WAANGALIZI huru walitambua dosari nyingi za taratibu, visa vya hapa na pale vya vurugu na vikwazo vilivyotia doa uaminifu wa kura hizo.

Lakini Mwenyekiti wa Elections Observation Group (ELOG), Victor Nyongesa, alionya kuwa chaguzi za Alhamisi zilionyesha udhaifu ambao nchi lazima ikabili kabla ya Uchaguzi Mkuu wa 2027.

“Siri ya kura ilikiukwa katika vituo vingi kuliko inavyokubalika. Wakati wapiga kura wanapopiga picha karatasi za kura ndani ya vituo, hatari ya kulazimishwa au kununuliwa kura huwa halisi sana.”

Hata hivyo, Katibu Mkuu wa UDA, Hassan Omar, alisema matokeo ya chaguzi hizo ndogo ni muhuri wa kuidhinisha serikali ya Kenya Kwanza.

“Matokeo haya yanaonyesha bila shaka kwamba serikali jumuishi ndiyo Wakenya wanataka,” Omar alisema wakati wa kikao cha wanahabari katika makao makuu ya chama.

Bw Omar, alisema chaguzi hizo ndogo hazikuwa mashindano ya maeneo, bali kipimo cha joto la kisiasa nchini; kura ya maoni ya katikati ya muhula kuhusu sera, wigo wa kisiasa na ahadi ya utulivu ya serikali ya Ruto.

Lakini huku UDA ikisherehekea mafanikio yake, ELOG ilitoa ripoti ya awali ikionya kuwa chaguzi hizo ziligubikwa na vurugu, vitisho na mapungufu ya mifumo ya usimamizi wa uchaguzi.

“Tunasikitishwa na visa vya vurugu, watu wasioidhinishwa kuingia vituoni na ukiukaji wa usiri wa kura katika kaunti kadhaa,” Bw Nyongesa alisema. “Ingawa matukio haya hayakutokea kila mahali, yanaonyesha udhaifu unaopaswa kushughulikiwa haraka.”

ELOG ilituma waangalizi 100 waliotembea vituo mbalimbali katika kaunti saba, wakifuatilia vituo 46 wakati wa kufunguliwa, 97 wakati wa kupiga kura na 21 wakati wa kufungwa na kuhesabu.

Kati ya hivyo, asilimia 93 ya vituo vilitathminiwa kuwa vizuri au vizuri sana, huku asilimia 6.6 vikitajwa kuwa na matatizo.

Idadi ya wapiga kura ilibaki chini ya asilimia 50 katika vituo vingi vilivyofuatiliwa. ELOG ilisema kuwa upigaji kura kwa kusaidiwa ulikuwa kwa wingi, ukiripotiwa katika takribani thuluthi mbili ya vituo, na ikabainisha kutotimizwa kikamilifu kwa taratibu za usiri wa kura, jambo lililoibua wasiwasi kuhusu makundi yaliyo hatarini.