ULIMBWENDE: Mbinu 8 bora za kulainisha ngozi

Na MAGGY MAINA

mwmaina@ke.nationmedia.com

BILA shaka mtu aliye na akili razini huhitaji ngozi laini na nyororo ili kujipa ujasiri wa kukabiliana na changamoto za kila siku pale kazini au nyumbani.

Hata hivyo, mbinu au njia tunazotumia wakati mwingine hutuacha na matokeo tusiyoyatarajia. Ni kwa sababu tumeumbwa sote tofauti na tunadhani kuwa kwa kutumia njia iliyomletea mwenzetu matokeo bora itatusaidia, lakini matokeo huwa kinyume kabisa.

Hizi hapa njia nane za kufuata ambazo zitakusaidia; haijalishi ni aina gani ya ngozi ulio nayo.

  1. Mlo

Vitu unavyokula vina mchango mkubwa katika ngozi na afya yako kwa ujumla. Ili kupata ngozi nzuri iliyo laini, nyororo na inayong’aa inabidi uache vyakula na vinywaji vinavyotengenezwa viwandani, wanga, mafuta na sukari na badala yake kula protini, matunda, mboga na kunywa maji kwa wingi.

Hakikisha unakunywa maji si chini ya glasi nane kwa siku na matunda pamoja na mboga kila unapopata mlo.

Matunda na mboga za matawi husaidia oksijeni kuzunguka vizuri mwilini na kwenye ngozi kuliko mafuta au kipodozi chochote unachoweza kupaka.

Protini husaidia kujenga ulinzi zaidi katika seli za ngozi ambayo ngozi inahitaji kukabiliana na ukavu wa ngozi. Nayo maji husaidia mzunguko mzuri wa damu mwilini na kusaidia vinyweleo kupumua vizuri, hivyo kuzuia bakteria chini ya ngozi.

  1. Muda wa kupumzika

Watu wengi hawatambui umuhimu wa usingizi katika kutunza ngozi na kuzuia kuzeeka haraka. Usingizi ni muhimu kwa ngozi yako sana, hakikisha unapata muda wa kutosha kulala usiopungua masaa 8. Kifiziolojia, ngozi inafanya kazi kubwa sana wakati wa mchana katika kutunza mwili, kukabiliana na mionzi ya jua, kukabiliana na vijidudu mbalimbali kama bacteria na virusi na kutizamia joto la mwili. Ngozi hujijenga wakati mwili umepumzika ili kuweza kuendelea kuchunga mwili wa mwanadamu ipasavyo.

  1. Acha kujichubua

Kutumbua chunusi na vipele ni tabia tulio nayo sisi wanadamu. Mara nyingi matokeo yake huwa ni kuwa na makovu na wekundu. Kufanya hivi pia huchangia bakteria kusambaa na kuharibu ngozi hata katika maeneo ambayo hayakuwa na matatizo.

Japokuwa ni ngumu kutotumbua chunusi, ni vyema ikiwa italazimu ufanye hivyo, tumia kitambaa safi kutoa chunusi na wala sio vidole au kucha kwa sababu ya uchafu uliopo kwenye kucha na vidole. Yaani hatuwezi kuamini mikono yetu kwa asilimia 100.

Ukiwa na chunusi unashauriwa kumuona mtaalamu wa afya ya ngozi ili akupe tiba ya uhakika.

  1. Usafi kwanza

Osha uso wako. Watu wengi hukimbilia kuosha nyuso zao harakaharaka na sio vizuri kusafisha uso juujuu kwa sababu kuna uwezekano mkubwa wa uchafu kubaki, hasa wanawake ambao wanatakiwa kutambua umuhimu wa nyuso zao. Basi ni bora ukatenga muda wa kutosha katika kuosha na kutunza uso.

Kusafisha uso mara zisizopungua mbili kwa siku ni vizuri kwa utunzaji wa ngozi yako ya uso.

Baada ya kufanya hivyo ni muhimu upake mafuta kiasi. Mafuta ni kwa ajili ya kulainisha na kung’arisha ngozi. Hata ijapokuwa una ngozi ya mafuta mengi, ni vizuri kutafuta mafuta ya ngozi yako (oily skin).

  1. Tunza vizuri macho yako

Watu wengi hupaka kiasi kidogo cha mafuta chini ya macho bila kujua faida tunazoziacha kwa kutokufanya hivyo.Kuna mistari (mikunjo) ambayo inaanzia kwenye jicho na ambayo muda mwingine husogea hadi kwenye maeneo ya karibu na nywele. Paka mafuta ya kutosha chini ya macho. Aidha, fanya ni kama unajimasaji kuanzia kwenye kona karibu na pua mpaka kwenye mfupa wa shavuni (cheekbone) kuzunguka jicho lote.

  1. Barafu

Barafu ni moja kati ya vitu muhimu katika kutunza ngozi. Licha ya upatikanaji rahisi pia ina uwezo wa kutunza ngozi yako bila gharama.

Faida za kutumia barafu katika utunzaji wa ngozi yako ni kwamba; Ukiumia au kujichuna kwenye ngozi waweza kutumia barafu kupunguza wekundu na kupunguza mwasho katika eneo lile.

Sote tunajua unapochubuka au kuumia kuna mwasho ambao tunahisi katika eneo lile la jeraha. Ukitumia barafu itakusaidia. Pia barafu unaweza ukaitumia kupunguza ukubwa wa matundu katika ngozi hasa pale mtu alikuwa amekamua chunusi.

Barafu husaidia kuvuta ngozi ilisiwe imeacha matundu ambayo muda mwingine hayapendezi kuonekana. Ila kumbuka wakati wa kutumia barafu zungusha maeneo tofauti kwasababu huunguza pale inapoachwa sehemu moja. Pia ni vizuri kuweka aloevera katika maji utakayo gandisha kwa ajili ya barafu (hiari yako).

  1. Tumia mafuta yanayofaa ngozi yako

Moja kati ya njia za kutapa ngozi laini na nyororo ni kutumia mafuta ambayo yametengenezwa kwaajili ya kupaka kwenye ngozi na sio ya nywele au ya kupikia.

Kutumia mafuta ya ngozi husaidia kung’arisha ngozi na muonekano mzuri ambao sio wa mafuta. Mafuta ya ngozi hayazibi vinyweleo vya ngozi, hivyo huruhusu ngozi kupumua na kutoa taka mwili kupitia vitundu hivyo na yanasaidia kupunguza uzajishaji wa mafuta katika uso hasa kwa wale wenye ngozi za mafuta.

Kumbuka kupaka mafuta mara mbili kwa siku katika uso safi; yaani baada ya kusafisha uso vizuri ndipo unashauriwa upake mafuta. Ukizingatia hilo utaona mabadiliko katika ngozi yako.

  1. Sunscreen

Kwa wale wenye matatizo ya kuungua wakiwa kwenye jua asubuhi, ni muhimu wawe wakipaka mafuta ya kuzuia mionzi ya jua (sunscreen) inayopenya kwenye ngozi na kuharibu ngozi yako. Na pale unapokuwa nje, hakikisha unajizuia na jua kwanzia mavazi yako; vaa miwani ya kuzuia miale mikali ya jua na kofia pana inayozuia jua kupiga usoni.

Homeboyz wazidi kutesa kwenye Raga ya Kitaifa

Na GEOFFREY ANENE

VIONGOZI Homeboyz wameacha mpinzani wa karibu Mwamba kwa alama sita kwenye Raga ya Kitaifa ya wachezaji saba kila upande, huku KCB, Kabras Sugar, Nondies, Masinde Muliro (MMUST), Blak Blad na Kisii zikiimarika baada ya Sepetuka Sevens, Julai 28, 2018.

Mabingwa wa duru za Prinsloo na Sepetuka, Homeboyz wana alama 44. Nambari mbili Mwamba wamezoa alama 38. Nafasi tatu zinazofuata zinashikiliwa na KCB (alama 32), Impala Saracens (27) na Kabras (23). Impala imerukwa na KCB. Nakuru inasalia ya sita kwa alama 22, mbili mbele ya Nondies, ambayo imepaa nafasi tano. Menengai Oilers imekwamilia nafasi ya nane kwa alama 18, mbili zaidi ya Kenya Harlquin, ambayo imeteremka nafasi nne. Mean Machine imeshuka nafasi moja hadi nambari 10 kwa alama 13. MMUST inashikilia nafasi ya 11 kwa alama 12. Makundi ya duru ijayo ya Kabeberi Sevens itakayofanyika Agosti 18-19 mjini Machakos, imefanywa.

Droo ya Kabeberi Sevens (2018):

Kundi A – Homeboyz, Nakuru, Oilers, Strathmore;

Kundi B – Mwamba, Impala, Blak Blad, Kisumu;

Kundi C – KCB, MMUST, Kisii, Harlequin;

Kundi D – Nondies, Kabras, Machine, Northern Suburbs.

Matokeo ya Sepetuka Sevens (2018):

Julai 29

Fainali – Homeboyz na Mwamba; Mechi ya kuamua nambari 3 na 4 – KCB 15-7 Nondies; Nusufainali – Homeboyz 12-5 KCB, Mwamba 24-12 Nondies; Fainali ya nambari 5/6 – MMUST 12-21 Kabras Sugar; Nusufainali ya nambari 5 hadi 8 –Impala Saracens 14-19 MMUST, Nakuru 5-21 Kabras Sugar; Robofainali – Homeboyz 29-0 Kabras Sugar, KCB 22-8 Nakuru, Mwamba 12-10 MMUST, Impala Saracens 14-17 Nondies; Fainali ya Challenge Trophy – Menengai Oilers 19-14 Blak Blad; Nusufainali ya Challenge Trophy – Menengai Oilers 22-14 Kisii, Blak Blad 27-12 Mean Machine; Robofainali ya Challenge Trophy – Menengai Oilers 24-0 Kisumu, Kisii 48-0 Catholic Monks, Strathmore Leos 12-21 Mean Machine, Blak Blad 14-12 Kenya Harlequins; Fainali ya nambari 13/14 – Kenya Harlequins 45-0 Kisumu; Nusufainali ya nambari 13 hadi 16 – Kisumu 31-12 Catholic Monks, Kenya Harlequins 31-19 Strathmore Leos.

Julai 28

Mechi za makundi – Nakuru 43-0 Catholic Monks, Impala Saracens 17-5 Blak Blad, Kabras Sugar 24-14 Strathmore Leos, Mwamba 38-0 Kisumu, Menengai Oilers 24-7 Mean Machine, Homeboyz 33-17 MMUST, Nondies 12-0 Kenya Harlequins, KCB 29-0 Kisii, Nakuru 26-19 Blak Blad, Impala Saracens 24-7 Catholic Monks, Kabras Sugar 7-5 Kisumu, Mwamba 14-12 Strathmore Leos, Menengai Oliers 7-10 MMUST, Homeboyz 27-5 Mean Machine, Kisii 28-0 Kenya Harlequins, KCB 15-10 Nondies, Catholic Monks 7-26 Blak Blad, Impala Saracens 26-7 Nakuru, Strathmore Leos 17-0 Kisumu, Mwamba 19-7 Kabras Sugar, Mean Machine 12-24 MMUST, Homeboyz 31-10 Menengai Oilers, Nondies 29-5 Kisii, KCB 12-12 Kenya Harlequins.

Wazito wasisitiza watasalia ligini

Na CECIL ODONGO

KOCHA msaidizi wa Wazito FC Ahmed Mohammed amesisitiza kwamba timu hiyo itaepuka shoka la kushushwa daraja japo wanaburura mkia kwenye msimamo wa jedwali la ligi KPL zikiwa zimesalia mechi 10 ligi ifike ukingoni.

Wazito walipoteza 2-3 dhidi ya Posta Rangers katika mechi iliyochezwa  Jumapili 29 uwanjani Camp Toyoyo jijini Nairobi.

Ingawa hali ilikuwa hivyo, Bw Ahmed  amedai kwamba ilikuwa bahati mbaya hawakushinda mechi hiyo na kujukusanyia pointi zote tatu.

“Tulikuwa bora kuwaliko na ilikuwa bahati mbaya tulipoteza . Wanasoka wangu walitia bidii, walidhihirisha ukakamavu na ujasiri mkubwa. Posta wana uzoefu lakini tuliwatoa kijasho kabla ushindi huo kutuponyoka,” akasema Ahmed baada ya mechi hiyo.

Klabu hiyo ipo katika nafasi ya 20 baada ya kupata alama 19 wakiwa wamejibwaga uwanjani mara 24 japo Ahmed amesema ana uhakika watasalia ligini.

“Tupo katika nafasi mbaya lakini nina hakika tutasalia ligini. Hapo awali tulikuwa na matatizo katika safu ya ushambulizi, sasa tuko sawa na lililosalia ni kuimarisha difensi yetu halafu tutaafikia lengo letu la kubakia ligini,” akaongeza Ahmed.

Wazito watatifua vumbi dhidi ya Nzoia Sugar ugani Sudi Kaunti ya Bungoma, Jumapili Agosti 5 katika mechi ya KPL.

Kerr amtetea kipa kulambishwa mabao 2 na Yanga

Na JOHN ASHIHUNDU

Kocha wa Gor Mahia, Dylan Kerr amemtetea kipa Boniface Oluoch anayeshutumiwa baada ya kufungwa mabao mawili katika ushindi wao wa 3-2 dhidi ya Yanga ya Tanzania kwenye mechi ya Kundi D ya michuano ya Confederations Cup.

Oluoch alilaumiwa vikali na mashabiki K’Ogalo kutokana na mabao hayo yaliyoingia kiholela mbele ya mashabiki wengi waliomiminika katika uwanja wa Kitaifa jijini Dar es Salaam.

Lakini akizungmza kuhusu mechi hiyo, Kerr alisema: “Hii ni mechi ambayo tungefunga mabao saba katika kipindi cha kwanza lakini hatukutumia nafasi nyingi tulizopata. Nimefurahia ushindi wa 3-2 kwa sababu umetuweka katika mazingara mazuri mashindanoni.” Kwa upande wa Yanga, naibu kocha, Noel Mwandila alieleza jinsi walivyochanganywa kutokana na bao la mapema.

K’Ogalo walipata bao la kwanza kupitia kwa George ‘Blackberry’ sekunde ya 38.

“Boniface alifanya kazi kubwa majuzi dhidi ya AFC Leopards kwa kuokoa hatari kubwa tulipokuwa sare, kabla ya kuibuka na ushindi wa 2-1. Nina Imani naye kwa asilimia kubwa.”

Baada ya ushindi huo, K’Ogalo’s wamechukua uongozi wa Kundi hilo baada ya USM Algers ya Algeria kutoka sarea na Rayon Sport ya Rwanda katika mechi nyingine iliyochezewa Mustapha Tchaker Stadium nchini Algeria mwishoni mwa wiki.

Baada ya kila timu kucheza mechi nne, Gor Mahia wanaongoza kwa point inane, sawa na USM, huku zote zikiwa na nafasi kubwa ya kufuzu kwa hatua ya robo-fainali. Ajabu ni kwamba, timu hizo mbili zina tofauti sawa ya mabao.

Rayon wanashikilia nafasi ya tatu wakiwa na pointi tatu nab ado wana nafasi ya kufuzu kwa robo-fainali.

Yanga wako nje ya kampeni za kuwania nafasi ya kutinga robo-fainali baada ya kujiokotea pointi moja.

Mbali na kuweka historia barani Afrika, kufuzu kwa Gor Mahia kwa hatua ya robo-fainali kutawaongezea mgao wa pesa.

Tayari mabingwa hao wa Ligi Kuu ya Kenya (KPL) wameweka mfukoni Sh27 milioni kwa kutinga hatua ya makundi na wataongezwa kitita kingine cha Sh8 milioni iwapo watafuzu kwa robo-fainali, kwa kuandikisha sare au ushindi katika mechi ijayo dhidi ya Rayon iliyopangwa kuchezwa Agosti 19, jijini Nairobi.

Timu zitakazofuzu hatua ya nusu-fainali zitapokea Sh45 milioni, huku mabingwa wa taji hilo la ligi ndogo ya bara wakipokea Sh125 milioni kutoka kwa CAF.

Jericho wachupa kileleni Super 8

Na JOHN ASHIHUNDU

Jericho All Stars wamechukua uongozi wa msimamo wa Ligi Kuu ya Super 8 PL baada ya kuandikisha ushindi wa 2-0 katika mechi iliyochezewa Camp Toyoyo, Jumapili.

Kiungo mahiri, John Owalla alifunga mabao yote dakika za 23 na 89 kwenye mechi hiyo iliyohudhuriwa na mashabiki wengi.

Licha ya kuwa na pointi sawa (37) na Makadara Junior League SA, vijana hao wa James Nandwa sasa wanaongoza jedwalini. Hii ni baada ya Makadara kuibuka na ushindi wa 2-1 dhidi ya NYSA, ugani Hamza.

Miongoni mwa timu zinazowania ubingwa wa mwaka huu, ni Jericho na Makadara pekee zilizofanikiwa kuokota pointi zote tatu mwishoni mwa wiki. Mabingwa Kawangware United waliagana bila kufungana na Metro Sports ugenini.

Uwanjani Jericho, mabao mawili katika mkipindi cha pili kutoka kwa Joespeh Makali (dakika ya 51) na  Ibrahim Ochieng (dakika ya 8) yaliiwezesha Team Umeme kupata ushindi wa 2-0 dhidi ya Kayole Asubuhi na kusonga hadi nafasi ya saba jedwalini.

MASA iliilazimisha Meltah Kabiria sare ya 2-2 katika mechi iliyochezewa BP wakati Leeds United ilipata ushindi finyu wa 1-0 dhidi ya Rongai All Stars ugani.

RYSA walipanda hadi nafasi ya 12 baada ya ushindi wa 2-1 dhidi ya Shauri Moyo Sportif katika mechi iliyochezewa uwanja wa Githogoro mtaa wa Runda.

Matokeo ya mechi za wikendi kwa ufupi:

Makadara Junior League SA 2-1 NYSA

Jericho All Stars 2-0 Zamalek

Meltah Kabiria 2-2 MASA

RongaI All Stars 0-1 Leads United

Shauri Moyo Blue Stars 0-0 TUK

RYSA 2-1 Shauri Moyo Sportif

Kayole Asubuhi 0-2 Team Umeme

Kisanga polo kufumania mganga akichovya asali yake

Na TOBBIE WEKESA

Kibabii, Bungoma

Kalameni mmoja kutoka hapa, alimtimua mganga baada ya kubaini kwamba alikuwa paka asiyeachiwa maziwa.

Kulingana na mdokezi, polo alimualika mganga kwa boma lake amgangue mkewe. Duru zinasema mara kwa mara jamaa alikuwa akimuacha mganga na mkewe mgonjwa ili atibiwe.

Inasemekana mkewe alikuwa ametaabika mno kutokana na ugonjwa ambao haukujulikana na madaktari wa hospitali zote alizozuru.

“Polo aliamua kumtembelea mganga ambapo walisikilizana asafiri hadi kwa boma,,” alieleza mdokezi.

Penyenye zinasema polo alianza kupata fununu kwa majirani kwamba mganga alikuwa akichovya asali kabla ya kuanza kumtibu mkewe.

Inadaiwa siku ya tukio, polo alimdanganya mganga kwamba angerudi jioni. Alimsihi aendelee kumhudumia mkewe.

Jamaa alienda na kujificha kwa nyumba ya jirani.

Kulingana na mdokezi, mganga alianza shughuli zake naye jamaa akawa anachungulia kwa dirisha.

“Hakuamini alichoona. Mganga alikuwa juu ya mzinga akirina asali,” alieleza mdokezi.

Duru zinasema mganga aliangushiwa makofi kadhaa na polo.

“Ilikuwa ni leo pekee. Sijawahi kufanya hivyo tena. Tafadhali nisamehe,” mganga alimrai polo.

Majirani walimzomea mganga huku wakitoa siri zote za mganga huyo.

“Kila wakati huwa unajifungia ndani ya nyumba. Juzi uliwafukuza watoto waliokuwa wakicheza hapa,” jirani alidai.

Inasemekana ilibidi mganga kukiri kosa asiangamizwe. Kwa kusikia hivyo, polo alimpa mganga dakika tano afunganye virago na kuondoka.

Mganga alilazimika kutoroka mbio kwani alihofia gadhabu ya majirani.

Haikujulikana ikiwa baadaye polo alisikilizana na mkewe au la kuhusu kitendo alichofanya na mganga. Hadi wa leo haikujulikana ugonjwa aliougua mke wa jamaa huyo.

Misri kunyonga watu 75 waliohusika kwa machafuko 2013

Na MASHIRIKA

Mahakama ya Misri mnamo Jumamosi iliwahukumu watu 75 kunyongwa, wakiwemo viongozi wa kundi la Muslim Brotherhood.

Hukumu hiyo sasa imewasilisha kwa kiongozi mkuu wa kidini wa nchi hiyo. Kulingana na sheria ya Misiri, kiongozi huyo anafaa kutoa ushauri kuhusu hukumu za kifo ingawa maoni anayotoa sio ya kisheria na waliohukumiwa wana haki ya kukata rufaa.

Waliopatikana na hatia walikuwa miongoni mwa watu 713 walioshtakiwa kwa mauaji ya polisi na kuharibu mali kwenye ghasia zilizotokea nchi hiyo 2013 kati ya maafisa wa usalama na wafuasi wa Rais aliyetimuliwa Mohamed Morsi.

Viongozi wakuu wa Muslim Brotherhood, Mohamed el-Baltagui, Issam al-Aryan na Safwat Hijazi walikuwa kizimbani ilhali watu 31 walihukumiwa bila kuwepo kortini.

Aidha mwanahabari Mahmud Abu Zeid, maarufu kama Shawkan, ambaye mwezi Mei alipokea tunzo kutoka kwa shirika la Unesco ni mmoja wa walioshtakiwa. Mahakama iliahirisha uamuzi dhidi yake.

Mnamo Agosti 14 2013, moja ya siku umwagikaji mkubwa wa damu ulishuhudiwa Misri katika siku za hivi punde, baada ya jeshi kumtimua Morsi mamlakani, polisi walitumwa kuwatawanya waandamanaji eneo la Rabaa al-Adawiya jijini Cairo.

Watu wapatao 700 waliuawa katika muda wa saa chache Rabaa al-Adawiya na katika eneo la Nahda Square ambapo maandamano mengine yalifanyika.

Mashirika ya kutetea haki za binadamu Amnesty International na Human Rights Watch yalisema watu 40,000 walikamatwa mwaka wa kwanza baada ya Morsi kuondolewa mamlakani.

Korti yatoa mwanya kwa Museveni kutawala maisha

Na AFP

RAIS Yoweri Museveni wa Uganda anaelekea kuwa rais wa maisha baada ya mahakama kuidhinisha mabadiliko ya kikatiba ya kuondoa kipengele cha umri wa juu unaohitajika kwa wagombeaji urais.

Kabla ya katiba kubadilishwa, rais alipaswa kuwa na umri wa chini ya miaka 75, hitaji ambalo lingemzuia Museveni, ambaye ameongoza nchi hiyo tangu 1986, kugombea urais kwenye uchaguzi wa 2021.

Mswada uliowasilishwa bungeni Septemba mwaka jana na kutiwa sahihi kuwa sheria Desemba mwaka huo ulizua maandamano na lawama kutoka kwa upinzani, ambao unamlaumu Museveni kwa kukatalia mamlakani.

Kundi la viongozi wa upinzani liliwasilisha kesi katika mahakama ya kikatiba iliyoamuliwa Alhamisi wiki jana na mabadiliko hayo kuidhinishwa.

“Mahakama imekubali rais wa maisha,” alisema wakili Ladislaus Rwakafuzi ambaye ni mtetezi wa haki za binadamu.

“Nafikiri majaji wetu walikosa ujasiri wa kumwambia Rais kwamba amekuwa mzee na wakati wake wa kuondoka umefika,” aliongeza.

Majaji wengi wa mahakama ya kikatiba waliotoa uamuzi wao kutoka mji wa Mbale, ulio kilomita 225 mashariki ya Kampala, waliunga mknono kuondolewa kwa umri wa juu wa wanaogombea urais.

Wakili Rwakafuzi aliwakilisha muungano wa upinzani unaotaka hitaji la umri wa wagombeaji lirejeshwe.

Rwakafuzi aliongeza kwamba atashauriana na wateja wake kubaini iwapo watakata rufaa.

Kiongozi wa upinzani bungeni, Winnie Kiiza alisema wanaweza kupata haki katika kiwango kingine.

Lakini majaji walikataa juhudi za wabunge za kuongeza vipindi vyao vya kuhudumu kutoka miaka mitano hadi saba, hatua ambayo ingesongesha uchaguzi hadi 2023 huku mmoja wa majaji akitaja hatua hiyo kuwa ya ubinafsi.

Majaji hao pia waliamua kwamba juhudi za kurejesha vipindi vya rais kuhudumu ambavyo viliondolewa siasa za vyama vingi ziliporejeshwa 2005 katiba ilipobadilishwa mara ya mwisho, ni ukiukaji wa mfumo wa bunge.

Waliamua kwamba juhudi hizo hazina msingi wa kisheria na kutoa nafasi kwa Museveni kutawala maisha.

Museveni, ambaye alitwaa uongozi akiwa kingozi wa waasi 1986 aliwahi kunukuliwa akisema kwamba viongozi wanaokatalia mamlakani ndio chanzo cha matatizo barani Afrika.

Hata hivyo, alipokuwa akigombea kwa kipindi cha tano mnamo 2016, alisema wakati wake wa kuondoka mamlakani haujafika kwa sababu angali na kazi nyingi ya kufanya.

Naibu Mwanasheria Mkuu Mwesigya Rukutana, ambaye aliwakilisha serikali katika kesi hiyo alisema alifurahia uamuzi huo.

Msichana aliyecharaza wanajeshi wa Israeli makofi aachiliwa

Na MASHIRIKA

Msichana wa Kipalestina aliyefungwa jela kwa kuwachapa makofi wanajeshi wa Israeli, aliachiliwa huru jana baada ya miezi minane gerezani.

Ahed Tamini alinaswa kwenye video iliyosambazwa kote ulimwenguni akiwachapa wanajeshi hao kwa kuwadhulumu wapalestina.

Tamimi, 17, na mama yake Nariman waliondolewa kwa gari kutoka gereza la Sharon hadi West Bank, wanakoishi, msemaji wa gereza Assaf Librati alisema.

Assaf alisema walikabidhiwa wanajeshi wa Israel, ambao waliwapeleka hadi kijiji chao cha Nabi Saleh.

Baada ya kuachiliwa na wanajeshi hao, Tamimi alitoa hotuba fupi kwa umati na wanahabari waliokusanyika akisema alitarajia kuhutubia mkutano mkubwa wa wanahabari baadaye.

Kulizuka taharuki kabla ya Tamimi kuwasili huku wanaume wachache waliokuwa na bendera za Israeli wakiwakaribia wafuasi waliokuwa na bendera za Palestina.

Walirushiana maneno lakini ghasia hazikutokea.

ADUNGO: Liverpool ndio madume EPL msimu huu, Guardiola, Mou, Emery wajipange

Na CHRIS ADUNGO

INGAWA Manchester City na Arsenal wanapigiwa upatu wa kutia kapuni ubingwa wa Ligi Kuu ya Uingereza (EPL) katika kampeni za msimu ujao wa 2018-19, nahisi kwamba kikosi cha pekee chenye uwezo wa kuvuruga matumaini ya miamba hao ni Liverpool.

Baada ya kutinga fainali za Klabu Bingwa Ulaya (UEFA) msimu uliopita na kuwalaza Man-City 2-1 na Man United 4-1 katika michuano ya kirafiki iliyowakutanisha nchini Amerika majuzi, Liverpool ni mpinzani ambaye kwa sasa amedhihirisha kuwa ana uwezo mkubwa usiostahili kupuuzwa.

Kikosi hicho cha kocha Jurgen Klopp kwa sasa ni timu tofauti kabisa. Chini ya mkufunzi huyu wa zamani wa Borussia Dortmund, viwango vya wachezaji wengi wa Liverpool vimeimarika.

Hili limedhihirishwa kupitia kwa ukali wa nyota Sadio Mane, Alex Oxlade-Chamberlain, Roberto Firmino na Mohamed Salah ambaye aliibuka Mfungaji Bora wa EPL msimu uliopita na hivyo kutia kibindoni ‘kiatu cha dhahabu’.

Hadi kufikia mwisho wa msimu uliopita katika EPL, Liverpool na Manchester United ndizo timu za pekee ambazo ziliishinda Man-City ligini. Silaha kubwa ya Liverpool ni uwezo wao wa kuanzisha mashambulizi ya kushtukiza kupitia kwa wachezaji wao wenye kasi sana na ambao hawahitaji nafasi nyingi ili kufunga mabao.

Huu ndio upekee wa kikosi cha Klopp. Kwa namna moja au nyingine, Liverpool ni timu ambayo ubora wake utadhihirika kila inapocheza na mpinzani aliye na mazoea ya kumiliki mpira kwa muda mrefu na ambaye anacheza soka ya kushambulia kama mabingwa washikilizi wa taji la EPL, Man-City.

Mnamo 2013, Klopp aliwachochea Dortmund kutinga fainali ya UEFA baada ya kuwabandua Real Madrid kwenye nusu-fainali. Ingawa kulikuwapo na klabu nyingi zenye vikosi bora zaidi kuliko Dortmund wakati huo, mfumo na upekee wa mbinu za ukufunzi wa Klopp uliwatambisha wapambe hao wa soka ya Ujerumani.

Man-City na Arsenal kwa sasa wana vikosi bora zaidi kuliko Liverpool. Hata hivyo, iwapo kuna timu iliyo na nafasi kubwa sana ya kusambaratisha kabisa ndoto za Man-City ya kocha Pep Guardiola na Arsenal ya mkufunzi Unai Emery katika jitihada za kuwania ubingwa wa EPL msimu ujao, basi ni Liverpool inayonolewa na Klopp!

Hadi kufikia sasa, hakuna kitu kizuri zaidi kuliko kuwa shabiki wa Liverpool. Hadi msimu mpya utakapoanza, Klopp atakuwa amefanikiwa kuwafanya wachezaji wake kuoanisha mitindo yao na kuelewa kabisa uwanjani.

Usajili ambao Klopp tayari ameufanya muhula huu ni ishara ya ukubwa wa kiu aliyonayo ya kutia kibindoni ufalme wa EPL na taji la UEFA. Japo matumizi yake ya fedha yameshtumiwa na mahasimu wake wakuu katika EPL, naona kwamba Klopp amepania kujenga kikosi thabiti kitakachohimili mawimbi yaushindani katika EPL na UEFA.

Baada ya kujinasia huduma za viungo Naby Keita na Fabinho, Klopp alimsajili fowadi Xherdan Shaqiri kabla ya kujitwalia maarifa ya kipa Alisson Becker ambaye ni mzawa wa Brazil.

Mbali na Man-City na Arsenal, sioni mpinzani yeyote mwingine wa Liverpool msimu ujao. Baada ya kumsajili kiungo Jorginho kutoka Napoli, Chelsea ambao wanaanza kuzoea maisha chini ya kocha mpya Maurizio Sarri, wamepotezewa dira na hatua ya Real kuanza kuwahemea nyota Eden Hazard, Willian na kipa Thibaut Courtois.

Chini ya Emery aliyemrithi Arsene Wenger uwanjani Emirates, Arsenal wanazidi pia kujiimarisha. Kikosi hicho tayari kimejinasia huduma za Stephan Lichtsteiner, Lucas Torreira, Bernd Leno, Sokratis Papastathopoulos na Matteo Guendouz.

Nikitarajia Tottenham kufunga orodha ya nne-bora mwishoni mwa kampeni za EPL mnamo 2018-19, nahisi kwamba changamoto ambazo kwa sasa zinawakabili Man-United na Chelsea zitawaponza hatimaye.

Badala ya kujishughulisha sokoni kama Klopp anavyofanya, Jose Mourinho wa Man-United bado analumbana na wachezaji Paul Pogba, Eric Bailly na Anthony Martial ambao huenda wakashawishika kuugura uwanja wa Old Trafford. Man-United kwa sasa wanahitaji winga mmoja, beki wa kati na mvamizi atakayesaidiana na Romelu Lukaku kuwateketeza mahasimu.

De Bruyne acheka na nyavu za mapenzi kwa bao kabambe

Na CHRIS ADUNGO

KIUNGO mahiri wa Manchester City na timu ya taifa ya Ubelgiji, Kevin De Bruyne kwa sasa anatarajia kuwa baba wa watoto wawili na hivyo kuifanya familia yake kuwa ya watu wanne.

Hii ni baada ya mkewe Michele Lacroix kujipata katika ulazima wa kuanza kuhudhuria kliniki kutokana na bao alilofungwa na sogora huyo.

Kufikia sasa, De Bruyne anajivunia mtoto Mason Milian katika uhusiano wake wa kimapenzi na Michele.

Akishindwa kabisa kuyaficha matarajio yake wiki jana, Michele alipakia kwenye mtandao wake wa Instagram picha zake za ujauzito na kuambatanisha maandishi: “Punde tutakuwa familia ya wanne”.

Isitoshe, kichuna huyo alifichua kwamba De Bruyne alimfunga bao hilo litakalohesabiwa mnamo Februari 2019 punde baada ya kipenga cha kuashirikia mwisho wa msimu wa 2017-18 kupulizwa rasmi mnamo Mei 2018.

Michele alimzalia De Bruyne mtoto wao wa kwanza mnamo 2016, miezi mitano baada ya nyota huyo kuagana rasmi na VfL Wolfsburg ya Ujerumani na kutua uwanjani Etihad kuvalia jezi za Man-City.

De Bruyne alimvisha demu wake pete ya uchumba mnamo Desemba 2016 katika mkahawa wa Eiffel Tower jijini Paris, Ufaransa kabla ya kufunga naye pingu za maisha nchini Italia mwishoni mwa Juni 2017.

Zogo la familia ya kichuna laahirisha harusi ya Gareth Bale

Na CHRIS ADUNGO

NYOTA wa Real Madrid na timu ya taifa ya Wales, Gareth Bale ameahirisha tena harusi yake na kichuna Emma Rhys-Jones hadi Agosti 2019 baada ya kuibuka kwa mtafaruku mkubwa katika familia ya wakwe zake watarajiwa.

Awali, harusi hiyo ilikuwa iandaliwe jijini Turin, Italia mwezi ujao huku mwanamuziki maarufu mzawa wa Amerika, Beyonce Knowles-Carter, 36, akitarajiwa kuwatumbuiza wageni katika hafla hiyo kwa kima cha Sh220 milioni.

Akihojiwa na gazeti la The Sun wiki jana, Emma, 26, alikiri kwamba kuahirishwa kwa sherehe hizo kutampa muda wa kuipatanisha famalia yake na pia kumwezesha kujiweka katika umbo sawa baada ya kujifungua majuzi.

Mnamo Juni 2018, Emma alimpa baba yake, Martin, 54, ilani ya kutohudhuria kabisa harusi yake wakati atakapofunga pingu za maisha na Bale, 29.

Hatua hiyo ya Emma ambaye ni mama wa watoto watatu ilichochewa na ufichuzi kwamba Martin, aliyewahi kufungwa jela kwa makosa ya ulaghai na utapeli, alikuwa akilimenya tunda bichi la kidosho Alina Baranova, 29.

Kwa mujibu wa Emma, hakuna jambo la aibu zaidi kuliko hilo la baba yake kuchovya asali kwenye mzinga wa kichuna ambaye kiumri, ana nusu ya miaka ya dume hilo.

Hadi kufikia sasa, Emma na Bale wamejaliwa watoto watatu – Alba Violet, 5, Nava Valentina mwenye umri wa miaka 2 na Axel Charles aliyezaliwa mwishoni mwa Mei, 2018.

“Si kitambo sana tangu Martin atoke jela baada ya kuhukumiwa kifungo cha miaka sita kwa kosa la utapeli wa zaidi ya Sh290 milioni nchini Marekani. Hatua yake ya kujinasia penzi la Alina ambaye ni muuzaji wa maua, ilimtia Emma aibu kubwa. Isitoshe, kimaadili, huyo ni demu ambaye Martin anastahili kumwita mtoto wake” akaandika msemaji wa familia ya Bale.

Kwa mujibu wa msemaji huyo, Martin alikuwa amepanga kutumia harusi ya mwanawe kama jukwaa la kumtambulisha rasmi Alina kwa familia yake. Mfanyabiashara huyo aliyemtema mkewe (mamaye Emma), Suzzane mnamo 2005, amekuwa akitoka kimapenzi na Alina kisiri kwa miezi mitano iliyopita.

Wengine ambao Emma aliwakataza kuhudhuria harusi yake baada ya kutuhumiwa kuwa walanguzi wa dawa za kulevya, wezi wa saa za thamani kubwa na waporaji wa zaidi ya Sh110 milioni ni binamu yake Epiphany Dring, 29, shangazi yake Jane Nurns, 56, Carl Dring ambaye ni babaye Epiphany na mume wa shangaziye, Daniel, 42.

Emma na Bale sasa wanapanga kurasimisha uhusiano wao wa kimapenzi mnamo Agosti mwakani kupitia sherehe kubwa za harusi zitazoandaliwa jijini Cardiff, Wales.

Gazeti la The Sun linaarifu kwamba harusi ya wawili hawa ambayo iliahirishwa tena mnamo Aprili 2017 inapigiwa upatu kufikia kiwango cha ile iliyomshuhudia nyota Lionel Messi akifunga silisili za maisha na kidosho Antonella Ruccuzzo mnamo Juni 24, 2017.

Bao la Martial kwa Melanie lahesabiwa rasmi na refa wa mahaba

Na CHRIS ADUNGO

FOWADI matata wa Manchester United, Anthony Martial ameingia katika orodha ya vidume kamili baada ya bao alilomfunga kipusa Melanie Da Cruz mnamo Oktoba 2017 kuhesabiwa rasmi na refa wa mahaba.

Baada ya kuarifiwa kuhusu hali ya mchumba wake, Martial alilazimika kuondoka ghafla kambini mwa Man-United nchini Amerika na kutua jijini Paris, Ufaransa kushuhudia kuzaliwa kwa kimalaika Swan.

Ujio wa Swan kwa sasa kunamfanya Martial, 22, kuwa baba wa watoto wawili.

Kabla ya kuanza kujirinia asali mzingani mwa Melanie mnamo 2016, Martial alikuwa katika uhusiano wa kimapenzi na kichuna Samantha Jacquelinet aliyemzalia mtoto wa kike, Peyton mwenye umri wa miaka miwili.

Akipania kutangazia ulimwengu mzima ukubwa wa furaha yake, Martial alitumia mtandao wa Instagram kupakia picha iliyoonesha sehemu za miguu ya mtoto Swan na kuambatanisha maelezo: “Mungu nakushukuru kwa kunipa mtoto wa pili ambaye amezaliwa leo akiwa mwingi wa afya.”

Kwa upande wake, Melanie ambaye ni mwanahabari maarufu nchini Ufaransa, alipakia mtandaoni picha zake za awali na kuandika, “Nawashukuru nyote. Jina ni Swan Anthony Martial. Mungu akubariki mwanangu.”

Akihojiwa na gazeti la The Sun mwishoni mwa mwezi jana, Samantha alikiri kwamba kusambaratika kwa ndoa kati yake na Martial kulichangiwa na mwanamuziki Emily Wademan aliyeanza kumwanikia mwanasoka huyo tunda lake mwanzoni mwa 2016.

Baada ya jaribio la Samantha kurudiana na Martial kugonga mwamba, kidosho huyo alianza kumpaka tope Melanie kwa kudai kuwa alikuwa kahaba aliyewania penzi la aliyekuwa mumewe kwa nia ya kuzifakamia hela zote za mchezaji huyu.

Isitoshe, Samantha alidai kuelewa urefu wa historia ya Melanie katika kuwalaghai wanaume na kuzinyonya hela zao na hivyo kumtaka Martial ajiandae kutemwa pindi ‘chemchemi yake ya fedha itakapokauka’.

Hadi kufikia mwisho wa mwaka jana, Samantha alikuwa akiteswa na uhalisia wa kuyakosa mapenzi motomoto ya Martial ambaye alipania kuponda raha ya ujana na Melanie nchini Mauritius baada ya kocha Didier Deschamps kutomteua kuunga kikosi kilichonyanyulia Ufaransa ubingwa wa Kombe la Dunia nchini Urusi mwaka huu.

Baada ya uhusiano wa Martial na kocha Jose Mourinho kudorora, huduma za fowadi huyu zinawaniwa kwa sasa na Juventus, Borussia Dortmund, Chelsea na Tottenham Hotspur.

Mbunge afokea wanaopinga mradi wa nishati ya makaa Lamu

Na KALUME KAZUNGU

MBUNGE wa Lamu Mashariki, Athman Sharif, amewataka wakazi wa Lamu wanaopinga kuanzishwa kwa mradi wa nishati ya makaa ya mawe eneo hilo kukoma kulalamika.

Akizungumza kwenye ukumbi wa Huduma Centre mjini Lamu wakati wa kikao kilichowakutanisha wakazi na kamati ya bunge la kitaifa kuhusu mazingira na maliasili mwishoni mwa juma, Bw Sharif aliwakashifu wale wanaoendeleza shinikizo za kupinga kuanzishwa kwa mradi huo Lamu kwa kukosa kutafakari iwapo mwekezaji wa mradi huo amefuata sheria kikamilifu hadi kufikia hatua iliyopo.

Mradi wa nishati ya makaa ya mawe ambao unakadiriwa kugharimu kima cha Sh 200 bilioni uko chini ya udhamini wa kampuni ya Amu Power.

Mradi huo unatarajiwa kujengwa eneo la Kwasasi, tarafa ya Hindi, Kaunti ya Lamu.

Kufikia sasa jumla ya ekari 975 za ardhi tayari zimetengwa eneo la Kwasasi ili kufanikisha ujenzi wa mradi huo unaotarajiwa kuzalisha megawati 1,050 za umeme punde utakapokamilika.

Bw Sharif alisema hairidhishi kwamba kila mara kumekuwa na utata na pingamizi tele miongoni mwa wakazi na mashirika ya kijamii kila mara kunapokuwa na mijadala kuhusu mradi wa nishati ya makaa ya mawe.

Alisisitizia wakazi kutambua kwamba bunge la awali la kaunti ya Lamu tayari lilipitisha mradi huo, hivyo akawataka viongozi na wakazi kuja pamoja ili kuafikiana ni jinsi gani dukuduku zilizopo kuhusu mradi huo zitatatuliwa.

“Tusikimbilia tu kupinga au kuunga mkono mradi wa nishati ya makaa ya mawe. Cha msingi ni kuangalia je, mwekezaji amefuata sheria kikamilifu au la? Kwa wale wanaokimbilia kupinga, ningewataka wafahamu kwamba bunge lenu la awali la kaunti ya Lamu tayari limepitisha mradi huo.

Lazima pia itambulike kwamba hata tukapinga au kuunga mkono mradi, ni asilimia kidogo sana iliyobakia kubadilisha lolote kuhusiana na kuanzishwa kwa mradi huo hapa Lamu.

Cha msingi ni sisi viongozi na wakazi kuja pamoja na kujadiliana ni jinsi gani dukuduku zilizopo zitatatuliwa kabla ya mradi uanze,” akasema Bw Sharif.

Upatanishi wasaidia kesi 600 kutatuliwa

Na MWANDISHI WETU

Mpango wa upatanishi uliozinduliwa na mahakama miaka miwili iliyopita, umesaidia kutatua kesi 600, Jaji Msimamizi wa Mahakama Kuu, Lydia Achode (pichani) amesema.

Alisema watu wengi wameanza kukumbatia mpango huo ambao kwa sasa umesaidia kutatua kesi hasa katika mahakama ya kututua mizozo ya kibiashara.

Akiongea katika kongamano la upatanishi la mwaka huu, Jaji Achode alisema mfumo huo unaendelea kukita mizizi katika mahakama.

Jaji Achode alisisitiza kuwa mfumo huo ni muhimu kwa kupunguza mrundiko wa kesi na kuachilia pesa zinazozimwa kwa sababu ya kesi.

Mahakama ilianza kufanyia majaribio mfumo huo Aprili 4 2016 katika mahakama ya kutatua mizozo ya kibiashara na ya kifamilia.

Baada ya mpango huo kufaulu katika vitengo hivyo, ulianza kutumiwa kutatua kesi za kijamii katika mahakama Kuu, Mahakama ya Watoto na Mahakama ya kutatua kesi za kibiashara.

Kwa sasa mipango ya kuanzisha upatanishi katika mahakama kote nchini umebuniwa na unaendelea kutekelezwa.

NAROK: Eneo ambako ndugu huoza dada zao bila kuchukuliwa hatua

Na BENSON MATHEKA

WATOTO wasichana eneo la Olpusimoru, Kaunti ya Narok wanakabiliwa na hatari ya kuozwa mapema na ndugu zao bila kuchukuliwa hatua na yeyote, uchunguzi wa Taifa Leo umefichua.

Wanaume hao wanaogopewa hivi kwamba hakuna anayethubutu kupinga hatua yao, wakiwemo wazazi wao wanaokumbatia mila na utamaduni zao kwa dhati.

Kwa wanaume hao, msichana ni mali inayofaa kuuzwa wakati wowote mtu akipenda, hata kama ni kumbadilisha na mifugo wachache.

Vijana hao wanaogopewa sana hivi kwamba wanaharakati na maafisa wa utawala ambao wasichana hao hukimbilia kupata hifadhi ili wasiozwe mapema kwa wazee wa rika la mababu wao, wanaishi wakihofia maisha yao.

Lakini kwa Pasta Stella Kerema na mumewe, ni lazima desturi hii ikomeshwe kwa vyovyote vile. Stella anahofia kwamba maisha ya wasichana katika eneo la Olpusimoru yataathirika iwapo wakazi hawatabadilisha tabia.

“Kama kuna yeyote anayejali maisha ya mtoto msichana, anafaa kufika hapa na kupigana kwa jino la ukucha kuzima desturi hii iliyopitwa na wakati,” alisema.

Mhubiri huyo amefaulu kuwaokoa wasichana wanne waliokuwa wamepangiwa kuozwa wakiwa na umri mdogo na kuhakikisha wanaendelea na masomo yao.

“Huwa wanakimbilia katika kanisa ninaloongoza nikiwa na mume wangu. Siwezi kuwafukuza licha ya upinzani kutoka kwa jamii,” anasema.

Juhudi zake hazijaungwa na shirika lolote la serikali, mashirika ya kutetea watoto au baadhi ya maafisa wa utawala katika eneo hilo. Anatoa mfano wa kisa kimoja ambapo ndugu wa msichana aliyetorokea kwake ili asiozwe walivamia nyumba yake.

“Mnamo Juni 6 2017, nilipiga simu kwa Childline Kenya kupitia nambari ya kuripoti dhuluma kwa watoto 116 kwamba msichana mwenye umri wa miaka 13 aliyepata alama 270 kwenye KCPE alikuwa akiozwa na ndugu yake kwa mwamamume mzee,” alisema Bi Stella.

Kwenye maelezo yaliyonakiliwa na Child Line Kenya, hakufichua jina la mwanamume huyo kwa kuhofia maisha yake.

Anasema siku moja kabla ya kupiga simu hiyo, mwanamume huyo alikuwa ameongoza wanaume wengine kuvamia nyumba yake kumsaka msichana huyo alipopata habari kwamba alikuwa amekimbilia huko.

Kulingana na ripoti ya Childline Kenya iliyopokelewa Juni 6, 2017, wazazi wa msichana huyo ni wazee na walikuwa wakiishi Mazelek Tanzania, mwanao alipopanga kumuoza dada yake.

“Baba ni mzee sana na aliacha mali yake kwa wanawe na ni wao waliopanga kumuoza kwa mzee anayefahamika kama Julius Lolgeso kutoka Nadoshoge, Tanzania,” Bi Stella alisema.

Mumewe alipouliza wazazi wa msichana huyo kwa nini hawakutaka kumpeleka shule ya upili, walidai hawakuwa wamepata shule ya kumpeleka. Stella asema yeye na mumewe walitafuta shule lakini wazazi walikataa kumlipia karo.

“Baba alipoulizwa, alisema japo alitaka kumlipia msichana huyo karo ya shule, wanawe hawakutaka dada yao asome,” alieleza. Stella anasema alijitolea kumtafutia msichana huyo shule nyingine lakini wazazi walikataa kulipa karo wakisema hawakuwa na pesa hadi wauze mifugo.

Anasema aliomba shule iwapatie muda watafute pesa lakini walikataa kulipa karo huku ndugu ya msichana akisema ni lazima aozwe. “Walisema wangempeleka Tanzania akarudie darasa la sita na msichana alikuwa tayari kufanya hivyo kabla ya kugundua kwamba walikuwa wamepanga kumuoza kwa mzee wa rika la babu yake,” anasema Bi Stella.

Kwa mara ya pili, msichana huyo alitorokea kwa nyumba ya Stella na wakalazimika kumficha katika eneo ambalo hakuna aliyemfahamu.

Hii ilikasirisha ndugu wa msichana huyo wakavamia nyumba yake na kusaka kila mahali. Walipomkosa, walianza kutisha Stella na mumewe.

Stella anasema alipiga ripoti katika kituo cha polisi cha Olpusimoru na maafisa wakamuita ndugu na baba wa msichana huyo lakini hawakuenda.

Polisi pia hawakumpatia nambari ya kuripoti kisa hicho lakini walimwambia wangempa akihiitaji. Ajabu ni kwamba ndugu ya msichana alienda kupiga ripoti katika kituo hicho kwamba baadhi ya watu walikuwa wameiba dada yake.

Licha ya kuwa Stella alikuwa amepiga ripoti, mwanamume huyo hakuchukuliwa hatua. Stella anasema ingawa Childline Kenya iliahidi kuwasiliana naye haraka ili imuunganishe na afisa wa watoto kaunti ya Narok hakupata msaada wowote. “Sikuona yeyote hapa, sikupigiwa simu na yeyote,” alisema.

Kulingana na Mkurugenzi Mkuu wa Childline Kenya Martha Keya, Stella alitumwa kwa afisa wa watoto kaunti ya Narok lakini alipopigiwa simu hakupatikana.

“Hakuna aliyewasiliana nami. Nilihakikisha msichana huyo alijiuunga na shule ya upili. Yeye ni mmoja wa wanne ambao walipitia masaibu sawa lakini sawa wako salama shuleni,” alisema.

Hata hivyo, alikataa tufichue shule wanazosomea kwa sababu ya usalama wa wasichana hao. Anasema akipata msaada anaweza kusaidia wasichana wengi wanaoteseka kwa kuozwa na jamaa zao badala ya kuwasomesha.

Familia ya polisi ‘aliyejiua’ yadai haki

Na SAMMY LUTTA

FAMILIA ya afisa wa polisi aliyedaiwa kujinyonga katika Kaunti ya Isiolo sasa inataka kupata haki baada ya mwili kupatikana na majeraha ya risasi. Konstebo Kelvin Aleper Nyanga, 23, wa Kikosi cha Kukabiliana na Dharura (RDU) alikuwa akifanya kazi katika kambi ya Ngarmara hadi mauti yake Julai 11.

Bi Marcella Karenga, dada ya mwendazake alisema maafisa wa RDU wa Isiolo walidai kuwa Aleper alijitia kitanzi lakini familia imepuuzilia mbali taarifa hiyo.

“Tunashuku kwamba jamaa yetu aliuawa kwa risasi. Tunaomba Tume ya Kitaifa ya Haki za (KNCHR) kuanzisha uchunguzi ili kubaini ukweli kuhusu kilichosababisha kifo cha ndugu yangu,” akasema.

Familia ilishikilia kuwa jamaa yao hakuwa na jambo lolote lililokuwa likimsumbua hadi kufikia hatua ya kujiua.

“Tunaamini kuwa aliuawa na tuna haki ya kujua ukweli,” akasema Bi Karenga.

“Nilipigia simu na Inspekta Hassan kutoka Isiolo aliyenifahamisha kwamba ndugu yangu alijiua. Nilimuuliza ikiwa kweli walishuhudia akijiua, wakanijibu kwamba walipata mwili wake bila kujua kiini cha mauti yake.

“Juzi Inspekta alinieleza kwamba ndugu yangu alienda hospitalini kupimwa na aliporejea alikuwa na huzuni. Madai hayo yote hayana mashiko,” akaongezea.

Familia yake inasema kuwa maafisa wenzake walitelekeza mazishi ya mwendazake, kama ishara ya kuonyesha kuwa alijitoa uhai. Waziri wa Kilimo wa Turkana Chris Aletia ambaye pia ni jamaa ya mwndazake alisema hata maafisa walioleta maiti ya mwendazake nyumbani hawakuvalia sare za polisi.

Viongozi wa Turkana wakiongozwa na kiongozi wa Chama cha Thirdway Alliance Party Ekuru Aukot na mbunge wa Loima Jeremiah Lomorukai walihusisha kifo cha Aleper na operesheni dhidi ya wezi wa mifugo inayoendelea katika Kaunti ya Isiolo.

Wanasiasa hao walidai kuwa huenda aliuawa baada ya kushukiwa kuwa huenda alifichua siri kuhusu wizi wa mifugo kwa watu wa jamii yake ya Waturkana.

Serikali ndiyo chanzo cha migomo shuleni – KUPPET

Na Gaitano Pessa

KATIBU Mkuu wa Chama cha Walimu wa Vyuo Anuwai (KUPPET) ameilaumu serikali kwa kuwa kiini kikuu cha kuongezeka kwa mioto shuleni.

Bw Misori (pichani) alisema kwamba wimbi la uchomaji shule lililopo limechangiwa na hali sawa, ila serikali imeshindwa kuidhibiti.

Akizungumza Jumamosi mjini Busia kwenye mkutano wa kila mwaka wa chama, Bw Misori alisema kuwa sababu kuu za mioto hiyo ni matatizo ya masuala ya usimamizi ambayo serikali imeshindwa kuyatatua. Vile vile, alitaja hali mbaya ya miundomsingi kama kiini kingine kikuu.

“Hatuhitaji uchunguzi kufahamu kiini kikuu cha hali ya mioto na migomo shuleni. Serikali imechangia moja kwa moja, kwani mazingira ya masomo katika shule husika yako katika hali mbaya sana,” akasema.

Akaongeza: “Ni vipi utawaeleza wanafunzi kuendelea kukaa katika shule ya mabweni ambayo haina vyumba vya malazi, kumbi za maakuli na madarasa ya kutosha. Serikali inapaswa kuchukua lawama moja kwa moja.”

Katibu huyo alikuwa ameandamana na Mwakilishi wa Wanawaka katika kaunti hiyo, Catherine Wambilianga, msimamizi mkuu wa tawi hilo Mophat Okisai na maafisa kutoka kaunti jirani.

Bi Wambilianga, aliye pia ni Katibu wa Mipango katika chama alisema kuwa imefikia wakati ambapo lazima serikali imalize kimya chake kuhusu mioto hiyo.

“Tunakabiliwa na changamoto hizi kwa kuwa serikali imekataa kutoa Sh5 kwa shule, ili zitumiwe katika uimarishaji wa miundosmsingi husika. Hilo ndilo limezua hali ya kutotosheka miongoni mwa wanafunzi. Serikali inaonekana kusahau kwamba si walimu wanachangia wala kuwachochea wanafunzi,” akaongeza.

Aliapa kuhakikisha kwamba changamoto zote zinazowakabili walimu zimejadiliwa katika Bunge la Kitaifa.

Miili ya wafu isiyo na wenyewe yatatiza hospitali ya Thika Level 5

Na Mary Wambui

WASIMAMIZI wa Hospitali ya Thika Level Five wameeleza wasiwasi wao kuhusu idadi kubwa ya miili ya wafu ambayo jamaa za waliofariki hawajulikani katika hifadhi ya maiti ya General Kago.

Ilisemekana idadi kubwa miongoni mwa miili hiyo ni ya watu waliohusika katika ajali na waliouawa kwenye uhalifu kisha ikapelekwa hapo na polisi.

Kwa sasa kuna miili 70 isiyofahamika jamaa zao katika chumba hicho kinachoweza kuhifadhi miili 114, na mingine imekaa hapo tangu mwaka wa 2014.

“Miili hiyo inapotezea hifadhi ya maiti mapato kwani imewekwa katika nafasi ambazo zingekodishwa. Inapozidi kukaa katika chumba hicho, hospitali inazidi kutumia fedha kuiihifadhi kwa miaka hiyo yote na hali hii inatumalizia rasilimali,” akasema afisa mkuu wa afya katika Kaunti ya Kiambu, Bw Jacob Toro.

Hospitali hiyo sasa imetoa wito kwa familia ambazo jamaa zao walitoweka, kwenda katika hifadhi hiyo ili wabainishe kama jamaa zao ni miongoni mwa wale ambao miili yao imehifadhiwa huko.

Hivi majuzi, Serikali ya Kaunti ya Kiambu ilitoa wito sawa na huo kupitia kwa vituo vya redio vya Kikuyi lakini baadaye ni familia moja pekee iliyotambua mwanao ambaye alifariki katika ajali iliyotokea Githurai mwaka wa 2016.

Hata hivyo familia hiyo haingeweza kugharamia ada za uhifadhi kabla kukabidhiwa mwili huo, hali iliyolazimisha hospitali kuwapunguzia ada kutoka zaidi ya Sh300,000 hadi Sh10,000.

Tikiti: ODM sasa yatishia kuadhibu Gavana Obado kwa kupinga chama

VIVERE NANDIEMO na BARACK ODUOR

MAAFISA wa Chama cha ODM wametishia kuchukua hatua za kinidhamu dhidi ya Gavana wa Migori, Bw Okoth Obado, kufuatia hatua yake ya kupinga msimamo wa chama kuhusu uchaguzi mdogo wa useneta katika kaunti hiyo.

Chama hicho Ijumaa kilimkabidhi waziri wa zamani Ochillo Ayacko tikiti moja kwa moja kuwania wadhifa huo uliobaki wazi baada ya kifo cha aliyekuwa seneta Ben Oluoch Okello.

Kulikuwa na wanasiasa wanane waliowasilisha ombi la kutaka tikiti hiyo ya ODM kwa uchaguzi huo mdogo uliopangiwa kufanyika Oktoba 8.

ODM ilitangaza uamuzi wake saa chache baada ya mahakama ya rufaa ya Kisumu kuamua kwamba Bw Obado alishinda ugavana kihalali, kwenye kesi iliyokuwa imewasilishwa na Bw Ayacko kupinga matokeo ya uchaguzi wa ugavana.

Bw Obado aliapa hataunga mkono uamuzi wa ODM kumpa hasimu wake wa kisiasa tikiti moja kwa moja kuwania useneta akataka wakazi wa Migori wasiunge mkono mgombeaji wanayesukumiwa kwa lazima na maafisa walio Nairobi.

Wakizungumza Jumamosi kwenye harambee katika eneo la Suna Magharibi, viongozi wa ODM wakiongozwa na Mkurugenzi wa Uchaguzi katika chama hicho Junet Mohamed na Mkurugenzi wa Masuala ya Kisiasa Opiyo Wandayi, walimkashifu gavana huyo na kudai anasaliti chama.

“Hatutaruhusu kuwe na wasaliti chamani. Haiwezekano kwamba unafurahi unapopewa tikiti ya ODM kuwania wadhifa wa kisiasa lakini unakasirika mwenzako akipewa,” akasema Bw Mohamed ambaye pia ni Mbunge wa Suna Mashariki.

Aliongeza: “Ukipinga ODM Migori, tutakabiliana na wewe vikali. Hakuna vile unashinda kiti uchaguzini kupitia chama hiki kisha unaanza kukimbia huku na kule kukikashifu baadaye. Tutakufunza adabu, wewe subiri tu utaona.”

Hata hivyo, kwenye kikao cha wanahabari siku hiyo hiyo, Bw Obado alikosoa viongozi wanaomkashifu akasema wao hao ndio waliomuunga mkono mgombeaji huru wa ugavana katika uchaguzi uliopita ilhali yeye ndiye alikuwa mgombeaji kwa tikiti ya ODM. Kulingana naye, itakuwa haki kama wanachama wa ODM waliompinga mwaka uliopita wataadhibiwa kwanza.

“Licha ya kuwa nilikuwa na tikiti ya ODM, ni viongozi wao hao ambao walikuwa wakidai nimeasi chama na wakapiga kampeni kunipinga, hakuna aliyewalaumu. Sitakubali kutishwatishwa,” akasema.

Kwa upande wake, Bw Wandayi alisema viongozi wa chama watashauriana na kuamua hatua ya kinidhamu itakayochukuliwa dhidi ya gavana huyo.

“Mtu mwingine yeyote yuko huru kumpinga Ayacko lakini kama wewe ni mwanachama wa ODM, bila kujali wadhifa wako katika jamii, hatutasita kukuadhibu na utashangaa,” akasema Mbunge huyo wa Ugunja. Mbunge wa Suna Magharibi Peter Masara na Mbunge Mwakilishi wa Kaunti ya Migori Pamela Odhiambo, waliomba wanasiasa wa ODM waheshimu chama hicho na kumuunga mkono Bw Ayacko.

“Sote katika ODM lazima tufuate msimamo wa chama katika uchaguzi mdogo ujao. Lazima tuthibitishe uzalendo wetu kwa chama kwa kumuunga mkono Bw Ochillo,” akasema Bi Odhiambo. Kwingineko katika Kaunti ya Homa Bay, dalili zimeonyesha kuwa ODM imeanza kuwashawishi wanasiasa waliokuwa wagombeaji huru katika uchaguzi uliopita warudi chamani.

Matatu ya abiria 14 yanaswa ikibeba wanafunzi 31, wasichana na wavulana

Na CHARLES WANYORO

POLISI mjini Embu wamewakamata wahudumu wa matatu waliokuwa wakiwasafirisha wanafunzi 31 wa shule za upili kwa matatu ya abiria 14.

Wanafunzi hao kutoka Shule za Ikuu Girls na Ikuu Boys, Kaunti ya Tharaka-Nithi walikuwa wakielekea Nairobi kwa likizo ya Agosti mnamo Jumamosi.

Baada ya kufika mjini Runyenjes kwenye barabara ya Meru – Embu, matatu hiyo ilisimamishwa na polisi lakini dereva akakaidi na kutoroka. Kulingana na polisi, hawakulifuata gari hilo kwani walihisi kwamba huenda likaendeshwa kwa mwendo kasi, hali ambayo ingehatarisha maisha ya wanafunzi hao.

Polisi waliwasiliana na wenzao mjini Embu ambao waliweka kizuizi barabarani, hali iliyolazimu matatu hiyo kusimama.

Polisi walishangaa kuona idadi kubwa ya wanafunzi waliokuwa wamebebwa, huku wahudumu hao wakitoroka. Hata hivyo, walikamatwa na kuzuiliwa katika Kituo cha Polisi cha Embu, ambako gari hilo pia lilipelekwa.

Mkuu wa Polisi wa Embu Magharibi, Julius Meli alikataa kuzungumzia mashtaka ambayo watawafungulia wawili hao.

Baadaye polisi waliwasaidia wanafunzi kupata magari mengine na kuendelea na safari yao.

Kwingineko, utulivu umerejea katika mji wa Sololo, Kaunti ya Marsabit, baada ya taharuki iliyodumu kwa siku tatu kufuatia kukamatwa kwa mshukiwa wa ugaidi kijijini Manyatta Golbo.

Hali ya taharuki iliibuka baada ya shambulio dhidi ya msafara wa magari ya polisi ambayo yalikuwa yakisafirisha mshukiwa huyo mjini Moyale kutoka Kituo cha Polisi cha Sololo. Shambulio hilo lilifanyika katika eneo la Qate.

Naibu Kamishna wa Kaunti Ndogo ya Sololo, Dennis Kieti alisema kuwa maafisa zaidi wa usalama walitumwa katika eneo hilo ili kuimarisha usalama. Vile vile, alithibitisha kwamba mshukiwa huyo alisafirishwa jijini Nairobi ili kuhojiwa zaidi.

Kulingana na Bw Kieti, mshukiwa alipatikana na bastola aina ya Ceska yenye risasi nane. Alisema kuwa wanashuku kuwa huenda ni mwanachama wa kundi la wanamgambo la Oromo Liberation Front (OLF) kutoka Ethiopia.

Mshukiwa alikamatwa na Kikosi Maalum cha Polisi wa Kukabiliana na Ugaidi (ATPU).

Tukio hilo lilizua taharuki, huku baadhi ya vijana wakiandamana kushinikiza kuachiliwa kwake.

Mibabe wa siasa wajipanga kisiri kuhusu 2022

Na BENSON MATHEKA

MIKUTANO ya siri kati ya viongozi wakuu wa kisiasa imeshika kasi huku mabadiliko makubwa yakitarajiwa kuhusiana na uchaguzi wa 2022.

Inakisiwa kuwa lengo la mikutano hiyo ni kusuka miungano mipya ya kisiasa, ambayo wadadisi wanasema itaamua mwelekeo wa siasa za Kenya.

Rais Uhuru Kenyatta amekuwa akitutana na kiongozi wa upinzani Raila Odinga, jambo ambalo limewatia tumbojoto washirika wa kisiasa wa Naibu Rais William Ruto.

Mkutano wao wa hivi punde umeripotiwa kufanyika mjini Mombasa. Walipotangaza muafaka wao Machi 29, viongozi hao walikiri kwamba walikuwa wakikutana kwa siri hadi walipokubaliana kufanya kazi pamoja.

Baada ya kukutana Mombasa, Rais Kenyatta alikutana na Rais Mstaafu Daniel Moi na mwanawe Seneta Gedion Moi, nyumbani kwa Mzee Moi, Kabarak.

Rais alisema alipitia kumjulia hali Mzee Moi ambaye ni mlezi wake kisiasa, akielekea katika mazishi ya mke wa jirani yake, Luteni Jenerali Jackson Kasaon.

Hata hivyo, kukosekana kwa Naibu wake William Ruto, hasimu wa kisiasa wa familia ya Moi, ambaye pia alihudhuria mazishi hayo, kulizua maswali kuhusu dhamira ya mkutano huo.

Ikizingatiwa kuwa ziara ya Rais huchukua muda na rasilmali kupanga, wadadisi wanasema haukuwa mkutano wa kupitia tu.

Haikuwa mara ya kwanza Rais Kenyatta kutembelea Mzee Moi akiwa na mwanawe Gedion, ambaye ilisemekana alimzuia Bw Ruto kumuona baba yake alipomtembelea mapema mwaka huu.

Juhudi za Bw Ruto kumtembelea Mzee Moi zilijiri siku chache baada ya Bw Odinga kumtembelea rais huyo wa pili wa Kenya akiandamana na Gedion.

Hii ilifuatiwa na mkutano wa Seneta Moi na wafanyabiashara mabwenyenye kutoka ngome ya kisiasa ya Rais Kenyatta ya eneo la Mlima Kenya.

Duru zilisema kuwa mkutano huo ulilenga kupanga mikakati ya kumjenga Gideon kabla ya 2022 ili aweze kutekeleza wajibu mkubwa.

Wafanyabiashara hao wana ushawishi mkubwa wa kisiasa eneo hilo na Kenya kwa jumla na wadadisi wanasema mkutano wao na Seneta Moi hauwezi kupuuzwa.

Baada ya mkutano huo, mbunge wa Tiaty, William Kamket alinukuliwa akisema kuwa marafiki wote wa Moi ambao wanajali nchi hii wanakutana kote nchini.

Katibu Mkuu wa Kanu, Nick Salat naye alinukuliwa akisema kuwa watu wengi wako tayari kushirikiana na cha Kanu. “Watu wengi wako tayari kuungana nasi kwenye safari hii na tunakutana nao kubadilishana maoni, Tegea tu na hivi karibuni utaona mabadiliko makubwa,” alisema Bw salat.

Kwa upande wake, Bw Odinga amekuwa akikutana na vinara wenzake wawili katika NASA, Kalonzo Musyoka na Musalia Mudavadi kwenye juhudi za kufufua muungano huo.

Tayari, Bw Musyoka, ambaye pia amekutana na Seneta Moi ameongoza chama chake kutangaza kitaunga mkono serikali ya Rais Kenyatta.

Duru zingine zinaeleza kuwa Bw Musyoka, Bw Mudavadi na kinara mwenzao katika NASA Moses Wetangula nao wamekuwa wakikutana bila Raila kupanga mikakati yao ya kisiasa.

Naye Bw Mudavadi na Bw Wetangula wamekuwa wakikutana kuandaa mikakati ya kuunganisha vyao vya ANC na Ford Kenya.

Japo Bw Ruto amekuwa akiendeleza siasa zake za 2022 chini kwa chini, wadadisi wanasema amekuwa akipanga mikakati yake kwa kutuma wandani wake wa kisiasa kukutana na wanasiasa maarufu kote nchini kwa sababu hataki kuonekana kuhujumu serikali ya Jubilee kwa wakati huu.

Baadhi ya wanasiasa tayari wametangaza kuwa watamuunga mkono kwenye uchaguzi wa 2022.

Warembo wa Uganda wapiga magoti kumshukuru hakimu baada ya kuachiliwa

Na RICHARD MUNGUTI

WASICHANA 20 raia wa Uganda Jumatano waliizuzua mahakama ya Milimani, Nairobi kwa kupinga magoti na kumshukuru hakimu mkuu Bw Francis Andayi kwa kuwaachilia huru wakitumia lugha ya Kiganda. “Weballessebo, asante mkubwa,” walisema.

“Bila shaka hawa hawezi kuwa Wakenya. Wasichana wetu hapa nchini hawawezi kufanya haya,” akasema Bw Andayi na kusababisha waliokuwa mahakamani kucheka.

Wasichana hao wote walipiga magoti na kuinamisha vichwa vyao na kuinua mikono wakisema wakitoa shukrani kwa mahakama waliposikia wako huru.

Akiwaachilia wasichana hao Bw Andayi alisema  “kwa moyo wa ushirikiano wa mataifa ya Afrika Mashariki ninawaachilia na kuwapeana kwa ubalozi wa Uganda nchini warudishwe kwao.”

Ubalozi wa Uganda ulimwandikia hakimu ukimsihi awaachilie ndipo uchunguzi ufanywe kubaini mshukiwa aliyekuwa anataka kuwalangua wasichana hao kuwauza nchini Oman kama wajakazi.

Bw Andayi alisema kuwa wasichana hao walikutwa wameghushi visa ya Kenya katika pasipoti zao.

Wasichana hao walibanduliwa kwenye ndege waliyokuwa wameabiri ya shirika la ndege la Kenya Airways (KQ) iliyokuwa inaenda nchini Oman.

Wakili wao David Ayuo alisema wasichana hao walikuwa wanalanguliwa na kundi la majangili wanaodai watawatafutia kazi mataifa ya ng’ambo.

“Naomba hii mahakama iwahurumie wasichana hawa wenye umri mdogo kati ya miaka 16-22 waliodanganywa kuna kazi inayowasubiri ng’ambo,” alisema Bw Ayuo.

Alisema walisukumwa na umaskini kutoka nyumbani kwao lakini wakaishia mikononi mwa mikora.

Kesi ya Mutua kuamuliwa Agosti 6

Na RICHARD MUNGUTI

MAHAKAMA ya Juu itasikiza Agosti 6 kesi iliyowasilishwa na Gavana wa Machakos Dkt Alfred Mutua anayepinga uamuzi wa kumtimua mamlakani.

Mahakama ya rufaa ilifutilia mbali ushindi wa Dkt Mutua na kuamuru uchaguzi mdogo ufanywe katika kaunti ya Machakos.

Majaji hao walisema Dkt Mutua hakuchaguliwa kwa njia halali na kuharamisha ushindi wake.

Punde tu baada ya uchaguzi wake kubatilishwa  Gavana Mutua aliwasilisha rufaa katika Mahakama ya Juu .

Jaji Mkuu David Maraga , naibu wake Philomena Mwilu na majaji wengine watasikiza rufaa hiyo.

Ikiwa wataunga mkono uamuzi wa mahakama ya rufaa basi Dkt Mutua atakuwa Gavana wa kwanza kupoteza kiti cha ugavana baada ya uchaguzi mkuu wa Agosti 8, 2017.

Afueni kwa mabinti 22 wa UG walionaswa Kenya wakisafiri Dubai

Na RICHARD MUNGUTI

MAHAKAMA imefuta mashtaka dhidi ya wasichana 22 raia wa Uganda waliotiwa nguvuni Kenya wakiwa na paspoti feki za usafiri.

Washtakiwa hao walikuwa wanajaribu kusafiri hadi Dubai kutafuta ajira walipotiwa nguvuni na maafisa wa idara ya uhamiaji.

Kiongozi wa mashtaka kutoka idara hiyo Bw Mutelo alimweleza hakimu mkuu mahakama ya Milimani Nairobi  Bw Francis Andayi kuwa pasipoti za washtakiwa zilikuwa na Visa zilizoghushiwa.

“Mbona mmetengeneza cheti kimoja cha mashtaka,” Bw Andayi alimwuliza Bw Mutelo na kuongeza , “ Ushahidi uko wapi utakaoniwezesha kuwapata washtakiwa na hatia.”

Mahakama ilikataa mashtaka yaliyotayarishwa na maafisa hao na kuamuru washtakiwa warudishwe rumande na kuagiza kila mmoja ashtakiwe peke yake.

DPP aitisha faili ya askari jela aliyemuua mwanachuo

Na RICHARD MUNGUTI

MKURUGENZI wa Mashtaka ya Umma (DPP) ameitisha faili ya Askari jela anayeshtakiwa kwa kumgonga dafrau na kumuua mwanafunzi wa chuo kikuu katika barabara kuu ya Nairobi-Mombasa Jumapili iliyopita akiwa mlevi.

Na wakati huo huo Mahakama ya kuamua kesi za trafik ilifutilia mbali kibali cha kumtia nguvuni Konstebo Dismas Gitenge Motongwa alipochelewa  kufika kortini.

“Naomba hii mahakama isimlaumu mshtakiwa. Nilikuwa naye tukitafuta faili ya hii kesi jina lake alipoitwa lakini hakuonekana. Mnilaumu mimi mwenyewe,” wakili Danstan Omari alimweleza  hakimu mwandamizi Bi Electa Riany.

Bw Omari aliomba korti ifutulie mbali kibali cha kumtia nguvuni mshtakiwa kwa kufika kortini akiwa amechelewa.

“ Naomba korti pia imrudishie dhamana ya mshtakiwa iliyokuwa imefutiliwa mbali na mshtakiwa kuagizwa azuliwe gerezani,” Bw Omari alimsihi hakimu.

Kiongozi wa mashtaka hakupinga ombi la kufutiliwa mbali kwa kibali cha kumtia nguvunu mshtakiwa.

“Sipingi mshtakiwa akirudishiwa dhamana na pia kibali cha kumtia nguvuni kikiondolewa,” Bi Riany alifafahamishwa.

Akitoa uamuzi Bi Riany alimrudishia mshtakiwa dhamana na kumuonya vikali dhidi ya kuchelewa kufika kortini.

Mahakama iliamuru faili ya Konstebo Motongwa ipelekwe moja kwa hadi kwa DPP aisome kisha atoe ushauri.

Bi Riany alikubalia ombi la kiongozi wa mashtaka la kuahirisha kesi dhidi ya Konstebo Motongwa hadi Agosti 2 kuwezesha DPP  kusoma faili ya kesi hiyo kisha atoe ushauri jinsi kesi itakavyoendeshwa.

Mshtakiwa anakabiliwa na mashtaka matatu ya kuendesha gari akiwa mlevi, kuendesha gari bila makini na kusababisha kifo cha  Mourine Wambui Gachagua mwenye umri wa miaka 22 na kutosimama baada ya kusababisha ajali hiyo.

Mshtakiwa alikiri shtaka la kutosimama mnamo Julai 15aliposababisha  ajali kisha akatozwa faini ya Sh10,000.

Konsteno Motongwa alikuwa anaendesha garu muundo wa Volkswagen nambari ya usajili  KCN 285B mnamo Julai 15 ajali hiyo ilipotokea.

Ajali hiyo iliyotokea mwendo wa saa nane unusu karibu na duka la Nexgen Mall.

Mshtakiwa alikuwa anaelekea jijini Nairobi.

Pia anadaiwa alikuwa amekunywa pombe akapitisha kiwango  kinachokubalika dereva kuendesha gari.

Kesi dhidi ya mshtakiwa huyo itatajwa tena Agosti 2 ndipo DPP atoe mwelekeo.

Kesi dhidi ya waziri wa kaunti aliyeaga yatupwa

Na RICHARD MUNGUTI

MKURUGENZI wa Mashtaka ya Umma (DPP) Noordin Haji amefutilia mbali kesi dhidi ya mmoja wa mawaziri wa Serikali ya kaunti ya Busia aliyeaga Bw Timon Otieno.

Otieno alishtakiwa pamoja na Gavana wa Busia Sospeter Ojaamong na mawaziri wengine watatu wa kaunti hiyo. Kesi dhidi ya Otieno iliondolewa n

Hakimu mkuu mahakama ya kuamua kesi za ufisadi (ACC) Douglas Ogoti alifahamishwa Otieno aliaga Juni 17 2018.

“Nathibitisha kuwa Timon Otieno aliaga mnamo Juni 17, 2017 . Natamatisha kesi dhidi yake,” Kiongozi wa Mashtaka Alexander Muteti alimweleza hakimu , huku akimkabidhi nakala ya cheti cha kifo cha mshtakiwa.

Bw Muteti aliwasilisha cheti kipya cha mashtaka dhidi ya Mabw Ojaamong , Bw Lenard Wanda Obimbira, Allan Ekweny Omacha na Bw Bernard Krade Yaite.

Washukiwa wengine ambao hawakufika kortini Bw Samuel Ombui, Bi Edna Adhiambo Odoyo, Renish Achieng ,Sebastian Hallensleben na Madam R Enterprises Limited watatiwa nguvuni.

Washukiwa hao hawakufika kortini na Bw Muteti aliomba watiwe nguvuni.

Na wakati huo huo mahakama ilitenga Septemba 11 siku ya kuanza kusikizwa kwa kesi dhidi ya Bw Ojaamong na wenzake watatu.

Upande wa mashtaka ulisema utachukua masaa 24 kuwasilisha ushahidi dhidi ya washtakiwa.

Bw Ogoti aliamuru upande wa mashtaka uwakabidhi washtakiwa nakala zote za ushahidi.

Pia aliamuru mawakili wanaotaka kujiondoa katika kesi hiyo wafanye hivyo mapema badala ya kung’atuka kwenye kesi siku ya kusikizwa kwa kesi na kuvurunga utaratibu.

Bw Ojaamong yuko nje kwa dhamana ya Sh1milioni pesa tasilimu.

Mahakama ilikubalia ombi la wakili Danstan Omari anayemwakilisha Ojaamong kwamba gavana huyo asiwe anaenda kupiga ripoti katika afisi za tume ya kupambana na ufisadi nchini EACC eneo la Busia kwa wafuasi wengi wa kiongozi huyo wataandamana naye.

Bw Ojaamong alikanusha shtaka la kufanya njama za kuilaghai Serikali ya kaunti ya Busia Sh8milioni kwa kuruhusu utafiti ufanywe kuhusu takataka na kampuni ya Ujeruman bila mpango.

Alikana alifanya mashauri kuhusu utoaji wa zabuni kwa kampuni ya Ujerumani bila ya kuwashirikisha maafisa wakuu wa kaunti hiyo.

Akiwa mjini Berlin, Ujerumani Gavana Ojaamong aliruhusu malipo ya Sh8milioni kinyume cha sheria.

Kesi itatajwa Septemba 4 upande wa mashtaka kueleza ikiwa umewakabidhi washtakiwa nakala za ushahidi zote.

Bidhaa ghushi za Sh7.5 bilioni zimenaswa, walaghai 75 wamezimwa – Ripoti

NA CECIL ODONGO

MISAKO ambayo imekuwa ikiendeshwa na serikali dhidi ya bidhaa ghushi nchini tangu Juni 2018 imenasa bidhaa zenye thamani ya Sh7.5 bilioni, serikali ilisema Jumanne.

Operesheni hiyo pia imewanasa walaghai 75 miongoni mwao maafisa 10 wa serikali ambao tayari wamekamatwa na kufikishwa mahakamani kujibu mashtaka ya ufisadi.

Katika taarifa iliyotumwa kwa vyombo vya habari, Naibu Mkuu wa utumishi wa umma Wanyama Musiambo alisema kwamba thamani ya sukari ghushi ndiyo  ilikuwa  juu zaidi  kushinda bidhaa nyingine zilizonaswa.

“Kati ya Sh 7.5 bilioni, thamani ya sukari ghushi ilikuwa  Sh5.3 bilioni. Bidhaa za sigara (Sh828milioni), kilimo(Sh341milioni), vifaa vya stima(Sh300milioni), na pombe(Sh241milioni) pia zilichangia thamani hiyo,” ikasema taarifa ya Bw Musiambo.

Serikali pia imezamia mbinu kabambe ya kuhakikisha bidhaa ghushi haziingizwi nchini kwa kuimarisha ukaguzi na usalama kwenye miji ya mipaka. Mipaka iliyotajwa ni Busia, Malaba, Isbania, Shimoni, Moyale, Lunga Lunga na bandari ya Mombasa.

Hata hivyo maafisa waliojukumiwa kuhakikisha bidhaa haziingizwi nchini kiharamu watakuwa na beji maalum kama kitambulisho chao kitakachowatofautisha na wakora wanaojifanya maafisa halali kwa lengo la kuwapunja wafanyabiashara wanaotumia njia za kisheria kuingiza bidhaa nchini.

“Maafisa wanaoendesha misako hii wanatoa onyo kwa umma kujihadhari na wahalifu wanaojifanya kuwa maafisa halali ingawa lengo lao ni kulaghai wafanyabiashara. Maafisa wetu wana beji maalum na hufuata sheria bila kuwahangaisha wafanyabiashara, kuvunja maduka yao au kufunga biashara halali,” ikasisitiza taarifa hiyo.

Afisa huyo wa serikali alifichua kwamba bidhaa zote ghushi zilizonaswa zitaharabiwa huku juhudi zote zikifanywa kuhakikisha mtandao wa kuagiza na kusambaza bidhaa ghushi unaomilikiwa na wafanyabiashara wakora unaangamizwa.

Aidha aliwataka wananchi kuungana na serikali kufaulisha vita dhidi ya bidhaa ghushi kwa kuwa ni moja ya changamoto zinazotatiza kutimizwa kwa nguzo nne za utawala wa Rais Uhuru Kenyatta ikiwemo nguzo muhimu ya uundaji bidhaa.