WAGOMBEAJI wawili waliobwagwa katika uchaguzi mdogo wa Novemba 27, 2025, Seth Panyako wa Malava na Philip Aroko wa Kasipul wamedai kulikuwa na dosari nyingi na ukiukaji wa sheria za uchaguzi.

Bw Seth Panyako aliyegombea kwa tiketi ya DAP- Kenya alikosoa vikali matokeo ya uchaguzi huo akidai kuwa kulikuwa na ukiukaji mkubwa wa sheria za uchaguzi katika vituo 54.

Panyako aliilaumu serikali kwa, kile alichodai, kuhusika kuchochea vurugu katika eneo la Malava ili kumtisha pamoja na wafuasi wake, kwa nia ya kuwafanya wasipige kura.

Mgombea huyo pia aliwashukuru wafuasi wake kwa kusimama imara licha ya madai ya vitisho, vurugu na hata njama za kuhatarisha maisha yake.

Bw Aroko, mgombeaji huru katika eneobunge la Kasipul, aliwashukuru wafuasi wake wote, akisema kuwa kampeni zilionyesha kiwango cha juu cha kujitolea kwa wananchi.

Katika taarifa hiyo, Aroko alisema licha ya changamoto nyingi, uzalendo wa wananchi ulifanya kila hatua kuwa ya maana.

“Kwa wananchi wangu wapendwa wa Kasipul na wafuasi kote nchini, ninawashukuru kwa dhati kwa upendo na uungwaji mkono wa kweli,” Aroko alisema.

Mwanasiasa huyo alitambua alichotaja kama kujitolea kwa wafuasi wake licha ya changamoto tele wakati wa kampeni.

“Safari hii imekuwa ushahidi wa kujitolea kwenu. Ingawa njia ilikuwa na changamoto, roho yenu ya kujituma ilifanya kila hatua kuwa ya thamani. Nimeguswa sana na ari yenu kuu na kujali kwenu kwa dhati,” alisema.