KINARA wa Mawaziri Musalia Mudavadi ameomboleza mauti ya watu 38 ambao waliaga dunia kwenye ajali ya ndege ya Shirika la Azerbaijan.

Bw Mudavadi ambaye ni Waziri wa Mashauriya kigeni, alisema Kenya inasimama na familia ambazo zilifiwa na wapendwa wao.

Aliombea familia hizo subira na amani ya mwenyezi Mungu kipindi hiki kigumu cha kuomboleza.

Pia waziri huyo alizitakia afueni ya haraka manusura 29 wa ajali hiyo iliyotokea karibu na Aktau, Kazakhstan siku ya Krismasi.

Ndege hiyo ilikuwa imetoka Baku Azerbeijan ikielekea Grozny kule Urusi.

“Tunaomboleza na familia ambazo zilifiwa na kupoteza wapendwa. Kwa manusura, tunawatakia afueni ya haraka,” akasema Bw Mudavadi kwenye ujumbe wa risala za rambirambi.

Ndege hiyo J2-8243 ilishika moto ilipojaribu kutua ghafla karibu na jiji la Kazakh kule Aktau. Ilikuwa ikielekea Grozny lakini ikaelekezwa kutokana na ukungu.