MOMBASA JIJINI

MWANADADA anayefanya kazi katika ofisi moja mjini hapa alimfokea mdosi wake aliyejaribu kumbusu na kumlaumu kwa kuvuka mpaka.

Inasemekana meneja huyo alikuwa akimmezea mate demu huyo na mara kwa mara alikuwa akimrushia mistari ambayo alihepa kwa ujanja. Siku ya kisa, demu alienda kwa ofisi ya meneja kusaka ushauri kuhusiana na kazi naye jamaa akamchangamkia.

Alimsalimia na kumsongea akitaka kumpiga busu ila demu akamkomesha kwa kufoka.

“Unafikiri unafanya nini? Sasa umevuka mpaka na sasa unanikosea heshima. Hapa nilikuja kazi na si kuchepuka na waume wa watu.”

“Iwapo unaona kazi yangu haitoshi, naenda kwa mwenye kampuni kumweleza aniongezee jukumu la ziada la kukuburudisha,” demu aliwaka na kuvutia wafanyakazi wenzake.

Meneja alimuomba radhi na nusura ampigie magoti ili asimripoti kwa mwenye kampuni.