Mienendo ya mashabiki EPL: Everton ni walevi, Man U ni wavutaji sigara huku wa Liverpool wakilemewa na madeni

Na GEOFFREY ANENE

EVERTON ndiyo klabu iliyojaa mashabiki walevi kwenye Ligi Kuu ya Uingereza nayo Manchester United ina inaongoza orodha ya mashabiki wanaovuta sigara katika ligi hiyo ya klabu 18, utafiti unaonyesha.

Nayo Liverpool ni nambari moja katika orodha ya mashabiki walio na madeni.

Utafiti huo uliofanywa na tovuti ya FootballTips.com unaonyesha kwamba mashabiki wa Everton hunywa tembo glasi 43 kwa wiki. Mashabiki wa Crystal Palace na Chelsea wanafuata katika nafasi za pili na tatu kwa unyuaji wa tembo wakibugia glasi 40 na 35 kila wiki, mtawalia.

Wafuasi wa Tottenham wanashikilia nafasi ya nne kwa glasi 34 kila wiki, huku wale wa Manchester United, Stoke City, Burnley, Manchester City, Liverpool na Arsenal wakifunga 10-bora kwa glasi 31, 30, 26, 25, 23 na 21, mtawalia.

Mashabiki wa Southampton (glasi sita), Brighton (sita), Bournemouth (tano) na Leicester City (nne) wanakunywa kiasi cha chini cha mvinyo katika orodha ya mashabiki ambao timu zao zinashiriki Ligi Kuu ya Soka ya Uingereza ya msimu 2017-2018.

Utafiti huu uliohusisha kuhojiwa kwa mashabiki 2,400 walio na umri wa miaka 18 na zaidi ulionyesha kwamba Manchester United ina wavutaji wengi sugu wa sigara.

#PandaMitiPendaKenya: Safari ya kupanda miti 1.8 bilioni yang’oa nanga

Na WAANDISHI WETU

RAIS Uhuru Kenyatta Jumamosi alizindua kampeni kubwa ya kupanda miti takriban 1.8 bilioni kote nchini katika muda wa miaka mitano ijayo. Waziri wa Mazingira, Keriako Tobiko alisema Serikali inalenga kupanda miti milioni 50 mwaka 2018.

Akihutubu katika shule ya Moi Forces Academy Nairobi, Rais Kenyatta alisema kufikia 2022, Serikali itahakikisha kiwango cha miti nchini ni asilimia 10, kuambatana na viwango vya kimataifa.

“Kiwango cha sasa cha asilimia 7 cha misitu yetu ni cha chini mno na hakiwezi kukidhi mazingira ya taifa linaloendelea kukua kama Kenya. Sharti tupande miti ili turejeshe hadhi ya misitu yetu,”alisema Rais Kenyatta.

Rais aliagiza idara zote za serikali kutumia angalau asilimia 10 ya pesa za huduma kwa jamii kupanda miti katika maeneo mbalimbali nchini.

“Hii si kazi ya mtu mmoja, sharti sisi sote tushirikiane.

“Hali yetu kwa sasa sio tofauti na janga la ukame lililotukumba hivi majuzi. Mazingira yetu ni muhimu zaidi katika maendeleo ya taifa hili kwa sababu kila sekta ya uchumi inategemea mazingira,” aliongeza Rais Kenyatta.

Rais Uhuru Kenyatta, naibu wake William Ruto, Mama wa Taifa Margaret Kenyatta watazama huku Waziri wa Mazingira Keriako Tobiko akipanda mti katika shule ya Moi Forces Academy, Nairobi Mei 12, 2018. Picha/PSCU

Rais alisema kutokana na ukataji wa miti, kiasi cha maji nchini kimepungua na kitaendelea kupungua iwapo hatua madhubuti hazitachukuliwa.

“Ukame umekuwa mkali zaidi ikilinganishwa na hapo awali. Mafuriko yamekuwa jinamizi, lazima tuelewe kwamba majanga tuliyokabiliana nayo yametokana na mabadiliko ya hali ya anga na ni muhimu kutilia maanani suala hilo,” alisema Rais Kenyatta.

Rais alitangaza kuunda Tuzo la Upanzi wa Miti ili kuzawadi watakaopanda na kutunza miti kwa kiwango cha juu nchini.

Naibu Rais William Ruto alisema ifikapo 2022, kila idara ya serikali pamoja na serikali za kaunti zitaonyesha kiwango cha miti zimepanda.

Shughuli hiyo ya upanzi wa miti pia iling’oa nanga katika kaunti kadhaa nchini huku magavana na polisi wa utawala wakiungana na wananchi kupanda miti.

Katika Kaunti ya Machakos, Gavana Dkt Alfred Mutua aliongoza wabunge pamoja na madiwani wa eneo hilo kupanda zaidi ya miche 3,000 katika shule ya msingi ya Makutano DEB.

Wanafunzi wa Moi Forces Academy washirikiana kupanda miti katika shughuli iliyoongozwa na Rais Uhuru Kenyatta Mei 12, 2018. Picha/ PSCU

Wanasiasa wavalia njuga zoezi

Naye Seneta wa Baringo ya Kati Gedion Moi akiandamana na Katibu Mkuu wa chama cha Kanu Nick Salat, Katibu Mkuu wa ODM Edwin Sifuna na mwenzao wa ANC Geoffrey Otsosi waliungana na mbunge wa Samburu Mashariki kupanda miti katika eneo hilo.

Kamishna wa Kaunti ya Makueni, Mohammed Maalim aliongoza maafisa wa kaunti kupanda zaidi ya miche 3,000 karibu na bwawa la Matinga.

Ili kutimiza malengo ya kupanda miti bilioni 1.8, serikali kuu imeshirikiana na mashirika ya yasiyo ya serikali kama vile Nation Media Group.

Naibu Waziri wa Michezo Kassim Farrah (kati) aungana na maafisa wa kulinda misitu katika Shule ya Mzingi ya Ngiine, Meru kupanda miti. Picha/ Gitonga Marete

Kiongozi huyo alisema uhifadhi wa mazingira na upanzi wa miti utachangia katika ajenda ya maendeleo ya serikali.

Wakati wa hotuba yake katika shule ya Moi Forces Academy Nairobi, Rais Kenyatta aliomboleza wananchi waliopoteza maisha yao Nakuru, Tana River na kwingineko na kuahidi kuwa serikali itawasaidia waathiriwa wote wa mafuriko.

“Tutasimama na nyinyi, tutawasaidia mahali mlipo nchini,” alisema kiongozi wa nchi na kuwataka wananchi kuzidi kuonyesha umoja katika kuwasaidia wananchi walioathiriwa.

Alisema Serikali itaendelea kuwaokoa wananchi walioathiriwa na mafuriko na kutoa chakula cha msaada, dawa pamoja na kuwatimizia mahitaji mengine kama vile kutoa maji safi.

Alisema serikali imetenga Sh1.5 bilioni kukabiliana na janga la mafuriko kote nchini na kusisitiza umuhimu mkubwa wa kuhifadhi mazingira.

Mwanamume kumlipa mkewe wa zamani Sh127,000 kila mwezi

Na RICHARD MUNGUTI

JUHUDI za mwanaume za kupunguziwa mzigo wa kumtunza na kumpa mkewe aliyemtaliki kitita cha Sh127,000 kila mwezi maisha yake yote hapa ulimwenguni iligeuka kuwa kufukuza kifuli baada ya mahakama ya upeo kumwamuru abebe mzigo wake.

Jaji Mkuu David Maraga pamoja na majaji wengine wanne walimwamuru Charles Michael Angus Walkers Munro aendelee kumlisha vinono mkewe ambaye ndoa yao ilijikwaa kisha wakatalikiana.

Majaji hao walikataa kukubalia ombi la Munro kwamba yeye ama mwanaume mwingine yule aliyetalikiana na mkewe hapasi kumsaidia ama kumtunza ikiwa yuko na mapato.

Lakini majaji hao walikataa na kusema vinono na maisha ya bashasha ambayo mwanaume humzoesha mkewe atavigharamia hadi kifo kitakapowatenganisha.

“Hili ni suala la kijamii linalohusu mtu na mkewe. Hatuna mamlaka kisheria kuingilia na kuvuruga maagizo mume awe akimlipa mkewe kiasi kilichowekwa na Mahakama ya Rufaa na Mahakama kuu,” walisema majaji watano wa Mahakama ya Juu wakiongozwa na Jaji Mkuu (CJ) David Maraga.

Uamuzi huo ulitowesha matumaini ya Bw  Bw Charles Michael Angus Walkers Munro kupunguziwa gharama za kumtunza mkewe aliyemtaliki.

Pia wanaume wengine waliokuwa wanasubiri kwa hamu na ghamu uamuzi huo ndipo wapunguziwe gharama za kuwatunza wake wao waliowapiga teke ziligonga mwamba.

Jaji Maraga na Majaji Jackton Ojwang , Njoki Ndung’u na Smokin Wanjala walikataa kubatilisha uamuzi wa Mahakama ya Rufaa ambapo Bw Munro aliagizwa awe akimtunza mkewe na kumpa vinono alizomzoesha nchini Uingereza na humu nchini.

Majaji hao walisema suala la talaka sio suala la kikatiba bali ni suala la kijamii na  “hawana mamlaka kisheria kuvuruga uamuzi uliopitishwa na mahakama ya rufaa na mahakama kuu.”

Majaji hao walisema lazima Bw Munro aendelee kufadhili raha za mkewe waliyetengana.

Bw Munro ambaye ni raia wa Kenya alikuwa amewasilisha rufaa kupinga agizo awe akimlipa mkewe Bi Pamela Ann Walker Munro kitita cha Sh127,000 kila mwezi baada ya kumtaliki.

Bi Pamela Ann ambaye ni raia wa Uingereza alikuwa amefunga ndoa na Bw Munro na ndoa yao haikujaliwa watoto.

 

Mapato ya juu

Katika rufaa yake,  Bw Munro alikuwa amesema mkewe huyo waliyetangana  “anaweza kujikimu kimaisha kwa vile alikuwa na mapato ya juu.”

Bw Munro alikuwa amedokeza Pamela Anne alikuwa na nyumba nchini Uingereza na alikuwa anapokea pensheni ya mumewe wa kwanza aliyekuwa afisa wa Kijeshi.

Alisema jumba hilo la kifahari liko ulaya na alilikodisha walipokuwa wanahamia nchini Kenya. Makazi yao humu nchini yalikuwa kaunti ya Kilifi.

Lakini walipotengana mwaka wa 2013 Jaji Christine Meoli aliambiwa Bw Munro alihama na kurudi Uingereza na kumwacha mkewe Kilifi.

Mkewe huyo alimweleza Jaji Meoli mumewe alimwacha kwa upweke na kushikana na wanawake wengine kuponda raha.

Pamela alikuwa ameomba mahakama iamuru Bw Munro awe akimlipa Sh250,000 kila mwezi.

Bw Munro alisema yeye ndiye mume wa pili kumuoa Pamela na kwamba “hastahili kumuongezea pesa juu ya pesa.”

Katika rufaa aliyowasilisha mbele ya Majaji Milton Asike Mahakhandia,William Ouko na Kathurima M’Inoti , Bw Munro alilalamika Sh127,000 alizoagizwa na Jaji Meoli awe akimlipa mkewe ni nyingi zapasa kupunguzwa.

Wakauliza, “Mbona sasa Bw Munro anataka kubanduka ilhali alikuwa amemzoesha mkewe maisha ya juu. Lazima aendelee kumweka katika maisha aliyomzoesha.”

Majaji hao walisema hawatakuwa na utu endapo watabatilisha uamuzi wa Jaji Meoli.

“Ulimzoesha mkeo vinono na maisha ya kifahari, endelea kuyagharamia,” waliamuru majaji hao.

Mary Njoroge ateuliwa kusimamia mechi za Kombe la Dunia U-20

Na GEOFFREY ANENE

MKENYA Mary Njoroge yuko katika orodha ya maafisa sita kutoka Bara Afrika walioteuliwa kusimamia mechi katika Kombe la Dunia la Wanawake wasiozidi umri wa miaka 20 nchini Ufaransa hapo Agosti 5-24, 2018.

Katika orodha hiyo iliyotangazwa na Shirikisho la Soka Duniani (FIFA) mnamo Aprili 9, Njoroge pamoja na Lidwine Rakotozafinoro (Madagascar) na Victoire Queency (Mauritius) watakuwa marefa wasaidizi (wanyanyuaji vibendera).

Njoroge pamoja na Wakenya wenzake, refa Agneta Itubo na refa msaidizi Jane Cherono walisimamia mechi ya marudiano ya kufuzu kushiriki kombe hili kati ya Djibouti na Burundi mnamo Agosti 5, 2017 ambayo wageni Burundi walishinda 2-1 katika awamu ya kuingia raundi ya kwanza.

Kenya haikuwa na afisa yeyote wa kusimamia mechi katika makala ya mwaka 2012, 2014 na 2016.

Muethiopia Lidya Tafesse Abebe na raia wa Malawi Gladys Lengwe ni marefa pekee kutoka Afrika watakaopuliza kipenga nchini Ufaransa. Timu za taifa za Nigeria na Ghana zilifuzu kuwakilisha Bara Afrika katika mashindano haya ya nchi 16.

Ghana, ambayo ilizima kampeni ya Kenya ya kufika Kombe la Dunia kwa mara ya kwanza kwa kuiliza 5-0 mjini Cape Coast na 5-1 mjini Machakos katika raundi ya pili, iko katika Kundi A pamoja na Ufaransa (wenyeji), New Zealand na Uholanzi. Mabingwa mara mbili wa Afrika Nigeria watalimana na Haiti, washindi wa medali ya fedha mwaka 2004 na 2006 Uchina na mabingwa mara tatu Ujerumani katika Kundi D.

Timu ya Nigeria inasalia timu iliyofanya vyema katika kombe hili kutoka Afrika ilipomaliza katika nafasi ya pili mwaka 2010 na 2014 na nambari nne mwaka 2012. Marefa 15 na wanyanyuaji vibendera 30 watakuwa nchini Ufaransa kwa makala haya ya tisa.

Polisi ashtakiwa kumuua mwenzake

Wyclife Nyandisi Motanya (kulia) ambaye ni afisa wa polisi wa zamani akiwa na kondakta Dengah John Lenda kizimbani Nairobi. Picha/ Richard Munguti

Na RICHARD MUINGUTI

ALIYEKUWA afisa wa polisi alishtakiwa Alhamisi kwa wizi wa mabavu uliopelekea kuuawa kwa afisa wa polisi.

Wyclife Nyandisi Motanya (afisa wa polisi wa zamani) alishtakiwa pamoja na kondakta wa matatu Dengah John Lenda mbele ya hakimu mwandamizi Bi Martha Mutuku.

Walikanusha mashtaka kumi na mawili ya kuwaibia abiria katika eneo la Baba Ndogo, Ruaraka kaunti ya Nairobi.

Walikana kuwa mnamo Aprili 28, 2018 walimnyang’anya Koplo Martin Korir bastola.

Wakitekeleza wizi huo, washtakiwa yadaiwa walikuwa na bastola na visu.

Walizuiliwa rumande hadi afisa wa urekebishaji tabia awasilishe ripoti kuwahusu ndipo wawasilishe ombi la kuachiliwa kwa dhamana.

Kesi itatajwa Mei 25.

Walioshukiwa kumuua kondakta kwa kuongeza nauli waponea

Na RICHARD MUNGUTI

MAAFISA wawili wa chama cha matatu  cha Mwiki  waliofikishwa kortini kwa mauaji ya kondakta aliyeongeza nauli kwa Sh20 tu waliachiliwa huru Alhamisi baada ya ripoti ya upasuaji kubaini alifariki kutokana na ugonjwa wa kichomi au Pneumonia.

Washukiwa hao Mabw John Kibe Nyagah na Geoffrey Ngamau Wambui walidaiwa walihusika na mauaji ya Julius Kamau Mburu.

Hakimu mkazi Bi Miriam Migure aliwaachilia huru baada ya kukabidhiwa ripoti ya afisa wa upasuaji.

“Sababu ya kufariki kwa Mburu ilikuwa ni kichomi na wala sio majeraha alyokuwa nayo,” alisema Bi Mugure akiongeza “Polisi wataendelea na uchunguzi na iwapo watapata ushahidi ambao unawaweza kuwafungulia mashtaka basi watatiwa nguvuni na kushtakiwa.”

Wawili hao walitiwa nguvuni  baada ya polisi kusema hawatekelezi kazi yao ilhali marehemu alifichua kabla ya kuaga alikuwa ameshambuliwa na wao.

Akiwasilisha ombi la kutaka wazuiliwe kuchunguzwa na kuhojiwa kiongozi wa mashtaka Bi Agatha Lango alisema utingo huyo alikumbana na mauti kwa madai ya kuwaongezea abiria nauli kwa Sh20 tu.

Magari ya matatu siku hiyo ya Aprili 23, 2018 yalikuwa yanalipisha Sh80 lakini  marehemu anadaiwa aliongeza nauli ikafika Sh100.

Bi Lango aliomba mahakama iwazuilie Mabw Nyagah na Ngamau kuwezesha polisi kukamilisha uchunguzi wa kesi hiyo.

Pia alisema cheti cha upasuaji wa maiti kubaibinisha kilichosababisha kifo cha Mburu kinahitajika kuambatanishwa katika nakala za  ushahidi.

Afisi ya mkurugenzi wa mashtaka ya umma ilisema Mburu aliuawa Aprili 23, 2018.

Upande mashtaka uliomba wawili hao wazuiliwe kwa siku saba lakini wakili Daniel Ndegwa akapinga akisema siku moja au mbili zatosha kuwezesha polisi kukamilisha shughuli za upasuaji.

“Polisi hawahitaji siku saba kufanyia maiti upasuaji,” alisema Bw Ndegwa .

Bw Ndegwa alisema katiba yakataza mmoja kuzuiliwa kwa kipindi kirefu korokoroni pasi kuelezwa mashtaka watakayofunguliwa.

Mahakama ilifahamishwa kuwa washukiwa hao wawili walijisalamisha kwa kituo cha Polisi cha Central kuhojiwa baada ya kupashwa habari kuwa walikuwa wanasakwa.

Hakimu mkazi Bi Mirriam Mugure aliamuru washukiwa hao wawili wazuiliwe katika kituo cha polisi cha Central kuwezesha polisi kukamilisha uchunguzi.

Washtakiwa watafikishwa kortini kujibu shtaka la kumuua Mburu.

Tunatambua Sossion kama kinara wa KNUT – Mahakama

Na RICHARD MUNGUTI

KITUMBUA cha naibu wa katibu mkuu (SG) wa chama cha kutetea walimu Hesbon Otieno kilitiwa mchanga baada ya mahakama kusema inamtambua tu Bw Wilson Sossion.

Jaji Maureen Onyango alisema katika uamuzi aliotoa Alhamisi kuwa Bw Sossion ndiye kinara wa KNUT na kwamba  mageuzi ama mabadiliko yoyote kwa uongozi wa chama hicho sio rasmi.

Mahakama ilimkubalia Bw Sossion aendelee kuhudumu kama SG hadi kesi aliyowasilishai kupinga kuondolewa kwake kama SG wa KNUT isikizwe na kuamuliwa.

Jaji Onyango wa Mahakama ya kuamua mizozo ya wafanyakazi (ELRC) aliharamisha kutambuliwa kwa Bw Hesbon Otieno kama SG mwandamizi wa KNUT.

Bw Sossion aliwasilisha kortini kesi ya kupinga kung’olewa kuwa SG akisema “hatua hiyo itaathiri maslahi ya wanachama zaidi ya 200,000 wa KNUT kote nchini.”

Agizo hilo la Jaji Onyango limesitisha harakati za kumtoa Bw Sossion kuwa SG wa KNUT.

Jaji alisema hakuna ushahidi uliowasilishwa kuthibitisha kuwa msajili wa vyama alimsajili Bw Otieno kuwa SG mpya wa KNUT kabla ya kukabidhiwa agizo la korti likimzuia kufanyia marekebisho sajili.

Msajili alikuwa amemtoa Bw Sossion kuwa SG wa KNUT baada ya kupelekewa majina mapya ya viongozi wa chama hicho kikubwa zaidi nchini cha wafanyakazi.

“ Naamuru Bw Sossion aendelee kuhudumu kama SG wa KNUT. Marekebisho yaliyofanyiwa sajili ya vyama kuhusu mabadiliko ya viongozi wa KNUT hayatambuliwi kwa sasa hadi kesi aliyoshtaki mlalamishi isikizwe na kuamuliwa,” alisema Jaji Onyango.

Bw Sossion aliwasilisha kesi ya kuruhusiwa aendelee kuhudumu kama SG wa KNUT akisema kuna njama za kumtimua kinyume cha sheria.

Bw Sossion anasema kuwa hatua ya kumtimua ni siasa tupu sio eti ameshindwa kutekeleza majukumu yake hata baada ya kuteuliwa kuwa Mbunge Maalum na chama cha Orange Democratic Movement (ODM).

Kesi  hiyo itasikizwa Mei 28, 2018.

Korti ilielezwa Bw Otieno alisajiliwa kama SG mwandamizi wa KNUT kinyume cha maagizo ya korti Bw Sossion asitimuliwe.

Mawakili Aulo Sowetto na Jackson Awele wanaomtetea Bw Sossion pamoja na Seneta James Orengo waliomba korti isisite kuamuru SG huyo aendelee kuhudumu huku wakiandaa kesi ya kumtaka msajili wa vyama asukumwe ndani miezi sita kwa kukaidi agizo la korti.

“Hata ikiwa Bw Sossion ataendelea kuhudumu kama SG wa KNUT msajili wa vyama hataathirika kwa njia yoyote. Naomba korti iamuru Bw Sossion aendelee kuhudumu,” alisema Bi Sowetto.

Korti ilikuwa imeamuru Bw Sossion aendelee kuhudumu kama SG wa KNUT lakini msajili akamwondoa na kumsajili Bw Otieno ahuhudmu kama mwandamizi.

Bw Otieno alikuwa naibu wa Bw Sossion na aliteuliwa na baraza kuu la chama hicho (NEC) kuhudumu kama SG wa KNUT jambo ambalo Bw Sossion anasema ni kinyume cha sheria.

Mahakama ilikuwa imemwamuru msajili wa vyama asimwondoe Bw Sossion kama SG wa KNUT hadi kesi aliyoshtaki isikizwe na kuamuliwa.

Vile vile Jaji Onyango alikuwa ameamuru KNUT isimwondoe Bw Sossion na kutaka Tume ya kuajiri Walimu (TSC) isitambue SG mwingine ila Bw Sossion.

Uongozi wa Bw Sossion umekumbwa na mtafaruku huku siasa zikienea kuwa anahudumu nyadhifa mbili za umma baada kuteuliwa kuwa Mbunge maalum wa chama cha Orange Democratic Movement (ODM).

Siasa za kumtimua uongozini wa KNUT zimepamba moto.

Bw Sossion ameshtaki Msajili wa Vyama na Tume ya Kuajiri Walimu (TSC) akiomba korti izuie mtu mwingine yeyote kusajiliwa kuwa SG wa KNUT.

Anaomba korti iamuru asiondolewe kama SG kwa madai anahudumu pia kama Mbunge Maalum.

Akitoa uamuzi Jaji Onyango alisema , “Msajili wa vyama katika afisi ya mwanasheria mkuu amezuiliwa kufanyia marekebisho sajili ya KNUT na kumwondoa Bw Sossion na kuandikisha jina la afisa mwingine kuwa SG,” alisema Jaji Onyango.

Jaji huyo aliamuru Bw Agola ama afisa mwingine yule wa KNUT asiandikishwe kuwa SG.

Jaji huyo alisema kuwa kazi za Bw Sossion hazipasi kutwaliwa na mtu mwingine yule hadi hadi kesi aliyoshtaki isikizwe na kuamuliwa.

Jaji Onyango pia aliizuia TSC kumtambua SG mwingine wa KNUT ila Bw Sossion.

Azimio la kumwondoa Bw Sossion lilipitishwa mnamo Aprili 30 2018 wakati wa mkutano mkuu wa chama cha KNUT.

Ajenda Nne Kuu: Kijana airai serikali imkubalie azindue kiwanda cha mvinyo wa miraa

Na FAUSTINE NGILA

MARUFUKU ya Uingereza na Somaliland dhidi ya miraa kutoka Kenya iliwaacha wakulima wengi katika kaunti ya Meru katika hali duni kiuchumi, kwani ilizima njia ya kipekee ya kuzoa riziki.

Kwa wastani, mmea huo ulikuwa ukichangia Sh10 bilioni kwa pato la nchi kufikia 2013 lakini zaidi ya asilimia 75 ya pato hilo iliyeyuka baada ya marufuku hiyo iliyoanza Juni 2014.

Wakati Rais Uhuru Kenyatta aliwarai wakulima wa eneo hilo kuwekeza kwa kilimo cha mimea mbadala, wajasiriamali walianza kusaka mbinu za matumizi mapya ya miraa.

Kevin Nthiga (kulia) aelezea wateja kuhusu mvinyo, juisi, siagi na maziwa gururu (yoghurt) katika maonyesho ya teknolojia ya kilimo jijini Nairobi mwaka 2015. Picha/ Faustine Ngila

Aliyekuwa katika mstari wa mbele wa kufufua sekta ya miraa ni Kevin Nthiga ambaye wakati wa marufuku hiyo alikuwa mwanafunzi wa mwaka wa mwisho katika Chuo Kikuu cha Ufundi na Kilimo cha Jomo Kenyatta (JKUAT), mjini Juja.

Kwenye mahojiano na Taifa Leo Alhamisi, kijana huyo mwenye miaka 24 alielezea jinsi alijizatiti kuanzisha kiwanda cha kutenegeneza mvinyo, sharubati, siagi na maziwa gururu (yogurt) kutokana na miraa.

“Lengo langu lilikuwa kuokoa sekta ya miraa kupitia teknolojia za kisasa. Nilibahatika kujua jinsi ya kuunda mvinyo kutokana na miraa kwenye maabara chuoni. Pia mradi wangu huo ndio ulitahiniwa na wahadhiri wangu wakati nikihitimu chuoni kwa shahada ya Sayansi ya Vyakula,” akasimulia.

Kijana Kevin Nthiga (kati) alipokutana na aliyekuwa Waziri wa Kilimo Willy Bett (kushoto) na Gavana wa Meru mwaka 2017. Picha/ Faustine Ngila

Kwa muwa miraa huharibika baada ya muda mfupi, pombe na juisi inayoundwa kutokana na majani hayo inaweza kusalia dukani kwa hadi miaka miwili, kulingana naye.

“Kutengeneza mvinyo, unafaa kusaga majani mabichi ya miraa hadi upate kiwango kinachofaa cha sukari. Kisha utatia kwenye vibuyu mseto huo ili kutoa ethanol, gesi ya carbon (IV) oxide na maji. Ni ethanol hii ambayo hatimaye itatumiwa kuunda pombe,” akaelezea.

Mradi wake ulipata umaarufu mnamo 2015 na kuweza kujinasia wateja si haba katika ameneo ya Nairobi, Kiambu, Embu, Nyeri na Meru.

Mjasiriamali Kevin Nthiga aelezea vijana wenzake kuhusu teknolojia ya kuunda vinywaji kutokana na miraa. Picha/ Faustine Ngila

“Nilikuwa nikihudhuria maonyesho ya kilimo na teknolojia ili Wakenya waweze kuona na kuonja ubunifu wangu. Katika onyesho moja la shindano la miradi ya wanafunzi, nilituzwa Sh250,000 kwa kazi yangu,” akasema.

Kwenye maonyesho hayo, alikuwa akiuza bidhaa hizo kwa wateja wa kila aina walioduwazwa na mbinu iliyotumiwa kuunda bidhaa za hali ya juu kutokana na miraa.

Alikuwa anauza mvinyo kwa Sh1,000 kwa chupa ya mililita 750, maziwa gururu ya mililita 500 kwa Sh50, siagi ya robo kilo kwa Sh200 huku juisi akiiuza kwa kati ya Sh50 na Sh120.

Baadhi ya maafisa wa serikali waonja bidhaa zake. Picha/ Faustine Ngila

Kijana huyo alijiundia nembo za kuvutia kwa bidhaa zake, huku akizipakia kwenye chupa maalum ambazo marafiki zake walimsaidia kutafuta.

“Nilikuwa nimeanza kuondoa dhana potovu kuwa miraa ni mhadarati unaolevya, na ambao jamii inafaa kuepushwa nao,” akasema.

Kufikia mwishoni wa mwaka 2015, Bw Nthiga alianza kuwazia kuwekeza katika kiwanda kikubwa cha utengenezaji wa bidhaa zake hizo humu nchini, akidhamiria kupunguzia taifa hili kiwango kikubwa cha Wakenya wasio na ajira.

Kijana Nthiga alipokutana na maafisa wakuu katika Wizara ya Kilimo na kaunti ya Meru 2017. Picha/ Faustine Ngila

“Nilipohitimu JKUAT Novemba 2015, nilitazamia kusaka mbinu za kusajili kampuni yangu ya uundaji wa bidhaa ambazo tayari nilikuwa nikiuza. Nilikuwa tayari kuingia kwa mkataba na mdhamini yeyote ambaye angejitolea kunipiga jeki.”

Lakini ndoto yake hiyo hadi sasa haijatimia. Badala yake, anafundisha masomo ya kilimobiashara katika taasisi moja mjini Nyeri huku akisubiri mambo yatengee. Je, ni nini kilifanyika 2016 na 2017 na kuzima maono yake?

“Hapo 2016, nilianza kuwekeza hela nilizokuwa nmeunda. Nilinunua mashine mbili kujitayarisha kuingia kwenye soko la vinywaji. Nilinuia kusaka ufadhili wa kifedha, lakini ufadhili huo ungepatikana iwapo ningepata idhini kutoka Shirika la Ubora wa Bidhaa nchini (KEBS),” anaeleza.

Juisi ya miraa iliyopakiwa kwa chupa maalum tayari kwa mauzo. Picha/ Faustine Ngila

Anasimulia kuwa alipoenda katika afisi za KEBS jijini Nairobi kuidhinishwa kuendelea na biashara yake, ilishindikana kutokana na hali kwamba KEBS haina vigezo wala mbinu za kutathmini iwapo bidhaa kutokana na miraa ni bora kwa afya ya binadamu.

Pili, uvumbuzi wake huo ulikuwa mpya sana sokoni na KEBS haikuwa imefanya utafiti kuhusu matumizi ya bidhaa za miraa awali. Ni hali hii iliyoisukuma KEBS kumtuma Bw Nthiga kwa afisi za Shirika la Kitaifa la Kupambana na Mihadarati (NACADA) ambapo pia hakupata usaidizi.

Ingawa serikali za kaunti za Embu na Meru ziliunga mkono uvumbuzi wake, mashirika hayo mawili ya serikali yalilemewa kumsaidia katika hatua muhimu za kuzindua kiwanda chake.

Juisi na mvinyo wa miraa aliokuwa akitengeneza Kevin Nthiga kwa soko la humu nchini. Picha/ Faustine Ngila

“Mwaka 2016 nilipungukiwa kabisa na hela na kukosa uwezo wa kuunda bidhaa hizo tena. Hapo ndipo nilianza kusaka ajira na kubahatika kupata kazi ya kufundisha mjini Nyeri.

“Nilikuwa nimetumia njia zote kuona teknolojia hiyo ikiwaajiri mamia ya vijana wasio na kazi. Nilifika hata kwa ofisi ya katibu wa kudumu wa Wizara ya Kilimo ambaye aliunga mkono wazo langu, lakini tatizo likasalia kuidhinishwa na KEBS na NACADA

“Mwaka 2017 nilikuatana na gavana wa Meru Kiraitu Murungi ambaye alinisikiza na kuahidi kunifadhili kupitia Shirika la Uwekezaji la Kaunti ya Meru. Kwa sasa bado ninafundisha huku nikisubiri mrejesho kutoka kwa kaunti,” akasimulia mkazi huyo wa Meru.

Kwa sasa anaiomba serikali kuu kutafuta mbinu ya kutathmini ubora wa bidhaa zake kwa kuwa ndoto yake hiyo bado inamkosesha usingizi.

Huu ndio wakati mwafaka kwa serikali kuwazia upya suala hili, has ikizingatiwa mojawapo ya Ajende Nne Kuu ni kupanua viwanda na kuunda nafasi za ajira.

Iwapo serikali itampa leseni ya kuanzisha kiwanda ambacho kitainyanyua biashara ya miraa inayotegemewa na wakulima wengi katika kaunti za Meru, Tharaka- Nithi na Embu, basi bashasha alizokuwa nazo hapo 2015 zitarejea usoni mwa kijana huyo mbunifu.

RIPOTI: Ugatuzi bado unawapiga chenga vijana

Na CAROLYNE AGOSA

ASILIMIA 60 ya vijana nchini hawafahamu jinsi mfumo wa ugatuzi unavyofanya kazi wala majukumu ya viongozi wao wa kaunti.

Hayo ni kwa mujibu wa ripoti mpya ya utafiti kuhusu hali ya vijana nchini na changamoto kuu zinazowakumba.

Katika utafiti huo ulioagizwa na vuguvugu la vijana la JIACTIVATE, na kuendeshwa na shirika la kimataifa la utafiti la Geo Poll, vijana walitaja changamoto hizo kama: ufisadi, ukosefu wa kazi, huduma za matibabu na ukosefu wa chakula cha kutosha.

Ni miaka mitano tangu mfumo wa ugatuzi kung’oa nanga nchini na vile vile kuundwa kwa serikali za kaunti.

Hata hivyo, ni bayana kwamba idadi kubwa ya vijana hawana ufahamu wa utendakazi wake.

“Karibu asilimia 40 ya waliohojiwa hawaelewi maana sahihi ya mfumo wa ugatuzi. Wengine asilimia 23 hata hawajui ugatuzi ni nini na majukumu ya viongozi waliochaguliwa katika mfumo huo,” ilisema ripoti hiyo ya utafiti uliofanywa katika kaunti 37.

“Kuna mwanya mkubwa sana katika ufahamu wa vijana kuhusu mfumo wa ugatuzi: nini maana yake, unavyofanya kazi, manufaa yake. Vile vile, vijana hawana uwakilishi wa moja kwa moja katika nyadhifa za uchaguzi (za ugatuzi) wala kuwa katika majukwaa yanayowapa usemi,” iliongeza ripoti hiyo iliyozinduliwa Ijumaa mjini Nairobi.

Vijana zaidi ya 1282 – wavulana 774 na wasichana 451 – walishiriki kutoka maeneo ya Nairobi, Kati, Mashariki, Rift Valley, Magharibi, Nyanza, Mashariki Kaskazini na Pwani.

Utafiti huo uliofanywa kati ya Mei 2017 na Aprili 2018 unaashiria changamoto kubwa inayolikumba taifa la Kenya katika kufanikisha ugatuzi, ikizingatiwa vijana ndio wengi zaidi nchini.

Takriban asilimia 80 ya watu nchini wako chini ya umri wa miaka 35 – kumaanisha kati ya idadi ya jumla ya watu 46 milioni vijana ni 36.8 milioni.

Utafiti ulipata kuwa zaidi ya nusu ya vijana (asilimia 56) wako tayari kuwashinikiza viongozi wao kuwajibika.

Hata hivyo, asilimia 44 walisema hawawezi kutekeleza wajibu huo kwa sababu mbalimbali. Kuu miongoni mwao ni viongozi hao hawapatikani mashinani (asilimia 33), hakuna uwazi na uwajibikaji (asilimia 26) na kukithiri kwa ufisadi (asilimia 18).

Ni jambo litakalowafanya waundaji sera kukuna vichwa vyao ikizingatiwa nusu ya wapiga kura wote 19 milioni nchini ni vijana wenye umri wa miaka kati ya 18 na 35.

 

Vibarua

Kuhusu suala la ajira nchini, asilimia 21.2 ya vijana waliohijiwa wanafanya vibarua ili kukimu mahitaji yao. Asilimia 10.4 wanamiliki biashara huku wengine 9.7 wakiwategemea wazazi ama jamaa zao.

Inakisiwa jumla ya vijana 3.68 milioni hawana kazi – hii ikiwa ni nusu ya Wakenya 7 milioni wasio na kazi.

Kulingana na Shirika la Kitaifa la Takwimu (KNBS), idadi kubwa ya vijana wasio na kazi (asilimia 19.2) ni wenye umri wa kati ya 20 – 24.

Takriban vijana 700,000 hujiunga na sekta ya ajira kila mwaka. Hata hivyo, wengi wanajipata wakifanya kazi zisizoambatana na ujuzi waliosomea chuoni, kazi ambazo zinaweza kufanywa na wale waliofika kidato cha nne.

Vijana wanahofu kwamba watakosa nafasi chache za kazi wanazopewa kwa sababu ya kukosa ujuzi.

Ilieleza ripoti: “Takriban asilimia 13 ya waliohojiwa walisema kuna haja ya kuwapa vijana ujuzi wa biashara na kiufundi.

“Asilimia 28.3 walihimiza vijana kuingilia biashara kama njia mbadala ya ajira huku wengine asilimia 10.1 wakihimiza kilimo kama njia ya kuunda nafasi zaidi za kazi katika jamii zao.”

Utafiti huo wa JIACTIVATE ulifanywa kwa ushirikiano na mashirika mengine ikiwemo Siasa Place, Shirika la Msalaba Mwekundu, Organization of African Youth, Maisha Youth, Youth Clan, Shujaaz na Well-told Stories.

NTV kuwapa raha mashabiki kwa kuonyesha mechi za Kombe la Dunia

Na JOHN ASHIHUNDU

Sasa ni nafuu kwa mashabiki sugu wa soka nchini baada ya runinga ya NTV kutangaza kwamba itapeperusha moja kwa moja mechi za Kombe la Dunia zitakazofanyika nchini Urusi kuanzia Juni 14.

Alhamisi, Shirika la Habari na Utangazaji la Nation Media Group (NMG) lilitia saini makubaliano na kituo cha kupeperusha habari za spoti cha Kwese Free Sports ili kuonyesha moja kwa moja mechi za fainali hizo.

Mechi hizo ni pamoja na zile za makundi zitakazohusisha timu zitakazowakilisha bara Afrika, za nusu-fainali na fainali. Mechi hizo zitachezewa katika miji tofauti ikiwemo jiji kuu la Moscow, Kransnodar, Kazan, Saint Petersburg, Sochi na Yaroslavi.

“Hii imewezekana baada ya mkataba baina ya mashirika haya maarufu ya habari. Nina hakika baada ya kumalizika kwa fainali hizo tutafurahia faida kutoka kwa mashabiki,” Meneja Mkuu wa Kwese Sports, Monica Ndung’u, alieleza.

“Ni fursa kubwa kwa watazamaji wetu kushuhudia mechi hizi kubwa duniani wakistarehe katika sehemu mbalimbali, hata wakiwa manyumbani mwao,” alisema Afisa Mkuu wa NMG, Stephen Gitagama.

“NTV imejitolea kuwafurahisha wafuasi wake kwa kuonyesha mechi hizo ambazo pia zitawasaidia wale wasio na uwezo wa kifedha kuzitazama bila malipo.

Kwa upande wangu, nitazifuatilia kwa makini ili nijiongezee ujuzi zaidi wakati huu ninapojiandaa kurejea katika timu ya taifa,” alisema Musa Mohammed aliyekuwa nahodha wa kikosi cha Harambee Stars kilichotwaa taji la Cecafa Senior Challenge Cup, mwaka uliopita.

Timu 32 zitashiriki katika fainali hizo, zikiwemo tano kutoka Afrika ambazo ni Nigeria, Senegal, Misri, Morocco na Tunisia.

Mabingwa watetezi Ujerumani, pamoja na Brazil, Ureno, Ublegiji, Ufaransa, Argentina na Uingereza zinawekewa nafasi kubwa.

Mashabiki watapata fursa ya kuwashuhudia nyota kadhaa wakiwemo Cristiano Ronaldo, Lionel Messi, Mo Salah, Saidio Mane, Harry Kane na Eden Hazard ambao watakuwa wakichezea timu za mataifa yao.

Makundi: Kundi A: Urusi, Misri, Saudia; Kundi D: Argentina, Croatia, Iceland, Nigeria; Kundi G: Ubelgiji, Uingereza, Tunisia, Panama; Kundi H: Poland, Colombia, Senegal na Japan.

SOLAI: Serikali yaondoa maji katika mabwawa mengine mawili

Na ERIC MATARA

WAHANDISI wa serikali Ijumaa waliondoa maji yaliyokuwa katika mabwawa mengine mawili yaliyo karibu na bwawa la Patel, eneo la Solai lililoangamiza watu 44 Nakuru.

Wataalamu wa Mamlaka ya Usimamizi wa Maji (Warma) walisema walichukua hatua hiyo ili kuzuia mkasa mwingine kama huo kutokea kighafla.

Mojawapo ya mabwawa hayo mawili lilikuwa likipenyeza maji hapo Alhamisi jioni, hali iliyozua hofu ya kuvunja kingo zake na kuua watu zaidi.

Bwawa la Patel ni moja kati ya mabwawa matatu yanayomilikiwa na mwekezaji mtajika wa kilimo Patel Mansukul.

Mshirikishi wa eneo la Rift Valley Bw Mongo Chimwanga na mwenyekiti wa Warma Simon Wang’ombe waliongoza zoezi hilo lililosimamiwa na wahandisi kutoka serikali ya kitaifa na ile ya kaunti ya Nakuru.

“Kundi la kiufundi la wahandisi lilikaugua mabwawa hayo Alhamisi jioni na kuwasilisha ripoti kwa mamlaka husika. Hapo Ijumaa maji yote katika mabwawa yaliondoloewa,” akasema Bw Chimwanga.

Hapo Alhamisi, iliibuka kuwa mabwawa yote katika eneo hilo hayakuwa na leseni ya ujenzi.

Warma ilijitetea kuwa imekuwa ikijaribu kuifikia kampuni ya Patel Coffee Estates Limited ili kuhalalisha bwawa hilo, lakini juhudi zao zimegonga mwamba.

Hii ni baada ya kung’amua hatari iliyokuwa ikiwakodolea macho wakazi walioishi upende wa chini wa bwawa hilo, walipoona maji yakipenyeza.

Meneja wa Warma eneo la Rift Valley, Simon Wang’ombe, alisema maafisa wake wamekuwa wakizuru eneo hilo mara kwa mara kukagua mabwawa.

Alifafanua kuwa sheria inasema kuwa bwawa la kibinafsi lenye urefu wa mita tano juu linahitajika kuhidhinishwa na shirika hilo.

“Kwa mwaka mmoja uliopita, tumekuwa tukijaribu kuwasiliana na maafisa wa kampuni hiyo bila mafanikio. Kulingana nasi, bwawa hili halikujengwa kulingana na sheria,” akasema.

 

 

 

DPP amtaka Boinnet ampe ripoti ya uchunguzi wa mkasa wa Solai kwa siku 14

Na ERIC MATARA

Mkurugenzi wa Mashtaka ya Umma (DPP) Ijumaa alitaka uchunguzi ufanywe kubaini kiini cha mkasa wa bwawa la Patel eneo la Solai, Nakuru uliotokea Jumatano usiku.

Bw Noordin Haji alimwagiza Mkuu wa Polisi Joseph Boinnet kuanzisha mchakato huo kutambua iwapo kuna watu walisababisha mkasa huo ulizua vifo vya watu 44 huku ukiharibu makazi na mazingira eneo hilo.Alimtaka Boinnet kuwasilisha ripoti kwa afisi yake katika muda wa siku 14.

“Naagiza uchunguzi uanzishwe na faili ya matokeo yake iwasilishwe kwangu siku 14 zijazo, ili tuchukue hatua zinazofaa,” ikasema taarifa iliyotiwa saini na Bw Haji.Hili linajiri wakati Wakenya wanauliza maswali kuhusu uhalali wa ujenzi wa bwawa hilo kubwa linalomilikiwa na mkulima maarufu Patel Mansukul.

Iliibuka Alhamisi kuwa mabwawa yote kati eneo hilo hayana leseni ya ujenzi.

Mamlaka ya Usimamizi wa Maji (Warma) imesema imekuwa ikijaribu kuifikia kampuni ya Patel Coffee Estates Limited ili kuhalalisha bwawa hilo, lakini juhudi zao zimegonga mwamba.Hii ni baada ya kung’amua hatari iliyokuwa ikiwakodolea macho wakazi walioishi upende wa chini wa bwawa hilo, walipoona maji yakipenyeza.

Meneja wa shirika hilo eneo la Rift Valley, Simon Wang’ombe, alisema maafisa wa Warma wamekuwa wakizuru eneo hilo mara kwa mara.

Alifafanua kuwa sheria inasema kuwa bwawa la kibinafsi lenye urefu wa mita tano juu linahitajika kuhidhinishwa na shirika hilo.

“Kwa mwaka mmoja uliopita, tumekuwa tukijaribu kuwasiliana na maafisa wa kampuni hiyo bila mafanikio. Kulingana nasi, bwawa hili lilijengwa kinyume na sheria,” akasema.

Lakini swali kuu ni, mbona shirika hilo la udhibiti wa mabwawa lilichelewa sana kuokoa hali kabla ya janga hilo kutokea.

BWAWA LA MAUTI: Watu 44 waangaamia kwenye mkasa Nakuru

MAGDALENE WANJA na ERIC MATARA

Kwa Muhtasari:

  • Wakazi walisikia mlipuko mkubwa kabla ya maji kusomba nyumba zao pamoja na makazi 
  • Baada ya kuvunja kingo zake, maji ya bwala hilo yalifyatuka kwa kasi kwa sababu bwala hilo liko katika nyanda za juu huku wakazi wakiwa wamejenga maeneo ya chini ya bwala hilo
  • Shirika la Msalaba Mwekundu walithibitisha kupata miili ya watu 44 huku zaidi ya waathiriwa 40 wakiendelea kupata matibabu katika hospitali za Bahati na Nakuru Level 5
  • Takriban maafisa 200 wa KDF waliwasili eneo hilo wakitumia ndege za kijeshi ili kuwasaidia maafisa wa Msalaba Mwekundu na wale wa Kaunti ya Nakuru

WATU wapatao 44 walipoteza maisha yao Jumatano usiku baada ya Bwala la Patel lililoko eneo la Solai, Kaunti ya Nakuru kuvunja kingo zake na kusomba vijiji viwili. Idara tofauti zilitoa takwimu zilizokinzana kuhusu idadi kamili ya vifo.

Kisa hicho kilichotokea mwendo wa saa moja jioni kiliongeza idadi ya vifo vilivyotokana na mvua nchini mwaka huu hadi 150 huku zaidi ya watu 300,000 wakikosa makao.

Maafisa wa Msalaba Mwekundu wanakili data kwenye Hospitali ya Nakuru Level Five kufuatia mkasa wa Solai. Picha/ Ayub Muiyuro

Wakazi wa Solai waliambia Taifa Leo kuwa walisikia mlipuko mkubwa kabla ya maji kusomba nyumba zao pamoja na makazi katika shamba kubwa la Nyakinyua.

Mkuu wa Polisi eneo Rongai, Japheth Kioko alisema bado kuna idadi kubwa ya watu ambao bado hawakuwa wamepatikana.

“Tulipata miili 11 ikiwa imefunikwa na matope katika shamba la kahawa na tunashuku miili hiyo ni ya watu waliokuwa wanajaribu kutoroka lakini wakashindwa nguvu na maji,” alisema Bw Kioko.

Maafisa wapakia kwenye gari mwili wa mmoja wa wakazi waliongamia kwenye mkasa. Picha/ Ayub Muiyuro

Alisema wengi wa waliopoteza maisha ni akina mama na watoto ambao walikuwa manyumbani jioni.

Tukichapisha habari hii, maafisa wa Shirika la Msalaba Mwekundu walithibitisha kupata miili ya watu 33 huku zaidi ya waathiriwa 40 wakiendelea kupata matibabu katika hospitali za Bahati na Nakuru Level 5.

Mary Karimi, mmoja wa waathiriwa, alisema bado anawatafuta watoto wake, akiwemo mmoja wa miaka minne.

Waziri wa Usalama wa Ndani Dkt Fred Matiang’i azifariji familia ambazo zilizopoteza jamaa wao kwenye mkasa wa Solai Mei 10, 2018. Picha/ Ayub Muiyuro

“Wakati tuliposikia sauti kubwa tulidhani ni mvua kubwa inanyesha. Tulikuwa tumechanganyikiwa. Natumai watoto wangu wako hai,” alisema Bi Karimi kwa majonzi.

Pius Mzee alikuwa anapiga gumzo na mkewe pamoja na watoto wake wanne nyumbani wakati maji yalipovamia nyumba yao. Alisema alijaribu kutoroka na binti zake wawili wenye umri wa miaka nne na sita lakini akalemewa. Baada ya maji kumshinda nguvu, Mzee aliachilia watoto wake na kupanda juu ya mti.

 

‘Sijui familia yangu iliko’

“Mke wangu alikuwa ameshikilia watoto wawili na punde baada ya maji kuongeza kasi sikujua walielekea wapi. Kufikia sasa sijui wako wapi,” alielezea Mzee akiwa hospitalini Nakuru Level Five anakoendelea kupata matibabu.

Wakazi waonyesha pahali mkasa wa bwawa la Patel ulianzia. Picha/ Ayub Muiyuro

Naye James Njung’e, ambaye pia anaendelea kutibiwa, alisema maji hayo yalimpata nyumbani akiwa na wazazi na mpwa wake.

“Tulisikia mlipuko mkubwa ambao tulidhani ni mvua. Punde maji yalivunja mlango na kuingia kwa kasi,” alielezea Njung’e.

Kwa bahati nzuri, Njung’e na jamaa wake waliponea baada ya kujishikilia kwenye mabaki ya nyumba.

George Wanjala mwenye umri wa miaka 25, alisema alipoteza watoto wake watatu akiwemo mmoja wa miezi miwili. Waathiriwa 13 walitibiwa Alhamisi na kuruhusiwa waende nyumbani.

Mashine hii inajaribu kuondoa matope yaliyosababishwa na maji kutoka kwa bwawa la Solai ililovunja kingo zake Mei 9, 2018. Picha/ Jeff Angote

Waziri wa Usalama wa Ndani Dkt Fred Matiang’i, Inspekta Jenerali wa Polisi Joseph Boinnet na Gavana wa Nakuru, Lee Kinyanjui waliongoza vikosi vya uokoaji katika eneo hilo huku wakazi wa maeneo jirani ya Marigu, Ruiru na Akuisi wakitoroka makwao kwa hofu ya mafuriko zaidi.

“Hatuna muda wa kupoteza. Serikali kuu inashirikiana kwa karibu na serikali ya Kaunti ya Nakuru ili kusaidia familia zilizoathirika,” alisema Dkt Matiangi.
Waziri Matiang’i alisema serikali imetoa vyandarua kwa walioathirika pamoja na chakula cha msaada.

 

Msaada wa KDF

Takriban maafisa 200 wa KDF waliwasili eneo hilo wakitumia ndege za kijeshi ili kuwasaidia maafisa wa Msalaba Mwekundu na wale wa Kaunti ya Nakuru.

Maafisa wa Msalaba Mwekundu walisema kuta za bwawa hilo zilishindwa nguvu na maji yaliyokuwa yanaongezeka kwa wingi kufuatia mvua kubwa iliyonyesha na kuvunja kingo zake kisha kufyeka zaidi ya familia 300.

Baadhi ya vyombo ambayo waakzi walifanikiwa kuokoa katika mkasa huo. Picha/ Jeff Angote

Bwawa hilo kubwa liko katika shamba kubwa la mkulima maarufu Mansukul Patel eneo la Solai.

Baada ya kuvunja kingo zake, maji ya bwala hilo yalifyatuka kwa kasi kwa sababu bwala hilo liko katika nyanda za juu huku wakazi wakiwa wamejenga maeneo ya chini ya bwala hilo.

Gavana Kinyanjui alisema watachunguza iwapo Bw Patel alikuwa na leseni ya kujenga bwawa katika nyanda za juu.

Makazi yalivyoharibiwa na maji hayo. Picha/ Jeff Angote

Tukichapisha habari hii, zaidi ya watu 50 walikuwa wameokolewa lakini juhudi za uokoaji zikasitishwa kutokana na giza.

Gavana Kinyanjui alisema serikali ya kaunti imefungua kituo cha kutoa habari kuhusu walioathiriwa katika afisi ya Naibu wa Kamishna wa Kaunti eneo la Solai.

Iliwalazimu maafisa wa Kenya Power kuzima stima eneo lote baada ya vikingi vya stima kusombwa na maji.

 

Gunia la miraa latolewa kanisani kama sadaka

Na LEAH MAKENA

MUTUATI, MERU

Polo wa eneo hili alishangaza waumini wa kanisa moja kwa kupeleka gunia la miraa kanisani kama sadaka ya kutoa shukrani kwa mavuno mema.

Yasemekana pasta wa kanisa hilo alikuwa amekubali washiriki kutoa mavuno kama sadaka.

Kwa kawaida, mavuno hayo huuzwa na pesa zinazopatikana hutumiwa kwa miradi ya kanisa.

Inasemekana kuwa waumini wengi walipeleka aina mbali mbali ya vyakula.

Hata hivyo, polo mmoja aliamua kupeleka gunia la veve kanisani akisema alikuwa amefanikiwa kupata mavuno mazuri na hangekosa kutoa shukrani kwa Maulana.

Pasta alishangaa alipofungua gunia na kupata miraa. Alimlaumu jamaa kwa kudharau kanisa lakini alijitetea akisema hakuona makosa yoyote kushukuru Mungu kwa baraka alizomjalia.

“Kama huwa mnakubali pesa ninazotoa sadaka nikiuza miraa mbona msikubali zao lenyewe? Isitoshe, mko na faida kwa sababu huwa ninauza kwa bei ya juu sana na hivyo kanisa litafaidi mkifanyia kazi zaka hiyo,” polo aliongeza.

Waumini walioshuhudia tukio hilo walisema kuwa pasta alimkemea polo kwa kitendo chake na kumtaka kuondoka na gunia lake la miraa. Alisema hangekubali biashara ya vileo kanisani.

Jamaa alilazimika kurejea nyumbani na gunia lake akimlaumu pasta kwa kumbagua na kukataa kukubali zaka yake ilhali kwa miaka mingi amekuwa akikubali pesa zinazotokana na zao hilo.

Alidai pasta alijifanya kwa sababu anajua waumini wengi ni wakulima wa miraa na hiyo ndiyo njia yao ya kujitafutia riziki.

Alisema pasta alifaa kuombea zao hilo ili lizidi kunawiri wakazi wapate pesa zaidi na kutoa sadaka nono apate kufaidika.

…WAZO BONZO…

IEBC: Wanaovuna bila jasho

BENSON MATHEKA na SAM KIPLAGAT

MAKAMISHNA watatu wa Tume Huru ya Uchaguzi na Mipaka (IEBC) waliotangaza kujiuzulu Aprili wanaendelea kupata mishahara yao licha ya kuwa hawafanyi kazi yoyote.

Kulingana na mwenyekiti wa IEBC, Wafula Chebukati, makamishna hao Consolata Maina, Margaret Mwachanya na Paul Kurgat (pichani) hawapaswi kuendelea kulipwa mishahara yao kwa sababu hawatekelezi majukumu yoyote ya tume.

Kwenye barua aliyomwandikia Katibu wa Wizara ya Fedha, Kamau Thugge na Mkuu wa Utumishi wa Umma Joseph Kinyua, Bw Chebukati anasema aliwaandikia barua makamishna hao mnamo Aprili 20 akiwataka waeleze kwa nini hawafiki kazini, lakini hawakujibu barua yake au hata kufika katika ofisi za tume katika jumba la Anniversary Towers, Nairobi.

“Ni wazi kuwa watatu hao wamekwepa kazi kinyume cha sheria,” alisema kwenye hati ya kiapo ya kujibu kesi ambayo mwanaharakati Okiya Omtatah anataka makamishna hao wajiuzulu rasmi.

“Ni maoni ya tume kwamba mshahara wa makamishna hao unafaa kusimamishwa,” inaeleza barua ya Bw Chebukati kwa Dkt Thugge.

Kulingana na Bw Chebukati, kamishna wa tume anaweza kujiuzulu kwa kuandika barua kwa rais, kutoa notisi ya mwezi mmoja au kulipa tume mshahara wa mwezi mmoja iwapo hatatoa notisi. Hata hivyo, anasema watatu hao hawakufuata utaratibu huo.

Anasema ikithibitishwa kuwa walimwandikia rais barua ya kujiuzulu, wanapaswa kuagizwa kulipa madeni na kurudisha mali yote ya tume waliyo nayo.

Kwenye barua hiyo, anawataka makamishna hao warudishe stakabadhi zote na nakala za IEBC, kompyuta, vifaa vyote vya kutoa mafunzo, funguo na pasi za usalama kisha watie sahihi vyeti vya kuonyesha wamerudisha mali hiyo.

Wakikosa kufanya hivyo, anasema, tume italazimika kuwakata pesa kutoka kwa malipo wanayopasa kupata wakiacha kazi.

Makamishna hao walitangaza kujiuzulu wakilalamikia hatua ya Bw Chebukati na makamishna Boya Molu na Abdi Guliye ya kumsimamisha kazi afisa mkuu mtendaji Ezra Chiloba.

Mshahara wa Bi Maina, ambaye alikuwa naibu mwenyekiti wa tume ni Sh895,270 kwa mwezi na ikizingatiwa kwamba mshahara wa kamishna wa IEBC ni Sh700,000, makamishna hao watatu wamekuwa wakipokea jumla ya mshahara usiopungua 2.5 milioni bila jasho tangu walipotangaza kujiuzulu.

Mbali na mshahara huo unaolipwa na Wizara ya Fedha, wana magari ya serikali, madereva na walinzi ambao kulingana na Chebukati hawajaondolewa kwa vile hawajajiuzulu rasmi.

 

#NaniKamaMama: Shiriki shindano la kumshindia mama Sh8,000

Na CHRIS ADUNGO

Huku Siku ya Akina Mama ulimwenguni ikizidi kukaribia, gazeti la Taifa Leo imepanga kuwatuza akina mama kwa siku tatu kuanzia Alhamisi.

Maagizo ni kama ifuatavyo:

 

Alhamisi

Mama zetu wanatuelimisha na kutuhamasisha kila siku. Kuanzia Alhamisi hii, Taifa Leo inakupa nafasi ya kumtuza mama yeyote ambaye anastahili kuzawadiwa kwa ubora wake kwa  vocha ya ‘Spa’ itakayogharimu Sh 8,000. Mteue mwanao (kama yeye ni mama), dada yako, rafiki yako au mke wako na utuambie katika Kiswahili sanifu jinsi wamekusaidia maishani.

Tutabadili uteuzi wako kuwa kadi huku kadi ambayo itakuwa na maoni mengi, ‘likes’ au’ ‘shares’ itashinda. Waulize jamaa na marafiki wakusaidie kwani kila ‘like’ au ‘share’ itahesabika kama kura. Washindi watatangazwa Siku ya akina Mama Duniani.

Ijumaa:

Nyanya zetu ni watu ambao wana uvumilivu, upendo na ujuzi katika familia. Lakini nyakati zinginie tunasahau kuwa hao bado ni mama kwa wazazi wetu na wazazi wetu ni watoto wao.

Tusherehekee nyanya zetu kwenye Siku ya akina Mama kwa kusema katika Kiswahili mufti ni kitu kipi chenye ujuzi  wamewahi kukuambia.

Tutachukua msemo huo na kutengeneza kadi kwa kila ujumbe na kuiweka katika mitandao yetu ili uweze kuipakua na kutuma kwa uwapendao.

Kadi iliyo na maoni mengi, likes au shares itashinda. Mshindi atatangazwa Siku ya akina Mama Duniani.

Jumamosi:

Mteue mama yako aliyekuzaa kwa nafasi ya kushinda vyombo vya upishi vinavyogharimu Sh10,000 kwa kutuambia ni kwa nini yeye ni mtu ambaye unayemdhamini zaidi.

Tumia Kiswahili sanifu na tutabadilisha uteuzi wako kuwa usemi ambao unaweza ukatuma kwake.

Usemi ambao una maoni mengi, likes ama shares utashinda. Washindi watatangazwa Siku ya akina Mama Duniani. Waulize jamaa na marafiki wakusaidie kumpigia debe mama yako.

 

2022: Hofu ya Jubilee kwa Raila yapanda

Na CHARLES WASONGA

WABUNGE wa Jubilee Jumatano walimsuta kiongozi wa upinzani Raila Odinga kwa kile walichotaja juhudi zake za kusababisha mgawanyiko kati ya Rais Uhuru Kenyatta na Naibu wake William Ruto.

Viongozi hao walisema Bw Odinga, ambaye alidai Jumanne kwamba masuala yaliyomo kwenye mwafaka kati yake na Rais yanaweza tu kutekelezwa kupitia marekebisho ya Katiba, ana njama fiche ya kugawanya nyumba ya Jubilee “kutoka ndani”.

“Ni wazi kuwa Raila anamchukulia William Ruto kama mshindani wake na hii ndio maana anamchukia pamoja na wandani wake. Anajaribu kujionyesha kuwa rafiki wa Rais huku akionekana kumchukia Ruto. Anaendeleza siasa za mgawanyiko sio zile za kuunganisha nchi,” kiongozi wa wengi katika Seneti Kipchumba Murkomen alisema, huku kauli yake ikionekana kuwakilisha msimamo wa kambi ya Ruto.

Seneta wa Nandi Samson Cherargei, ambaye ni mmoja wa wabunge wanaopinga marekebisho ya Katiba, vile alishikilia kuwa hamna haja kwa nguzo ya utawala kugatuliwa kupitia kubuniwa kwa nyadhifa zaidi kama afisi ya Waziri Mkuu mwenye mamlaka.

“Wanajua kuwa Ruto anaelekea kuwa Rais. Hii ndio maana sasa wanataka kufanyike kura ya maamuzi ili kuziua azma yake kwa kubuni wadhifa wa Waziri Mkuu ambao utatengewa watu fulani, na sio atakayechaguliwa moja kwa moja na Wakenya,” akasema Bw Cherargei.

Bw Ruto aliweka gizani kuhusiana na mazungumzo kati ya Rais na Raila hadi mwafaka huo ulipotangazwa mnamo Machi 9.

Na ingawa Naibu huyo wa Rais ameunga mkono mwafaka huo, akiutaja kama ambao utaunganisha nchini, amepinga kabisa wazo la Bw Odinga la kwamba ili mwafaka huo uzae matunda sharti katiba ifanyiwe mageuzi.

Mnamo Jumanne Bw Odinga aliwataka wafuasi wa chama chake cha ODM kuunga mkono mwafaka huo. Lakini akashikilia kuwa ili ufanikishwe sharti katiba ifanyiwe marekebisho kubuni wadhifa wa Waziri Mkuu sawa na ilivyopendekezwa kwenye rasimu ya Katiba ya Bomas iliyoandaliwa mnamo 2005.

Vile vile, Bw Odinga amependekeza kuanzishwe kwa utawala wa maeneo huku serikali za kaunti na ile ya kitaifa zikiendelea kudumishwa.

Kile ambacho kambi ya Ruto inahofia ni kwamba mabadiliko yoyote wa kimuunda na mamlaka ya Rais yataathiri nafasi ya Naibu Rais kuweza kufurahia mamlaka sawa na bosi wake, Rais Kenyatta, endapo atashinda urais.

Duru zinasema kuwa wafuasi wa Ruto pia wameingiwa na wasiwasi kwamba kura ya maamuzi huweza kubuni vuguvugu za kisiasa ambazo huenda zikavuruga nafasi ya Ruto kuingia Ikulu.

Lakini Bw Odinga anapinga wazo hilo: “Endapo mabadiliko ambayo yako katika mwafaka (MoU) hayatatekelezwa, uchaguzi mkuu wa 2022 utakumbwa na vurugu. Utajaa mkanganyiko, ghasia ya baadhi ya watu watavunjika moyo. Tunajaribu kuzuia hali kama hiyo,” Bw Odinga akasema alipohutubia wanachama wa Baraza Kuu (ODM) katika hoteli moja eneo la Elementaita, Gilgil.

Akaongeza: “Salamu kati yangu na Rais haikuhusu uchaguzi wa 2022. Lengo kuu lilikuwa kuunganisha nchini ili kuzua machafuko yalyoshuhudiwa katika uchaguzi mkuu wa mwaka jana. Kwa hivyo, jambo hili halifai kufasiriwa kumaanisha kuwa nia ilikuwa ni kutoa nafasi kwa watu fulani kung’angania nyadhifa za uongozi.”

Kauli za Bw Cherargei zinafanana na zile za Kiongozi wa Wengi katika Bunge la Kitaifa ambaye majuma mawili yaliyopita alidai kuwa mwafaka huo “umekufa” iwapo ulinua kufanikisha marekebisho ya katiba kupitia kura ya maamuzi.

 

Salamu imeyeyuka

“Salamu imesambaratika. Haipo tena. Hatutaki kura ya maamuzi; ilhali wao wanataka kura ya maamuzi. Kwa hivyo, hatuwezi kulala katika kitanda kimoja. Vile vile, hatuwezi kukubali kubuniwa kwa ngazi nyingine ya utawala- itakuwa ghali mno,” Bw Duale akasema bungeni akirejelea pendekezo la Bw Odinga kwamba sharti katiba ifanyiwe mabadiliko.

Katika mwafaka huo, Rais na Odinga walikubaliana kushughulikia masuala kama; uhasama wa kikabila, ukosefu wa maadili ya kitaifa, ujumuishaji wa wote katika utawala, uimarishaji wa ugatuzi, kukomeshwa kwa chaguzi zenye kuleta migawanyiko, kuhakikisha usalama wa Wakenya wote, kumaliza ufisadi na kuhakikisha uwepo na ustawi shirikishi.

Kulingana na Bw Odinga baadhi ya masuala haya “sharti yashughulikiwe kupitia mageuzi katika sheria na katiba”.

Masuala hayo ni kama vile ujumuishaji ambapo kila eneo, kabila, dini au tabaka la Wakenya watahisi kuwakilishwa katika uongozi wa nchini.

Lakini Murkomen anasema: “Kura ya maamuzi ni mbaya kuliko uchaguzi na alivyosema Raila sharti ifanyike ndani ya kipindi cha mwaka mmoja. Anaonekana kama mtu anayepigia debe siasa za udikteta,” akasema Bw Murkomen.

Naibu Kiranja wa Wengi katika Seneti Irungu Kang’ata anasema: “Nilisema Raila ana malengo fiche…. Bado simwamini”.

Hata hivyo, Katibu Mkuu wa Jubilee Raphael Tuju alitoa kauli isiyo kali.

“Ni vizuri kwamba Wakenya wanaongea. Hii ni hatua muhimu na hatupasi kunyamazisha yeyote mwenye maoni tofauti na yetu. Tuweke masuala hayo yote kwenye meza. Na kama hakuna meza, kunaweza kutengeneza meza,” Bw Tuju akasema.

Kwa upande wake Naibu Kiongozi wa ODM Wycliffe Oparanya alisema ingawa chama hicho hakilengi uchaguzi wa 2022 kwa sasa, sio makosa kwa Bw Odinga kuwania urais wakati huo.

“Mbona watu wameingiwa na hofu kwamba Raila Odinga atawania urais. Yeye ni Mkenya na ana haki ya kufanya hivyo… hahitaji ruhusu kutoka kwa mtu. Kile anachohitaji ni kuidhinishwa na chama chetu,” Oparanya ambaye ni Gavana wa Kakamega, alisema alipohojiwa katika runinga.

Mwanahabari abubujikwa na machozi baada ya kuponea kusukumwa ndani

Na RICJARD MUNGUTI

MWANAHABARI alidodokwa na machozi Jumatano kortini baada ya polisi kunyimwa fursa ya kumzuilia siku saba kuhusiana na shambulizi la mfanyabiashara katika hoteli moja jijini Nairobi.

Bw Sangira Stephen Ochola, ambaye picha yake ilisambazwa mitandaoni kutokana na shambulizi la Bw Timothy Muriuki mnamo Aprili 30, 2018 alishindwa kujimudu na kujipata akitiririkwa n amachozi baada ya hakimu mkazi Bi Miriam Mugure kusema “hakuna ushahidi wowote uliomhusisha mwanahabari huyu na kisa cha kutwangwa kwa mlalamishi.”

Bw Stephen Sangira kabla ya kesi dhidi yake kuanza hapo Mei 9, 2017 katika mahakama ya Milimani, Nairobi. Picha/ Richard Munguti

Mahakama iliambiwa hakuna utambuzi mwingine unahitajika kwa vile picha ya Ochola imeonekana kote ulimwenguni baada ya kuchapishwa na magazeti  ya Taifa Leo na Daily Nation.

Mawakili  Cliff Ombeta, Nelson Havi , Michael Osundwa , Rodger Sagana  na Harun Ndubi walimweleza hakimu polisi wanataka kumtesa mshukiwa.

Akimhoji afisa anayechunguza kesi hiyo  Koplo Francis Mwita , Bw Ombeta alimtaka aeleze ikiwa Bw Ochola alitiwa nguvuni wakati mmoja na Mbunge wa zamani wa Kamkunji Simon Mbugua  na mabroka  Antony Otieno Ombok almaarufu Jamal  na Benjamin Odhiambo Onyango almaarufu Odhis mnamo Mei 8, 2018.

Mwanahabari apandwa na hisia baada ya kuona jinsi mawakili walimenyana katika kesi dhidi yake. Picha/ Richard Munguti

Koplo Mwita alikiri aliwatia nguvuni wote wanne wakati mmoja.

“Mbona hukumfungulia mshtaka ya wizi wa mabavu wakati mmoja na Mabw Mbugua, Ombok na Onyango?” Bw Ombeta akauliza.

“Sikuwa nimekamilisha uchunguzi kwa vile kuna washukiwa wengine wanaoendelea kuswakwa na polisi,” alijbu Koplo Mwita.

Koplo Mwita aliomba korti iamuru mshukiwa huyo azuiliwe kwa siku saba ndipo “walalamishi wajitokeze kumtambua kwa vile anashukiwa amehusika katika visa vingine vingi vya kuwashambulia watu.”

Machozi yaanza kumdondoka mwanahabari alipoona dalili kuwa hatasukumwa ndani siku saba. Picha/ Richard Munguti

Mahakama iliambiwa Koplo Mwita anamtesa mshukiwa huyo.

“Kubali tu unamtesa mshukiwa huyu,” Bw Ombeta alimwambia polisi huyo.

“Hapana,” alijibu Koplo Mwita.

Mawakili Ndubi , Sagana na Havi walisema kile mahakama inaweza kufanya ni kumwachilia mshtakiwa kwa dhamana kwa vile “tayari afisa mkuu wa polisi Ireri Kamande ameshasema hawatamshtaki  Bw Ochola.”

Jaji alipotaja kuwa Bw Sangira aachiliwe kwa dhamana ya Sh100,000, hakuweza kuvumilia, aliyaachilia machozi yakambubujika. Picha/ Richard Munguti.

Bi Mugure alitupilia mbali ombi la kumtaka Bw Ochola azuiliwe kwa siku saba.

Pia alisema Koplo Mwita hakuwa ameitia saini ombi alilowasilisha kortini akiunga mkono kuzuiliwa kwa mshukiwa huyo.

Korti ilimwachilia kwa dhamana ya Sh100,000 pesa tasilimu kisha ikamwamuru afike mbele ya koplo Mwita kuhojiwa.

Kesi hiyo itatajwa mnamo Mei 14, 2018.

Wanaovumisha Ruto 2022 wakome – Fred Ouda

Na LUCY KILALO

MBUNGE wa Kisumu ya Kati, Fred Ouda amewataka baadhi ya viongozi wa Rift Valley wanaompigia debe Naibu Rais William Ruto wawache kubabaika kuhusiana na Uchaguzi Mkuu wa 2022, akisema kuna wengi wanaoweza pia kuwania.

Mbunge huyo pia aliwaonya dhidi ya kumpa Rais Uhuru Kenyatta masharti kuhusiana na uchaguzi huo.

Akihutubia wanahabari Jumatano katika majengo ya Bunge, Bw Ouda alimshtumu hasa Seneta wa Elgeyo Marakwet, Kipchumba Murkomen kwa kuonekana kusisitiza kuwa Naibu Rais William Ruto ndiye atawania urais 2022.

“Kwa sasa Rais Kenyatta ana ajenda moja, ambayo ni kuacha sifa njema, na lazima aungwe mkono,” alisema.

Mbunge huyo pia aliwasuta viongozi hao akisema wanastahili kutambua kuwa sio Bw Ruto pekee anaweza kuwania urais nchini.

“Wengi nchini wanaweza kuwania urais na sio kwa vitisho. Pia kinachoamua ni tabia yako, marafiki na kile umefanyia nchi na sio kupendekezwa.”

Aliongeza, “Rift Valley ina watu wengine, ingawaje kufikia sasa ni Seneta wa Baringo Gideon Moi na Bw Ruto ambao wameonyesha nia. Hata hivyo, Bw Moi ana haki ya kuwania na ninamhimiza awanie. Wacha awashawishi Wakenya sawa na Bw Ruto.”

Juma lililopita katika mazishi ya mbunge wa Baringo Kati, Bi Grace Kipchoim, viongozi hao walimtaka Bw Moi kutelekeza azma yake ya kuwania urais.

Mbunge wa Kikuyu, Kimani Ichung’wa pia alionya ushindani wa kisiasa dhidi ya viongozi hao kutoka jamii ya Kalenjin kuwa huenda ukawanyima urais 2022 na pia kumtaka Bw Moi kutowania.

Alisema kuwa Jubilee ilifanya mkataba ambapo rais Kenyatta alikuwa aongoze kwa kipindi cha mwisho, na kisha eneo la Mlima Kenya litamuunga mkono Bw Ruto 2022.

 

 

Tahadhari kuhusu Ebola

Na VALENTINE OBARA

SERIKALI Jumatano ilitoa tahadhari baada ya mkurupuko wa maradhi hatari ya Ebola kutokea katika Jamhuri ya Demokrasia ya Congo (DRC).

Waziri wa Afya, Bi Sicily Kariuki (pichani), alisema maafisa wa afya watachunguza wasafiri wote wanaoingia nchini kupitia sehemu za mpakani za Busia, Malaba na Uwanja wa Ndege wa Kimataifa wa Jomo Kenyatta (JKIA).

“Tumeweka vifaa vya kupima joto mwilini katika maeneo haya ili kutambua kama kiwango cha joto kitakuwa kimezidi kupita kiasi (kwa wasafiri),” akasema kwenye taarifa.

Kufikia jana, watu 17 walikuwa wamethibitishwa kufariki DRC baada ya kuambukizwa ugonjwa huo ambao huenea kwa kasi, na Shirika la Afya Ulimwenguni (WHO) likasema limepeleka usaidizi ili kuzuia maambukizi kuenea zaidi.

Bi Kariuki aliongeza kuwa wizara yake imebuni Baraza la Tahadhari za Afya Kitaifa ambalo mojawapo ya majukumu yake itakuwa ni kuzuia magonjwa hatari kama vile Ebola kusambazwa nchini kutoka nchi za kigeni.

Hospitali zote nchini zinatarajiwa kupokea ilani kutoka kwa serikali ili kuweka mikakati maalumu itakayowezesha wahudumu wa matibabu kuwa macho na kutambua kama kuna maambukizi yoyote, na hatua zinazofaa kuchukuliwa.

Hata hivyo, Bi Kariuki alihakikishia Wakenya kwamba taifa hili lina utaalamu na uwezo wa kutosha kuzuia ugonjwa huo kuingia nchini.

“Wakenya wanafaa wawe watulivu kwani tumewahi kudhihirisha uwezo wetu wa kutambua na kuchukua hatua kwa haraka wakati wowote kunapokuwa na mkurupuko wa magonjwa,” akasema.

Mnamo 2015, Kenya ilikuwa miongoni mwa mataifa ambayo yalituma wahudumu wa afya Magharibi mwa Afrika wakati kulitokea mkurupuko mbaya zaidi wa Ebola ukanda huo.

 

KURGAT: Serikali yalenga kumzima kwa kuwa ‘aliiba mamilioni Urusi’

Na CHARLES WASONGA

WIZARA ya Mashauri ya Kigeni imeitaka Tume huru ya Uchaguzi na Mipaka (IEBC) kutomlipa aliyekuwa kamishna wake, Paul Kurgat, malipo yake ya kuondoka afisini kwa tuhuma kuwa aliiba pesa za umma alipohudumu kama Balozi wa Kenya nchini Urusi.

Dkt Kurgat ni miongoni mwa makamishna watatu waliojiuzulu mnamo Aprili 16, baada ya kutofautia na mwenyekiti Wafula Chebukati.

Wengine ni Bi Consolata Nkatha Maina na Bi Margaret Mwachanya. Dkt Roselyne Akombe alijiuzulu kabla ya Oktoba 26, 2017, kura ya urais iliporudiwa. Alidai tume hiyo haikuwa na uwezo wa kuendesha zoezi hilo kwa sababu ya kuingiliwa na maafisa wakuu serikalini.

Kujiuzulu kwa Kurgat na wenzake kulijiri baada ya wenzao wakiongozwa na Bw Chebukati kuidhinisha kusimamishwa kazi kwa Afisa Mkuu Mtendaji Ezra Chiloba kuhusiana na kashfa ya ununuzi wa vifaa vilivyotumiwa katika uchaguzi mkuu 2017.

Chini ya uongozi wa Chebukati, watatu hao wakasema, “ukumbi wa mkutano wa tume hii umegeuzwa kuwa eneo la kusambaza madai ya uwongo, uwanja wa kueneza uadui na mahala pa kung’ang’ania na kusaka utukufu na sifa.”

Kwenye barua kwa kaimu Afisa Mkuu Mtendaji wa IEBC, Katibu wa Wizara ya Mashauri ya Kigeni, Balozi Macharia Kamau anadai kuwa Sh178 milioni zilidaiwa kupotea wakati Dkt Kurgat alipohudumu kama Balozi wa Kenya nchini Urusi.

“Kwa hivyo ni yeye alitia idhini ya matumizi ya pesa hizo,” akasema Kamau alipofika mbele ya Kamati ya Bunge kuhusu Uhasibu wa Pesa za Umma (PAC) Jumatano.

Katibu huyo aliongeza kuwa Sh8.6 milioni zingine zilitumika kwa njia isiyo halali kwa kulipa marupurupu kwa watumishi wa Wizara ya Mashauri ya Kigeni.

“Wizara inawasilisha suala hili kwa IEBC kama mwajiri na kuiomba kwamba malipo yoyote ambayo Bw Kurgat alifaa kulipwa yasimamishwe hadi pale suala hili litakaposhughulikiwa na kukamilishwa,” ikasema barua ambayo iliandikwa mnamo Mei 2 na Bw LM Waweru kwa niaba ya Katibu wa Wizara ya Mashauri ya Kigeni.

Dkt Kurgat alihudumu kama Balozi wa Kenya nchini Urusi kati ya Agosti 11, 2010 hadi Desemba 21, 2015, kabla ya kuteuliwa kuwa kamishna wa IEBC.

Wiki jana Bw Chebukati aliwaambia wanachama wa Kamati ya Bunge kuhusu Haki na Masuala ya Sheria (JLAC) kwamba hana uhakika kama watatu hao walijiuzulu au la, na kama wao hupokea mishahara yao au la.

Makamishna wa IEBC, sawa na makamishna wa tume zingine za kikatiba hulipwa mishahara kutoka kwa hazina ya pamoja (Consolidated Fund).

Kulingana na Bw Chebukati, Wizara ya Fedha haijajibu barua zake ambapo alitaka kujua kama makamishna hao bado hupokea mishahara yao au la.

Hata hivyo, aliwaambia makamishna hao kwamba watatu hao bado wanatumia magari ya serikali yenye nambari za usajili za GK. Aidha, alisema bado Dkt Kurgat na wenzake bado wanafurahia huduma za madereva na walinzi.

“Watatu hao bado hawajarejesha mali ya tume kama vile magari na vifaa vinginevyo licha ya wao kudai kujiuzulu,” Bw Chebukati akaambia wanachama wa kamati hiyo wakiongozwa na naibu mwenyekiti Bi Esther Wahome.

 

Ubadhirifu wa fedha

Ukaguzi wa akaunti za ubalozi wa Kenya nchini Urusi kuhusu matumizi ya fedha katika mwaka wa kifedha wa 2015/2016, ulioendeshwa na Mkaguzi Mkuu Edward Ouko, ulifichua visa vya matumizi mabaya ya fedha.

Suala hilo linachunguzwa wakati huu na PAC chini ya uongozi wa Mbunge wa Ugunja Opiyo Wandayi.

Katika mwaka huo, maafisa wa ubalozi wa Kenya jijini Moscow, Urusi, walilipwa marupurupu ya kuhudumu ughaibuni chini ya kategori ya A2, ambayo hulipwa maafisa wa ubalozi wa Amerika na mataifa mengine chini ya kategori A1. Maafisa wa mataifa ya Uropa pia hulipwa marupurupu ya chini ya kategori hiyo (A1).

Kwa hivyo, maafisa wa ubalozi wa Urusi walilipwa fedha hizo kinyume na agizo kwenye taarifa ya Novemba 2012 kuhusu malipo ya marupurupu aina hiyo.

Kwa kuwa hitilafu hiyo ya malipo ilitokea wakati Dkt Kurgat alikuwa akisimamia ubalozi huo, kuna uwezekano kwamba pesa hizo zitapatikana ikiwa atapatikana na hatia.

Hata hivyo, Balozi Kurgat alijitenga na tuhuma hizo akisema ukaguzi huo wa matumizi ya fedha akitaja sauala hilo kama “la kihistoria” ambalo lilianza kuchipuza mnamo 2007 na ambalo kufikia sasa lilifaa kuwa limetatuliwa wakati huo.

 

Kujitakasa

“Ukitumia kiwango kama hicho cha fedha, shughuli za ubalozi zitakwama. Wizara inafaa kwanza kusuluhisha makosa yaliyotokea kabla ya mimi kutumwa kule. Ni matumaini yangu kwamba PAC itanialika kujitetea na kutakasa jina langu,” Balozi Kurgat akasema.

Kuhusiana na madai kuwa malipo ya Marupurupu ya Huduma katika Balozi za Kigeni, kuhusiana na Ubalozi wa Urusi yalilipwa kwa kiwango cha juu, Balozi Kurgat alisema viwango vya marupurupu hayo huwekwa na Wizara na kwamba “hauwezi kubadilisha viwango hivyo”.

Wizara ya Mashauri ya Kigeni inachunguza hitilafu hizo za matumizi ya fedha kabla ya kuwasilisha ripoti yake kwa PAC.

Ujumbe wa maafisa sita umetumwa Urusi kuchunguza suala hilo. Majukumu ya maafisa hao ni pamoja na kuchunguza vitabu vya uhasibu na taarifa za benki za ubalozi huo.

Haijulikani ni kwa nini Wizara hiyo inachunguza suala hilo wakati huu ilhali ilipata habari kuhusu hitilafu hizo za madai ya matumizi mabaya ya pesa za umma mnamo 2016.

Njogu ateuliwa kuinoa Thika United

Na CECIL ODONGO

KLABU ya Thika United imemteua John Njogu kama kocha mkuu wa timu hiyo ili kuchua nafasi ya Nicholas Muyoti aliyejiuzulu wiki nne zilizopita.

Njogu awali alikuwa kocha wa Klabu ya Kiambu All Stars, Ruiru All Stars na kikosi cha sok cha Chuo Kikuu cha Mlima Kenya bewa la Thika

Kocha huyo chipukizi anatarajiwa ataongoza timu hiyo katika pambono dhidi ya klabu ya SoNy Sugar siku ya Jumapili katika uwanja wa Manispaa ya Thika.

Njogu atasaidiwa na Haji Bilali ambaye mchango wake klabuni kama mchezaji miaka ya nyuma bado inatambulika hadi leo.

Kocha Muyoti aliagana na Thika United inayodhaminiwa na kampuni ya Brookside Tarehe 1 mwezi Mei kufuatia misururu ya matokeo mabaya

Njogu ambaye aliandaa mazoezi mepesi na timu yake mpya siku ya Jumanne alitangaza uteuzi wake kupitia akaunti yake ya Facebook.

“Namshukuru Mwenyezi Mungu na marafiki zangu ambao wamenisaidia kuafikia ndoto yangu. Nimeshiriki mazoezi yangu ya kwanza kama kocha wa klabu ya Thika United,” ikasema chapisho lake.

Kuteuliwa kwa kocha huyo hata hivyo kumewashangaza mashabiki wa soka waliotarajia timu hiyo kuteua mojawapo wa makocha maarufu na mwenye uzoefu.

Katika kipindi kisichozidi mwaka moja, Thika United wameweza kubadilisha makocha mara tatu. Alihudumu aliyekuwa naibu kocha wa Harambee Stars James Nandwa, akaja Nicholas Muyoti na sasa Njogu.

Makocha wengine wa zamani wa klabu hiyo ni Kocha wa vijana wasiozidi umri wa miaka 23 John Kamau na kocha mtajika Juma Abdalla.

Thika United wanakalia nafasi ya 16 ambayo ni eneo hatari la kushushwa ngazi kwenye msimamo wa jedwali la ligi baada ya kuvuna alama 12.

Matano kumkosa difenda matata dhidi ya Kariobangi Sharks

Na CECIL ODONGO

KLABU ya Tusker itakosa huduma za mlinzi wake matata Erick Ambunya katika mechi yao ya KPL siku ya Jumapili dhidi ya Kariobangi Sharks ugani Ruaraka.

Difenda huyo ambaye anatumikia marufuku ya mechi moja amekuwa mhimili mkubwa kwa wanamvinyo hawa walioonyesha ufufuo mkubwa tangu kocha Robert Matano apokezwe mikoba ya kuiongoza.

Ambunywa alilishwa kadi nyekundu katika mtanange wa ligi Jumapili iliyopita dhidi ya Klabu ya Bandari mechi iliyogaragazwa ugani Mbaraki. Tusker walishinda mechi hiyo kwa mabao 2-0.

Tangu ujio wa Kocha Matano, klabu hiyo imerekodi asilimia 100 ya ushindi kati mechi zake tatu. Iliwalambisha klabu ya SoNy Sugar mabao 3-2 , ikawachabanga Wazito FC 1-0 na ushindi waliousajili Jumapili iliyopita dhidi ya Bandari FC ulizidi kudhihirisha ubabe wao.

Kocha huyo kwa jina la utani ‘the lion’ alichukua usimamizi wa Tusker FC kutoka kwa aliyekuwa kocha raia ya  Uganda Sam Timbe.

Msimu huu klabu hiyo ilikuwa ikipata matokeo mabaya chini ya kocha Timbe na wakati mmoja ilikuwa ikiselelea katika eneo hatari la kuteremshwa ngazi kwenye msimamo wa jedwali la ligi.

Ushindi  huo katika mechi tatu mfululizo umewapaisha mabingwa hao wa zamani hadi nafasi ya tisa kwa alama 19 nane tu nyuma ya viongozi wa ligi Gor Mahia.

Wapinzani wao katika mechi ya Jumapili Kariobangi Sharks wanashikilia nafasi ya 11 kwa alama 17 na imesajili matokeo ya wastani ya sare katika mechi zake tatu zilizopita.

Pasta amfurusha mke kwa kutisha kusambaratisha kanisa

Na CORNELIUS MUTISYA

NZAIKONI, MACHAKOS

PASTA wa kanisa moja eneo hili alimfurusha mkewe akidai alikuwa amechoshwa na tabia yake ya udaku. Jamaa alisema tabia ya mkewe nusura isambaratishe kanisa lake na hangemvumilia.

Kulingana na mdokezi, pasta alifungua kanisa hapa na likavutia watu wengi. Waumini walikuwa wakifurika kanisani kupata chakula halisi cha roho.

Inasemekana kwamba mkewe alipewa jukumu la kuwapa ushauri nasaha wanawake kanisani.

Hata hivyo, wanawake hao hawakuwa na imani na uongozi wake wakidai alikuwa mwenye kiburi na mjeuri kupindukia.

Yasemekana alikuwa akiwasengenya akina mama hao kokote alikoenda.

Hata akiwa saluni, ama akinunua mboga sokoni, alikuwa akieneza porojo kuhusu vile wanawake wa kanisa la mumewe walikuwa wachoyo, washamba na waliokosa hadhi ya kuitwa wanawake kwa sababu ya kutojua kujipodoa.

Kulingana na mdokezi, wanawake hao walipochoshwa na udaku mke wa pasta, walianza kususia ibada.

Hata hivyo, mmoja wao aliwashauri wamjulishe pasta wao kabla ya kuchukua hatua yoyote.

“Akina mama hao walimwendea Mtumishi wa Mungu ofisini na wakamueleza malalamishi yao. Pasta aliwaomba radhi na akawaahidi kuchukua hatua muafaka,’’ akasema mpambe wetu.

Duru zaarifu kuwa, pasta alifululiza hadi nyumbani na kumuamuru mkewe kufunganya virago vyake na kutokomea kwa kumharibia sifa.

“Siwezi nikakubali kanisa langu lisambaratike kwa sababu ya sususu na umbea wako. Nenda zako. Wewe ni bure kabisa!’’ pasta alimfokea mkewe.

Twaarifiwa kwamba, mke wa pasta alifunganya virago vyake na kutokomea kusikojulikana. Aliacha nyuma watoto wawili ambao wanaendelea kutunzwa na baba yao huku kanisa likizidi kushamiri.

…WAZO BONZO…

 

 

Iran yateketeza bendera ya Amerika bungeni

AFP na CHARLES WASONGA

WABUNGE wa Iran walitekeza bendera ya Amerika huku wakiimba “Kifo kwa Amerika” Jumatano ndani ya bunge la taifa hilo.

Walikuwa wakipinga uamuzi wa Rais wa Amerika Donald Trump wa kuondoa taifa lake kutaka mkataba wa kinyuklia unaoshirikisha mataifa kadha.

Picha zilizopeperushwa katika vyombo kadha vya habari nchini Irani zilionyesha mbunge mmoja akipeperusha kijibendera kabla ya kukiteketeza ndani ya ukumbi wa bunge.

Mojtaba Zolnour ambaye ni mbunge wa chama cha Conservative naye mbunge huyo na kuteketeza nakala ya mkataba huo wa kinuklia.

Wabunge wengine waliungana nao wakiimba, “Kifo cha Amerika”, kauli ambayo imeshika kasi miongoni mwa wabunge wa Conservative.

“Mjihadhari msiteketeze bunge,” Spika Ali Larijani alisema.

Maafisa wakuu nchini Iran wamelaani uamuzi wa Trump kuiondoa Amerika katika mkataba huo uliotiwa saini mwaka wa 2015.

Kutiwa saini kwa mkataba huo kulipelekea kuondolewa kwa vikwazo dhidi ya Iran kwa makubaliano kwamba isitishe shughuli za utengenezaji zana za kinyuklia.

Wakati huo huo, mataifa ya bara Uropa yenye uwezo kiuchumi Jumatano yalijitahidi kuokoa mkataba huo baada ya Trump kuondoa Amerika kutoka kwayo na kurejesha vikwazo dhidi ya Iran.

Hatua hiyo ya Trump ilishutumiwa na mataifa kadha ya ulimwengu, kwani huenda ikapelekea ongezeko la fujo katika eneo la Mashariki ya Kati.

Trump aliukosoa mktaba huo wa 2015 kwenye hotuba aliyotoa Jumanne akiwa katika Ikulu ya White House.

Mbinu ilizotumia Safaricom kuzoa faida ya Sh55 bilioni licha ya wimbi la #Resist

Na CHARLES WASONGA

KAMPUNI ya mawasiliano ya Safaricom ilipata faida ya Sh55.29 bilioni, baada ya kutozwa ushuru, katika mwaka wa kifedha uliokamilika Machi 31, 2018, kutoka Sh48.44 bilioni ilizoandikisha mwaka 2017.

Hii ni sawa na ongezeko la faida kwa kima cha asilimia 14.1.

Mapato yake ya jumla pia yaliimarika kutoka 212.9 bilioni mwaka 2017 hadi Sh233.7 bilioni mwaka huu, ongezeko linalowakilisha asilimia 9.8.

“Faida yetu iliendelea kuimarika 2017 licha ya changamoto za kiuchumi, ukame na kupanda kwa joto la kisiasa kufuatia kupindi kirefu cha uchaguzi,” akasema Afisa Mkuu Mtendaji Bob Collymore Jumatano.

“Faida hii ya kima cha asilimia 14.1 inaashiria kuwa Safaricom ilimarisha usamamizi wa rasilimali zake huku ikidumisha huduma kwa wateja wake,” akaongeza afisa huyo Jumatano asubuhi alipohutubia wawekezaji wa kampuni hiyo kupitia teknolojia ya video ya mtandaoni.

Bw Collymore ambaye amekuwa katika likizo kupata nafasi ya kupokea matibabu alitangaza kuwa atarejea kazini hivi karibuni kwani afya yake imeimarika.

“Nasubiri idhini ya madaktari kabla ya kurejea nchini Kenya kuendelea na majukumu yangu,” akasema afisa huyo ambaye aliondoka nchini Oktoba mwaka 2017 kwenda Afrika Kusini kwa matibabu.

Safaricom pia iliungama kuwa hatua ya muungano wa upinzani (NASA) kuchochea wafuasi wake kususia huduma na bidhaa za kampuni hiyo Septemba mwaka 2017 iliathiri mapato yake “japo sio kwa kiwango kikubwa zaidi”.

“Siasa chafu za baada ya uchaguzi mkuu uliopita haswa zilitatiza soko letu la huduma za kupiga simu kati ya mwezi Septemba hadi Desemba 2017,” Bw Collymore akawaambia wawekezaji hao katika makao makuu ya kampuni hiyo, jumba la Safaricom, Westlands, Nairobi.

Sehemu kubwa ya faida ya Safaricom ilitokana na huduma za kupokea na kutuma pesa kupitia simu, maarufu M-PESA, ambayo iliiwezesha kupata jumla ya Sh62.9 bilioni kutoka Sh36.4 bilioni katika kipindi kama hicho 2017.

“Hii ina maana kuwa mapato huduma za M-PESA yaliimarika kwa kima cha asilimia 14.2 katika mwaka wa kifedha uliokamilika Machi 31 mwaka huu.

Huduma hii inachangia asilimia 28 ya mapato ya Safaricom,” Mkurugenzi wa Masuala ya Fedha Sateesh Kamash akasema alipowasilisha takwimu za matoke0 ya faida. Kufikia sasa wateja wa M-PESA wamefikia watu 2.1 milioni.

Bw Kamash alitangaza kuwa Safaricom itatumia kati ya Sh35 bilioni na Sh38 bilioni katika mwaka wa kifedha wa hadi Machi 31, 2019 kwa ajili ya kupanua mitambo yake ya kutoa huduma.

“Katika mwaka wa kifedha hadi 2019 tunatarajia kuimarisha mitandao yetu ya mawasiliano, huduma za data na mipango mingine ya kuiwezesha kampuni kuimarisha huduma zake na faida,” akasema.

Bw Kamath alisema bodi ya wakurugenzi wa Safaricom imeidhinisha mgao (dividends) wa Sh44.1 bilioni kwa wenyehisa wake.

Hela hizi zitalipwa kwa kiwango Sh1.10 kwa kila hisa.

Mashine hizi zinatupotezea hamu ya uroda, wakulima wa chai walia

Na PETER MBURU

VIONGOZI wa wafanyakazi wa kuchuna majani chai wameunga mkono baadhi ya serikali za kaunti ambazo zimo mbioni kuunda sheria kupinga matumizi ya mashine za kuchuna majani chai, ama kuzitoza ushuru wa juu.

Wasema mashine hizo zimeleta hasara kuu ya kiuchumi na kiafya kwa wafanyakazi na kwamba, sasa wanaume wanaozitumia wameshindwa kutekeleza majukumu yao ya chumbani na kuwakolesha wapenzi wao tendo la ndoa.

Waliunga mkono serikali za kaunti Nandi na Kericho ambazo zinasemekana kuandaa miswada itakayohitaji mashine hizo kulipiwa ushuru na kuharamishwa kabisa.

Wakihutubia wanahabari mjini Nakuru jana, viongozi hao walisema kumeripotiwa visa vya wanaume wanaotumia mashine hizo kupoteza makali yao chumbani, mbali na kukumbwa na matatizo ya mgongo na kichwa.

“Wafanyakazi wanahitajika kubeba mashine kwa saa nyingi na hivyo wanaishia kuathirika na msukosuko wake kiafya.

Visa vya shida za mgongo, kichwa na hamu ya mapenzi kwa watumizi kwenda chini na hivyo kushindwa kutosheleza wapenzi wao vimeripotiwa,” akasema katibu mkuu mshirikishi wa wafanyakazi wa mashamba makubwa na kilimo nchini (KPAWU) Henry Omasire.

Kulingana na viongozi hao, kaunti ya Nandi inaandaa mswada utakaotoza ushuru mashine hizo, ilhali Gavana wa Kericho Paul Chepkwony naye yuko mbioni kulitaka bunge la kaunti yake kutunga sheria kuharamisha utumiaji wa mashine hizo.

Walisema hatua za kaunti hizo zitawaokoa wafanyakazi wengi masikini ambao wameathirika tangu mashine hizo ziagizwe nchini.

Walidai wafanyakazi 10,000 wamepoteza kazi tangu 2006, mbali na madhara ya kiafya.

Hii, waliongeza, ni kando na kuhatarisha usalama wa miji iliyoko karibu na mashamba ya majani chai.

 

Ajuta kumbaka mpenziwe wa zamani

Na BENSON MATHEKA

MWANAMUME aliyekabiliwa na shtaka la kumbaka mpenzi wake wa zamani, alipatikana na hatia ya kumshambulia mwanadada huyo na kutozwa faini ya Sh30,000.

Paul Angweny atafungwa jela mwaka mmoja iwapo hatalipa faini hiyo aliyotozwa na Hakimu Mkuu Mwandamizi wa Kibera Barbara Ojoo. Mahakama haikumpata na hatia ya kumbaka mwanamke huyo ilivyodaiwa lakini ikampata na hatia ya kumjeruhi kimaksudi.

Angweny aliambia mahakama kwamba, mwanamke huyo alikuwa mpenzi wake wa zamani lakini akakanusha kwamba alifanya mapenzi naye bila hiari yake akimtisha kwa kisu.

Ilidaiwa kwamba alitenda kosa hilo Januari 31, 2013 mtaani Kabiria eneo la Dagoreti jijini Nairobi.

Kwenye ushahidi wake, mwanamke huyo alieleza mahakama kwamba, mshtakiwa alimvizia kwa njia na kumpiga kabla ya kumsukuma hadi nyumbani kwake ambapo alimbaka. Alidai kwamba mshtakiwa alimtisha kwa kisu ambacho pia alitumia kumtisha jirani aliyeenda kumuokoa.

“Alimweleza jirani huyo kwamba nilikuwa mpenzi wake na hakufaa kuingilia. Jirani huyo aliondoka alipogundua kwamba alikuwa na kisu,” alisema mwanamke huyo.

Angweny alikanusha madai hayo akisema alisingiziwa makosa alipotofautiana na mwanamke huyo.

Akimhukumu kwa kosa la kupiga na kujeruhi, hakimu alisema kulingana na ushahidi uliotolewa kortini, ilikuwa wazi kwamba mshtakiwa alikuwa amepanga kumdhuru mlalamishi.