Mifupa ya binadamu iliyopatikana shambani yapelekwa mochari

Na RICHARD MUNGUTI

MIFUPA ya binadamu iliyookotwa katika shamba moja erneo la Ugunja Ijumaa ilipelekwa katika chumba cha kuhifadhia maiti cha hospitali ya kaunti ya Siaya na Polisi.

Iliwachukua maafisa wa Polisi siku mbili kuiondoa mifupa hiyo baada ya kufahamishwa na wakazi wa kijiji cha Mundindi.

Iliwabidi wakazi hao kustahimili huku polisi wakiiondoa mifupa hiyo iliyoaminika kuwa ya mwanaume.

Kujikokota huko kwa polisi kufika mahala palipokuwa na mifupa hiyo kuliwakera wanakijiji.

Kulingana na mkazi Bw Antony Odero , mifupa hiyo ilipoonekana karibu na mto Woruoya ikiwa imefunikwa na shati , chifu pamoja na maafisa walienda mahala hapo na kuondoka bila kuchukua hatua.

Shirika la habari nchini KNA lilipozugumza na Afisa mkuu wa Polisi Bw Samuel Koskei kuhusu tukio hilo , alithibitisha kwamba mifupa ya binadamu ilikuwa imeonekana.

Bw Koskei alisema maafisa wa uchunguzi walipelekwa kijijini humo na kuiondoa mifupa hiyo na kuipeleka chumba cha kuhifadhia maiti katika hospitali ya kaunti ya Siaya.

Uchunguzi umeanzishwa.

Polisi kukamatwa kutoa ushahidi katika kesi ya ugaidi

Na RICHARD MUNGUTI

MAHAKAMA moja ya Mombasa Ijumaa iliamuru maafisa wawili wa polisi kutoka kitengo cha kupambana na ugaidi watiwe nguvuni kwa kukosa kufika kortini kutoa ushahidi dhidi ya wanawake wanne wanaokabiliwa na shtaka la kuwa wanachama wa kundi la magaidi wa Al Shabaab.

Akitoa kibali cha kuwakamata , hakimu mkuu Bw Evans Makori alisema amekuwa akiwatahadharisha maafisa wa polisi wanaochunguza kesi dhidi ya kuzembea kazini mwao.

“Maafisa wa polisi wanaochunguza kesi kaunti ya Mombasa wamekuwa mwimba katika utenda kazi wa mahakama na wahusikao sharti waadhibiwe,” alisema Bw Makori.

Hakimu huyo alisema mara nyingi kesi zimekuwa zikitupiliwa mbali kutokana na sababu za maafisa wa polisi waliochunguza kesi kufika kortini kutoa ushahidi ama kukosa kuwasilisha ushahidi.

Alisema uzembe wa maafisa wanaochunguza kesi wa kutowasilisha ushahidi ni njia moja ya kuvuruga  utenda kazi wa mawakili, kuwatesa washukiwa na vile  kusababisha mahakama kuchelewesha kuamua kesi katika muda unaofaa.

“Namwamuru afisa anayesimamia kitengo cha ATPU eneo la Pwani Bw Charles Ogeto awakamate na kuwafikisha kortini Koplo Samuel Ouma na Konstebo Fogat Abdi waeleze sababu ya kutotoa ushahidi dhidi ya washukiwa hawa wanne,” hakimu aliamuru.

Bw Makori pia alimwagiza OCPD Mombasa asaidie katika kutiwa nguvuni kwa maafisa hao wawili wa polisi.

Maafisa hao walikuwa wanatarajiwa kutoa ushahidi katika kesi dhidi ya Bi Ummulkheir Sadri Abdalla , Bi Khadija Abubakar Abdulkadir, Bi Maryam Said Aboud na Bi Halima Adan wanaoshtakiwa kuwa wanachama wa Al-Shabaab.

Wasiomtambua Mungu walaani mwanamke kupigwa kofi

NA PETER MBURU

Muungano wa watu wasitambua uwepo wa Mungu nchini (Atheists In Kenya) umeghadhabishwa na kitendo cha mwanamume kutoka kaunti ya Nyeri kumzaba kofi afisa wa kike wa tume huru ya uchaguzi na mipaka (IEBC), na umeapa kufuatilia suala hilo hadi haki itendeke.

Katika video inayosambaa mitandaoni, mwanamume huyo anayedaiwa kuwa wa kikundi cha mbunge wa Mathira Rigathi Gachagua anaonekana akimzaba kofi mwanamke huyo, baada ya makibiliano ya maneno kwa muda kuhusiana na uchaguzi mdogo wa wodi ya Ruguru.

Mbunge huyo alifika katika kituo kimoja cha kupigia kura akidai kuwa baadhi ya maafisa wa IEBC walikuwa wafuasi wa mmoja wa wapiganiaji wa kiti cha uwakilishi wa wodi hiyo.

Kufuatia kitendo hicho cha aibu, muungano wa AIK ulighadhabika na kutoa taarifa kwa vyombo vya habari, ambayo pia ilichapishwa kwenye ukurasa wao wa facebook, kulaani kitendo chenyewe.

Kwenye habari hiyo iliyo na jina Daisy Siongok kama naibu wa rais wa muungano wa AIK, wanasisitiza kuwa hawataruhusu haki za wanawake kudhalilishwa.

“Kitendo hicho ni dhuluma ya kijinsia na ni kukiuka haki za binadamu. Ni kitendo cha kupingika na kukatalika katika kila jamii iliyostaarabika,” ikasema habari yao.

“Imejulikana kuwa dhuluma kama hii ya jinsia imejikita katika taasubi zetu za kiume na tamaduni potovu zinazokubali dhuluma dhidi ya wanawake- haswa kutoka kwa wanaume. Hata baada ya kitendo hicho, polisi hawakuchukua hatua mara moja kumkamata mhalifu,” akasema Bi Siongok.

Muungano uliahidi kufuatilia suala hilo hadi mwisho wake, ili kuhakikisha kuwa mwanamke aliyedhulumiwa amepata haki yake.

“AIK inasimama kulaani kila aina ya dhuluma dhidi ya wanawake,” ikamalizia habari yao.

Hii, hata hivyo ilikuwa baada ya mtuhumiwa wa kitendo hicho kukamatwa na kufikishwa kortini.

JAMVI: Ni pata potea kwa wafuasi wa seneta Moi huku akisalia kimya kuhusu 2022

Na LEONARD ONYANGO

KIMYA kirefu cha Seneta wa Baringo, Gideon Moi, kuhusiana na ikiwa atawania urais 2022 kimewaacha wengi na maswali huku hasimu wake wa kisiasa, Naibu wa Rais William Ruto tayari akianza kampeni za mapema.

Japo kuna dalili kwamba Bw Moi atawania urais, hatajitokeza wazi kuelezea azma yake tangu kumalizika kwa uchaguzi mkuu wa Agosti, mwaka jana.

Akizungumza katika Kanisa la Full Gospel, Kabarnet mwezi uliopita, Bw Moi aliwataka wafuasi wake kuwa na subira huku akisema atatangaza msimamo wake kuhusiana na kinyang’anyiro cha urais 2022 hivi karibuni.

Bw Moi alisema yuko tayari kufanya mazungumzo na kiongozi yeyote kuhusiana na siasa za 2022.

“Wakati wa siasa haujafika lakini utakapotimia, nitawatangazia msimamo wangu. Kila mmoja ni rafiki yangu na niko tayari kufanya mazungumzo kuhusu uwezekano wa kubuni muungano wa kisiasa,” akasema Bw Moi.

Bw Moi alikuwa ametangaza kuwania urais katika uchaguzi uliopita lakini baadaye akabadili msimamo baada ya familia ya Rais Uhuru Kenyatta kukutana na baba yake, Rais Mstaafu Daniel Arap Moi.

Matokeo ya utafiti wa shirika la Ipsos yaliyotolewa mwezi uliopita yalionyesha kuwa,  Naibu wa Rais Ruto anaongoza kwa umaarufu ikilinganishwa na Bw Moi.

Utafiti huo ulionyesha kuwa, asilimia 30 ya Wakenya wanaunga mkono Bw Ruto huku asilimia 14 wakiunga Bw Moi. Utafiti huo pia ulionyesha kuwa umaarufu wa Gavana wa Mombasa Hassan Joho ambaye ametangaza kuwania urais na kinara wa ODM Raila Odinga ni sawa na wa Bw Moi.

Bw Moi amekuwa akiidhinishwa kuwania urais na viongozi mbalimbali kutoka Bonde la Ufa  na maeneo mengineyo ya Kenya.

Kiongozi wa hivi karibuni kuidhinisha Bw Moi ni mbunge wa Lurambi, Askofu Titus Khamala.  Mwanasiasa huyo aliyekuwa akizungumza katika eneo la Chemolingot wiki iliyopita alisema, Bw Moi ni mwana wa rais mstaafu sawa na Rais Kenyatta, hivyo hafai kushutumiwa kwa kuwania urais 2022.

Ziara ya Bw Odinga nyumbani kwa Rais Mstaafu Moi katika eneo la Kabarak pia ilifasiriwa kama mikakati ya kiongozi huyo wa upinzani kumuunga mkono, Bw Gideon Moi 2022.

Alhamisi, Bw Odinga alisema alienda kumjulia hali Rais Mstaafu baada ya kuondoka hospitalini ambapo alilazwa akitibiwa goti lake mwezi Machi.

Hata hivyo, wadadisi wa masuala ya kisiasa wanasema huenda siasa za 2022 zilikuwa ajenda kuu ya mkutano baina ya Bw Odinga na Rais Mstaafu Moi.

“Tangu Bw Odinga alipokubali kufanya kazi na Rais Kenyatta, amekuwa akikutana na viongozi ambao wanakinzana na Bw Ruto kisiasa kama vile gavana wa zamani wa Kiambu William Kabogo, Bw Moi kati ya wengineo.

Hiyo inaweza kufasiriwa kuwa kuna mipango inayoendelea chini kwa chini ili kumpiku Bw Ruto,” asema Bw George Mboya ambaye ni mdadisi wa masuala ya kisiasa.

Kulingana na Bw Mboya, hatua ya Bw Ruto kutokutana na Bw Odinga tangu alipokubali kuunga mkono serikali ya Jubilee pia ni ishara kwamba anashuku muafaka baina ya Rais Kenyatta na kiongozi huyo wa Upinzani.

 

‘Salamu haina umaarufu’

Waandani wa Bw Ruto, wakiongozwa na Kiongozi wa Wengi Bungeni Aden Duale, walipuuzilia mbali mkutano huo baina ya Bw Odinga na Rais Mstaafu Moi wakisema hautasaidia kujipatia umaarufu kwa ajili ya uchaguzi wa 2022.

Lakini Bw Mboya anaonya kuwa iwapo Bw Moi atachelewa kutangaza msimamo ikiwa atawania urais 2022, huenda akapata mwana si wake, haswa ikizingatiwa kwamba, tayari Bw Ruto ameanza kampeni zake za urais 2022.

Rais Kenyatta amejipata katika njiapanda ikiwa atalipa deni la Rais Mstaafu Moi aliyemuingiza katika siasa au ataunga naibu wake 2022.

Wandani wa Bw Ruto wamekuwa wakisisitiza kuwa Rais Kenyatta ndiye atakuwa kiongozi wa kampeni za naibu wake. Lakini kiongozi wa nchi amesalia kimya kuhusiana na siasa za 2022.

Bw Ruto amekuwa akikutana na viongozi kutoka maeneo mbalimbali ili kujitafutia uungwaji mkono.

Alhamisi, Bw Ruto alikutana na viongozi wa kidini kutoka eneo la Kati katika Kanisa la Anglikana mjini Kiambu. Karibu kila siku, Bw Ruto amekuwa akikutana na viongozi kutoka kaunti mbalimbali katika afisi yake mtaani Karen, Nairobi.

Bw Ruto pia amekuwa akizuru maeneo mbalimbali kama vile Kati, Magharibi na Pwani ili kujitafutia uungwaji mkono.

 

Hakuna deni

Na alipokuwa akizungumza wakati wa sherehe yake ya kurejea nyumbani tangu kuchaguliwa Agosti 8, 2017, mwanawe Rais Mstaafu Moi, Raymond Moi, alisema jamii ya Wakikuyu haina deni la Bw Ruto na haitampigia kura 2022.

Bw Raymond ambaye ni mbunge wa Rongai, Kaunti ya Nakuru, alisema nduguye Gideon ndiye atamrithi Rais Kenyatta 2022.

Alisema Mzee Moi alilipa deni la kisiasa kati ya jamii ya Wakalenjin na Wakikuyu alipomteua Rais Kenyatta kuwania urais 2002 bila mafanikio kupitia chama cha Kanu.

Bw Raymond Moi alimtaka Naibu wa Rais Bw Ruto kutotarajia kuungwa mkono na jamii ya Wakikuyu 2022.

“Nasikia baadhi ya watu wakisema kuwa jamii ya Wakikuyu inadaiwa na Wakalenjin. Hakuna deni. Mzee Jomo Kenyatta alipokuwa rais, Mzee Moi ndiye alikuwa naibu wake na alimsaidia kumwandalia uwanja kuwa rais. Mzee Moi pia alimwandaa Rais Uhuru Kenyatta kuwa rais,” akasema Bw Raymond.

 

JAMVI: Mkono fiche wa mabilionea unaomtetemesha Sonko jijini

Na WYCLIFFE MUIA

KWA mara nyingine, Gavana wa Nairobi, Mike Sonko amemkabili vikali Katibu katika Wizara ya Usalama wa Ndani, Karanja Kibicho huku ikiaminika kuwa mabwenyenye kutoka Mlima Kenya ndio wanatashia kuangusha utawala wa Sonko jijini. 

Wadadisi wanasema wafanyabiashara wakuu jijini, hasa kutoka Mlima Kenya pamoja na wanasiasa kadhaa kutoka chama cha Jubilee wanahisi Bw Sonko anaendesha masuala ya kaunti bila kuwahusisha ilhali wamewekeza mabilioni ya pesa jijini humo.

“Bw Kibicho ni kipaza sauti tu cha watu wenye ushawishi kutoka Mlima Kenya ambao wanahisi kupuuzwa na uongozi wa Sonko. Uteuzi wa naibu gavana wa Nairobi ndio umesababisha kupanda kwa joto katika City Hall,” anasema Prof Herman Manyora, mhadhiri wa maswala ya kisiasa katika Chuo Kikuu cha Nairobi.

 

Madai ya Sonko ni kweli

Kwa mujibu wa Prof Manyora, kauli ya Sonko kuwa kuna baadhi ya viongozi wa Mlima Kenya wanaokutana usiku kupanga njama ya ‘kumruka’ Naibu Rais William Ruto ifikapo 2022, huenda ilikuwa ya kweli kutokana na hisia za kisiasa zinazotoka Mlima Kenya.

“Sonko ana habari zake za kijasusi ambazo amewekeza pesa nyingi. Haitakuwa ajabu watu anaowashutumu kwa kuvuruga utendakazi wake ndio wanaongoza mikutano hiyo,” anaongeza Prof Manyora.

Katika mahojiano na Kameme FM, Sonko alidai Bw Kibicho na maafisa wengine watatu wakuu serikalini wanaongoza kampeni za jamii ya Agikuyu kumtema Bw Ruto kuelekea 2022.

“Kwa sasa nitafichua watu wawili wanaolenga kumhujumu Ruto: Kibicho na Nancy Gitau. Kuna wengine ambao nitawataja baadaye,” Sonko aliambia gazeti moja.

Hata hivyo, Bw Kibicho alikanusha madai hayo akisema kama mkuu wa ujasusi nchini hana habari kuhusu mikutano hiyo ya usiku.

“Ambieni Sonko akome na akabiliane na watu anaotaka kukabiliana na wao kisiasa lakini si kupitia kwangu. Mimi si mwanasiasa na siwezi kuanza kupiga vita naibu rais,” alisema Bw Kibicho.

Kibicho anasema tofauti zake na Sonko zilianza baada ya kumwamrisha atoe bendera ya taifa katika gari lake.

“Ukianza kuzama, unatafuta vitu vya kujishikilia hata vile dhaifu…ambieni Sonko asafishe jiji na aachane na mimi,” alisema Bw Kibicho.

 

Igathe alitetea Jubilee

Masaibu ya Gavana Sonko yanasemekana kuchacha zaidi baada ya aliyekuwa naibu wake Polycarp Igathe kujiuzulu.  Bw Igathe alionekana kuwakilisha na kutetea maslahi ya mabwenyenye wa Mlima Kenya pamoja na wakuu wa chama cha Jubilee.

Ni wakati huo ambapo Sonko, kupitia mtandao wake wa Facebook alidokeza mpango wake wa kutaka kujiuzulu kutokana na ‘changamoto nyingi zinazomkumba.’

“Mjue hii kazi imekuwa ngumu na iko karibu kunishinda. Na sio mambo ya bendera. Hizo nimekubali kutoa kama nilivyoshauriwa na Bw Kibicho lakini nitawaambia hivi karibuni ni kwa nini nataka kung’atuka mnishauri,” taarifa iliyochapishwa katika Facebook yake ilinukuu.

Baadaye, Sonko alipuuzilia mbali taarifa hiyo akishutumu vyombo vya habari kwa kusambaza propaganda.

Miongoni mwa watu waliotajwa kwa kushawishi uteuzi wa Bw Igathe ni pamoja na mwenyekiti wa benki ya Equity Peter Munga, naibu mwenyekiti wa chama cha Jubilee David Murathe na mmoja wa mshauri wa Rais Uhuru Kenyatta kutoka Ikulu.

Mfanyabiashara Chris Kirubi ambaye alikataa nafasi ya kuwa mshauri wa Sonko vilevile alisemekana kuwa na ushawishi mkubwa katika uteuzi wa Bw Igathe.
Wafanyabiashara hao wanatoka Kaunti ya Murang’a.

 

Wawekezaji wa Murang’a

Mbunge wa Kiharu, Irungu Kang’ata anasema kuondoka kwa Igathe kulipangua mipango ya chama cha Jubilee jijini na sharti nafasi yake ichukuliwe na mtu kutoka eneo la Kati.

“Sisi watu wa Murang’a tumewekeza sana Nairobi na hata kuna mtaa unaofahamika kama ‘Murang’a ndogo’ jijini. Ni muhimu tupate mwakilishi katika usimamizi wa kaunti ya Nairobi,” alinukuliwa Bw Kang’ata.

Mchanganuzi wa kisiasa Martin Andati asema Mlima Kenya walimuunga mkono pakubwa Peter Kenneth katika ugavana wa Nairobi 2017 lakini umaarufu wa Sonko ulilazimu apewe tiketi ya Jubilee, hivyo bado hawana Imani na uongozi wake.

“Walikuwa wanataka mtu atakayechunga biashara zao lakini Sonko anaonekana kubomoa hata makundi haramu ya kibiashara jijini ili kuokoa mabilioni ya pesa zinazoishia kwa mikono ya watu wachache,” alisema Bw Andati.

Kulingana na Bw Andati, iwapo Gavana Sonko atawania tena ugavana, huenda hatatumia chama cha Jubilee.

Tayari Sonko, amefichua kwamba atachagua mwanamke mtaalamu kutoka jamii ya Wakikuyu kuchukua mahali pa Igathe.

 

Ushirikiano na Wakikuyu

“Ninajua nafasi ya naibu gavana inafaa iende kwa Mkikuyu kwa sababu wengi wao waliniunga mkono, lakini nataka niwe huru kumchagua Mkikuyu nimtakaye,” alisema Sonko.

“Nimeshirikiana vyema na Wakikuyu tangu 2010 ambapo walinipigia kura kwa wingi nikiwa Mbunge wa Makadara. Mnamo 2013, pia walinipigia kura kuwa seneta na baadaye nikawa gavana. Wao hawana ukabila na kama wangekuwa wakabila, singekuwa gavana,” akasema.

Miongoni mwa wanawake ambao wamekuwa wakisemekana kuwa kwenye orodha yake ni aliyekuwa Mbunge wa Starehe, Bi Margaret Wanjiru, gwiji wa kibiashara, Bi Agnes Kagure, na aliyekuwa Mwakilishi wa Kaunti ya Kiambu, Bi Ann Nyokabi.

Kutokana na matamshi yake, kuna uwezekano mkubwa kuwa atamchagua Bi Kagure (mzaliwa wa Nyeri) au Bi Nyokabi kwani wengine waliobaki hawajaafiki vigezo alivyoyataja.

Inadaiwa Ikulu pamoja na wafanyabiashara wakuu kutoka Murang’a wanashinikiza kuteuliwa kwa Bi Nyokabi ambaye ni binadmu wa Rais Kenyatta. Hata hivyo Sonko anapendelea Bi Kagure kwa kuwa hana ushawishi mkubwa wa kisiasa, hasa kutoka Mlima Kenya.

Waiguru ataka Bi Ngirici na mumewe wakamatwe

NICHOLAS KOMU na JOSEPH WANGUI

GAVANA wa Kirinyaga Anne Waiguru amewataka polisi wamkamate Mwakilishi wa Wanawake katika kaunti hiyo, Wangui Ngirici na mumewe Andrew Ngirici.

Gavana huyo anawashutumu wawili hao kwa madai ya kuwalipa vijana kumpigia kelele wakati Naibu Rais William Ruto alipofanya ziara Kerugoya.

Bi Waiguru alisema wawili hao walisababisha machafuko yaliyomzuia kuhutubia wakazi wa eneo hilo.

Akizungumza wakati wa mkutano na wanahabari mjini Sagana, gavana huyo alilalamika kuwa baadhi ya wafuasi wake walikamatwa kuhusiana na kisa hicho.

“Nimewataja wawili kuwa wahusika wakuu katika kisa hicho. Polisi wameanza kukamata washukiwa ambao hawakuhusika. Wawili hao waliwalipa vijana kadhaa waliokuwa wamejihami kwa visu ili kuhofisha watu na kutatiza mkutano,” alisema gavana huyo.

“Polisi wanafaa kuambia wakazi ikiwa wawili hao hawawezi kunaswa kwa sababu ya pesa zao.”

Mapema kupitia kwa taarifa katika vyombo vya habari, gavana huyo aliomba msamaha kuhusiana na kisa hicho cha Ijumaa, na kusema lengo lake kuu lilikuwa ni maendeleo na sio siasa.

“Hatua hiyo haikuwa tu ya kibinafsi lakini pia ya kishenzi,” alisema Bw Waiguru.

Msimamizi huyo wa kaunti alipigiwa kelele na baadhi ya vijana wakati wa uzinduzi wa barabara ya kilomita 100 ya Gakoigo kuelekea Njega, Kirinyaga ya kati, katika hafla iliyokuwa ikiendeshwa na Naibu wa Rais William Ruto.

Wakazi wa eneo hilo walimpigia kelele huku tofauti za kisiasa kati ya viongozi eneo hilo zikijitokeza hadharani.

Hotuba ya Bw Ruto ilitatizwa kwa muda mfupi eneo la Kerugoya huku vijana wakiitisha kuondoka kwa gavana huyo kwa kibwagizo: “Waiguru must go.”

 

Hospitali yakataa kuachilia maiti ikazikwe

Na SHABAN MAKOKHA

FAMILIA moja katika eneo la Lurambi kaunti ya Kakamega inaomba msaada wa zaidi ya Sh2.3 milioni kulipia gharama za matibabu ya hospitali na ada ya mochari ndipo ikubaliwe kuchukua mwili wa jamaa yao na kuuzika.

Mwili wa Vincent Khashiya unazuiliwa katika hospitali moja mjini Eldoret.

Hospitali hiyo imekataa kuruhusu familia ya Khashiya kuchukua maiti yake hadi pale gharama za hospitali zitakapolipwa.

Familia ya marehemu imeshindwa kabisa kupata pesa za kulipa hospitali hiyo.

Mjane wa marehemu Bi Vivian Mwandi ametoa wito kwa Gavana Wycliffe Oparanya wa Kakamega, Seneta Cleophas Malala, Mbunge wa Lurambi Bw Titus Khamala kuwasaidia kulipa gharama za hospitali na za Mochari.

Khashiya alilazwa katika hospitalini mnamo Februari 10.

Aliaga dunia baada ya wiki mbili akiendelea kupokea matibabu ya Saratani ya damu.

Mama yake mwendazake Bi Margaret Ingato alisema kila juhudi imefanywa kupata pesa hizo lakini mambo yamegonga mwamba.

Gharama ya hospitali ni Sh2.3 milioni nayo ada ya mochari ni Sh50,0000.

Bi Ingato alisema hospitali inawataka walipe Sh1.5 milioni pesa tasilimu kisha wawasilishe hati ya umiliki wa shamba ama kitabu cha umiliki wa gari ndipo wakubaliwe kuondoa mwili wakauzike.

Hazina ya kitaifa ya bima ya afya (NHIF) imewalipia Sh200,000.

 

Ruto ajikumbusha maisha ya ‘uhasla’

DPPS na BERNARDINE  MUTANU

NAIBU Rais William Ruto Jumamosi alijikumbusha siku za kuwa ‘hasla’ kwa kutembelea Kambi Kuku mjini Eldoret, Uasin Gishu.

Akiwa kijana, Bw Ruto alikuwa mfanyabiashara katika soko hilo akiwauzia kuku waendeshaji magari.

Alifika sokoni humo kuzindua mnada wa kuku, ambao ni mradi wa kipekee nchini.

Kila hadithi maishani ina mwanzo na thamani ya hadithi ni umbali aliofika mtu kutoka mwanzoni. Tofauti hiyo ndio watu hutumia kuelezea ufanisi maishani. Kwa Bw Ruto, mwanzo haukuwa mwema.

Angeamka asubuhi na kwenda sokoni humo kuuzia waendeshaji magari kuku katika soko hilo ambalo halikuwa la kudumu katika barabara ya Eldoret kuelekea Malava.

Jumamosi, kiongozi huyo alizuru eneo hilo, ambako alitangamana na wauzaji wa kuku na kusikiliza hadithi zao kabla ya kuzindua mnanda wa kuku kwa lengo la kuuza kuku wao kwa bei bora.

Bw Ruto alisema uzinduzi wa mnada eneo hilo ambako alipata jina ‘hustler’ ilikuwa ni njia ya kuimarisha biashara miongoni mwa vijana na makundi ya kina mama.

Mnanda huo ulichangisha Sh6 milioni kwa kuwaleta wafugaji wa kuku wadogo kutoka Jua Kali, Turbo na maeneo yaliyo karibu pamoja ambapo kuku 5,000 waliuzwa, kila mmoja kwa Sh1, 200.

Akihutubia wafanyibiashara, Bw Ruto alisema serikali ya kaunti itasaidia wafugaji wa kuku eneo hilo kuunda chama cha ushirika.

Aliandamana na wabunge na viongozi wengine akiwemo Waziri wa Kawi Charles Keter na Seneta Kipchumba Murkomen.

Aliwashauri wakazi kuwekeza katika ufugaji wa kuku ili kuimarisha maisha yao na kuongeza kuwa ufugaji wa kuku ilikuwa nafasi nzuri ya wanawake na vijana kujiimarisha kimapato na kuondokea umaskini.

Ruto atengwa kuhusu marekebisho ya katiba

Na BERNADINE MUTANU

NAIBU RAIS William Ruto Jumamosi aliendelea kutengwa kwa upinzani wake kwa mapendekezo ya kufanyia marekebisho Katiba iliyopitishwa 2010.

Jumamosi, Muungano wa vyama vya wafanyakazi (COTU-K) ulimwambia Bw Ruto abadili msimamo wake na badala yake awe katika mstari wa mbele kuunga mkono marekebisho kwa lengo la kuhakikisha uwakilishi mpana serikalini.

COTU iliungana na Kanisa Katoliki ambalo Askofu Mkuu Kadinali Njue amesema marekebisho ya Katiba ni muhimu katika kuleta maridhiano ya kitaifa. Muungano wa Makanisa (NCCK) pia umekuwa ukihimiza marekebisho.

Kiongozi wa ANC, Musalia Mudavadi mnamo Ijumaa aliunga mkono marekebisho akisema kuna haja ya kuwa na mfumo wa utawala unaojumuisha wengi.

Wengine ambao wanaunga mkono marekebisho ni kinara wa ODM Raila Odinga ambaye washirika wake wa karibu wametangaza wazi msimamo wao na magavana Alfred Mutua (Machakos) na Wycliffe Oparanya (Kakamega).

Akiongea wakati wa mkutano na wasimamizi wa wafanyikazi, Katibu Mkuu Francis Atwoli alisema muungano huo unataka marekebisho ya Katiba kwa lengo la kuongeza nafasi kuu serikalini.

Alisema marekebisho hayo yanafaa kubuni nafasi ya rais na manaibu kadhaa na waziri mkuu na manaibu wake, kwa lengo la kuzima joto la kisiasa nchini.

“Walete hiyo Katiba turekebishe. Bw Ruto anastahili kujua kuwa anaweza tu kuongoza taifa hili ikiwa kuna amani. Anafaa kuwa katika mstari wa mbele kupigia debe marekebisho ya Katiba,” alisema Bw Atwoli, na kumuonya kuwa ikiwa hataunga mkono azimio hilo, huenda akajipata pabaya.

Wikendi iliyopita, Bw Ruto alipuzilia mbali mjadala kuhusu marekebisho ya Katiba akisema hatua hiyo haifai kwani inalenga kunufaisha watu wachache.

Imeonekana kinaya kwa Bw Ruto kupinga marekebisho ikizingatiwa alikuwa mpinzani mkuu wa Katiba iliyopitishwa 2010, ambapo alikuwa akisisitiza ilikuwa na dosari zilizofaa kurekebishwa kabla ya kuipitisha.

Mapema wiki hii, Bw Ezekiel Njeru aliwasilisha ombi kwa Bunge akihimiza marekebisho. Spika Justin Muturi alisema ombi hilo lilikuwa na uzito uliofaa kutiliwa maanani na akaitaka Kamati ya Sheria kulitathmini na kuwasilisha ripoti katika muda wa siku 60.

 

Kupunguza gharama

Kiongozi huyo wa COTU alisema sababu ya kuunga mkono marekebisho ya Katiba pia ni kupunguza idadi kubwa ya wabunge, ili kupunguza gharama, hasa katika ulipaji wa mishahara na marupurupu, pamoja na kubadilisha sheria za uchaguzi.

“Kenya ni yetu sisi wote, lazima tubadilike jinsi mambo yanavyozidi kubadilika,” alisema Bw Atwoli.

Wakati huo huo, COTU ilimtaka Waziri wa Leba Ukur Yattani “kutopotoshwa” na wanasiasa kuunga mkono mabadiliko ya sheria kuhusu bodi ya Hazina ya Kitaifa ya Malipo ya Uzeeni (NSSF).

“Ikiwa sheria kuhusu itabadilishwa, COTU itaenda mahakamani kutafuta haki, ikiwa mahakama itashindwa kabisa, tuko tayari kuunda hazina yetu ya pensheni,” alisema.

Chama hicho kinapinga mabadiliko yoyote katika hazina hiyo kwa kusema yanalenga kuibua usimamizi mbaya, wizi na uharibifu wa fedha za wafanyakazi.

Pia, muungano huo ulipinga marekebisho ya kifungu cha katiba kinacholinda migomo ya wafanyikazi na mikataba ya mishahara na marupurupu.

Alisema mabadiliko hayo yanahitaji marekebisho ya Katiba kupitia kwa kura ya maamuzi lakini sio kupitia Bungen kama wanavyopendekeza baadhi ya wanasiasa.

Muungano huo uliitaka serikali kutathmini uwezo wa Shirika la Bima la Afya (NHIF) kuchukua kiwango kikubwa cha fedha katika mradi wa bima kwa wanafunzi, kwa kusema huenda shirika hilo likatumiwa kuiba fedha za umma.

Wakati huo, aliitaka serikali kuwaruhusu maafisa wa polisi kuunda chama cha kuwatetea.

Mfalme wa Swaziland abadili jina la taifa hilo hadi eSwatini

MBABANE, SWAZILAND

Mfalme Mswati wa Swaziland amebadilisha jina la taifa kuwa eSwatini.

“Ninataka kutangaza kuwa Swaziland itarudia jina lake la awali Eswatini,” alitangaza Alhamisi wakati wa sherehe za kuadhimisha siku yake ya kuzaliwa, na miaka 50 baada ya taifa hilo kupata uhuru kutoka kwa Uingereza.

“Mataifa ya Afrika baada ya kupata uhuru yalirejea kutumia majina yao ya awali kabla ya ukoloni. Hivyo kuanzia leo taifa hili litaanza kuitwa Ufalme wa eSwatini,” aliongeza.

Taifa hilo ndogo sana kusini mwa Afrika lilipata uhuru 1968 baada ya kutawaliwa na Uingereza. Lakini halikubadilisha jina lake kama mataifa mengine yalivyofanya.

Jina hilo linamaanisha “eneo la Swazi”, hivyo, eSwatini ni jina la taifa hilo kwa lugha ya Swazi.

Jina Swaziland liliwaudhi baadhi ya raia kwa sababu lilitokana na mchanganyiko wa lugha za Swazi na Kiingereza.

Hatua hiyo ilikuwa imejadiliwa kwa miaka kadhaa. Mwaka wa 2015, wabunge walitathmini suala hilo kwa kina.

Mfalme Mswati alitumia jina hilo mpya katika hotuba rasmi za awali.

Mfalme huyo aliyepewa mamlaka 1986 akiwa na miaka 18 kuambatana na tamaduni na ni taifa la kipekee Afrika kuongozwa na mfalme.

Tangu 1973, Swaziland imepiga marufuku vyama vya kisiasa kushiriki uchaguzi, ingawa vingalipo.

Ili kuwania wadhifa wa kisiasa, wawaniaji huwa wanatumia tiketi ya kibinafsi halafu wanaidhinishwa na mfalme kama wabunge.

Taifa hilo ambalo lina watu 1.3 milioni lina asilimia kubwa zaidi ulimwenguni ya virusi vya Ukimwi, ambapo asilimia 27 ya watu wazima wameambukizwa.

Kubadilishwa kwa jina kunamaanisha kuwa katiba ya nchi hiyo pia itaandikwa tena na huenda mabadiliko ya majina yakashuhudiwa katika idara ya polisi ya inayofahamika kam Royal Swaziland Police, jeshi la Swaziland na Chuo Kikuu cha Swaziland.

MAKALA MAALUM: Mama wa Taifa waliojaliwa kuliko wengine duniani

Na FAUSTINE NGILA

MNAMO Aprili 17, 2018, Bi Barbara Pierce Bush, mkewe mmoja wa waliokuwa marais wa Amerika na mama ya rais mwingine, aliyetambulika kwa kupigania elimu kwa wote alifariki dunia nyumbani kwake jijini Houston, akiwa na umri wa miaka 92.

Wakati wa kifo chake, mumewe ambaye ni rais wa zamani wa taifa hilo, George H W Bush, aliyekuwa pembezoni mwa kitanda cha hospitali alikolazwa, alimshika mkono kwa siku nzima kulingana na taarifa iliyotolewa na familia hiyo iliyosema Bw Bush ‘alivunjika moyo.’

Mwanawe Barbara Bush, George W Bush alisema, “Kwetu sisi alikuwa muhimu sana. Mama alitulea vizuri na kutuchekesha hadi kifo chake. Mimi ni mwanamume mwenye bahati sana kuwa mwanawe Mama wa Taifa wa zamani, Barbara Bush. Familia yetu itamkosa sana, na tunawashukuru kwa maombi yenu.”

Tofauti na mama wengi wa taifa duniani, Bi Barbara Bush alibahatika kuwa mume wa rais na pia kumzaa rais.

Mumewe, George H W Bush alikuwa rais wa Amerika kati ya mwaka 1989 hadi 1993 huku mwanawe George W Bush akiongoza taifa hilo kati ya 2001 na 2009.

Lakini si mwanamke huyu pekee aliye na bahati hii ya kipekee duniani. Hapa barani Afrika kuna wanawake wengine pia walioolewa na marais na wanao kuchaguliwa rais. Taifa Leo inaangazia mataifa hayo ambako bado wanawake hao wako hai.

 

  1. Mama Ngina Kenyatta – Kenya

Mamaye Rais wa sasa wa Jamhuri ya Kenya, Bw Uhuru Kenyatta, Mama Ngina Kenyatta, alikuwa mkewe rais mwazilishi wa nchii hii, Mzee Jomo Kenyatta.

Mzee Kenyatta alitawala kuanzia mwaka 1964 hadi kifo chake mwaka 1978. Miaka 35 baadaye, mwanao wawili hao waliyemzaa 1961, Uhuru Kenyatta, alishinda uchaguzi wa urais na kuingia Ikulu hapo 2013. Rais Kenyatta alishinda tena katika Uchaguzi Mkuu wa 2017 na ataongoza hadi 2022, kipindi chake kitakapotamatika.

Rais mwanzilishi wa Kenya, Mzee Jomo Kenyatta akiwa na mkewe Mama Ngina Kenyatta na wanao Uhuru Kenyatta na Muhoho Kenyatta. Picha/ Hisani
  1. Sifa Mahanya – Jamhuri ya Kidemokrasia ya Congo (DRC)

Wakati mama wa taifa wa zamani wa taifa hili, Sifa Mahanya aliolewa na mwanamapinduzi machachari Laurent-Desire Kabila, hakutarajia kamwe kuwa mumewe angekuwa rais kwa wakati mmoja (1997) na mwanawe kuchukua hatamu za uongozi wa taifa hilo lililoko katikati ya Afrika.

Laurent Kabila aliuawa na mlinzi wake Rashidi Muzele alasiri ya Januari 16, 2001 ambaye pia aliuawa kwa kupigwa risasi wakati akijaribu kuhepa makazi ya rais huyo ya Palais de Marbe.

Mwili wake Kabila ulisafirishwa hospitalini nchini Zimbabwe huku serikali ikidai bado alikuwa hai. Hatimaye ilisema alifariki kutokana na majeraha na mwili wake kurejeshwa nchini DRC wiki moja baadaye.

Baada ya siku nane, mwanawe Laurent Kabila na Sifa Mahanya, Joseph Kabila alikabidhiwa mamlaka ya urais. Ameongoza taifa hilo tangu Januari 2001 hadi sasa.

Mama Sifa Mahanya. Picha/ Hisani
  1. Mama Fatma Karume – Zanzibar

Raia wa Uganda John Okello aliongoza mapinduzi ya kipekee yaliyotia kikomo utawala wa waarabu kisiwani Zanzibar, na kumualika mwanasiasa wa kisiwa hicho aliyetambulika zaidi, Abeid Amani Karume kuwa rais mwaka 1964.

Rais Karume alikuwa ashamuoa Bi Fatma Karume na pamoja wakajaliwa watoto wawili wa kiume – Ali Karume na Amani Abeid Karume.

Ingawa rais huyo mwanzilishi aliuawa kwa kupigwa risasi na majambazi wanne wakati akicheza bao katika makao makuu ya chama cha Afro Shiranzi, Zanzibar Aprili ya mwaka 1972, miaka 28 baadaye mwanawe alichaguliwa kuwa rais.

Amani Abeid Karume aliongoza nchi hiyo kutoka Novemba 2000 hadi 2010 mwezi sawa.

Mama Fatma Karume wa Zanzibar. Picha/ Hisani
  1. Patience Dabany – Gabon

Rais wa zamani wa Gabon, El Hadj Omar Bongo Ondimba, anatambulika zaidi hapa barani Afrika kama rais aliyekwamilia mamlaka ya urais kwa muda mrefu zaidi, miaka 42.

Katika kipindi hicho alioa wake watatu – Edith Lucie Bongo (1990–2009), Patience Dabany (1959–1986), Louise Mouyabi Moukala (1955–1959), lakini ni Patience Dabany aliyebahatika zaidi kwa kuwa licha ya kutengana na mumewe 1986, mwanawe, Ali Bongo Ondimba ndiye rais wa sasa wa Gabon baada ya kuingia Ikulu hapo 2009.

Mumewe Dabany aliongoza taifa hilo kutoka 1967 hadi 2009 alipofariki.

Patience Dabany wa Gabon. Picha/ Hisani
  1. Sena Sabine Mensah – Togo

Aliyekuwa rais wa Togo, Gnassingbé Eyadéma alifaulu katika mapinduzi mawili ya kijeshi – Januari 1963 na Januari 1967 na hatimaye kuwa rais Aprili mwaka huo.

Mkewe rais huyo, Sena Sabine Mensah alikuwa Mama wa Taifa kwa miaka 38 hadi kifo cha mumewe hapo Februari 2005 kilichotokana na mshtuko wa moyo jijini Tunis, Tunisia.

Lakini familia hiyo iliendelea kuongoza taifa hilo kwani mwanawe Sena na Gnassingbe, Faure Essozimna Eyadéma aliridhi urais kutoka kwa babake pindi tu baada ye kifo chake 2005. Ametawala hadi sasa.

Rais wa Togo Faure Essozimna Gnassingbe alipoandamana na mama yake, Sena Sabine Mensah katika picha ya pamoja na Papa Francis, katika ziara ya Vatican awali. Picha/ Hisani
  1. Lalla Latifa – Morocco

Mfalme Hassan II aliongoza taifa la Morocco kuanzia 1961 hadi kifo chake 1999. Katika kipindi hicho, alikuwa na wake wawili – Lalla Fatima na Lalla Latifa.

Mnamo Agosti 1964, mfalme huyo na mke wake wa pili, Lalla Latifa, walijaliwa mtoto wa kiume ambaye alichukua hatamu za uongozi wa taifa hilo baada ya kifo cha baba yake mnamo 1999. Amekuwa kiongozi wa nchi hiyo ya uarabuni hadi sasa.

Bi Lalla Latifa wa Morocco. Picha/ HIsani
  1. Ruth Williams Khama – Botswana

Ingawa ashafariki (2002), Mama wa Taifa wa zamani wa Botswana, mzaliwa wa Uingereza Bi Ruth Williams Khama alifurahia fursa ya kuwa muhibu wa rais ambaye pamoja walizaa rais.

Mumewe mama huyo, Seretse Maphiri Khama aliongoza serikali ya Botswana kutoka 1966 hadi 1980. Imeichukua familia hiyo miaka 28 kurudi uongozini kupitia kwa mwanawe Ian Khama aliyetawala nchi hiyo kutoka 2008 hadi mwaka huu.

Marehemu Ruth Williams Khama akiwa na mumewe Seretse Khama katika miaka ya zamani nchini Botswana. Picha/ Hisani

Katika uchanganuzi, mama wawili wa taifa ambao wanao hatimaye walitwaa mamlaka ya urais walikuwa wameolewa kama wake wa pili – Gabon na Morocco.

Pia imezichukua familia mbili miaka 28 kurejea madarakani ya urais – Zanzibar na Botswana. Wanao marais  wa zamani wa nchi nne – DRC, Gabon, Togo na Morocco waliridhi urais kutoka kwa baba moja kwa moja.

Yaya ajuta kugeuza nyumba ya mdosi kuwa danguro

Na SAMMY WAWERU

FREE AREA, NAKURU

Yaya aliyekuwa akifanya kazi kwa mama mmoja mtaani hapa, anajuta baada ya kupigwa kalamu kwa kuhangaisha wanaume.

Duru zinasema mwanadada huyo aliajiriwa Desemba 2017 ili kumsaidia bosi wake aliyejifungua.

Mama huyo alirejea kazini mwezi uliopita, na kipusa amekuwa akialika wanaume tofauti kwa mwajiri wake.

Kulingana na mdaku wetu  hata kazi aliyoajiriwa kufanya ilimshinda sababu alikuwa bize akipokea wageni.

“Kidosho mwenyewe ni mrembo ma huvalia mavazi  ya hadhi ya juu,” alisema mdokezi.

Majirani walimfahamisha dosi tabia za yaya wake, lakini alimtetea akisema hakuona makosa yoyote kwake.

“Huyu ni msichana mdogo hajui mambo ya wanaume,” mama alimjibu jirani mmoja.

Inasemekana hivi majuzi kipusa alialika jamaa mmoja baada ya kukamilisha majukumu aliyopewa.

Wakiwa katika harakati za mahaba sebuleni mapolo wawili walifika, wote wakidai yaya huyo alikuwa mpenzi wao. Walianza kubishana na mwishowe wakalishana makonde.

“Hayo mavazi anayovalia mnajua bei yake kweli? Mimi ndiye humnunulia,” aliwaka kalameni mmoja, wote wakikabana koo.

Kuna aliyedai kuwa kipusa alitoka kwao na kwamba alikuwa mchumba wake.

“Huyu mimi ndiye nilimleta huku kwa kuwa tumetoka mahali moja, na ni mke wangu,” alilalamika.

Polo wa tatu alisema bosi wa yaya ni rafiki wa dhati na alijua uhusiano wao.

Yasemekana majirani ndio waliingilia kati na kufurusha makalameni hao wakitishia kuwacharaza endapo wangeendelea kuzua fujo tena.

Mama alifika makalameni walipokuwa wakizozana na kujionea sinema hiyo. Kipusa alisalia kimya akishindwa kujitetea kwa mshtuko aliopata.

Inasemekana dosi alimlipa mshahara wake na kumfurusha kisha akawaomba radhi majirani zake na kuwashukuru kwa kumfunua macho.

…WAZO BONZO…

Hatimaye Joho aonekana hadharani kwenye harusi ya Ali Kiba

Na MOHAMED AHMED

BAADA ya kukosa kuonekana hadharani kwa takriban miezi mitatu, Gavana wa Mombasa Hassan Joho hatimaye alionekana kwa mara kwanza Alhamisi katika harusi ya msanii wa Bongo, Ali Saleh almaarufu Ali Kiba.

Wakati wa harusi hiyo iliyofanyika katika msikiti wa Ummul Kulthum eneo la Kizingo, Bw Joho alionekana kuepuka hadhira na kuingia msikitini humo kwa siri akitumia mlango wa nyuma.

Bw Joho alikuwa nchini Estonia na baadaye alienda Uhispania kwa safari za kikazi, kulingana na usimamizi wa afisi yake.

Taifa Leo iliyokuwa imekita kambi msikitini hapo kwa ajili ya harusi ya Kiba ilimuona Bw Joho akiingia na gari jeupe bila ya kuandamana na walinzi wake.

Waandishi wa habari walizuiliwa kupiga picha katika harusi hiyo ambayo ilikuwa inapeperushwa na Azam TV ya Tanzania.

Baada ya harusi kufungwa, gavana huyo ambaye pia ni naibu kiongozi wa chama cha ODM alitoka hivyo hivyo kwa siri akiepuka kunaswa na kamera za waandishi waliokuwa hapo.

Licha ya harusi hiyo kufanywa kisiri asubuhi mapema jana, harusi hiyo iling’oa nanga kwa shwange kubwa Mombasa.

Ali Kiba aliyekuwa ameandamana na nduguye Abdu Kiba walifika katika msikiti huo ambao ujenzi wake ulisimamiwa na familia ya Joho mapema kwa ajili ya sherehe hiyo ya Nikkah.

Baada ya aya chache za Korani kusomwa muda ukawadia na Sheikh Mohammed Kagera akashika kiganja cha Kiba kumuozesha mchumba wake Amina Khalef.

Kiba akafuatisha: “Mimi Ali Saleh nimekubali kumuoa Amina Khalef kwa mahari tuliosikizana na ikitokea sababu ya kuachana tuachane kwa wema.”

Tabasamu lake la kawaida likaja kinywani mwake baada ya kuitika mwito huo. Kiba alikuwa amevalia gauni linalotambulika kama joho na kilemba na kushika upanga kama ilivyo desturi ya tamaduni ya Uswahilini.

Katika mahojiano mafupi Kiba alisema: “Nafurahi siku yangu imewadia. Sina mengi ya kusema kwa sasa,” akasema kabla gari alilokuwa ndani kuondoka.

Baada ya kutoka msikitini waalikwa walienda nyumbani kwa nduguye Joho, Abu Joho eneo la Kizingo kwa ajili ya kula bembe la harusi.

Bwanahurusi kisha alifululiza mpaka kwa kina bibi harusi eneo la Kongowea kumuona mkewe kama ilivyo ada.

Baadaye mlo wa waalikwa pekee uliandaliwa eneo hilo la Kizingo na baadae Joho akaandamana na Kiba katika jumba lake la Vipingo, kaunti ya Kilifi.

Alhamisi jioni wanawake walikusanyika katika ukumbi wa Diamond Jubilee kwa sherehe ya kupamba ambapo bibi harusi aliingia kwa madaha na waalikwa waliokuwa na hamu kumuona kichuna huyo.

Avurumishia pasta makonde hadharani

Na CORNELIUS MUTISYA

KATOLONI, MACHAKOS

Kioja kilizuka eneo hili polo aliyejawa na hasira za mkizi alipomparamia pasta na kumzaba makonde akimlaumu kwa kuvuruga mipango yake ya harusi  na mwanadada muumini wa kanisa lake.

Kulingana na mdokezi, polo alianzisha urafiki na mwanadada kanisani na penzi lilipokoleza wakaamua kufunga ndoa hivyo wakapasha habari hizo jamaa zao na pasta.

“Polo aliamua kutangazia ndugu na marafiki mipango ya harusi.  Walimwendea pasta wa kanisa lao ili awape baraka na kuwa kiungo muhimu katika matayarisho ya harusi yao,’’ akasema mdokezi.

Inasemekana kwamba, pasta alipopashwa habari za ndoa hiyo, alifurahia na kusema kuwa angehakikisha wawili hao wametimiza azma yao.

Aliwaalika wote wawili katika ofisi yake ili kuwapa ushauri na pia kuwaombea  wapate baraka katika harusi yao. Alionekana kuunga mkono mipango ya wawili hao kikamilifu.

Hata hivyo inadaiwa siku moja pasta alimwita mwanadada huyo kwake na akamkanya dhidi ya kuolewa na polo.

Alimwambia kuwa alipata maono kuwa hakuwa mtu wa kuaminiwa na ndoa yao ingejaa kisirani.

Mwanadada huyo alishtushwa na ushauri wa pasta na akaamua kukatiza mipango ya harusi.

“Mwanadada alimwendea polo na kumwambia peupe kuwa asahau kumuoa maana hakuwa na hamu ya kuolewa,’’ alisema mdokezi.

Polo alipopata habari hizo alijawa na huzuni na akaamua kudadisi  sababu ya kidosho kughairi nia ilhali mipango ya ndoa yao ilikuwa inaelekea kukamilika.

Na ukweli ukafichuka kuwa pasta kamshauri demu asiolewe.

Inasemekana polo alimwendea pasta huyo na  kumtandika vilivyo akimlaumu kwa kusambaratisha mipango yake.

Pasta aliokolewa na wapita njia naye polo akaonywa dhidi ya kuvuruga amani katika jamii.

…WAZO BONZO…

Matiba alirudisha shamba alilonyakua kujenga shule, mahakama yaambiwa

Na RICHARD MUNGUTI

MENEJA mkuu wa kampuni ya Muchanga Investment Limited (MIL) Bw Dimitri Da Gama Rose aliambia mahakama kuu Alhamisi kwamba mwanaharakati wa uzinduzi wa mfumo wa vyama vingi vya kisiasa na waziri wa zamani marehemu Kenneth Njindo Matiba alirudisha ardhi aliyokuwa amenyakua kujenga Shule ya Hillcrest Group of Schools katika la shamba la ekari 134 lililoko mtaani Karen eneo la Karen.

Dimitri alimweleza Jaji Elijah Obaga kwamba baada ya Bw Matiba kugundua kwamba sehemu ya shamba alilokuwa amejumuisha katika shamba alikojenga shule za Hillcrest Group of Schools ni ya MIL alilirudisha.

“Maafisa wa usoroveya walirekebisha mpaka na kurudisha sehemu ya ardhi iliyokuwa imetwaliwa na kujumuishwa katika ardhi ya shule za Bw Matiba,” alisema Dimitri.

Meneja huyo aliyemweleza Jaji Obaga aliachiwa rekodi zote za shamba hilo na marehemu baba yake Horatius Da Gama Rose alisema awali msimamizi wa shule hizo za Hillcrest Bi Susan Mwamto, bintiye Matiba aliita afisa wa usoroveya kurekebisha mpaka kati ya shule hiyo na shamba hilo la MIL.

Lakini MIL kupitia kwa wakili Mwaniki Gachoka ilihoji kuhusu ardhi iliyokuwa imekatwa na kuunganishwa na shamba la Bw Matiba aliyekuwa ameuziwa na Bw William Berliam Worner na ambaye alikuwa ameinunua kutoka kwa Bw Grattham Biddulph Norman.

Bw Norman alimwuzia Bw Worner ekari 20.2 ambazo ziliuziwa Bw Matiba baadaye ndipo ajenge shule za Hillcrest.

Dimitri alitoa stabadhi mbali mbali kuthibitisha kwamba Bw Matiba alikuwa amethibitisha shamba hilo linamilikiwa na MIL.

Pia alisema Wizara ya Ardhi , Kampuni ya Kenya Power & Lighting, Mamlaka ya Ushuru (KRA), Kaunti ya Nairobi na Makampuni mbali mbali zilitambua kwamba shamba hilo ni la MIL.

“Kile unaeleza hii mahakama ni kwamba Bw Matiba, Wizara ya Ardhi na Idara za Serikali zilitambua MIL kuwa mmiliki wa shamba hili la ekari 134 liloko eneo la Karen,” wakili Cecil Miller alimwuliza Dimitri.

“Ndio na hata natoa riziti za malipo ya ada kati ya 1978 hadi 2013 kuthibitisha Serikali iliipa MIL hati ya umiliki wa shamba hili kwa njia halali,” alijibu Dimitri.

Dimitri , mwanawe marehe Horatius Da Gama Rose aliyemiliki MIL akiwa na aliyekuwa makamu wa Rais Moody Awori aliomba mahakama iamuru kampuni na watu binafsi wanaodai umiliki wa shamba hilo hawana haki ya kuidai.

Kesi inaendelea.

Mzozo IEBC ni njama ya kuiba kura 2022 – ANC

Na VALENTINE OBARA

CHAMA cha Amani National Congress (ANC) kinachoongozwa na Bw Musalia Mudavadi, kimedai mzozo unaokumba Tume Huru ya Uchaguzi na Mipaka (IEBC) ni njama ya kupanga wizi wa kura ifikapo mwaka wa 2022.

Katibu Mkuu wa chama hicho, Bw Barrack Muluka (pichani), Alhamisi alisema mzozo huo uliopelekea makamishna watatu kujiuzulu mapema wiki hii unachochewa na watu ambao walisababisha uchaguzi uliopita kuwa usioaminika.

“Tunataka wajue tutapinga juhudi zozote za kunyakuwa mamlaka ya urais kupitia kwa uchaguzi mwingine mbovu wa urais utakaosimamiwa na IEBC isiyoaminika na yenye ubaguzi,” akasema kwenye taarifa kwa vyumba vya habari.

Naibu Mwenyekiti wa IEBC, Bi Consolata Maina, alijiuzulu Jumatatu pamoja na makamishna, Bi Margaret Mwachanya, na Dkt Paul Kurgat. Hali hii imesababisha tume kusalia na makamishna watatu pekee ambao ni Mwenyekiti, Bw Wafula Chebukati, na makamishna Boya Molu na Prof Abdi Guliye.

Kamishna Roselyn Akombe, alijiuzulu mwaka uliopita kabla uchaguzi wa marudio wa urais uliofanywa Oktoba 26, akidai haingewezekana kusimamia uchaguzi huru na wa haki wakati tume ilikuwa imegawanyika kisiasa na kulikuwa na vitisho dhidi ya maafisa wa IEBC.

Kwenye taarifa yake, Bw Muluka pia alidai kuna watu wanaotaka kushawishi matokeo endapo kura ya maamuzi itaitishwa kufuatia makubaliano kati ya serikali na upinzani, na matokeo ya utathmini upya wa maeneo ya mipaka nchini ambao unatarajiwa kuanza kuandaliwa hivi karibuni.

Sawa na Chama cha ODM, katibu huyo alisema ANC inataka pia afisi ya usimamizi inayosimamiwa na Bw Ezra Chiloba, aliyesimamishwa kazi kwa muda, iondolewe na maafisa wachunguzwe kwa ukiukaji wa sheria ili walio na hatia wachukuliwe hatua za kisheria.

Ombi lingine tatanishi kuhusu urais latua bungeni

Na CHARLES WASONGA

OMBI tata la kuongeza muhula wa wabunge hadi miaka sita na kupunguza muhula wa rais hadi miaka minne liliwasilishwa bungeni Alhamisi.

Spika wa Bunge la Kitaifa Justin Muturi aliaamuru Kamati ya Bunge kuhusu Haki na Masuala ya Sheria (JLAC) kushughulikia mapendekezo, mengine ya kiajabu, kwenye ombi ambalo limewasilishwa na raia wa kawaida.

Aidha, katika ombi hilo, Ezekiel Njeru kutoka kaunti ya Embu anataka katiba ifanyiwe mabadiliko ili kuongeza maeneo bunge kutoka 290 hadi 300, kuondoa nyadhifa za maseneta na madiwani maalum wa kike huku akipendekeza kuwa lugha za kiasili zitumike katika mijadala bungeni.

“Ombi hili la mkazi wa Embu, Bw Ezekiel Njeru ni lenye uzito mkubwa kwani mapendekezo yake yatahitaji mabadiliko makubwa katika katiba ya sasa, hatua ambayo itahitaji kuandaliwa kura ya maamuzi,” akasema Bw Muturi kabla ya kuanza kusoma mapendekezo hayo.

“Mkenya huyo anataka kipengee cha 89 cha katiba kuhusu mipaka kifanyiwe mabadiliko ili kuongeza idadi ya maeneo bunge kutoka 290 hadi 300 na hitaji la uhitimu wa masomo liondolewe; kipengee cha 136 kuhusu uchaguzi wa rais ili muhula wake wa kuhudumu upunguzwe kutoka miaka mitano hadi minne huku ule wa wabunge uongezwe kutoka miaka mitano hadi sita.

“Vile vile, anataka maseneta wahudumu kwa muhula mmoja wa miaka saba pekee na nafasi 20 za maseneta maalum wa kike pamoja na madiwani 774 maalum wa kike ziondolewe. Bw Njeru pia anataka kipengee cha 120 (1) kuhusu lugha rasmi bunge kifanyiwe mabadiliko ili lugha za kiasili zitumike bungeni,” akasema Bw Muturi.

Spika Muturi aliipa JLAC inayoongozwa na Mbunge wa Baringo Kaskazini William Cheptumo kulichanganua ombi hilo kwa siku 60 kisha kuwasilisha ripoti bungeni.

“Ombi hili sasa litashughulikiwa na JLAC itakayohitaji kumwalika Bw Njeru kufika mbele yake ili atetee mapendekezo yake,” akasema.

Baadhi ya wabunge walisikika wakichangamkia baadhi ya mapendekeo hasa yale ya kuongeza muhula wao na hitaji la masomo huku wengine wakinung’unikia wazo kwamba lugha za kienyeji zitumike katika mijadala bungeni.

Pendekezo la kuongezwa kwa idadi ya maeneo bunge linajiri wiki moja baada ya Kiongozi wa chama cha ThirdWay Ekuru Aukot kuzindua kampeni ya kushinikiza mabadiliko ya katiba kupunguza idadi ya wabunge na maseneta waliochaguliwa kutoka 338 hadi 194.

Aidha, anapendekeza kufutiliwa mbali kwa nyadhifa 47 za Wabunge Wawakilishi wa Kaunti, kama sehemu ya kupunguza gharama ya mishahara ya maafisa wa umma.

Akizindua kampeni ya ukusanyaji wa sahihi kufanikisha kuandaliwa kwa kura ya maamuzi kufanikisha lengo hilo, Bw Aukot alisema idadi ya sasa ya wabunge ni juu zaidi.

“Bunge letu lina wabunge wengi kupita kiasi kwamba baadhi yao huwa hawaachangii mijadala bungeni. Huu ni mzigo kwa mlipa ushuru kwa sababu mishahara wanayolipwa haileti faida yoyote kwa Wakenya,” akasema huku akiongeza kuwa baadhi ya wabunge wanaunga mkono pendekezo.

Kikao cha Ruto na Kibwana chazua msisimko

Na PIUS MAUNDU

GAVANA wa Makueni Prof Kivutha Kibwana alipokutana na Naibu Rais William Ruto mnamo Jumanne, ilitarajiwa kikao hicho kiibue hali ya mshikemshike katika maeneo ya Ukambani.

Badala yake, viongozi katika Kaunti za Kitui, Machakos na Makueni wamepongeza mkutano huo katika ofisi ya Bw Ruto jijini Nairobi kama hatua sawa ya kisiasa na kuashiria kuwa eneo hilo liko tayari kumsikiliza mwanasiasa yeyote.

Mkutano huo umeibua gumzo kwani viongozi hao wawili walishikilia kuwa kikao hicho kilihusu suala la ushirikiano baina ya serikali za kaunti na ile ya kitaifa.

“Tulijadili maendeleo katika Kaunti ya Makueni na eneo zima la Ukambani. Miradi mikuu tuliyogusia ni pamoja na kuweka lami katika barabara ya Emàli-Ukia, bwawa la Thwake, mji wa kiteknolojia wa Konza Technocity, uwanja wa michezo wa Wote na miradi mingineyo,” ilisema taarifa aliyochapisha Prof Kibwana kwenye kurasa zake za mitandao ya kijamii.

“Tuna imani kwamba ushirikiano baina ya serikali ya kitaifa na za kaunti utawezesha ufanisi wa Ajenda Kuu Nne,” iliongeza taarifa kwenye kurasa za mitandao ya kijamii ya Naibu Rais Ruto.

Mkutano huo ulifanyika siku moja baada ya Prof Kibwana, ambaye pia ni mwenyekiti wa chama cha Wiper, kudokeza kuibuka kwa migawanyiko katika chama hicho. Kikao hicho kiliibua uvumi kwamba mazungumzo yao pia yaligusia siasa.

Maseneta Mutula Kilonzo Junior (Makueni) na Enock Wambua (Kitui) pamoja na wabunge Daniel Maanzo (Makueni), Patrick Makau (Mavoko) na Thaddeus Nzambia (Kilome) waliunga mkono mjadala wowote wa kisiasa uliofanyika.

Kwa mujibu wa viongozi hao, kikao hicho kilifanyika wakati mazungumzo baina ya Wiper na vyama vingine kuelekea 2022 yakikaribishwa.

 

Ni siasa tu

“Prof Kibwana na Naibu Rais William Ruto wote ni wanasiasa wa muda mrefu. Wanaodhania ni siasa tu zilizozungumziwa katika mkutano huo hawajakosea,” Bw Wambua aliambia Taifa Leo katika mahojiano na kuongeza kwamba hakufahamu masuala ya kisiasa yaliyojadiliwa kwenye kikao hicho.

“Ningeulizwa, ningewaambia (vigogo wa Wiper) waharakishe kukutana na Naibu Rais pamoja na viongozi wengine,” akaongeza Bw Kilonzo Jnr kuunga mkono matamshi ya viongozi wengine wa Wiper.

“Naibu Rais atakuwa mtu wa sawa kuingiliana na Wiper,” Bw Wambua alisema.

Wito kwa Wiper kujiweka pazuri kuunda miungano ya baada ya uchaguzi umezidi wakati chama hicho kikikabiliwa na changamoto za kutoka ndani na nje huku wachanganuzi wakisema misukosuko hiyo imeashiria Ukambani kuwa eneo lisilokuwa na misimamo mikali ya kisiasa.

Jumapili, Prof Kibwana alihimiza kinara wa chama Kalonzo Musyoka kudhibiti wanasiasa wasumbufu kutoka Ukambani ili kuweka chama hicho katika nafasi nzuri ya kuunda miungano na jamii nyinginezo.

Miongoni mwa wanasiasa hao ni Mbunge wa Mwingi ya Kati Gideon Mulyungi ambaye alimshambulia Gavana wa Kitui Charitu Ngilu kwa maneno makali wiki mbili zilizopita.

Ajuta kujaribu kumtia mumewe kiganjani

Na LEAH MAKENA

GITEMBENE, MERU

Mama wa hapa alipatiwa talaka  kwa kuweka akiba kisiri ili ajenge nyumba ya kifahari. Mama alikuwa na mshahara mnono na akaamua kuweka pesa akiwa na lengo la  kujenga nyumba na kumweleza mumewe baada ya kuikamilisha. 

Mumewe hakuwa na kazi nzuri na mapato yake yalikuwa kidogo mno.

“Nia ya mama ilikuwa kumpunguzia mumewe mzigo kwa sababu mapato yake yalikuwa ya chini sana. Alitaka familia yake kuwa na maisha mazuri,” alisema mdokezi.

Inasemekana kuwa mama alichukua mkopo  benki ili kuharakisha ujenzi wa nyumba hiyo na akaamua kulipa madeni yote bila kumhusisha polo.

Haikujulikana jinsi mumewe alivyogundua siri ya mama ila alimpigia simu akiwa kazini na kumtaka kujipanga kuondoka kwake.

Jioni ya kisanga, mama alifika na kupata begi la nguo nje huku jamaa akitetemeka kwa hasira.

“Yaani unanifanya kutoa jasho kushughulikia mahitaji yote ya nyumbani ilhali unachukua loni kujengea uwapendao majumba makubwa? Huu uwe mwisho wangu na wewe kwani umekuwa kero kwangu,” jamaa aliteta.

Juhudi za mama za kujaribu kujitetea hazikufua dafu kwani polo aliendelea kubishana akidai jengo lililokuwa likikamilika halikuwa lao.

“Siwezi kuishi katika nyumba ambayo sikuhusika kujenga. Ulikuwa unaficha nini iwapo ulikuwa na nia nzuri?” mzee aliwaka.

Ilibidi mama kuzoa kilichokuwa chake na kuondoka huku polo akiapa kulisha watoto pekee yake na kumlaumu mkewe kwa kuficha siri kubwa kama hiyo.

Haikujulikana iwapo jamaa alibadilisha nia  baadaye mkewe kuwajulisha wazee wazungumze naye apate kujua ukweli wa mambo.

…WAZO BONZO…

Ninavuta bangi ili nipate nguvu za kuchapa kazi shambani, mshukiwa aambia mahakama

Na STEPHEN MUNYIRI

MWANAMUME aliyekamatwa akiwa na bangi, Jumatano aliishangaza mahakama moja mjini Karatina, alipomwambia hakimu kwamba huwa inamsaidia kufanya kazi kwa bidii anapoivuta.

Mshukiwa huyo, Erick Njogu alikubali makosa hayo, mbele ya Hakimu Mkuu Florence Macharia.

“Nakubali kwamba mashtaka hayo ni ya kweli. Nilipatikana na bangi. Huwa ninaitumia kwani huwa inanisaidia kufanya kazi kwa bidii katika shamba langu,” akamwambia hakimu huyo, aliyeonekana kushangazwa na kauli hiyo.

Baadaye hakimu alimuuliza: “Je, unakubali uliyoyasema?” Mshukiwa alikubali bila kupepesa. Kauli yake ilizua gumzo kwa muda, hasa miongoni mwa viongozi wa mashtaka.

Upande wa mashtaka uliiambia mahakama kwamba mnamo Aprili 12, polisi walipata habari kutoka kwa wananchi kwamba mshukiwa amekuwa akiuza bangi.

Walibaini hayo kuwa kweli, baada ya kuvamia makazi yake, kwani walipata misokoto ya bangi yenye thamani ya Sh170.

Mahakama iliagiza afanyiwe ukaguzi, huku hukumu yake ikitarajiwa kutolewa mnamo Aprili 30.

 

Wahadhiri waapa kutumia njia zote kuendeleza mgomo wao

Na WANDERI KAMAU

WAHADHIRI wa vyuo vikuu vya umma Jumatano waliapa kutumia njia mbadala kuendeleza mgomo wao baada ya maandamano waliyopanga kufanya kusambaratishwa na polisi jijini Nairobi.

Wahadhiri hao walikuwa wakielekea katika makao makuu ya Wizara ya Elimu na Hazina ya Kitaifa jijini Nairobi, ila maandamano yao yakazimwa na polisi walipofika katika Jumba la Anniversary.

Aidha, walikuwa wamekusanyika katika Chuo Kikuu cha Nairobi, walikolalamikia kutojitolea kwa serikali katika kusuluhisha mgomo wao. Licha ya hayo, polisi waliingilia kati na kuwazuia, wakishikilia kwamba hawakuwa wamepokea notisi ya kuwakubalia kuandamana.

Polisi waliokuwa wamejihami vikali walidai kupokea “maagizo kutoka juu” walitishia kuwarushia vitoa machozi, iwapo hawangetii maagizo yao.

“Hatujapata kibali rasmi kuruhusu maandamano yoyote. Hivyo, lazima wanaondamana waondoke barabarani mara moja,” akasema Mkuu wa Polisi katika Kituo cha Central, Robinson Thuku, aliyeongoza kikosi hicho.

Ilibidi wahadhiri kurejea katika Chuo Kikuu cha Nairobi, ambako waliapa kutumia kila njia kuhakikisha kwamba hakuna shughuli zozote za masomo zinaendelea katika vyuo hivyo, hadi pale matakwa yao yao kushughulikiwa.

Wahadhiri hao wanashinikiza kutekelezwa kwa Mwafaka wa Malipo wa 2017-2021, ili kuongezwa mishahara na marupurupu wanayopata.

Kwenye hotuba zao, viongozi wa Chama cha Wahadhiri (UASU) na Wafanyakazi wa Vyuo Vikuu (KUSU) waliwalaumu Waziri wa Elimu Amina Mohamed na Katibu Japeh Ntiba kuwa kikwazo kikuu cha kupatikana kwa suluhisho kuu.

Mwenyekiti wa UASU Prof Muga K’Olale alisema kuwa wawili hao hawana ufahamu wa kindani kuhusu malalamishi halisi ya wahadhiri na wafanyakazi wengine, kwani wameluwa wakikubali kupotoshwa na Manaibu Chansela (VCs).

Prof K’Olale alisema kwamba juhudi za kuwafikia wawili hao zimegonga mwamba, hivyo wakibaki bila lingine ila kuendeleza mgomo huo.

“Nimekuwa katika harakati za kuwatetea wafanyakazi wa vyuo vikuu kwa muda mrefu, ila kinyume na migomo mingine, kikwzo kikuu kwa sasa ni waziri husika (Amina) kukubali kupotoshwa na wakuu wa vyuo kwamba hakuna ukweli wowote katika malalamishi yetu,” akasema.

Kwa upande wake, Katibu Mkuu wa UASU Dkt Constantine Wasonga alisema kuwa wako tayari kumaliza mgomo huo, ikiwa serikali iko tayari kutoa mapendekezo yake kuhusiana na mkataba huo.

 

 

 

Mgomo huo ambao unaingia siku ya 49 leo umeathiri masomo katika vyuo vyote 31 vya umma nchini na wanafunzi zaidi ya 600,000.

 

Wakazi wakwama juu ya miti kufuatia mafuriko

STEPHEN ODUOR na JADSON GICHANA

WAKAZI wa eneo la Nanigi, Kaunti ya Tana River, wamekuwa wakiishi mitini na kwa paa za nyumba zao kwa siku tatu zilizopita baada ya nyumba hizo kujaa maji ya mafuriko. Wakazi hao ambao waliamshwa na mafuriko baada ya mvua kubwa kunyesha usiku, walilazimika tena kukesha bila chakula kabla serikali ya kaunti kutuma boti la kasi kuwaokoa.

“Hatukuchoka kupiga simu ili watu waje kutusaidia. Waliokuwa mitini na kwenye paa walisumbuka sana. Baadhi yetu tulisaidiwa na shirika la Msalaba Mwekundu siku kadha baadaye,” alisema mmoja wa waathiriwa Said Odha.

Akizungumza alipowatembelea waathiriwa hao Gamano, Gavana Dhadho Godhana alieleza jinsi waathiriwa hao walimpigia simu mfululizo wakiomba usaidizi.

“Nilipokea simu zenu nyingi mkisema baadhi yenu mnaishi juu kwa miti na paa za nyumba, na kwamba chakula na mifugo wenu walisombwa na maji. Tuko hapa kuhakikisha shughuli ya uokoaji inafanyika na kutathmini hasara iliyotokea,” akasema Bw Godhana.

Familia karibu 300 ziliokolewa usiku wa kuamkia Jumanne katika kijiji hicho cha Nanigi baada ya maboti 30 ya kasi kutolewa na serikali ya kaunti na kupewa shirika la Msalaba Mwekundu ili kutumika kwa operesheni hiyo.

Kulingana na Mratibu Jarred Bombe, zaidi ya asilimia 60 ya kaunti hiyo imejaa maji na kusababisha watu zaidi ya 10,000 kuhama makwao.

Wakazi wengine bado wamezingirwa na mafuriko hususan wanaoishi karibu na Mto Tana katika vijiji sita vya kaunti ndogo ya Bura.

Wanahofia kushambuliwa na mamba ambao wameonekana wakifuata maji ya mafuriko hadi vijijini.

Kwengineko, baadhi ya wakazi wa Kisii na Nyamira wamelazimika kuhama makao yao huku miundo msingi ikiharibiwa na mafuriko.

Katika soko la Kisii, wafanyibiashara walikadiria hasara kufuatia kusombwa kwa bidhaa zao za mauzo. Barabara kuu ya Kisii- Migori na ile ya Kisii- Kisumu zilifungwa kwa muda kufuatia maji yaliyosambaa barabarani.

Kamshina wa kaunti ya Kisii, Bw Godfrey Kigochi,aliwatahatharisha wakazi ambao wanaishi kando ya mto Nyakomisaro kuondoka kwa vile mto huo unazidi kufurika msimu huu wa mvua.

 

Viagra huangamiza Saratani – Utafiti

Na AGEWA MAGUT

KANDO na kupandisha ashiki za kimapenzi, imebainika kuwa dawa za viagra zina uwezo wa kupunguza makali ya maradhi ya saratani.

Utafiti wa hivi punde unaonyesha uwezekano wa viagra kutibu kansa ya ngozi, matiti na ubongo.

Utafiti huo ulichapishwa katika mradi wa Repurposing Drugs in Oncology (ReDO) ambao ni ushirikiano kati ya Hazina ya Kupambana na Kansa kutoka nchi ya Ubelgiji na GlobalCures kutoka Marekani.

Kulingana na utafiti huo uliochapishwa Aprili 11, tiba hiyo iligunduliwa wakati mzee wa miaka 80 aliyekuwa akiugua kansa alipoonyesha dalili ya kupona ugonjwa huo baada ya kuanza kutumia viagra ili kupata ashiki ya kufanya mapenzi.

Pia utafiti huo unasema wanaume wanne katika kliniki moja walionyesha dalili za kupona kansa baada ya kuanza kutumia viagra. Kemikali inayotibu kansa ambayo inapatikana ndani ya viagra huitwa PDE5 inhibitors.

Haitakuwa mara ya kwanza kwa dawa kama viagra kutumiwa kwa lengo ambalo halikusudiwa ilipotengenezwa. Viagra hiyo hiyo imewahi kutumiwa kutibu aina ya ugonjwa wa moyo uitwao Angina. Lakini hiyo ilisahaulika na ikawa maarufu kwa kutumiwa na wanaume kuamsha hamu ya kushiriki ngono.

“Hatua zilizopigwa katika matumizi ya Sildenafil maarufu kama viagra ni ya kuvutia mno. Mwanzo ilikuwa tiba ya ugonjwa wa moyo kisha ikawa ya kuamsha hamu ya kushiriki ngono na sasa ni tiba ya kansa,” alieleza Dkt Pan Pantziarka kutoka Hazina ya kupambana na Kansa.

Kwenye chapisho la Utafiti huo imenakiliwa kwamba kemikali ya PDE5 inhibitors inaweza kupenya katika damu iliyoganda kwenye ubongo na kutibu ugonjwa wa kiakili. Hii inawezekana hata katika tiba ya sehemu nyingine za mwili kama Mapafu, Matiti na kwenye Koo.

“Bei ya chini na kutokuwa na sumu nyingi ndizo huchangia dawa hizi kutumiwa na wengi” alinukuliwa moja wa waandishi wa chapisho hilo.

 

Korti yadinda kumlazimisha Betty Tett kutambua wazazi wa mwana wa kambo

Na RICHARD MUNGUTI

MAHAKAMA Kuu Jumatano ilikataa kuwashurutisha aliyekuwa Waziri msaidizi Bi Betty  Tett na mumewe William Mulready Tett kuwatambua wazazi waliomzaa mwanao wa kambo David William Tett.

David aliyehukumiwa kunyongwa kwa kumnyang’anya kimabavu Mukready katika kisa ambapo majambazi wawili waliuawa, alikuwa amewasilisha kesi katika mahakama kuu akiomba wazazi hao wake wa kambo walazimishwe kumtambulia wazazi waliomzaa na sababu ya kumpeana kwa Betty na mumewe Mulready.

Jaji John Mativo aliyeamua kesi hiyo alisema David hakuwasilisha ushahidi wa kutosha kuthibitisha kwamba wazazi wake wa kambo walimtoa katika jumba la kuwalelea watoto wasio na wazazi la Mama Fatuma Goodwill Childrens Home.

Ilibidi Jaji Mativo kutumia sheria za kimataifa kuhusu haki za watoto kuamua kesi hiyo ya David.

David alihukumiwa kifo na aliyekuwa hakimu mkuu sasa Jaji Kiarie Waweru kwa kumnyang’anya mali kimabavu Mulready.

Kesi ya kuapisha Prof Mugenda yarudishwa kwa Jaji Mativo

Na RICHARD MUNGUTI

MAHAKAMA Kuu Jumatano ilikataa kuzuia kuapishwa kwa makamishna watatu walioteuliwa na Rais Uhuru Kenyatta kuwa wanachama wa tume ya kuajiri wafanyakazi wa Idara ya Mahakama (JSC).

Badala ya kuongeza muda wa kuzuia kuapishwa kwa Prof Olive Mugenda, Felix Koskei na Patrick Gichohi,  Jaji Wilfrida Okwany aliamuru kesi ipelekwe tena kwa Jaji John Mativo aliyetoa maagizo .

Mnamo Machi 9, Jaji Mativo alisitisha kuapishwa kwa wanachama hao watatu kwa muda wa siku 14.

Mahakama ilisimamisha kuapishwa kwa watatu hao baada ya kuelezwa maoni ya umma kuwahusu hayakuulizwa.

Kituo cha Katiba kiliomba mahakama ifutilie mbali kuchapishwa kwa majina ya watatu hao katika Gazeti rasmi la Serikali.

Kesi ya Jack & Jill iliyokaa kortini kwa miaka 25 kutupwa

Na RICHARD MUNGUTI

MAHAKAMA Kuu Jumatano ilitisha kutupilia mbali kesi iliyowasilishwa na duka la Jack& Jill (JJ) miaka 25 iliyopita ikiwa wakurugenzi wake hawatafika kortini kutoa ushahidi ipasavyo.

Jaji Fred Ochieng alisema hatasita kutupa kesi hiyo kwa vile mlalamishi hajatosheleza matakwa ya kuwasilisha ushahidi katika kesi hiyo iliyowasilishwa kortini mwaka wa 1993.

Katika kesi hiyo  JJ imeishtaki kampuni ya kutengeneza magari ya Marshall East Africa kwa kuizia magari ambayo yaliharibika hata kabla ya kusafiri kilomita 40,000 yakisafirisha mizigo.

Mahakama ilisema kwamba haitaendelea kutoa maagizo ya muda katika kesi ambayo imekuwa kortini tangu 1993.

JJ ilipeleka magari mawili iliyokuwa imenunua kutoka kwa Marshall East Africa katika karakana yake yatengenezwe lakini kufika sasa bado kutengenezwa.

JJ inaomba kampuni hiyo ya magari iilipe magari mengine kwa vile ilikiuka mkataba wa mauzo.

Kesi hiyo itasikizwa mnamo Mei 24, 2018.

Katibu adai hongo ya Sh5 milioni katika zabuni ya maharagwe

Na RICHARD MUNGUTI

MFANYABIASHARA amedai kwamba katibu mmoja mkuu amekuwa akidai hongo ya Sh5milioni ndipo amkubalie kuuzia Idara ya Kushughulikia Mikasa maharagwe ya misaada.

Bw Ibrahim Mohamoud amedai katibu  huyo ambaye hakumtaja kwa jina amekuwa akimzuia kupata zabuni.

Bw Mohammed amesema kwamba zabuni hiyo ilikuwa imetangazwa Januari 16 mwaka huu.

Katika kesi aliyowasilisha mahakama kuu , mfanyabiashara huyo anaomba mahakama izime ununuzi huo wa maharagwe hayo ya kutoa msaada hadi kesi aliyoshtaki isikizwe na kuamuliwa.

Bw Mohammed amedai hongo hiyo inaitishwa na Bw Joseph Mukombe Ndolo kwa niaba ya katibu huyo ambaye ni ndugu yake.

Mlalamishi aliwasilisha kesi hiyo kupitia kwa kampuni yake kwa jina Indigo Capital Services.

Amesema kampuni hiyo imetishwa kuzuiliwa kushiriki katika zabuni hiyo endapo hatatoa kiinua mgongo hicho.

Lakini katibu huyo na mwanasheria mkuu wamepinga kesi hiyo ikisikizwa na kitengo cha kuamua kesi za masuala ya ukiukaji wa haki.

Wakili wa Serikali Lumiti Chilaka amesema suala la madai ya hongo yanapasa kushughulikiwa na polisi na Afisi ya Mkurugenzi wa Mashtaka ya Umma (DPP).

Wabunge wa Ruto Mlima Kenya wakaangwa mitandaoni

Katuni ya kejeli iliyotundikwa mitandaoni Alhamisi. Grafiki/ Peter MBuru

NA PETER MBURU

JUHUDI  za wabunge wanne kutoka eneo la Mlima Kenya kumpigia debe Naibu Rais William Ruto licha ya upinzani mkali wa kisiasa unaomkosesha usingizi zimewazolea kejeli na ucheshi miongoni mwa Wakenya, japo wengi wakizichukulia kuwa mzaha tu.

Wabunge hao wakiongozwa na Moses Kuria (Gatundu Kusini), Kimani Ichungwa (Kikuyu), Rigathi Gachagua(Mathira) na Ndindi Nyoro (Kiharu) wamekuwa wakizunguka maeneo mengi nchini wakieneza ajenda ya ubora wa Bw Ruto kuwa rais ifikapo 2022.

Na licha ya viongozi wengi kutoka eneo la Mlima Kenya kupunguza kasi lifikapo suala la kumpigia debe Naibu wa rais, huku wengine wakionyesha dalili za kumtema, wanne hao wamesalia dhabiti kumuunga mkono.

Katuni ya grafiki yaonyesha Bw Ruto akiondolewa uchovu na wabunge wa Mlima Kenya. Grafiki/ Peter Mburu

Ni hali hiyo ambayo imewafanya Wakenya kuchangamkia suala hilo na kueleza wanavyohisi katika mitandao ya kijamii, japo wakitumia njia za ucheshi zinazooashiria kuwa huenda wabunge hao wanampotosha Bw Ruto.

Picha za vibonzo vya viongozi hao zimekuwa zikisambaa kuashiria viongozi wasio na mashiko na ambao naibu wa rais ameaminia kumzolea kura kutoka eneo ambalo uwezekano wa kumtenga hauwezi kuepukika.

Nao viongozi hao wameshikilia ishara yao ya kikazi kuhakikisha kuwa wanauza ajenda za Bw Ruto kila wanapokanyaga, hata kama wanaouzia hawasikii wala kukubali.

Bw Kuria ambaye ndiye kigogo hapo amekuwa akitembea hata sehemu zilizo ngome za upinzani na kuwataka kumuunga mkono Bw Ruto.

Wabunge wenzake nao wamekuwa wakionekana katika mikutano ya Naibu wa rais mara kwa mara.