MAHAKAMA ya Mazingira na Ardhi imeamuru Serikali ya Kaunti ya Mombasa kuwalipa zaidi ya wakazi 200 wa eneo la Mwakirunge fidia ya Sh350 milioni kutokana na ukiukaji wa haki yao ya kuishi katika mazingira safi na salama uliosababishwa na uchafuzi kutoka jaa la taka eneo hilo.

Katika uamuzi wake, Jaji Lucas Naikuni alisema wakazi hao, wakiongozwa na mwanaharakati wa mazingira Ainea Ragen, walithibitisha kuwa jaa hilo limekuwa likasababisha madhara ya muda mrefu kwa maisha yao.

Jaji huyo alibaini kuwa Serikali ya Kaunti ya Mombasa pamoja na Mamlaka ya Kitaifa ya Kusimamia Mazingira (NEMA) walishindwa kuchukua hatua za kutosha kuzuia na kudhibiti uchafuzi wa mazingira unaotokana na shughuli za jaa  la Mwakirunge.

“Jaaa la Mwakirunge limekuwepo kwa muda mrefu na bado linaendelea kufanya kazi hadi leo. Hivyo basi haki ya wakazi ya kuishi katika mazingira safi na yenye afya inaendelea kukiukwa,” alisema jaji huyo.

Mahakama ilisema ushahidi uliowasilishwa ulionyesha kuwa hatua na uzembe wa maafisa ulisababisha madhara ya kimazingira na kukiuka Kifungu cha 42 cha Katiba, kinachohakikisha kila mtu ana haki ya mazingira safi na yenye afya.

Mbali na fidia hiyo, mahakama pia imeamuru kaunti hiyo kuanza mara moja ujenzi wa ukuta wa simiti  kuzunguka jaa hilo. Ukuta huo unatakiwa kuwa na urefu wa angalau mita sita, uwe na milango salama ya kuingilia na kutoka.

Kaunti imepewa muda wa miezi 12 kukamilisha kazi hiyo na pia kuweka walinzi wa kutosha pamoja na mfumo wa kudhibiti watu wanaoingia katika eneo hilo.

Aidha, mahakama imeagiza serikali ya kaunti kuandaa na vifaa vya kisasa vya kuchoma taka vinavyokidhi viwango vya kimataifa vya afya na usalama.

Hata hivyo, jaji alikataa ombi la wakazi kutangaza kipande hicho cha ardhi ya ekari 50 kuwa ardhi ya jamii, uamuzi uliomaanisha kuwa jaa hilo halitahamishwa kwa sasa.