Israeli yashambulia kambi za jeshi la Iran na Syria ikidai waliichokoza

Wanajeshi wa Israeli kaskazini mwa taifa hilo eneo la Alonei Abba, Februari 11, 2018 wakikagua mabaki ya ndege waliyodungua. Picha/AFP

Na AFP

JERUSALEM, ISRAELI

ISRAELI Jumamosi ilishambulia vituo vya Iran nchini Syria baada ya ndege yake ya kivita kuangushwa na jeshi la angani la Syria. 

Kutokana na makabiliano kati ya mahasimu wa jadi Israeli na Iran tangu vita vianze Syria 2011, Waziri Mkuu Benjamin Netanyahu aliapa kuzuia Iran kuzua msukosuko wa kijeshi katika nchi hiyo ya Kiarabu.

Mashambulio ya Israeli yalijiri baada ya kunasa ilichotaja kama ndege ya Iran isiyoendeshwa na rubani ikielekea Syria na kusema lilikuwa shambulio.

Ilikuwa mara ya kwanza kwa Israeli kutangaza hadharani kulenga inachotambua kama vituo vya Iran nchini Syria tangu mzozo huo ulipoanza.

Iran ilitaja madai ya Israeli kama uongo na kusema Syria ina haki ya kujilinda ikishambuliwa.

Aidha, Iran pamoja na mataifa mengine inayoshirikiana nayo nchini Syria – Urusi na kundi la Hezbollah lenye makao Lebanon-walikanusha madai ya Israeli kuhusu kunaswa kwa ndege.

Wizara ya mashauri ya nchi za kigeni ya Urusi ilitaka pande zote kuwa na uvumilivu na kusema haikubaliki kuzua vitisho kwa maisha na usalama wa wanajeshi wa Urusi walio Syria.

Msemaji wa jeshi la Israeli, Jonathan Conricus, alionya Syria na Iran kwamba zinacheza na moto, lakini akasisitiza kuwa nchi yake haitaki kuzidisha vita.

“Huu ndio ukiukaji wa hali ya juu wa utukufu wa Israeli kutendwa na Iran katika miaka ya hivi karibuni,” Conricus aliambia wanahabari.

Israeli ilisema ilitekeleza mashambulio makubwa dhidi ya vituo vya jeshi la angani la Syria na vituo vya kijeshi vya Iran.

Wanajeshi wawili wa ndege ya kivita aina ya F16 iliyoangushwa walikuwa hai ingawa mmoja wao alipata majeraha mabaya, jeshi lilisema. Walitua Israeli na kupelekwa hospitalini.

Israeli ilisema makabiliano yalianza baada ya ndege ya kivita isiyoendeshwa na rubani kuingia katika anga yake na kunaswa na helikopta.

Conricus alisema ilinaswa ikiwa ndani ya Israeli kaskazini ya jiji la  Beit Shean, karibu na mpaka wa Jordan.

Hata hivyo, hakueleza ikiwa ndege hiyo ilikuwa na silaha lakini akadai ilikuwa katika shughuli za kijeshi na ilitumwa na wanajeshi wa Iran kutoka kambi ya kijeshi ya Iran iliyoko eneo la Palmyra.

Alisema ndege nane za kivita za Israeli zililenga vituo vya kijeshi vya Iran vilivyoko Syria.

Shirika la haki za binadamu la Syrian Observatory for Human Rights, lenye makao Uingereza, lilisema Israeli ililenga vituo kadhaa vilivyoko mkoa wa kati wa Homs. Shirika hilo lilisema vituo hivyo hutumiwa na Iran na Urusi.

Msemaji wa mashauri ya nchi za kigeni wa Iran Bahram Ghasemi alilaumu Israeli kwa kudanganya akisema Iran haina wanajeshi Syria.

 

 

JAMVI: Uhuru pabaya kwa kusahau baadhi ya maeneo ya Gema katika uteuzi wake

Na WANDERI KAMAU

Kwa Muhtasari:

  • Mirengo mitatu inang’ang’ania ushirikishi zaidi wa kisiasa serikalini, hasa baada ya wanasiasa wenye ushawishi kukosa kutajwa mawaziri
  • Kuchipuka kwa mirengo hiyo mitatu kunaashiria kibarua kipya kwa Rais Kenyatta
  • Rais Kenyatta anakejeliwa kwa kutomteua Bi Martha Karua kama waziri, licha ya kuahidi kwamba angemteua
  • Wanasema kuwa mwelekeo huo ni hatari, ambao huenda ukazua mgawanyiko mkubwa, hasa anapojitayarisha kung’atuka uongozini

HATUA ya Rais Uhuru Kenyatta kukosa kuwateua baadhi ya wandani wake imezua uasi wa kichinichini katika ukanda wa Mlima Kenya, hali ambayo imegawanya eneo hilo katika mirengo mitatu ya kisiasa.

Mirengo hiyo inang’ang’ania ushirikishi zaidi wa kisiasa serikalini, hasa baada ya wanasiasa wenye ushawishi kukosa kutajwa katika baraza la mawaziri na Rais Kenyatta.

Mrengo wa kwanza unahusisha kaunti za Meru, Embu, Tharaka-Nithi na Kirinyaga. Mrengo wa pili unahusisha kaunti za Kiambu na Murang’a, huku mrengo wa tatu (Aberdare Group) ukishirikisha kaunti za Nyeri, Nyandarua, Laikipia na Nakuru.

Kulingana na wachanganuzi, kundi la kwanza linadai kutengwa na Bw Kenyatta, hasa baada ya kukosa kuteuliwa kwa Seneta Kithure Kindiki (Tharaka-Nithi) ambapo walimpigania kuteuliwa kama waziri.

Baadhi ya viongozi wa kaunti hizo wamejitokeza kuelezea kutoridhishwa kwao na uteuzi wa gavana wa zamani wa Meru, Peter Munya, wanayedai kutowakilisha maslahi ya wakazi hao.

 

“Ukiritimba wa kisiasa”

Chini ya uongozi wa Gavana Muthomi Njuki wa Tharaka-Nithi, kundi hilo linaamini kwamba kuteuliwa kwa Bw Munya ni uendelezaji wa “ukiritimba wa kisiasa” wa jamii ya Ameru.

“Tunahisi kutengwa kabisa na utawala wa Jubilee, licha ya kujitokeza pakubwa kumpigia kura Rais Kenyatta,” akalalama Bw Njuki.
Kulingana na wachanganuzi wa kisiasa, kundi la Kiambu-Murang’a linaonekana kuridhika na uteuzi wa watu kadhaa katika baraza hilo.

Miongoni mwa walioteuliwa ni James Macharia (Uchukuzi) ambapo anatoka katika Kaunti ya Murang’a na Joe Mucheru (anayetoka katika Kaunti ya Kiambu) ila ana makazi yake katika Kaunti ya Nyeri.

Kundi la tatu, maarufu kama ‘Aberdare Group’ halijafurahia kuteuliwa kwa Bw Mwangi Kiunjuri kama Waziri wa Kilimo.

Kulingana na Profesa Ngugi Njoroge, ambaye ni mchanganuzi wa kisiasa, kuchipuka kwa mirengo hiyo mitatu kunaashiria kibarua kipya kwa Rais Kenyatta, ikizingatiwa kwamba msingi wake mkuu ni kushinikiza uteuzi wa watu maarufu ambao waliachwa nje.

“Tathmini ya ndani inaonyesha kuwa msingi mkuu wa makundi hayo ni ung’ang’aniaji wa mamlaka, hasa kwa wanasiasa ambao waliachwa nje,” asema Prof Njoroge.

 

Mgawanyiko

Aidha, anatoa mfano wa kutotajwa kwa aliyekuwa mbunge wa Kigumo, Jamleck Kamau kama waziri ama naibu waziri, kama jambo ambalo huenda likazua uasi na mgawanyiko katika kundi linaloshirikisha kaunti za Murang’a na Kiambu.

“Kuna hatari kubwa ya Bw Kamau kujiunga na wanasiasa wengine waasi kama aliyekuwa gavana wa Kiambu William Kabogo, hivyo kufanya kipindi cha pili cha Bw Kenyatta kuwa kigumu.

Ni wakati wa yeye (rais) kuwatafutia mahali baadhi ya wanasiasa hao, ili kuepuka uwezekano wa msambao wa uasi wa kisiasa,” asema Prof Njoroge.

Msukumo wa ukanda wa Mlima Kenya Mashariki (Embu, Meru na Tharaka-Nithi) ni hisia kwamba Rais Kenyatta ‘aliwazawidi’ watu ‘wasiofaa.’

Mchanganuzi wa kisiasa Daudi Mwenda anasema kuwa uteuzi wa Bw Munya kama Waziri wa Masuala ya Afrika Mashariki ni ishara ya wazi kwamba ni kama Rais Kemyatta hatambui mchango wao katika ushindi wake.

“Matarajio ya wengi yalikuwa kwamba angaa Bw Kenyatta angaliwazingatia baadhi ya wanasiasa kutoka eneo la Tharaka. Hii ni kwa kuwa tayari ‘amezituza’ jamii za Meru na Embu, kupitia uteuzi wa Bw Munya na Bi Cecily Mbarire kama mbunge maalum,” asema Bw Mwenda.

 

Kutomteua Bi Karua

Wengi pia wanamkosoa Bw Kenyatta kwa kutomteua Bi Martha Karua kama waziri, licha ya kuahidi kwamba angemteua, ikiwa angeshindwa kwenye kinyang’anyiro cha ugavana wa Kirinyaga na Bi Anne Waiguru.

Malalamishi kama hayo ndiyo yaliyo katika kaunti zilizo katika kaunti zinazojumuisha kundi la ‘Aberdare Group.’

Wachanganuzi na viongozi katika eneo hilo wanapinga uteuzi wa Mabw Joe Mucheru na Mwangi Kiunjuri, wakiwataja kuwa “wageni” na kutofaa katika eneo lao.

Baadhi ya viongozi wa Nyeri wamejitokeza kulalamika kwamba Bw Mucheru si mmoja wao, huku Bw Kiunjuri akidaiwa kuwa mwakilishi wa Kaunti ya Laikipia.

“Kwa mara nyingine, Rais Kenyatta ameisahau Kaunti ya Nyeri, licha yake kujitokeza pakubwa kumpigia kura. Hatuna waziri hata mmoja katika baraza lake.

Aliowachagua (Mucheru na Kiunjuri) si wakazi asilia wa Kaunti ya Nyeri. Tunamtaka kutimiza ahadi yake,” akasema mbunge wa Kieni Kaniini Keega.

Mchanganuzi na wakili Wahome Gikonyo anawataja wawili hao kutokuwa “wawakilishi wa kisiasa wa eneo hilo.”

 

Hawapendezi

“Mabw Kiunjuri na Mucheru wamehudumu katika kipindi cha kwanza cha rais, ambapo imedhihirika kwamba hawapendezi. Hawajaonekana kumjenga Rais Kenyatta. Ni wakati rais anafaa kutathmini msimamo wake,” asema Bw Gikonyo.

Wakosoaji wa Bw Kenyatta wanataja uteuzi wake kuwa unaoendeleza “ukiritimba wa kisiasa wa Kaunti ya Kiambu” kama alivyofanya babake, marehemu Mzee Jomo Kenyatta.

Wanasema kuwa mwelekeo huo ni hatari, ambao huenda ukazua mgawanyiko mkubwa, hasa anapojitayarisha kung’atuka uongozini.

“Ni wakati mwafaka azibe nyufa zote ambazo huenda zikaleta mgawanyiko katika ngome yake,” asema mwanaharakati wa kisiasa Linford Mutembei.

 

JAMVI: Onyo utawala wa Jubilee unarejesha Kenya gizani

Wakili mbishi Dkt Miguna Miguna alipowasili jijini Toronto, Ontario, Canada baada ya kufurushwa humu nchini Februari 5, 2018. Picha/ Hisani

Na BENSON MATHEKA

Kwa Muhtasari:

  • Watetezi wa haki za binadamu wanaonya kwamba haki za binadamu zinapuuzwa ili kurejesha Kenya katika utawala wa kiimla wa chama cha KANU
  • Ingawa serikali ilisema kwamba Miguna alikuwa raia wa Canada, iliibuka kuwa walikataza maafisa wa ubalozi wa nchi hiyo jijini Nairobi kumuona
  • Gharama ya ukiukaji wa haki za binadamu ni kubwa. Wanaowajibika wanafaa kuheshimu katiba na kuwa msitari wa mbele kuilinda

MATUKIO yaliyopelekea kufurushwa kwa mwanasiasa mbishi Miguna Miguna yamefanya serikali kushutumiwa vikali na kuonywa dhidi ya kurejesha Kenya katika enzi za giza kwa kupuuza utawala wa sheria, kunyanyasa upinzani na kukiuka haki za raia.

Watetezi wa haki za binadamu na wanauchumi wanaonya kwamba hatua ambazo Kenya ilipiga chini ya katiba mpya hasa kuhusu haki za binadamu, zinapuuzwa kwa lengo la kurejesha Kenya ilivyokuwa chini ya utawala wa kiimla wa chama cha Kanu.

Wanasema dalili za Kenya kurejea katika enzi za giza zinajitokeza kufuatia kukandamizwa kwa vyombo vya habari, kukamatwa na kuzuiliwa kwa watu wanaokosoa serikali na kupuuzwa kwa maagizo ya mahakama.

 

Mwelekeo hatari

Kulingana na Tume ya Taifa ya Haki za Binadamu (KNHRC), serikali imechukua mwelekeo hatari unaoweza kutumbukiza nchi katika msukosuko kwa kutoheshimu utawala wa sheria.

KNHRC inataja ukadamizaji wa uhuru wa wanahabari na maafisa wa serikali na kudharau mahakama kama vitisho kwa utawala wa sheria, upuuzaji wa haki za binadamu na demokrasia.

“Tume inasikitishwa na matukio ya wiki moja iliyopita ambapo kumekuwa na ongezeko la visa vya kudharau utawala wa sheria, vitisho kwa haki za binadamu na haki za kidemokrasia ambazo zimetambuliwa na kuhifadhiwa katika katiba,” asema mwenyekiti wa tume hiyo, Bi Kagwiria Mbogori kwenye onyo kwa waziri wa usalama wa ndani, Dkt Fred Matiang’i, Inspekta Jenerali wa polisi Joseph Boinnet na ofisi ya mkurugenzi wa mashtaka ya umma.

Maafisa hao watatu walipigwa darubini kufuatia kukamatwa kwa viongozi wa upinzani, kuwapokonywa walinzi, silaha na paspoti zao na kuandamwa na maafisa wa polisi.

 

Enzi za giza

“Tunatoa onyo kwamba Kenya inarejea kwa haraka katika enzi za giza na zenye uchungu mwingi. Tunalaani vikali kukamatwa kiholela kwa watu na kudharau mahakama kunakoendelea,” asema Bw Mbogori.

Onyo hilo lilijiri saa chache baada ya serikali kumtimua mwanasiasa Miguna Miguna ikidai hakuwa raia wa Kenya baada ya kukamatwa na polisi na kuhangaishwa kwa siku tano.

Polisi walikataa kutii maagizo kadhaa ya mahakama kumfikisha kortini. Inspekta Jenerali wa polisi Joseph Boinnet na Mkurugenzi wa upelelezi George Kinoti pia walipuuza agizo la Jaji Luka Kimaru la kufika mbele yake kueleza kwa nini walikataa kutii agizo la mahakama.

Ingawa serikali ilisema kwamba Miguna alikuwa raia wa Canada, iliibuka kuwa walikataza maafisa wa ubalozi wa nchi hiyo jijini Nairobi kumuona akiwa seli hatua ambayo mawakili wanasema ni kilele cha ukatili.

 

Twaelekea wapi?

“Ikiwa polisi wanaweza kumkamata raia wa nchi ya kigeni na kunyima ubalozi wa nchi hiyo nafasi ya kumuona, tunafaa kujiuliza tunaelekea wapi kama nchi na kurekebisha mambo kabla ya kuharibika zaidi,” alisema wakili mmoja aliyeomba tusitaje jina lake kwa sababu ya uhusiano wake na Jubilee.

Anasema matukio ya hivi majuzi yanaonyesha kwamba washauri ambao rais anatengemea. Bi Mbogori anamtaka Bw Boinnet kuhakikisha polisi wanafuata katiba na kutimiza viwango vya haki za binadamu katika kazi yao.

“Agiza maafisa wote wa polisi kufuata katiba kikamilifu na kuheshimu haki za binadamu za watu wanaokamatwa na wote wanafaa kuchukuliwa kuwa sawa bila ubaguzi kwa misingi yoyote,” Bi Mbogori alimweleza Bw Boinnet.

KNHRC ilimwelekezea waziri Matiang’i kidole cha lawama kwa kukandamiza uhuru wa wanahabari na kumuonya kwamba maagizo anayotoa hayafai kukiuka katiba.

“Fuata sheria na ukome mara moja kutoa amri zinazoenda kinyume cha sheria,” tume ilimweleza Bw Matiang’i na kumtaka kufungua vituo vya runinga ilivyoagiza mahakama. Serikali ilifungua vituo vya NTV na KTN News lakini ikachelewa kufungua Citizen Tv na Inooro Tv.

 

Kusambaratisha uchumi

Wadadisi wanasema serikali ikiendelea kukandamiza upinzani, kudharau mahakama na kupuuza utawala wa sheria inaalika msukosuko ambao utalemaza ukuaji wa uchumi.

“Ni mwelekeo mbaya ambao utaathiri uchumi wa nchi, hakuna mwekezaji anayependa nchi isiyo thabiti kisiasa,” asema Dkt Rajnkat Shah, mwekezaji wa kimataifa.

Bi Mbogori anaonya kwamba hali ya kisiasa nchini inaathiri haki za vijana, wanawake, watoto, wazee na watu walio na ulemavu na tayari imeanza kuzua taharuki.

“Ripoti ya tume inaonyesha kuwa kufikia Februari 6, maandamano ya raia yemelipuka katika maeneo ya Kisumu na Migori ambapo mtu mmoja aliuawa Ahero, mali ikaharibiwa na kuibwa. Hali ya sasa inaonyesha jamii inayokumbwa na taharuki na kugawanyika kwa misingi ya kikabila na kisiasa,” anaeleza Bi Mbogori.

Anaonya kwamba maafisa wa serikali wanaohusika hawatajukumika, hali itakuwa mbaya zaidi na kuzaa majuto.

“Tume inawakumbusha wote wanaohusika kwamba gharama ya ukiukaji wa haki za binadamu ni kubwa, gharama ambayo nchi inayong’ang’ana kutimiza mahitaji yake ya kiuchumi na maslahi ya kimsingi ya raia wake haiwezi kumudu. Wanaowajibika wanafaa kuheshimu katiba na kuwa msitari wa mbele kuilinda na kuitetea kwa nia nzuri,” alisema

JAMVI: Je, Mlima Kenya waweza kumuunga mkono Kalonzo uchaguzini 2022?

Kiongozi wa chama cha Wiper Bw Kalonzo Musyoka asema na Rais Uhuru Kenyatta katika hafla ya awali. Picha/ Maktaba

Na MWANGI MUIRURI

Kwa Muhtasari:

  • Baadhi ya wadadisi wa kisiasa wasema yawezekana hasa iwapo maafikiano ya UhuRuto hayatatimilika
  • Hatua ya Kalonzo kuokoa serikali ya Rais Mstaafu Mzee Mwai Kibaki 2007 inaweza kurejelewa ili kuunda ushirika mwingine wa 2022
  • “Kalonzo huyu ambaye hana msimamo thabiti na huwa ni wa kutegea mawindo yatekelezwe, nyama ichinjwe na waliowinda wale kwanza halafu yeye anarukia mabaki”
  • Kalonzo hana uthabiti mkubwa Ukambani kutokana na kuibuka kwa uasi wa wazi

WENGI wetu tutazidi kukumbushwa na matukio ya kila mara kwamba siasa ni sawa na mchezo wa pata-potea. Hivi leo kauli hii inapochanganuliwa, tayari Rais Uhuru Kenyatta amemuahidi naibu wake, Bw William Ruto kuwa ndiye atakayemrithi mwaka wa 2022.

Lakini kuna hisia ambazo zinaibuka katika ngome ya Rais Kenyatta ya Mlima Kenya inayoashiria kuwa urithi huo sio tu wa kusemwasemwa katika mikutano ya hadhara, bali unafaa kuungwa mkono na mkataba wa kimaelewano kuhusu jinsi ushirika wa eneo hilo na serikali inayopendekezwa ya Ruto utakavyotimilika.

Tayari, wanasiasa wasiochuchukuliwa kimzaha katika eneo la Mlima Kenya wameelezea wasiwasi wao kuhusu urithi wa Ruto.
Wale ambao wamekuwa wawazi na kusema sio lazima eneo hilo litii agizo la rais ni pamoja na aliyekuwa gavana wa Kiambu, William Kabogo, aliyekuwa Seneta maalum, Paul Njoroge Ben, Mbunge wa Nyeri Mjini Ngunjiri Wambugu na aliyekuwa mbunge wa Maragua, Elias Mbau.

Ikiwa pingamizi hizo zitatimia, basi eneo la Mlima Kenya litajipata katika mustakabali telezi wa kisiasa likisaka ushirika wa kumenyana katika kivumbi cha uchaguzi mkuu wa urais, 2022.

Kunao wanaopendekeza jina la Kalonzo Musyoka ambaye ni kinara wa Wiper Democratic Party-Kenya iwapo maelewano na Naibu Rais yatagonga mwamba.

 

Kuokoa serikali ya Kibaki

Hatua ya Kalonzo kuokoa serikali ya Rais Mstaafu Mzee Mwai Kibaki wakati wa ghasia za baada ya uchaguzi wa 2007 ambapo alikubali kuunda serikali ya umoja wa Wakamba na Agikuyu ili kuzima makali ya Bw Raila Odinga, inaweza kurejelewa ili kuunda ushirika mwingine wa 2022.

Ni wazo ambalo ukumbi huu ulisaka maoni kulihusu na kukusanya hisia mseto zilitolewa; wengine wakionekana kukataa uwezekano huo moja kwa moja, wengine wakisema mazingira ya kisiasa hubadilika upesi na lolote linawezekana katika siasa.

“Nani aliamini kuwa Odinga mwenyewe mwaka wa 2002 angesema Kibaki Tosha na akae katika mkondo huo hadi kuvuna ufanisi wa jamii ya Luo Nyanza kumpigia Kibaki kura?” anahoji aliyekuwa mwakilishi wa wanawake wa Nyeri bungeni, Priscilah Nyokabi.

Anasema kuwa siasa ni mchezo wa lile ambalo linaweza kuzua ushindi wala si ushirika usiokuwa na hakika ya kuleta mafanikio.
Anasema kuwa hata wazo kama hilo la Kalonzo kujiunga na Mlima Kenya 2022 ndilo lililochezwa 2013 ambapo wengi hawakutarajia jamii za Agikuyu na Kalenjin ziungane dhidi ya Odinga.

“Mimi binafsi siwezi nikapuuza uwezekano huo. Lakini katika hali ya sasa, sioni Mlima Kenya wakimsaliti Ruto,” anasema Nyokabi.

 

Kalonzo ajitakase kwa Mlima Kenya

Anasema ili Kalonzo akubalike kuwa thabiti katika ushirika wa kuleta ushindi, ni lazima ajitakase kwa Mlima Kenya “ambao siku chache kabla ya uchaguzi mkuu wa Agosti 8, 2017 aliwaahidi watu wa Agikuyu kuwa Nasa ikiibuka na ushindi, watalala chini kama bahasha.”

Lakini mbunge wa Kikuyu, Kimani Ichung’wa ambaye anatajwa kama miongoni wa walio guu mbele katika kutwaa ugombezi wa pamoja na Ruto 2022, anasema kuwa hilo haliwezekani.

“Ni Kalonzo huyu ambaye hana msimamo thabiti na huwa ni wa kutegea mawindo yatekelezwe, nyama ichinjwe na waliowinda wale kwanza halafu yeye anarukia mabaki?” anasema.

Anasema kuwa kujaribu kufikiria Kalonzo akiwa mwaniaji wa urais wa kuungwa mkono nje ya Ukambani ni ndoto ya ujuha kisiasa.

“Kwa sasa hana jina ndani ya mrengo pana wa National Super Alliance (NASA) baada ya kujipa nembo ya usaliti alipokataa kujitokeza kula kiapo cha afisi sawia na Odinga aliyejiapisha kama ‘rais wa wananchi,” asema Ichung’wa.

 

Ni muujiza kupata umaarufu tena

Anasema kuwa kwa sasa uwezekano wa Kalonzo kujipa thamani ya kisiasa umeyeyuka kama hewa, na ni muujiza tu na maajabu makuu yanayoweza kumrejesha katika soko la kisiasa.

Hata hivyo, Prof Ngugi Njoroge ambaye ni mchanganuzi wa kisiasa anasema kuwa “wanasiasa ni wale wale, hali ikibidi, na iwe hakuna lingine la kutekelezwa ila tu muungano wa Kalonzo na Agikuyu, itakuwa hivyo”.

Anasema kuwa “wanasiasa wakijipanga upya katika miungano mipya na wajipambe katika taswira ya kusisimua raia, huenda wakawashangaza Wakenya kwa kuunda ule muungano ambao haukutarajiwa.”

Anasema kuwa ingawa kwa sasa maoni ya wengi ni kuwa “Kalonzo hawezi akaaminika na hata ni mtu anayeweza akakusaliti wakati wowote, bado ni mapema kumtuma kwa pipa taka la kisiasa.

Anaonya kuwa hatari kuu itakuwa hali ambapo wafuasi wa Nasa wafike katika uchaguzi huo wa 2022 wakiwa na hisia za ghadhabu kuhusu usaliti wa Kalonzo katika kiapo cha Odinga na pia wakiwa na ghadhabu kuhusu utawala wa Mlima Kenya.

“Katika hali hiyo, muungano wa Kalonzo na Mlima Kenya ukiwa hauna Ruto ni kigae tu cha kujiwasilisha debeni kwa manufaa ya kuonekana ukiwania. Utashindwa kabla ya saa tatu asubuhi,” asema.

 

‘Wazo butu’

Aliyekuwa mbunge wa Mwingi ya Kati, Joe Mutambo anasema kuwa “hilo ni wazo butu kwa sasa, labda hali imwendee vinginevyo Kalonzo kabla ya 2022, na iwe ni mapema.

Anasema kuwa kwa sasa Kalonzo hana uthabiti mkubwa Ukambani kutokana na kuibuka kwa uasi wa wazi na siasa za kukaidi ukiritimba wa Kalonzo eneo hilo wa kuwafanyia maamuzi.

“Kwa sasa tuko na viongozi limbukeni kama Gavana wa Machakos, Dkt Alfred Mutua. Kwa sasa, eneo hilo lia wabunge wa Jubilee ambao ni Victor Munyaka wa Machakos Mjini aliyemrambisha sakafu mwaniaji wa Wiper, Ulbanus Mutisya kwa pengo la kura 22, 000.

Kuna wengine ambao ni washirika wa Jubilee wakiwa ni Rachel Nyamai wa Kitui Kusini na pia Vincent Musyoka wa Mwala na pia Charles Kilonzo wa Yatta.

Katika hali hiyo, Kalonzo anaishia kuorodheshwa kama mshirika dhaifu zaidi kwa Mlima Kenya katika kujaribu kuendeleza ukiritimba wa kunyakua urais.

 

Landilodi kula hu kwa kumezea mke wa polo

 

Na LEAH MAKENA

Kwa Muhtasari:

  • Landilodi alikuwa akizuru plotini kukusanya kodi lakini ikabainika alikuwa akimnyemelea mke wa mpangaji
  • Siku ya kisanga, polo alimuachia mkewe amkabili landilodi
  • Iliwalazimu wawili hao kufungua mlango baada ya wakazi kutisha kuuvunja na kuwavamia

SANSIRO, LIKONI

JOMBI wa hapa, alikataa kulipa kodi ya nyumba baada ya kumpata landilodi akirushana roho na mke wake.

Inasemekana kuwa landilodi alikuwa akizuru plotini mara mbili kwa mwezi akidai alitaka kukusanya kodi lakini ikabainika alikuwa akimnyemelea mke wa mpangaji.

Penyenye zasema kuwa landilodi alikuwa na tabia ya kufika polo akiwa kazini na hata kupikiwa na mkewe.

Duru zilidai kuwa jamaa aliponong’onezewa tabia ya landilodi, aliamua kufanya uchunguzi na haikuchukua muda mrefu kabla ya kubaini ukweli wa mambo.

Siku ya kisanga, polo alimuachia mkewe amkabili landilodi.

Kulingana na mdokezi, bibi alitumia sehemu ya hela hizo kununua nusu kilo ya nyama pamoja na mapochopocho mengine kisha akamuita landilodi kwa chakula cha mchana.

Punde tu baada ya kumaliza mlo, wawili hao walianza starehe zao ambazo zilikatizwa na jamaa aliyebisha mlango kwa fujo. Kijasho chembamba kilianza kuwatoka wasijue wafanye nini.

Habari zasema kuwa wawili hao walipokawia kufungua mlango, jombi alipiga kamsa kuwavutia majirani na wapita njia.

Iliwalazimu wawili hao kufungua mlango baada ya wakazi kutisha kuuvunja na kuwavamia. “Samahani, sema utakacho na nitakupa tumalize hili suala bila ya kunisababishia aibu zaidi,” aliomba landilodi huku akitetemeka mwili mzima.

Kulingana na mdokezi, polo alichagua kutolipa kodi tena na baada ya mwenye nyumba kutia sahihi mkataba huo, alimwachilia huru.

Mke wa polo alilazimika kutoroka akihofia kuadhibiwa na polo pamoja na aibu aliyokuwa amepata.

Haikujulikana iwapo landilodi alifika tena hapo kukusanya kodi ila mpangaji aliapa kusalia hapo hadi kaburini.

 

KINAYA: Naona ni heri tuiuze Kenya kila mtu agawiwe hela arudi kwao

Wakili mbishi na mwanasiasa wa NASA aliyefurushwa kutoka humu nchini na kurudishwa nchini Canada, Dkt Miguna Miguna. Picha/ Maktaba

Na DOUGLAS MUTUA

Kwa Muhtasari:

  • Ikiwa huna kwenu kwingine, anza kuuliza wazee wako mlitoka wapi kabla ya kuja Kenya
  • Hapa ndipo siasa za uapisho na uhamiaji zilipotufikisha. Nikizingatia hali hii, naona Kisiwa cha Migingo kikikabidhiwa Uganda rasmi
  • Mashtaka atakayofungua Miguna, ikiwa tayari hajayafungua, yatakushangaza

KENYA ni ya nani? Nauliza tu kwa sababu yumkini kuna watu walio na hatimiliki ya nchi hii – kama ya shamba au ploti hivi – wanaoweza kukwambia ufunganye.

Ikiwa huna kwenu kwingine, anza kuuliza wazee wako mlitoka wapi kabla ya kuja Kenya kwa maana hakuna hakika huku kutasalia kwetu daima.

Binafsi sina wasiwasi; walikotoka mababu wa mababu zangu, ndani ya misitu ya Jamhuri ya Kidemokrasia ya Kongo (DRC) kungalipo, tena hakujalimwa na yeyote.

Nahitaji tu kumsadikisha Rais Joseph Kabila kwamba haja yangu ni pahali pa kuita nyumbani, aniruhusu nipenyeze hadi katikati ya msitu na kujenga msonge wa Kikamba.

Nitaukandika kwa udongo na kuuezeka kwa nyasi, nile matunda na mizizi ya porini kabla ya kuanza shughuli za kilimo, niendelee na maisha yangu mbali na usumbufu wa serikali.

Hapo ndipo siasa za uapisho na uhamiaji zilipotufikisha. Nikizingatia hali hii, naona Kisiwa cha Migingo kikikabidhiwa Uganda rasmi, Wakenya fulani waambiwe wahamie huko na wasiote wakirudi Kenya.

Lakini Migingo ni ndogo sana, umati wa watu nilioona katika Bustani ya Uhuru Park wakati wa sarakasi ya uapisho wa ‘Baba’ hawawezi kutoshea hapo.

 

Kurudi Nigeria

Ikiwa watu wanarudishwa kunakodhaniwa kwao, hata kama hawataki, nitawashauri wafuasi wa ‘Baba’ wajiandae kuvuka mpaka kuingia Sudan, njiani kurudi Nigeria.

Kila mtu akirejeshwa kwao, tutaona mrejeshaji watu atakalia nani kimabavu. Ni uraibu wa binadamu wakati wote kuwa na mtumwa wa aina fulani.

Nimesema mara nyingi hapa kwamba nakubaliana na wachekeshaji wanaopendekeza tuuze Kenya, tugawane hela kila mtu atie zake kibindoni na kujiondokea.

Ikiwa tunachukiana kiasi cha kutoweza kuishi pamoja kwa amani wala kujitawala, ikizingatiwa kwamba Kenya si ya mama wa mtu, mbona tusiigeuze pesa na kuzigawana?

 

Sote tuko sawa

Nasema hivi kwa sababu naamini kwa dhati ya moyo wangu kwamba hakuna Mkenya bora kuliko mwingine, sote tuko sawa machoni pa Mwenyezi Mungu na Katiba.

Unapotoka pale unaponitishia eti kwa sababu nina nyumba Marekani, Canada, Uingereza, Tanzania au Uganda, unajiona bora kunizidi katika ushirika huu uitwao Kenya.

Nakumbuka nikiijadili Katiba ya sasa na mwendazake Mutula Kilonzo, aliyekuwa waziri wa masuala ya kikatiba, muda mfupi baada ya sheria hiyo kuu kupitishwa.

Alinihakikishia kuwa niko radhi iwapo ningetaka kuhama Kenya kuishi nchi za watu kwa maana hakuna anayeweza kunipokonya haki ya uzawa!

Katiba yenyewe inanihakikishia haki hiyo, hivyo kondo langu la nyuma lililozikwa Kenya nilipotoka tumboni mwa mama haliwezi kufukuliwa likaletwa Marekani ninakoishi; Kenya ni kwetu.

Bila shaka umejionea ya Miguna, yule bwana anayetumia jina moja mara mbili.

 

Mshangao unakusubiri

Nisikize kwa makini: mashtaka atakayofungua Miguna, ikiwa tayari hajayafungua, yatakushangaza.

Atatushtaki sote, waliotaka ahamishiwe Canada na waliomtaka asalie Kenya kama ‘jenerali’ wao, hata wahudumu ndani ya ndege, sikwambii hata Malkia wa Uingereza atashtakiwa kwa maana ndiye mkuu wa Jumuiya ya Madola!

Polisi watatakikana kueleza vilikokwenda viatu vyake, akalazimika kuingia ndani ya ndege na champali za kwendea msalani.

Nitakukariria alivyopenda kusema Jakaya Mrisho Kikwete enzi zake akilala Ikulu ya Tanzania pindi maji yalipokaribia kuzidi unga: “Upepo utapita tu.”

Ripoti ya mabilioni ya madeni yanyima Gavana Kinyanjui lepe la usingizi

Gavana wa Nakuru Bw Lee Kinanjui akihutubu awali. Picha/ Maktaba

Na FRANCIS MUREITHI

Kwa Muhtasari:

  • Imebainika kuwa deni la Sh722 milioni pekee ndilo halali kati ya deni la Sh3 bilioni ambalo Gavana Kinyanjui alilirithi
  • Mengi ya madeni ambayo serikali ya kaunti inadaiwa yaliidhinishwa katika kipindi cha mwisho cha mwaka 2017 miezi michache tu kabla ya uchaguzi mkuu
  • Hata hivyo, Gavana Kinyanjui amewahakishia wanakandarsi waliofanya kazi safi watalipwa madeni yao bila kucheleweshwa
  • Idara kadha zilipatikana na makosa ya kununua bidhaa kwa kuongeza bei

WAKATI muhula wa kwanza wa Gavana Lee Kinyanjui wa Kaunti ya Nakuru ukiingia hatua muhimu, huenda kipindi chake cha kwanza kikakumbwa na mgogoro wa malimbikizi ya madeni.

Kulingana na ripoti ya mkaguzi wa hesabu wa ndani, imebainika kuwa ni deni la Sh722 milioni pekee ndilo halali kati ya deni la Sh3 bilioni ambalo Gavana Kinyanjui alilirithi kutoka kwa Gavana Kinuthia Mbugua

Deni hilo linawakilisha asilimia 24 ya madeni yote yaliosalia.

Sasa inamaanisha kuwa deni la zaidi ya Sh2 bilioni ni feki kwani hazina stakabadhi za kudhibitisha kuwa wanakandarasi walitoa huduma kwa kaunti katika kipindi cha makadirio ya fedha cha mwaka wa 2016 /2017.

Aidha ripoti hiyo imefichua kuwa zaidi ya Sh300 milioni hazijulikani jinsi zilivyoingizwa kwenye hesabu ya madeni ya kaunti ilhali hakuna kandarasi zilizotolewa.

 

Kufilisisha kaunti

La kustaajabisha ni kuwa mengi ya madeni ambayo serikali ya kaunti inadaiwa yaliidhinishwa katika kipindi cha mwisho cha mwaka 2017 miezi michache tu kabla ya uchaguzi mkuu.

Kati ya idara ambazo zinadaiwa kupunja pesa za umma ni pamoja na idara ya mazingira, maji na mali ya asili na idara ya barabara.
Ripoti hiyo inawashuku wafanyakazi wa kaunti kwa kushirikiana na matapeli kufilisisha kaunti kwa njia ya udanganyifu.

Gavana Kinyanjui sasa amewaalika maafisa wa kupambana na ufisadi na maadili kuchunguza baadhi ya wafanya kazi hao.

“Huu ni wizi wa mchana wa mali ya umma na ni lazima wafanyakazi waliohusika na ufisadi huu wachunguzwe na wakipatikana na hatia washtakiwe kulingana na sheria za nchi kwani sitakubali kuongoza kaunti iliyojaa wafanyakazi wafisadi

Aidha, Gavana Kinyanjui alisema kuwa lazima atimize ahadi yake kwa zaidi ya wakazi milioni mbili wa kaunti ya Nakuru.
Bw Kinyanjui alisema kuwa baadhi ya miradi haikuwa kwenye bajeti huku zabuni zilizotolewa zikiwa hazina stakabadhi muhimu.

 

Kukithiri kwa ufisadi 

“Ni jambo la kuhuzunisha kuwa kaunti inaonekana kana kwamba ina deni la mabilioni ilhali ripoti ya mkaguzi wa hesabu imefichua kuwa zabuni nyingi zilikuwa na ufisadi mwingi,” akasema Bw Kinyanjui.

Hata hivyo, Gavana Kinyanjui amewahakishia wanakandarsi waliofanya kazi safi watalipwa madeni yao bila kucheleweshwa tena.
Ripoti hiyo ya kurasa 700, imefichua kuwa sheria za kukabiliana na wizi wa pesa za umma katika kaunti zina kasoro nyingi kwani zimewapa wafanyakazi wafisadi mwanya wa kupora pesa za umma.

Ripoti hiyo ambayo imezua wasiwasi miongoni mwa wafanyakazi katika kaunti hii ilitayarishwa kati ya Oktoba na Disemba mwaka 2017 na tayari imekabidhiwa Gavana Kinyanjui.

Hata hivyo, wakazi wa Nakuru wanasubiri kwa hamu na ghamu ikiwa Gavana Kinyanjui atatekeleza mapendekezo ya ripoti hiyo kwa kina.

 

Huenda deni lisilipwe

Kwa mfano deni la Sh656milioni huenda lisilipwe kwa vile hakuna rekodi za kudhibitisha kuwa kazi ilifanyika huku Sh523 milioni zingine zikiwa na kasoro ya stakabadhi.

Hali kadhalika deni la Sh9million katika idara kadha zilipatikana na mushkili kwani stakabadhi hazikuwa sahihi kulinga na sheria za zabuni.

Idara kadha zilipatikana na makosa ya kununua bidhaa kwa kuongeza bei hizo kupita kiasi cha bei zilizotengwa na kuidhinishwa. Idara nyingine iliyokumbwa na ufujaji wa pesa za umma ni idara ya elimu ambapo ripoti hiyo ilifichua kuwa deni la Sh14 milioni limekuwepo tangu mwaka wa 2014.

Idara ya Mazingira, Maji na mali ya Asili hali kadhalika ilipatikana na doa la kuongeza deni kwa zaidi ya Sh14 milioni ilhali idara ya Ardhi ilipatikana na kasoro ya kuongeza deni kwa Sh2.3 milioni.

 

Dhamira kuu ya Miguna Miguna yaonekana ni kujitakasa apate umaarufu kisiasa

Wakili maarufu na mwanasiasa wa NASA aliyefurushwa humu nchini hadi nchini Canada Dkt Miguna Miguna. Picha/ Maktaba

Na WANDERI KAMAU

Kwa Muhtsari:

  • Wachanganuzi wasema kwamba urejeo wa Dkt Miguna katika kambi ya Bw Odinga huenda ukawa hatua ya kujijenga upya kisiasa
  • Viongozi wengi ambao wanalenga kumrithi Bw Odinga walinyamaza wakati Dkt Miguna akiziuiliwa na polisi
  • Dkt Miguna hajapokelewa vizuri katika eneo la Nyando anakotoka, kwa madai ya kuwa “msaliti mkubwa”
  • Baadhi ya watu wanamwona kama mnafiki, anayelenga kujijenga kisiasa kwa kutumia jina la Bw Raila Odinga

HATUA ya wakili mbishi na kiongozi wa vuguvugu la National Resistance Movement (NRM), Dkt Miguna Miguna kujitokeza kama ‘mtetezi mkuu’ wa kinara wa NASA Raila Odinga, ni mkakati wa kurejesha umaarufu wake miongoni mwa jamii ya Waluo.

Wachanganuzi wanasema kwamba urejeo wa Dkt Miguna katika kambi ya Bw Odinga huenda ukawa hatua ya kujijenga upya kisiasa, hasa baada ya kushindwa kwenye kinyang’anyiro cha ugavana katika Kaunti ya Nairobi mnamo Agosti 8, 2017.

Dkt Miguna Miguna amewahi kuwa mkosoaji mkuu wa Bw Odinga, ila ni baada ya Agosti 8, ambapo alirejea katika kambi yake, akiapa kupigania ‘haki’ baada NASA kudai kwamba ‘ilinyang’anywa’ ushindi wake na mrengo wa Jubilee.

“Maamuzi ya Miguna Miguna kumtetea Odinga ni mkakati wa kuimarisha umaarufu wake kitaifa, na kurejesha urafiki na jamii yake ya Waluo. Hii ni kwa kuwa kwa mtazamo wa wengi alikuwa ‘amepoteza’ mwelekeo kisiasa, hasa baada ya kukosana na Bw Odinga mnamo 2011,” asema Wycliffe Muga, ambaye ni mchanganuzi wa masuala ya kisiasa.

Kulingana na Bw Muga, hatua ya Bw Miguna kujitokeza kama kiongozi wa pekee mwenye “ushujaa” katika kumlisha kiapo Bw Odinga mnamo Januari 30, ni mkakati mpana wa mchakato wa urithi wa kisiasa wa Bw Odinga.

Bw Miguna alirejeshwa kwa lazima nchini Canada na Serikali  Jumatano usiku, kwa sababu ya kushiriki katika kiapo hicho, ambacho kimefasiriwa kama “tishio kwa usalama wa kitaifa.”

Aidha, mchanganuzi huyo anarejelea “ukimya” uliodhihirika miongoni mwa viongozi wakuu wa NASA, akiwemo Bw Odinga mwenyewe, Seneta James Orengo wa Siaya, wabunge Junet Mohammed (Suna Mashariki), John Mbadi kati ya wengine kama ishara ya wazi kuhusu ‘tishio za kisiasa’ wanazokabiliwa kutoka kwa kupanda kwa nyota ya Bw Miguna.

 

NASA haikumtetea

Kama kile kinaonekana kudhihirisha hayo, wakili Edward Sifuna, ambaye alimwakilisha Bw Miguna, alikubali kwamba viongozi wengi ambao wanalenga kumrithi Bw Odinga walinyamaza wakati akiziuiliwa na polisi.

“Hatukuchukua juhudi za kutosha kama Bw Miguna. Alibaki kujitetea peke yake huku baadhi yetu tukitazama tu,” akasema Bw Sifuna, aliyeonekana kutoridhishwa na mikakati ya NASA kumtetea Bw Miguna.

Kwa hayo, wachanganuzi wanafasiri ukimya huo kama hofu iliyo na baadhi ya viongozi hao kuhusu umaarufu mkubwa ambao Bw Miguna amepata kutokana na ujasiri wake kumwapisha Bw Odinga.

Mchanganuzi wa kisiasa Edward Kisiang’ani  asema kwamba NASA haikuonyesha umoja kamili na kujitolea kwake, wakati mmoja wao alijipata taabani.

“Ni dhahiri kwamba viongozi wa NASA hudumisha umoja mkubwa, kila wakati mmoja wao anapokamatwa, au anakabiliwa kisiasa kwa njia yoyote. Tulitarajia kuwaona akina Orengo, Muthama kati ya wengine wakijitokeza vikali kuilaumu serikali dhidi ya ‘maonevu dhidi ya mmoja wao. Lakini hali ilikuwa tofauti. Walinyamaza!” asema mchanganuzi huyo.

Kwenye Uchaguzi Mkuu wa Agosti 8, Bw Miguna alishindwa kunyakua ugavana katika Kaunti ya Nairobi, alipowania kama mgombea huru.

 

‘Msaliti mkubwa’

Bw Miguna pia hajakuwa akipokelewa vizuri katika eneo la Nyando (anakotoka), Kisumu katika eneo la Nyanza, kwa madai ya kuwa “msaliti mkubwa” wa Bw Odinga, hasa baada ya kuandika vitabu Peeling Back the Mask: A Quest for Justice in Kenya na Kidneys for The King: De-forrming the Status  Quo’ ambavyo vilimkosoa sana Bw Odinga.

Kwa wakati mmoja, aliyekuwa mbunge wa eneo hilo Bw Fred Outa, aliwaongoza wakazi kuandamana dhidi ya Bw Miguna, ambapo pia walichoma mfano wa “jeneza” lake kwa kuwa msaliti.

Kwa upande wake, Bw Miguna alikosoa vikali kisa hicho, akikifananisha na “amri iliyotolewa” na Bw Odinga.

Hata hivyo, hali imeonekana kuwa tofauti mara hii, ambapo wakazi waliandamana vikali wakiilaumu serikali dhidi ya kumhangaisha Bwe Miguna, waliyemtaja kuwa “mtoto wao.”

Hivyo, wachanganuzi wanasema kwamba ingawa huenda Bw Miguna hatimaye akafaulu kupata uungwaji mkono katika jamii hiyo, juhudi zake hazitakosa pingamizi, hasa kutoka kwa viongozi ambao watahisi kutishwa na urejeo wake.

 

Hajakubalika kama ‘Jenerali’

Mdadisi wa kisiasa Kiprotich Mutai asema kwamba makovu ya usaliti wa Bw Odinga na Bw Miguna, hasa baada ya matamshi yake ya awali dhidi ya Bw Odinga. “Kuna viongozi ambao bado hawajamkubali Bw Miguna kama ‘Jenerali’  wao wa kisiasa.

Baadhi wanamwona kama mnafiki, anayelenga kujijenga kisiasa kwa kutumia jina la Raila, kama wengi ambavyo wamekuwa wakifanya ili kupata upenyu katika siasa za kitaifa,” asema Bw Mutai.

Licha ya hayo, Bw Miguna amekuwa akijinadi kama “mwanamapinduzi” anayelenga kuhakikisha kwamba haki kamili imepatikana kwa wale ambao wamekuwa wakibaguliwa kisiasa.

“Lengo langu ni kulainisha mfumo wa kisiasa nchini. Tulipigana na utawala wa rais mstaafu (Moi) na kumshinda. Kamwe hatutakubali kutishwa na uongozi wa Rais Uhuru Kenyatta na naibu wake Willam Ruto,” akasema Bw Miguna.

Wanafunzi 400 wenye funza wanufaika

Na FADHILI FREDRICK

WANAFUNZI 400 kutoka shule za msingi za Kilole na Zigira wamenufaika na mradi wa kupambana na funza uliozinduliwa na shirika la Ahadi Trust Kenya katika Kaunti ya Kwale.

Afisa Mkuu Mtendaji wa  shirika hilo, Dkt Stanley Kamau alisema vita dhidi ya funza ni muhimu ili kuwawezesha watoto kusoma katika mazingira mazuri bila usumbufu.

Akizungumza katika shule ya msingi ya Kilole wakati wa usambazaji wa dawa za funza, viatu na sodo kwa wanafunzi, Bw Kamau alisema Kwale ni kati ya kaunti zitakazonufaika kwa Sh2 milioni za kupambana na funza.

“Tumeweka Sh2 milioni kwa kila kaunti ili kupambana na funza  ili kuruhusu watoto wetu kusoma katika mazingira mazuri na kuwawezesha kufanya vizuri katika masomo yao,” alisema.

Bw Kamau alitumia fursa hiyo kuwashawishi wazazi kubuni miradi ambayo itawasaidia kupigana na umaskini na kuboresha viwango vyao vya maisha.

Hata hivyo, aliongeza kwamba mwezi Machi mwaka huu, shirika hilo litafanya utafiti wa kina nchini ili kubainisha ni maeneo yapi ambayo yana katika hatari kuu ya funza kuwaathiri wakazi.

Alisema utafiti huo utatoa ripoti kamili ambayo italisaidia shirika hilo kupambana na mdudu huyo hatari.

 

Atwoli ataka Duale apokonywe kazi

Katibu Mkuu wa COTU Bw Francis Atwoli. Picha/ Maktaba

Na BERNARDINE MUTANU

Kwa Muhtasari:

  • Bw Francis Atwoli asema Bw Duale alipotosha umma alipomuuliza Ukur Yattani hatua ambayo angemchukulia
  • Bw Atwoli alimkumbusha Bw Duale matukio ya awali ambapo mgogoro mkubwa ulishuhudiwa 2013
  • Asema wanachama wa COTU-K wana uhuru wa kumchagua wanayemtaka

KATIBU Mkuu wa Muungano wa Vyama vya Wafanyikazi (COTU) Francis Atwoli ametaka Kiongozi wa Wengi Bungeni Aden Duale afutwe kazi.

Katika taarifa ya Jumamosi, Bw Atwoli alisema Bw Duale alipotosha umma alipouliza waziri mteule wa Leba Ukur Yattani hatua ambayo angemchukulia Bw Atwoli ikiwa angepewa wadhifa huo.

Bw Atwoli ni mwanachama wa Bodi ya Hazina ya Malipo ya Uzeeni (NSSF), ambayo iko chini ya Wizara ya Leba.
Akijibu, Bw Yattani alisema shughuli ya kwanza ikiwa atapewa wadhifa huo itakuwa kumwondoa Bw Atwoli na Bi Jacquelyn Mugo, anayesimamia shirikisho la waajiri (FKE) katika Bodi ya NSSF.

“Inasikitisha kuwa Kiongozi wa Wengi Bungeni anategemea tetesi kufanikisha majukumu yake. Yafaa aondolewe ili atakayepewa nafasi hiyo awe anaelewa sheria ili awe na uwezo wa kushauri bunge kwa njia inayofaa kuhusiana na suala muhimu kama hilo,” alisema Atwoli katika taarifa.

Awali, kulikuwa na mzozo kati ya wanachama wa Bodi ya NSSF na aliyekuwa Waziri wa Leba Kazungu Kambi ambao ulisuluhishwa na Waziri Raychelle Omamo 2015, alipokuwa kaimu waziri wa Leba baada ya Kazungu Kambi kufutwa kazi.

Kauli ya Bw Duale imefufua makovu kwani katibu huyo alimpuzilia mbali katika taarifa kali iliyotumwa katika vyumba vya habari jana.

“Kauli ya Kiongozi wa Wengi Bungeni ni ishara wazi kuhusiana na jinsi baadhi ya watu walioko mamlakani walivyo na tamaa kuu kuhusiana na uendeshaji wa NSSF,” alisema Bw Atwoli.

Katika taarifa hiyo, Bw Atwoli alimkumbusha Bw Duale matukio ya awali ambapo mgogoro mkubwa ulishuhudiwa 2013, baada ya Bw Kambi kufanywa Waziri wa Leba.

Kulingana naye, aliteuliwa kuhudumu katika NSSF akiwa na Bi Mugo kupitia kwa notisi katika Gazeti la Serikali Septemba 16, 2015 na Bi Omamo, baada ya msururu wa kesi mahakamani.

Bw Atwoli alisema mgogoro ulioshuhudiwa ulitokana na Bw Kazungu kutofuata sheria, zaidi ya kupuuza agizo la mahakama la kutoingilia shughuli za NSSF.

Alisema wanachama wa COTU-K wana uhuru wa kumchagua wanayemtaka kuwawakilisha katika bodi ya NSSF na kuongeza kuwa muhula wao wa kwanza kuhudumu katika bodi hiyo hajakamilika, na kwamba bado kuna muhula mwingine wa kuhudumu.

Familia yakabiliwa na mzigo wa kulipia upasuaji wa binti yao

Na PETER MBURU

Kwa Muhtasari:

  • Babake Jane Wacuka, aliamua kumgawia sehemu ya ini lake asimwone akiteseka tena
  • Familia hiyo masikini ilifanya mchango na kupata Sh3 milioni
  • Kadri anavyokua Wacuka, ini lake linazidi kuwa dogo

FAMILIA moja katika eneo la Bahati, Nakuru inatatizwa na mzigo wa kulea binti wa miaka 14, ambaye anasumbuliwa na ugonjwa wa ini.
Ingawa mzazi wa mtoto huyo, Bw Geoffrey Warui aliamua kumgawia bintiye sehemu ya ini lake, shughuli hiyo inafaa kufanywa nchini India.

“Inaniuma sana kumwona mwanangu akiteseka kila wakati, amekuwa na matatizo mengi ya afya ambayo yameishia kuathiri elimu yake. Niliamua kumgawia sehemu ya ini langu nisimwone akiteseka tena,” Bw Warui akaeleza Taifa Jumapili.

Msichana Jane Wacuka, 14, amekuwa na ugonjwa wa ini (Liver Cirrhosis) tangu akiwa na miezi sita, jambo ambalo limetatiza hali ya maisha yake na elimu.
Leo, familia hiyo itakuwa ikifanya mchango nyumbani kwao eneo la Ndundori ili kujaza pesa zilizosalia.

Matibabu hayo ambayo yatahusisha upasuaji wa baba na bintiye kwa takriban saa 15, utafanyika katika hospitali moja nchini India na yatagharimu Sh7 milioni.

Familia hiyo masikini ilifanya mchango na kupata Sh3 milioni ambapo wazazi walizuru India mnamo Januari 14 pamoja na binti yao kwa ajili ya upasuaji, wakiwaacha marafiki na familia wakichangisha pesa zilizosalia.

“Utakuwa upasuaji wa wazi baina yangu na binti yangu tukiwa katika chumba kimoja na utaendeshwa na vikosi vitatu vya madaktari watano kila kimoja, kwa saa tano,” Bw Warui akaeleza.

Serikali ya kaunti ya Nakuru imekuwa ikishirikiana na familia hiyo kutoa msaada na iliahidi kuzidi kuwashika mkono.

“Tunaamini kuwa pesa zilizosalia zitapatikana ili mtoto huyo apone na erejelee maisha ya afya bora,” Spika wa kaunti Joel Kairu akasema.

Kulingana na babake mtoto huyo, kadri anavyokua Wacuka, ini lake linakuwa dogo na hivyo inakuwa vigumu kwa mwili wake kuendesha shughuli zake kikamilifu.

 

Fujo chuoni baada ya mwanafunzi kuuawa

 

Jengo la klabu ya Dalawa mjini Bondo ambalo lilichomwa na wanafunzi wa Chuo Kikuu cha Sayansi na Teknolojia cha Jaramogi Oginga Odinga (JOOUST) Februari 10, 2018 baada ya mwenzao wa mwaka wa tatu kuuawa Ijumaa usiku. Picha/ Justus Ochieng

Na JUSTUS OCHIENG

Kwa Muhtasari:

  • Mauaji ya mwanafunzi yachochea maandamano makubwa, huku wanafunzi wakichoma klabu mjini Bondo
  • Mwanafunzi huyo alidungwa kisu cha mauti wakati wa mapigano mwendo wa saa nane za usiku
  • Steve Owino Otombo, alikuwa mwanafunzi wa mwaka wa tatu, aliyekuwa akisomea kilimo

MWANAFUNZI wa Chuo Kikuu cha Jaramogi Oginga Odinga kilichoko kaunti Siaya aliuawa kwa kudungwa kisu kwenye mgogoro katika baa moja usiku wa kuamkia Jumamosi.

Mauaji hayo yaliibua maandamano makubwa, ambapo wanafunzi wa chuo hicho walichoma klabu hicho mjini Bondo.

Kulingana na Naibu Chansela wa chuo hicho Prof Stephen Agong, baadhi ya wanafunzi kutoka chuoni humo walianza kupigana na wahudumu wa baa hiyo mjini Bondo. Ni wakati huo ambapo mwanafunzi wa mwaka wa tatu alidungwa kwa kisu.

“Wanafunzi walizozana na wahudumu wa baa katika kisa ambacho kinachunguzwa na polisi. Taarifa tuliyo nayo ni kwamba mwanafunzi wetu alidungwa kisu na kufa wakati wa makabiliano hayo,” akasema Prof Agong.

Kamishna wa Kaunti ya Siaya anayeondoka, Bi Josephine Onunga, alisema mwanafunzi huyo alidungwa wakati wa mapigano mwendo wa saa nane za usiku.

“Alikimbizwa katika Hospitali ya Kaunti Ndogo ya Bondo ambamo aliaga dunia,” alisema Bi Onunga.

Jengo la klabu ya Dalawa mjini Bondo ambalo lilichomwa na wanafunzi wa Chuo Kikuu cha Sayansi na Teknolojia cha Jaramogi Oginga Odinga (JOOUST) Februari 10, 2018 baada ya mwenzao wa mwaka wa tatu kuuawa Ijumaa usiku. Picha/ Justus Ochieng

Prof Agong’ alisema polisi Bondo wameanzisha uchunguzi kuhusiana na kisa hicho.

“Hili ni suala la polisi na tayari wameanzisha uchunguzi. Tutatoa habari zaidi baadaye, ni wazi kwamba hayo yalikuwa mauaji,” alisema Naibu Chansela.

Marehemu, Steve Owino Otombo, alikuwa mwanafunzi wa mwaka wa tatu, aliyekuwa akisomea kilimo.

Aliuawa baada ya mashindano ya DJ katika klabu ya Dala-wa kugeuka mapigano.

Naibu Kamishna wa Kaunti Bondo Richard Ojwang’ alisema mambo yaligeuka wakati baadhi ya wanafunzi walihisi walikuwa karibu kupoteza katika mashindano hayo.

Wanafunzi hao walizua rabsha, na ni wakati huo ambapo mwanafunzi huyo alidungwa kwa kisu.

“Wanafunzi hao walitoka nje ili kulalamika kabla ya kuanza kurusha mawe, hali iliyozua mapigano,” alisema Bw Ojwang’.

Makabiliano makali yalizuka kati ya wanafunzi na wakazi, na ndipo mwanafunzi huyo alipodungwa.

 

Agizo ardhi inayozozaniwa isiingiliwe hadi kesi isikizwe

Joseph Lenguris (kushoto) akitazama vijana wakiangusha lango la shamba linalozozaniwa eneo la Kikambala, Kaunti ya Kilifi jana. Bw Lenguris na mewe Bi Monika Behrmann anazoania umiliki wa ardhi hiyo na Bi Caroline Mwelu. Picha/ Kazungu Samuel

Na PHILIP MUYANGA

Kwa Muhtasari:

  • Shamba la mamilioni ya pesa eneo la Kikambala libaki lilivyo
  • Bi Caroline Mwelu Mwandiku anataka mahakama kumpa agizo la muda la kumzuia Bi Monika Herta Behrman kutojihusisha na shamba hilo
  • Kwa upande wake Bi Behrman katika ombi lake, anataka majina yake yatolewe katika kesi

MAHAKAMA ya Mazingira na Mashamba imeamuru kuwa shamba la thamani ya mamilioni ya pesa linalozozaniwa eneo la Kikambala libaki lilivyo kwa sasa.

Jaji Charles Yano, katika mahakama ya Mombasa, aliamua kuwa hali ilivyo katika shamba hilo imebaki vivyo hivyo hadi Aprili 16, wakati maombi mawili yaliyowekwa mahakamani na pande zinazozona yatasikizwa.

Katika ombi moja, Bi Caroline Mwelu Mwandiku anataka mahakama kumpatia agizo la muda la kumzuia Bi Monika Herta Behrman ambaye ni mmoja wa waliowasilisha maombi katika kesi kutojihusisha na shamba hilo liliko kaunti ya Kilifi.

Anataka pia kamanda wa polisi katika eneo la kilifi na maafisa wake waamuriwe kuhakikisha maagizo hayo ya mahakama yametimizwa.
Kulingana na ombi hilo, Bi Mwandiku anaishi na mwanawe wa kiume na wasichana wawili wadogo na ni mmiliki wa shamba hilo.

“Mlalamishi wa pili (Bi Behrman), bwanake na watu wanaofanya kazi kwa niaba yao, wametekeleza shughuli za uharibifu katika shamba hilo zikiwemo kuiba vitu vya thamani na vya kielektroniki,” ombi hilo lilisema.

Kwa upande wake Bi Behrman katika ombi lake, ambaye kulingana na karatasi Za kesi ni muweka kesi pamoja na Bi Mwandiku anataka majina yake yatolewe katika kesi.

Anataka pia kesi ambayo Bi Mwandiku aliwasilisha mahakamani kutupiliwa mbali.

 

Watatu wafariki baada ya malori mawili kugongana na kushika moto

Na PIUS MAUNDU

WATU watatu waliaga dunia Ijumaa adhuhuri baada ya magari walimokuwa wakisafiria kugongana na kuwaka moto karibu na mji wa Salama, katika barabara ya Nairobi kuelekea Mombasa.

Mtu mwingine aliyejeruhiwa alikimbizwa hospitalini kutibiwa, alisema Mkuu wa Polisi wa Mukaa Bw Charles Muthui alipothibitisha ajali hiyo.

“Lori moja lililokuwa likisafiri kutoka Nairobi lilipoteza mwelekeo baada ya gurudumu kupasuka. Kutokana na hilo, liligonga lori lingine ambalo lilikuwa likitoka upande wa Mombasa,” alisema Bw Muthui. Magari hayo yaliwaka moto na kuteketea.

Ajali hiyo ilitokea huku watu wengine watatu wakiripotiwa kuangamia eneo la Homabay baada ya gari walimokuwa kugonga trakta la kubeba miwa. Watu hao waliaga dunia papo hapo. Licha ya hatua za serikali kidhibiti ajali za barabarani, bado watu wanaendelea kuangamia kutokana na ajali mbaya.

 

Kamishna atahadharisha viongozi dhidi ya siasa kuingizwa katika ujenzi wa bwawa

Na Kenya News Agency

KAMISHNA wa Kaunti ya Kirinyaga Birik Mohammed amehimiza viongozi kutoingiza siasa katika mradi wa Sh19 bilioni wa ujenzi wa bwawa la Thiba.

Bw Birik alisema siasa duni ikiwemo uchochezi wa watu fulani utachelewesha utekelezaji wa mradi huo unaostahili kuanza Machi.

Kamishna huyo alikuwa akizungumzia habari za maandamano ya wakazi katika eneo la Mutithi mjini Mwea ambako ofisi ya mradi imefunguliwa. Alisema manaibu kamishna wote wa kaunti hiyo wanahitajika kuongoza shughuli ya kusajili wafanyakazi watakaohudumu katika mradi huo wa ujenzi, utakaochukua miaka mitatu hadi minne.

“Ni msimamo wa serikali kwamba mradi huu wa bwawa utekelezwe bila ya kuingizwa siasa duni. Tutahakikisha manaibu wa makamishna wanashiriki kikamilifu,” akasema.

Awali, afisa katika Kitengo cha Utekelezaji Mradi alimfahamisha Bw Birik kwamba kati ya wakazi 60 waliohojiwa ili kuendesha mashine za uchimbaji, hakuna aliyefaulu.

Msomi ataka ushirikiano Pwani

WACHIRA MWANGI na WINNIE ATIENO

WAISLAMU katika eneo la Pwani wamehimizwa kuweka kando tofauti zao na kushirikiana kukabiliana na changamoto zinazowakumba.

Katibu mteule wa Utafiti katika wizara ya Kilimo, Profesa Hamadi Boga, alisema japokuwa eneo la Pwani lina matatizo mengi, viongozi wake wameshindwa kuyatatua kwa kukosa ushirikiano.

“Pwani tuko na changamoto za matumizi ya mihadarati, ukosefu wa elimu na misimamo mikali ya kidini. Haya ndiyo mambo ambayo twapaswa kushirikiana na kuyakabili kwa msimamo mmoja” akasema.

Naibu Chansela huyo wa Chuo Kikuu cha Taita Tateva ambaye amependekezwa kuongoza utafiti katika wizara ya Kilimo, alisema ni umoja tu utakaowasaidia watu wa Pwani.

Alikuwa akizungumza wakati wa hafla maalum katika uwanja wa Serani mjini Mombasa Ijumaa usiku, akiandamana na mfanyabiashara maarufu Bw Mohamed Jaffer.

Mfanyabiashara huyo aliwashauri watu wa Pwani kuwa wakakamavu na kujitolea kufanya kazi, na kuacha tabia ya ‘omba omba’ kwa wanasiasa.
Alimshukuru Rais Uhuru Kenyatta na naibu wake William Ruto kwa kuhakikisha uwanja wa Serani unapata hatimiliki baada ya miaka 35.

“Nimepigania hatimiliki ya ardhi hii kwa miaka 35. Kwanza nilienda kwa rais mstaafu Daniel Moi kumrai atupatie hati miliki lakini sikupata. Nikaenda kwa mrithi wake Mwai Kibaki na Raila Odinga lakini sikupata,” akaelezea umma.

 

Simanzi katika hafla ya waliokufa katika ajali ya ndege

Hafla ya mazishi ya watu wawili walioangamia katika ajali ya ndege Oktoba 21, 2017, yafanyika katika ufuo wa Ziwa Nakuru Februari 10, 2018. Picha/ Joseph Openda

Na PETER MBURU

Kwa muhtasari:

  • Mazishi hayakuwa na jeneza, bali maua na picha pekee
  • Sam G na Mapozi hawakuwahi kupatikana tangu ajali ya Nakuru itokee
  • Babake Mapozi naye alieleza huzuni yake, akisema mwanawe alikuwa amependekeza mahali alipotaka kujenga nyumba ya kifahari
Hafla ya mazishi ya watu wawili walioangamia katika ajali ya ndege Oktoba 21, 2017, yafanyika katika ufuo wa Ziwa Nakuru Februari 10, 2018. Picha/ Joseph Openda

MAJONZI yalitanda Jumamosi katika ufuo wa Ziwa Nakuru wakati wa sherehe ya mazishi ya ukumbusho wa pamoja kwa watu wawili kati ya watano walioangamia kwenye ajali ya ndege mwaka 2017.

Kinyume na mazishi ya kawaida ambapo kungekuwa na majeneza, ni picha zao nadhifu pamoja na maua vilivyowekwa mezani katika hema.

Wawili hao, Samuel Gitau (Sam G) na John Ndirangu Njuguna (Mapozi) waliangamia pamoja na wenzao watatu Anthony Kipyegon, rubani Apollo Malowa na mwanadada Veronica Muthoni.

Hafla ya mazishi ya watu wawili walioangamia katika ajali ya ndege Oktoba 21, 2017, yafanyika katika ufuo wa Ziwa Nakuru Februari 10, 2018. Picha/ Joseph Openda

Japo watatu hao walipatikana na maiti zao kuzikwa nyumbani mwao, Sam G na Mapozi hawakuwahi kupatikana, jambo lililosukumia viongozi, familia na marafiki kupendekeza sherehe ya aina hiyo, kama njia mojawapo ya kuliwaza familia zao.

Jumamosi wakati wa maombelezi hayo, viongozi wa tabaka mbalimbali waliungana na familia za wendazao katika ufuo huo tangu ajali hiyo mwezi Oktoba.

Picha za ‘Mapozi’ na ‘Sam G’ walioangamia katika ajali ya ndege Oktoba 21, 2017. Mazishi yao yalifanyika katika ufuo wa Ziwa Nakuru Februari 10, 2018. Picha/ Joseph Openda

“Tumepitia miezi mitatu na nusu ya kuchosha, kutamausha na kuvunja moyo tulipokuwa tukitafuta miili ya wapendwa wetu,” seneta wa Nakuru Susan Kihika, ambaye pia alikuwa mwajiri wao akasema.

Babake ‘Mapozi’ naye alieleza huzuni yake, akisema mwanawe alikuwa amependekeza mahali alipotaka kujenga nyumba ya kifahari, lakini akafa kabla ya kutimiza ndoto yake.

 

Makanisa yataka serikali izime ‘Samantha’

Kinyago cha wanaume kujiburudisha kimapenzi almaarufu ‘Samantha’. Makanisa yameitaka serikali kuzima biashara hii. Picha/ Hisani

 

Na MWANGI MUIRURI

Kwa muhtasari:

  • Askofu Hillary Mugo aitaka serikali kukomesha biashara ya ‘Samantha’
  • Makanisa yamtaka waziri wa Usalama wa Ndani, Dkt Fred Matiang’i ajumuishe misako dhidi ya vinyago hivyo
  • Tamadauni za kizungu zakataliwa nchini

MUUNGANO wa Wakristo ukanda wa Mlima Kenya, unaitaka serikali iunde sheria ya kupiga marufuku utumizi wa vinyago vya mahaba hapa nchini, hasa muundo wa ‘Samantha’.

Unasema utumizi wa vinyago hivyo ni upotovu wa kimaadili na hali inayoashiria uabudu wa shetani.

Mwenyekiti wao, Askofu Hillary Mugo, muungano huo ulisema Jumamosi kwamba serikali hadi sasa inaonekana kuchukulia mwelekeo huo wa kuunda vinyago hivyo na kuvisambaza mashinani kama njia moja ya kibiashara.

Akiongea Mjini Murang’a, askofu huyo alisema kuwa hadi sasa vinyago hivyo vimepenya mashinani na ambapo majumba spesheli ya kuburudika mahaba yanapokea wateja wa kushiriki mahaba kwa malipo na vinyago hivyo.

“Niko na ushahidi kuwa katika mitaa ya Githunguri katika Kaunti ya Kiambu, Nyeri, Murang’a na Kirinyaga kuna ‘Samantha’ hao. Wazee kwa vijana wanajumuika kulipa ada ili washiriki mahaba na hilo ni suala la kishetani,” akateta.

Alisema kuwa serikali isiyowajibikia masuala ya kimaadili na kuwahimiza watu wake wafuate mkondo uliowekwa na tamaduni za kijamii na maandiko matakatifu kuhusu ndoa na mahaba ni mshirika wa ushetani.

‘Uzungu’

“Tulianza na kuletewa ‘Uzungu’ wa ndoa za jinsia moja pamoja na biashara ya ukahaba ndani ya mpangilio huo potovu. Tukawa na vinyago vya kuridhisha wanawake kimahaba na tena tukawa na watoto wetu wa kike wakisajiliwa katika mitandao ya biashara ya ngono na wanyama. Sasa tumeletewa Samantha na serikali haijaongea kupinga kwa kuwa hatutarajii iunge mkono,” akasema.

Askofu Mugo alimtaka waziri wa Usalama wa Ndani, Dkt Fred Matiang’i ajumuishe misako dhidi ya vinyago hivyo sambamba na magenge haramu na pia mitambo ya kamari katika amri zake za misako.

Aidha, ameitaka serikali izindue mpango maalum wa kutoa imani ya kimaisha kwa vijana wa taifa hili “ambao wameishiwa na uvumilivu dhidi ya mahangaiko ya kimaisha kiasi kwamba kujituliza, badala ya wakimbizane na ya kuwafaa maishani, wanafuatana na yale ya kuwaangamiza.”

Alisema kuwa misukosuko ndani ya ndoa inhayoshuhudiwa kwa sasa imetokana na kuishiwa na imani hiyo kwa maisha kiasi kwamba “sasa kuepuka mahangaiko, kuna mauaji, ulevi kiholela, utumizi wa mihadarati na sasa kujituliza hisia za mahaba na vinyago.”

Mawakili kugoma kulalamikia mazoea ya serikali kukaidi maagizo ya mahakama

Mwenyekiti wa Chama cha Mawakili nchini (LSK) Bw Isaac Okero. Picha/ Maktaba

Na KENNEDY KIMANTHI

Kwa muhtasari

  • LSK chasema mgomo huo utafanyika kote nchini na kudumu kwa siku tano
  • Maaandamano ya amani katika miji mbalimbali nchini 
  • Jaji Mkuu ameikejeleli serikali kwa kupuuza maagizo ya mahakama

SHUGHULI za mahakama Jumatatu zitakwama kote nchini, mawakili watakapoanza mgomo kupinga hatua ya serikali kudharau maagizo ya mahakama na kukiuka haki za waliozuiliwa kwenye korokoro za polisi.

Chama cha Wanasheria Nchini (LSK) Jumamosi kilisema mgomo huo utafanyika kote nchini na kudumu kwa siku tano, hadi Ijumaa wiki hii.
Naye kiongozi wa NASA, Bw Raila Odinga ameikashifu serikali kwa kukiuka Katiba na haki za raia kwa kudharau mahakama.

“Utawala wa Jubilee umegeuka kuwa dhalimu kwa kukaidi mahakama huku ikitumia polisi kuwahangaisha wananchi bila sababu,” akasema alipohudhuria mazishi ya babake mkurugenzi wa mawasiliano wa ODM Philip Etale, Bw Justus Etale.

LSK ilisema serikali ambayo inastahili kuonyesha mfano mzuri kwa umma kwa kutii maagizo ya mahakama, imefeli kutekeleza wajibu huo.

“Wanachama wetu wote watasusia mahakama kwa siku tano kuanzia Jumatatu kupinga tabia ya serikali, na maafisa wake wakuu, kutoheshimu amri za mahakama,” akasema mwenyekiti wa chama hicho, wakili Isaac Okero kwe

nye taarifa kwa vyombo vya habari.

“Ni wajibu wa kila mtu kuheshimu sheria. Ikiwa serikali inadharau sheria haifai kutarajia wananchi kuheshimu sheria hizo. Na nchi ambayo haiheshimu katiba na sheria hutumbukia katika machafuko,” akaeleza.

 

Maandamano

Wanachama wa LSK pia watafanya maandamano ya amani katika miji mbalimbali nchini. Watavalia mavazi yao rasmi ya kazi na kufunga ukanda wa manjano kuashiria kuwa wanagoma.

“Utawala wa kisheria nchini umekuwa ukikabiliwa na changamoto kuu katika siku chache zilizopita, baada ya maafisa wa serikali kuamua kuvunja haki za wananchi na kudharau maagizo ya mahakama,” akaeleza Bw Okero.

Hata hivyo, mahakama zinazoshughulikia kesi za uchaguzi hazitaathiriwa kutokana na kile ambacho LSK inasema ni makataa yaliyowekewa kesi hizo.
Msimamo huo wa LSK unajiri siku chache baada ya Jaji Mku David Maraga kuikashifu serikali kwa kupuuza mahakama, akisema maagizo yake yanafaa kuheshimiwa na wote.

Jaji Maraga alisema kuwa mwenendo wa kupuuzilia mbali maagizo ya mahakama unakwenda kinyume na Katiba na utawala wa sheria.
Katika kipindi cha wiki moja iliyopita, serikali na maafisa wake wakuu wamekuwa wakipuuza maagizo yanayotolewa na serikali kuhusu masuala yenye umuhimu wa kitaifa.

Kwanza, serikali ilipuuza agizo lililotolewa na mahakama kuu kuitaka Mamlaka ya Mawasiliano (CA) kufungua mitambo ya matangazo ya runinga nne zilizozimwa mnamo Januari 30.

 

Runinga kuzimwa

Mitambo ya kupeperusha matangazo ya vituo vyo NTV, Citizen, KTN na Inooro TV ilizimwa kwa kupeperusha moja kwa moja matukio katika halfa ya kuapishwa kwa kingozi wa NASA Raila Odinga katika bustani ya Uhuru Park, Nairobi.

LSK ilisema itawasilisha kesi mahakamani kutaka kuadhibiwa kwa maafisa waliohusika moja kwa moja katika hatua hiyo ya kudharua mahakama.
Polisi, wakiongozwa na Inspekta Jenerali (IG) Joseph Boinnet, walipuuzilia mbali agizo la mahakama la kutaka wakili Miguna Miguna aachiliwe huru baada ya kupewa dhamana ya Sh50,000.

Isitoshe, IG alipuuza amri ya kumtaka kufika mbele ya Jaji wa Mahakama Kuu Luka Kimaru, kuelezea ni kwa nini alikataa kumwachilia Dkt Miguna.
Hii si mara ya kwanza kwa maafisa wakuu serikalini kudharau maagizo ya mahakama.

Itakumbubwa kuwa Makatibu wa Wizara wakiwemo Karanja Kibicho, Saitoti Torome, na Monica Juma (sasa waziri mteule) wamewahi kudharau amri za mahakama nyakati tofauti.

 

Polo aacha kazi eti bosi anamnyemelea

KABATI, MURANG’A

Na TOBBIE WEKESA

KALAMENI mmoja aliyekuwa akifanya kazi ya shambani katika boma la eneo hili, aliwashangaza wengi alipoacha kazi akidai mke wa mdosi alikuwa akimnyemelea.

Kulingana na polo, mama alipenda sana kumpa “mshene” kumhusu bwana yake. Jamaa alidai mke wa bosi alipenda kumpigia polo simu akisema alitaka kumpa salamu tu.

Duru zinasema mara kwa mara, mdosi alipokosa kurejea nyumbani kwake, mkewe alikuwa akimpigia polo simu na kumuelezea jinsi alivyokuwa akipigwa na kibaridi usiku.

Alifichua kwamba mwanamke huyo alikuwa akimtisha akubali mambo yake au amfute kazi. Polo aliamua kumpuuzilia mbali kipusa japo wasiwasi wake ulikuwa huenda mdosi akagundua mkewe humpigia simu wakati wa usiku.

Kulingana na polo, mdosi hangeamini kuwa ni mkewe aliyekuwa akimsumbua. Penyenye zinasema mdosi alijulikana kijiji kizima kama mtu asiyependa mzaha na yeyote aliyechezea mali yake.

Kwa kuhofia kupewa adabu kali, polo aliamua kufunganya virago na kwenda zake.

“Huyu mwanamke atanisababishia balaa. Bwana yake akisikia haya mambo, hatanielewa. Heri nichukue tahadhari ya mapema,” polo alisema akianza safari.
Wenyeji wa hapa walishangaa kumuona mtu aliyefanya kazi kwa unyenyekevu kwa muda mrefu akiondoka ghafla.

“Mimi ninataka kuishi kesho. Huyu mwanamke ameninyemelea kwa muda mrefu sana na mimi sitaki maneno yake,” polo aliwaeleza majirani. Vilevile aliwaeleza majirani jinsi mwanamke huyo alivyokuwa akimpigia simu usiku akimuomba ampe joto.

Polo alidai kwamba licha ya kukataa wito wa mama, mdosi hangeshawishika na maelezo yake iwapo angegundua kilichokuwa kikiendelea.
“Acha amnyemelee mtu mwingine lakini mimi sitaki majeraha,” polo aliwaaga majirani na kuenda kabisa.

BI TAIFA FEBRUARI 11, 2018

DORIS Michu, 21, ni mwanamitindo jijini Nairobi. Uraibu wake ni kuogelea na kusikiliza muziki. PICHA/ ANTHONY OMUYA

Wakenya wazua maswali kuhusu mawaziri wateule

 

Bi Amina Mohammed ambaye ameteuliwa kusimamia Wizara ya Elimu. Picha/MAKTABA

Na LUCY KILALO

BAADHI ya watu walioteuliwa na Rais Uhuru Kenyatta mwezi Januari kuwa mawaziri huenda wakakabiliwa na maswali magumu kutoka kwa Wakenya kuhusu kufaa kwao katika nyadhifa hizo.

“Afisi ya kamati ya Uteuzi imepokea kiapo cha ushahidi wa kuandikwa na barua sita ambazo zinaibua masuala kuhusu uteuzi wa baadhi ya mawaziri,” karani wa Bunge la Kitaifa, Bw Michael Sialai alieleza.

“Pia nimepokea barua nyingine mbili kutoka kwa mwenyekiti wa Tume ya Haki za Binadamu Kenya (KHRC), Bw George Kegoro na Bw Ekuru Aukot, ambao wangependa kufika mbele ya kamati kuzungumzia masuala ya jumla ya utaratibu wa upigaji msasa.”

Aliongeza: “Umma pia unashauriwa kuwa suala lolote ambalo wangependa kuwasilisha kuhusiana na walioteuliwa, ufanye hivyo wa njia ya kiapo cha ushahidi ulioandikwa.”

Kamati hiyo kisha inatarajiwa kuchunguza barua na ushahidi huo kabla ya shughuli ya kuwapiga msasa mawaziri tisa waliopendekezwa. Rais Kenyatta aliwasilisha majina tisa ya mawaziri wapya kwa Bunge la kitaifa ambao watapigwa msasa na kamati ambayo hatimaye inatarajiwa kuwasilisha ripoti yake bungeni kuidhinisha ama kupinga mapendekezo yake.

Juma lililopita, kamati hiyo iliondoa tashwishwi yoyote kuhusiana na jinsi itaendesha utaratibu huo, hasa ikibainika kuwa wanakamati ni wa chama tawala cha Jubilee pekee. Upinzani, kupitia kwa Kiongozi wa Wachache, Bw John Mbadi uliandika barua kwa Spika, Justin Muturi na kudumisha msimamo wake kuwa hautashiriki utaratibu huo. Muungano wa NASA umetangaza kuwa hautambui uteuzi huo, kwa kuwa haujatambua serikali iliyopo.

Katika kikao chao cha kwanza juma lililopita, kamati hiyo ilijitetea ikisema kuwa itatekeleza wajibu huo vilivyo. Spika Muturi na Kiongozi wa Walio Wengi katika Bunge la Kitaifa, Adan Duale waliambia wanahabari kuwa wana uwezo wa kuwapiga msasa walioteuliwa, kubainisha utendaji kazi wao.

Wanaotarajiwa kupigwa msasa ni Margaret Kobia (Utumishi wa Umma, Vijana na Mashauri ya Kijinsia), John Munyes (Mafuta na Madini), Monica Juma (Mashauri ya Kigeni), Simon Chelgui (Maji na Usafi), Rashid Echesa (Michezo), Farida Karoney (Ardhi), Ukur Yattany (Leba) Peter Munya (Muungano wa Afrika Mashariki) na Keriako Tobiko (Mazingira).

 

MWANASIASA wa NASA, Miguna Miguna (aliyevaa kofia) akiwa katika Mahakama ya Kajiado jana asubuhi. Bw Miguna alionekana kwa mara ya kwanza alipofikishwa katika mahakama hapo jana, siku tano baada ya kukamatwa na polisi. Picha/KANYIRI WAHITO

Hatimaye Miguna Miguna aonekana hadharani baada ya siku tano

Bw Miguna Miguna alipofikishwa katika mahakama ya Kajiado Februari 6, 2018. Picha/ KANYIRI WAHITONa BENSON MATHEKA

HATIMAYE mwanasiasa Miguna Miguna alionekana hadharani kwa mara ya kwanza Jumanne, siku tano baada ya kukamatwa nyumbani kwake mtaani Runda Kaunti ya Nairobi.

Bw Miguna alionekana alipofikishwa katika mahakama ya Kajiado chini ya ulinzi mkali wakati kundi la mawakili wake walipokuwa mbele ya Jaji Luka Kimaru wa Mahakama Kuu ya Nairobi kufuatilia agizo alilotoa afikishwe mbele yake.

Mwanasiasa huyo ambaye ni wakili alionekana akizama kwenye mawazo alipokuwa akisubiri hakimu kuwasili kortini. Mawakili waliotumwa kumwakilisha walibishana na mkuu wa upelelezi katika kaunti ya Kajiado (DCIO), Bw Daniel Musangi, ambaye aliwazuia kuzungumza na Bw Miguna.  Hata hivyo, baadaye waliruhusiwa kuzungumza naye.

Bw Miguna alikataa kujibu mashtaka matatu ya kuhudhuria na kushuhudia “kiapo” ambacho kinara wa NASA Raila Odinga alikula Januari 30 katika bustani ya Uhuru Park, Nairobi.Shtaka la pili lilisema kwamba alihudhuria mkutano haramu bila kuarifu maafisa wa polisi jijini Nairobi na la tatu ni la kuwa mwanachama wa kundi haramu la National Resistance Movement (NRM).

“Sitajibu mashtaka yasiyo na maana. Huu ni ukiukaji wa haki zangu. Nimefungiwa kwa siku tano bila kuwasiliana na mawakili wangu na bila kuwasiliana na familia yangu. Nimeagizwa kufika mbele ya Mahakama jijini Nairobi,” alisema.
Wakili Koin Lompo alimwakilisha Bw Miguna.

Kulikuwa na mawakili wengine watatu na hakimu alipotaka kujua walikuwa wametumwa na nani Bw Miguna alizua kicheko kortini aliposema wote walikuwa wakimwakilisha. Koin alifahamisha mahakama kwamba Jaji Kimaru alikuwa ameagiza Bw Miguna afikishwe mbele yake na kwamba kumpeleka Kajiado kulikuwa ukiukaji wa haki zake. Kulingana na wakili Koin, hatua hiyo ilikuwa dharau kwa agizo la Jaji Kimaru.

Kwenye uamuzi aliotoka mwendo wa saa nane na nusu baada ya kukabidhiwa agizo la mahakama kuu, hakimu aliagiza Miguna kupelekwa mbele ya Jaji Kimaru kabla ya saa tisa alasiri kisha arejeshwe mbele yake kusomewa mashtaka Februari 14.

Alipokuwa akipelekwa seli, Bw Miguna alisikika akisema angali imara na hatishwi na mashtaka yanayomkabili.
Alipokuwa njiani kuelekea Nairobi, mawakili wake wakiongozwa na Dkt John Khaminwa walikuwa mbele ya Jaji Kimaru ambaye Ijumaa iliyopita aliamuru kuwa Miguna aachiliwe huru kwa dhama ya Sh50,000.

Alisema kuwa hangeondoka katika majengo ya mahakama hiyo hadi amri yake itakapotekelezwa. Jumanne asubuhi kundi la mawakili wanaomtetea Dkt Miguna walimuomba Jaji Kimaru asisite kuwasukuma jela Inspekta Jenerali wa Polisi (IG) Joseph Boinnet na Mkurugenzi wa Idara ya upelelezi wa jinai (DCI) George Kinoti kwa kukaidi na kudharau agizo la mahakama.

 

MWANASIASA wa NASA, Miguna Miguna (aliyevaa kofia) akiwa katika Mahakama ya Kajiado jana asubuhi. Bw Miguna alionekana kwa mara ya kwanza alipofikishwa katika mahakama hapo jana, siku tano baada ya kukamatwa na polisi. Picha/KANYIRI WAHITO

Mahakama yaagiza polisi wasinase wakuu wa NASA

 

MWANASIASA wa NASA, Miguna Miguna (aliyevaa kofia) akiwa katika Mahakama ya Kajiado jana asubuhi. Bw Miguna alionekana kwa mara ya kwanza alipofikishwa katika mahakama hapo jana, siku tano baada ya kukamatwa na polisi. Picha/KANYIRI WAHITO
MWANASIASA wa NASA, Miguna Miguna (aliyevaa kofia) akiwa katika Mahakama ya Kajiado Februari 5, 2018 asubuhi. Bw Miguna alionekana kwa mara ya kwanza alipofikishwa katika mahakama, siku tano baada ya kukamatwa na polisi.
Picha/KANYIRI WAHITO

Na RICHARD MUNGUTI na WANDERI KAMAU

VIONGOZI wa NASA waliokuwa kwenye hatari ya kukamatwa na polisi kuhusiana “uapisho” wa kinara wao Raila Odinga kama “rais wa wananchi” walipata afueni Jumanne baada ya Mahakama Kuu kuagiza Serikali isiwatie mbaroni. Continue Reading