Kocha wa Harambee Starlets Beldine Odemba amesema bado hawajapoteza matumaini ya kutinga robo-fainali za Kombe la Mataifa ya Afrika kwa Wanawake (WAFCON) licha ya kichapo cha 4-0 na wenyeji Morocco katika mechi yao ya kwanza ya Kundi A Jumapili usiku mjini Rabat.

Kenya sasa italazimika kushinda mechi zake mbili zilizosalia dhidi ya Senegal Alhamisi na Algeria Agosti 3 ili kufufua matumaini ya kupiga hatua.

“Hatukutarajia matokeo haya. Tulianza vizuri lakini tukapoteza umakini baada ya kufungwa. Bado tuna mechi mbili na nafasi ipo. Lazima turekebishe makosa yetu hasa kwenye mipira ya adhabu na mashambulizi ya kushtukiza,” alisema Odemba.

Aliongeza kuwa benchi ya ufundi itachambua mchezo wa Senegal kabla ya pambano la Alhamisi, akisisitiza kuwa Kenya bado ina nafasi ya kufuzu.

Kocha wa Morocco Jorge Vilda, aliyeiongoza Uhispania kutwaa Kombe la Dunia  la Wanawake 2023, aliisifu Kenya akisema imeimarika pakubwa tangu ilipopoteza 5-0 kwenye mechi ya kirafiki mwaka jana.

“Kenya ni timu tofauti kabisa. Wamepiga hatua kubwa na walitupa ushindani mzuri,” alisema Vilda.

Aliwataja kipa Lilian Awuor, mshambuliaji Teresa Engesha, kiungo Fasila Adhiambo na nahodha Mwanahalima Jereko kuwa miongoni mwa waliomvutia zaidi.

Morocco ilitawala mchezo tangu mwanzo na kufunga kupitia Sakina Ouzraoui (dakika ya 19), Maryame Atiq (28) na Ibtissam Jraïdi aliyefunga mabao mawili.

Kenya ilipata nafasi kupitia Teresa Engesha na Valerie Nekesa lakini ikashindwa kuzitumia, huku Awuor akiokoa mabao kadhaa yaliyoizuia Morocco kupata ushindi mkubwa zaidi.

Baada ya duru ya kwanza ya Kundi A, Morocco na Algeria zinaongoza zikiwa na pointi tatu kila moja, huku Kenya na Senegal zikiwa bado hazina pointi.

Starlets sasa italazimika kuifunga Senegal ili kuendelea kuwa na matumaini ya kutinga robo fainali.