MABINGWA mara nne wa Ligi Kuu ya Wanawake (KWPL), Vihiga Queens, wameendelea kukumbwa na masaibu baada ya kuchapwa 2-0 na Kayole Starlets katika uwanja wa Mumias Sports Complex, kaunti ya Kakamega, jana.

Kichapo hicho kilikuwa cha tano mfululizo kwa Vihiga msimu huu, kikiwaacha mkiani mwa jedwali bila alama yoyote.

Kikosi hicho kinachonolewa na kocha Boniface Nyamunyamuh pia kimekuwa miongoni mwa timu zilizofungwa mabao mengi zaidi, kikiruhusu nyavu zake kutikiswa mara 12. Elim White na Bungoma Queens ndizo zimefungwa mabao mengi zaidi (13) kila moja.

Vihiga walianza msimu kwa kichapo cha 3-1 dhidi ya Kayole Starlets, kabla ya kupoteza 2-0 dhidi ya Kibera Soccer Women, 3-0 dhidi ya Gideon Starlets, 2-1 dhidi ya Ulinzi Starlets na 3-1 dhidi ya Mathare United Women.

Katika mechi nyingine ya jana, Bungoma Queens walipokea kichapo cha 3-1 nyumbani dhidi ya Trinity Starlets.

Huku vita vya kuwania kilele cha jedwali vikiendelea kushika kasi, Ulinzi Starlets waliendeleza ubabe wao kwa kuicharaza Elim White 4-0 Ijumaa.

Fowadi Siliya Rasoha alifunga mabao mawili dakika za sita na 55, huku Quinter Adhiambo na Margaret Melitus wakiongeza mengine dakika za 74 na 83.

Mabingwa watetezi Kenya Police Bullets nao walipata ushindi wa 4-0 dhidi ya Mathare United Women katika uwanja wa Police Sacco, jijini Nairobi, Jumamosi.

Mshambuliaji Irine Madalina alifunga mabao mawili, huku Lorn Nyabutio na Lydia Akoth wakifunga bao moja kila mmoja.

Ulinzi Starlets na Kenya Police Bullets wana pointi 15 kila mmoja, lakini Bullets wana tofauti bora ya mabao.

Katika mechi nyingine, Kibera Soccer Women waliwashinda Gideon Starlets 2-0, huku Zetech Sparks na Shabana Starlets zikitoka sare ya 1-1.

Matokeo

Ulinzi Starlets 4-0 Elim White

Gideon Starlets 0-2 Kibera Soccer Women

Police Bullets 4-0 Mathare United Women

Zetech Sparks 1-1 Shabana Starlets

Vihiga Queens 0-2 Kayole Starlets

Bungoma Queens 1-3 Trinity Starlets