JUNIOR Stars inahitaji ushindi mmoja tu, kufuzu kwa Kombe la Mataifa ya Afrika (AFCON) 2026 la wachezaji chini ya miaka 17, wanapokutana na Tanzania leo katika nusu fainali Uwanjani Abebe Bikila, Addis Ababa nchini Ethiopia kuanzia saa mbili usiku.

Mapema katika uwanja huo huo, Ethiopia itapambana na Uganda saa kumi na moja jioni katika nusu fainali nyingine.

Washindi hao wawili na timu itakayomaliza nafasi ya tatu watafuzu kwa AFCON nchini Morocco. Tarehe za michuano hiyo bado hazijatangazwa.

Stars walifikia hatua hii baada ya kumaliza katika nafasi ya pili kwenye Kundi A wakiwa na alama saba, tatu nyuma ya Ethiopia.

Kenya ilitoka sare ya 1-1 na Somalia na kupata ushindi dhidi ya Rwanda (2-1) na Sudan Kusini (2-0), lakini ilipoteza 1-0 dhidi ya Ethiopia.

Kwa upande mwingine, Tanzania iliongoza Kundi B kwa pointi 12 bila kupoteza. Waliwashinda Uganda 2-1, Sudan 6-0, Burundi 5-0, na kuwanyeshea Djibouti 11-0.

Tanzania imekuwa na ufanisi mkubwa katika mashindano hayo, ikifunga mabao 24 na kuruhusu bao moja tu, ikilinganishwa na Kenya ambao wamefunga mara tano na kuruhusu mabao mawili.

Kocha wa Stars, William Muluya, anasema wako tayari kupambana katika fainali hii kabla ya fainali.

“Mshindi anafuzu moja kwa moja kwa AFCON. Tunaelewa tunakabiliana na mpinzani mgumu ambaye anapigiwa upato sana kushinda kushinda, lakini dakika 90 zitaamua,” alisema Muluya.

Alisema pia kwamba, “Maambukizi ya mafua yamewaathiri wachezaji wengi, lakini madaktari wa timu wanafanya juhudi zao. Pia, wachezaji kadhaa wana majeraha madogo, ikiwa ni pamoja na baadhi ya wachezaji muhimu, na ingawa wanaweza wasianze, wataanza benchi.”

“Tunafurahi kufikia hatua hii, ambayo tumekuwa tukisubiri sana. . Tunakabiliana na ndugu zetu, Kenya, na ni jambo la kitaifa huku kila mtu akijiandaa. Timu bora na ishinde,” alisema Elieneza Nikolaus kocha wa Tanzania.