo mwingine ndani ya Nasa, ugawe kura za Nasa na Ruto aibuke na ushindi wa zaidi ya asilimia 70,” akasema.

Aliwataka wenyeji wamuombee Odinga aendelee na mkondo wake wa sasa wa siasa “ili aendelee kuvurugika huku sisi tukiwa imara bila mawazo mengi”.

Naye mbunge wa Gatundu Kusini Moses Kuria akihutubu katika mazishi ya Esther Nyaruai Wachira ambaye ni dadake mwakilishi wa wanawake wa Nyeri, Winnie Mukami, alisema kuwa “sisi hatuna presha kwa kuwa Odinga anatumalizia mambo yetu ya 2022.”

Alisema jinsi anavyoendelea kuhangaika akisaka kura ya 2017 iandaliwe tena kabla ya Agosti 2018, ndivyo anavyotupa shinikizo za dhati za kuendelea kuunga mkono hawa wetu ambao tulijichagulia. Anasema kila siku ya Odinga akiwa katika siasa za ukaidi na uasi ni siku ya kampeni kwa Jubilee na njama yake ya 2022 ya kumpa urais Ruto.

 

Ghasia za 2007

“Sisi tunajua hatari ya kusambaratika kama Jubilee. Tunajua kuwa tumewekeza si haba katika mikakati ya kuleta amani kati ya jamii zetu ambazo zilikuwa zinazozana kisiasa na kutumbukia katika ghasia za baada ya uchaguzi wa 2007.

Kila harakati za Odinga ambazo zinaangazia njama ya kuturejesha katika hali hiyo ya ghasia ni baraka kwetu kwa kuwa tutazidi kuwa pamoja ili tumfungie nje,” akasema.

Naye mwakilishi wa wanawake wa Murang’a, Bi Sabina Chege anasema “Odinga amekuwa baraka kwetu katika msukumo wake wa siasa za upinzani.

Jinsi arukavyo juu akilenga kutuangamiza kisiasa, ndivyo sisi humngojea arejee chini tukiwa ngome thabiti.”

Anasema kuwa hali hiyo ya upinzani wa Odinga huwaweka wafuasi wa Jubilee wakiwa chonjo kwa kila hali na ambapo bora tu anaendelea kubishana, huwa anasaidia ngome muhimu za Jubilee kujitokeza kujisajili kama wapiga kura na pia kupiga kura katika siku ya uchaguzi.

Bi Chege anatoa mfano wa jinsi idadi Mlima Kenya na Rift Valley zilipendeza katika usajili na upigaji kura, lakini kujiondoa kwa Odinga katika kura ya marudio ya Oktoba 26 kukapunguza idadi hizo.

 

Kumwandama debeni

“Msingi wetu wa dhati ni kuwa, bora tu Odinga ana makali yake ya kisiasa, huwa anatufaa zaidi katika kuwasukuma wafuasi wetu kuwajibikia vita vya kumwandama ndani ya debe kupitia upigaji kura wa uhakika,” asema.

Mchanganuzi wa siasa, Prof Ngugi Njoroge anasema kuwa “Mlima Kenya na Rift Valley pamoja na jamii zingine ambazo hujihusisha na mpangilio huo wa kisiasa ungependa zaidi Odinga azidishe makali yake ya upinzani hadi 2022, ashindwe na kwa uhakika awe sasa amewakoma Jubilee.

Anasema kuwa ikiwa Odinga ataendelea na mkondo wake wa sasa wa kupinga ushindi wa rais Kenyatta, ako na hatari ya kutumiwa na Jubilee kuwa kama mwandani wao wa kimikakati “ambapo ataendelea kuwaweka wafuasi hawa katika ngome zao za kikabila wakiwa wameungana.”

Anasema Mlima Kenya hufurahia juhudi na uaminifu wa Ruto kwa Uhuru Kenyatta, na ndizo humwezesha ‘mtu wao’ kujinasua katika mtego wa Odinga.

“Kwa hilo, Mlima Kenya huendelea kukwamilia dhana kuwa wana deni kwa ngome ya Ruto ambayo ingekuwa haikujiunga na Uhuru, basi 2013 rais angeishia kuwa Odinga na apate awamu ya pili 2017,” asema.

 

Kuunganisha Mlima Kenya na Rift Valley

Katika hali hiyo, Prof Njoroge anasema kuwa “hakuna cha kupendeza Ruto na Uhuru kuliko kumwona Odinga akiendelea mbele na kuwakosea heshima wakiwa mamlakani kwa sasa kwa kuwa kufanya hivyo kuna baraka zake katika kudumisha Mlima Kenya na Rift Valley pamoja.

Mhathiri wa somo la kisiasa, Gasper Odhiambo anasema kuwa mtazamo huo umegonga ndipo kwa kuwa “Odinga huwa ni mwaathiriwa wa mbinu mbovu za kisiasa”.

Anasema kuwa Odinga angekuwa na wa kumshauri vilivyo, angetambua hawa wawili walio mamlakani kwa sasa, “lakini azidishe njama zake za kuangazia ufisadi ambao ni utamaduni wa Jubilee na katika hali hiyo ajipange upya katika kuunda muungano mwingine.”

Anasema kuwa kwa sasa kile Jubilee inadhaniwa kufanya ni kumtenga Odinga aonekane kama aliye tu na upinzani kwa Jubilee, “huku ikidaiwa kuwa inagawa pesa kama njugu kwa vyama tanzu vya Nasa kwa nia ya kuvunja muungano huo.”

 

Mhaini

Katika hali hiyo, Odhiambo anasema kuwa Odinga anabakia tu kuwa “mhaini wa kisiasa kwa Mlima Kenya na Rift Valley, huku ngome za washirika wake ndani ya kabila zao wakionyeshwa kuwa kuwekeza kwa Odinga ni kujihakikishia hasara ya kura 2022, lakini kukerwa na Odinga kuendelee kuweka ngome za Jubilee za sasa pamoja.”

Odhiambo anasema kuwa “wazo la busara kwa Odinga hadi sasa ni ajipange kama upinzani ambao alizindua kupitia kuapishwa kwake kama rais wa wananchi na hatimaye aanze harakati za uhakika za kulenga wandani wa Jubilee ambao daima hawatawahi kujiuzuia kupora uchumi wa taifa.”

Anaeleza kuwa wakati Odinga anaangazia ufisadi ndani ya “hizi serikali za jamii za ukiritimba wa urais, ndivyo hujivunia umaarufu katika maeneo yote ya hapa nchini.”

Anasema kuwa Odinga ni mwaniaji anayependeza ngome zote lakini wapinzani wake ni wale tu wa kupendeza vijiji vyao na ambapo huviunganisha kuzua kura ya ushindi.

 

‘Ufisadi ni utamaduni wa Jubilee’

Anaongeza kuwa Odinga angekuwa na wa kumshauri vilivyo, angetambua hawa wawili walio mamlakani kwa sasa, “lakini azidishe njama zake za kuangazia ufisadi ambao ni utamaduni wa Jubilee na katika hali hiyo ajipange upya katika kuunda muungano mwingine.”

Kwa sasa kile Jubilee inadhaniwa kufanya ni kumtenga Odinga aonekane kama aliye tu na upinzani kwa Jubilee, “huku ikidaiwa kuwa inagawa pesa kama njugu kwa vyama tanzu vya Nasa kwa nia ya kuvunja muungano huo.”

Katika hali hiyo, Odhiambo anasema kuwa Odinga anabakia tu kuwa “haini wa kisiasa kwa Mlima Kenya na Rift Valley, huku ngome za washirika wake ndani ya kabila zao wakionyeshwa kuwa kuwekeza kwa Odinga ni kujihakikishia hasara ya kura 2022, lakini kukerwa na Odinga kuendelee kuweka ngome za Jubilee za sasa pamoja.”

Odhiambo anasema kuwa “wazo la busara kwa Odinga hadi sasa ni ajipange kama upinzani ambao alizindua kupitia kuapishwa kwake kama rais wa wananchi na hatimaye aanze harakati za uhakika za kulenga wandani wa Jubilee ambao daima hawatawahi kujiuzuia kupora uchumi wa taifa.”

 

 

JAMVI: Dhamira fiche ya Uhuru kuzuia wabunge wa Jubilee kuhojiwa yaanikwa

Kumteua Bw Raphael Tuju kama waziri asiyeshikilia nafasi yoyote ni juhudi za kuhakikisha kwamba maslahi ya Chama cha Jubilee (JP) yanashughulikiwa serikalini, na katika wizara zote. Picha/ Maktaba

Na WANDERI KAMAU

Kifupi:

  • Imefichuka kuwa Jubilee ina mipango madhubuti inayoendeshwa kichinichini kuhakikisha kwamba imedhibiti  habari 
  • Imebainika JP pia inabuni mikakati ya kutoa mafunzo maalum kwa maafisa watakaosimamia chama hicho kutoka ngazi za mashinani hadi za kitaifa
  • Huenda ikawa vigumu kwa Kenya kuwa na chama kimoja ama viwili vya kisiasa, ikizingatiwa kwamba mazingira ya kisiasa nchini ni telezi sana
  • Chama hicho kitageuzwa kuwa chenye asasi thabiti ambazo zitahakikisha kimebaki imara, hata wakati UhuRuto watakapoondoka uongozini

 

HATUA ya Rais Uhuru Kenyatta kuwazuia wabunge wa Jubilee kushiriki katika mahojiano yoyote na vyombo vya habari imeibua mkakati wa serikali kuirejesha Kenya katika enzi ya chama kimoja.

Aidha, imefichuka kuwa mkakati huo ni sehemu ya mipango madhubuti inayoendeshwa kichinichini na uongozi wa Jubilee kuhakikisha kwamba imedhibiti jinsi habari muhimu kuhusu maendeleo ya chama hicho yanavyowafikia wananchi.

Mbali na hayo, kuteuliwa kwa Bw Raphael Tuju kama waziri asiyeshikilia nafasi yoyote ni juhudi za kuhakikisha kwamba maslahi ya Chama cha Jubilee (JP) yanashughulikiwa serikalini, na katika wizara zote.

Imebainika kwamba kuwa hiyo ndiyo sababu kuu ambapo Bw Tuju, ambaye pia ni Katibu Mkuu wa JP, hakupigwa msasa na Bunge, kwani wajibu wake ni ‘mkubwa’.

“Wajibu wa Bw Tuju ni kuhakikisha kuwa utendakazi wa kila wizara unawiana na malengo ya Jubilee, hasa manifesto yake. Ni hali ya kawaida, katika nchi zenye vyama thabiti vya kisiasa kama Afrika Kusini, Uchina, Tanzania, Uganda kati ya nchi nyingine,” zikaeleza.

Duru zimeeleza kwamba ili kuhakikisha kuwa hakuna pengo lolote katika uongozi wa chama, Rais Kenyatta ataendelea kuwa kiongozi rasmi wa JP, hata atakapong’atuka uongozini kama rais mwaka wa 2022.

 

Kugeuza Jubilee kuwa KANU

Na ingawa, hilo lingali kubainika kwa wengi, wachanganuzi wanasema kuwa huo ni mpango wa wazi wa kukikuza chama hicho kufikia kiwango cha chama cha Kanu, ambacho kiliitawala nchi kwa karibu miongo mitano.

“Nadhani ni wazi kwamba Jubilee inairejesha Kenya katika enzi ya utawala wa chama kimoja cha kisiasa,” asema Gabriel Otachi, ambaye ni mchanganuzi wa kisiasa.

Imebainika kwamba JP pia inabuni mikakati ya kuweka mchakato wa kutoa mafunzo maalum kwa maafisa watakaosimamia chama hicho kutoka ngazi za mashinani hadi za kitaifa.

Kulingana na mwongozo ulioonwa na Jamvi la Siasa, lengo kuu ni kukiwianisha na vyama Chama cha Kikomunisti cha Uchina (CP), African National Congress (ANC) cha Afrika Kusini, Chama cha Mapinduzi (CCM) nchini Tanzania kati ya vingine vyenye nguvu.

“Lengo la JP ni kubuni utaratibu thabiti wa usimamizi wa chama, ambao utahakikisha kuwa uongozi wake hautegemei uwepo wa mtu binafsi, basi asasi zitakazokuwepo,” unaeleza mwongozo huo.

 

Ni vigumu

Hata hivyo, wachanganuzi wanatilia shaka mpango huo, wakisema kuwa huenda ikawa vigumu kwa Kenya kuwa na chama kimoja ama viwili vya kisiasa, ikizingatiwa kwamba mazingira ya kisiasa nchini ni telezi sana, ikilinganishwa na mataifa mengine.

“Kenya ni nchi iliyostawi sana kidemokrasia. Hivyo, jaribio lolote la kuirejesha katika chama kimoja huenda lisifaulu, kwani watu wataliasi kwa kutumia vipengele vilivyo katika Katiba kudai haki zao,” asema Bw Kipkorir Mutai, ambaye ni mhadhiri wa Sayansi ya Siasa katika Chuo Kikuu cha Egerton.

Hata hivyo, baadhi ya wadadisi wanasema kwamba hawajashtushwa na mpango huo, kwani ilidhihirika tangu awali kwamba mpango wa mabw Uhuru na Naibu Raid William Ruto walikuwa na mipango mikubwa kuigeuza Jubilee kuwa chama chenye nguvu.

“Ilidhihirika awali kwamba mpango wao ulikuwa kubuni chama chenye nguvu, hasa baada ya Jubilee ‘kumeza’ vyama tanzu kama vile TNA, URP na vinginevyo. Hii ilikuwa hatua ya kwanza kwamba lengo lao lilikuwa kubwa zaidi,” asema Bw Mutai.

Vile vile, wachanganuzi pia wanataja ukaribu uliopo kati ya uongozi wa Jubilee na CP kutoka Uchina, kama ishara ya wazi kwamba haiangalii nyuma.

Mwezi uliopita, ujumbe kutoka CP uliwasili nchini, ambapo ulitoa mafunzo kwa maafisa kadhaa wa Jubilee. Ilibainika kwamba maafisa hao watatumiwa na chama kuendesha ajenda zake katika kutoka ngazi ya kitaifa hadi mashinani.

Ilibainika kwamba jukumu kuu la maafisa hao litakuwa kuwafikia wananchi katika viwango vyote ili kuwafahamisha kuhusu ajenda kuu za chama, hasa manifesto yake.

 

Kuimarisha chama

Katika mojawapo ya mahojiano na kituo kimoja cha televisheni majuzi, mwenyekiti wa JP Bw David Murathe alieleza kuwa chama hicho kitageuzwa kuwa chenye misingi na asasi thabiti ambazo zitahakikisha kwamba kimebaki imara, hata wakati Rais Kenyatta na Bw Ruto watakapoondoka uongozini.

“Hatuna nia mbaya, ila lengo letu kuu ni kuimarisha mfumo wa siasa za nchi, ili kuondoa utegemezi wa watu binafsi, ila uwepo wa vyama ambavyo vitaendeleza malengo yake, hata viongozi hao watakapoondoka,” akasema Bw Murathe.

Mwezi uliopita, Rais Kenyatta alihudhuria maadhimisho ya miaka 106 tangu kuanzishwa kwa ANC, Afrika Kusini, hatua iliyoonekana kuimarisha ushirikiano kati ya vyama hivyi viwili.

Licha ya hayo, wakosoaji wa mpango huo wanautaja kama njama ya kurejesha utawala wa kidikteta nchini. Wanazikosoa mbinu hizo, hasa kuwazuia wabunge kutoa hisia zao kuhusu hali ya nchi, kama ishara ya wazi ya ukiukaji wa haki za kujieleza.

“Sitashangaa ikiwa nitaona maasi kutoka ukanda wa Mlima Kenya (anakotoka Rais Kenyatta) ama Bonde la Ufa (anakotoka Bw Ruto) kwani huu ni udikteta wa wazi,” akasema mwanaharakati wa kisiasa Raymond Mutembei.

 

JAMVI: Dhana Raila atawania urais 2022 yazua hofu ya mgawanyiko Nasa

Na BENSON MATHEKA

Kwa ufupi:

  • Dalili zinaonyesha kuwa Bw Odinga amekuwa akitengwa na wenzake tangu ajiapishe kuwa rais wa wananchi
  • Wabunge wa ODM wanatumia kiapo kuwadhalilisha vinara wenza wa NASA ili kupata sababu ya kujiondoa NASA  na kuunda muungano mpya
  • Kulingana na Bw Ayub Savula, Bw Musyoka, Bw Mudavadi na Bw Wetang’ula wameanza kuweka mikakati mipya kuelekea uchaguzi mkuu wa 2022
  • Wabunge wa ODM wanahisi kwamba Kalonzo, Mudavadi na Wetangula waliwavunja moyo kwa kususia kuapishwa kwa Bw Odinga
  • Dalili kwamba hali sio shwari katika NASA zimejitokeza katika bunge vyama hivyo vilipopigania nafasi za uwakilishi katika kamati mbalimbali

Hofu kwamba huenda kinara wa NASA Raila Odinga akaamua kugombea urais tena 2022 kinyume na mkataba baina yake na vinara wenza, inayumbisha meli ya muungano huo na kuipa Jubilee mteremko kwa kukosa upinzani thabiti wa kukosoa utawala wa Rais Kenyatta.

Japo vinara wa muungano huo akiwemo Bw Raila, Kalonzo Musyoka, Musalia Mudavadi na Moses Wetangula wamekuwa wakisisitiza kuwa wangali wameungana, wadadisi wanasema matukio ya hivi majuzi yanaonyesha kuwa kuna hofu na kutoaminiana katika NASA.

Kulingana na Bw Geff Kamwanah, mdadisi wa siasa ambaye amekuwa akifuatilia shughuli za NASA, dalili zinaonyesha kuwa Bw Odinga amekuwa akitengwa na wenzake tangu ajiapishe kuwa rais wa wananchi katika bustani ya Uhuru Park mnamo Januari 30.

“Kauli za vinara wenzake tangu wakose kuhudhuria hafla hiyo na washirika wao wa kisiasa zinaonyesha kwamba kuna shida katika NASA. Shida inatokana na hofu kwamba huenda Bw Odinga akawaruka na kugombea urais kwenye uchaguzi wa 2022 kinyume na walivyokubaliana,” asema Bw Kamwanah. Anasema ni wazi kuwa Bw Musyoka, Bw Mudavadi na Bw Wetangula hawakuunga kiapo cha Bw Odinga.

“Ni wazi kuwa wanasiasa wa ODM ya Bw Odinga ndio waliokuwa wakishinikiza kiapo hicho. Wakati mmoja mwenyekiti wa Wiper Kivutha Kibwana na katibu wa Amani National Congress Barack Muluka walilalamika kuwa ODM haikuwa ikiwahusisha katika maandalizi ya hafla hiyo na katika masuala mengine ya muungano wa NASA,” asema.

Kulingana na wadadisi, wabunge wa ODM bado wanairejelea hafla hiyo katika juhudi za kuwadhalilisha vinara wenza wa NASA ili kupata sababu ya kujiondoa NASA  na kuunda muungano mpya ambao Bw Odinga atatumia kugombea urais 2022.

“Mito ya kumtaka Bw Odinga kuwatema vinara wenzake kwa kususia kiapo chake ni njama pana ya kuvunja NASA na kukwepa mkataba wa NASA ambao aliahidi kutogombea urais tena,” aeleza Bw Kamwanah.

 

Vyama vinatoshana

Akihojiwa na runinga ya NTV mapema wiki hii, Bw Mudavadi alisema NASA si mali ya chama kimoja  bali inashirikisha vyama vinne na hakuna kikuu kuliko kingine.

Kiongozi huyo wa chama cha ANC alisema kilicho muhimu ni kupanga mikakati ya uchaguzi wa 2022.

Ishara kwamba kuna hofu ya Bw Odinga kugombea urais tena ilionekana hata kabla ya kuapishwa kwake kwenye mkutano wa bunge la wananchi mjini Machakos Bw Kibwana alipomtaka kuheshimu mkataba wa NASA na kumuunga mkono Bw Musyoka kwenye uchaguzi wa 2022.

Akimjibu, Bw Odinga alisema lililo muhimu ni kukomboa ushindi ambao NASA inaamini ilipokonywa na Jubilee kwenye uchaguzi mkuu wa Agosti 8, 2017.

“Jibu la Bw Odinga katika ngome ya Wiper halikuwafurahisha wanachama na viongozi wa chama hicho. Ukweli wa mambo ni kuwa chama chetu kilichukulia kauli yake kama thibitisho kwamba hatamuunga kiongozi wetu ambaye amekuwa akimuunga tangu 2013,” anasema mbunge mmoja wa Wiper ambaye aliomba tusichapishe jina lake kwa sababu si msemaji wa chama hicho.

Kulingana na mbunge wa Lugari, Bw Ayub Savula, Bw Musyoka, Bw Mudavadi na Bw Wetangula wameanza kuweka mikakati mipya kuelekea uchaguzi mkuu wa 2022.

 

Mchujo

“Ajenda yetu ya kwanza ni haki katika uchaguzi, ya pili ni kuwa na mchujo kati ya Bw Musalia na Bw Kalonzo katika uchaguzi wa 2022,” Bw Savula alinukuliwa akisema. Hata hivyo alisema ANC imejitolea kuimarisha NASA.

Wadadisi wanasema wabunge wa ODM wanahisi kwamba Kalonzo, Mudavadi na Wetangula waliwavunja moyo kwa kususia kuapishwa kwa Bw Odinga.

Bw Kamwanah anasema japo kuna hofu na kutoaminiana katika NASA, vyama tanzu vinakubaliana kwamba adui vinayemlenga ni Jubilee.

“Wanasema kwamba adui wa NASA ni  Jubilee na watafanya kila wawezalo ili vinara wote waendelee kuungana. Hata hivyo, huenda adui ni NASA yenyewe,” alisema.
Kulingana na mbunge mwingine wa chama hicho ambaye aliomba tusitaje jina lake, kuna hisia kwamba huenda Bw Odinga akatema NASA kuunda muungano mpya.

“Umewasikia wabunge wa chama chake wakimtaka awaache wenzake kwa kukataa kuhudhuria kuapishwa kwake, hii ni njama ya kukwepa makubaliano yake na vinara wenzake. Akifanya hivyo, utakuwa mwisho wa NASA,” asema mbunge huyo.

 

Usaliti

Mbunge wa Nyando, Bw Jared Okello mmoja wa wanaomtaka Bw Odinga kuunda muungano mpya wa kisiasa anasema wenzake katika NASA walimsaliti kwa kususia kuapishwa kwake.

“Ninasisitiza kuwa Raila Odinga anafaa kutafuta washirika wengine wa kisiasa. Kumuacha rais wa wananchi wakati muhimu wa kutawazwa kwake kulikuwa kitendo cha usaliti na woga.

Vinara hao wengine walikuwa humu nchini  na hakuna aliyekuwa mgonjwa mbali na kufahamu kuwa angeapishwa,” Bw Okello aliambia wanahabari siku tano baada ya  Bw Odinga kuapishwa.

Bw Kamwanah anasema kwamba dalili kwamba hali sio shwari katika NASA zimejitokeza katika bunge vyama hivyo vinapopigania nafasi za uwakilishi katika kamati mbalimbali.

“Hii ni fursa ambayo Jubilee itatumia kufanikisha sera zake kwa sababu upinzani hautakuwa na nguvu za kukosoa serikali,” asema.

BI TAIFA FEBRUARI 23, 2018

LINAH Njue, 21, ni mwanamitindo jijini Nairobi. Anaenzi kujipodoa, kusafiri na kusoma vitabu. Picha/ Anthony Omuya

Agonga mumewe kwa mwiko sababu ya mlo

Na TOBBIE WEKESA

WEBUYE MJINI

WAKAZI wa eneo hili, walibaki midomo wazi baada ya mwanadada kumlenga mumewe kwa mwiko wa kusonga sembe wakizozania kitoweo.

Kulingana na mdokezi, jamaa alitoka kazi ya mjengo na kupitia buchari na kununua kilo moja ya nyama akipanga kupigia mwili pole.

Baada ya upishi, kipusa alipakua chakula na kumpakulia polo vipande vichache vya nyama.

“Kwani nilinunua nyama kiasi gani ndio uniwekee vipande vitatu kwenye sahani?” polo alimuuliza mkewe.

Mama alimuangalia polo na kumtaka atosheke na alichowekewa mezani. “Unatakaje. Kula na uache maswali mengi,” alimkaripia polo.

Polo alimwangalia mkewe na kukataa kula. “Umenizoea sana. Kila wakati nikinunua nyama au samaki kwa hii nyumba, kazi yako ni kunijazia tu supu kwenye sahani,” polo alimfokea mkewe.

Hasira zilianza kumpanda mwanadada na kumjibu polo bila kujali lolote. “Wewe akili zako si sawa. Unabishana na mimi kwa sababu ya sufuria! Kesho nunua nyama uje ujipikie,” demu alimkaripia polo.

Inasemekana kwamba polo aliibua suala la ushirikiano baina yake na mkewe katika shughuli zote za jikoni lakini mkewe akapinga vikali.

“Kama umekosa kazi ya kufanya, nenda ukaajiriwe kuosha vyombo na kupika hotelini. Kazi ya jikoni ina mwenyewe,” demu aliwaka na kuelekea jikoni.

Aliporudi, mkononi alikuwa amebeba mwiko na sufuria iliyotumiwa kupika ugali.

Polo alipoona mambo si shwari, aliamua kukimbilia usalama wake huku akimweleza kipusa kuwa ataoa mke mwingine.

“Kwenda kabisa. Hakuna siku hata moja nitakuruhusu uingie jikoni,” kipusa alimueleza polo.

 

KINAYA: Jenerali Miguna Miguna atarudi Kenya akiwa shujaa wa Jubilee

Na DOUGLAS MUTUA

Kwa ufupi:

  • Bwana Miguna aliyeondoshwa nchini akifanana na kinyago, atarejea kama shujaa na atapokelewa kama mheshimiwa
  • Paspoti ya ‘Jenerali Miguna Miguna’ imeraruliwa, ndiyo. Sikatai. Lakini itashonwa. Na nani? Walioirarua. Kwa nini? Anawatumikia
  • Sasa ‘Baba’ hamwamini ‘Jenerali Mwitu’ huyo kwa maana hajui kufunika kombe mwanaharamu apite
  • Utengano wa wakuu wa NASA ndiyo dua ya Jubilee.  Waliomtishia ‘Bwana Tikitimaji’ kutoka Ukambani akaogopa uapisho hawakukoma hapo

‘JENERALI’ wa National Resistance Movement (NRM) Kenya atarejea nchini kama shujaa wa Jubilee.

Ala! Vipi tena? Waliomfurusha nchini wameafikia malengo yao, sasa wanatabasamu kila wakati akitajwa. Hawana chuki naye.

Imekuwaje tena? Nyufa alizosababisha katika chungu kiitwacho National Super Alliance (NASA) zikipanuka zaidi na kitakuwa vigae.

Hivyo basi? Bwana huyo aliyeondoshwa nchini akifanana na kinyago – huku kavalia suti na sapatu – atarejea kama shujaa na atapokelewa kama mheshimiwa.

Aliyeondoshwa nchini na karatasi ya sandarusi mkononi kama aliyekwenda kwa ‘mama-mboga’ atabebewa mkoba na kusindikizwa hadi chumbani mwa watu mashuhuri katika uwanja wa ndege wa JKIA, Nairobi. Kwa maagizo ya nani? Usijali, wagombanao ndio wapatanao.

Waliompigania eti arejeshewe paspoti watakuwa watazamaji tu, sikwambii nusura wajinyonge, lakini hawatamfanyia chochote. Siasa ni mchezo wa wakora.

 

Paspoti itashonwa

Paspoti ya ‘Jenerali Miguna Miguna’ imeraruliwa, ndiyo. Sikatai. Lakini itashonwa. Na nani? Walioirarua. Kwa nini? Anawatumikia. Wanajua kushona matambara.

Iliyoraruliwa ni paspoti ya kawaida tu, kurasa 32, lakini atakayopewa itakuwa ya kidiplomasia, yenye kusara 48.

Kibaraka wa ‘Baba’ na ODM unanilaani na kusema hayo yote yanafanyika katika ulimwengu wangu wa kufikirika.

Labda una ukweli fulani, lakini chochote kinaweza kutokea. Anayenata pamoja kana kwamba kapandikizwa kwa gundi ni wewe mlalahoi msi kitu!

Haya ninayosema yanaweza kufanyika ghafla kama kupepesa jicho kwa maana ‘Baba’ amezeeka, anashauriwa na walafi wasiompenda mlafi mwenzao ‘Jenerali’.

Tatizo kuu ni kwamba anawasikiliza kikamilifu, hadi kiwango cha kumwambia ‘Jenerali’ afyate ulimi, naye haambiliki hasemezeki!

Nilijua tangu mwanzo kwamba ingekuwa vigumu kwa Miguna kuridhiana kikamilifu na kambi ya ‘Baba’. Wangeridhianaje ilhali wanaomzingira ‘Baba’ hawamwamini?

 

‘Jenerali mwitu’

Miguna mwenyewe ni domo-kaya; mwana wa Jaramogi alipomnong’onezea kwamba barobaro fulani kalishwa vitamutamu na Jubilee alianika yote mtandaoni.

Sasa ‘Baba’ hamwamini ‘Jenerali Mwitu’ huyo kwa maana hajui kufunika kombe mwanaharamu apite, anaoamini ni wajanja wanaotegea tu apumue za mwisho wamrithi.

Hofu ilitanda kotekote Miguna aliporejea katika kambi ya ‘Baba’ na uvumi ukaenea kwamba angemrithi kisiasa.

Watu waliomchukia na kumdharau walihoji hana ufuasi wowote, wakapiga mfano wa alipojaribu kuwania ugavana Nairobi akapata kura yake pekee, wakasema haiwezekani!

Lakini walishtuka ghaya ya kushtuka alipojitangaza ‘jenerali’ wa NRM na kuvutia wafuasi wa mbali na karibu.  Sasa waliyemdharau amekuwa tishio, ndiposa wanalilia maini yake.

 

Ni hatari

Tayari wamemsadikisha ‘Baba’ kwamba mtu huyo ni hatari, ‘Baba’ naye pasipo na kuchelewa akawaambia wafuasi wake wayapuuze matamshi ya Miguna, ni porojo.

Huo ni mgawanyiko, ikiwa si utengano wa hakika. Kila mkora wa Jubilee ameweka gunia zima la karanga mbele yake, anatafuna mojamoja huku akijionea sinema bila malipo.

Kumbuka tangu mwanzo utengano wa wakuu wa NASA ndiyo iliyokuwa dua ya Jubilee.  Waliomtishia ‘Bwana Tikitimaji’ kutoka Ukambani akaogopa uapisho hawakukoma hapo.

Utengano ukitokea kabisa NASA, wafuasi watamchukia ‘Baba’ kwa kutotumia nguvu mpya za Miguna kuvumisha vuguvugu lao.

Dua ya Jubilee kwamba ‘Baba’ atengwe itakuwa imejibiwa, wataandaa karamu kusherehekea. Ukialikwa utahudhuria?

 

Baruapepe: mutua_muema@yahoo.com

Serikali yalemewa na gharama ya kutunza wafungwa, wale wa makosa madogo kuachiliwa

Na JOSEPH WANGUI

WAFUNGWA wa makosa madogo wanatarajiwa kuanza kuachiliwa huru huku serikali ikijizatiti kupunguza gharama ya kuwatunza gerezani ambayo kwa sasa ni Sh388 milioni kila mwezi.

Ofisi ya Mkurugenzi wa Mashtaka ya Umma (ODPP), tayari imeanza zoezi la kutathmini upya kesi za wafungwa walioshtakiwa kwa makosa madogo.

Hatua hivyo, inanuia kupunguza idadi kubwa ya wafungwa waliojaa katika magereza ya nchini, Afisa Mkuu Msaidizi katika Ofisi ya Mkurugenzi wa Mashtaka ya Umma Bw Alloys Kemo alisema.

Aliongeza kuwa zoezi hilo pia litawezesha serikali kuokoa pesa ambazo zitaelekezwa katika matumizi mengine.

Bw Kemo alikuwa akizungumza jana alipozuru gereza la King’ong’o jini Nyeri. Alisema kwa sasa kuna takriban mahabusu 54,000 katika magereza ya humu nchini na serikali hutumia Sh240 kila siku kutunza kila mmoja wao.

 

Sh12.9 milioni kila siku

Kwa jumla, serikali hutumia zaidi ya Sh12.9 milioni kila siku na Sh388 milioni kila mwezi kugharamia mavazi, maji, chakula na mahitaji yao mengine.

Kikundi cha waendesha mashtaka tayari kimezuru gereza la Nairobi, gereza la wanawake la Lang’ata, magereza ya watoto ya Kamiti na Kabete, gereza la Embu na gereza la Nyeri kutathmini upya kesi za wafungwa hao wanaoweza kuachiliwa.

“Tunazuru magereza kubaini changamoto ambazo mahabusu hupitia katika harakati za kutafuta haki. Tunataka wafungwa wa makosa madogo waachiliwe kwani hiyo itapunguza gharama ambayo serikali inatumia,” alieleza Bw Kemo.

Aliongeza kuwa zoezi hilo pia litawezesha kuharakisha kesi za wafungwa hao.

 

Kucheleweshwa kwa kesi

Afisa Mkuu huyo Msaidizi alidokeza kuwa matokeo ya awali ya zoezi hilo yameonyesha kuwa, kucheleweshwa kwa kesi kumechangiwa pakubwa na visa vya mashahidi kukosa kufika kortini kutoa ushahidi na uchanganuzi wa ushahidi katika maabara ya serikali.

Bw Kemo alisema: “Kuna sababu zingine ikiwemo uhaba wa mahakimu na majaji, kujikokota kwa maafisa wa upelelezi, mazoea ya mawakili kuomba kesi ziahirishwe, mwendo wa pole pole wa kusikizwa kwa kesi na taratibu chungu nzima.”

Aliongeza kuwa baada ya zoezi hilo kukamilika kote nchini ofisi ya DPP itawasilisha ripoti na mapendekezo jinsi ya kupunguza idadi ya mahabusu katika magereza.

 

Wakuu wa shule wataka ruhusa watoze wazazi ada ya kujenga madarasa

JOSEPH WANGUI na WANDERI KAMAU

WAKUU wa shule za upili katika eneo la Kati wamemwomba Waziri wa Elimu Bi Amina Mohamed kuwaruhusu kuwatoza wazazi ada ndogo ili kuwawezesha kujenga madarasa na mabweni katika shule zao.

Aidha, hili linatokana na idadi kubwa ya wanafunzi ambao wamejiunga na Kidato cha Kwanza.

Kupitia Chama cha Walimu Wakuu wa eneo la Mlima Kenya (MTF), walimu hao walisema kwamba uwepo wa idadi kubwa ya wanafunzi umesababisha msongamano mkubwa sana katika madarasa na mabweni katika taasisi hizo.

“Nafasi iliyopo haiwatoshi wanafunzi hao. Pia, fedha tulizo nazo ni kidogo sana kutuwezesha kushughulikia idadi kubwa ya wanafunzi,” akasema Bw Ndung’u Wangenye, ambaye ndiye mshirikishi mkuu wa chama hicho.

Alitoa mfano wa shule moja ya upili ya wavulana mjini Thika, ambayo ililazimika kubadilisha jumba lake la maakuli kuwa la bweni ili kutosheleza idadi kubwa ya wanafunzi.

Alisema kuwa baadhi ya shule pia zimelazimika kubadilisha maabara na afisi za walimu kuwa madarasa.

Kwingineko, Naibu Rais William Ruto ametoa onyo kwa shule za upili za kutwa ambazo zinawatoza wanafunzi karo.

Bw Ruto alisema kuwa hakuna mtu yeyote anayepaswa kuitisha fedha zozote kutoka kwa wanafunzi, kwani serikali inashughulikia gharama zote.

Akizungumza katika Shule ya Upili ya Wavulana ya Milo katika eneobunge la Webuye Magharibi Jumamosi, Bw Ruto alisema kuwa serikali imejitolea kuwalipia karo wanafunzi wote, bila kujali wanakotoka.

 

Ukosefu wa DPP sasa wakwamiza maamuzi mahakamani

Na RICHARD MUNGUTI

KUTOKUWEPO kwa Mkurugenzi wa Mashtaka ya Umma (DPP) kumeacha afisi hiyo kama yatima na idara ya Mahakama katika njiapanda kwa vile imekuwa vigumu kwa mahakimu kutoa maamuzi yenye mashiko kamili ya kisheria.

Kwa mujibu wa katiba ni DPP tu anayepasa kutoa mwelekeo kuhusu kesi na pia kuamuru kufungiliwa kwa mashtaka dhidi ya mmoja.

Hali ya suitafahamu sasa imekumba afisi ya DPP kwa vile maafisa wanaofanya kazi chini yake wanapasa kupokea ushauri na mwongozo kutoka kwa DPP.
Tangu kujiuzulu kwa aliyekuwa DPP Keriako Tobiko, afisi hiyo imeachwa wazi.

Watalaamu wa masuala ya sheria miongoni mwao mwanasheria mkuu aliyejiuzulu Profesa Githu Muigai wamejadilia suala hili pamoja na wakili Donald Kipkorir.

Bw Kipkorir ambaye ni mwanasheria mwenye tajriba ya juu aliambia Taifa Jumapili kwamba kesi zinazofunguliwa wakati huu afisi ya DPP haina afisa baada ya Bw KeriakoTobiko kujiuzulu hazina mashiko ya kisheria.

 

Ajikuna kichwa

Sasa hakimu mkazi katika mahakama ya Milimani Nairobi Hellen Onkwani anajikuna kichwa iwapo amwachilie raia wa Zibambwe aliye pia kinara wa Kampuni ya Oilibya Kenya Bw Duncan Zinaya Murashika, anayeshtakiwa kwa kuvunja kituo cha kuuza mafuta na kuiba pesa na bidhaa za kampuni ya Maced za thamani ya Sh1.5milioni.

Ombi la kuondolewa kwa kesi dhidi ya Bw Murashika liliwasilishwa na kiongozi wa mashtaka Bi Addah Sega.

Bi Sega aliwasilisha kortini barua iliyoandikwa na kutiwa saini na naibu mkuu wa mkurugenzi wa mashtaka ya umma (SADPP) James Mungai Warui na kuomba kesi dhidi ya Bw Murashika anayeshtakiwa pamoja na wakenya itamatishwe chini ya kifungu cha sheria nambari 87 (a) za uhalifu (CPC).

Lakini ombi hili lilipingwa vikali na wakili wa kampuni ya Maced Lewis Kyengo anayeitetea akiwa na Kyalo Mbobu akisema “ afisi ya DPP haina afisa anayehudumu na kwamba maagizo ya Bw Warui ya kutamatishwa kwa kesi dhidi ya watano hao itamatishwe ni kutumia idara ya mahakama vibaya.”

Korti imeombwa ikatae hatua hiyo ya Bw Warui na kuamuru kesi dhidi ya Bw Murashiki na wenzake iendelee.

Bw Kyengo alisema Bw Warui kisheria hana mamlaka ya kuamuru kesi itatamatishwe kwa vile yeye sio DPP. Maagizo hayo yamepotoka kisheria.
Pia aliambia korti haki za mlalamishi zitakandamizwa ikitiliwa maanani wakuu hao wa Oilibya walivunja kituo chake cha petroli na kutekeleza wizi.

 

Baa la njaa: Watoto sasa wazirai shuleni

Mwanamke na watoto wake wasubiri chakula cha msaada katika kauntindogo ya Kinango, Kaunti ya Kwale wakati wa kiangazi mwaka uliopita. Kaunti hiyo inakumbwa na janga la njaa ambalo, inahofiwa, litadumu kwa muda mrefu kama mvua haitanyesha hivi karibuni. Picha/KNA

Na KNA

Kwa ufupi:

  • Wengi wa watoto hutegemea mlo mmoja pekee kwa siku, ambao wanakula usiku tu wala hawana uwezo wa kumudu kiamsha-kinywa ama chamcha
  • Baadhi ya wanafunzi wamegeukia kula maembe huku wengine wakiminya limau na kunywa maji yake ili kupunguza makali ya njaa
  • Watoto hawa wanazidi kudhoofika siku baada ya nyingine. Visa vya upungufu wa damu mwilini vimeenea kote kwa sababu ya utapiamlo
  • Wazazi wametakiwa kuwajibika zaidi na kutimiza mahitaji ya watoto wao akisema baadhi wametelekeza majukumu yao

WALIMU katika Kaunti ya Kwale wameeleza hofu yao kuhusu jinsi janga la njaa linavyoathiri masomo kwa kiwango cha kufanya watoto kuzirai madarasani.

Walitoa wito hatua za dharura zichukuliwe kwa haraka kwani wao wenyewe hawana uwezo wa kuitatua hali hiyo.

“Njia ya pekee ya kukabiliana na hali hii ni kwa serikali kufufua mpango wa kuwapa chakula wanafunzi,” alisema Bi Flora Nzisya ambaye ni mwalimu katika shule ya msingi ya Kwale.

Kulingana naye, idadi ya watoto shuleni pia itaongezeka ikiwa watakuwa wakipewa chakula shuleni.

Aliongeza, “Mambo yakiwa mabaya sana, huwa tunagawa chakula chetu na kuwapa wanafunzi. Lakini hata hilo halisaidii kwa sababu idadi ya wanafunzi wanaokabiliwa na baa la njaa ni wengi sana.

“Unakuta katika darasa moja zaidi ya wanafunzi 10 hawana chakula. Inakuwa vigumu kuwafaa wote kwani ni jambo la kila siku.”

Wengi wa watoto hao hutegemea mlo mmoja pekee kwa siku, ambao wanakula usiku tu wala hawana uwezo wa kumudu kiamsha-kinywa ama chakula cha mchana, walieleza walimu.

 

Damu imepungua mwilini

“Watoto hawa wanazidi kudhoofika siku baada ya nyingine. Visa vya upungufu wa damu mwilini vimeenea kote kwa sababu ya utapiamlo,” akasema mwalimu mwingine ambaye hakutaka jina lake lichapishwe.

Baadhi ya wanafunzi wamegeukia kula maembe huku wengine wakiminya limau na kunywa maji yake ili kupunguza makali ya njaa, mwalimu mwingine aliambia Taifa Jumapili.

Mwaka 2017, kaunti hiyo ilikabiliwa na moja ya vipindi vibaya sana vya ukame kuwahi kutokea katika miaka ya hivi karibuni huku masomo yakisitishwa katika shule kadhaa kwa sababu ya njaa iliyozuka.

Mkurugenzi wa Elimu wa Kaunti, Bi Brigit Wambua ameomba serikali na mashirika ya misaada ya kibinadamu kama Red Cross ziingilie kati kuwasaidia.

 

Wazazi wajumuishwe

“Suala hili haliko chini ya usimamizi wangu lakini wakuu wa shule pia wanafaa kuwajumuisha wazazi ili kupata suluhisho,” Bi Wambua alisema.

Mkurugenzi huyo pia alitoa changamoto kwa wazazi kuwajibika zaidi na kutimiza mahitaji ya watoto wao akisema baadhi wametelekeza majukumu yao.

Taarifa za kuathirika kwa masomo katika baadhi ya shule za Kwale zinatokea huku ripoti kwamba kaunti hiyo inakabiliwa na baa sugu la njaa zikichipuka.

Hii ni kulingana na tathmini ya hivi punde kuhusu usalama wa chakula Kwale baada ya msimu wa mvua fupi mwishoni mwa mwaka jana. Kaunti hiyo ilikabiliwa na ukame mkali 2017.

Tathmini hiyo iliyofanywa na Kamati Elekezi kuhusu Usalama wa Chakula Kenya (KFSSG) pamoja na Mamlaka ya Kitaifa ya Kukabiliana na Majanga (NDMA), inatoa picha ya kuogofya kuhusu hali ya chakula katika kaunti hiyo.

Serikali ilitangaza Ijumaa mipango ya kutumia Sh3.8 bilioni kusaidia wananchi wanaokabiliwa na njaa.

Serikali yapiga marufuku ukataji wa miti kwa siku 90

Na VALENTINE OBARA

Kwa ufupi:

  • Amri hiyo ilitolewa na Naibu Rais William Ruto, wakati ambapo athari ya kiangazi inazidi kushuhudiwa nchini
  • Wizara ya Mazingira na Misitu itahitajika kushauriana na wadau wote na kutoa mapendekezo kuhusu hatua zinazofaa kuokoa mazingira
  • Ukataji wa miti misituni umekuwa ukishuhudiwa sana kutokana na unyakuzi wa ardhi, biashara za mbao na uchomaji wa makaa

SERIKALI imepiga marufuku ukataji wa miti katika misitu yote nchini, iwe ni ya kitaifa au ya kijamii.

Amri hiyo ya kisheria itakayodumu kwa siku 90 ilitolewa Jumamosi na Naibu Rais William Ruto, wakati ambapo athari ya kiangazi inazidi kushuhudiwa katika maeneo tofauti nchini.

Kulingana na Bw Ruto, kiangazi kikali ambacho kimeshuhudiwa kwa karibu miaka mitatu sasa kimesababisha uhaba wa maji mitoni na katika chemchemi za maji.

Alisema hali hii imetokana na ukataji wa miti kiholela pamoja na jinsi watu wanavyonyakua maeneo yanayotega maji na hivyo basi kuathiri vibaya uwezo wa nchi kuzalisha chakula cha kutosheleza mahitaji ya umma.

“Kutokana na haya, serikali imepiga marufuku mara moja ukataji wa miti katika misitu yote ya kitaifa na ya kijamii kwa siku 90 ili kutoa nafasi kwa utathmini wa misitu yote ya Kenya,” akasema.

Katika kipindi hicho, Wizara ya Mazingira na Misitu itahitajika kushauriana na wadau wote ili kubuni jopo kazi la kufanyia misitu utathmini na kuchapisha ripoti baada ya siku 14 kutoa mapendekezo kuhusu hatua zinazofaa kuchukuliwa kuokoa mazingira ya Kenya.

 

Hatua mwafaka

“Wizara ya Masingira na Misitu pamoja na wizara zingine zote husika, idara na taasisi za serikali kuu na za kaunti zimeagizwa kushirikiana kuchukua hatua mwafaka mara moja kutekeleza agizo hili,” akasema.

Shirika la Kenya Red Cross lilitangaza kuna watu zaidi ya milioni tatu wanaokumbwa na janga la njaa nchini, huku idara ya utabiri wa hali ya hewa ikisema msimu wa mvua utakaoanza mwishoni mwa Machi utashuhudia kiwango kidogo cha mvua.

Ukataji wa miti misituni umekuwa ukishuhudiwa sana kutokana na unyakuzi wa ardhi zilizotengwa kuwa misitu, mbali na biashara za mbao, uchomaji wa makaa na jinsi jamii mbalimbali zinavyojenga vijiji vyao misituni.

Miongoni mwa misitu ambayo imeathirika zaidi na ukataji wa miti kiholela ni msitu wa Mau ambao unategemewa kutega maji yanayoingia mito ya Ewaso Ng’iro Kusini, Sondu, Mara na Njoro. Mito hii hutiririza maji kwa maziwa makubwa ya Victoria, Nakuru na Natron.

Mbali na msitu wa Mau, misitu mingine katika maeneo tofauti nchini pia yamekuwa yakiharibiwa kama vile msitu wa Ngong ulio Kaunti ya Nairobi.