‘WHO haitaishinikiza Uchina kufichua chanzo cha corona’

NA MASHIRIKA

SHIRIKA la Afya Duniani (WHO) limesema haliwezi kuilazimisha Uchina kutoa habari zaidi kuhusu chanzo cha Covid-19.

Aidha, WHO imesema kuwa itapendekeza tafiti zinazohitajika ili kuongeza “kiwango” cha ufahamu kuhusu asili ya virusi hivyo.

“WHO haina mamlaka ya kumshurutisha yeyote kuhusu suala hili,” alisema Mkurugenzi wa Shirika hilo anayesimamia idara ya dharura Mike Ryan.

Afisa huyo alisema hayo Jumatatu wakati wa mahojiano na vyombo vya habari kuhusu mipango ya WHO ya kuishinikiza Uchina kuwa na uwazi zaidi.

“Tunatarajia ushirikiano kikamilifu, kujitolea na kuungwa mkono na mataifa ambayo ni wanachama wetu kuhusu suala hilo,” alisema Ryan.

Kuna dhana kadhaa kinzani zinazosema kuwa virusi hivyo viliruka kutoka kwa wanyama hususan popo na kuwaingia binadamu au kuwa virusi hivyo vilisambaa kutoka maabara moja mjini Wuhan, Uchina.

Nadharia ya ‘kuvuja kutoka lebu Wuhan’ imegeuka mjadala mkali kwa mara nyingine katika siku za hivi karibuni baada ya wanasayansi kadhaa maarufu kuitisha uchunguzi kamili kuhusu asili ya virusi hivyo.

Makisio kuwa virusi hivyo vilivujwa kwa bahati mbaya kutoka kwa lebu yalipuuziliwa pakubwa na wanasayansi katika hatua za kwanza za mkurupuko wa virusi vya corona.

Uchina imekanusha kila mara kwamba, lebu hiyo ndiyo iliyosababisha mkurupuko huo.Timu ya WHO iliyozuru Uchina mapema mwaka huu ikisaka chanzo cha Covid-19 ilisema kuwa hawakuweza kupata data yote hivyo kuzidisha mjadala kuhusu uwazi wa taifa hilo.

Aliyekuwa rais wa Amerika, Donald Trump na wafuasi wake wamekuwa wakisisitiza dhana kuwa Uchina ilisambaza virusi hivyo kimaksudi.

Aliyekuwa Waziri wa Usalama wa Ndani Amerika Mike Pompeo alisisitiza mwaka jana kwamba kuna “ushahidi thabiti” kuwa virusi hivyo vilitoka kwenye lebu, huku akikosa kutoa ushahidi wowote na kukiri kwamba hakukuwa na uhakika.

Wakati huo huo, kinara wa WHO, Tedros Adhanom Ghebreyesus, ametoa wito kwa kampuni zinazounda chanjo za Covid-19 kupatia mradi wa kimataifa unaolenga kuleta usawa kuhusu chanjo, kifurushi cha kwanza cha COVAX zilizokataliwa au kutoa nusu ya chanzo zinazoundwa kwa mpango huo unaungwa mkono na WHO.

Mkurugenzi huyo alilalamikia ukosefu wa usawa kuhusu chanjo dhidi ya Covid-19 hali aliyosema imesababisha “mikondo miwili ya mkurupuko” ambapo mataifa ya Magharibi yamelindwa huku mataifa maskini yakiwa bado hatarini, akirelejea ombi lake la kuitisha msaada wa chanjo.

China kuchanganya chanjo mbalimbali kukabili corona

NA AP

CHINA inapanga kuchanganya chanjo zake za kukabili virusi vya corona na chanjo kutoka nchi zingine ili kuimarisha ubora wake.

Mamlaka ya Kudhibiti Magonjwa nchini humo (CCDC), ilikiri kwamba ubora wa chanjo zake “uko chini” hivyo pana haja ya kuzichanganya na chanjo zingine ili kuziboresha zaidi.

“Chanjo za China hazina uwezo mkubwa kumzuia mtu kuambukizwa corona,” akasema Gao Fu, ambaye ndiye mkurugenzi mkuu wa mamlaka hiyo.

China imesambaza mamilioni ya dozi za chanjo zake katika nchi mbalimbali duniani, kwenye juhudi zinazoonekana kama mikakati ya kukabili chanjo kutoka nchi za Magharibi.

“Ni rasmi kwamba tumeanza kutathmini ikiwa tutakuwa tukitumia chanjo tofauti kuwachanja raia,” akasema Gao, alipohutubia wanahabari katika mji wa Chengdu, mkoa wa Sichuan.

Utathmini uliofanyiwa chanjo aina ya Sinovac kutoka China nchini Brazil, ulionyesha ina uwezo wa kiwango cha asilimia 50.4 kuwalinda watu dhidi ya corona. Hii ni ikilinganishwa na chanjo ya kampuni ya Pfizer kutoka Amerika, ambayo ina uwezo wa asilimia 97.

China yaanza kutoa chanjo ya Covid-19 kwa wageni wa mataifa mbalimbali

Na MASHIRIKA

OFISI ya mambo ya kigeni jijini Beijing imesema Beijing imeanza kuwapa wageni wa mataifa mbalimbali chanjo ya Covid-19.

Kufuatia kanuni ya kushiriki kwa hiari, kutoa idhini binafsi na kubeba jukumu la hatari, wageni wa mataifa mbalimbali wenye umri wa miaka 18 na zaidi watapatiwa chanjo ya Covid-19.

Kwa mujibu wa taarifa, chanjo itakayotumika ni ya China na itahitaji dozi mbili.

Wageni wote wanaotaka kuchanjwa wanaweza kuangalia matangazo yatakayotolewa na waajiri wao, shule au ofisi za jamii ya makazi na kuweka miadi kupitia taasisi hizo.

Kufikia Machi 28, 2021 zaidi ya watu milioni 106 walikuwa wamepata chanjo katika maeneo mbalimbali kote nchini China.

Kwa sasa, maambukizi yote mapya yaliyoripotiwa nchini China ni kutokana na watu wanaoingia nchini humo. Ili kuzuia kuletwa kwa vyanzo vya nje vya maambukizi, China inaharakisha mchakato wa utoaji wa chanjo ili kuwezesha watu wengi kupata kinga.

CRI

 

CORONA: Uwezo wa chanjo ya China katika kuisaidia Afrika kukabili upungufu

Na MASHIRIKA

MNAMO Machi 2021, Kituo cha Kupambana na Maradhi barani Afrika (Afrika CDC), kilitangaza kuwa bara hili bado linakabiliwa na changamoto ya kupata chanjo ya Covid-19.

Afrika inapanga kutoa chanjo kwa asilimia 60 ya watu wake ili kuthibiti msambao wa maambukizi ya virusi hivyo.

Likiwa na zaidi ya watu bilioni moja na chini ya chanjo milioni nne tu hadi sasa, ni dhahiri kuwa bara la Afrika litakuwa na ugumu wa kufikisha chanjo kwa watu wengi ndani ya muda mfupi.

Ulafi wa nchi za Magharibi

Ikiwa wazi kwamba nchi za Afrika hazina uwezo wa kisayansi wa kuzalisha chanjo, shirika liliso la kiserikali la The People’s Vaccine Alliance, linaripoti kuwa nchi tajiri zaidi zinazowakilisha asilimia 14 tu ya watu wote duniani zimenunua zaidi ya nusu ya chanjo za Covid-19.

Umoja wa Mataifa unaripoti kuwa chanjo milioni 460 zimetolewa lakini Afrika imepokea chini ya asilimia mbili tu licha ya kuwa na asilimia 18 ya watu kote duniani.

Afrika ilifanya uagizaji wa awali wa dozi milioni 900. Lakini Afrika CDC imesema inahitaji angalau dozi bilioni 1.5 ili kuwachanja asilimia 60 ya watu.

Mchakato wote wa kununua na kugawa chanjo hizo huenda ukagharimu hadi Dola milioni 10 ambazo ni sawa na Sh1 bilioni.

Ikiwa tayari nchi za Magahribi zimenunua dozi nyingi za chanjo na kukosa kutoa misaada kwa nchi maskini, ni wazi kwamba Afrika haiwezi kutegemea nchi hizo.

Wakati uo huo, pia sauti za kutilia shaka usafirishaji wa chanjo za kampuni kama vile Pfizer hadi Afrika zinaendelea kuongezeka.

“Chanjo hizi hazikutengenezwa kwa ajili ya matumizi katika nchi zinazoendelea. Lazima zigandishwe”, anasema mwanzilishi wa jukwaa la habari la China-Afrika, Eric Olander.

“Chanjo hizi hazina faida kwa nchi nyingi zinazoendelea kwa sababu miundo-mbinu ya kuzihifadhi haipo,” anaeleza Olander.

Kwa upande mwingine, China inasisitiza kuwa chanjo zake zinaweza kuhifadhiwa kwa urahisi kwenye jokofu la kawaida tu.

China yaziba mwanya wa chanjo Afrika

Kwa kuzingatia kasi ya sasa ya utoaji wa misaada ya chanjo ya China, kuna matumaini ya kufanikisha kasi ya kuwafikia watu wengi barani humo.

Tayari China imepeleka msaada wa chanjo ya Covid-19 katika nchi za Gabon, Zimbabwe, Namibia, Djibouti, Niger, Benin miongoni mwa nyingine.

Mnamo Februari, China ilitangaza kuwa itatoa chanjo ya Covid-19 kwa nchi 19 za Afrika.

Msemaji wa Wizara ya Mambo ya Kigeni nchini China, Wang Wenbin anasema China pia inasaidia kampuni zinazouza chanjo katika nchi za Afrika na ambako zinahitajika zaidi.

Hadi kufikia sasa, China ndiyo nchi ya kwanza miongoni mwa mataifa makubwa zaidi duniani kuanza kutoa misaada ya chanjo kwa Afrika.

Mapema mwezi Mei, Rais wa China, Xi Jinping, aliahidi kuwezesha chanjo za Covid-19 zipatikane hasa kwa nchi za Kanda ya Kusini mwa dunia; yaani Global South.

Lakini si chanjo tu, China pia ilikuwa ya kwanza kutuma vifaa vya kupamba na corona Afrika pindi janga hili liliporipotiwa katika baadhi ya mataifa ya bara hilo.

Msomi na mtaalamu wa masuala ya China na Afrika nchini Kenya, Stephen Ndegwa, anapongeza mchango wa China katika hatua muhimu inayoendelea sasa hivi ya utoaji wa chanjo dhidi ya virusi vya corona.

Anasema China imekuwa msitari wa mbele kushirikiana na nchi mbalimbali duniani zikiwemo za Afrika, na kutoa msaada wa kiufundi na wa vifaa.

Bila shaka nchi za Magharibi zitaendelea kukosoa ushirikiano mpya wa China na Afrika katika suala la kukabiliana na janga la corona.

Lakini kashfa kama hizo zimeendelea kukosolewa kwa misingi ya ukweli na hali halisi.

Aliyekuwa Waziri wa Afya nchini Rwanda, Agnes Binagwaho, anaona kuwa kujali kwanza afya ya wananchi ni kupaumbele.

Anasema, “Ikiwa China itafanikiwa kutoa chanjo na kuokoa maisha ya Waafrika wengi, unadhani kwamba watu barani humo wataichukia China?”

Ufanisi wa chanjo ya China

Hadi sasa, viongozi kadhaa duniani na watu waliopata chanjo ya Sinovac kutoka China hawajalalamikia madhara yoyote kutokana na chanjo hiyo.

Japo kwa kawaida, ufanisi na usalama ni viashiria vikuu vinavyotumiwa kutathmini ubora wa chanjo; lakini siku zote usalama ni kipaumbele.

Kwa mujibu wa Kituo cha Kudhibiti na Kuzuia Magonjwa cha Marekani, kati ya watu milioni mbili waliopata dozi ya kwanza ya chanjo iliyotengenezwa na kampuni ya Pfizer nchini humo, watu 4,000 walionyesha dalili za madhara yake makubwa.

Cha kusikitisha zaidi ni kuwa mamlaka ya dawa ya Norway imesema watu zaidi ya 30 nchini humo wameaga dunia baada ya kupata chanjo ya Pfizer. Kinyume na waliopata chanjo za China, kati ya watu milioni 15 kutoka nchi 125, hakuna hata mmoja aliyefariki au kuugua kiasi cha kufikia hali mahututi, wala kuonyesha madhara makubwa.

Kuhusu ufanisi wa chanjo za China, takwimu zilizotolewa na nchi mbalimbali zimeonyesha kuwa na asilimia 50 hadi 90, kiasi ambacho ni juu ya kiwango cha chini cha ufanisi wa chanjo kinachokubaliwa na Shirika la Afya Duniani (WHO).

Wingi wa watu na nidhamu ya China

China ikiwa ni nchi yenye idadi kubwa zaidi ya watu duniani, inasukumwa na jukumu la kuzalisha chanjo nyingi ili kufikia watu wote nchini humo.

Lakini pia haiwezekani kabisa kutegemea chanjo kwa asilimia 100 katika vita dhidi ya corona, hivyo nidhamu na kufuata maagizo ya mamlaka husika nchini humo zimekuwa nguzo muhimu katika kupunguza maambukizi.

Kufikia sasa, maambukuzi yanayopatikana nchini humo ni kutokana na watu wanaoingia kutoka nje, wala si wale walioko China tayari.

Wataalam watarajiwa China kuchunguza kiini cha corona

Na MASHIRIKA

BEIJING, China

WATAALAM wa Shirika la Afya Duniani (WHO) wanatazamiwa kufika China kuchunguza kiini cha virusi vya corona, mwaka mmoja baada ya kuzuka kwa mkurupuko huo.

Ziara hiyo inaandamwa na siasa kali, shutuma za kuwepo njama fiche, usiri na hofu ya kasumba za magharibi.

Mbele ya ulimwengu wote Beijing ilichelewesha kuwaruhusu wataalam wasioegemea upande wowote kuingia China kuchunguza chanzo cha janga hilo la kiafya na kusitasita kufanyiwa uchunguzi.

WHO, sasa inasema China imetoa kibali cha ziara ya wataalam wake ambapo timu ya watu kumi inatarajiwa kuwasili hivi punde kwa ziara ya siku tano au sita – ikiwemo wiki mbili watakazokaa katika karantini.

Serikai ya China wiki hii ilikataa kuthibitisha tarehe halisi na maelezo ya kina kuhusu ziara hiyo, hatua iliyoashiria uzito wa shughuli hiyo.

Covid-19 iligunduliwa kwa mara ya kwanza katika eneo la kati la mji wa Wuhan mwishoni mwa 2019, kabla ya kuenea nje ya mipaka ya China na kuzua balaa kwa kusababisha vifo vya watu zaidi ya 1.8 milioni kote ulimwenguni na kuzorotesha sekta za kiuchumi.

Kiini cha ugonjwa huo kimesalia mjadala mkali ambao umeibua lawama nyingi miongoni mwa jamii ya kimataifa pamoja na kutolewa kwa ripoti tatanishi na serikali ya China iliyopania kudhibiti usemi wake kuhusu virusi hivyo.

Timu ya WHO imeahidi kutilia maanani sayansi, hususan jinsi virusi hivyo vya corona vilivyoweza kuruka kutoka kwa wanyama – wanaoaminika kuwa popo – hadi kwa binadamu.

“Hii haihusu kupata taifa au serikali iliyo na hatia. Hii inahusu kuelewa kilichotendeka ili kuepuka hali kama hiyo siku za usoni na kupunguza athari,” alisema Fabian Leendertz kutoka Taasisi ya Robert Koch, Shirika Kuu la kudhibiti maradhi Ujerumani, ambaye atakuwa miongoni mwa wanasayansi watakaosafiri.

Ziara hiyo haitakuwa ya kwanza ambapo makundi yamezuru China kuhusiana na Covid-19.

Mwaka uliopita shughuli kama hiyo iliangazia hatua zilizochukuliwa na serikali za mataifa badala ya kiini cha virusi huku nyingine ikiandaa njia kwa uchunguzi unaosubiriwa.

Katika safari hii, WHO itajiweka katikati ya shutuma kutoka kwa mataifa ya magharibi na uongozi wa China uliopania kuonyesha kwamba mfumo wake wa kisiasa wenye usiri na michakato tele ulichangia kudhibiti na wala si kuenea kwa mkurupuko huo.

Watu 18 wafa kwenye mgodi China

Na AFP

BEIJING, China

WACHIMBA migodi 18 Jumamosi, Desemba 5, 2020, walithibitishwa kufariki baada ya gesi ya ukaa kuvuja ndani ya mgodi wa makaa ya mawe kusini magharibi mwa China, vyombo vya habari nchini humo vimeripoti.

Shughuli za kuwaokoa wengine watano ambao walikuwa wamekwama kwenye mgodi huo zilianza mara moja.

Mkasa huo uliwakumba wachimba migodi 24 katika mgodi wa Diaoshuidong jijini Chongquig baada ya kuvuja kwa mtungi wa gesi hiyo ya sumu Ijumaa jioni, shirika la habari la kitaifa, CCTV, liliripoti.

Kufikia jana asubuhi, manusura mmoja na waathiriwa 18 walikuwa wamepatikana, ikasema CCTV, ikinukuu taarifa kutoka makao makuu ya shirika la uokoaji eneo hilo.

Kisa hicho kilitokea wakati wafanyakazi walikuwa wakifungua mitambo ya uchimbaji ndani ya mgodi huo ambao hapo awali ulikuwa umefungwa kwa muda wa miezi miwili.

Wapelelezi wameanzisha uchunguzi kubaini chanzo cha ajali, shirika la habari la Xinhua lilisema.

Kisa cha hapo awali sawa na hicho, kilisababisha vifo vya watu watatu mnamo 2013, kulingana na Xinhua inayomilikiwa na serikali.

Uhuru sasa aililia China ilegeze masharti ya madeni

Valentine Obara na PSCU

RAIS Uhuru Kenyatta ameiomba Serikali ya China kulegeza masharti ya madeni ambayo taifa hilo linadai Kenya na nchi nyingine nyingi za Afrika.

Akizungumza katika kongamano la kipekee kati ya viongozi wa Afrika na China, ambalo liliandaliwa kwa njia ya kimitandao usiku wa kuamkia jana, Rais Kenyatta alimwambia mwenzake wa China, Xi Jinping kwamba uchumi umezorota sana Afrika kwa sasa.

Hali hii mbaya ya uchumi imesababishwa na janga la corona ambalo limefanya shughuli muhimu za kibiashara kukwama kimataifa.

“Kwa kuzingatia athari za kiuchumi barani, ningependa kuihimiza China kuongeza zaidi hatua za kulegeza masharti ya madeni na yale ya kibiashara. Hii itayapa mataifa ya Afrika nafasi ya kujikwamua kwa ufufuzi wa kiuchumi,” akasema Rais Kenyatta.

Kongamano hilo lililofanyika kwa njia ya video liliandaliwa na China, Afrika Kusini na Senegal.

Rais wa Afrika Kusini Cyril Ramaphosa ndiye Mwenyekiti wa Muungano wa Afrika (AU) huku Rais wa Senegal Macky Sall akiwa ndiye Mwenyekiti Mwenza wa Shirikisho la Ushirikiano wa Afrika na China (FOCAC).

Katika hotuba yake, Rais Xi aliahidi kwamba serikali yake itaendelea kusaidia mataifa ya Afrika kupambana na janga la corona.

Alimsifu Rais Kenyatta kwa kuhakikisha shughuli hazijakwama katika bandari ya Mombasa na hivyo basi kusaidia katika usafirishaji wa bidhaa licha ya vikwazo vingi vilivyosababishwa na janga la corona.

Wachina waliokuwa Kenya waruhusiwa kurudi kwao

STEVE NJUGUNA

Serikali ya China itawatoa wananchi wake 400 kutoka Kenya, huku kikundi cha kwanza kikiondoka Jumanne saa tano usiku kwa kuhofia virusi vya corona.

Wachina hao walichukua tiketi zao Jumapili lakini hawangeweza kutoshea kwa ndege moja ya China Southern Airline kutokana na kanuni ya kuweka umbali wa mita moja.

“Waliobaki 200 tunajarajia warudi China wiki hii. Tulitarajia wangesafiri wote lakini haikuwezekana kwa sababu ya kanuni mpya ya usafiri ya umbali wa mita moja,” alisema Isaac Okinyo.

Mipango ya mwisho ya kuwatoa Wachina hao ilifanyika baada ya Wizara ya Maswala ya Kigeni kuwapa ruhusa ya kuwatoa humu nchini.

Bw Isaac Okinyo aliambia Taifa Leo kwamba Wachina hao walikuwa wameomba ruhusa ya kutoka humu nchini kwa wizara hiyo lakini ubalozi wa Uchina ukakataa.

Hii ilimlazimu kwenda kortini ambapo serikali ya Kenya iliagizwa kuwaruhusu waondoke Juni 16, kwa sababu Wizara ya Afya ya Kenya imelemewa kukabiliana na corona.

Jaji alitoa amri baada ya mwanasheria huyo kuomba ruhusa ya kipekee ya kuwatoa Wachina hao humu nchini.

Mwanasheria huyo aliwasilisha agizo hilo la korti kwa Wizara ya Masuala ya Kigeni ambayo iliwaruhusu.

“Hawakupinga na matayarisho yote yalikamilika Jumapili,” alisema.

Mchina ndani kwa kuuza vifaa feki vya corona

Na RICHARD MUNGUTI

MKURUGENZI Mkuu wa kampuni moja ya Uchina alishtakiwa Jumatatu kwa kuuza bidhaa feki za kupima ugonjwa wa corona.

Zhuo Wu almaarufu Williams ni mmiliki wa kampuni ya Zankem Medical Supplies Limited iliyo na afisi zake mtaani Kileleshwa, Nairobi.

Raia huyo wa China alikuwa miongoni mwa washtakiwa waliofikishwa katika mahakama ya Milimani, Nairobi siku ya kwanza ya kufunguliwa tena kwa shughuli za kusikizwa kwa kesi.

Alikabiliwa na mashtaka mawili mbele ya Hakimu Mwandamizi, Bi Zainab Abdul. Alikanusha mashtaka na kuomba aachiliwe kwa dhamana.

Kiongozi wa mashtaka hakupinga ombi la Wu ila aliomba pasipoti yake isalie na afisa anayechunguza kesi hiyo. Hakimu alimwachilia kwa dhamana ya Sh500,000.

Mshtakiwa alikana kupatikana na vifaa feki vya kupima ugonjwa wa corona mnamo Juni 12, 2020. Kesi itasikizwa Juni 26, 2020. Shughuli za kusikizwa kwa kesi katika Mahakama ya Milimani zilirejelewa jana baada ya kusitishwa kwa miezi mitatu. Utaratibu mkali wa kuwakagua mawakili, washukiwa na kila mtu anayeingia katika jengo hilo uliwekwa huku mahema sita yakiwekwa kuwashughulikia wote waliotaka kuingia.

Washtakiwa na mawakili walisimama katika milolongo mirefu kukaguliwa kwanza kabla ya kuruhusiwa kuingia katika eneo la maegesho ya magari ama ndani ya jengo la mahakama hiyo yenye shughuli nyingi.

Huku haya yakijiri, Kiongozi wa Wengi katika bunge le Seneti, Bw Samuel Poghisio alimtembelea Jaji Mkuu David Maraga katika Mahakama ya Juu.

Mkutano huo wa faragha ulifanywa wiki moja baada ya hotuba kali aliyotoa kinara huyo wa mahakama akieleza mahangaiko aliyopata akitafuta nafasi ya kuzugumza na Rais Uhuru Kenyatta kuhusu uteuzi wa majaji 41.

Hakimu mkuu wa mahakama ya Milimani, Bw Francis Andayi aliwahutubia mawakili, washukiwa na wananchi waliofika kortini jana na kuwaeleza kuhusu kanuni mpya. “Lazima mwongozo uliotangazwa na Wizara ya Afya na Shirika la Afya Ulimwenguni (WHO) ufuatwe na kila mmoja,” akasema.

Bw Andayi aliwaeleza waliofika kortini jana kuwa lazima kila mmoja apimwe joto na kuosha mikono.

Mateso ya Wakenya China: Serikali yawasilisha barua ya malalamishi

Na AGGREY MUTAMBO

Kenya imewasilisha malalamishi kwa serikali ya China kuhusiana na picha zilizopeperushwa kwenye ruinga na mitandaoni zikiwaonyesha Wakenya wakilala barabarani baada ya kufurushwa kutoka makazi yao wakishukiwa kuwa na virusi vya corona.

Ilidaiwa kuwa serikali ya China ilichukua hatua hiyo baada kubainika kuwa visa vipya vya maambukizi ya corona nchini humo vilikuwa vikigunduliwa kutoka kwa wageni, haswa wa asili ya Afrika.

Hii ndio maana katika barua yake, Kenya ilisema inafahamu kuwa China inatekeleza kanuni mpya za kuzuia maambukizi ya ugonjwa wa Covid-19, ikiwemo kuwachunguza watu kwa wingi.

Kwa hivyo, Kenya inatambua kuwa China inalenga “kuzuia kuingizwa kwa visa vya Covid-19 ndani ya mkoa wa Guangzhou na maeneo mengineyo.”

Hata hivyo, Serikali ya Kenya inalalama kuwa baadhi ya hatua hizo “zimechangia baadhi ya raia wa China, haswa wamiliki wa nyumbani, kuwadhulumu wageni, haswa wa asili ya Afrika,”

Katika taarifa, Wizara ya Masuala ya Kigeni ya Kenya ilisema baadhi ya kuwasilishwa kwa barua yake ya malalamishi kwa ubalozi wa China, Nairobi, serikali ya China imetoa hakikisho kuwa iknafuatilia suala hilo.

“Watawala mkoani Guangzhou wametakiwa kuchukua hatua za haraka za kulinda haki za Waafrika walioathirika,” afisi ya ubalozi wa China, jijini Nairobi ikasema.

Wizara ya Mashauri ya Kigeni imewataka Wakenya wote nchini China kuwasiliana na

“Ubalozi wetu jijini Beijing iko tayari kushughulikia changamoto zozote ambazo zinaweza kuibuka. Utafanya hivyo kwa kushirikiano na utawala wa Chine”, wizara ikasema.

Ikaongeza, “Kwa kuzingatia kujitolea na ushirikano kati ya mataifa haya mawili, tunatarajia kuwa suala hili litatatuliwa haraka kwa manufaa ya Wakenya walioko China.”

Hata hivyo, Wakenya walioko nchini China wameitaka serikali ya Kenya kuwasaidia warejee nyumbani baadhi ya kushamiri kwa ubaguzi wa rangi dhidhi ya Waafrika baada ya taifa hilo kupata afueni kutokana na maambukizi ya virusi vya corona.

Wengi wao wamefurushwa kutoka nyumba zao na sasa wanaishi barabarani huku wengine wakitegemea wahisani kwa mahitaji kama chakula

Iliripotiwa kuwa polisi waliwafurusha kwa nguvu na kutwaa stakabadhi zao

Wakenya wengi wameisuta serikali ya China kwa kufumbia macho dhuluma zinazotendewa Waafrika wasio na hatia huku wakitaka mataifa mengine kupinga unyama huo.

Mkurupuko wa virusi vya corona uliripotiwa kwa mara ya kwanza jijini Wuhan, China mnamo Desemba 31, 2019. Na kufikia sasa taifa hilo limerikodi maambukizi 81,907 na vifo 3,336 kulingana na takwimu rasmi zilizotolewa na serikali ya nchini hiyo.

Hata hivyo virusi hivyo vimesambaa kwa kasi zaidi katika kote ulimwenguni haswa Amerika na Uropa ambapo vimesababisha vifo vya maelfu ya watu.

Tafsiri: Charles Wasonga

China kuharibu pesa zote kuzima maambukizi zaidi

Na MASHIRIKA

BENKI Kuu ya China imetangaza kuwa itaharibu pesa zote ambazo zimekusanywa na hospitali, mabasi na hata masoko katika maeneo ambapo virusi hatari vya Corona vimeshuhudiwa, kama njia moja wa kuzuia ueneaji wa virusi hivyo.

Mnamo Jumamosi, Benki Kuu iliagiza benki zote kuweka kando pesa zote zilizokusanywa katika maeneo ambapo virusi hivi vimesambaa, kuzisafisha halafu wazikabidhi benki hiyo.

Hii ni baada ya idadi ya watu ambao wameambukizwa homa hiyo kufika 70, 000 na walioaga dunia ni 1,670 kufikia Jumapili.

“Matrilioni ya pesa zimewekwa katika Benki Kuu kuanzia Januari 17 na kuna zile zilitoka katika eneo la Wuhan ambapo virusi hivi vilizuka,” alisema Fan Yifei, Naibu Gavana wa Benki Kuu ya China.

Benki hiyo ilisema kuwa itatumia miale ya mwangaza wa Ultra-Violet (UV) na viwango vya juu vya joto ili kuua virusi hivyo vya Corona katika pesa hizo.

Pesa hizo zitawekwa kando kwa siku 14 kabla ya kuanza kusambazwa tena.

Hata hivyo, Yifei alisema kuwa Benki Kuu itaongeza fedha katika mabenki ili kusaidia biashara zisizorote katika msimu huu ambapo nchi hiyo inapambana na janga hili na vita vya kibiashara kati ya Amerika na China.

“Wateja wataulizwa ni wapi walitoa pesa zao lakini hatuna uhakika kuwa hatua hii itasaidia katika vita dhidi ya virusi hivi,” akasema naibu msimamizi wa benki moja.

Kulingana na wataalamu wa masuala ya uchumi, virusi vya Corona vitaathiri uchumi wa China na mataifa jirani ambapo sekta ya utalii na biashara za kusafirisha vitu ng’ambo zimeanza kuathirika katika nchi za Taiwan, Korea na Thailand.

Kwingine, polisi wa Hong Kong wanaendelea kuwatafuta wezi walioiba karatasi za chooni zenye thamani ya Sh13, 000 kutoka kwa duka moja, jana.

“Dereva wa lori moja alisimamishwa na wanaume watatu waliokuwa na visu nje ya duka moja katika eneo la Mong Kok na wakaiba karatasi hizo za chooni,” akasema msemaji wa polisi.

Karatasi za chooni zimekuwa miongoni mwa bidhaa ambazo zimeadimika sana katika eneo hilo hata baada ya serikali kuwahakikishia kuwa bidhaa za matumizi ya kila siku zitaendelea kusambazwa kama kawaida.

Pia bidhaa kama mchele na spaghetti ambazo ni vyakula vinavyoliwa sana na Wachina vimepungua.

Wanafunzi kutoka Kenya walio China wasema serikali imewatelekeza

Na DIANA MUTHEU

CHAMA cha wanafunzi wa Kenya walio China (KENSWA) kimelaumu serikali kwa kuwatenga na kuwatelekeza watu katika nchi hiyo kukiwa na hatari kubwa wao kuambukizwa virusi vya Corona.

Chama hicho kimeiomba serikali kuwaondoa wanafunzi wote walio katika mji wa Wuhan ambayo imeathirika zaidi na virusi vya Corona.

Wanafunzi hawa walilaumu ubalozi wa Kenya huko China kwa kukosa kujibu barua waliotuma mnamo Januari 31 wakielezea changamoto zao.

Katika barua ya pili walioielekeza kwa Waziri wa Mambo ya Nje Bw Macharia Kamau mnamo Februari 5, 2020, viongozi wa wanafunzi hao walirejelea kuwa hali imezidi kuwa mbaya na wana wasiwasi mwingi na pia wazazi wao nyumbani wamejawa na hofu sana.

Pia walisema wana njaa kwa kuwa kupata mahitaji ya kila siku imekuwa changamoto.

Wanafunzi hawa walisema wako tayari kupimwa na hata kutengwa kwa siku 14 baada ya kuwasili nchini.

Homa hiyo ya China inayosababisha na virusi vya Corona ilizuka mnamo Desemba 2019 na kufikia Februari 7, 2020, watu 636 wamepoteza maisha na 31,000 wameambukizwa. Hii ni kulingana na takwimu za Tume ya Afya ya China.

Mnamo Januari 31, 2020, Shirika la Afya Ulimwenguni (WHO) lilitangaza virusi vya Corona kuwa tishio kubwa kwa afya ya binadamu na ambalo dunia nzima ilifaa kuchukua hatua za dharura kukabili.

KQ yasema haisitishi safari za kuenda China, aghalabu kwa sasa

Na ALLAN OLINGO

SHIRIKA la ndege la Kenya Airways, KQ limesema Jumatano halisitishi kwa sasa safari za ndege hadi China licha ya kitisho cha virusi vya Corona, lakini likaeleza wazi kwamba linafuatilia hali halisi.

KQ inasema hivi huku shirika la ndege la Uingereza – British Airways – likitangaza kusitisha safari zake za kuingia Beijing na Shanghai baada ya serikali ya nchi hiyo kushauri raia wake wasisafiri kuenda China hasa ikiwa sababu si za lazima.

Kwa upande wa shirika la Kenya ni kwamba linafuatilia hali jinsi ilivyo na litachukua hatua madhubuti kwa wakati mwafaka.

“Kufuta safari za ndege ni mojawapo ya hatua tunazoweza kuchukua, lakini hili litatokea tu ikiwa tutabainisha kwamba ipo hatari ya wazi,” imesema KQ Jumatano.

Hii ni licha ya balozi wa Kenya nchini China Bi Sarah Serem kulishauri shirika hilo lisitishe safari zake za kuingia katika taifa hilo hadi virusi hivyo vidhibitiwe.

Kaimu Afisa Mkuu Mtendaji wa KQ Allan Kilavuka amesema wanashauriana na serikali ya Kenya kuhusu ikiwa wanalazimika au ni lini watasitisha safari za ndege.

“Tunafuatilia matukio kila wakati na kila saa na tunashauriana na serikali kuhusu ni lini au ikiwa tunalazimika kusitisha safari,” amesema Bw Kilavuka.

Ndege za KQ huwa na safari tatu kila wiki za kutoka Nairobi-Guangzhou na Jumanne abiria wake mmoja aliwahiwa katika hospitali ya kitaifa ya Kenyatta (KNH) baada ya kushuka akitokea China akionyesha dalili za virusi hivyo ambavyo kufikia sasa vimewaua zaidi ya watu 130.

Kilavuka amesema ndege zinatunzwa likija suala la usafi na abiria wanavalia mavazi ya kuwakinga na kuzuia aina yoyote ya maambukizi ya Corona.

 

Kisa cha kwanza cha virusi hivyo kilitambulika Wuhan, katika mkoa wa Kati wa Hubei nchini China mnamo Desemba 2019.

Hofu tele China virusi hatari vikiua karibia watu 10

Na MASHIRIKA

MTU wa tisa amefariki China kutokana na aina mpya ya virusi ambavyo vimesambaa kwa kasi kote nchini humo, huku mamlaka ikithibitisha kwamba vinaweza kuenezwa kutoka mtu mmoja hadi mwingine.

Virusi hivyo vinafanana na vile vya SARS

Naibu mkurugenzi wa Tume ya Afya nchini China, Li Bin, amethibitisha kwenye kikao cha Jumatano jijini Beijing.

Mwanamume aliyekuwa na umri wa miaka 89 kutoka mji wa Wuhan ambao ndio kitovu cha mkurupuko huo alikuwa mhanga wa hivi majuzi wa aina mpya ya virusi hivyo vya mapafu vinavyosababisha aina fulani ya nimonia.

Visa vya maambukizi zaidi ya 440 sasa vimeripotiwa katika miji mikuu nchini China ikiwemo Beijing na Shanghai.

Shirika la Afya Duniani (WHO) linatathmini kuhusu kutangaza dharura ya afya ya umma kimataifa kuhusiana na virusi hivyo; jinsi ilivyofanya na homa ya nguruwe na Ebola.

Uamuzi utafanywa katika mkutano hii leo Jumatano.

Tume ya Afya Nchini China mnamo Jumatatu ilithibitisha kwa mara ya kwanza kwamba ugonjwa huo unaweza kuambukizwa kutoka kwa mtu mmoja hadi mwingine.

Ilisema watu wawili katika mkoa wa Guangdong walikuwa wameambukizwa kwa njia hiyo.

Katika taarifa tofauti, Tume ya Afya katika Manispaa ya Wuhan ilisema kuwa maafisa wa afya wapatao 15 mjini Wuhan pia wameambukizwa virusi hivyo, huku mmoja wao akiwa katika hali mahututi.

Wafanyakazi hao yamkini waliambukizwa virusi hivyo kutokana na kutangamana na wagonjwa hao.

Matabibu hao wote wamewekwa katika sehemu zilizotengwa huku wakitibiwa.

Ugonjwa huo uligunduliwa kwa mara ya kwanza mjini Wuhan, eneo la kati, Uchina, lenye watu milioni 11, mwishoni mwa mwaka uliopita.

Kwa sasa kuna visa 218 vilivyothibitishwa vya virusi hivyo Uchina kulingana na WHO.

Visa kadha pia vimethibitishwa kwingineko: viwili Thailand, kimoja Japan, na kingine Korea Kusini ambapo walioambukizwa walikuwa wamerejea majuzi kutoka Wuhan.

Rais wa China Xi Jinping ametoa wito kwa “juhudi za kila namna” za kudhibiti mkurupuko huo kulingana na vyombo vya habari nchini humo, ikiwemo “kutoa habari na kuchukua hatua za kuelekeza maoni ya umma.”

Mamlaka katika mataifa mengi ikiwemo Australia, Singapore, Hong Kong, na Japan zimezidisha uchunguzi wa abiria wa ndege kutoka Wuhan.

Mamlaka ya Amerika wiki iliyopita ilitangaza hatua sawa na hizo katika viwanja vya ndege vya San Francisco, Los Angeles na New York.

Virusi hivyo vinavyofahamika pia kama 2019-nCoV, vinaeleweka kuwa aina mpya ya virusi vya mapafu ambavyo havijawahi kutambuliwa hapo mbeleni katika binadamu.

Ghasia zachacha Hong Kong ikipinga utawala wa China

NA AFP

GHASIA zinaendelea kushuhudiwa mjini Hong Kong baada ya raia kupinga vikali udhibiti wa eneo hilo na serikali kuu ya China yenye makao yake jijini Beijing.

Hapo jana, polisi walilazimika kufyatua risasi na vitoa machozi hewani maelfu ya raia wakiandamana kupinga sera za China kutumika kwenye uongozi wa jiji hilo linalojitawala kivyake.

Waandamanaji hao walipiga mawe vituo vya kibiashara vinavyoaminika kumilikiwa na wafanyabiashara wanaounga serikali ya China ikiwemo afisi ya Shirika la habari la Xinhua.

Polisi nao waliwakabili waandamanaji hao walijitahidi sana kukabiliana na waandamanaji huku taarifa zikisema zaidi ya waandamanaji 100 walikamatwa na kuwekwa ndani ya magari matatu ya polisi hadi maeneo yasiyojulikana.

Kupitia taarifa, Xinhua ilikashifu waandamanaji walioshambulia afisi zake na kuwataja kama watu wasiofahamu wanachokitenda.

Maandamano hayo yanakuja baada ya serikali ya China mnamo Ijumaa kusema kwamba haitavumilia mabadiliko yoyote kwenye utawala wa serikali ya Hong Kong na nia ya uongozi huo kuanzisha masomo yanayowasisitizia raia wao kuonyesha uzalendo kwa taifa lao.

Huku waandamanaji jijini Hong Kong wakiwa hawaonyeshi dalili zozote za kukata tamaa na kuwa watulivu, utawala wa Beijing nao umekataa kuridhia mapendekezo ya kuwapa waandamanaji hao uhuru na demokrasia wanayopigania.

“Serikali yote ya Hong Kong inadhibitiwa na utawala wa China na sasa lazima tujitokeze na tupiganie demokrasia na haki yetu. Hatutakata tamaa hadi tupate kile tunachohitaji,” akasema Gordon Tsoi, 18 ambaye ni kati ya waaandamanaji wanaopigania utawala huru wa mji huo.

Polisi ambao wamelaumiwa pakubwa kwa kutumia nguvu kupita kiasi dhidi ya raia wamekuwa wakikataa kuidhinisha notisi ya kuruhusu maandamano ya amani yaandaliwe japo mara nyingi raia huwapuuza.

Baada ya miezi kadhaa ya maandamano, makabiliano kati ya polisi na raia yamekuwa jambo la kawaida huku Umoja wa Kimataifa(UN) ukionya kwamba hali isipodhibitiwa, uhasama kati ya China na raia wa Hong Kong utasambaratisha ukuaji wa mji huo kabisa.

“Uhuru wa kujikusanya au kuandaa mkutano unazidi kukandamizwa kwa kuwa polisi wapo kila mahali. Hata hivyo, tutazidi kupigania haki zetu za kikatiba,” akaandika mmoja wa waandamanaji Joshua Yong kupitia Twitter.

Tangu aingie mamlakani, Rais Xi Jinping amekuwa akilaumiwa kwa kukandamiza uhuru wa raia wa Hong Kong.

MWANAMKE MWELEDI: Jina lake hutikisa wanariadha duniani

Na KEYB

JINA lake linapotajwa, ulimwengu wa riadha humu nchini na kimataifa sharti umvulie kofia. Sio mwingine bali ni Vivian Jepkemoi Cheruiyot, mmojawapo wa wanariadha wa kike wanaoheshimika sana kutoka humu nchini.

Kwa takriban miongo miwili, mwanariadha huyu amekuwa malkia kwenye mbio za mita 3,000, 5,000, 10,000, na hata marathon, na katika harakati hizo kujishindia nishani kwenye mbio za kitaifa na kimataifa.

Lakini ni katika mbio za mita 5,000 ambapo Bi Cheruiyot ameng’aa na kuwa tishio kwa wanariadha hasa wa Ethiopia ambao kwa miaka wametawala mbio hizi.

Ni suala alilothibitisha mwaka wa 2016 kwenye michezo ya Olimpiki jijini Rio de Janeiro Brazil, alipotwaa nishani ya dhahabu kwenye mbio hizo, na hata kuvunja rekodi ya mashindano hayo. Pia, hapa aliandikisha vitabu vya kumbukumbu kwa kuwa Mkenya wa kwanza wa kike kushinda taji hilo. Aidha, alishiriki katika mbio za mita 10,000 na kushinda nishani ya fedha.

Anajivunia kuiwakilisha Kenya kwenye mbio za Olimpiki mara tatu. Alishiriki kwenye michezo ya Olimpiki kwa mara ya kwanza mwaka wa 2008 jijini Beijing, China.

Mwaka wa 2012 pia alishiriki kwenye michezo ya Olimpiki iliyoandaliwa jijini London, Uingereza, ambapo alitwaa nishani ya fedha katika mbio za mita 5,000, na ya shaba kwenye mbio za mita 10,000.

Aidha, ameshiriki katika mbio zingine humu nchini na kimataifa kama vile mashindano ya IAAF, mbio za marathon na hata michezo ya madola, na katika harakati hizo kujishindia nishani kochokocho.

Mwaka wa 2018 alishinda London Marathon nchini Uingereza. Mwaka huo huo alimaliza wa pili kwenye New York Marathon, nyuma ya mshindi, Mary Keitany.

Aidha, anashikilia rekodi ya kitaifa katika mashindano ya madola, kwenye mbio za mita 10,000.

Ufanisi huu umemfanya kutambuliwa sio tu humu nchini, bali pia katika ngazi za kimataifa. Mwaka wa 2012, alipewa tuzo ya Laureus Female Athlete of the Year, mwanariadha wa kike wa mwaka kwa mujibu wa jarida la riadha la Track and Field Magazine, nchini Amerika.

Aidha, Bi Cheruiyot alitambuliwa kama mmojawapo wa wanaspoti mahiri wa kike kwa mujibu wa Laureus World Sports Academy, na hivyo kuwa mwanamke wa kwanza Mkenya, na raia wa pili wa Kenya kutambuliwa kwenye jukwaa hili.

Sio hayo tu, mwaka wa 2009, alipewa tuzo ya ‘The State Order of the Grand Warrior (OGW)’ baada ya kutwaa nishani ya dhahabu kwenye mbio za mita 5,000 katika michezo ya Olimpiki, jijini Beijing.

Mzaliwa wa eneo la Kerio, kama watoto wengi eneo la bonde la ufa, ndoto yake kwenye riadha ilichongwa kwa kutazama baadhi ya magwiji kutoka sehemu hiyo.

Alianza kukimbia akiwa bado mdogo huku ari yake ikichangiwa hasa na mwanariadha Alice Timbilili kwani walikuwa wanatoka katika kijiji kimoja.

Nyota yake katika ulimwengu wa riadha ilianza kung’aa mwaka wa 1999, akiwa na umri wa miaka 15 pekee, alipomaliza wa pili na kutwaa nishani ya fedha katika mbio za IAAF World Cross-Country Championships.

Mwaka huo huo katika mashindano ya riadha ya ulimwengu kwa vijana – World Youth Championships, alishinda nishani ya shaba kwenye mbio za mita 3,000.

Ni hapa alipopata mwaliko kwenye kikosi cha watu wazima ili kushiriki kwenye mbio za All-Africa Games, ambapo alijinyakulia nishani ya shaba katika mbio za mita 5,000.

Huku Kenya ikizidi kutambuliwa kama taifa lililojaa vipaji katika riadha, Bi Cheruiyot kwa upande wake ametia bidii na kuhakikisha kwamba jina lake linaorodheshwa miongoni mwa magwiji wa fani hii.

Maporomoko ya ardhi yasababisha maafa China

Na AFP

BEIJING, China

WATU tisa wamefariki na wengine 35 bado hawajulikani waliko kufuatia msururu wa maporomoko ya ardhi yaliyoshuhudiwa katika mkoa wa Sichuan ulioko Kusini Magharibi mwa China, maafisa wa utawala wamesema.

Mhudumu mmoja wa shirika la uokoaji, mwenye umri wa miaka 33, ni miongoni mwa waliofariki katika mafuriko yaliyoangusha gari lao walipokuwa wakienda kuwasaidia watu walioathirika na maporomoko ya ardhi katika Kaunti ya Wenchuan, maafisa hao wakasema.

Maporomoko hayo na mafuriko yanatokana na mvua kubwa inayonyesha katika mkoa huo wa Sichuan na maeneo ya karibu.

Shirika la habari la serikali, Xinhua limesema mhudumu mwingine wa idara ya zimamoto alikuwa akipokea matibabu ya dharura, lilinukuu wasimamizi wa shirika la uokoaji la Sichuan.

Watu wengine sita wameripotiwa kujeruhiwa huku zaidi ya watu 100,000 wakihamishwa kutoka Wenchuan hasa maeneo ya milima ya Aba Tibetan na Oiang.

Mvua kubwa na maporomoko hayo ya ardhi yalivuruga mfumo wa usambazaji maji na umeme kwa maelfu ya makazi, kando na kuharibu madaraja na barabara zinazoelekea jiji la Chengdu, ambalo ndilo mji mkuu wa mkoa wa Sichuan.

Maafisa walisema kuwa wametuma mabasi 20 na helikopta mbili kuwaokoa watalii katika eneo hilo ambalo hutembelewa na watalii wengi.

Mlipuko katika kiwanda cha kemikali China wasababisha vifo vya watu 44

Na MASHARIKI

WATU 44 wameuawa huku wengine 600 wakijeruhiwa katika mlipuko uliotokea katika kiwanda kimoja cha kutengeneza kemikali ya kuangamiza wadudu mashariki mwa China, shirika la kitaifa la habari lilisema Ijumaa.

Mlipuko huo, ambao ulisababisha mtetemeko mdogo wa ardhi katika jimbo la Jiangsu, ndio wa hivi punde kusababisha maafa katika msururu wa ajali viwandani nchini humo ambazo zimewakera wananchi.

Mlipuko huo ulitokea Alhamisi usiku katika eneo la viwandani la Chenjiagang Industrial Park, jijini Yancheng.

“Hatimaye moto ulioandamana na mlipuko huo uliweza kudhibitiwa jana saa kumi alfajiri,” runinga ya kitaifa ikaripoti.

Watoto wa shule moja ya chekechea karibu na eneo hilo pia walijeruhiwa katika mlipuko huo.

Majeruhi walikimbizwa katika hospitali 16, 640 miongoni mwao wakitibiwa kwa majeraha madogo ya moto. Wengine 32 walipata majeraha mabaya zaidi na kulazwa katika hospitali hizo.

Zaidi ya wahudumu 3,500 wa afya waliletwa kuwahudumia waathiriwa wa mkasa huo.

Rais Xi Jinping ambaye yuko nchini Italia kwa ziara ya kikazi, aliamuru mashirika yote ya kutoa misaada yawasaidie waathiriwa ili “kudumisha uthabiti wa kijamii”.

Sharti asasi za serikali zichukue hatua zifaazo kuzuia kutokea kwa ajali kama hizo na wabaini chanzo cha mlipuko huo haraka iwezekanavyo, Xi akaongeza.

“Katika siku za hivi karibuni kumekwua na msururu wa ajali aina hiyo. Idara husika zinapasa kupata funzo ili kuzuia visa kama hivi,” taarifa hiyo ilimnukuu Rais Xi akisema.

Moto waenea

Moto huo uliotokea katika kampuni inayomilikiwa na Kampuni ya Tianjiayi Chemical, ulienea katika viwanda vingine vya karibu.

Takriban wakazi 1,000 katika eneo hilo jana walihamisha hadi maeneo salama kuwakinga dhidi ya athari za mlipuko huo, ukasema utawala wa jiji hili katika taarifa iliyotumwa katika ukurasa wake kwenye mitandao ya kijamii.

Uchunguzi unaendeshwa kubaini chanzo cha mkasa huo, lakini kampuni husika ambayo huzalisha aina 30 za kemikali, nyingine ikiwa rahisi kushika moto, imewahi kushtakiwa na kutozwa faini kwa kukiuka kanini za usalama mahala pa kazi, gazeti la China Daily lilisema.

Utawala wa mkoa wa Jiangsu umeazisha ukaguzi wa viwanda vinavyozalisha kimekali kulingana na ilani iliyochapisha katika vyombo vya habari Ijumaa.

Taarifa hiyo ilisema kuwa serikali itafunga kiwanda chochote cha kemikali ambacho kitapatikana na hatia na kukiuka sheria na kanuni kuhusu kemikali hatari.

Msururu wa ajali ambazo zimekuwa zikitokea nchini China viwandani na katika matimbo ya madini umewakera raia wa nchini. Inasemekana kuwa visa hivyo vimetia doa katika ukuaji wa kiuchumi uliodumu kwa miongo mitatu nchini humo.

Misikiti yaagizwa ipeperushe bendera, ifunze waumini kuhusu chama tawala

Na AFP na VALENTINE OBARA

BEIJING, UCHINA

MISIKITI yote imeagizwa kupeperusha bendera za kitaifa ili “kuonyesha moyo wa uzalendo” miongoni mwa Waislamu.

Kulingana na Chama cha Uislamu Uchina ambayo ni idara ya kiserikali, bendera hizo zinafaa kupeperushwa mahali ambapo zinaonekana vyema msikitini.

Hatua hii “itaimarisha zaidi uwezo wa kuelewa maadili ya kitaifa na ya umma, na kueneza moyo wa uzalendo miongoni mwa Waislamu wa makabila yote,” kwa mujibu wa taarifa ya chama hicho.

Misikiti pia inahitajika kubandika wazi maelezo kuhusu misimamo ya chama tawala cha Communist, na kueleza waumini wao jinsi misimamo hiyo inavyowiana na maandiko ya dini ya Kiislamu ili ikite mizizi moyoni mwa waumini.

Chama cha Uislamu Uchina ni shirika la kiserikali lililo na mamlaka ya kuidhinisha Maimamu.

Barua hiyo ilizidi kusema kuwa wafanyakazi misikitini wanafaa kuandaa kuwe na mafunzo kuhusu katiba ya Uchina na sheria nyingine muhimu, hasa sheria mpya ya dini iliyofanyiwa mabadiliko hivi majuzi.

Chama hicho kilidai kuwa lengo kuu ni kufanya misikiti iwe maeneo ya elimu kuhusu chama tawala na sheria za nchi mbali na kuwa maeneo ya ibada na hivyo basi kuwezesha Waislamu wawe wazalendo.

Kuna Waislamu karibu milioni 23 nchini Uchina na dini hiyo ni miongoni mwa tano zinazotambuliwa rasmi na Chama cha Communist ambacho inahusishwa na wasioamini Mungu.

Wanachuo kizimbani kwa kuwapora wawekezaji wa Uchina mamilioni

Na RICHARD MUNGUTI

WANAFUNZI wawili wa chuo kikuu kimoja jijini walioshtakiwa Jumatatu walidaiwa ni wanachama wa genge la majambazi linaloongozwa na mwanamke Mkenya Levanda Akinyi Ogilo na wanawake wengine wawili raia wa Tanzania.

Kiongozi wa mashtaka Solomon Naulikha alimweleza hakimu mkuu Francis Andayi kwamba kesi tano walizoshtakiwa Tolbert Ouma Odhiambo na Don Odhiambo Ogutu (pichani) zitaunganoshwa na zile walizoshtakiwa Akinyi na wenzake.

Sasa kesi dhidi ya Odhiambo na  Ogutu zitaunganishwa na zile dhidi ya Akinyi alyeishtakiwa pamoja na raia watatu wa Tanzania Bi Teresa Richard , Bi Rose Richard, na Shimton Ambasa Khan.

Washtakiwa wanadaiwa waliwalenga wawekezaji kutoka Uchina pesa na mali ambayo thamani yake ni zaidi ya Sh8.4 milioni .

Bi Levanda Akinyi Ogilo alifikishwa kortini baada ya hakimu mkuu wa Nairobi Bw Andayi kuwaamuru polisi wamfungulie mashtaka baada ya kumzuia rumande kwa muda wa wiki moja.

Bi Akinyi alishtakiwa pamoja na raia watatu wa Tanzania Bi Teresa Richard , Bi Rose Richard, na Shimton Ambasa Khan.

Washtakiwa hao walikabiliwa na mashtaka zaidi ya kumi ya kuvunja nyumba na kuiba mali na pesa kutoka kwa Mabw Zhang Gong , Wan Baihui, Bi Zhia Qian, Moses Kironyo Pratt na  Mohamud Hussein Egeh.

Washtakiwa hao wanne walikana kuiba Vipakatalishi, Dola za Kimerekani, Euro na sarafu za Uchina zote zenywe thamani ya zaidi ya Sh8,463,000.

Wakili John Swaka anayewakilishtakiwa hao wote aliomba mahakama iwaachilie kwa dhamana akisema Akinyi ni mama aliyeacha watoto kwa nyumba.

Bw Swaka alisema washtakiwa hao walitiwa nguvuni Machi 30, 2018 na wamekuwa wakizuiliwa katika vituo mbali mbali vya polisi.

Hakimu Mkuu akisikiza kesi hiyo. Picha/ Richard Munguti

Jambo hilo lilimuudhi Bw Andayi ndipo akamwagiza kiongozi wa mashtaka Bw Solomon Naulikha apeleke uamuzi wa mahakama kuu katika kila kituo cha polisi jijini Nairobi unaosema hakuna mshukiwa wa wizi au kosa lingine lolote anayepasa kuzuiliwa kama hakuna shtaka la kushikilia.

“Lazima maafisa wote wa polisi wafahamishwe kwamba lazima wawasilishe kortini shtaka la kushikilia ndipo wakubaliwe kumweka rumande mshukiwa wakimhoji,” aliamuru hakimu.

Bw Andayi aligadhabishwa na tabia ya polisi ya kuwazuilia washtakiwa kwa siku nyingi kabla ya kuwashtaki.

Washtakiwa hao walikuwa wakizuiliwa katika kituo cha Kilimani kwa zaidi ya siku saba polisi wakiandikisha taarifa za mashahidi.

Akiomba washtakiwa hao wazuiliwe kuhojiwa na kuwasaidia polisi kutambua wanakoweka bidhaa walizoiba , hakimu alifahamishwa washtakiwa hawa hutorokea Tanzania.

“Punde tu washukiwa hawa wanapotekeleza uhalifu wanatorokea nchi jirani ya Tanzania,” alisema Konstebo James Wanjohi wa idara ya upelelezi.

 

CCTV

Hakimu alifahamishwa kwamba washukiwa hao wametambuliwa katika picha za CCTV ambapo wanaonekana wakiwa wamejihami na bastola.

“Punde tu wanapotekeleza uhalifu washukiwa hawa hutorokea nchi jirani ya Tanzania,” alisema Bw Wanjohi aliyeongeza , “ kwa muda wa miaka mitatu tumekuwa tukichunguza mienendo ya washukiwa hawa watano.

Mahakama ilifahamishwa washtakiwa walitekeleza wizi huo katika mtaa wa Kilimani Nairobi miezi ya Feburuari na Machi 2018.

Waliachiliwa kwa dhamana ya kati ya Sh300,000 hadi  Sh1milioni pesa tasilimu hadi. Akinyi atalipa zaidi ya Sh3milioni ikiwa atafaulu kulipa dhamana hiyo ndipo aachiliwe. Anakabiliwa na kesi tano tofauti.

Kesi zitasikizwa kati ya Mei 3 hadi 10 mwaka huu.

Mtoto azaliwa miaka minne baada ya wazazi wake kuangamia ajalini

MASHIRIKA na CHARLES WASONGA

MIAKA minne baada ya mke na mume kufariki gari lao lilipohusika katika ajali, mtoto wao alizaliwa na mama mbadala kulingana na ripoti za vyombo vya habari nchini China.

Mtoto huyo aliyepewa jina, Tiantian, alizaliwa nchini China na mwanamke wa asili ya nchi ya Laos, gazeti la The Beijing News limeripoti.

Inasemekana kuwa nyanya na babu za mtoto huyo wamethibitisha kuwa na uhusiano naye, wa kinasaba, kupitia uchunguzi wa chembechembe za DNA.

Wanandoa hao, raia wa China, ambao walifariki mnamo 2013 walikuwa wamehifadhi viinitete (embryos) kadha kwa matumaini ya kupata mtoto kwa mbinu ya kisiasa, maarufu kama, “In vitro Fertilization” (IVF).

Hii ni kutokana na sababu kwamba mke hakuwa na uwezo wa kupata mimba kwa njia ya kawaida.

Baada ya ajali, wazazi wa wanandoa hao walijaribu mbinu zote kupitia njia za kisheria wakitaka waruhusiwe kutumia viinitete hivyo.

Mtoto huyo mvulana alizaliwa mnano Desemba 2017 na mama mbadala lakini gazeti la The Beijing News liliripoti kisa hicho wiki hii.

Gazeti hilo lilielezea jinsi kukosekana na kisa cha awali aina hiyo kiliwalazimu wazazi wa wanandoa hao kupitia visiki vya kisheria kabla ya mama huyo mbadala kuruhusiwa kubeba watoto hao tumboni mwake.

Ajali hiyo ilipotokea, viinitete hivyo vilikuwa vimehifadhiwa salama katika Hospitali ya Nanjing katika mazingira baridi zaidi ndani ya tangi la hewa ya Nitrojeni.

Mahakama ilitoa idhini ya wazazi wanne wa wanandoa hao kumiliki mayai hayo ambayo yalikuwa yameunganishwa kuzaa viinitete.

Kulingana na ripoti hizo, hamna kesi za awali za aina hiyo ambayo ingewaruhusu wazee hao kurithi viinitete vya wanao vilivyohifadhiwa.

 

Vizingiti

Changamoto nyingine iliyowakabiliwa na jinsi ya kupata mama mbadala. Kwa kuwa huduma hiyo imepigwa marufuku nchi China, walilazimika kuangazia ng’ambo na hatimaye wakatua nchini Laos ambako huduma hizo sio marufuku.

Shida nyingine iliyowakabili ni kwamba hakuna shirika la ndege lililokubali kusafirisha viinitete hivyo, hali iliyowalazimu kuvisafirishwa kwa barabara kwa siku nyingi.

Nchini Laos, kiinitete kimoja kiliwekwa ndani ya tumbo ya mama mbadala na mnamo Desemba 2017 mtoto mvulana alizaliwa.

Uraia wa mtoto huyo kwa jina Tiantian, ni changamoto nyingine ambayo wazee hao walikumbana nayo.

Kwa hivyo, ilibidi mama huyo kumzalia mtoto nchini China wala sio Laos, baada ya mama huyo kuingia humo (China) kama mtalii.

Kwa kuwa mtoto huyo hakuwa na wazazi, iliwalazimu wazee hao kupeana damu zao ili uchunguzi wa DNA ufanywe kubaini kuwa alikuwa mjukuu wao halisi na kwamba wazazi wake walikuwa raia halisi wa China.

Rais wa China akaangwa kwa nia yake ya kusalia madarakani milele

Na AFP

BEIJING, CHINA

MPANGO wa Rais wa China Xi Jinping kutaka kuwa kiongozi wa maisha umewakera, na kuwashangaza watu wengi nchini humo.

Mmoja wao ni mhariri wa gazeti linalomilikiwa na serikali Bw Li Datong ambaye juzi alitumia maneno makali, ya lugha moja ya kigeni, mbele ya halaiki akilaani njama hiyo ya chama tawala cha Kikomunisti, Communist Party.

Chama hicho kinadai kuwa “umma unaunga mkono” mswada wa sheria unaopania kubatilisha kipengee cha Katiba kinachodhibiti mihula ambayo rais anapaswa kuhudumu.

Bunge la nchini hiyo, linalodhibitiwa na chama hicho tawala, linatarajiwa kupitisha mswada huo Jumapili.

Li ni miongoni mwa raia ambao wamekaidi amri ya serikali na kulalamika hadharani kuhusu mswada huo.

“Nilishangazwa na tangazo hilo. Sikuamini kwamba Rais Xi na chama chake wangechukua hatua hiyo. Inasikitisha zaidi,” Li, 66, ambaye ni mhariri wa gazeti la China Youth Daily alisema kwa lugha ya Kiingereza.

Li alipata umaarufu kimataifa, alipokitaka chama cha National People’s Congresss (NPC), kupinga marekebisho hayo ya katiba.

Kupitia barua ya wazi aliyoiandika wiki jana, mhariri huyo alionya kuwa hatua hiyo “itapanda mbegu ya uhasama ya fujo nchini China.”

“Msipojitokeza wazi wazi na kupinga hatua hii, watadhani kwamba sote twakubaliana nao,” Li akaambia shirika la habari la AFP.

Barua hiyo iliibua msisimko mkubwa miongoni mwa Wachina kwenye mitandao ya kijamii wiki jana, hali iliyopelekea kuzima mjadala kuhusu suala hilo.

Dai kuwa umma unaunga mkono hatua hiyo, kwa kauli moja, liko kwenye taarifa ya marekebisho yaliyopendekeza katika kikao cha ufunguzi wa mkutano wa kila mwaka wa NPC mnamo Jumatatu. Wabunge wote wameelezea imani kwamba watapiga kura ya “ndio” mnamo Jumapili.

Lakini watu wengi nchini China- kuanzia wafanyabiashara, makundi ya akina mama, walimu, viongozi wa kidini na maafisa wastaafu- wamepinga hatua hiyo kupitia mitandao ya kijamii na mahojiano na wanahabari wa kigeni.

China yaipa Kenya msaada wa mchele magunia 90,000

Na WINNIE ATIENO

SERIKALI ya Uchina imeipa Kenya msaada wa mchele ili kukabiliana na baa la njaa linaloendelea kukumba sehemu mbalimbali humu nchini.

Akipokea msaada huo wa magunia 90,000 ya mchele katika bandari ya Mombasa, Jumamosi, Waziri wa Ugatuzi Eugene Wamalwa alisema chakula hicho kitatolewa kwa wakazi wanaokumbwa na baa la njaa kukabiliana na janga hilo.

Aidha, Bw Wamalwa alisema serikali imeweka mikakati kabambe ya kukabiliana na njaa ikiwemo kuimarisha kilimo cha unyunyiziaji mimea maji.

Aliilaumu kiangazi kusababisha njaa hususan katika kaunti za maeneo kame kama Wajir, Mandera, Garissa na Isiolo.

“Maafisa husika wafanye bidii ili chakula hiki kiwafikie wahanga wa njaa. Wakenya msiwe na wsiwasi msaada umefika, sasa kuna chakula.

Mchele huu utapelekwa Isiolo ambapo kuna hatari ya njaa, vile vile Wajir, Garissa, Mandera miongoni mwa sehemu nyingine humu nchini,” akasema waziri huyo.  Alisema kuna uhaba mkubwa wa mchele humu nchini.

“Tuna mahindi, maharagwe na mafuta ya kupikia; kilichobakia ni mchele ambao tunaagiza sababu ya uhaba.  Ni majuzi tu ambapo tulizindua ujenzi wa bwawa la Thiba huko Kirinyaga ambalo litaongeza zao la mchele katika mradi wa umwagiliaji maji wa Mwea,” Bw Wamalwa akasema.

Ujenzi huo utakapomalizwa, Bw Wamalwa alisema utazalisha mchele wa tani 80,000 hadi 160,000 kwa mwaka. Ujenzi huo utagharimu Sh20 bilioni. Kwa sasa mradi huo unazalisha tani 80,000 za mchele.

“Tutaimarisha miradi kadhaa ya umwagiliaji maji eneo la Nzoia ambayo pia itaongeza mazao, ile ya Soin-Koru miongoni mwa mingine,” akasema Bw Wamalwa. Katika eneo la Pwani, Kaunti ya Tana River inakabiliwa na ukosefu wa mazao kutokana na kiangazi.

Gavana Dhadho Godhana atanunua tani 40 ya mahindi kwa wakulima wa Bura ili kusambaza kwa wakazi wanaokabiliwa na baa la njaa kutokana na kiangazi.