Na THOMAS MATIKO

JINA lake la kuzaliwa ni Eric Marlon Bishop, jina ambalo ukiwatamkia mamilioni ya mashabiki wake, utawachanganya sana mpaka pale utamwita Jamie Foxx.

Foxx ni mdau mkubwa wa burudani akiwa amejaliwa vipaji chungu nzima vinavyomfanya kuwa katika levo ya juu sana kwenye ulimwengu wa showbiz.

Ni mwigizaji stadi, mtunzi mzuri wa mashairi, mwimbaji, produsa, na chale kwa maana kuwa anachekesha.

Vipaji vyote hivi yeye huvitumia kila anapopata fursa na matokeo yake yamekuwa ni kumwezesha kupiga hela za nguvu na pia kuwa maarufu.

SAFARI YA SANAA

Foxx mwenye umri wa miaka 49 alizaliwa 1967 kule Texas na kwa bahati mbaya hakulelewa na wazazi wake ila babu na nyanya yake.

Sanaa alianza mwaka 1989 wakati wengi wa mashabiki wake wakiwa wanazaliwa.

Baada ya miaka miwili pekee nyota yake ikaanza kung’aa. Alipata shavu la kujiunga na kipindi cha kichekesho In Living Color na baada ya muda mfupi Foxx alianzisha kipindi chake cha kichekesho The Jamie Foxx Show kilichodumu toka 1996 hadi 2001.

Toka hapo, Foxx alitokea kwenye filamu kadhaa fupi fupi hatua iliyomjenga na kumwezesha kuanza kupata shavu la kuigiza filamu kubwa kubwa.

Wakati akiendelea na mchakato huo, pia alikuwa akijishughulisha na muziki. Mpaka wa leo anazo albamu tatu zilizofanya vyema kando na kuwa na Stand Up comedy tatu alizofanya na zikatesa.

KIPOCHI

Unapozungumzia uwezo wake wa kifedha, Foxx anaorodheshwa kati ya waigizaji wa asili nyeusi wanaopiga mkwanja mnene duniani.

Miaka miwili iliyopita jarida la Atlanta Black Star, lilikadiria utajiri wake kuwa wa dola 85 milioni (Sh8.6 bilioni) na kumworodhesha katika nafasi ya nne kwenye listi ya waigizaji weusi wanaovuta senti ndefu.

Takwimu hizo zimepanda na kufikia mwaka huu, utajiri wake umekadiriwa kufikia dola 100 milioni kwa mujibu wa jarida la Forbes.

Hela zake anazipiga upande mbili, akiachia filamu na pale anapoachia ngoma. Kutokana na muziki tu, Foxx ametengeneza zaidi ya dola 4 milioni huku kipato chake kikubwa kikitokana na filamu kibao alizoigiza na kufanya vyema.

MAKAZI

Foxx anaishi kistaa, nyumbani kwake ni kama vile ranchi. Mjengo wake uitwao Ventura Mansion aliununu kwa dola 8 milioni (Sh813, milioni). Una dimbwi la kuogelea, uwanja wa tenisi, jumba la michezo, gym na sifa zingine za nyumba ya kitajiri.

USAFIRI

Anasukuma Rolls Royce lenye thamani ya dola 250,000 na pia ana Bugatti Veyron lililomgharimu dola 1.5 milioni.

Ukiachana na michuma hiyo miwili anamiliki Lamborgini.

MAHUSIANO

Kwa sasa anatoka kimahusiano na kichuna mwigizaji Katie Holmes.

Wawili hao wanaripotiwa kuwa kwenye mahusiano ya kisirisiri kwa kipindi cha miaka mitano mpaka sasa walipoamua kuyaanika waziwazi.

Hili linasemekana limetokana na talaka ya Holmes kwa mwigizaji mwenzake Tom Cruise ambaye walipotengana aliomba mahakama imzuie kichuna huyo kuweka mahusiano yake yajayo hadharani kwa kipindi cha miaka mitano.

Cha kufurahisha ni kuwa, Foxx anatoka na mke wa zamani wa Cruise ambaye waliishia kuwa washikaji baada ya kuigiza kwenye movi moja.

Hivi majuzi Foxx alikiri wazi wazi kuwa, anapata maisha ya mahusiano kuwa magumu sana kwa sababu ya usumbufu anaoupata kutoka kwa mademu wengi wanaomwona kuwa mtu mdogo sana wakati yeye umri ukizidi kumsonga.

Kabla ya kuanza kutoka na Holmes, Foxx alikuwa kwenye mahusiano na mwanamke Connie Kline ambaye ni mama wa mtoto wake wa kwanza Corrinne Foxx.

Walipoachana akampata mwanamke mwingine ambaye amekuwa akibana jina lake na kuzaa naye binti yake wa pili.

SWAG

Licha ya uzee wake, Foxx ni mkali wa kutupia pamba kalikali.

Staili yake itakupendeza muda wowote ule utakapokutana naye.

Licha ya kuwa wakati mwingine hujiachia kwa tisheti na jeans, muda mwingi utamkuta kwenye suti za kubana zinazomwacha na mwonekano wa bishoo asiyejua shida.