06/03/2021
  • Apr 18, 2018

Rift Valley Railways yawekewa vikwazo na IMF sababu ya ufisadi

Na BERNARDINE MUTANU

BENKI ya Dunia imeliwekea vikwazo Shirika la Uchukuzi wa Reli la Rift Valley Railways (RVR).

Hii ni kutokana na ufisadi mwingi unaolizonga shirika hilo kutokana na mkataba wa ushirikiano kati ya mashirika ya uchukuzi wa reli ya Kenya na Uganda.

Benki ya Dunia ilichukua hatua hiyo baada ya visa vya ufisadi katika miradi inayofadhiliwa na tawi la kibinafsi la Benki ya Dunia-International Finance Corporation (IFC).

RVR iliwekewa vikwazo pamoja na mashirika mawili, ambapo moja ya mashirika hayo lilipigwa marufuku kushiriki katika miradi ya Benki ya Dunia kwa miaka miwili. Shirika hilo ni Africa Railways Logistics Ltd.

Kulingana na benki hiyo, afisa wa shirika hilo alipatikana kushawishi utaratibu wa forodhani kutoa idhini kwa uingizaji wa magari ya moshi ambayo yalikuwa sehemu ya miradi miwili IFC, ilisema katika taarifa.

 Kampuni za Africa Railways Ltd na Rift Valley Railways Kenya, (RVRK) pia ziliwekewa vikwazo lakini kwa masharti. Zinaweza kushiriki miradi ya Benki ya Dunia ikiwa zitafuata taratibu, kanuni na masharti ya benki hiyo kulingana na mkataba.

RVRK imekubali kwamba afisa mmoja alivunja taratibu za kandarasi hiyo. Tayari, shirika hilo limemfuta kazi afisa huyo, ambaye alikuwa na kampuni iliyokuwa ikimezea mate mapato kutokana na kandarasi hiyo kwa kuwa na kampuni yake iliyokuwa ikishiriki katika kandarasi hiyo kupitia kwa RVRK.

  • Apr 18, 2018

SHAIRI: Ukihitaji habari, tafuta Taifa Leo

Na KULEI SEREM

Gazeti la  Kiswahili, halina mapendeleo,
Nazungumzia lili, hili la  TAIFA LEO,
Gazeti lenye ukweli, wa habari ufunguo,
Ukihitaji gazeti, tafuta TAIFA LEO.

Kwa habari za nyakati, tena kwa lugha fasaha,
Maneno kwenye gazeti, si yale ya kimzaha,
Lina maandishi mufti, kweli linaleta raha,
Ukihitaji gazeti, tafuta TAIFA LEO.

Matukio yalojiri, hatupati kwa fununu,
Lina waandishi mahiri, shupavu na wenye mbinu,
Hakika zake habari, nazienzi kama tunu,
Ukihitaji gazeti, tafuta TAIFA LEO.

Taarifa sadikifu, zisizotiliwa chumvi,
Kwa Kiswahili sanifu, lugha iso na ugomvi,
Kwa habari timilifu, hadi kulikunja jamvi,
Ukihitaji gazeti, tafuta TAIFA LEO.

Tayari nimenunua, ninayo yangu nakala,
Kurasa nazipekua, najisomea makala,
Unaweza kununua, ufuatilie maswala,
Ukihitaji gazeti, tafuta TAIFA LEO.

  • Apr 17, 2018

Kesi 5 za wizi benki ya Equity kuunganishwa

Na RICHARD MUNGUTI

MKURUGENZI wa mashtaka ya umma (DPP) Bw Noordin Haji atajumuisha kesi tano dhidi ya wafanyakazi wa benki ya Equity wanaoshtakiwa kwa wizi wa mamilioni ya pesa.

Hakimu mkazi Hellen Onkwani alimwamuru Bw Noordin awasilishe ombi hilo mnamo Aprili 30 kesi hizo zitakapotajwa.

Kiongozi wa mashtaka Bi Addah Sega alimweleza hakimu kwamba anasubiri maagizo kutoka kwa Noordin kuhusu kuunganishwa kwa kesi hizo.

Bi Sega alisema hayo baada ya mfanya kazi mwingine wa benki hiyo Fredrick Kitaka Muoki  aliposhtakiwa kwa wizi wa Sh3.4milioni.

Wengine watakaoshtakiwa pamoja na Muoki ni  James Omoto Otembo na Stephen Wanjii Githinji.

James na Stephen wanakabiliwa na shtaka la wizi wa Sh 4.6 milioni kila mmoja kutoka kwa benki ya Equity.

Wakop nje kwa dhamana ya Sh300,000 pesa taslimu.

  • Apr 17, 2018

Kenya yalazimishwa sare tasa na Ethiopia U-17

Na GEOFFREY ANENE

KENYA imeambulia sare tasa dhidi ya Ethiopia katika mechi yake ya pili kwenye mashindano ya soka ya wachezaji wasiozidi umri wa miaka 17 yaliyoingia siku yake ya nne nchini Burundi hapo Aprili 17, 2018.

Vijana wa kocha Michael Amenga walitafuta ushindi bila mafanikio. Ushindi ungewapa Wakenya tiketi ya kushiriki nusu-fainali wakiwa bado wanasalia na mechi moja ya Kundi A dhidi ya Somalia hapo Ijumaa.

Kenya ilianza kampeni kwa kunyuka Burundi 4-0 Aprili 14 nayo Somalia ilipata alama tatu na ushindi wa mabao 3-0 dhidi ya Ethiopia katika mechi yake ya ufunguzi Aprili 15.

Ethiopia ndiyo ilishinda Somalia uwanjani 3-1, lakini ikakonywa alama hizo baada ya kupatikana na hatia ya kuchezesha wachezaji watatu waliozidi umri wa miaka 17. Burundi na Somalia zilipangiwa kumenyana katika meci nyingine Aprili 17.

Kikosi cha Kenya: Wachezaji 11 wa kwanza – Maxwell Mulili (kipa), Lawrence Otieno, Telvin Maina, Christopher Raila, Arnold Onyango, Nicholas Omondi, Patrick Ngunyi, Hillary Okoth, Isaiah Abwal, Lesley Otieno, Mathew Mwendwa.

Wachezaji wa akiba – Brian Olango, Costah Anjeo, Nesta Wangema, Michael Abongo, Felix Chabaya, Daniel Ochieng, Said Musa.

  • Apr 17, 2018

Pigo kwa Gor Tuyisenge kukosa stakabadhi za kusafiri Afrika Kusini

Na GEOFFREY ANENE

GOR Mahia imepata pigo kubwa kabla ya mechi yake ya marudiano dhidi ya SuperSport United kwenye Kombe la Mashirikisho baada ya Jacques Tuyisenge, ambaye ameisaidia kushinda mechi tatu zilizopita, kukosa stakabadhi za kusafiri Afrika Kusini.

Mabao ya Mshambuliaji huyu kutoka Rwanda yalisaidia mabingwa mara 16 wa Kenya, Gor, kuzamisha Vihiga United 1-0 (Machi 31), SuperSport 1-0 (Aprili 8) na Wazito 1-0 (Aprili 11).

Yuko katika orodha ya wachezaji sita tegemeo, ambao kocha Dylan Kerr atakosa huduma zao.

Tatizo la stakabadhi za usafiri pia limefungia nje mvamizi wa Ivory Coast, Ephrem Guikan kuenda mjini Pretoria. Winga matata Godfrey Walusimbi bado amegoma kuchezea Gor hadi pale atakapolipwa ada ya uhamisho.

Kiungo Ernest Wendo yuko nje kwa sababu ya kulishwa kadi za njano katika mechi mbili zilizopita, moja dhidi ya Esperance katika Klabu Bingwa na dhidi ya SuperSport katika Kombe la Mashirikisho. Mabeki Wellington Ochieng’ na Karim Nizigiyimana wanauguza majeraha.

Mshindi kati ya Gor na SuperSport ataingizwa katika mojawapo ya makundi manne ya raundi ya 16-bora. Pia atajihakikishia tuzo ya Sh27 milioni.

  • Apr 17, 2018

Kirui kujizolea mamilioni kwa kusalia kileleni mwa jedwali

Na GEOFFREY ANENE

LICHA ya kupoteza ubingwa wa mbio za Boston Marathon hapo Jumapili jioni, Mkenya Geoffrey Kirui anaongoza vita vya kujinyakulia tuzo ya Sh25 milioni kwenye Marathon Kuu Duniani (WMM) ya msimu wa 11.

Kirui, ambaye alijishindia Sh7.5 milioni kwa kumaliza makala ya 122 ya Boston Marathon katika nafasi ya pili, yuko juu ya jedwali kwa alama 41. Alipata alama 25 kwa kushinda Riadha za Dunia mnamo Agosti 6, 2017 na kujiongezea alama 16 kwa kumaliza wa pili nyuma ya Mjapani Yuki Kawauchi mjini Boston.

Bingwa wa Marathon Kuu Duniani wa msimu wa 11 atafahamika baada ya mbio za London Marathon nchini Uingereza hapo Aprili 22, 2018. Matumaini yake ya kushinda Marathon Kuu Duniani yatategemea sana matokeo ya Wakenya wenzake Daniel Wanjiru na Eliud Kipchoge.

Wanjiru yuko jijini London kutetea taji naye Kipchoge alishinda Berlin Marathon nchini Ujerumani mwaka 2017. Wawili hawa wamezoa alama 25. Mshindi hupata alama 25 kwa hivyo wawili hawa wanaweza kufikisha alama 50.

Bingwa wa Tokyo Marathon nchini Japan, Dickson Chumba na mshindi mpya wa Boston Marathon Kawauchi pia wana alama 25, lakini hawashiriki mbio za London. Makala ya 38 ya London Marathon hapo Aprili 22 yanatarajiwa kuwa moto kwa sababu yamevutia Wanjiru, Kipchoge na mahasimu wakubwa wa Kenya, Mo Farah (Uingereza) na Kenenisa Bekele (Ethiopia).

Vita vya taji la wanawake jijini London pia vinatarajiwa kuwa vikali. Mshikilizi wa rekodi ya dunia ya marathon ya wanawake pekee Mary Keitany (saa 2:17:01) atakabililiana na Muethiopia bingwa wa Chicago Marathon Tirunesh Dibaba (Ethiopia). Wawili hawa wanaongoza jedwali la wanawake la Marathon Kuu Duniani kwa alama 41 kila mmoja. Kipchoge anatafuta taji lake la tatu mfululizo la Marathon Kuu Duniani baada ya kushinda msimu wa tisa na 10.

Keitany pia ni bingwa mara mbili wa Marathon Kuu Duniani. Alishinda msimu wa sita na tisa.

Msimamo wa Marathon Kuu Duniani (5-bora):

Wanaume

Geoffrey Kirui (Kenya) alama 41

Dickson Chumba (Kenya) 25

Yuki Kawauchi (Japan) 25

Daniel Wanjiru (Kenya) 25

Eliud Kipchoge (Kenya) 25

Wanawake

Mary Keitany (Kenya) alama 41

Tirunesh Dibaba (Ethiopia) 41

Ruti Aga (Ethiopia) 32

Rose Chelimo (Bahrain) 25

Shalane Flanagan (Marekani)

Matokeo ya Boston Marathon (2018):

Wanaume

Yuki Kawauchi (Japan) saa 2:15:58

Geoffrey Kirui (Kenya) 2:18:23

Shadrack Biwott (Marekani) 2:18:35

Tyler Pennel (Marekani) 2:18:57

Andrew Bumbalough (Marekani) 2:19:52

Scott Smith (Marekani) 2:21:47

Abdi Nageeye (Uholanzi) 2:23:16

Elkanah Kibet (Marekani) 2:23:37

Reid Coolsaet (Canada) 2:25:02

Daniel Vassallo (Marekani) 2:27:50

Wanawake

Desiree Linden (Marekani) 2:39:54

Sarah Sellers (Marekani) 2:44:04

Krista Duchene (Canada) 2:44:20

Rachel Hyland (Marekani) 2:44:29

Jessica Chichester (Marekani) 2:45:23

Nicole Dimercurio (Marekani) 2:45:52

Shalane Flanagan (Marekani) 2:46:31

Kimi Reed (Marekani) 2:46:47

Edna Kiplagat (Kenya) 2:47:14

Hiroko Yoshitomi (Japan) 2:48:29

  • Apr 17, 2018

Madiwani wapunjwa na ‘kamanda wa polisi’

Na BRUHAN MAKONG

Wawakilishi sita wa Kaunti ya Wajir wametapeliwa na mhalifu aliyejifanya kamanda wa polisi wa kaunti hiyo Bw Stephen Ng’etich.

Kwenye mahojiano na Taifa Leo, Bw Ng’etich alisema mwanamume huyo aliwapigia simu madiwani hao kwa kutumia nambari 0723475525.

Aliwadanganya kuwa yeye (kama kamanda) alikuwa ameamua kuwapa silaha madiwani hao kwa Sh20,000 kila mmoja kwa sababu ya kudhoofika kwa usalama eneo hilo.

Tapeli huyo aliwataka kuharakisha kulipa ada hiyo akidai bunduki zilizokuwa zimesalia zilikuwa chache mno.

Aliwapa wawakilishi hao nambari ya MPESA, 0722858786, ambayo wawakilishi hao sita walifaa kutuma pesa hizo. Lakini hawakuwa na bahati kwani walipoteza pesa hizo.

Kulingana na ujumbe wa MPESA, nambari hiyo ilisajiliwa chini ya jina John Njoroge Githua. Kamanda huyo alisema  uchunguzi kuhusu suala hilo umeanzishwa.

 

  • Apr 17, 2018

Kamket amuonya Ruto kwa kuhujumu mswada wake

Na FLORAH KOECH

MBUNGE wa Tiaty William Kamket Jumanne alimkashifu Naibu Rais William Ruto kwa kuhujumu mswada wake wa kubadilisha katiba ili kubuni wadhifa wa waziri mkuu.

Bw Kamket alisema Bw Ruto anaongoza kundi fulani ndani ya chama cha Jubilee ili kupinga vikali mswada huo ambao anasema unalenga kuhusisha jamii zote katika uongozi wa nchi.

“Watu fulani katika Jubilee wanahisi kuwa mswada huu utawanyima nafasi ya kuwa rais mwenye mamlaka makuu. Ningetaka kuwaonya kuwa hata Raila (Odinga) aliamini sana kuwa rais lakini hajakuwa,”alisema Bw Kamket.

Mbunge huyo ambaye alichaguliwa kupitia tiketi ya chama cha Kanu alisema ni mapema sana kwa wanaopinga mswada huo kuogopa kukosa mamlaka.

“Sielewi kwa nini mswada huu unatia baadhi ya watu tumbo joto na hata hawajui nani atamridhi Rais Uhuru Kenyatta,” alishangaa Kamket.

Alisema anataka kuleta urais katika Kaunti ya Baringo akiongeza kuwa kinyang’anyiro cha 2022 ni kati ya farasi wawili, Seneta wa Baringo Gideon Moi na Naibu Rais William Ruto.

“Safari ya Ikulu imeanza na sharti watu fulani wajitayarishe kwa kipindi kigumu cha kisiasa,” alisema.

Akiongea katika hafla ya harambee eneo la Chepkalacha, wadi ya Tangulbei aliweka wazi kuwa mkutano kati ya Raila Odinga na Rais mstaafu Daniel Moi nyumbani kwake Kabarak ulikuwa kuhusu siasa za 2022.

Mswada wa Bw Kamket unalenga kubadilisha mfumo wa uongozi nchini kwa kupatia bunge mamlaka ya kuchagua rais kwa muhula mmoja.

Mswada huo pia unatoa nafasi ya waziri mkuu kama mkuu wa serikali na manaibu wake na kuondoa wadhifa wa naibu rais.

  • Apr 17, 2018

Magavana wamtetea vikali Koffi Olomide kutumbuiza nchini

Na BENSON AMADALA

GAVANA wa Kakamega, Bw Wycliffe Oparanya, amemwomba Waziri wa Ugatuzi, Bw Eugene Wamalwa, aingilie kati ili mwanamuziki mashuhuri Koffi Olomide aruhusiwe kutumbuiza wageni watakaohudhuria warsha ya ugatuzi.

Bw Olomide, ambaye jina lake halisi ni Antoine Christophe Agbepa Mumba, alifurushwa nchini Julai 2016, baada ya kuonekana kwenye video akimpiga teke msichana aliye kwenye bendi yake katika Uwanja wa Kimataifa wa Ndege wa Jomo Kenyatta, Nairobi.

Bw Oparanya alimwomba waziri ashauriane na mwenzake wa usalama, Dkt Fred Matiang’i, ili mwanamuziki huyo apewe kibali cha kuingia nchini.

“Watu wetu wanapenda muziki wa Koffi Olomide na itakuwa furaha sana kama mwanamuziki huyo ataruhusiwa kuja kutumbuiza katika uwanja wa Bukhungu,” akasema gavana huyo.

Bw Wamalwa ambaye alikuwa anaarifiwa kuhusu maandalizi ya warsha hiyo yalipofika aliahidi kufuatilia suala hilo na kuhakikisha Bw Olomide na wenzake wataruhusiwa kuingia Kenya.

Jumanne, Msemaji wa Wizara ya Usalama wa Ndani, Bw Mwenda Njoka, alisema waandalizi wa ziara ya mwanamuziki huyo wanahitajika kuwasilisha ombi kutaka marufuku aliyowekewa iondolewe ndipo utathmini ufanywe kuona kama ataruhusiwa kuja nchini.

“Wakati mtu anapofurushwa huwa ni jukumu la aliyefurushwa kuomba marufuku dhidi yake itolewe na aeleze sababu zake. Jukumu ni la Koffi Olomide kuwasilisha ombi na wala si la serikali,” akasema Bw Njoka.

Kulingana naye, mwanamuziki huyo alifurushwa nchini kwa njia rasmi za kisheria na hivyo basi marufuku inayomzuia kuingia nchini haiwezi kuondolewa kupitia kwa ombi la matamshi kwa waziri wa usalama.

Mkuu wa mawasiliano katika Kaunti ya Kakamega, Bw Dickson Rayori, alisema ziara ya mwanamuziki huyo haifadhiliwi na serikali ya kaunti bali waandalizi wa tamasha za burudani.

“Serikali ya kaunti haitatumia senti zozote kumleta Koffi Kakamega. Kwanza kaunti itanufaika kwa mapato kutokana na ada za kiingilio na ukodishaji wa uwanja wa michezo kwa tamasha hiyo ya Koffi,” akasema Bw Rayori.

Alipuuzilia mbali uvumi kwamba serikali ya kaunti ilitenga Sh20 milioni kumleta mwanamuziki huyo nchini.

  • Apr 17, 2018

Makamishna wa IEBC waliosalia wapokonywa walinzi na madereva

CHARLES WASONGA na VALENTINE OBARA

MAKAMISHNA watatu waliosalia kwenye Tume Huru ya Uchaguzi na Mipaka (IEBC), akiwemo Mwenyekiti Wafula Chebukati, Jumanne walipokonywa walinzi na madereva wao.

Hatua hiyo ilijiri saa chache baada ya viongozi mbalimbali, akiwemo Kiongozi wa Wengi katika Bunge la Taifa, Bw Aden Duale kutaka IEBC ifagiliwe ili kuteuliwe makamishna wapya.

Meneja wa mawasiliano katika IEBC, Bw Andrew Limo, alisema watatu hao ambao ni Mwenyekiti Wafula Chebukati, na makamishna Boyu Molu na Prof Ayub Guliye, wana haki kupewa walinzi hadi wakati muda wao wa kuhudumia tume utakamilika.

“Kuondoa walinzi wao kunaweza kuhatarisha usalama wa mwenyekiti na makamishna. Hatua hii inadhuru uwezo wao wa kutekeleza majukumu katika tume,” akasema.

Awali, Bw Chebukati alikuwa amepuuzilia mbali wito wa kumtaka ajiuzulu na badala yake akasema inafaa wabunge waweke mikakati ya kupitisha sheria itakayotoa mwongozo wa jinsi ya kuajiri makamishna watakaojaza nafasi zilizoachwa wazi.

“Bunge halijapitisha sheria ya kusimamia jinsi ya kuajiri makamishna kuchukua mahala pa wale wanaoondoka. Hivyo basi, tunaomba asasi husika za serikali zichukue hatua zinazofaa ili kuhakikisha majukumu ya tume hayakwami,” akasema.

Kulingana naye, makamishna Consolata Nkatha Maina (Naibu Mwenyekiti), Dkt Paul Kibiwott Kurgat na Margaret Wanjala Mwachanya ambao walijiuzulu walionyesha hawana uwezo wa kuongoza tume inapokumbwa na matatizo, na pia si wenye moyo wa kukumbatia maoni yanayotofautiana na misimamo yao.

Lakini viongozi walizidi kusisitiza tume hiyo ivunjwe ili iundwe upya.

 

Waondoke kwa utaratibu 

Bw Duale alitaka Kamati ya Bunge kuhusu Haki na Masuala ya Sheria (JLAC) kusuluhisha mzozo katika IEBC kwa kuandaa utaratibu utakaowezesha Chebukati na wenzake kuondoka afisini. Kamati hiyo inaongozwa na Mbunge wa Baringo Kaskazini, William Cheptumo.

Aliwalaumu viongozi wa kidini kwa masaibu yanayoizonga Tume Huru ya Uchaguzi na Mipaka (IEBC), akisema waliwapa Wakenya “bidhaa mbovu”, kupitia kwa jopo la uteuzi wa makamishna wa tume hiyo lililoongozwa na wawakilishi wa makundi ya kidini.

“Chebukati aliletwa na viongozi wa kidini. Yeye na wenzake ni “bidhaa mbovu” kwani wanatumia wakati mwingi kuzozana badala ya kufanya kazi,” akasema huku akiunga mkono shinikizo za kumtaka Bw Chebukati na makamishna Prof Abdi Guliye na Boya Molu wajiuzulu.

Hata hivyo, viongozi hao wa kidini waliwasilisha orodha ya watu kadhaa kwa Rais Uhuru Kenyatta, ndipo uamuzi ukafanywa kuhusu aliyestahili kushikilia wadhifa huo.

Wito wa kutaka shughuli ya kuvunja IEBC ianzishwe ulikuwa pia umetolewa na Kiongozi wa Wengi katika Seneti, Bw Kipchumba Murkomen, na mwenzake wa wachache, Bw James Orengo.

Wawili hao walisema hali ya tume hiyo ilivyo sasa inaashiria kuna uozo ambao unaweza tu kutatuliwa kwa kuunda tume mpya.

  • Apr 17, 2018

Diamond akamatwa kwa kujionyesha akifanya ‘mambo’ kitandani na Hamisa

Na MWANANCHI

MSANII nyota wa Bongo Naseeb Abdul Juma, almaarufu Diamond Platnumz alikamatwa na kuhojiwa na polisi Jumatatu, kwa madai ya kusambaza picha za aibu mtandaoni zinazokiuka maadili.

Waziri wa Habari, Harrison Mwakyembe, Jumanne alisema msanii Diamond Platnumz alikamatwa baada ya video iliyomwonyesha akiwa na mwanamitindo Hamisa Mobeto kitandani kuchipuza katika mitandao ya kijamii.

Katika video hiyo, msaanii huyo wa Bongo alionekana akipigana pambaja na Bi Mabeto ambaye ni mama ya binti yake.

Katika video hiyo, Diamond anasikika akimtania Mabeto kwa kumpeleka mahakamani kwa kutelekeza mtoto ilihali walikuwa kitandani pamoja wakati huo.

Lakini Mabeto Bi anamjibu kwa kusema, “Niache kwani bado nimekukasirikia.”

Video hiyo iliwavutia wengi huku baadhi wakikosoa Diamond kwa kujionyesha mitandaoni akifanya mapenzi kitandani na mpenziwe Mobeto.

Akizungumza bungeni Jumanne, Waziri Mwakyembe alisema serikali imebuni sheria inayozuia wasanii na Watanzania dhidi ya kutundika picha za uchi na kuchapisha mambo yanayokiuka utamaduni na maadili ya Kitanzania.

Waziri Mwakyembe pia aliagiza polisi kumkamata msanii wa kike anayejulikana kama Nandy baada ya picha zake zinazokiuka maadili kuchipuza mtandaoni.

Katika picha hizo, msanii Nandy anaonekana akimpiga busu mpenzi wake wa zamani anayefahamika kwa jina la Billnass.

Picha hizo zinadaiwa kupigwa 2016 lakini zilichipuza mtandaoni mwezi huu. Bw Mwakyembe alisema: “Tanzania sio jalala la kutupa picha za uchi zinazokiuka maadili yetu ya Kitanzania.”

Waziri alifichua kukamatwa kwa Diamond alipokuwa akijibu swali la nyongeza la mbunge wa Ulanga Godluck Mlinga aliyetaka kujua serikali ilikuwa na mkakati gani kukomesha tabia za baadhi ya watu wanaotumia mitandao vibaya na kueneza ushoga.

Alisema ongezeko la Watanzania wanaotia picha za uchi mitandaoni linatokana na athari ya utamaduni wa mataifa ya ughaibuni hivyo akaahidi kukabiliana vikali na tatizo kwa kutumia sheria mpya.

Waziri Mwakyembe alilalama kuwa wasanii wa Bongo hawajakuwa wakipeleka nyimbo zao kuhaririwa na Baraza la Sanaa la Taifa (BASATA) kabla ya kuanza kuzicheza hadharani.

Msanii Diamond alitoa video hiyo tatanishi saa chache baada ya kuachilia wimbo mpya ‘Kwangwaru’ ambao amemshirikisha msaani mwenzake wa Bongo Harmonize.

Katika wimbo huo Diamond amemkejeli mpenziwe wa zamani, Zari ambaye amemwambia ‘Ukiachwa Achika’.

Diamond na Zari wamezaa pamoja watoto wawili; Tiffah na Nillan.

  • Apr 17, 2018

#FormNiGani: Wanaume washirikishwe kupanga uzazi

Na CAROLYNE AGOSA

VUGUVUGU moja la kijamii linataka Bunge kutenga bajeti mahususi ya kuimarisha huduma za kupanga uzazi nchini huku idadi ya Wakenya ikigonga 50 milioni.

Vuguvugu hilo linalojitambulisha kwa wito: “FormNiGani”, pia linataka wabunge kuweka mikakati ya kujumuisha wanaume katika kupanga uzazi kwani ni wahusika wakuu katika suala la uzazi.

Wakizungumza Jumanne walipoandaa matembezi katikati ya jiji la Nairobi kuelekea Bunge kuwasilisha hoja yao, wanachama wa vuguvugu hilo walisikitika kwamba mzigo wa kupanga uzazi umeachiwa wanawake.

“Ingekuwa wanaume wanaweza kupata mimba mbinu za kupanga uzazi zingepatikana kwa urahisi zaidi, tena kwa bei nafuu. Hii ni kwa sababu japo mama ndiye hubeba mimba ni wanaume hufanya maamuzi kuhusu idadi ya familia,” akasema mmoja wa waandalizi wa matembezi hayo, Bw George Nderitu.

“Wabunge sasa wanatayarisha bajeti ya mwaka ujao. Tunawahimiza kutenga fedha mahususi ili kuimarisha upatikanaji wa mbinu bora za kupanga uzazi kote nchini, sio kondomu pekee,” aliongeza.

Kampeni hiyo inalenga hususan vijana wenye umri wa miaka kati ya 18-35 limehimiza wanaume kushiriki kikamilifu katika kupanga uzazi.

Wataalamu wanahoji kuwa, mbinu za kupanga uzazi huchangia kuokoa gharama za matibabu kwa akina mama na watoto kwani ni wachache watakumbwa na matatizo ya ujauzito na kujifungua, wala kusaka huduma za kuavya mimba ambazo hawajapangia wala kutarajia.

Ripoti ya Hali ya Uzazi Kenya (KDHS) inaonyesha kuwa karibu nusu ya mimba zote (asilimia 43) huwa hazijapangiwa. Vijana wachanga wa miaka kati ya 15-19 ndio wanaongoza katika kuhitaji huduma za kupanga uzazi.

“Wanawake na wanaume wote wakubaliane idadi na wakati wa kupata watoto.  Vile vile, waandamane kwa kliniki za kupanga uzazi ili wanaume pia wafahamishwe mbinu zinazowafaa angalau pia wasaidie akina mama kubeba mzigo huo,” alieleza Bw Joel Ingo.

Takwimu zaonyesha kuwa mtoto huzaliwa kila sekunde 20 nchini Kenya au 4,237 kwa siku.

Viwango vya uzazi vingali juu huku mwanamke mmoja akitarajiwa kupata watoto 4 maishani mwake.

Kenya itafanya zoezi la kuhesabu watu Agosti mwaka ujao. Zoezi la mwisho mnamo 2009 lilipata idadi ya watu ilikuwa 38,61 milioni.

Makadirio ya kila mwaka yaonyesha idadi hiyo ilipanda hadi 41 milioni mwaka 2011 na imefika 50.95 mwaka huu. Shirika la Umoja wa Mataifa linakadiria kutakuwa na Wakenya 51.7 milioni mwaka 2020.

  • Apr 17, 2018

Wabunge wa Kenya waduwazwa 3-1 na wenzao wa Uturuki

Na GEOFFREY ANENE

BUNGE FC imepoteza raundi ya kwanza ya mechi ya kirafiki dhidi ya Uturuki baada ya kulimwa 3-1 katika klabu ya michezo ya Parklands jijini Nairobi, Jumanne.

Vijana wa kocha Sylvester Ochola walipata bao la kufutia machozi kutoka kwa Seneta wa kaunti ya Kakamega, Cleophas Malala dakika tatu kabla ya kipenga cha mwisho kilie.

Timu ya Wabunge wa Kenya almaarufu Bunge FC ikipiga picha kabla ya kumenyana na wenzao kutoka Uturuki hapo Aprili 17, 2018. Picha/Geoffrey Anene

Katika mchuano huu wa kuimarisha uhusiano na ushirikiano kati ya mataifa haya, Uturuki iliizidi Bunge na chenga za maudhi na pasi za uhakika katika uwanja telezi baada ya mvua kunyesha jijini Nairobi mapema asubuhi.

Bunge haikuwa imetulia kabla ya kujipata bao moja chini baada ya Ibrahim Halil Yildiz kucheka na wavu dakika ya kwanza.

Timu ya Uturuki yapiga picha kabla ya kuvaana na Bunge FC katika mechi ya kirafiki uwanjani Parklands. Picha/Geoffrey Anene

Kenya ilipata nafasi murwa dakika chache baadaye, lakini Mbunge wa Rarieda Otiende Amolo hakukamilisha vyema ikabu kutoka kwa Mbunge wa Homa Bay, Peter Kaluma.

Uturuki kisha ilipata nafasi ya kuimarisha uongozi wake dakika mbili kabla ya kipindi cha kwanza kumalizika pale Bunge ilifanya masihara ndani ya kisanduku chake na kutunuku wageni hao penalti.

Mwenyekiti wa Chama cha Urafiki cha Wabunge wa Kenya na Uturuki, Adan Keynan akijiandaa kupeana kombe kwa washindi Uturuki. Picha/Geoffrey Anene

Yildiz alivuta mkwaju huo kwa mguu wake wa kushoto, lakini kipa Jimmy Okwiri alikuwa macho na kuipangua. Hata hivyo, walinzi wa Bunge hawakumakinika na Sarikaya akahakikisha Uturuki haipotezi nafasi hiyo na kuiweka mabao 2-0 juu.

Huku muda ukiipa Bunge kisogo, Mbunge wa Nyali, Mohammed Ali alivuta krosi nzuri, lakini Victor Munyaka (Machakos Town) akapiga mpira hafifu uliodakwa na kipa.

Wabunge wa Kenya na Uturuki katika picha ya pamoja uwanjani Parklands. Picha/Geoffrey Anene

Sarikaya, ambaye alikuwa mwiba kwa timu ya Kenya kwa chenga zake na kasi pembeni kushoto, alipachika bao la tatu dakika ya 53 baada ya Okwiri na wenzake kuzembea.

Malala aliondolea Bunge aibu ya kumaliza mechi bila bao alipofuma wavuni ikabu safi kutoka pembeni kulia. Bunge ilipata frikiki hiyo baada ya nahodha Daniel Wanyama (Webuye West) kuangushwa nje ya kisanduku.

Kombe rembo lililowaniwa na timu ya Bunge FC na Uturuki. Picha/Geoffrey Anene

Timu hizi zinafanya mpango wa kuwa na mechi ya marudiano katika mji wa Antalya ama Istanbul. Bunge imeapa kulipiza kisasi ugenini. 

  • Apr 17, 2018

Taabani kwa kugeuza kondoo wa babake mke na ‘kurina asali’ mara saba

Na TITUS OMINDE

MWANAMUME wa umri wa miaka 30 alifikishwa katika mahakama moja mjini Eldoret kujibu mashtaka ya kushiriki ngono na kondoo wa babake.

Mlalamishi Sang Kibii ambaye ni baba wa mshtakiwa alisababisha kicheko kortini alipodai kuwa mwanawe amekuwa akishiriki tendo hilo na kondoo wake kwa zaidi ya mara saba.

Maelezo ya mashtaka yalisema kuwa mshtakiwa alitenda kosa hilo mnamo Aprili 13 mwaka huu kaitka eneo la Chepkanga viungani mwa mji wa Eldoret.

Mshtakiwa William Kipchirchir Kibii ambaye alikana mashtaka hayo mbele ya hakimu mkuu wa Elodret Bw Charles Obulutsa, alionekana kujikanganya pale alipokiri kuwa amewahi kushiriki ngono na kondoo huyo mara moja wala si mara mbili kama ilivyodaiwa.

Juhudi za mahakama kushawishi pande mbili husika kutafuta suluhu nje ya mahakama ziligonga mwamba kwani babake mshtakiwa aliambia mahakama kuwa tabia ya mwanawe ilikuwa imezidi ambapo alitaka apate funzo kupitia kwa sheria.

“Mheshimiwa nimechoshwa na kijana wangu ameshindwa kutafuta mke badala yake amebadilisha kondoo wangu kuwa mke wake,” aliambia mahakama  mzee mwenye ghadhabu.

Mahakama iliamuru mshtakiwa kuachiliwa kwa dhamana ya pesa taslimu ya Sh10,000, kesi hiyo itasikizwa Aprili 25 mwaka huu.

  • Apr 17, 2018

Shinikizo kumtaka Chebukati pia ajiuzulu

Na WAANDISHI WETU

DARUBINI sasa imeelekezwa kwa Mwenyekiti wa Tume Huru ya Uchaguzi na Mipaka (IEBC), Bw Wafula Chebukati, na makamishna wawili waliobaki kwenye tume hiyo baada ya wenzao kujiuzulu.

Viongozi mbalimbali walisema inastahili Bw Chebukati ajiuzulu pamoja na makamishna Boya Molu na Prof Abdi Guliye, sawa na jinsi Naibu Mwenyekiti Consolata Nkatha Maina, Bw Paul Kurgat na Bi Margaret Mwachanya walivyojiuzulu  Jumatatu.

Bi Maina na wenzake walimshutumu Bw Chebukati, na kusema ameshindwa kuongoza tume kwa uthabiti.

“Katika uongozi wake, tume imegeuka kuwa kitengo cha kusambaza habari za kupotosha, kutoaminiana na kujitakia makuu ya kibinafsi,” wakasema kwenye taarifa iliyosomwa na Bi Mwachanya kwenye kikao cha wanahabari Nairobi.

Kiongozi wa Wengi katika Seneti, Bw Kipchumba Murkomen, na mwenzake wa Wachache, Bw James Orengo, walisema hatua ya makamishna kujiuzulu ni ishara tosha ya uozo ulio katika IEBC.

Bw Murkomen aliwapa makamishna hao siku saba waondoke la sivyo bunge libuni jopokazi kuchunguza utendakazi wao.

“Wito wangu kutaka makamishna wa IEBC wajiuzulu unatokana na mizozo ya hivi majuzi.

Inaonekana mwenyekiti hajawahi kuwa msimamizi awali kabla ya kuchaguliwa kusimamia IEBC,” akasema seneta huyo wa Elgeyo Marakwet.

Kwa upande wake, Bw Orengo alisema: “Hakuna cha makamishna wema wala wabaya katika IEBC. Asasi hiyo ina laana. Kujiuzulu kwa makamishna ni dalili ya maradhi yasiyotibika yanayokumba tume hiyo.”

 

Mtindo wa ‘timua timua’

Endapo makamishna wote watang’atuliwa, Kenya itakuwa ikiendeleza mtindo wa kuondoa makamishna wa tume za uchaguzi mamlakani kabla ya muda wao kukamilika, tangu Uchaguzi Mkuu wa 2007.

Katika mwaka wa 2008 makamishna wa Tume ya Uchaguzi ya Kenya (ECK) wakiongozwa na marehemu Samuel Kivuitu, waliondolewa wakati bunge lilipounda Tume Huru ya Muda ya Uchaguzi (IIEC) kufuatia ghasia za baada ya uchaguzi wa 2007.

Bw Issack Hassan, aliyeongoza IIEC (baadaye IEBC), alibanduliwa pamoja na wenzake mwaka wa 2016, walipoandamwa na madai ya ufisadi.

Wabunge Kanini Kega (Kieni), Kathuri Murungi (Imenti Kusini), James K’oyoo (Muhoroni) na Mbunge Mwakilishi wa Kaunti ya Laikipia, Bi Catherine Waruguru, jana walisema inafaa maafisa wote wabadilishwe.

“Bw Chebukati anafaa kufanya jambo la uungwana ambalo ni kujiuzulu. Makamishna waliobaki pia wafuate nyayo zake,” akasema Bw Kega.

 

Maafisa wapya

Wakizungumza wakiwa Nanyuki, Bi Waruguru na Bw K’oyoo walisema IEBC inahitaji maafisa wapya.

Wito wa kutaka makamishna wachunguzwe ulitolewa pia na Shirikisho la Watumizi Bidhaa la Kenya (COFEK).

Kwa upande wao, wazee wa jamii za Rift Valley wakiongozwa na mwenyekiti wao, Mzee Gilbert Kabage, walisema kuwa katika hali yake ya sasa, tume hiyo haiwezi kuaminiwa kuendesha uchaguzi mwingine wowote, kwani imezorota mno.

Bw Chebukati aliahidi kutoa taarifa ya kina kuhusu hali ya IEBC baadaye, ingawa taarifa hiyo haikuwa imetolewa kufikia wakati wa gazeti hili kuchapishwa.

Haya yametokea huku uchunguzi alioagiza ufanywe kuhusu madai ya ubadhirifu katika IEBC ukiendelea, sawa na uchunguzi mwingine unaoendelezwa na Kamati ya Bunge kuhusu Uhasibu wa Umma (PAC).

  • Apr 16, 2018

MATIBA: Viongozi wasifu ushujaa wa ‘Baba wa demokrasia nchini’

Na LEONARD ONYANGO

VIONGOZI mbalimbali nchini wamemiminia sifa tele mwanasiasa mkongwe Kenneth Stanley Njindo Matiba huku wakimtaja kuwa ‘Baba’ wa demokrasia na mfumo wa vyama vingi.

Matiba Jumapili katika hospitali ya Karen, Nairobi huku akiwa na umri wa miaka 85.

Katika rambirambi zake Rais Uhuru Kenyatta alimtaja Matiba kama mzalendo halisi aliyejitolea mhanga kupigania demokrasia.

“Mzee Matiba alikuwa miongoni mwa wana wa Kenya walioweka misingi ya taifa hili. Alitumikia taifa hili kwa uadilifu tangu alipokuwa mwalimu katika shule ya Upili ya Kangaru na hata alipokuwa waziri na mtetezi wa demokrasia,” akasema Rais Kenyatta alipokuwa akihutubia taifa kutoka Ikulu, Jumapili usiku.

“Kwa niaba ya familia yetu, Bi Margaret na mimi tunatuma risala zetu za pole kwa Bi Edith Matiba na familia yake kwa kumpoteza Mzee Kenneth Matiba,” akaongezea.

Naibu wa Rais William Ruto alimtaja Bw Matiba kama mtetezi wa wanyonge na shujaa aliyepigania mageuzi na demokrasia.

“Bidii yake katika kupigania uhuru wa kujieleza, demokrasia ilimfanya kuzuiliwa kikatili. Alipendwa katika eneobunge la Kiharu na eneo zima la Muranga kwa kuwa aliwatumikia kwa kujitolea na uadilifu,” akasema Bw Ruto.

Jaji Mkuu David Maraga alimtaja Bw Matiba kama mwanasiasa shupavu aliyetumikia taifa kwa kujitolea.

 

Kielelezo

“Japo Mzee Matiba ametuacha, maisha yake yataendelea kuwa kielelezo kwa familia yake na Wakenya wote waliomfahamu. Tunashukuru Mungu kwa kutupatia Mzee Matiba kuwa nasi kwa kipindi hicho hadi alipotuacha,” akasema Jaji Mkuu.

Kinara wa Upinzani Raila Odinga alisema Mzee Matiba alikuwa shujaa na nembo ya ukombozi wa nchi hii.

“Kenya imepoteza nembo ya mwisho ya mwisho ya maumivu yaliyotokana na harakati za kupigania ukombozi na demokrasia. Matiba alijitolea mhanga kuhakikisha kuwa Wakenya wanakuwa na maisha bora na demokrasia ya kudumu,” akasema Bw Odinga.

Viongozi wengine waliotuma risala zao za rambirambi ni Spika wa Bunge la Kitaifa Justin Muturi, Kiongozi wa chama cha Wiper Kalonzo Musyoka, Kiongozi wa Amani National Congress (ANC) Musalia Mudavad, Gavana wa Murang’a Mwangi wa Iria kati ya wengineo wengi.

Matiba alikuwa mwalimu katika Shule ya Upili ya Kangaru, Embu baada ya kukamilisha masomo yake katika Chuo Kikuu cha Makerere, Uganda mnamo 1960.

Kati ya 1961 na 1962 Bw Matiba alihudumu kama Naibu Afisa wa elimu ya juu katika wizara ya Elimu.

 

Katibu wa kwanza

Mnamo Mei 18, 1963, Bw Matiba aliyekuwa na umri wa miaka 31 aliitwa katika afisi ya waziri wa Elimu katika serikali ya wakoloni, David Gregg. Bw Matiba aliteuliwa kuwa Katibu wa wizara siku hiyo, kulingana na tawasifu yake, Aiming High.

Bw Matiba alikuwa katibu wa wizarawa kwanza mweusi na jukumu lake kuu lilikuwa kuhakikisha kuwa sekta ya elimu inaambatana na maadili na matakwa ya Kiafrika.

“Wanafunzi wote waliotaka kwenda kusomea ughaibuni walilazimika kupata saini yangu katika paspoti zao kabla ya kusafiri,” akasema Bw Matiba.

Wadhifa huo ulimwezesha Bw Matiba kukutana na idadi kubwa ya wanafunzi ambao baadaye walikuwa maafisa wenye ushawishi katika serikali ya Mzee Jomo Kenyatta.

Baadaye aliteuliwa kuwa Katibu wa Wizara ya Masuala ya Ndani ambapo aliweza kufanya kazi na Daniel arap Moi aliyekuwa waziri. (Rais Mstaafu) Moi alikuwa rafiki wa karibu wa Bw Matiba.

Alipokuwa waziri wa Ujenzi, Bw Matiba alifanikiwa kukwea safu ya Milima Himalayas iliyoko barani Asia. Aliweza kusimamisha bendera ya Kenya katika kilele cha mlima wa Island Peak ulioko Nepal na alikuwa Mkenya wa kwanza kufanya hivyo.

Aliwahi kutembea kutoka jijini Nairobi hadi Murang’a akichangisha fedha, hatua iliyomfanya kujizolea sifa tele.

 

Mfugaji

Kabla ya kujiunga na siasa Bw Matiba pia alikuwa mkulima na mfugaji wa nguruwe mtajika katika eneo la Limuru.

Biashara ya nguruwe iliporomoka baada ya mmoja wa wafanyakazi wake kuwalisha chakula kingi na kuwafanya kuwa wanono kupindukia hivyo akawauza wote kwa bei ya chini.

Baadaye, Matiba alianzisha shirika la safari za ndege, African International Airways.

Matiba pia aliwekeza katika sekta za elimu, hoteli na alikuwa miongoni mwa mamilionea wachache humu nchini huku akiwa na umri wa miaka 48.

Mnamo 1988, alijiuzulu kutoka serikalini baada ya kutofautiana na serikali ya Rais ya Moi kuhusiana na uchaguzi wa viongozi wa Kanu katika eneo la nyumbani, Murang’a.

Akiwa na Charles Rubia ambaye pia alikuwa amejiuzulu kutoka serikalini, alijiunga na wanaharakati wa kupigania mfumo wa vyama vingi kama vile Jaramogi Oginga Odinga na vuguvugu la vijana lililojulikana kama ‘Young Turks’.

 

Kiharusi korokoroni

Kabla ya maandamano ya Julai 7, 1990 yaliyojulikana kama Saba Saba, Bw Matiba alikamatwa na kuzuiliwa bila kufikishwa mahakamani hadi 1991. Aliachiliwa huru baada ya kuugua maradhi ya kiharusi.

Mfumo wa vyama vingi ulipoanza Matiba alijiunga na chama cha Ford kilichojumuisha viongozi wa upinzani kama vile Jaramogi Oginga Odinga. Makamu wa Rais wa zamani na Waziri wa Afya Mwai Kibaki alijiuzulu kutoka serikalini na kubuni chama chaDemocratic Party (DP) kabla ya uchaguzi mkuu wa 1992.

Mvutano baina ya Matiba na Odinga kuhusiana na mwaniaji wa urais, chama cha Ford kilisambaratika na kuwa Ford-Asili cha Matiba na Ford-Kenya chake Odinga.

Rais Moi aliibuka mshindi kwa kura 1.9 milioni, Matiba kura 1.4 milioni, Bw Kibaki 1.05 milioni na Odinga akapata kura 0.94 milioni.

Matiba alimtoa kijasho Rais Moi, Kibaki na Odinga licha ya afya yake kuzorota.

Mwaka 2017, Jaji wa Mahakama ya Juu Isaac Lenaola aliagiza serikali kumlipa Mzee Matiba kitita cha Sh945 milioni kwa kumtesa na kumzuilia kikatili katika gereza la Kamiti.

  • Apr 16, 2018

Moi aombe familia ya Matiba msamaha kwa mateso – Koigi Wamwere

NA PETER MBURU

MPIGANIAJI wa ukombozi wa pili Koigi Wa Wamwere Jumatatu alimtaka rais mstaafu Daniel Moi kuomba familia ya marehemu Kenneth Matiba msamaha kwa mateso aliyopitia ndani ya uongozi wake, huku wazee wa Bonde la Ufa wakiitaka serikali kumzika kishujaa kama alivyozikwa Nelson Mandela.

Bw Wamwere alisema kuwa kifo cha Bw Matiba kilitokana na shida za kiafya alizopata wakati alipofungwa bila hukumu, na mateso aliyokumbana nayo akiwa jela.

Mbunge huyo wa zamani wa Subukia alimtaka Mzee Moi kuwa shupavu na kuiomba msamaha wakati taifa likiomboleza kifo cha kiongozi huyo, akisema ujumbe wa rambirambi haungetosha.

Alimtaja Bw Matiba kuwa kiongozi aliyejitolea kupigania Kenya huku akiitaka serikali kukiri makosa ya uongozi wa mbeleni mbele ya umma kama namna ya kuonyesha kufurahia matunda aliyopigania marehemu Bw Matiba.

“Ninatarajia kuwa siku zijazo wakati taifa likiomboleza, mzee Moi atapata ushupavu wa kuomba familia ya Matiba msamaha, mbali na kutuma rambirambi kwani ni kutokana na kifungo alichopata wakati wa Moi na mateso yaliyofuata vilivyompa magonjwa ambayo alirudi nyumbani nayo na kufa baadaye,” Bw Wamwere akasema.

Mwanasiasa maarufu katika vita vya ukombozi wa Kenya kutokana na utawala wa rais mstaafu Daniel Moi, marehemu Kenneth Matiba. Picha/ Maktaba

Kulingana na Bw Wamwere, mateso waliyopata viongozi waliofungwa bila kuhukumiwa yalikuwa mengi na machungu, yakiwemo kunyimwa matibabu na kutengwa kando na watu.

“Kutengwa kando na watu kwa saa 23 na nusu kila siku ni uchungu, ni kutengwa kikamilifu na hata unapougua haupewi huduma,” akakumbuka mbunge huyo wa zamani wa Subukia, ambaye pia aliwahi kufungwa kifungo sawa.

Kwa upande mwingine, wazee wa kutoka Bonde la Ufa wakiongozwa na mwenyekiti wao Gilbert Kabage waliitaka serikali kujitwika mzigo wa kumzika mzee Matiba, huku wakisisitiza kuwa marehemu anapasa kuzikwa kishujaaa kama alivyozikwa rais wa kwanza wa Afrika Kusini Nelson Mandela.

“Kushikwa na kufungwa kwake ni baadhi ya mambo yaliyoudhi, lakini matunda yake tumeyaona kama taifa. Marehemu anafaa kuzikwa kishujaa kama Bw Mandela kwani pia naye alipigania Uhuru wa wakenya kutoka kwa wakenya wakoloni na matunda yake tunayaona,” akasema mzee Kabage.

“Mipango ya mazishi inafaa kuwa jukumu la serikali kama njia ya kukiri kuwa ilikosea kwa kumtesa, na kufurahia shujaa wa taifa letu,” Bw Kabage akasema.

  • Apr 16, 2018

Kuria apokelewa vizuri Nyanza baada ya muafaka

NA PETER MBURU

MUAFAKA baina ya mkono kati ya Rais Uhuru Kenyatta na kiongozi wa ODM Raila Odinga umewanusuru viongozi wengi waliochukiwa na wafuasi wa mirengo hasimu, huku baadhi yao wakiishia kuwa mabingwa katika maeneo ya wafuasi wa waliokuwa maadui mbeleni.

Baadhi ya viongozi walionufaika na salamu hiyo muhimu kwa taifa ni mbunge wa Gatundu Kusini Moses Kuria, ambaye siku chache zilizopita ametembelea maeneo mengi yaliyo ngome za upinzani.

Bw Kuria ambaye mbeleni alikosolewa vikubwa na wadadisi na wafuasi wa Bw Odinga sasa anatembea sehemu za Nyanza na Magharibi kama nyumbani kwake, akila na kuimba na waliomwona kama hasimu mkubwa mbeleni.

Ziara hizo, aidha zimemsaidia kiongozi huyo kueneza ajenda ya haja ya sehemu hizo ambazo kwa miaka mingi zimetofautiana kisiasa na eneo la Mlima Kenya kushirikiana na eneo hilo na kujikomboa kutoka upinzani.

“Tumeanza safari ya ugatuzi wa salamu. Wakati wa siasa umeisha na tunaona nchi yote iko na amani, hata uchumi utaimarika na wawekezaji sasa wanaona umuhimu wa salamu hiyo,” mbunge huyo akaeleza alipokuwa akizungumzia watu Homabay.

Ziara hizo, hata hivyo, zimeonekana kama zinazonuia kukijengea chama cha Jubilee sifa na kukipa hatua, kabla ya uchaguzi wa 2022.

“Mambo ya upinzani hamuwezani nayo, kwani hata kipawa chake hamna, tuungane pamoja ili twende safari hii pamoja kwani nyumba ya Jubilee ni kubwa,” Bw Kuria akasema alipokuwa akihutubia watu Kakamega.

  • Apr 16, 2018

Madoya ahakikishia Zoo kuwa itasalia ligini

Na CECIL ODONGO

KIUNGO wa Klabu ya Zoo Kericho Michael Madoya amewahakikishia mashabiki wa timu hiyo kwamba hawatateremshwa ngazi mwisho wa msimu.

Madoyo ambaye alituzwa kama kiungo bora mbunifu mwaka 2017, alisikitikia matokeo mabaya ambayo yamekuwa yakisajiliwa na timu hiyo lakini akasema bado mwanya wa kujiimarisha upo.

Zoo Kericho Jumapili walionyesha kwamba si wanyonge katika ligi jinsi inavyodhaniwa baada ya kutoka nyuma na kulazimisha sare ya mabao 2-2 dhidi ya miamba wa soka AFC Leopards.

Hadi sasa klabu hiyo kutoka Kaunti ya Kericho imeweza kushinda mechi mbili kati ya kumi iliyocheza na wanashikilia nafasi ya 17 kwenye msimamo wa jedwali la ligi inayoshirikisha timu 18.

“Kila timu huwa na wakati wake mgumu ambapo huwa wanalemewa lakini sisi kipindi hicho kinaelekea kuisha haswa baada ya sare dhidi ya AFC Leopards,” akasema kiungo huyo ambaye kando na talanta ya soka alisomea uanahabari.

Aidha alisisitiza kwamba hana presha zozote za kufikia kiwango chake cha mwaka 2017 na cha muhimu anacholenga ni kuisaidia timu kupata matokeo bora.

“Mimi sizingati kuibuka bora katika hiki ama kile lengo langu kuu ni kusaidia timu hii iepuke kuteremshwa ngazi,” akasema katika mahojiano baada ya mechi yao na Ingwe.

Zoo walipandishwa ngazi mwisho wa msimu jana baada ya kumaliza wa kwanza katika ligi ya daraja la pili na wanakibarua kigumu cha kuhakisha wanashinda mechi nyingi zilizosalia ili kutoka katika hatari ya kuteremshwa ngazi kufikia mwisho wa msimu.

  • Apr 16, 2018

Wabunge wa Kenya kuchuana na wenzao kutoka Uturuki

Na GEOFFREY ANENE

WABUNGE wa Kenya wataweka suti zao kando kwa mechi ya kirafiki dhidi ya wenzao kutoka Uturuki hapo Aprili 17, 2018.

Mchuano huu utasakatwa katika klabu ya michezo ya Parklands jijini Nairobi.

Bunge FC ya Kenya, ambayo imekuwa ikishiriki mashindano ya Afrika Mashariki kwa miaka kadhaa sasa, inatarajiwa kuwakilishwa na wabunge kama Kanini Kega (Kieni), Daniel Wanyama (Webuye West) na Otiende Amollo (Rarieda), miongoni mwa wengine.

Wabunge kutoka Uturuki wamekuwa humu nchini kwa karibu juma moja kufanya mazungumzo jinsi ya kuimarisha uhusiano kati ya mataifa haya katika sekta mbalimbali zikiwemo elimu na biashara.

Mwenyekiti wa Chama cha Kirafiki cha Wabunge kutoka Uturuki na Kenya, Mahmut Kacar anatarajiwa kuongoza timu ya Waturuki.

Spika wa Bunge la kitaifa Justin Muturi atafungua rasmi mchuano huo wa kihistoria saa mbili asubuhi.

  • Apr 16, 2018

Meneja atetea kampuni kuhusu umiliki wa shamba la Sh8 bilioni

Wakili Cecil Miller (kulia) akizugumza na mteja wake, meneja mkuu wa kampuni Muchanga Investments Limited Bw Dimitri Da Gama Rose Aprili 16, 2018. Picha/ Richard Munguti

Na RICHARD MUNGUTI

MENEJA mkuu wa kampuni inayomilikiwa na aliyekuwa makamu wa rais Moody Awori Jumatatu alitetea hatimiliki iliyopewa na Wizara ya Ardhi.

Bw Dimitri Da Gama Rose, mwanawe , Horatius Da Gama Rose mmiliki mwenza wa kampuni ya Muchanga Investments  alimweleza Jaji Elijah Obaga kwamba  shamba hilo lililoko mtaa wa Karen la ekari 135 linamilikiwa kwa njia halali na kampuni hiyo.

“Hati ya umiliki wa shamba hili ilitolewa kwa Muchanga na Wizara ya Ardhi mnamo 1983 baada ya Benki ya Barclays kuiuzia kulingana na wosia aliokuwa ameacha Bw Arnold Braddley aliyeuziwa shamba hilo miaka 90 iliyopita,” alisema Dimitri.

Dimitri aliyekuwa akitoa ushahidi kuhusu umiliki wa shamba hilo lililo na hati miliki tatu alisema mmiliki wa kwanza wa shamba hilo alikuwa Bw Gratthan Biddulph Norman ambaye mwaka wa 1922 alikuwa amepewa ardhi hiyo ya ekari 160.

Baada ya kuziwa shamba hilo 1928 , mlowezi Braddley alikata ekari 20.2 na kumuuzia Bw William Berliam Worner na kusalia na ekari 139.2.

Hatimaye Braddley alimkabidhi bintiye Bi Arnette Theresa Benson ekari nne na kusalia na ekari 134 alizozikabidhi benki ya Barclays  kuzisimamia kwa vile alikuwa amezeeka.

Jaji Obaga alifahamishwa  kwamba Mabw Awori na marehemu Da Gama Rose walipokea mkopo kutoka kwa Benki ya Barclays kisha wakamaliza kulipa mnamo 1983 ndipo shamba hilo likasajiliwa kwa jina la kampuni ya Muchanga Investments Limited (MIL).

Dimitri aliyekuwa anatoa ushahidi katika kesi ambapo MIL imeshtaki kampuni ya Telesource Com Limited inayomilikiwa na aliyekuwa meneja mkuu wa Hazina ya Malipo ya Uzeeni (NSSF) Josephat Konzollo aliambia korti rekodi iliyoko katika  wizara ya ardhi inadhihirisha kwamba shamba hilo ni la Muchanga na wala sio ya walalamishi wengine.

  • Apr 16, 2018

Mawakili wapinga NHIF kuitisha Wakenya cheti cha ndoa

Na RICHARD MUNGUTI

CHAMA cha wanasheria nchini LSK Jumatatu kiliwasilisha kesi katika mahakama kuu kupinga agizo la bima ya kitaifa ya huduma za afya (NHIF) la kutaka thibitisho la ndoa.

LSK inasema kwamba agizo la NHIF kwamba lazima wawili wathibitishe wamefunga pingu za maisha na wanaishi kama mke na mume kabla ya kunufaika na huduma zake linakaidi na kukandamiza haki za wanachama wake.

Chama hicho kinaomba korti iharamishe agizo hilo kwamba ni ushahidi tu wa afidaviti zilizotayarishwa na mahakimu utakaokubalika kwamba “wawili wameonana na wanaishi kama mke na mume.”

Chama hiki cha kutetea mawakili nchini kimeishtaki NHIF pamoja na mkurugenzi wake mkuu kikidai agizo hilo limepotoka na ukiukaji wa hali ya juu wa haki za wanachama wake wanaolipa ada zao kwa bima hiyo.

“Naomba hii mahakama ifutilie mbali agizo hilo la NHIF la kutaka cheti cha ndoa kuthibitisha mke au mume wamefunga ndoa ndipo wafaidi kwa huduma za bima za NHIF,” anasema kinara wa LSK katika kesi iliyowasilishwa katika mahakama kuu ya Milimani.

LSK inaomba mahakama ifutilie mbali kabisa agizo la NHIF kwamba “haitaki ushahidi wa afidaviti uliopigwa muhuri na wakili kuwa ushahidi wa kutosha kuthibitisha wawili wameoana.”

LSK inasema uamuzi huo wa NHIF umepotoka kabisa na kwamba utamlimbikizia mahakimu kazi ikitiliwa maanani kwamba “kuna mrundiko wa kesi katika baadhi ya mahakama.”

NHIF imesema tu itakubalia cheti cha kufunga ndoa kilichotolewa na maafisa wanaotambulika kisheria kama vile Wasajili wa masuala ya ndoa kutoka afisi ya mwanasheria mkuu, kadhi, mapadri, makasisi au afidaviti zilizotayarishwa na mahakimu kwamba wawili ni mke na mume.

“Ikiwa agizo hili litatekelezwa mawakili watanyimwa kazi,” LSK chasema.

Chama hiki kinasema kwamba afidaviti zinazotayarishwa na mawakili ndizo zinazotumika kama ushahidi kwa wanawake wanaoishi katika sehemu za mashambani kuthibitisha wameolewa.

LSK chasema ikiwa mawakili watanyimwa kazi hii bila shaka mamilioni ya wanawake wanaotegemea afidaviti zao kujaza Fomu za NHIF kutibiwa wataumia na “haki zao zitakandamizwa.”

Korti imeombwa itangaze kwamba uamuzi huo wa NHIF umepotoka na ni ukandamizaji wa hali ya juu wa haki za waliofunga ndoa na hawana vyeti rasmi.

Kwa sasa NHIF inataka wanaopeleka maombi watibiwe ama kurudishiwa pesa awe akitoa ushahidi amefunga ndoa kwa kutoa cheti cha kufunga ndoa rasmi ama afidaviti iliyotayarishwa na hakimu wa mahakama.

  • Apr 16, 2018

Chifu wa Kilimani ashtakiwa kughushi cheti

Na RICHARD MUNGUTI

CHIFU wa Kilimani, kaunti ya Nairobi alishtakiwa  kwa kughushi cheti cha kumruhusu mwenye hoteli kuendeleza biashara katikati ya jiji.

Mwenye hoteli hiyo alidai leseni hiyo ilikuwa halisi. Leseni ambayo Bw Patrick Adagi Adira alidaiwa alighushi ilikuwa ya ada ya Sh61,000 inayotozwa wenye mikahawa.

Leseni hiyo Bw Adira alishtakiwa ilikuwa ya kumruhusu mwenye mkahawa wa Meriada Gardens Restaurant.

Cheti hicho anachodaiwa kughushi chifu huyo kilimruhusu mwenye hoteli hiyo kuendelea na kazi yake kwa kipindi cha mwaka wa 2017 pasi kusumbuliwa na askari wa kaunti ya Nairobi.

Bw Adira mwenye umri wa miaka 56 alikanusha mashtaka mawili aliyofunguliwa na afisi ya mkurugenzi wa  mashtaka ya umma (DPP) baada ya kuchunguzwa na tume ya kupambana na ufisadi nchini (EACC).

Cheti hicho nambari 1441411 kilichokabidhiwa Mkahawa huo Meriada Gardens kilidaiwa kilitolewa na afisi husika ya kutoa leseni kwa wafanya biashara ya kaunti ya Nairobi mnamo Agosti 2017.

Muda wa cheti hicho ungelitamatika Agosti 2018.

Hakimu alifahamishwa cheti hicho feki kilikabidhiwa afisa wa kaunti ya Nairobi Bw Johnson Akong’o mnamo Machi 16, 2018.

Bw Akong’o kutoka idara ya ukaguzi wa leseni za biashara ya kaunti alifika katika Mkahawa huo wa Meriada na kuomba akabidhiwe leseni ndipo akapewa leseni hiyo feki.

Mnamo Machi 18, 2018 hakimu mkuu katika mahakama ya Milimani Bw Francis Andayi aliombwa na kiongozi wa mashtaka Bw Solomon Naulikha atoe kibali kwa polisi cha kumtia nguvuni Bw Adira kujibu mashtaka ya ufisadi.

Bw Andayi alikubalia ombi la Bw Naulikha na kutoa kibali kwa maafisa wa polisi wamtie nguvuni mshtakiwa na kumfikisha kortini Machi 19, 2018.

Mshtakiwa hakufika kortini siku aliyotakiwa kufika kujibu mashtaka.

  • Apr 16, 2018

Maelfu kwenye mafuriko wahitaji msaada wa dharura

Na WAANDISHI WETU

MAELFU ya Wakenya katika maeneo mbalimbali ya nchi wanahitaji msaada baada ya makazi na mazao yao kusombwa na mafuriko.

Katika Kaunti ya Kisumu, zaidi ya watu 2,000 kutoka eneobunge la Muhoroni wanahitaji msaada kwa dharura baada ya makazi na mali yao kusombwa na mafuriko yaliyotokana na kupasuka kwa kingo za Mto Nyando, Jumamosi.

Idadi ya waathiriwa imekuwa ikiongezeka katika kambi za muda za kupokea manusura zilizowekwa katika maeneo ya Mitandi, Achuodho na Katundu katika Wadi ya Ombeyi.

Mafuriko hayo ya Jumamosi yalisomba nyumba na mifugo.

Wanaume waliojistiri katika eneo la Katundu jana walilazimika kulala nje ya hema ambapo zaidi ya waathiriwa 500 wametafuta hifadhi. Ni wanawake na watoto tu walioruhusiwa kulala ndani ya hema.

Waathiriwa walisema Mto Nyando ulivunja kingo zake Jumamosi mchana kufuatia mvua kubwa na kusababisha mafuriko.

Sasa kuna wasiwasi kuwa waathiriwa hao huenda wakashikwa na maradhi kama vile malaria, kichocho, kipindupindu na magonjwa mengineyo.

Katika Kaunti ya Isiolo, nyumba kadhaa zilisombwa na mafuriko katika vijiji vya Baasa na Malkagala kwenye wadi ya Cherab na kuwaacha wanakijiji bila makazi.

Naibu Kamishna wa Wilaya ya Merti Julius Maiyo alisema hajapata idadi kamili ya waathiriwa.

Katika Kaunti ya Kisii, wakulima walipata hasara baada ya Mto Kuja kuvunja kingo zake na kusababisha mafuriko yaliyosomba mazao.

Mkazi wa eneo la Mugirango Kusini Thomas Gigoye, alisema mafuriko hayo yaliharibu mashamba ya ndizi katika eneo hilo.

Mjini Kisii, madereva na wahudumu wa bodaboda wanataka kujengwa kwa daraja litakalounganisha eneo la mjini na mtaa wa Jogoo.

Ripoti za Victor Otieno, Rushdie Oudia, Vivian Jebet na Magati Obebo

 

  • Apr 16, 2018

ODM: Ruto anavuruga muafaka wa Uhuru na Raila

VALENTINE OBARA na DAVID MWERE

WABUNGE wa upinzani wamemkashifu Naibu Rais, Bw William Ruto, kwa kupinga pendekezo kuhusu marekebisho ya katiba, wakisema ndiye kikwazo kwa muafaka.

Wabunge sita wa chama cha ODM Jumapili walisema msimamo wa Bw Ruto kupinga uundaji wa nafasi zaidi za uongozi kama vile wadhifa wa waziri mkuu, ni ishara kuwa haungi mkono juhudi za upatanisho zinazoendelezwa na Rais Uhuru Kenyatta na kiongozi wa ODM, Bw Raila Odinga.

Viongozi hao walisisitiza kuwa lazima marekebisho ya katiba yafanywe, Bw Ruto apende asipende.

Wakizungumza katika Kanisa la Church of God lililo katika mtaa wa South B, Kaunti ya Nairobi, wabunge hao walisema matamshi ya Naibu Rais yanaonyesha haungi mkono ushirikiano wa Rais Kenyatta na Bw Odinga.

“Wakati Wakenya wanapojitahidi kuungana, wengine wanatia bidii kuwatenganisha. Hii haifai. Bw Ruto anafaa ajue tutahamasisha Wakenya ili waunge mkono juhudi zozote za kubadilisha mfumo wa uongozi wakati huo utakapofika,” akasema Mbunge wa Alego Usonga, Bw Samuel Atandi.

Alikuwa ameandamana na Bw Anthony Oluoch (Mathare), Bw George Aladwa (Makadara), Bw Caleb Amisi (Saboti), Bi Florence Mutua (Mbunge Mwakilishi Mwanamke wa Busia) na Mbunge Maalumu, Bw Geoffrey Osotsi.

Marekebisho ya mfumo wa uongozi yanatarajiwa kuwa miongoni mwa mapendekezo yatakayotolewa kufuatia ushirikiano uliotangazwa mnamo Machi 9, kati ya Rais Kenyatta na Bw Odinga.

Wazo la kuunda nafasi ya waziri mkuu limekuwa likishinikizwa zaidi na viongozi wa kidini ambao wanaamini itakuwa njia ya kuleta uwiano wa kitaifa kwa kuwezesha jamii tofauti kushikilia nyadhifa za uongozi.

 

Salamu si makubaliano

Hata hivyo, Bw Ruto Jumapili alisema ‘salamu’ za viongozi ambao walikuwa mahasimu wa kisiasa hazimaanishi kuna makubaliano ya kuunda nafasi mpya au kugawana mamlaka na watu fulani, huku akitaka viongozi wakome kupigia debe marekebisho ya katiba.

“Wakati wa siasa ulipita na uchaguzi mwingine utafanywa 2022, kwa hivyo inafaa tutumie nguvu zetu kuhudumia wananchi ambao walituchagua,” akasema.

Aliongeza kuwa Wakenya ndio wenye mamlaka ya kuchagua viongozi wanaotaka na jukumu hilo halifai kutolewa kwa watu wachache ikizingatiwa kuwa endapo kutakuwa na nafasi ya waziri mkuu, kuna uwezekano mkubwa atakuwa akichaguliwa na wabunge.

“Wakenya ndio wenye jukumu la kuchagua viongozi wanaotaka kwa msingi wa katiba. Hakuna vile watu wachache bungeni wanaweza kupewa jukumu la kuchagua watu kushikilia mamlaka makuu. Hiyo ni kazi ya wananchi,” akasema.

Alikuwa akizungumza katika Kaunti ya Turkana ambako aliandamana na Kiongozi wa Wachache katika Seneti, Bw Kipchumba Murkomen na magavana Josphat Nanok (Turkana), Stanley Kiptis (Baringo), Alex Tolgos (Elgeyo Marakwet) na Naibu Gavana wa Kaunti ya Uasin Gishu, Bw Daniel Chemno miongoni mwa wengine.

Hili linatokea siku mbili tu baada ya viongozi wa kanisa Katoliki kupendekeza kuwa katiba irekebishwe ili kuunda nafasi zaidi serikalini kwa nia ya kumaliza uhasama wa kisiasa nchini.

 

  • Apr 16, 2018

Marufuku kutafuna miraa na muguka Nyandarua

Na WAIKWA MAINA

WATAFUNAJI wa miraa na muguka katika Kaunti ya Nyandarua sasa watalazimika kutafuta bidhaa hizo katika kaunti jirani kama vile Nakuru na Laikipia baada kupigwa marufuku katika kaunti hiyo.

Maafisa wa usalama walipiga marufuku uuzaji na utumiaji wa miraa na muguka katika maeneo yote ya vijijini kwenye kaunti hiyo.

Miraa ilipigwa marufuku baada ya wakazi wa wilaya ya Nyandarua ya Kati waliokongamana katika shule ya msingi ya Kandutura kulalama kuwa maeneo ya kuuza miraa na muguka yamegeuka kuwa maficho ya wahalifu. Wakazi pia walisema utafunaji wa miraa na muguka umechangia katika watoto kuachana na masomo.

Walisema vijana ambao ni waraibu wa miraa wamekuwa wakiiba vitu mbalimbali kama vile masufuria, mayai, mahindi na viazi ili kupata fedha za kununua bidhaa hiyo. Wakazi walisema kumekuwa na ongezeko la wanafunzi wanaoacha shule na kujiunga na uraibu wa miraa.

Walilalama kuwa wauzaji wa miraa wanacheza muziki unaokiuka maadili kwa lengo la kuwavutia vijana. Naibu Kamishna wa Kaunti Gideon Oyagi aliagiza polisi kuvamia vibanda vya kuuza miraa na muguka.

“Nimesikia wauzaji wa miraa wakisema kuwa wanataka kuhamia katika maeneo ya mijini. Lakini ninawaonya kuwa sitaki kuwaona katika eneo ninalosimamia. Waende kwingineko,” akasema Bw Oyagi.

Naibu wa Kamishna pia aliagiza machifu na manaibu wao kuandaa mipango ya utoaji ushauri nasaha kwa watoto ambao wameathiriwa na utafunaji wa miraa.
Mwezi uliopita, Bunge la Kaunti ya Kwale lilipitisha hoja ya kupiga marufuku biashara ya miraa na muguka katika eneo hilo.

Madiwani walisema wengi wa vijana walikatazwa kujiunga na jeshi la KDF kutokana na vigezo kwamba walikuwa na dosari zinazosababishwa na utafunaji wa miraa na muguka.

  • Apr 16, 2018

Raila akamilisha ziara ya kumwakilisha Uhuru Afrika Kusini

Na CHARLES WASONGA

KIONGOZI wa Upinzani Raila Odinga anatarajiwa kurudi nchini leo baada ya ziara rasmi ya kumwakilisha Rais Uhuru Kenyatta kwenye mazishi ya Winnie Mandela Afrika Kusini.

Mbali na hafla hiyo ya mazishi, Bw Odinga jana alikuwa amepengiwa kuwa na mkutano wa kibinafsi na Rais Cyril Ramaphosa.
Kwenye taarifa kwa vyombo vya habari, mshauri wake Bw Silas Jakakimba, alisema mkutano huo ulikuwa wa kibinafsi.

“Mheshimiwa Raila Odinga atakutana na Rais Cyril Ramaphosa kabla ya kurejea Kenya. Mkutano huo utakuwa na kibinafsi,” akasema Bw Jakakimba ambaye alikuwa katika ujumbe wa kiongozi huyo.

Bw Odinga anatambuliwa kuwa na urafiki na viongozi kadhaa wa Afrika, akiwemo Bw Ramaphosa ambaye alichukua uongozi majuzi kutoka kwa aliyekuwa rais Jacob Zuma.

Alipowasili Afrika Kusini siku ya Ijumaa, kiongozi huyo wa chama cha ODM ambaye sasa anashirikiana na Rais Kenyatta, alilakiwa na Balozi wa Kenya nchini humo Bi Jean N Kamau na maafisa wa ngazi ya juu katika serikali ya Afrika Kusini.

Kiongozi huyo aliandamana na mkewe, Ida, bintiye Winnie Odinga na Seneta wa Kisii Profesa Sam Ongeri.

Winnie, ambaye alishiriki katika mapambano dhidi ya utawala wa ubaguzi wa rangi nchini humo, alikuwa mkewe Rais wa kwanza mweusi nchini humo shujaa Nelson Mandela. Alizikwa Jumamosi katika hafla iliyohudhuriwa na maelfu ya watu pamoja na wageni kutoka mataifa ya nje.

Katika risala yake ya rambirambi, Bw Odinga alisema daima marehemu Winnie atakumbukwa na wale ambao walishuhudia na kufaidi kutokana na juhudi zake na kupinga utawala dhalimu wa mbeberu.

“Alijitolea mhanga kwa ajili ya ukombozi wa Afrika Kusini na watu wake. Na akapoteza mengi kama mtu binafsi. Lakini nafasi yake katika historia ni thabiti kwa mashujaa na wahasiriwa ulimwenguni,” akasema Bw Odinga.

Wakati wa ibada ya ukumbusho iliyoandaliwa katika uwanja wa michezo wa Orlando mjini Soweto, Bw Odinga alikutana na Naibu Rais wa Afrika Kusini David Mabuza, Waziri wa Mahusiano ya Kimataifa Lindwe Sisulu, Rais wa zamani Thabo Mbeki, miongoni mwa viongozi wengine mashuhuri.

Bi Mandela aliyefariki Aprili 2 akiwa na umri wa miaka 81 alizikwa katika bustani ya Four Way Memorial jijini Johannesburg.

Hapo ndipo mjukuu wake, Zenani Mandela alizikwa mnamo 2010 alipofariki baada ya kugongwa na gari.

Kumwakilisha rais kwenye hafla hiyo muhimu ya kitaifa kunaonekana kuwa sehemu ya matunda ya ushirikiano wa Bw Odinga na Bw Kenyatta, ambaye alikuwa mpinzani wake mkuu kwenye Uchaguzi Mkuu wa Agosti 8 mwaka jana.

Lakini tangu wasalimiane hadharani Machi 9 mwaka huu, mambo yamebadilika.

  • Apr 16, 2018

Malori yenye magunia 330 ya makaa yanaswa

Na OSCAR KAKAI

MAAFISA wa misitu na wa serikali ya kaunti wamenasa malori matatu yakisafirisha magunia 330 ya makaa mjini Kacheliba, kaunti ya Pokot Magharibi.

Malori mawili ambayo yalikuwa yakihusika na biashara hiyo kinyume na sheria yenye nambari za usajili KXF 25 L, KBJ 608 Q, kwa sasa yako katika ofisi za huduma ya misitu mjini Kapenguria huku moja limekwama barabarani eneo la Kacheliba baada ya kuharibika likiwa njiani kutokana na mvua kubwa inayonyesha katika eneo hilo.

Afisa anayesimamia misitu katika kaunti, Bw Allan Ongere, alisema maafisa waliokuwa wakishika doria walinasa malori hayo kufuatia agizo la siku tisini la serikali kusimamisha ukataji miti ili kuokoa misitu nchini.

Bw Ongere alisema kuwa watu sita ambao wanahusika na biashara hizo za makaa wamejisalimisha na watapelekwa mahakamani leo Jumatatu.

“Madereva wa malori hayo walihepa baada ya kuvamiwa na maafisa lakini wenye malori hayo wamejisalimisha kwetu. Maafisa wa misitu wanalinda lori moja ambalo limekwama,” alisema.

Akiongea na Taifa Leo kwa njia simu, afisa wa Mazingira na Maliasili katika kaunti hiyo, Bw Peter Adoki, alisema kuwa walisimamisha malori hayo ambayo yalikuwa yakibeba makaa kutoka eneo la Kanyerus kuelekea mjini Kisumu wakiwa kwenye msako kisha wakayashika.

“Tuliwavamia baada ya kuona malori hayo yakiwa yamebeba makaa. Askari wa akiba na machifu walitusaidia kushika malori hayo,” alisema.

Bw Adoki alisema kuwa watu wengine kumi wamenaswa eneo la Kanyarkwat na askari wa akiba wakisafirisha magunia 34 ya makaa baada ya kupashwa habari na wakazi.

Afisa huyo aliwaonya wakazi kuhusu ukataji wa miti na uchomaji wa mkaa kwenye misitu ya serikali kwenye kaunti hiyo akisema kuwa wale watapatikana watakabiliwa na mkono wa sheria.

“Serikali imesimamisha uchomaji wa makaa na hatutaruhusu mtu yeyote kukata miti kiholela sababu tutanatekeleza agizo hilo. Wiki mbili ambazo zimepita tumeshika lori tatu zikisafirisha mbao na hatutacheka na wale ambao wanaharibu miti.

Alisema kuwa biashara za makaa zinafaa kusimama kwa wakati huu hadi muda wa agizo kuisha Mei 2.

“Kama serikali ya kaunti tutatoa mwelekeo baada ya tarehe hiyo lakini hatutaruhusu biashara ya makaa isipokuwa ya kutumika nyumbani. Kwa sasa tunakuwa wakali kwa wale wanaenda kinyume na agizo la siku tisini kuhusu ukataji miti,” alisema Bw Adoki.