France 24 yaungana na Signet kufaidi wenye runinga za dijitali

Na CECIL ODONGO

SHIRIKA la Habari la Kimataifa la France 24 limetia saini makubaliano na mawimbi ya Signet ili kupeperusha matangazo yake kwa lugha ya Kiingereza kupitia runinga za dijitali.

Makubaliano hayo yataiwezesha chombo hicho cha habari kufikia zaidi wakenya 2.3 milioni hapa nchini.

Japo wamedumu humu nchini tangu mwaka wa 2009 shirika hilo limekuwa likipeperusha matangazo yake kwa Kiswahili kupitia Radio France International katika miji ya Mombasa na Nairobi kupitia mawimbi ya FM.

“Tumekuja Kenya siyo kwa sababu tunalenga biashara au kutoa ushindani kwa vyombo vingine vya habari. Lengo letu ni ni kufikia watazamaji wengi na kuwajulisha kuhusu matokeo yote duniani,” akasema Mkurugenzi Mkuu Jean-Emmanuel Casalta anayesimamia mikakati na maendeleo katika shirika hilo.

Hata hivyo alisisitiza kwamba chombo hicho kipya kitashirikiana na vyombo vya habari vya nyumbani katika maswala muhimu yanayoathiri jamii na nchi kwa jumla.

“Sisi hatutapiginia nafasi ya kupeperusha matangazo ya kibiashara kwa kuwa nia yetu si kufaidi kifedha ila tutaangazia mambo ibuka yanayoathiri jamii na taifa hili,” akasema.

Afisa huyo pia alisisitiza kwamba kwa kuanzisha televisheni hiyo kwa lugha ya kingereza wanalenga kuimarisha uhusiano kati ya Kenya na mataifa ya Magharibi mwa Afrika ambako lugha ya kifaransa huzungumzwa mno.

Kwa sasa France 24 inapatikana kupitia Zuku, Azam, Starsat na satelaiti za NSS 12 na SES 5. Inapeperusha habari zake katika zaidi ya nchi 150 na inakadaria watazamaji wake kutoka bara la Afrika huwa 29 milioni.

Lugha za Kiarabu, Kihispania, Kifaransa pia hutumika kupeperusha matangazo ya shirika hilo ambalo lina wanahabari 430 kote duniani.

 

Sonko akanusha mipango ya kujiuzulu kwa kulemewa na kazi ya ugavana

Na WYCLIFFE MUIA

GAVANA wa Kaunti ya Nairobi Mike Sonko Jumatano alikanusha taarifa kuwa anapanga kujiuzulu kutokana na changamoto anazokumbana nazo katika uongozi wake.

Kupitia mtandao wake wa Twitter, Sonko alikashifu vyombo vya habari kwa kueneza propaganda kuwa anapanga kujiuzulu kama gavana wa Nairobi.

Habari zilizodaiwa kuchapishwa katika mtandao wake wa Facebook zilisambaa zikisema gavana huyo anaendelea kusaka ushauri kuhusu uamuzi wake wa kujiuzulu.

“Mjue hii kazi imekuwa ngumu (na) iko karibu kunishinda. Na sio mambo ya bendera. Hizo nimekubali kutoa kama nilivyoshauriwa na (Katibu wa Usalama wa Ndani) Karanja Kibicho lakini nitawaambia hivi karibuni ni kwa nini nataka kung’atuka mnishauri. Isiwe kama yule ndugu yangu alihepa bila kusaka ushauri,” taarifa iliyodaiwa kuchapishwa katika Facebook yake ilinukuu.

Inaaminika usemi wa ‘ndugu yangu aliyehepa bila kusaka ushauri’ Sonko ulirejelea naibu wake Polycarp Igathe ambaye alijiuzulu mnamo Januari 13, kwa misingi kuwa hangeweza kuaminiwa na gavana huyo.

Hata hivyo, kupitia akaunti yake ya Twitter Jumatano, Sonko alisema yeye anajishughulisha na uchapa kazi na wala hana nia ya kuacha kazi ya ugavana.

“Wacheni propaganda ya pesa nane ati nataka kujiuzulu. Uzeni stori zenu wachaneni na mimi nifanye kazi,”aliandika Sonko.

Mapema wiki hii baadhi ya viongozi wa eneo la Mlima Kenya, walimshtumu Sonko, kwa kudai kwamba wanasiasa wa eneo hilo wanapanga kuhujumu azma ya Naibu Rais William Ruto ya kutwaa urais 2022.

Vyama vya Ford-K na ANC kuvunjwa kuunda chama kimoja

LEONARD ONYANGO na GAITANO PESSA

VIONGOZI kutoka eneo la Magharibi wamedokeza mpango wa kutaka kuvunjilia mbali vyama vya Amani National Congress (ANC) na Ford-Kenya ili kuunda chama kipya watakachotumia katika uchaguzi wa 2022.

Viongozi hao wakiongozwa na Katibu Mkuu wa Ford-Kenya, Eseli Simiyu, Naibu Kiongozi wa ANC Ayub Savula, mbunge wa Butere Tindi Mwale, mbunge wa Nambale Sakwa John Bunyasi na mbunge wa Emuhaya Omboko Milemba walisema hatua hiyo inalenga kuunganisha jamii ya Waluhya.

Wanasiasa hao waliokuwa wakihutubia wanahabari jijini Nairobi walisema jamii ya Waluhya imechoka kutumiwa vibaya na wanasiasa kutoka nje na kisha kutelekezwa.

“Kwa muda mrefu jamii ya Waluhya imekuwa ikitumiwa na wanasiasa kutoka nje na kisha kututelekeza,” akasema Bw Eseli.

Mbunge huyo wa Tongaren alisema viongozi wote ambao sasa wako katika vyama vya ANC na Ford Kenya watajiunga na chama kipya kitakachokuwa na sura ya kitaifa.

Alisema baadhi ya wabunge waliochaguliwa kupitia vyama vya ODM na Jubilee katika ukanda wa Magharibi tayari wameunga mkono pendekezo la kutaka kubuniwa kwa chama kipya kitakachounganisha jamii ya Waluhya.

Tayari kiongozi wa ANC Musalia Mudavadi na mwenzake wa Ford-Kenya wameanza mchakato wa kuunganisha Waluhya huku wakimshutumu kinara wa ODM Raila Odinga kwa kuhadaa na kusaliti jamii hiyo.

 

Adui wa Raila

Bw Wetang’ula amegeuka kuwa adui wa Bw Odinga tangu alipong’olewa kutoka wadhifa wa Kiongozi wa Wachache katika Seneti na nafasi hiyo kuchukuliwa na Seneta wa Siaya James Orengo.

Uhasama baina ya ODM na vyama vingine vilivyomo katika mwavuli wa NASA, ANC, Wiper na Ford-Kenya ulizuka baada ya Bw Odinga kutoroka vinara wenzake na kutangaza kufanya kazi na Rais Uhuru Kenyatta.

“Jamii ya Waluhya imekuwa ikichukuliwa kama watu waliotengana, lakini tunataka kuonyesha kuwa tunaweza kuungana na kuzungumza kwa sauti moja. Tunaonya vikali wanasiasa ambao wamekuwa wakitugawanya,” akasema Bw Eseli.

Ikiwa vyama vya ANC na Ford Kenya vitavunjiliwa mbali inamaanisha kuwa huo utakuwa mwisho wa muungano wa NASA.

Walitoa kauli hiyo huku Gavana wa Busia Sospeter Ojaamong’ akisema yuko tayari kufanya kazi na Rais Uhuru Kenyatta na kinara wa muungano wa upinzani Raila Odinga kwa manufaa ya wakazi.

 

Kuzika tofauti

Viongozi hao wawili hasimu Februari waliamua kuweka kando tofauti zao za kisiasa na kukubaliana kushirikiana ili kuleta utangamano nchini hasa baada ya kipindi kirefu cha siasa mwaka jana.

Bw Ojaamong ambaye alipongeza hatua ya wawili hao kushirikiana, alisema msimu wa siasa ulimalizika.

Akizungumza baada ya kuzindua mradi wa maji wa Sh 30 milioni katika eneo bunge la Budalangi, Bw Ojaamong alitoa wito kwa Rais Kenyatta kutochagua viongozi walioshindwa uchaguzini kujaza nyadhifa muhimu.

“Iwapo mtu alitemwa na wananchi sioni haja ya rais kumpa wadhifa mwingine. Ni vyema rais awateue watu wengine wanaoweza kuwajibika ipasavyo,” akasema.

Kauli yake huenda iliwalenga wabunge wa zamani Paul Otuoma (Funyula), Ababu Namwamba (Budalangi), Mary Emaase (Teso Kusini), Arthur Odera (Teso Kaskazini) na Michael Onyura (Butula).

Baadhi ya wabunge hao waliapa kufanya kazi na chama tawala cha Jubilee. Tayari Bw Ababu aliteuliwa na Rais katika wizara ya maswala ya nje.

 

Aliyetandika babake aambia korti kuwa yeye ni wazimu

Na TOTUS OMINDE

KULIKUWA na kicheko mahakamani Eldoret wakati mwanamume ambaye anakabiliwa na mashtaka ya kumpiga na kumjeruhi babake kudai kuwa yeye ni kichaa. 

Mwanaume huyo aliambia mahakama kuwa alimpiga babake baada ya viwango vyake vya wazimu kupanda.

Isaac Kipruto Mutai ambaye anakabiliwa na mashtaka ya kumpiga na kumjeruhi babake aliambia mahakama kuwa akili yake si timamu ambapo alikuwa akitumia dawa ya kupunguza makali ya matatizo ya kiakili.

Huku akiongea Kiingereza kwa ufasaha alionya, kuwa iwapo atazuiliwa rumande atasababisha uharibifu mkubwa  endapo viwango vya wazimu vitapanda.

Mutai alikuwa akijitetea mbele ya msajili wa mahakama mjini Eldoret Bi Mildred Munyekenye.

Alipoulizwa na msajili wa mahakama ni vipi alijua kuwa ana akili isiyo timamu, alisema anajifahamu vyema kuliko mtu mwengine yeyote.

“Mheshimiwa usipumbazwe na ufasaha wangu wa Kiingereza. Mimi ni wazimu. Naweza nikabadilika wakati wowote na kusababsiha uharibifu hata hapa mahakamani,” alisema mshtakiwa.

Mahakama iliambiwa kuwa mshtakiwa alivamia babake mnamo tarehe 23 katika kijiji cha Segero Eldoret Magharibi ambapo alimsababishia majeraha.

Vile vile alikabiliwa na shtaka jingine la kujaza shimo la choo ambacho babake alikuwa amekodisha vijana kumchimbia ambacho kilikadiriwa kugharimu kima cha shilingi 5,000.  Alikiri mashtaka yote.

Kesi hiyo itatajwa mnamo Aprili 16 baada ya mahakama kupokea ripoti kutoka kwa idara kifungu cha nje ili kubaini aina ya kifungo ambacho atafungwa.
 

KDF bandia kortini kwa kuibia mpenziwe Sh36,000

Na RICHARD MUNGUTI

MWASHI aliyejifanya kuwa afisa wa Jeshi (KDF) na kumwibia mpenzi wake Sh36,000 na simu ya rununu alishtakiwa Jumatano.

Lakini Bw Dennis Makori Isaboke aligeuza maneno alipofikishwa mbele ya hakimu mwandamizi Bw Kennedy Cheruiyot na kufichua kwamba “walikosana na mpenzi wake kisha akamweleza kwamba atalilia kwa choo ndipo ajue majuto ni mjukuu.”

Bw Isaboke alimweleza Bw Cheruiyot akiomba aachiliwe kwa dhamana: “Naomba hii mahakama iniwie radhi kwa vile nilitishwa na mlalamishi katika hii kesi kwamba nitajuta kwa kutofautiana naye. Bi Lydia Moraa Onchwangi ni mpenzi wangu. Tumekuwa tukichumbiana lakini tulipokosana alinitisha akinieleza nitaona cha mtema kuni.”

Bw Isaboke alimweleza hakimu kwamba alifikiria Bi Onchwangi alikuwa anamtania kumbe alikuwa “ akimaanisha atanitoa jasho kweli kweli.”

Mshtakiwa aliomba korti imwachilie kwa dhamana isiyo ya kiwango cha juu cha pesa kwa vile mimi “ ni mjenzi wa nyumba na sina mapato ya juu.”

Mshtakiwa huyo aliendelea kueleza mahakama kwamba ameshangazwa na kutimizwa kwa vitisho hivyo na Lydia ambaye wamekuwa marafiki kwa muda mrefu.

“ Naomba hii mahakama iniachilie kwa dhamana ndipo niendelee kumsaidia mama yangu mkongwe pamoja na ndugu zangu wanaosoma shule ya Sekondari,” alisema Bw Isaboke.

Kiongozi wa mashtaka Bi Cynthia Opiyo hakupinga ombi la kuachiliwa mshtakiwa kwa dhamana.

“Dhamana ni haki ya mshtakiwa. Sipingi akiachiliwa. Uchunguzi umekamilishwa na nitampa mshtakiwa nakala za ushahidi,” alisema Bi Opiyo.

Mshtakiwa alikabiliwa na mashtaka matano ya wizi wa simu za rununu mbili aina ya Infinix Hot 5 katika hospitali kuu ya Kenyatta (KNH). Pia alijifanya afisa wa mamlaka ya bandari na kumwibia Migoro Nyakundi Abela simu aina ya Infinix.

Wailaumu serikali ya kaunti kukosa kuwanasua kutokana na minyororo ya mihadarati

NA KALUME KAZUNGU

WAATHIRIWA wa ulanguzi wa dawa za kulevya eneo la Lamu wanailaumu serikali ya kaunti hiyo kwa  kuwatelekeza katika kuwasaidia kujinasua kutoka kwa janga hilo.

Waathiriwa hao wanadai serikali ya kaunti haijatoa mbinu zozote mwafaka za kuwasaidia kujinasua kutoka kwa maisha ya uteja licha ya waathiriwa hao kuwa tayari kubadili tabia.

Wakizungumza na wanahabari mjini Lamu Alhamisi, mateja hao walisema baadhi ya maafisa wa kaunti wamekuwa wakiwatafuta na kusajili majina yao kwa lengo la kuwasaidia na kisha kutoweka baadaye.

Wakiongozwa na Bi Khadija Shebwana, mateja hao walieleza hofu yao kwamba wanaowaandikisha majina huenda wanafsnya hivyo ili kujinufaisha wenyewe binafsi.

Walimuomba Gavana wa Lamu, Fahim Twaha, kuandaa mkutano wa dharura na mateja hao ili kuwapa fursa ya kumweleza masaibu yao na kutafuta jinsi atakavyowasaidia.

“Mimi nimekuwa teja kwa zaidi ya miaka 10 iliyopita baada ya wazazi wangu kutalakiana, hivyo kukosa malezi bora. Niko tayari kuachana na dawa za kulevya iwapo wahisani watajitokeza kutusaidia. Kaunti imetutelekeza.

Majina yetu yamekuwa yakichukuliwa mara kwa mara na kuahidiwa kwamba tungesaidiwa lakini hakuna lolote limefanywa kufikia sasa. Ningemuomba gavana wetu, Fahim Twaha, kutufikiria sisi mateja kwani pia ni binadamu kama wengine,” akasema Bi Khadija.

Naye Bw Ali Islam aliitaka kaunti kubuni vituo vya urekebishaji tabia kwa walanguzi wa dawa za kulevya.

Bi Khadija Shebwana, 25 ambaye ameishi akitumia dawa za kulevya ikiwemo bangi na kokeni kwa zaidi ya miaka 10. Ni mzaliwa wa Lamu na alilazimika kuingilia mihadarati baada ya kukosa malezi maishani. Picha/ Kalume Kazungu

Alisema wengi wao wako tayari kuacha kutumia mihadarati iwapo vituo kama hivyo vitabuniwa kuwasaidia kubadili tabia.

“Tunaambiwa kaunti iko mbioni kuanzisha kituo cha urekebishaji tabia kwa walanguzi wa dawa za kulevya eneo la Hindi. Hakuna yeyote ambaye amejitokeza kutueleza maendeleo ya mpango huo. Ombi langu ni kwamba serikali iharakishe ujenzi wa vituo vya urekebishaji tabia kwa walanguzi wa dawa za kulevya hapa Lamu,” akasema Bw Islam.

Akizungumza na Taifa Leo aidha, Naibu Gavana wa Lamu ambaye pia ni Waziri wa Idara ya Elimu, Masuala ya Vijana na Michezo, Abdulhakim Aboud, alipinga madai ya kaunti kuwatelekeza waathiriwa wa mihadarati.

Badala yake, Bw Aboud alisema kupitia usaidizi wa Shirika la Kimataifa kuhusiana na Masuala ya Mihadarati (UNODC), tayari wameanzisha mpango unaolenga kuwasaidia waathiriwa wa mihadarati kuacha uraibu huo kote Lamu.

“Ni kweli. Tumesajili majina ya waraibu wa mihadarati hapa Lamu. Kwa ushirikiano na UNODC, tuko mbioni kubuni kituo cha kuwasaidia waathiriwa wa mihadarati kuacha uraibu.

Kituo hicho kitakuwa karibu na hospitali ya King Fahad mjini Lamu na tuko asilimia 50 kukamilisha mpango huo. Tayari maafisa watakaoshughulikia mateja hao wamepokezwa mafunzo na hivi karibuni tutafungua rasmi kituo hicho,” akasema Bw Aboud.

Naye Waziri wa Afya wa Kaunti ya Lamu, Raphael Munyua, alisema pia wamekuwa wakiendeleza mpango wa kuwapa tiba maalum wathiriwa wa mihadarati wanaogonjeka ili kuwasaidia kuacha kiu yao ya dawa za kulevya.

“Mpango unaoendelea katika hospitali kuu ya King Fahad unalenga hasa mateja wagonjwa. Tunawaleta hospitalini na kuwadunga sindano ya methadone ambayo huwasaidia kupoteza hamu ya mihadarati,” akasema Bw Munyua.

TAHARIRI: Polisi waheshimu amri za mahakama

Na MHARIRI

Hatua ya Serikali kuendelea kumzuilia wakili na mwanasiasa Miguna Miguna katika uwanja wa kimataifa wa ndege wa Jomo Kenyatta, (JKIA) Nairobi ni dhuluma na ukiukaji wa haki msingi za wakili huyo.

Kenya ni nchi inayoongozwa na utawala wa kisheria na inayokumbatia mfumo wa haki ambapo sheria ndio msema kweli. Yamkini, sheria inazingatiwa na kutekelezwa dhidi ya wachache.

Ni kwa nini wakili huyo anaendelea kuzuiliwa licha ya Mahakama Kuu kuamuru aachiliwe na kufikishwa mbele yake mara moja? Ni taswira gani inayojitokeza machoni pa raia wa kawaida maafisa wa polisi wanapokaidi amri za korti kiholela?

Kuna ukweli kwamba, wakili huyo huenda alivunja sheria kwa kuchelea kudai uraia wa Kenya baada ya kujisajili kama raia wa Canada. Lakini kama taifa linaloongozwa na Katiba, uhalali wa uraia wake unaweza tu kuamuliwa na mahakama.

Inasikitisha hata zaidi, maafisa wa polisi wanapojinata mbele ya waandishi habari wakidai wao ndio Serikali na kupuuza maagizo ya majaji na mahakimu.

Je, iwapo raia wangefuata mkondo wa polisi hao kudhalilisha amri za korti, nchi itaongozwa kivipi? Mfumo mzima wa sheria utasambaratika na matunda yake ni vurumai na maafa.

Idara ya polisi imejizolea sifa mbaya katika siku za hivi majuzi kutokana na namna inavyokandamiza haki msingi za raia, huku baadhi ya maafisa wakishirikiana na wahalifu kutenda maovu ya kijamii.

Wengine, hasa wale wa idara ya trafiki, wanasifika kwa kupokea hongo bila kujali wala kuogopa kushtakiwa. Sokomoko zilizotokea katika uwanja wa ndege Jumanne zinachafulia sifa idara hii ambayo kwa kweli inahusishwa na kila aina ya uozo nchini.

Tunahimiza Inspekta Jenerali Joseph Boinett kuhakikisha maafisa wake wanazingatia sheria wanapotekeleza wajibu wao. Kuvunja sheria na kukaidi amri za korti ndio mwanzo wa mwisho wa utawala wa kisheria kama tunavyoufahamu sasa.

Ni matumaini yetu kwamba, Mwanasheria Mkuu mpya Paul Kihara ambaye ni jaji mstaafu, atatoa ushauri mwafaka kwa wahusika wakuu kwenye vuta nivute inayoendelea katika JKIA ili sheria izingatiwe kwa dhati.

Kama nchi, hatuwezi kuwa na sampuli mbili za sheria; za kina yakhe na zile za mabwanyenye na wale walio na ushawishi katika jamii. Matokeo ya mpangilio kama huo ni vita na uhasama tele, na hatungependa taifa letu lichukue huo mwelekeo.

Mhubiri ajuta kujenga kwenye ardhi ya umma

Na DENNIS SINYO

SHIBALE, MUMIAS 

PASTA mmoja eneo hili, alililazimika kubadilisha kanisa kuwa chumba cha kulala baada ya nyumba yake ya kifahari kubomolewa kwa madai ilijengwa kwenye ardhi ya umma.

Inasemekana kwamba nyumba hiyo iliyogharimu mamilioni ya pesa ilikuwa imejengwa kwenye kipande cha ardhi ambacho kilikuwa kimetengwa kutumiwa na umma.

Kulingana na mdokezi, nyumba ilijengwa huku baadhi ya washiriki wa kanisa wakipinga na kumweleza pasta ardhi hiyo ilikuwa imenyakuliwa na matapeli.

“Pasta huyo aliwapasha habari washirika kwamba alikuwa ameona ploti iliyokuwa ikiuzwa na akawataka waumini kuchanga pesa kununua ardhi hiyo,” alisema mdokezi

Licha ya washiriki wengine kupinga, ardhi ilinunuliwa baada ya pasta kuwapuuza na ujenzi ukaendelea. “Maelfu ya pesa zilichangishwa kufanikisha ujenzi huo.Waumini kadhaa waliacha kwenda kanisani kwa kuhofia kuitishwa pesa za ujenzi.

Inasemekana ujenzi wa nyumba hiyo uligharimu zaidi ya Sh2 milioni.

Lakini hata kabla ya mwaka kuisha, notisi ilitolewa kwamba nyumba zote kwenye ardhi za umma zibomolewe katika muda wa miezi mitatu.

Mhubiri huyo hakuamini macho yake alipotazama kwa uchungu na masikitiko wakati tinga tinga lilipobomoa nyumba hiyo ya kifahari.

Baadhi ya washiriki waliokuwa wakipinga ujenzi huo, walianza kulaumu mhubiri kwa kupuuza maoni yao walipomshauri kuwa ploti hiyo ilikuwa imenyakuliwa.

Pasta alitokwa machozi na akalazimika kuhamia kanisani ambako amekuwa akilala na kufanyia shughuli zote.

Waumini wameapa kutochanga pesa zingine kugharimia ujenzi wa makazi mapya ya mhubiri huyo.

“Tulipinga ujenzi huo lakini tukapuuzwa. Sasa hatutatoa chochote kununua shamba au kujenga tena,’’ alisema muumini mmoja.

…WAZO BONZO…

Mamilioni watoroka makazi yao wakihofia kudhulumiwa kimapenzi

Na AFP

VISA vya dhuluma za kimapenzi vimeongezeka eneo la mashariki mwa Jamhuri ya Kidemokrasia ya Congo. Hali hiyo imesababisha mgogoro wa kibinadamu na kulazimisha mamilioni kutoroka makwao.

Takriban raia 13.1 milioni wa Congo wanahitaji misaada ya chakula, nguo na malazi ambao ni pamoja na 7.7 milioni wasio na chakula kabisa.

Ripoti hii ni kwa mujibu wa Baraza la Umoja wa Mataifa kuhusu Usalama wiki iliyopita, katika taarifa ya pamoja.

Lakini serikali ya Congo imepuzilia mbali taarifa hiyo ikisema imeongezwa chumvi. Huku majibizano hayo yakiendelea, visa vya ubakaji na unajisi vimeongezeka katika eneo hilo linaloendelea kukumbwa na vita.

DR Congo wiki iliyopita ilijiepusha na mkutano mkubwa wa mashirika ya utoaji wa misaada ya kibinadamu, Geneva, unaotarajiwa kufanyika mwezi ujao.

“Mnamo 2015, visa vya dhuluma za kimapenzi vilipungua kwa kiasi kidogo,” alisema daktari wa kina mama Denis Mukwege, ambaye kwa mara tatu ameteuliwa kwa Tuzo la Amani la Nobel kutokana na kazi yake ya kuwasaidia waathiriwa wa ubakaji na unajisi eneo hilo.

“Tangu mwishoni mwa 2016 na 2017, kumekuwa na ongezeko la visa vya dhuluma za kimapenzi,” aliambia AFP hospitalini mwake, jijini Bukavu, ambako huwatibu wanawake waliobakwa au wasichana walionajisiwa.

Mmoja wa manusura, msichana wa miaka 10 alinajisiwa na wapiganaji Februari, walipovamia kwao kijijini Kabikokole.

Mukwege alisema aina ya wabakaji na wanajisi imebadilika. “Visa vingi sasa vinatekelezwa na watu wa kawaida eneo la Kivu Kusini. Sio tena wanajeshi au wapiganaji,” alisema.

Hata hivyo, watu wengi eneo hilo walikuwa wapiganaji, ulisema wakfu wa Panzi. Wakati huo, migogoro kati ya makundi tofauti ya wapiganaji, waasi, makundi ya vijana ya kudumisha amani, na jeshi la Congo kusababisha vifo zaidi.

Kulingana na kundi la utafiti Congo Research Group, wanajeshi pekee walisababisha vifo 106 na waliteka nyara watu 80 eneo la Kivu Kaskazini Februari.

Katika mji wa Goma, Kivu Kaskazini, Hospitali ya Bethesda, inayoendeshwa na Shirika la Msalaba Mwekundu uhudumia watu waliopigwa risasi.

 

Trump amtimua Godec, ateua Kyle McCarter kutwaa nafasi yake

Na WYCLIFFE MUIA

RAIS Donald J. Trump Alhamisi amemfuta kazi Balozi wa Amerika nchini Kenya Robert Godec na nafasi hiyo akampa Seneta wa Illinois, Kyle McCarter.

Taarifa kutoka White House alisema Bw McCarter ana ufahamu kuhusu Kenya baada ya kuhudumu kama mmishonari na Mkurugenzi wa kampuni ya Each One Feed One International,iliyokuwa na afisi yake eneo la Mukothima,Kaunti ya Tharaka-Nithi.

“Seneta McCarter amefanya kazi na shule za kibinafsi za K-8 ambapo alisaidia watoto masikini na mayatima. Alitoa huduma za matibabu kwa zaidi ya watu 15,000 kila mwaka alipokuwa mkurugenzi wa Each One Feed One International,” ilinukuu taarifa ya Ikulu.

Katika mtandao wake wa Twitter, McCarter alimshukuru Rais Trump kwa uteuzi huo na kuelezea furaha yake ya kutumwa kuhudumu Kenya.

“Ni heshima kubwa kwa kutumwa na Rais Trump na taifa la Amerika kwenda kurudi kuhuduma taifa ambalo nimeishi na kufanya kazi,”alisema Bw McCarter.

Seneta huyo alisema anakusudia kukuza uhusiano kati ya mataifa hayo mawili ili kuacha wosia unaompendeza Mungu na raia wa mataifa yote.

Kwa mujibu wa vyombo vya habari nchini Amerika, McCarter na mkewe wanaongea Kiswahili sanifu baada ya kuishi Kenya kwa muda.

Uteuzi wa seneta huyo unatarajiwa kuidhinishwa na kamati ya Seneti kuhusu Masuala ya Kigeni nchini Amerika.

“Nina upendo mkubwa kwa Kenya,” McCarte aliambia gazeti moja nchini Amerika.

Baada ya kuidhinishwa na Seneti, McCarter atachukua mahali pa Bw Godec ambaye muhula wake nchini Kenya ulikumbwa na shutuma kutoka kwa muungano wa upinzani NASA uliodai kuwa anaegemea upande wa serikali.

Godec aliteuliwa na aliyekuwa Rais wa Amerika Barack Obama mnamo 2012 kuwa balozi wa Kenya na kabla ya hapo alihudumu kama balozi wa Amerika nchini Tunisia kutoka 2006 hadi 2009.

Katika ujumbe wake wa kwaheri, Godec alisema anajivunia ushirikiano aliokuza mataifa hayo mawili katika nyanja za kilimo, afya, biashara, uwekezaji, usalama pamoja na uongozi.

“Kenya ina mahali pazuri katika moyo wangu. Ningependa kusema asanteni sana kwa serikali ya Kenya, raia wa Kenya na wenzangu katika ubalozi kwa ushirikiano mzuri wa zaidi ya miaka mitano niliyohudumu hapa,”alisema Bw Godec katika taarifa yake kwa vyombo vya habari.

 

Miguna apokea matibabu jijini Dubai baada ya maumivu kumzidi

WYCLIFFE MUIA na HARRY MISIKO

WAKILI mbishi Dkt Miguna Miguna Alhamisi amelazwa hosiptalini katika uwanja wa ndege wa Dubai, nchini Milki za Uarabuni, baada ya kulalamika kuwa alihisi uchungu mwingi mwilini.

Kwa sasa anapokea matibabu katika Hospitali ya Sheikh Rashid, ambapo alipelekwa na maafisa wa Canada katika jiji hilo.

Dkt Miguna alisema mwili wake, hasa mbavu, ulikuwa na uchungu wa ajabu baada ya kupuliziwa dawa za kumptezea fahamu, kupigwa, kuvutwa na kulazimishwa kuingia ndege iliyokuwa ikielekea jijini Dubai.

Picha mtandaoni zimeonyesha wakili huyo akiwa katika kitanda cha hospitali iliyo katika uwanja wa kimataifa wa Dubai.

Kwenye taarifa, Dkt Miguna alisema alikubaliwa kupewa matibabu baada ya kukataa katakata kuabiri ndege ya kuelekea jijini London, Uingereza, akisema maumivu yalikuwa yamemzidi.

Hata hivyo, uchunguzi wa kimatibabu, alisema, ulithibitisha kuwa maafisa wa polisi nchini Kenya walimjeruhi vibaya wakati wakimlazimisha kuabiri ndege Jumatano jioni.

“Nina uchungu mwingi sana upande wa kushoto wa kifua changu, mkono wa kulia na kushoto na miguuni,” akasema Alhamisi asubuhi.

“Ninaamini kuwa vibaraka wa serikali ya Kenya walidunga sindano yenye chembechembe hatari.”

Alisema uchunguzi zaidi kuhusu afya yake unahitaji kuondoka Dubai, “lakini inawezekana tu ningekuwa na paspoti yangu ya Kenya ambayo vibaraka hao walinyakua na kuharibu na kukaidi agizo la Jaji Kimaru.”

 

 

Kesi ya Miguna: Matiang’i, Boinnet na Kihalangwa kujua hatima yao Alhamisi

Na RICHARD MUNGUTI

Kwa ufupi:

  • Jaji George Odunga awapata na hatia Mabw Matiang’i, Kihalangwa na Boinnet ya kudharau na kukaidi maagizo ya mahakama kwa kukataa kumwachilia huru Dkt Miguna
  • Vitendo vya baadhi ya mawaziri na wakuu serikalini, ni ithibati wazi kuwa wanaendelea kuishi katika enzi ya zamani ambapo haki za wananchi zinahujumiwa kiholela, asema jaji huyo 
  • Jaji Odunga aamuru Dkt Miguna aachiliwe mara moja na ikiwa maafisa wa Uhamiaji na Mkuu wa Polisi JKIA hawatamwachilia, Mabw Matiang’i, Kihalangwa na Boinnet hawatasikizwa wakifika kortini Alhamisi
  • Masaibu ya Miguna yalianza alipomwapisha kinara wa Nasa Raila Odinga mnamo Januari 30, 2018, lakini tamati ya kizugumkuti hiki ni Alhamisi

MBIVU na mbichi zitajulikana Alhamisi wakati Waziri wa Usalama Dkt Fred Matiang’i , Inspekta Jenerali wa  Polisi (IG) Joseph Boinnet  na Mkurugenzi wa Idara ya Uhamiaji Meja Mstaafu Gordon Kihalangwa watafika katika Mahakama Kuu kuhukumiwa kwa kukaidi agizo la kumwachilia huru wakili mbishi Dkt Miguna Miguna ambaye amezuiliwa ndani ya choo katika Uwanja wa Ndege wa Kimataifa wa Jomo Kenyatta (JKIA) kwa muda wa saa 72 sasa.

Watatu hao wamepatikana na hatia ya kukaidi agizo wamachilie Dkt Miguna na huenda wakawa maafisa wakuu katika serikali ya Jubilee kusukumwa jela.

Uamuzi dhidi yao utakaotolewa Alhamisi utakuwa wa kihistoria kwa vile mahakama inatarajiwa kudhihirisha uwezo wa mamlaka yake.

Mahakama pia inatazamiwa kuamuru kwamba watatu hao pamoja na mwanasheria mkuu ambaye ni mshauri mkuu wa Serikali “hawafai kuhudumu katika nyadhifa za umma.”

Wakisukumwa jela watapoteza nyadhifa wanazoshikilia na siku za usoni hawatakubaliwa kuhudumu kwa vile wamekaidi vifungu nambari 10 na 6 vya sheria. Vyote vinazugumzia maadili ya wanaohudumu katika nyadhifa za umma.

Macho yote yanamtazama Jaji George Odunga ambaye aliwapata na hatia Mabw Matiang’i, Kihalangwa na Boinnet ya kudharau na kukaidi maagizo ya mahakama kwa kukataa kumwachilia Miguna hapo Jumatano.

Mawakili wa Dkt Miguna Dkt John Khaminwa, Lawrence Sifuna, James Orengo, Nelson Havi na Otiende Amolo wakiwa katika Mahakama Kuu Machi 28, 2018 jijini Nairobi. Picha/ Richard Munguti

Ndani miezi 6

Jaji Odunga aliombwa awasukume jela miezi sita kila mmoja na kuwaamuru walipe faini ya Sh200,000 kutoka kwa mifuko yao.

Alipowapata na hatia, Jaji Odunga alisema watatu hao walidharau korti na maagizo iliyotoa na badala ya kuonyesha heshima kufika kortini Jumatano alasiri wakiandamana na Dkt Miguna walihepa wakidai walikuwa wanahudhuria gwaride la kufuzu kwa maafisa wa kikosi cha polisi cha GSU mtaani Embakasi, Nairobi.

“Badala ya kufika kortini, watatu hao walitoroka na kukataa katakata kumwachilia Dkt Miguna. Haya ni madharau dhidi ya mamlaka ya mahakama,” akasema Jaji Odunga.

Jaji huyo alisema ni jambo la kusikitisha kabisa kwa vile “baadhi ya mawaziri wanajichukua kwamba wao ndio sheria na hawana haja ya kutii sheria na maagizo ya mahakama.”

Alisema kwamba ni masikitiko makubwa kwa vile baadhi ya mawaziri na wakuu serikalini hawajatambua katiba iliyopitishwa Agosti 27, 2010 na umuhimu wake.

Jaji huyo alisema kutokana na vitendo vya baadhi ya mawaziri na wakuu serikalini, ni wazi wanaendelea kuishi katika enzi ya zamani ambapo haki za wananchi zinahujumiwa kiholela.

Akizungumzia juu ya kesi ya Dkt Miguna, Jaji Odunga alisema aliwaamuru Dkt Matiang’i, Bw Boinnet na Bw Kihalangwa kufika mbele  yake Jumatano saa nane “kuadhibiwa kwa kudharau maagizo ya mahakama.”

Mawakili wa KNHRC Judy Lema na Victor Kamau wakiwa kortini Machi 28, 2018 katika kesi ya Dkt Miguna Miguna jijini Nairobi. Picha/ Richard Munguti

Miguna aachiliwe mara moja

Na wakati huo huo Jaji Odunga aliamuru Dkt Miguna aachiliwe mara moja na ikiwa “maafisa wa Uhamiaji na Mkuu wa Polisi JKIA hawatamwachilia, Mabw Matiang’i, Kihalangwa na Boinnet hawatasikizwa wakifika kortini Alhamisi.”

Vile vile jaji huyo aliamuru walinzi katika JKIA wawaruhusu Mawakili Dkt John Khaminwa , James Orengo, Otiende Amolo, Cliff Ombeta , Harun Ndubi na Aulo Soweto wamwone Dkt Miguna pasi kuweka vikwazo vyovyote.

“Naamuru kwamba Dkt Miguna asalie humu nchini na wala asisafirishwe kama alivyofanyiwa Feburuari 9, 2018 akitarajiwa kortini,” alisema Jaji Odunga.

Alisema watatu hao waliagizwa wamwachilie Dkt Miguna Jumanne na badala yake wakamzuilia kinyume cha maagizo ya  Jaji Roselyn Aburili. Jaji huyo alikuwa amesema Dkt Miguna aachiliwe huru bila masharti.

Pia jaji huyo alikuwa ameagiza Dkt Miguna afike kortini wakati wa kusikizwa kwa kesi aliyowashtaki watatu hao kwa kuvunja haki zake.

Mawakili wa Chama cha Wanasheria nchini Kenya (LSK) na Tume ya Kitaifa ya Kutetea Haki za Binadamu (KNHRC) waliunga mkono ombi Dkt Matiang’i, Kihalangwa na Boinnet wasUkumwe jela miezi sita na watozwe faini watakayolipa wenyewe na isigharamiwe na pesa za umma,

“Bali na faini hiyo na adhabu hiyo, naomba hii mahakama iamuru watatu hao wasihudumu katika nyadhifa za umma ama hata kushika milango ya afisi za umma,” akasema wakili Victor Kamau wa KNHRC.

Mawakili wa Dkt Miguna Dkt John Khaminwa, Lawrence Sifuna, James Orengo, Nelson Havi na Otiende Amolo wanywa kahawa baada ya siku ndefu mahakamani Machi 28, 2018 jijini Nairobi. Picha/ Richard Munguti

Mateso ya Miguna

Bw Kamau alisema wakili  Miguna aliteswa na kuraruriwa nguo na kusukumwa ndani ya Ndege kupelekwa Dubai kinyume cha sheria huku haki zake za kuwa nchini bila cheti cha kusafiria na hata nguo ama hati zozote zikihujumiwa.

“Huu ni ukiukaji wa hali ya juu wa haki za binadamu,” alisema Bw Kamau.

Mahakama ilisema watatu hao walikaidi maagizo ya Majaji Luka Kimaru na Enock Mwita kwamba hawapasi kumtangaza Dkt Miguna mwananchi haramu.

Badala ya kumfikisha kortini kama walivyoagizwa na Jaji Kimaru, idara ya uhamiaji ilimsomba na kumsafirisha hadi nchini Canada.

Mawakili walisema walipoteza zaidi ya saa 320 wakifanya kesi hiyo na maagizo waliypopata yakapuuzwa na kudharualiwa.

Mwanaharakati Okiya Omtatah alikuwa miongoni mwa waliohudhuria kesi ya Miguna Miguna mbele ya Jaji George Odunga Machi 28, 2018. Picha/ Richard Munguti

“Kesi hii sasa ni ile ya kudharau korti yenyewe,” alisema Jaji Odunga na kuongeza lazima “sheria ifuatwe na kila mtu kwa vile hakuna mmoja aliye mkuu kuliko sheria na hakuna aliye juu ya sheria.

Masaibu ya Miguna yalianza alipomwapisha kinara wa Nasa Raila Odinga mnamo Januari 30, 2018.

Polisi walivunja makazi yake na kumkamata kisha wakamzuilia kwa siku mbili ndipo Jaji Luka Kimaru akaamuru afikishwe kortini.

Jaji Kimaru alikaa kortini hadi saa mbili kasorobo ila Miguna hakuletwa licha ya hakikisho ya kiongozi wa mashtaka Duncan Ondimu.

Usiku huo wa Feburuari 9, 2018 Miguna alifurushwa na kupelekwa Canada na idara ya Uhamiaji.

Mahakama iliamuru Miguna arudishwe pasi masharti lakini alipokanyaga JKIA Jumatatu saa nane unusu alasiri, hakuruhusiwa kuondoka JKIA na sarakasi na kizaazaa kikaanza hadi sasa. Tamati ya kizugumkuti hiki ni Alhamisi.

Diwani akanusha mashtaka 6 ya ulaghai Murang’a

Diwani kutoka kaunti ya Murang’a Peter Mburu Muthoni almaarufu Soloman Kamau Nyingi akiwa kizimbani aliposhtakiwa kwa kumlaghai mfanyabiashara Sh2.2 milioni. Picha/ Richard Munguti

Na RICHARD MUNGUTI

MWAKILISHI wa wadi katika kaunti ya Murang’a (MCA) aliachiliwa huru katika kesi inayomkabili ya kumlaghai mfanyabiashara Sh2.2milioni akidai angemuuzia Lori la kubebea bidhaa.

Bw Peter Mburu Muthoni almaarufu Solomon Kamau Nyingi  alifikishwa mbele ya hakimu mwandamizi Kennedy Cheruiyot.

MCA huyo alikamatwa na afisa wa idara ya kupambana na makosa ya jinai alipomwona mahakamani katika kesi nyingine inayomkabili.

Bw Muthoni amekanusha mashtaka sita ya kumlaghai Bi Alice Penninah Wangui Guchu Sh2,295,000, kughushi agizo la korti iliyoruhusu kuuzwa kwa lori hilo, kujifanya Bw Solomon Kamau Nyingi na kughushi kitambulishi cha Nyingi.

Kibali cha kumtia nguvuni MCA Muthoni kilitolewa mnamo Machi 12, 2018.

Hakimu alimwachilia  kwa dhamana na kurodhesha kesi kusikizwa Mei 30.

I&M pia yapungukiwa na faida

Na BERNARDINE MUTANU

BENKI ya I&M imepata upungufu wa mapato yake baada ya kutozwa ushuru kwa asilimia sita, katika mwaka uliokamilika Desemba 31, 2017.

Kampuni hiyo ilipata Sh9.9 bilioni baada ya kutozwa ushuru ikilinganishwa na Sh10.6 bilioni katika kipindi hicho mwaka uliotangulia.

Kulingana na kampuni hiyo, hilo lilishuhudiwa hasa kutokana na changamoto za zilizoshuhudiwa nchini kwa sababu ya siasa na kudhibitiwa kwa viwango vya riba na Benki Kuu ya Kenya.

Mwenyekiti wa IMHL Daniel Ndonye alisema Jumanne alisema benki hiyo inaunga mkono viwango vipya vya kimataifa vya kifedha (IFRS 9) kutokana na kuwa iliamini kuwa viwango hivyo vitaweza kuimarisha hali.

Alisema kampuni hiyo imetenga Sh4.1 bilioni kukabiliana na changamoto katika baadhi ya sekta katika operesheni zake zilizoonekana kuathirika vibaya.

Kampuni 5 zanufaika na malipo ya chini forodhani

Na BERNARDINE MUTANU

KAMPUNI tano za Kenya zimepewa cheti cha kijamii, ambapo zitakuwa na uwezo wa kupokea huduma zaidi za forodhani kwa malipo ya chini.

Kampuni hizo: Isuzu East Africa Ltd, Kuehne Nagel Limited, Bollore Africa Logistics, Ufanisi Freighters Limited na Farmers Choice Limited zilipendekezwa na Shirika la Ukusanyaji Ushuru(KRA)kuwekwa katika orodha ya kampuni ambazo zinafaidika kutokana na huduma hiyo.

Kampuni hizo zilipokea vyeti vyao wakati wa mkutano wa nne wa mashirika ya forodha ulimwenguni (WCO) na mashirika ya kibiashara kati ya Machi 14 na Machi 16, 2018, Kampala, Uganda.

Mizigo ya mashirika yaliyo katika orodha hiyo itakuwa ikiachiliwa moja kwa moja forodhani, alisema Mkurugenzi Mkuu wa KRA John Njiraini wakati wa mkutano huo.

Kampuni hizo zimefikisha 14 idadi ya kampuni za Kenya ambazo zimepewa cheti hicho, kati ya kampuni 73 katika Jumuiya ya Afrika Mashariki (EAC).

Waholanzi sasa ndio wateja wakuu wa bidhaa za Kenya

Na BERNARDINE MUTANU

TAIFA la Uholanzi limekuwa mwagizaji wa pili mkubwa zaidi ya bidhaa za Kenya, kwa kuipiku Uganda ambayo awali ilikuwa ikinunua zaidi bidhaa za Kenya kote ulimwenguni.

Bidhaa zilizonunuliwa na wafanyibiashara wa Uganda zilipungua kwa karibu Sh1 bilioni Januari, ikilinganishwa na kipindi kama hicho mwaka uliotangulia.

Hii ina maana kuwa bidhaa zilizouzwa na Wakenya nchini Uganda zilipungua kwa asilimia 21.8, hadi Sh3.52 bilioni, kulingana na takwimu za hivi punde za Shirika la Kitaifa la Takwimu (KNBS).

Uganda imo katika ni nambari ya tatu katika orodha ya mataifa yaliyonunua bidhaa za pesa nyingi zaidi kutoka Kenya.

Hii ni baada ya kuondolewa katika nafasi ya mwanzo na Pakistan mwishoni mwa mwaka jana, na sasa Uholanzi.

Bidhaa ambazo huagizwa zaidi kutoka Kenya na Uholanzi ni maua. Biashara hiyo iliongezeka kwa asilimia 10.38 hadi Sh4.19 bilioni Januari.

Pakistan iliipa Kenya Sh7.31 bilioni kutokana na mauzo ya majani chai. Hata hivyo, mapato hayo yalipungua kwa asilimia 0.02.

Walanguzi wa mihadarati sasa wageukia mita za maji

NA KALUME KAZUNGU

BODI ya Usimamizi na Usambazaji wa Maji Katika Kaunti ya Lamu (LAWASCO) inahofia kupoteza mamilioni ya fedha kufuatia ongezeko la uharibifu wa mita za maji ambazo zinalengwa na walanguzi wa dawa za kulevya.

Ufichuzi umebaini kuwa waraibu wa mihadarati katika kisiwa cha Lamu wamezindua mbinu mpya ya kukimu kiu  yao ya dawa za kulevya, ambapo wamekuwa wakigeukia mita za maji na kuzibomoa ili kutoa poda ambayo ni kemikali maalum inayotumiwa kuhifadhia mita hizo zisiharibike.

Poda hiyo baadaye huvutwa na pia kuliwa na walanguzi hao wa dawa  ambao kisha hulewa chakari.

Akizungumza na wanahabari mjini Lamu Jumatano, Mwenyekiti wa Bodi ya Maji (LAWASCO), Bw Mohamed Athman, alisema zaidi ya mita 350 za maji ambazo zinagharimu kima cha takriban Sh 2.1 milioni tayari zimeharibiwa na walanguzi hao wa dawa za kulevya katika harakati zao za kutafuta kemikali ya kuwalewesha.

Bw Athman alitaja mitaa ya Langoni, Mkomani, Gadeni, Bajuri na Kashmir kuathirika zaidi na visa hivyo vya mita za maji kulengwa na walanguzi.

“Visa zaidi ya 350 vya mita za maji kuharibiwa na walanguzi wa dawa za kulevya vimeripotiwa katika afisi yetu. Waraibu wa mihadarati wanavunja mita na kutoa unga ambao ni kemikali maalum inayowekwa ndani ya mita hizo ili kuzihifadhi zisishike kutu au kuharibika.

Tumegundua kuwa kemikali hiyo ndiyo inayotafutwa na walanguzi wa dawa kwa minajili ya kuivuta au kuiramba. Baadaye wao hulewa chakari kushinda dawa nyingine zozote za kulevya,” akasema Bw Athman.

Mwenyekiti wa Bodi ya Usambazaji Maji eneo la Lamu (LAWASCO), Bw Mohamed Athman, akikagua mojawapo ya mita za maji ambazo zimekuwa zikilengwa na kuharibiwa na waraibu wa mihadarati. Picha/ Kalume Kazungu

Naye Meneja wa LAWASCO, Bw Paul Maina, alisema visa hivyo vimechangia kupotezwa kwa bili za maji zinazotumiwa kwenye majumba tofauti tofauti mjini Lamu na kisha mwishowe mita zao za maji kuharibiwa na waraibu wa dawa za kulevya.

Bw Maina alisema tayari wametoa tangazo kwa wamiliki wa mita za maji majumbani mwao kuzitunza ili zisiharibiwe na walanguzi hao wa dawa za kulevya.

“Mita zinazoharibiwa ndizo zinazotuwezesha kusoma bili za maji zinazotumika majumbani. Mita hizo zinapoharibiwa kabla ya bili kusomwa, itamaanisha ushuru unaotozwa kwa matumizi ya maji hayo unapotea.

Ningewasihi wenye mita hizo kuwa makini ili zisiharibiwe. Pia itakuwa bora iwapo wanaojenga nyumba watazingatia kuziweka mita hizo ndani ya nyumba zao ili zisifikiwe na waharibifu,” akasema Bw Maina.

Baadhi ya wazazi waliozungumza na Taifa Leo aidha walieleza hofu yao kuhusiana na kemikali mpya inayotumiwa na vijana kulewa.

Bw Ahmed Omar Bingwa, aliitaka idara ya usalama ya kaunti ya Lamu kuwa macho na kuwakamata wale watakopatikana wakivunja mita za maji ili kutoa kemikali hiyo.

“Tushirikiane sisi wakazi na kuwasema hadharani wale wanaopatikana wakivunja hizo mita za maji. Kemikali yenyewe ni hatari. Vijana wetu wakiendelea kutumia poda hiyo wataharibika hata zaidi. Idara ya usalama iangazie tatizo hilo na kulikomesha,” akasema Bw Bingwa.

Redio 24 Uganda zafungwa kwa kupeperusha matangazo ya uchawi

Na BENSON MATHEKA

TUME  ya Mawasiliano ya Uganda (UCC), imeagiza vituo 24 vya redio vifungwe mara moja kwa kupeperusha matangazo yanayohusiana na uchawi.

Shirika hilo limesema vituo hivyo vilikiuka masharti ya leseni zao licha ya kuonywa mara kadhaa. Uamuzi huo umezua hofu katika sekta ya utangazaji katika nchi hiyo ya Afrika Mashariki.

Msemaji wa UCC, Pamela Ankunda, aliambia gazeti la  The EastAfrican  kwamba vituo hivyo vilikuwa vimeonywa kusitisha matangazo ya kishirikina.

Tume ilitaja ilani iliyotoa Machi 24 2014 kwa vituo vyote vya redio vikome kupeperusha matangazo ya uchawi.

“Tume imefahamu kwamba licha ya  onyo la mara kwa mara, umma umelalamika dhidi ya matumizi mabaya ya mawimbi ya utangazaji, kituo chako kimeendelea kupeperusha matangazo kinyume cha sehemu ya 2 ya sheria ya uchawi,” inasem barua ya tume.

Tume hiyo pia inalaumu vituo hivyo kwa kusaidia utapeli kwa kuruhusu walaghai kutumia vituo vyao kudanganya watu kupitia matangazo  yao wakidai wana nguvu za kuponya.

Bi  Ankunda alisema vituo hivyo vitaruhusiwa kurejea hewani vikitimiza masharti ya utangazaji.

Uganda ina vituo 270 vya redio vinavyotangaza kwa mawimbi ya FM na kuna ushindani mkubwa  huku vikikubali matangazo kwa mteja yeyote aliye na pesa.

Baadhi ya wanaolipa matangazo  ya kibiashara ni madaktari wa kienyeji na waganga ambao tume inasema wanavumisha uchawi na utapeli.

Matokeo mseto kwa klabu za Kenya voliboli Misri

Na GEOFFREY ANENE
KLABU za Kenya zimeanza mashindano ya voliboli ya Klabu Bingwa Afrika ya wanaume na matokeo mseto jijini Cairo, Misri, Jumanne.

Mabingwa wa Kenya,  General Service Unit (GSU) wamekaribishwa mashindanoni kwa kubwagwa na Olympique ya Algeria kwa seti 3-1 za alama 20-25, 25-15, 24-26 na 17-25. Washindi hawa wa medali ya shaba mwaka 2005 watapiga mechi ya pili Machi 28 dhidi ya Wolaitta Dacha ya Ethiopia.

Prisons, ambayo ilinyakua medali ya fedha mwaka 2013, imeanza vyema kwa kunyamazisha Red Skins kutoka Ushelisheli 3-0 (25-15, 25-14, 25-22). Mabingwa hawa wa zamani wa Kenya watapambana na Espoir ya Jamhuri ya Kidemokrasia ya Congo katika mechi ya pili Machi 28.

Katika mechi zingine zilizosakatwa Jumanne,  ilikuwa Port (Cameroon) 3 Wolaitta (Ethiopia) 1, DGSP (Congo Brazzaville) 1 Swim Blue (Ushelisheli) 3, Swehly (Libya) 3 Bafia (Cameroon) 0, Ahly Benghazi (Libya) 3 University of Zimbabwe (Zimbabwe) 0, Police (Benin) 3 Mwangaza (DR Congo) 1, Aviation (Misri) 3 Finances (Benin) 0, Smouha (Misri) 3 FAP (Cameroon) 0.

Okumbi apigwa kalamu kwa matokeo duni ya Harambee Stars

Na JOHN ASHIHUNDU

KOCHA wa Harambee Stars, Stanley Okumbi amefutwa kazi Jumatano pamoja na wasaidizi wake, Frank Ouna na Haggai Azande.

Watatu hao ametimuliwa mfupi tu baada ya timu hiyo ya taifa kuchapwa 3-2 na Jamhuri ya Afrika ya Kati (CRA) katika mechi ya kupimana nguvu nchini Morocco mapema juma hili.

Matokeo hayo yalifuatia sare ya 2-2 ya mwishoni mwa wiki dhidi ya limbukeni Comoros katika mechi nyingine ya kirafiki, pia nchini humo.

Comoros ambao wako nyuma ya Kenya mara 27 katika viwango vya kimataifa vya FIFA, wanashikilia nafasi ya 132 kwenye orodha hiyo ya Dunia.

Okumbi amekuwa akishikilia uadhifa huo kwa muda baada ya Paul Put kujiuzulu Februari.

Taarifa kutoka FKF ilisema Ukumbi amepewa jukumu la kuinoa timu ya vijana wasiozidi umri wa miaka 20 inayojiandaa kushiriki mechi za vijana za mchujo wa kufuzu kwa fainali za AFCON.

Hii ni mara ya pili kwa Okumbi kupewa jukumu la kuwa kocha mkuu wa Harambee Stars baada ya hapo awali kupewa kazi hiyo mwezi Februari 2016 na kuhudumu hadi Novemba 2017 baada ya Bobby Williamson kung’atuka. Alishushwa na kuwa naibu wa Put aliyeajiriwa Februari 2018.

Haikujulikana haraka majukumu watakayopewa Ouna na Azande, lakini wataendelea kufanya kazi katika klabu za Wazito FC na Tusker mtawaliwa.

Katika mechi yao ya Jumanne, CAR walipata mabao ya ushindi kupitia kwa Foxi Kethevomano, Dagalou Eudes na Moimi Hilare, huku ya Stars ikijibu kupitia kwa Erick Johana na Michael Olunga.

Juhudi za Okumbi kuwaingiza Paul Were na Timbe katika nafasi za Clifton Miheso na Jesse Were kwa ajili ya kupata mabao ziliambulia patupu.

Ismail Gonzalez wa Stars alionyeshwa kadi nyekundu na kutolewa nje katika mechi hiyo iliyochezewa mjini Marakech.

Dhidi ya Comoros, Stars ilijipatia mabao yake kupitia kwa kiungo wa Tottenham Hotspur, Victor Wanyama na winga wa Buildcon nchini Zambia, Miheso.

Wanyama alifunga penalti baada ya Eric Johanna wa IF Brommapojkarna ya Uswidi kuangushwa ndani ya kijisanduku na beki, Chaker Alhdhur.

Mtoto aliyejitwika jukumu la kumlea mamaye mlemavu

NA PETER MBURU

HALI ya ulemavu kwa mama mmoja kutoka mtaa wa Shabaab, Nakuru aliyetelekezwa na familia yake miaka 18 iliyopita imemsukumia mwanawe wa kiume wa miaka kumi kuchukua majukumu mazito ya ulezi na kikazi, ambayo yanaathiri maisha na elimu yake.

Kevin Momanyi, 10 ni mwanawe Bi Irene Monari, 32, ambaye ni kiwete baada ya kupooza miguu alipokuwa na miaka minne, alipougua Polio.

Hata hivyo, Bi Monari aliteswa na kutelekezwa na familia baada ya wazazi wake kuaga na kujipata akiishi maisha yaliyojaa matatizo.

Kutokana na hali yake, Bi Monari hawezi kulipa kodi ya nyumba. Mmiliki wa ploti, hata hivyo, alimhurumia na kumruhusu kuishi pasi kulipa kodi lakini kumtaka awe akifanya usafi eneo la ploti badala yake.

“Niliiona kama bahati kwani nimeishi maisha ya kufukuzwa kila ninapoishi punde tu ninaposhindwa kulipa. Hata hivyo siwezi kufanya usafi na hivyo ni mwanangu anayefanya kazi hiyo kwa niaba yangu ili tuendelee kuishi humu,” akasema Bi Monari.

Kutokana na hayo, mama na mtoto huamka mwendo wa saa kumi na nusu alfajiri, anaosha vyombo kabla ya kumpa mamake vyombo vya kupikia chai akiwa kitandani, kisha anatoka kuanza kazi za usafi wa ploti.

Kevin Momanyi amsukuma mamaye Bi Irene Monari kwenda kazini mtaani Shabaab, mjini Nakuru. Picha/ Peter Mburu

Ni kazi anayofanya takriban saa moja kutokana na ukubwa wa eneo la kusafishwa, kisha baadaye anarejea na kuwaamsha ndugu zake, kuwaosha kisha kuwapa kiamsha kinywa.

Kufikia sa kumi na mbili asubuhi, mtoto huyu anachukua gari la kumsukuma mamake ‘wheelchair’ na kuanza safari ya kumpeleka katika eneo lake la kazi.

“Nina biashara ndogo ambayo niliweka baada ya kupata msaada kutoka kwa marafiki ambayo iko umbali wa karibu kilomita moja kutoka tunapoishi. Kila siku ni lazima Kevin anisukume hadi huko kabla ya kuchukua safari ya kwenda shuleni,” akasema Bi Monari.

Ukutanapo nao njiani, utakachoona tu ni mtoto aliyemakinika kumsukuma mama kwenye ‘wheelchair’, akikaza kupigana na muda ili asichelewe shuleni. Ni mchache wa mazungumzo, lakini mengi ameyazika moyoni.

“Huwa tunafika kwenye eneo la kazi takriban saa mbili ama ikiwa imepitisha dakika kadhaa na hapo Kevin anafungua mlango, anatoa kiti kidogo nje na kunishusha kwani gari hili haliwezi kutoshea ndani, kabla ya kunivuta hadi ndani,” akasema mama huyo.

Ni baada ya hapo apatapo uhuru wa kwenda shuleni, mara nyingi akichelewa kuhudhuria somo la kwanza ama kufika likiwa karibu kuisha.

Mtoto huyu ana uwezo wa kufanya vyema masomoni lakini maisha anayopitia yanamwathiri kwa kumlazimisha kufanya kazi za utu uzima. Picha/ Peter Mburu

Hana raha

Walimu nao walishakubali na kukumbatia maisha ya mtoto huyo, ambaye walimtaja kuwa “ameathiriwa pakubwa na maisha anayopitia, kwani hana ucheshi wala mchezo wa utoto tena na ni mnyamavu kupita kiasi,” akasema mwalimu mkuu wa Bridge International Bw Dennis Seke.

“Nilipofika miaka miwili iliyopita nilivutwa na hali ya mtoto huyo kuchelewa kupita kiasi, kukosa kuburudika pamoja na wenzake, kisha nikafahamu kuwa hata wakati wa kula chamcha alikuwa akinywa maji,” akasema Bw Seke.

Kulingana na mwalimu huyo, mtoto huyo ana uwezo wa kufanya vyema masomoni lakini maisha anayopitia yanamwathiri kwa kumpitishia katika hali ya kufanya kazi za utu uzima.

Lakini maafisa wa kushughulikia watoto Nakuru walisema kuwa hawakuwa na ufahamu wa maisha ya mtoto huyo, japo wakakiri kuwa hali ya ugumu wa maisha apitiayo mtoto huyo, polepole inalemaza elimu na mustakabali wake maishani.

Kuhangaisha Miguna ni njama ya kuvuruga muafaka wa Uhuru na Raila, asema mbunge

Na CHARLES WASONGA
MBUNGE wa Nyando Jared Opiyo amedai kuzuiliwa na kuhangaishwa kwa mwanaharakati wa vuguvugu la “National Resistance Movement” (NRM) kunachochewa kwa viongozi fulani ambao wangependa kuvuruga matunda ya mwafaka kati ya Rais Uhuru Kenyatta na kiongozi wa NASA Raila Odinga.
Bila kuwataja majina, mbunge wa huyo chama cha ODM alisema viongozi hao aliosema wanatoka mrengo wa Jubilee hawajafurahishwa na hatua ya viongozi hao wawili kushirikiano kwa lengo la kuleta maridhiano ya kisiasa humu nchini.
“Kama Mbunge wa Nyando anakotoka Bw Miguna Miguna naamini kuwa walioamuru Miguna azuiliwe kuingia humu kulingana na agizo la mahakama walenga kuvuruga manufaa ya muafaka kati ya Rais Kenyatta na Raila Odinga.
Ilikuwa aibu kubwa kwa maafisa wa polisi kumdhulumu Bw Miguna mbele ya Bw Odinga kwa saa nyingi katika uwanja wa ndege,” Bw Okello akasema alipowahutubia wanahabari Jumanne alasiri katika majengo ya Bunge, Nairobi.
Bw Okello alisema atawasilisha kesi mahakamani kutaka Bw Miguna aachiliwe huru kutoka uwanjia wa JKIA ambako amekuwa akizuliwa kwa zaidi ya saa 20 baada ya kuwasili nchini kutoka Canada.
Kuzuiliwa kwa Bw Miguna kuliibua makabiliano makali katika uwanja wa huo pale maafisa wa usalama walipojaribu kumsafirisha kwa ndege hadi Dubai lakini akadinda huku akipiga mayowe uwanjani humo hali iliyopelekea rubani wa ndege kuamuru aondolewe.

Bila Miguna, hakuna amani, wakazi Kisumu waimba

RUSHDIE OUDIA na EDDY ODHIAMBO

WAKAZI wa Kisumu Jumatano waliandamana katika eneo la Kondele, kulalamikia kuendelea kuzuiliwa kwa wakili Miguna Miguna katika uwanja wa Kimataifa wa ndege wa Jomo Kenyatta (JKIA) jijini Nairobi.

Familia ya Miguna inayoishi Ahero eneobunge la Nyando pia ililalamikia jinsi mwana wao anavyonyanyaswa na serikali na kumtaka Rais Uhuru Kenyatta kuingilia kati ili aachiliwe huru.

Waandamanaji walioanza kwa kusukuma mawe kufunga barabara inayounganisha miji ya Kisumu na Kakamega na kulazimisha wenye magari kutumia njia mbadala.

Waliimba “Bila Miguna, hakuna amani” na kubeba mabango wakitaka Miguna atendewe haki. Baadhi yao walichoma magurudumu ya magari na wengine kuvalia jezi zilizoandikwa kauli mbiu iliyobuniwa na wakili huyo ya “uasi.”

Familia ikiongozwa na kaka ya Miguna, Bw Ondiek Miguna, iliiomba serikali kumwachilia mwana wao kuingia nchini.

Dkt Miguna alifurushwa Kenya Februari lakini akarejea Jumatatu kufuatia agizo la korti la kumruhusu kuingia Kenya.

Hata hivyo, akiwa JKIA, alikataa kutoa paspoti yake ya Canada na kukataa kutia sahihi stakabadhi za kuomba uraia wa Kenya alizokabidhiwa na idara ya uhamiaji.

Ingawa idara hiyo inasema aliasi uraia wa Kenya miongo miwili iliyopita, Dkt Miguna anasema hakuwahi kuuasi na alizaliwa Kenya jambo linalompa haki ya kurudishiwa paspoti yake.

 

Huzuni

Bw Ondiek aliambia Taifa Leo kwamba familia inasononeshwa na jinsi Miguna anavyohangaishwa na polisi na serikali. Katika kijiji alichozaliwa cha Migina, wakazi walihuzunishwa na kuendelea kuzuiliwa kwake Nairobi.

“Hatujawahi kuwa na amani tangu Miguna alipokamatwa baada ya kumuapisha Raila Odinga hadi kisa cha hivi punde cha kuzuiliwa kwake. Baadhi yetu hatuli tukashiba tukisikiliza redio na kutazama runinga tukitarajia habari za kuachiliwa kwake,” alisema Bw Ondiek.

Wafuasi na familia ya Bw Miguna walisema wanahisi kusalitiwa na muungano wa NASA na mwafaka kati ya Rais na Bw Odinga.

“Tulifikiri mwafaka huo ungerahisisha mambo, ilhali wangali wanaendelea kuzuilia Miguna. Iwapo hawatamwachilia, tutakataa mwafaka huo na maridhiano,” alisema mwandamanaji mmoja.

Aliongeza: “Jaji Mkuu David Maraga anafaa kusimamisha shughuli zote za mahakama hadi maagizo ya korti yaheshimiwe”.

Buda afurusha bintiye kwa kuvaa suruali ya kubana

Na TOBBIE WEKESA

KIZAAZAA kilizuka katika boma moja la hapa baada ya mzee kumtimua binti yake alipofika nyumbani kutoka chuoni akivalia kaptula fupi mno jambo lililomkasirisha mzee.

Kulingana na mdokezi, kipusa alipofika kwao, alienda moja kwa moja akitaka kumpa pambaja baba yake.

Inadaiwa mzee alikataa kumkumbatia binti yake. “Kama ni salamu unataka kunipa kaa nazo. Sizihitaji kwa sasa,” mzee alimkaripia bintiye.

Mwanadada alishangaa. Alielekea alikokuwa mama yake na mzee akamfuatisha maneno. “Unatoka wapi ukiwa umevalia hivi?” mzee alimuuliza binti yake kwa ukali.

Duru zinasema mama ya kipusa alijaribu kumshawishi mzee apunguze hasira lakini hakutoboa.

“Nimeuliza anatoka wapi akiwa amevaa hivi? Huyu hatakaa hapa kwangu. Arudi atokako. Angalia, uchi wake wote uko nje,” mzee alimkemea binti yake.

Inadaiwa kipusa aliamua kujitetea kwa kumueleza mzee kwamba huo ndio mtindo wa mavazi chuoni.

“Kuvalia suruali fupi inayokubana mpaka nyama zote za mwili ziko nje ndio mtindo unaoniambia. Kwangu hutakaa,” mzee aliapa.

Kulingana na mdokezi, mzee alimpa binti yake dakika kumi abadilishw nguo hiyo au arudi shuleni alikotoka. Alipoona mrembo hakushtuka, mzee aliamua kumtimua.

“Hicho kiingereza chako na kaptula yako vipeleke kwingine. Mamako tangu nimuoe, hajawahi kuvaa hivi. Umenikosea heshima kabisa. Labda mimi si baba yako,” mzee alichemka huku akimtimua binti yake.

Inadaiwa mzee alitoa fimbo na kumuamrisha mrembo kuondoka boma lake naye akalazimika kukimbilia usalama wake.

“Kwenda kabisa. Hata masomo yako siyahitaji kwangu. Siku nyingine ukitoka masomo usikanyage hapa,” mzee alimkaripia binti yake.

…WAZO BONZO…

SHANGAZI AKUJIBU: Nilienda ng’ambo kurudi nikapata amesonga

Na SHANGAZI SIZARINA

Vipi shangazi. Mimi ni msichana mwenye umri wa miaka 21 na nimekuwa na uhusiano na mwanamume fulani kwa miaka saba. Miaka miwili iliyopita nilipata safari ya ghafla ya kwenda ng’ambo kwa miaka miwili. Mpenzi wangu alinihakikishia kuwa angekuwa mwaminifu kwangu kwa muda ambao sikuwepo. Nilishangaa sana niliporudi majuzi nikapata ashapendana na msichana mwingine na tayari wamezaa pamoja. Sasa anadai eti bado ananipenda. Nishauri.
Kupitia SMS

Ni ajabu kwamba bado unahitaji ushauri kuhusu mwanamume kama huyo ilhali umehakikisha kwamba hana msimamo na hawezi kuwa mwaminifu kwako. Ukisafiri alikuhakikishia kuwa atakuwa mwaminifu kwako. Muda si mrefu akamhadaa msichana wa wenyewe kuwa anampenda akampa mimba. Sasa anataka kumuacha arudi kwako. Utamruhusu aendelee na karata yake hiyo? Utaamua mwenyewe!

 

Alinitema bila sababu,sasa anitaka
Vipi shangazi? Nilikuwa na uhusiano na mwanamume fulani na nilimpenda kwa moyo wangu wote. Lakini siku moja mwaka uliopita alinipigia simu akaniambia tuachane tu bila sababu yoyote. Nilikubali uamuzi wake wala sikumuuliza hata swali moja. Sasa ameanza kunitafuta kwa simu nafikiri anataka turudiane na mimi sitaki hata kumuona. Nishauri.
Kupitia SMS

Ninaunga mkono kwa dhati msimamo wako kuhusu mwanaume huyo. Ni dharau na ujeuri mkubwa kwa mtu anayedai kumpenda mwenzake kuamka siku moja na kukatiza uhusiano bila sababu. Inaonekana amegundua hawezi kupata mwingine kama wewe na ndiyo maana ameanza kukutafuta. Muondoe kabisa katika mawazo yako kwa kubadilisha nambari yako ya ama kufunga simu zake.

 

Alinichukia alipopata mimba yangu
Kwako shangazi. Kuna msichana tuliyependana sana na nilikuwa nimepanga kumuoa. Lakini alipopata mimba yangu alinichukia hata akanifungia kumpigia simu. Nampenda sana na sijui nitafanya nini. Nishauri.
Kupitia SMS

Kitendo cha msichana huyo ni ishara kwamba hakuwa ameamua moyoni mwake kwamba utakuwa mumewe. Hiyo ndiyo sababu alitoweka maishani mwako licha ya wewe kumhakikishia kuwa utamuoa na pia kupata mimba yako. Haina maana uendelee kuhangaisha moyo wako kuhusu mtu ambaye hana shughuli nawe na ameamua kuishi bila wewe.

 

Aliniahidi kunipeleka kwao, miaka minne sasa imeisha
Shangazi nilipata mpenzi na kwa bahati nzuri au mbaya nikapata mimba yake. Aliahidi kunipeleka kwao akanitambulishe kwa wazazi wake kisha anioe lakini huu sasa ni mwaka wa nne na bado hajatimiza ahadi yake hiyo. Amekuwa akiniambia nisubiri tu hadi umefika wakati nahisi kuwa ananichezea akili. Lakini pia nampenda sana sidhani ninaweza kumuacha. Nishauri.
Kupitia SMS

Ni hali ya kusikitisha sana kwamba baadhi yetu sisi wanawake huzuzuliwa na mapenzi tukawa hatuoni, hatusikii wala hatufikirii. Ni ajabu sana kuwa mpenzi wako huyo amekuhadaa kwa miaka minne kuwa atakuoa na bado unaendelea kusubiri ilhali tayari una mtoto wake. Na kama kwamba hayo si kitu si chochote, unasema huwezi kumuacha! Mimi sitasema zaidi, endelea kuubiri.

 

Rafiki ameniambia mpenzi wangu anamtongoza
Shikamoo shangazi. Nimegundua kuwa mwanamume mpenzi wangu amekuwa akimuandama msichana rafiki akitaka wawe na uhusiano wa pembeni. Rafiki yangu ameamua kuniambia kwa sababu hawezi kunisaliti kwa njia hiyo tena amemchukia sana mwanamume huyo kwa tabia yake hiyo. Nifanye nini?
Kupitia SMS

Bila shaka sasa umejua kuwa mpenzi wako huyo si mwaminifu kwako na mkiendelea na uhusiano huo hatimaye atakucheza tu. Ni bahati nzuri kwamba amemjaribu rafiki yako ndipo ukajua tabia yake hiyo. Ushauri wangu ni kwamba umkabili ukiwa pamoja na rafiki yako umzome kisha umteme.

 

‘Si lazima ukate miti ndipo uchome makaa’

Na PAULINE ONGAJI

KATIKA enzi hizi ambapo kumekuwa na uharibifu wa mazingira kwa sababu ya ukataji miti, anatoa suluhu kwa kuunda makaa kutokana na uchafu wa makaa na taka.

Ni kazi ambayo Stella Sigan, 35, amekuwa akiifanya kwa miaka mitatu sasa kupitia mradi wake wa Alternative Waste Technologies-AWT ambapo bidii yake imesaidia kukuza mazingira kwa kutumia uchafu vilevile kupunguza ukataji miti kutengeneza makaa.

Makaa haya kwa jina briquettes hutengenezwa kwa vumbi ya makaa na taka ambapo tangu waanze mwaka wa 2015, wametumia zaidi ya tani 600 za uchafu huo.

Mbali na kusafisha mazingira, yakilinganishwa na kuni, makaa haya yanawaka kwa muda mrefu na kutoa moshi mchache. Pia ni ya bei nafuu huku wateja wake wakiwa nyumba binafsi, taasisi za kielimu, hoteli na mikahawa

Kwa kawaida yeye hununua vumbi ya makaa kutoka kwa wakazi wa Kibera ambapo wanatengeneza kati ya mifuko 200 na 300 ya makaa haya kila mwezi.

Kwa sasa anafanya kazi na kikundi cha watu sita wanaohusika na shughuli za kuunda makaa haya na wengine takriban 100 wanaokusanya taka na uchafu wa makaa unaotumika katika shughuli hii huku wengine sita wakiyasambaza kwa wateja.

Alihitimu na shahada ya uundaji mavazi na mapambo ya nyumbani kutoka Chuo Kikuu cha Egerton. “Nikiwa chuoni, penzi langu la ujarisiamali lilijitokeza huku nikianzisha biashara ya ushonaji nguo na mapambo ya nyumbani, lakini kwa bahati mbaya biashara hiyo haikudumu,” asema.

Ili kuimarisha ujuzi wake kibiashara, alisomea shahada ya uzamili katika masuala ya kiuchumi na biashara na pia kujiunga na mpango wa Young African Leadership Program, mpango wa kutoa mafunzo ya biashara, ujarisiamali na uongozi miongoni mwa vijana kutoka mataifa 14 ya Afrika ambapo alipiga msasa ustadi wake wa kibiashara.

Penzi hili lilimjia alipokuwa akifanya kazi katika shirika la Carolina for Kibera, kama afisa anayesimamia masuala ya kiuchumi na ujarisiamali.

Ni hapa ndipo alipata wazo la kuanza kuunda makaa haya. Mwanzoni jitihada zake kuuza bidhaa hii hazikufaulu na akaamua kufanya utafiti zaidi kutuma maombi ya kupata ufadhili.

Mwaka wa 2016, alikuwa mmojawapo ya wajarisiamali 1,000 walionufaika na ufadhili wa Wakfu wa Tomy Elumelu ambapo alipokea mafunzo, unasihi wa kibiashara bali na kupokea mtaji wa shilingi laki tano alizotumia kuanzishia biashara hii.

Lakini ari yake kamili ilimjia kutokana na nia yake ya kutaka kuimarisha maisha ya raia wa kusini mwa Jangwa la Sahara.

“Eneo hili huwa na idadi kubwa ya vifo vya mama na watoto kutokana na uchafuzi wa mazingira unaosababishwa na moshi wakati wa mapishi. Na nilipata taswira kamili ya masaibu yao baada ya kuingiliana na wakazi wa vitongoji duni na hasa Kibera,” aeleza.

Kabla ya kuanzisha biashara hii alifanya majaribio kwa kuyanunua kutoka kwa wafanyabiashara ambao tayari walikuwa wanayaunda na kuwauzia wakazi Kibera.

Kwa sasa nia yao ni kupanua huduma zao hadi magharibi mwa Kenya ambapo wanapanga kuanzisha kiwanda cha kutengeneza makaa haya.

PAMBO: Msaidie mchumba wako kupiga deki upate asali bila kipimo

Na BENSON MATHEKA

Unapomsaidia kazi za nyumbani bila shaka unampunguzia uchovu hivyo kumuacha katika hali mzuri ya kukupatia burudani tosha
-Alfred Ombati, Shirika la Love Care, Nairobi

IKIWA wewe ni mwanamume mzembe unayependa kuketi kwenye kochi mkeo akifanya kazi za nyumbani, unajinyima uroda kutoka kwake.

Wataalamu wanasema kwamba wanaume wanaosaidiana kazi za nyumbani na wake zao hupata shibe la uroda na pia ni magwiji wa shughuli chumbani.

Utafiti huo ulifichua kwamba wanaume wanaochangia kazi za nyumbani hawakaushwi na wake zao wanapotaka uroda. Na sio kukaribishwa kushiriki tendo lenyewe pekee, hukolezwa uhondo wa ngoma mara kwa mara.

Kulingana na mtafiti Dkt Matt Johnson, wa chuo kikuu cha Alberta, Canada aliyeshiriki katika utafiti huo uliochukua miaka mitano, kiwango cha kazi za nyumbani ambacho mwanamume hufanya huchangia kiwango cha burudani anachopata kutoka kwa mkewe.

Utafiti huo ulishirikisha wanandoa 1,338 kutoka Ujerumani na ulilenga kubaini iwapo kiwango cha kazi za nyumbani wanachofanya wanaume kina uhusiano na maisha ya uroda ya wanandoa.

“Katika uhusiano wa kimapenzi kiwango cha kazi hutegemea majukumu ya wachumba wenyewe. Kuna wanaume wanaoweza kupangusa meza na kuchochea hisia za mapenzi za wachumba wao na kuna wanaopiga deki na kukosa kusisimua watu wao,” aeleza Bw Johnson.

Hata hivyo Alfred Ombati wa shirika la Love Care jijini Nairobi anasisitiza kwamba mchango wa wanaume katika majukumu ya nyumbani huongeza joto la mahaba.

“Unapomsaidia mke au mchumba wako kwa kazi za nyumbani bila shaka unampunguzia uchovu. Kwa hivyo, mnapoingia chumbani atakuwa katika hali mzuri ya kukupatia burudani,” aeleza Bw Ombati.

Mwenzake wa shirika la Big Hearts Hellen Wanjiku anasema wanaume hujinyima uroda kwa kuwaachia wanawake kazi zote za nyumbani.

 

Asiwe mtumwa

“Unapomchukua mchumba wako kama mtumwa kwa kumuachia kazi za nyumbani huku ukitulia kochini na kutazama runinga, haufai kutarajia burudani faraghani,” aeleza.

Utafiti wa Johnson ulibaini kwamba wanawake wakihisi kuwa wachumba wao hawawachukulii kama watumwa, huwa wanawafungulia milango ya tendo la ndoa mara kwa mara na kuwa na maisha ya uroda ya kuridhisha.

Alisema matokeo ya utafiti huo ni muhimu kwa wanandoa wanaotaka kudumisha joto katika maisha yao ya uroda.

Bi Wanjiku asema wanandoa wanaposaidiana na kushirikiana katika majukumu ya nyumbani, mili yao hutulia na kuwa katika nafasi nzuri ya kulishana uroda.

“Ni suala la kisaikolojia na rahisi sana ambalo watu huwa wanapuuza na kwa kufanya hivyo wanaangamiza maisha yao ya tendo la ndoa,” asema na kukiri kwamba kuna vizingiti vya kitamaduni ambavyo watu wanafaa kuepuka iwapo wanataka kuboresha maisha yao ya uroda.

Utafiti huo unasema kwamba baadhi ya watu huwa wanaepuka kazi za nyumbani wakidhani kufanya hivyo kutawasaidia kuwa na maisha bora ya tendo la ndoa.

 

Kukaushwa

“Wanaofanya hivyo hujipata wameharibu uhusiano wao na wachumba wao na kukaushwa wanapohitaji burudani. Na hata wakipatiwa burudani huwa sio katika hali ya kuridhisha, wanapimiwa kama dozi,” aeleza Bw Ombati.

Anashauri watu kujukumika kwa kila hali iwapo wanataka kufurahia maisha ya uroda na wachumba wao. “Usipojukumika, usitarajie mchumba wako akukoleze mapenzi.

Mbali na kutekeleza majukumu yako kama kiongozi wa familia, msaidie mke wako kulea watoto, kupika, kupiga deki, kufua nguo na kupeleka watoto shuleni. Ukifanya hivi, tarajia mabadiliko makubwa katika maisha yenu ya burudani faraghani,” asema.

Utafiti mwingine wa Sharon Sassler mwanasaikolojia wa chuo kikuu cha Cornell, New York, unafichua kwamba kiwango cha uroda miongoni mwa wanandoa kote ulimwenguni kinaendelea kushuka, isipokuwa wale wanaogawana majukumu ya nyumbani kama kupika na kupiga deki.

“Siku hizi kujenga mapenzi ni mchango wa kila mtu. Ni wanaogawana majukumu ambao wanaendelea kufurahia tendo la ndoa kwa kiwango cha juu kinachowaridhisha,” aeleza.

 

Matiang’i, Kihalangwa na Boinnet waitwa kortini kuhusu Miguna

Na MAUREEN KAKAH

Mahakama Kuu sasa imewaagiza maafisa watatu wa ngazi ya juu serikalini kufika kortini  Jumatano alasiri kuhusu kesi ya uraia wa wakili mbishi Dkt Miguna Miguna.

Jaji George Odunga amewataka Waziri wa Usalama Dkt Fred Matiang’i, Mkurugenzi wa Idara ya Uhamiaji Gordon Kihalangwa, na Mkuu wa Polisi Joseph Boinnet kufika mbele yake saa nane kamili.

 

Habari zaidi kufuata …