Waumini wafokea pasta dikteta

Na TOBBIE WEKESA

UGWERI, RUNYENJES

WAUMINI wa kanisa moja lililoko hapa walitishia kumtimua pasta wao wakidai alikuwa dikteta.

Waumini hao walikasirishwa na uamuzi wa pasta huyo kuweka kiwango cha chini cha sadaka ambacho kila muumini alifaa kutoa.

Kulingana na mdokezi, baada ya ibada pasta alitoa tangazo kwa waumini wote.

“Waumini wapendwa ninalo tangazo moja,” pasta alianza kusema.

Waumini walitulia kumsikiliza pasta.

“Nimehudumu na nyinyi miaka mingi. Tumefanya maombi mengi sana tukitaka Mungu atufungulie milango ya ufanisi,” pasta aliwaeleza waumini. Kila wakati hatupigi hatua yoyote. Naona ni kama wengine wenu huwa hamuombi. Kuanzia leo hakuna mtu kuja na sadaka ya shilingi hamsini,” pasta alitangaza.

Inadaiwa waumini walianza kuangaliana huku wakisemezana kwa sauti za chini.

“Huyu mtu leo amevuta bangi ya wapi? Ameona sisi tunapalilia pesa kwetu,” muumini mmoja alisikika akisema.

Duru zinasema pasta alianza kutaja miradi iliyofaa kutekelezwa.

“Tuna miradi mingi sana ya kutekelezwa. Iwapo utakuja na sadaka chini ya kiwango nilichotaja, usilete hapa. Itakuwa bora hata usije kanisani,” pasta aliwaeleza waumini.

Habari zilizotufikia zinasema waumini waliinuka na kuanza kumfokea pasta.

“Sisi tutaleta chochote tutakachopata hata kama shilingi kumi,” muumini alifoka.

Inadaiwa pasta alishindwa kuwadhibiti waumini.

“Kwanza hizi nguo unazobadilisha kila Jumapili tunashuku unatumia sadaka yetu kuzinunua. Tutachunguza,” pasta alifokewa.

Duru zinasema waumini hawakumpa pasta muda kujieleza.

“Wewe mwenyewe huna chochote. Sadaka yenyewe huwa hutoi. Unatupa masharti kama nani,” pasta alizomewa.

Kwa kuhofia usalama wake, pasta alianza kuomba msamaha.

“Wewe ni dikteta. Na ukiendelea hivi hutakaa hapa,” waumini waliapa.

Buda aliyefumaniwa alipa Sh0.5m

Na MWANDISHI WETU

KAGIO, KIRINYAGA

BUDA eneo hili alilazimika kulipa mwanamume mwenzake nusu milioni jamaa zake wakishuhudia baada ya kufumaniwa akipapasa mke wa mwenyewe.

Mume wa mwanadada alikuwa amepashwa kuhusu vituko vya buda na akaamua kumkomesha.

“Mke wako si mwaminifu. Kila uendapo safari ndefu, amezoea kualika mwanamume huku kwako. Chunguza na utaujua ukweli,” jirani alimdokezea.

Jamaa alikuwa dereva wa malori yaliyosafirisha bidhaa kutoka Mombasa hadi Kigali.

Habari hizo zilikuwa sawa na nyundo iliyomteremkia utosini.

Alijiunga na wanaume wenzake katika baa jioni hiyo kujaribu kuyafukuza mawazo mazito yaliyomkosesha furaha. Ni huko katika baa alikozinduliwa na kuelezwa namna ya kufanya.

“Patafuka moshi kisha palipuke moto! Kuna mtu atakayeumia,” jamaa alisema.

Asubuhi ya siku iliyofuata, aliagana na mkewe akamwambia anafunga safari ndefu ya kuvuka mpaka hadi nchini DRC.

Alipoondoka, badala ya kuenda mbali, alifika nyumbani kwa rafikiye. Alikaa huko kwa siku nne na siku ya tano, jirani alimpigia simu.

“Mchovya asali ashafika tayari. Usikawie. Njoo mara moja utawakuta,” jirani alimpasha kwa simu.

Moyo ulimdunda kadri alivyopiga hatua kukaribia kufika kwake.

Alipobisha, mkewe alikataa kufungua.

“Fungua hapa mara moja! Mimi ni mumeo nimerudi,” jamaa alipaza sauti.

“Uongo! Uongo! Mume wangu kanambia amesafiri kuelekea nchi jirani. Wewe ni mwongo,” mke alisisitiza.

“Mumeo aliyekwambia atafunga safari aligundua unamla kivuli na amerudi. Usipofungua, nauvunja mlango na kumwaga damu,” jamaa aling’aka kwa hasira.

Mama yake ndiye alifika kumtuliza. Jamaa za mchovya asali waliitwa naye jamaa akasema bila nusu milioni angeua mtu.

Ilibidi alipwe pesa hizo ndipo alipoutupa upanga na kisu chini.

Mchovya asali alipitishwa mlango wa nyuma huku aibu ikimfunika kama blanketi akiafiki methali isemayo: Siku za mwizi ni arubaini.

Wazee wadai ‘kitu kidogo’ kwa mganga

Na TOBBIE WEKESA

MSAKASA, Bungoma

KIZAAZAA kilizuka eneo hili baada ya wazee kumlazimisha mganga kuwagawia sehemu ya faida inayotokana na kazi yake au waivuruge.

Kulingana na mdokezi, wazee kadha kijijini walikusanyika na kuelekea kwa mganga.

“Vipi mzee mwenzetu. Umekuwa mganga maarufu. Hela umejizolea nyingi sana. Tumejileta hapa ili utumegee kidogo,” mganga alielezwa.

Duru zinasema mganga aliwaangalia wazee hao kisha akaanza kuwazomea.

“Nimelelewa na nyinyi hapa. Nimezeeka na nyinyi. Mimi sipendi watu wazembe,” mganga aliwakemea wazee.

Inadaiwa wazee hawakutishika na semi za mganga.

Waliapa kutoondoka hadi mganga atimize maombi yao.

“Hapa hatutoki mikono kavu. Hii mali yote umepata kutokana na kazi ya uganga. Hakuna vile utafurahia kula nyama na sisi tunapambana na mboga za matawi,” wazee walifoka.

Duru zinasema mganga alitishia kuwachukulia hatua wazee hao.

“Naona mmeanza kuingilia kazi yangu. Kama mnataka kula nyama kama mimi njooni niwafunze kazi,” mganga aliwaambia wazee wenzake.

Inaarifiwa kuwa wazee walitishia kuvuruga kazi ya mganga.

“Kwa muda mrefu tumekupa amani na utulivu ili ufanye kazi yako vyema. Umetajirika kwa kutapeli watu na tumekuwa tukinyamaza tukijua vituko vyako. Hata sisi tunakuchukulia hatua na tuone nani ataenda hasara,” wazee walitishia.

Habari zilizotufikia zinasema wazee waliapa kuwaonya watu kijijini na nje ya kijiji dhidi ya kuenda kwa mganga.

“Huwa unawadanganya watu kuwa wewe ni daktari wa kutibu magonjwa yote ilhali hukuweza kumtibu mkeo. Wewe ni mkora na tutawatangazia watu,” wazee walitisha.

Mdaku aliarifu kuwa, mganga alipoona kazi yake imo hatarini, aliwarai wazee wawe watulivu.

“Niko tayari kutimiza maombi yenu. Msiniharibie kazi,” mganga aliwarai wazee.

Kioja mama akiuza shamba aponde raha

Na JOHN MUSYOKI

KIVAA, MASINGA

WAKAZI walishuhudia sinema ya bwerere mwanamke mmoja alipoamuru nyumba ya mwanawe ibomolewe ili auze shamba alikoijenga.

Siku ya kisanga mke wa jamaa alipokuwa akifanya shughuli zake nyumbani, alipigwa na mshangao, mama wa mumewe alipokita kambi kwake na watu wasiojulikana.

Alianza kumgombeza mkaza mwanae akimtaka aondoke katika shamba lake.

“Wewe na mwanangu nataka mtoke kwa shamba langu. Chukua kilicho ndani nataka kuuza shamba hili la marehemu mume wangu,” mama alisema.

Maneno ya mwanamke huyo yalishangaza.

Watu walianza kunong’onezana huku na kule huku kila mmoja akitoa kauli yake kuhusu alichodhani kilipelekea mwanamke huyo kuamua kumfurusha mwanawe na mke wake.

“Mwanamke huyu ni kisirani sana. Hata kabla ya mumewe kuaga dunia alikuwa akidai kuishi maisha ya raha mstarehe lakini mumewe wakati huo hakumpa nafasi ya kumkalia chapati,” mmoja wa majirani wa mama huyo alisema.

Naye mwanamke mwingine alinukuu maneno ya mwanamke huyo kabla ya kifo cha mumewe, akidai alisema kuwa: “Mume wangu amekuwa akininyima raha kwa muda mrefu. Akitoka katika dunia hii nitatawala na kuishi maisha ya raha. Nitakuwa ninakula chakula nikipendacho kila siku. Shamba nitauza na mifugo pia na mwanangu akileta pang’ang’a nitamfunza adabu.”

Bila kujali watu waliokusanyika, mwanamke huyo aliamuru nyumba ya mwanawe ibomolewe.

Aliuza shamba hilo na ikabidi mke wa mwanawe kwenda kwa wazazi wake kwa kuwa wakati wa kisanga hicho mumewe hakuwa karibu.

Wakazi walikashfu kitendo cha mwanamke huyo ila hakuna aliyethubutu kuingilia kati kwa kuwa mwanamke huyo alikuwa moto wa kuotea mbali.

“Tamaa ya pesa itampeleka mwanamke huyu wapi? Sasa ameuza shamba mpaka kaburi la mumewe ili aponde raha mwanawe akiteseka,” mwanakijiji mmoja alilalamika.

Hata hivyo haikujulikana mwana wa mwanamke huyo alichukua hatua gani baada ya mamake kubomoa nyumba yake na kuuza shamba.

Watoto wa demu wadharau sponsa

Na JOHN SAMUEL MUTUKU

BAHATI, NAKURU

POLO wa eneo hili aliyekuwa akijiandaa kuoa alipata mshangao atakaochukua muda mrefu kusahau maishani mwake baada ya kumtembelea mchumba wake na badala ya kukaribishwa, akadharauliwa na watoto.

Jamaa aligundua demu aliyekuwa akimhadaa hana watoto na hajawahi kuolewa, alikuwa mama wa watoto wanne na alikuwa ametorokwa na mumewe ambaye alikuwa tajiri.

Vile vile, mwanadada alikuwa akibadilisha wanaume na hata kuwapeleka nyumbani na kuwatambulisha kwa watoto wake kama baba yao.

Kulingana na mdokezi jamaa alikutana na demu mjini Nakuru na baada ya kuchumbiana kwa miezi kadhaa, wakaamua kwenda kwa demu.

Polo alijiona wa maana sana akiendesha gari. Walipofika nyumbani kwa demu, polo alikaribishwa na watoto wanne waliovalia mavazi mazuri mazuri.

“Hawa ni kina nani?” polo alimuuliza demu wakiwa bado ndani ya gari.

“Hawa watoto smart ni wa dadangu ambaye hufanya kazi jijini Nairobi. Usione ajabu wakiniita mum,” demu alieleza akitabasamu.

Mum, huyu ni dad wa aina gani umetuletea?” mmoja aliuliza polo alipotoka katika gari.

“Tazama anaendesha probox, gari lisilo zuri kama la dad wa kwanza,” mtoto wa pili alisema.

“Na hata mavazi yake si mazuri kama yule dad aliyetutoroka,” wa tatu naye alishindwa kunyamaza.

“Kwa hivyo wewe ndiwe mama wa watoto hawa ilhali umekuwa ukinidanganya hujawahi kupata mtoto hata mmoja?” polo alishangaa.

Badala ya kuingia ndani ya nyumba, polo aliingia katika probox yake na kuondoka mbio mbio.

“Itakuwa vigumu kuwaamini kina dada wa siku hizi. Baadhi yao ni mashetani wakubwa,” jamaa alisikika akiambia rafiki yake.

 

Fisi aibiwa tairi akila vya haramu

Na TOBBIE WEKESA

ROYSAMBU, Nairobi

KIZAAZAA kilizuka eneo hili polo alipokatiziwa raha ya kuchovya asali katika chumba cha mpenzi wake baada ya gari lake kung’olewa magurudumu.

Inasemekana gari la polo liling’olewa magurudumu dakika chache baada ya kuliegesha kando ya barabara iliyopita karibu na duka moja.

Kulingana na mdokezi, mwenye duka aliamua kung’oa magurudumu ya gari akidai kwamba polo alikuwa na mazoea ya kuegesha gari lake mbele ya biashara yake na kuelekea kwa chumba cha mpenzi wake.

“Huyu kijana amenizoea sana. Kila wakati akija kumuona mrembo wake lazima aegeshe gari lake hapa. Haoni kwamba anaathiri biashara yangu,” mwenye duka alifoka huku akielekea kulikokuwa gari.

Duru zinasema wengi walilifahamu gari hilo pamoja na mwenyewe.

“Mwenye hili gari yuko tu katika chumba kimoja sehemu hii. Lazima anakula mali yake polepole. Hatatoka saa hizi,” jamaa mmoja alisikika akisema.

Habari zilizotufikia zinasema mwenye duka alianza kung’oa magurudumu huku majirani zake wakimshangilia.

“Ng’oa magurudumu yote. Anaturingia hapa kana kwamba sisi hatuwezi kununua V8,” sauti zilisikika zikisema.

Inadaiwa kelele hizo zilimfanya polo kusitisha shughuli nzima ya kurina asali na kuteremka kubaini kilichokuwa kikiendelea.

Alipigwa na butwaa kupata watu wamelizingira gari lake bila magurudumu mawili ya mbele.

“Mwenyewe ndiye huyu hapa. Bosi leo lazima utatembea kwa miguu hadi kwako,” polo alifokewa.

Inasemekana polo aliwaka kwa hasira akimlaumu mwenye duka kwa kucheza na gari lake la pesa nyingi.

“Sijaegesha gari kwako. Liko katika egesho la umma na hata kama lingekuwa kwako, hauna ruhusa la kufanya hivi. Utalipia ujinga wako,” jamaa alisema na kutisha kuwaita maafisa wa polisi. Alilipa baadhi ya vijana kurudisha magurudumu na akaondoka.

Polo auguza nyeti kisiri nyumbani

Na JOHN MUTUKU SAMUEL

PIPELINE, NAIROBI

POLO mtaani hapa alijifungia ndani ya nyumba kwa siku kadhaa kujiuguza baada ya kufinywa sehemu nyeti na kidosho aliyejaribu kumpapasa wakiwa kwenye matatu.

Jamaa aligundua kwamba, si wanawake wote wa kudhalilishwa.Kulingana na mdokezi, polo alikuwa na mazoea ya kutongoza na kudhalilisha wanawake wa kila sampuli.

Alifanya mambo hayo hadi akawa mzoefu, woga ukamuondoka, akawa tayari kuwatesa wanawake.

Siku ya tukio, polo alisimama steji kusubiri demu mmoja aliyevalia sketi fupi alipowasili.

“Hili totoshoo siliachi, wallahi billahi siliachi. Lazima nilitongoze litake lisitake,” polo aliambia makanga.

Polo alihakikisha kwamba aliketi kiti kimoja na demu huyo. Baada ya salamu alianza kurusha mistari.

“Vipi dada, wapendeza mno,” polo alisifia.

“Shukran ila kaka mie ni mke wa mtu. Nishapita kiwango cha kutongozwa,” demu alitoa msimamo.

“Siku hizi uwe umeoa au umeolewa, kutongozana ni kawaida dada,” polo alijibu.

“Utongoze nani? Jipe shughuli mhuni wewe,” dada alikuja juu.

Ghafla taa garini ilizimika.

Polo alichukua fursa hiyo kunyoosha mkono kuelekea kwenye kifua cha dada.

Kisura aliudaka ule mkono, akazamisha kucha zake kali kisha akamkamata nyeti zake na kuanza kuzifinya kisawasawa.

Polo alijaribu kupiga nduru za kuomba msaada akashindwa. Alifuta jasho na kamasi jingi likamtoka.

“Utarudia kuwatongoza wengine?” demu alimnong’onezea.

Polo aliishia kujibu kwa ishara kwamba asingerudia.

“Najua steji unayoshukia. Shuka na usitazame nyuma,” demu alimshauri.

Polo alipoachiliwa, alichechemea kwa tabu hadi akashuka garini. Hakutazama nyuma. Alielekea nyumbani kujiuguza majeraha.

“Huyo sio wale wanawake ambao nimekuwa nikidhalilisha,” jamaa alijiambia kimoyomoyo.

Polo 2 wakabana demu akijifungua

Na TOBBIE WEKESA

KABARNET, BARINGO

POLO alipigwa na butwaa alipowasili katika hospitali moja hapa na kumpata jamaa mmoja akimsubiri mkewe kujifungua.

Inadaiwa jamaa huyo alifika hosipitalini baada ya kujuzwa na mwanadada kuhusu kulazwa kwake hospitalini baada ya kupelekwa na mumewe kujifungua.

Kulingana na mdokezi, jamaa alikuwa mpango wa kando wa kidosho.

Inadaiwa kwamba mimba aliyokuwa amebeba kipusa haikuwa ya mumewe bali ya mpango wa kando.

“Niko hospitalini karibu najifungua. Njoo umuone mwanao kabla ya mume wangu kufika,” mwanadada alimweleza jamaa kwa simu.

Duru zinaarifu kwamba jamaa aliwasili asubuhi na mapema hospitalini.

Aliarifiwa na wahudumu atulie katika chumba cha mapokezi amsubiri demu.Inasemekana haikupita muda mrefu kabla ya mume wa mwanadada kufika.

“Nimemletea mke wangu chakula. Nilimleta huku jana jioni kujifungua,” polo alimueleza mlinzi aliyekuwa kwenye lango.

Mlinzi alichanganyikiwa kiasi.

“Kuna mtu aliingia hapa dakika chache zilizopita. Aliandikisha hapa kuwa anaenda kumuona huyo huyo mwanamke unayedai kuwa mkeo,” mlinzi alimueleza polo.

Inadaiwa polo alianza kuingiwa na wasiwasi.

“Jina lake ndilo hili hapa. Sura yake naijua vizuri sana. Njoo twende tumtafute,” mlinzi alimueleza polo.

Walipofika katika chumba cha mapokezi, walimpata polo ametulia.

“Bosi ulisema unakuja kumuona nani?” mlinzi alimuuliza jamaa.

Inasemekana jamaa alisimama na kuanza kufoka.

“Nimekuja kumuona mrembo wangu. Alinipigia simu akidai aliletwa hapa kujifungua,” jamaa alifoka.

Inasemekana mlinzi alimlazimisha jamaa aondoke chumbani ili wasuluhishe mambo nje ya hospitali.

“Hiyo mimba aliyobeba ni yangu. Sitaki kumuona huyu mtu hapa,” jamaa alifoka.

Habari zilizotufikia zinasema makalameni walirukiana na kuanza kurambishana changarawe.

Ilimlazimu mlinzi kuingilia kati.

Pasta mfuska anusurika kichapo

Na JOHN MUTUKU SAMUEL

KIBINGOTI, Kirinyaga

PASTA wa kanisa moja eneo hili hakuamini arubaini zake zilipofika akajipata akinyenyekea mshirika wake asimdhuru kwa kumnyemelea mkewe.

“Naweza kukumegamega vipande vipande usitambuliwe hata na mkeo,” polo alimtishia pasta, akimkabidhi zawadi ya makofi mawili mazito.

“Ndugu yangu, usilipize kisasi. Naomba unionee huruma sitarudia tena. Haya ni majaribu ya kishetani,” pasta alizidi kunyenyekea kwa majonzi.

Pasta, buda aliye stadi wa kueneza injili alikuwa ameanza tabia ya kutembea na mke wa polo.

Mapasta marafiki zake walimuonya lakini akawa hasikii la mwadhini wala la mtekamaji msikitini.

“Mke wa mtu ni sumu. Huyu haogopi kifo?” pasta mmoja aliuliza.

“Sikio la kufa halisikii dawa. Mwacheni ale asali itakapomgeuka atajua Mungu keshamuacha,” pasta mwingine alichangia.

Siku ya siku, pasta aliegesha gari lake nyumbani kwa polo saa kumi alfajiri.

Jirani aliyejua kilichoendelea alimpigia polo simu na kumtaka afike kwake upesi.

Polo anafanya kazi ya ubawabu nyumbani kwa matajiri, karibu na kwake.

Polo alipoambiwa ‘mgeni’ wa usiku alikuwa nyumbani kwake alifika mbio mbio na kumfumania pasta kitandani kwake akiendelea kuuchovya mzinga.

Polo alivua koti la heshima, akamtandika pasta kwa mjeledi ambao ulimbambua mgongo vibaya vibaya.

“Mshirika wangu, utaniua jamani. Haya ni mambo tunayoweza kuzungumza,” pasta aliomba.

“Sitaki kuyazungumza na wewe. Mbwa kasoro mkia,” polo alisema akimvaa pasta tena na kumwangushia mvua ya makonde na mateke.

Kama si majirani, ‘Mtumishi wa Mungu’ angekiona cha mtema kuni.

Zimepita wiki mbili tangu mkasa huo na inasemekana pasta amesameheana na polo naye amekoma tabia ya kufukuzana na wake za watu.

Polo aporwa na kisura ‘malaika’

Na JOHN MUTUKU SAMUEL

HURLINGHAM, NAIROBI

POLO alibaki kulia na kuomboleza kama mfiwa, akashindwa kutoka nje ya nyumba kichuna aliyemteka kwa ukarimu na urembo wake alipomuacha bila chochote.

Jamaa alipokutana na mwanadada huyo hakufikiria anaweza kuwa hatari.

Polo alihamia mtaani hapa majuzi baada ya kupata kazi yenye donge nono. Alipohamia mtaani, alikutana na kichuna aliyemdokezea aliishi karibu naye. Kichuna ndiye alimsaidia kupanga vitu katika nyumba, kazi ambayo polo hakuipenda.

“Jamani sijui ingekuwaje iwapo usingetokea kunisaidia. Miye sijui kupanga vyombo vya nyumba,” polo alishukuru.

“Usijali. Nipo kwa ajili yako. Bado napanga kukuletea maua bandia nikupangie huku na kule ila siwezi kwa kuwa sina ufunguo,” kichuna alisema.

“Ufunguo huu hapa darling. Kila upatapo nafasi, kuwa huru kuingia humu mwangu,” polo alimhakikishia akimkabidhi ufunguo.

Siku iliyofuata polo alipoenda kazini, kichuna alifika na vijana wake wanne.

Walichukua kila kitu cha thamani katika nyumba hiyo, wakapakia katika lori kisha wakaondoka.

“Mshenzi mkubwa huyo. Atokapo kazini atakuta atakayokuta,” kichuna alisemea akiondoka.

Polo alipokuta nyumba ikiwa tupu, alijiinamia na kulia sana.

“Laiti nisingalimkaribisha kwangu huyo mwanadada, haya yote yasingalinikuta. Hata hivyo, yaliyomwagika hayazoleki. Itabidi nisadiki nishatapeliwa na kichuna na nafaa kuwa makini,” polo alijiliwaza baada ya kuelezea majirani yaliyotendeka.

Tangu siku hiyo, polo hapumbazwi na urembo wa mademu. Ameamua akitamani mke, itabidi amtafute kwa uangalifu.

“Haufai kuamini mwanadada yeyote hii Kanairo. Ona sasa umepoteza mali kwa kuamini demu ambaye alijifanya malaika kwako ilhali humjui wala anakoishi,” jirani mmoja alimweleza jamaa.

Polo ajuta kutafuna kuku na mayai yake

Na NICHOLAS CHERUIYOT

NAROK Mjini

BAROBARO mmoja wa mji huu alifinywa na kisha kutimuliwa na shugamami wake kwa kunyemelea binti yake.

Duru zasema kuwa, polo alianza uhusiano wa kimapenzi na mama huyo mwaka uliopita na wakaendelea vizuri licha ya pingamizi kutoka kwa familia ya polo.

Kulingana na mdokezi, jamaa alishauriwa aepukane na shugamami naye akashikilia kuwa anachuma mali akijitayarisha kuoa katika siku za usoni.

“Siwezi kuoa nikiwa sina mali. Nitamlisha binti wa wenyewe na nini? Nikiwahi donge kutoka kwa shugamami, nitaanzisha biashara na kumtema,” barobaro akasema akipinga wazo la kutengana na shugamami.

Juzi mambo yalienda kombo binti ya shugamami alipofika nyumbani kutoka chuo kikuu baada ya kupata likizo na mate yakamdondoka polo.

“Mama ya binti alipoondoka nyumbani kufanya shughuli zake, barobaro alimrushia demu mistari lakini kipusa akafura na kumfokea kwa tetesi za kumkosea heshima,” mdaku akaeleza.

“Unadhani mimi ni demu wa kawaida? Mimi siwezi kukubali mlofa kama wewe awe mpenzi wangu. Hata tayari nimejipanga kwa kumpata mpenzi anayesoma chuoni kama mimi. Nitakuripoti kwa mama,” kipusa alifoka.

“Eti utaniripoti? Maajabu! Mimi ndiye nitapendekeza uchukuliwe hatua kali na mama kwa kukosa heshima. Hata usijaribu kuyasema haya, mamako ataona unapayuka tu ovyo,” jamaa akasema kwa majigambo kisha akatoka kuelekea kwao.

“Siku iliyofuata, jamaa alifika kwa boma la mama sukari lakini mwenyeji wake akampa makaribisho baridi. Alipoona hali si hali, jamaa alijaribu kutoroka lakini shugamami huyo wa miraba minne akamtia mkononi na kumfinya sana kisha kumpiga teke kwa kugeuka fisi mtafuna vifaranga,” mdaku akaeleza.

Demu avamia polo kwa kutomtongoza

Na JOHN MUSYOKI

MAKONGENI, THIKA

KIDOSHO mmoja mtaani hapa alimzaba kofi jamaa mmoja kwa kukataa kumtongoza.

Demu alikuwa na mazoea ya kumtembelea jamaa huyo katika chumba chake cha kupangisha kwa nia ya kujipendekeza ili atongozwe.

Hata hivyo, mpango wa mwanadada huyo uligonga mwamba jamaa alipompuuza kwa sababu alikuwa akijua tabia yake ya kunyemelea wanaume.

“Demu alikuwa na tabia ya kuwanyemelea wanaume na wakishaonja tunda, anawatapeli na kutoroka,” alisema mdokezi.

Inasemekana licha ya kumtembelea jamaa huyo mara kadhaa, hakufaulu kumuingiza kwa boksi.

Siku ya kioja, demu alikosa subira na kuamua kumgutusha jamaa kwa kumzomea vikali kisha akamzaba makofi.

“Kwani wewe ni mwanamume sampuli gani? Tangu nilipoanza kukutembelea hujawahi kung’amua kwamba ninakupenda? Ni mistari umekosa au huna hisia?” demu alimkaripia polo.

Jamaa kwa upande wake alimweleza demu kwamba hakuwa na haja naye.

“Nilijua kwamba unajipendekeza kwangu. Sina shughuli na wewe. Kaa tu ule na utazame runinga na ukichoka urudi kwako. Umekuwa na wanaume chungu nzima na mnaachana kwa sababu ya ujeuri wako. Usidhani mimi ni fala nikurukie haraka hivyo. Tafadhali bahatisha kwa mtu mwingine lakini kwangu, sahau,” jamaa alisema.

Inasemekana hata kabla ya jamaa kumaliza kauli yake, demu alimzomea kisha akamzaba kofi. “Ninyamazie gumegume wewe. Sijawahi kuona mtu mwoga kama wewe. Mwanamume ni kuramba asali. Lakini sitakulaumu sana, labda jembe lako haliwezi kulima shamba vizuri,” demu alimwambia jamaa.

Jamaa alihisi uchungu ila hakulipiza kisasi kwa kuwa aliamini alikuwa amemzidi demu huyo maarifa naye demu akaondoka na hakurudi kwake tena.

Chupi za kimada zanaswa mvunguni

Na JOHN MUTUKU SAMUEL

UMOJA ONE, Nairobi

MIPANGO ya polo wa hapa kuhama nyumba ilivurugika mkewe alipopata chupi ambazo kimada wa mumewe alificha chini ya kitanda.

Kugunduliwa kwa ngotha hizo kulisababisha mzozo uliotishia kuvunja ndoa yake ya miaka miwili.

Polo alikuwa na mipango kadhaa ya kando na hakuona aibu kuwaleta wanawake katika nyumba mkewe akisafiri. Ili majirani wasigundue tabia yake alikuwa akiwaleta wanawake hao usiku na kuwasindikiza alfajiri.

Miongoni mwa mademu hao, kuna mmoja aliyedhani alifika kwa polo na hakukuwa na yeyote wa kumng’oa pale. Alihakikisha kila alipomzuru polo, alificha chupi chini ya kitanda. Nia yake ilikuwa mke wa polo agundue chupi hizo, ili naye apate nafasi ya kummiliki polo.

Siku ya tukio, polo aliwaita vibarua kumsaidia kupangua vitu. Walipofungua mbao za kitanda, kule mvunguni walipata chupi sita zilizotiwa kwenye mfuko. Walimpokeza mkewe na kuona haya kushika nguo hizo. Hapo ndipo yowe lilipomtoka mkewe.

“Una nini jamani?” wanaume hao waliuliza. Dakika chache baadaye polo aliingia na kushangaa kumpata mkewe chozi kifua tele.

“Wewe ni ndumakuwili! Hizi nguo ni za nani?” demu alimkabili mumewe.

Tafadhali mke wangu, usikasirike. Nitakueleza,” polo alimbembeleza.

“Unieleze nini? Hizi ni chupi za mwanamke mwingine,” demu alisisitiza.

“Mbona uko hivyo? Mbona wanikosea heshima ukitembea nje ya ndoa? Ni kipi ukosacho kwangu ili ukatembee na wanawake wengine?Siwezi kuishi na mkware, nina heshima zangu. Chumba nilichoacha kwetu kingalipo,” mke alipakia nguo na kutoka kwa ghadhabu.

“Wanaume wengine ni wanyama,” mke alisema hayo na kuondoka bila kutazama nyuma.

Hata hivyo, haijulikani iwapo suluhu ilipatikana baadaye.

Demu aachwa kwa kukwamilia mzinga

Na TOBBIE WEKESA

MWIKI, NAIROBI

KIDOSHO mmoja hakuamini mpenzi wake alipomuacha mataani kwa kukataa kumtimizia haja zake.

Inasemekana polo aliamua kumuacha baada ya kugundua kwamba kidosho alikuwa akimfyonza mali ilhali hakuwa tayari kumfungulia mzinga arambe asali.

Kulingana na mdokezi, polo na kidosho walikutana katika hoteli ilivyokuwa kawaida yao.

“Mimi ningependa kunywa juisi. Wewe itisha chakula chako,” polo alimueleza kidosho.

Kidosho aliitisha menu na kuanza kuikagua kwa makini. Weita aliwakaribia.

“Mimi niletee juisi baridi na samosa moja,” polo alimueleza weita.

Inadaiwa baada ya kupitisha jicho lake kwenye kurasa zote za menu, kidosho aliagiza chakula.

“Naomba uniletee wali kwa samaki,” kidosho alimueleza weita.

Baada ya muda mfupi mlo uliletwa.

“Beib leo utalala kwangu. Acha niitishe teksi,” polo alimueleza kidosho huku wakiendelea kula.

Duru zinasema totoshoo aliinuka na kumtazama polo.

“Beib najua unachotaka. Hakuna haraka kwa hayo mambo. Kuwa mpole,” alimweleza jamaa.

Inadaiwa jibu la kidosho halikumfurahisha polo.

“Beib tangu tuanze kupendana karibu tunamaliza mwaka mmoja. Kila wakati ukija kwangu unaniambia nisubiri. Nitasubiri hadi lini?” polo alifoka.

Kidosho alijitia hamnazo.

“Juzi ulikuja kwangu. Nikagharamika sana lakini hata busu pekeyake hukunipa,” polo alimfokea kidosho.

Kidosho aliendelea kushambulia chakula. Hakujali maneno ya polo.

“Huwezi kuendelea kuninyonya huku vya kwako ukivifungia kwa kufuli. Tafuta mchumba mwingine,” polo alifoka.

Polo hakumpa kidosho muda kujitetea.

“Kila wakati unasema “nitakupa siku moja”. Kwani hiyo siku ni lini? Nimevumilia ya kutosha. Usiwahi kunipigia simu,” polo alimwambia kidosho huku akiamka na kuenda zake.

Polo atorokwa na demu juu ya msoto

Na TOBBIE WEKESA

ROASTERS, Nairobi

POLO mmoja alilazimika kula kwa macho baada ya kidosho aliyekuwa akiburudika naye katika baa kuhamia meza ya makalameni wengine iliyojaa pombe.

Kidosho alichukua hatua hiyo baada ya kugundua kwamba jamaa alikuwa ameishiwa na hela za kununua chupa zaidi za pombe.

Kulingana na mdokezi jamaa na mrembo waliingia katika baa na kuitisha vinywaji. Waliagiza nyama choma vile vile.

Duru zinasema baada ya kubugia chupa kadhaa, kidosho alimhimiza polo aongeze vinywaji vingine.

Beib mimi sipendi kuona meza ikiwa wazi hivi. Hebu jaza meza iwe jinsi ilivyokuwa hapo awali,” kidosho alimueleza jamaa.

Lofa alijitia hamnazo. Baada ya muda mfupi kidosho alimkumbusha. “Beib hebu muite weita. Hii meza inatupa aibu. Ongeza pombe,” kidosho alimueleza polo.

Duru zinasema jamaa alimuangalia kidosho na kunyamaza.

“Kama pesa zako zimeisha niambie. Ni wewe uliniita kulewa na unajua mimi hunywa chupa ngapi. Siko tayari kurudi kwa nyumba saa hii,” kidosho alimfokea polo.

Habari zilizotufikia zinasema kidosho aliinuka polepole na kuelekea hadi kwenye meza walikokuwa wameketi makalameni fulani.

“Karibu sana mrembo. Meza hii imeketi wanaume kamili,” kalameni mmoja alisikika akimuambia kidosho.

Kidosho aliwashukuru kwa ukarimu wao.

“Asanteni sana. Yule jamaa ni mtu wangu lakini anakaa mkono birika sana. Siwezi kaa kwenye meza yenye haina raha,” kidosho alisema huku vicheko vikishamiri.

Inadaiwa makalameni waliitisha vinywaji zaidi.

“Weita jaza hii meza na ulete bili. Leo lazima watu watembee kwa magoti,” kalameni mmoja alisema.

Polo alibaki kutazama jinsi makalameni walivyomuosha kidosho wake kwa pombe. Muziki uliwekwa. Kidosho aliinuka na kuanza kuwaburudisha makalameni kwa miondoko mbalimbali ya kusakata densi.

Waume wazomea pasta wa wake wao

Na TOBBIE WEKESA

INGOTSE, KAKAMEGA

MAKALAMENI kadhaa waliwashangaza wengi walipovamia mkutano wa wahubiri wa eneo hili wakidai wake wao wamepotelea makanisani.

Duru zinasema kwamba makalameni hao walevi waliweka wazi changamoto ambazo wanapitia wafikapo nyumbani na kuwakosa wake wao.

“Kila wakati nikifika kwangu huwa simpati mke wangu. Nikiuliza alikoenda naambiwa yuko kanisani. Huduma gani inafanywa hadi jioni,” polo mmoja alifoka.

Mapasta waliohudhuria walisikiliza malalamishi ya majamaa hao kwa makini. Jamaa hao walidai kwamba wakati mwingine wanalazimika kushinda kwa mamapima hadi usiku kwa sababu wake wao wamepotelea makanisani.

“Sisi sote tulioitisha mkutano huu tunajuana. Baada ya hapa tunaenda kwa mamapima kupewa roborobo. Mamapima ndio wanaotushughulikia kila kitu,” polo alifoka.

Mapasta waliwaahidi makalameni hao kwamba watashughulikia madai yao.

“Tumesikia tetesi zenu. Tutawashauri wake zenu wawe wakirudi mapema,” pasta mmoja alieleza.

Duru zinadai makalameni hao hawakuridhika na maelezo ya pasta.

“Mimi nimechoka kukaa njaa na nina mke. Nyinyi mapasta ninaona vitambi mnazidi kujaza. Wake zenu wanawahudumia lakini wetu wanaishi makanisani mwenu,” mlevi mwingine alifoka.

Inadaiwa jamaa hao waliwaamru mapasta kutowaruhusu wake wao kushinda kanisani kwa muda mrefu.

“Hatusemi wasiombe lakini msikae nao sana. Wakishawahudumia waamrisheni waje watuhudumie sisi pia la sivyo tutafungua makanisa yetu,” mlevi mwingine alifoka.

Penyenye zinasema baada ya kikao makalameni walifuatana hadi kwa mamapima huku mapasta wakienda zao.

“Nikirudi jioni nimkose mke wangu walahi Jumapili nitavuruga shughuli katika kanisa analoshiriki. Hii tabia imezidi,” polo mmoja alifoka na kuungwa mkono na wenzake.

Haikujulikana iwapo mapasta waliwashauri wanawake kuwa wakirudi makwao mapema au walipuuza vilio na vitisho vya makalameni hao.

Avuliwa taulo sababu ya visura

Na JOHN MUTUKU

KARIOBANGI, Nairobi

JUMBE za mapenzi ambazo jamaa alitumiwa na ‘mipango ya kando’ nusura zivuruge ndoa mkewe alipoziona na kumkabili vikali.

Polo, ambaye hakuwa na mazoea ya kuacha simu mezani akienda kuoga, alijuta kwa kuisahau siku hiyo.

Mkewe alikuwa akimshuku kwa muda mrefu, na alipata fursa ya kuchukua simu akatoka nayo nje ya nyumba kusoma arafa.

“Hani, mbona waniacha kwenye baridi ukisingizia ni lockdown? Umeniacha nile nini pamoja na wanao?” ujumbe mmoja ulisema.

“Uliahidi kufika kwangu leo usiku. Unajua kafyu inaanza saa mbili. Hakikisha umewasili saa moja na nusu. Nitakuwa nikikusubiri mpenzi,” arafa ya mwanamke mwingine ilimtetemesha mke wa polo.

“Mpenzi, mbona siku hizi umeadimika hivyo? Au ni kafyu imekufanya kuganda kwa huyo shosh wako unayemwita mkeo? Nataka zawadi za Pasaka mie na wanangu. Usipozinunua, kwangu usionekane; najua ujanja wako,” SMS ya mpenzi wa tatu ilimvunja moyo kabisa.

Polo alipotoka bafuni hata mke hakumpa nafasi ya kujifuta maji. Alimvamia na kumpokonya taulo kabla kuanza kumtupia makofi.

“Loma mkubwa wewe! Kumbe badala ya mume nimefuga fumbwe! Wewe mwanamume wa aina gani?” alimkabili.

“Mama watoto, kuna shida gani jamani? Mbona vita?” polo aliuliza.

“Nitakacho kujua ni jumbe hizi zatoka kwa kina nani?” mke aliuliza akimwonyesha polo zile arafa.

“Hao ni marafiki zangu tu,” kalameni alijibu baada ya kimya cha muda.

“Kwa hivyo mie ni mjinga!” mama watoto aliwaka kabla kumrukia polo na kumparuza usoni.

Kutokana na kuvuliwa taulo, polo alishindwa kujitetea akiwa uchi.

“Utaniumiza jamani! Mke wangu naomba msamaha, unaniumiza,” jamaa alilia kwani kuna sehemu mama alikuwa amemkamata.

“Nikijua tena una mpenzi, hiyo ‘doshi’ uringayo nayo nitaikata. Wallahi nitaikata!” mke alionya akimwacha na kuondoka.

Siku hizi polo ametulia kama maji ya mtungi wala mademu wakimpigia simu hazipokei.

Dume bwege labururwa na mke

Na JOHN MUTUKU

HURUMA, NAIROBI

KALAMENI aliyekuwa ametoroka mkewe na wanawe watatu na kupiga kambi katika nyumba ya kimada wake, aliaibika mkewe alipomvamia, akamkamata pabaya na kumburura hadi nyumbani watu wakitazama.

Inadaiwa polo huyo alikuwa amemtoroka mkewe wa ndoa yao, na kuelekeza mshahara wake wote kwa kimada wake.

Pia ilidaiwa alitumia kiasi kikubwa cha pesa kumfungulia hoteli mwanadada huyo.

“Niliolewa na mtu au niliolewa na mnyama! Huyu ni mwanamume mwenye akili timamu? Anawezaje kuwaacha wanawe na kuenda kwa mwanamke mwengine? Kesho ninashuka kwenye hoteli hiyo. Nitawavuruga kinoma,” mke aliapa. Siku iliyofuatia, mke wa kalameni huyo alijiandaa na kuelekea kwenye hoteli. Alimpata mumewe na kimada wake wakiendelea kufanya biashara.

“Hapa ndipo nyumbani kwako? Kama sipo, wafanya nini hapa? Je, unajua wanao walishindaje au walilalaje?” alimuuliza mumewe. Jamaa alibaki bila maneno.

“Yaani, huyu ni nani amekuja kunifukuzia wateja?” kimada aliuliza kwa dharau.

Mke wa kalameni alimrukia na kumtandika makofi mazito mazito. Alinyakua chapati na mandazi na kurusharusha ovyo barabarani.

“Njoo, nifuate nikupeleke kwa wanao,” mke aliruka na kuukamata ‘mpini’ wa kalameni. Aliukamata sawasawa na kwa nguvu hivi kwamba hakuna chochote ambacho kalameni angefanya ila kuinua mikono ishara ya kusalimu amri.

Walienda hivyo, mke mbele akivuta mpini, kalameni nyuma akimfuata, maumivu yakimwandama kweli. Walipofika kwenye ploti, mke alimwachilia na kumsukuma ndani ya nyumba akimsindikiza kwa makofi.

“Na iwe siku ya mwisho kwenda kwa hawara huyo. Ikitukia siku nyingine, nasikitika utajuta,” mke alionya. Siku hizi, kalameni amepoa na kutulia nyumbani.

Mke azima polo kuoa wa pembeni

Na JOHN MUSYOKI

KIVAA, MASINGA

UGOMVI ulizuka katika boma moja hapa, jamaa alipokabiliwa na mke wake wa kwanza kwa kutaka kuuza ploti ili apate pesa za kumlipia mke wa pili mahari.

Duru zinasema, polo alilazimika kuoa mpango wa kando baada ya kumpachika mimba na wakwe wakamsukuma alipe mahari.

Kwa kuwa hakuwa na pesa, aliamua kuuza ploti yake, hatua ambayo haikumfurahisha mke wa kwanza.

Inasemekana mke wa kwanza alipinga hatua ya mumewe ya kuuza ploti ambayo alichangia kununua.

“Una akili timamu wewe? Kama una mpango wa kuuza ploti hii tuliyoinunua mimi na wewe ili umlipie mke wako wa pili mahari sahau. Hautauza ploti hii upende usipende,” mke alimwambia mumewe.

Jamaa alizusha akidai ploti hiyo ilikuwa mali yake.

“Ninauza ploti yangu sio yako. Haufai kulalamika kwa kuwa tayari nilikulipia mahari na wewe pia ni mali yangu,” jamaa alimjibu mkewe.

Hata hivyo, mkewe aliwaka kwa hasira akimlaumu jamaa kwa kupenda wanawake.

“Ulikosa nini kutoka kwangu mpaka ukaamua kuoa mke wa pili? Tamaa ya wanawake utaiacha. Ulijifanya simba ulipomleta mwanamke huyu hapa nikiwa nimenyamaza. Leo hii ni mimi simba hapa na hautaiuza ploti hii. Beba msalaba wako na ukishindwa umrudishe binti ya wenyewe kwao akaolewe na mwanaume mwingine, hata wewe umezeeka sana na hauna adabu kuoa mwanamke wa rika la binti yako,” mke aliwaka.

Polo aliposhindwa kumtuliza mkewe, aliamua kwenda mafichoni kuwaepuka wakwe waliokuwa wakimshinikiza alipe magari. Hakuna anayejua aliko jamaa huyo japo inasemekana huwa anawasiliana na mkewe wa pili ambaye amekuwa akiwatuliza wazazi wake.

Azirai mke kufichua ana sponsa

Na TOBBIE WEKESA

KIMBO, Ruiru

LOFA mkazi wa hapa alipigwa na butwaa baada ya mke wake kufichua kwamba amekuwa akilishwa na mpango wake wa kando.

Inasemekana kila siku kipusa akirejea nyumbani kutoka kazini, hakukosa kilo moja ya nyama ya mbuzi ama nguruwe mkobani ambao jamaa alikuwa akifurahia.

Penyenye zinasema polo na mkewe walikuwa wakizozana kila mara. Mwanadada alikuwa akimuonya polo kukoma kukimbiakimbia kwa mamake kuomba usaidizi badala yake atafute kazi ya kufanya ili akidhi mahitaji ya familia yake.

Inasemekana mwanadada aliamua kumfichulia polo siri baada ya kuudhika na tabia yake.

“Wewe ni mwanamume sampuli gani. Kila saa uko kwa mama yako. Kwani utalishwa hadi lini na wahisani,” mwanadada alimfokea polo.

Inadaiwa polo alibaki mdomo wazi asielewe alichoamanisha mkewe.

“Tangu huu mwezi uanze umekuwa ukirarua nyama ya mbuzi bila huruma. Kwani unafikiria huwa ninaitoa wapi?” kidosho alimuuliza polo.

Duru zinasema polo aliamua kuondoka akifikiria mkewe alikuwa na nia ya kumdhalilisha.

“Hata ukienda. Kuanzia leo jua ya kwamba mpango wangu wa kando hataendelea kukulisha,” mkewe alimuonya polo.

Polo aliposikia tamko la mkewe, mate yalimkauka kinywani.

“Ile siku mtu wangu atakoma kununua chakula ndio utajua maisha ni magumu. Endelea kukimbiakimbia kwa mama yako tu badala ya kutafuta kazi kama wanaume wengine,” mkewe alimzomea polo.

Duru zinasema polo alishindwa la kufanya. Alitamani ardhi ipasuke na immeze mzimamzima.

Habari zilizotufikia zinasema alipandwa na hasira na kutaka kumzaba mkewe makofi lakini mwanadada aligundua njama ya polo na kuchomoka mbio.

Pasta afokewa kupendelea vipusa

Na TOBBIE WEKESA

BUCHINGA, Mumias

KIOJA kilizuka katika kanisa moja la eneo hili baada ya mapolo kumzomea pasta wakidai kwamba alikuwa akipendelea vipusa katika mahubiri yake.

Kulingana na mdokezi, mara kwa mara, pasta alikuwa akiwapendelea sana wanawake wakati akitoa mafunzo yake kanisani jambo ambalo halikuwafurahisha mapolo.

Duru zinasema ili kudhihirisha gadhabu yao, makalameni waliamua kumkabili mtu wa Mungu. Siku ya kioja, pasta alijongea kwenye altari na kuanza kuhubiri ilivyokuwa desturi yake. Inadaiwa baada ya kunukuu kifungu cha Bibilia, pasta alianza moja kwa moja kuwadhalalisha mapolo.

“Wasichana ninataka kuzungumza nanyi. Mungu anawapenda sana. Endeleeni kumheshimu Mungu naye atawatimizia matamanio ya mioyo yenu,”pasta alihubiri.

Baadaye pasta aliwageukia mapolo. “Ninataka wanaume wote ambao hawajapata jiko wanisikilize kwa makini. Kila siku mnakuja hapa kunitazama tu. Mungu amekataa kuwabariki kwa sababu hamjui kuomba,” pasta aliwafokea.

Inadaiwa makalameni waliangaliana kisha wakasimama wote kwa pamoja. “Kama hatujui kuomba mbona hutaki kutufunza,” sauti ya polo mmoja ilisikika ikisema.

Vicheko vilisikika kote kanisani. “Mwaka huu ni mwaka wa urejesho kwa akina dada,” pasta aliendelea kusema.

Habari zilizotufikia zinasema mapolo walipandwa na za kwao na kuanza kumfokea pasta. “Kwenda huko. Umetudharau sana kwa muda mrefu. Tumechoka na hizo kejeli zako,” walifoka. Pasta alianza kutokwa na kijasho jembamba.

“Mahubiri yako yamejaa mapendeleo na madharau mengi sana. Unawapendelea warembo sana sijui wana nini ambacho sisi hatuwezi kukupa,” polo mmoja alimzomea pasta.

Pasta alitamani ardhi ipasuke immeze mzimamzima. “Koma hiyo tabia ama tuhame kanisa,” makalameni walionya na kuketi chini huku pasta akibadilisha mahubiri.

Yasemekana baada ya ibada aliwaita makalameni kwa mkutano na kuwaomba msamaha akisema hakuwa na nia mbaya kwao.

Kisura avua kalameni kila kitu!

Na JOHN MUTUKU

ROYSAMBU, Nairobi

POLO wa hapa amebaki hohehahe baada ya kuibiwa mali yote ya nyumba na mpenzi waliyefahamiana mitandaoni.

Jamaa ni kapera, hivyo marafiki walimshauri kutafuta mchumba kwenye mitandao baada yao kujaribu na mambo kuwaendea vyema.

“Mambo ya zamani ndugu yashapitwa na wakati. Jitose mitandaoni utafute kichuna wa kukupikia, kukufulia nguo na kukutoa baridi,” mmoja wa rafiki zake akashauri.

Baada ya muda, polo alimpata totoshoo aliyemvutia kwenye mtandao mmoja.

Siku moja demu akamwarifu kuwa angependa kumtembelea.

Kaka alijiandaa kwa kunadhifisha nyumba na jioni hiyo mgeni akaingia.

Jamaa alipomuona, alishtuka lakini akajituliza. Inasemekana mwanadada aliyefika kwake alikuwa tofauti na picha iliyokuwa mtandaoni.

Mgeni alikuwa jimama la takriban miaka arubaini hivi, nene lenye mwili tipwatipwa.

Hakuwa msichana wa rika lake bali shugamami wasioweza hata kutembea barabarani pamoja.

Polo alijikaza kupika na walipokula na kuzungumza zaidi, akatoa masharti.

Alitaka mgeni alale kitandani naye kwenye kochi. Mgeni hakustaajabu hata!

Usiku huo, polo hakupata lepe la usingizi.

Siku iliyofuata alienda kazini akidhamiria kunyoosha mambo baina yao usiku huo akipanga kumfukuza mwanamke huyo.

Ajabu ni kuwa aliporejea jioni, hakumpata au chochote cha thamani katika nyumba yake.

Si redio, si runinga, si sofa si vyote; vyote havikuwemo.

Jamaa aligutuka kwamba alikuwa ameangukia jambazi akisaka mpenzi mtandaoni.

“Wajinga ndio waliwao. Huu ni msiba wa kujitakia. Unawezaje kumwalika mgeni kwako na kuondoka uende kazini ukimwachia nyumba yenye vyombo ghali?” sauti ilimkumbusha.

Inadaiwa siku hizi kalameni ameanza maisha upya, akijutia uamuzi wa kusaka mrembo kupitia mitandao.

Jombi ‘afilisisha’ shugamami

Na JOHN MUTUKU

LAVINGTON, NAIROBI

SHUGAMAMI mtaani hapa alitiririkwa na machozi ya majuto baada ya barubaru aliyemteka kimapenzi, kumcheza shere na kutoweka na mamilioni ya pesa na mali yake.

“Jamani mbona sina kismati maishani? Nitaitoa wapi mali na pesa zangu alizoondoka nazo?” Shugamami alilia huku akizongwa na mawazo.

Inasemekana mama alikutana na jamaa huyo katika hafla moja jijini. Polo ambaye alikuwa MC wa sherehe alimvutia shugamami huyo kwa sauti yake nyororo. Alikuwa pia na sura nzuri pamoja na maumbile ya mwanamume mnyanyua vyuma.

Baada ya kubadilishana nambari za simu, walianza kuwasiliana na penzi likanoga kweli. Na ili kumthibitishia ukweli wa mahaba, shugamami huyo alimnunulia polo nyumba ya kifahari, gari aina ya BMW pamoja na kuikuza akaunti yake kwa mamilioni kadhaa.

“Kipenzi, wewe ndiwe wangu ila nina wivu sana. Sitaki kukuona na mwengine ndio maana nimewekeza kwako kwa mali nyingi. Huba ni kuaminiana,” shugamami alisema.

“Haina tabu. Nimetambua wanipenda nami naapa kulitunza, kulipalilia na kulilinda penzi letu daima,” polo alimhakikishia.

Haukupita muda mrefu, polo aliingiwa na tamaa. Alianza kuandamwa na mademu wengi kutokana na pesa alizokuwa nazo.

“Mbona unazidi kujifunga kwa ng’ombe yule. Mama wa miaka hamsini na moja mtapelekana wapi? Tuondoke nje ya nchi tukaponde maisha,” totoshoo mmoja alimshauri.

Hapo ndipo akili ya polo ilipozinduka akauona mpango huo ukiwa bora. Aliiuza nyumba kisiri pamoja na mali nyingine kisha alfajiri moja akatoweka na kuzima simu.

Shugamami alijaribu kwa siku nyingi kumpigia asimpate. Hivyo ndivyo polo alivyotoweka na kumwacha shugamami mataani.

Ajuta kupeleka kesi kwa wakwe

Na JOHN MUSYOKI

KITENGELA, Kajiado

HATUA ya kalameni wa hapa ya kumshtaki mkewe kwa wazazi wake iliambulia patupu alipoangushiwa kichapo kikali na wakwe zake kwa kumdhalilisha binti yao.

Inasemekana jamaa alimrudisha mkewe kwa wazazi wake na kudai alikuwa msumbufu kupindukia.

Siku ya kioja, wakwe wakimwalika jamaa kwenye kikao cha faragha ambapo polo alieleza kwamba demu hakuwa mke aliyetarajia wala kumfaa maishani.

“Sina furaha na ninasikitika sana kwa kuoa binti yenu. Tulipofanya harusi alibadilika ghafla. Nikimwambia kitu haambiliki. Haniheshimu kwa lolote. Mimi nimechoka kabisa. Sitakubali kukaliwa chapati na binti yenu kutaka kuwa kichwa katika boma yangu. Utundu huu wake ameutoa wapi? Nimechoka kuishi maisha ya presha,” jamaa alilalamika.

Inasemekana mzee alichemka na kumzima polo.

“Unaongea kwa ukali hapa kama nani? Hujui ni mimi mwenye boma na huyu ni msichana wangu. Kama umechoka na binti yetu wacha kumharibia jina. Binti yetu sio mtundu kwa sababu tulimlea kwa misingi ya kikristo. Kuna wanaume wanaommezea mate kama wewe umemchoka,” mzee wa boma alimwambia polo.

Polo alichemka zaidi na kuanza kumsuta mkewe mbele ya wazazi wake.

“Hautatoboa hata ukiolewa na mwanaume mwingine. Hakuna mwanaume atakayekuvumilia ukiwa na utundu huo wako wa kishetani. Wewe ni mtu bure kabisa,” jamaa alipayuka.

Inasemekana kabla ya jamaa kuendelea kumsimanga demu, wakwe walikerwa na maneno yake na kumtwanga bila huruma.

“Sitakubali uendelee kumtusi binti yangu mbele ya watu. Nitakuharibu hiyo sura yako,” mzee aliwaka huku akimtandika polo kwa bakora.

Jamaa alipozidiwa na maarifa alitoka shoti na kutorokea usalama wake.

Kilio beste akiponyoka na bebi wake

Na JOHN MUTUKU

KAYOLE, Nairobi

POLO mmoja mtaani hapa hajiwezi hajifai kwa machozi baada ya rafiki yake wa dhati kumpokonya mpenzi.

Jamaa hakuamini kuwa rafiki waliyefaana kwa jua na mvua alikuwa akichovyachovya buyu lake la asali.

Polo alikuwa na totoshoo waliyependana kwa dhati, mahaba moto yakifungua ukurasa mpya wa maisha yao.

Walikuwa katika harakati za kukamilisha mipango ya arusi iliyotarajiwa kugharimu zaidi ya Sh2 milioni. Wawili hao walikuwa wameapa kutoachana huku demu akimhakikishia jamaa kwamba alikuwa akimpenda kwa dhati.

“Nakupenda switi. Nitakuoa tuishi kwa majaaliwa maisha ya raha mustarehe,” polo alimhakikishia demu.

“Nakupenda sana nyota wangu bila kung’aa kwako, maisha kwangu ni giza zito,” demu alimuapia.

Lakini hayo yalifikia kikomo polo alipobisha majuzi kwa rafiki yake na akamfumania akiwa na totoshoo wake. Jamaa hakuamini kupata demu aliyetarajiwa kuoa akiwa kifuani mwa rafiki yake wakinong’onezana matamu waliyoyajua wao wenyewe.

“Switi, yaani umefikia kiwango hiki cha kunisaliti? Nilikutendea nini unisaliti hivi?” polo aliuliza akitokwa machozi.

Demu alimwangalia jamaa na kusonya.

“Mpenzi, hebu mjibu huyu mshenzi maana sina maneno ya kumwambia,” demu alimuomba rafiki wa jamaa.

“Buda, kanyaga nje. Umesikia kutoka kinywani mwake ameshakushiba,” mwenye nyumba alisema na kuufunga mlango.

Huku akitokwa na machozi, jamaa aliondoka na kurudi kwake akijuta kumwamini rafiki yake bila kujua alikuwa fisi.

“Mie siwezi kuolewa na jamaa asiyejua kupenda. Hela anazo lakini penzi hana,” demu alisikika akisema.

Bado polo hajaachilia picha ya demu kumuondoka akilini na moyoni. Huzuni haimwachi japo wenzake washamwambia amtafute mwengine mwenye penzi la kweli.

Walioenda kulipa mahari walimwa faini

Na JOHN MUSYOKI

SHANZU, Mombasa

VIJANA waliofika katika boma moja sehemu hii kulipa mahari walitozwa faini na wazee wa familia ya kidosho kwa kutoandamana na wazee wa familia yao.

Inasemekana jamaa aliyeoa demu alipuuza wazee wa familia yake na kuwachagua baadhi ya marafiki wake kumwakilisha kwa wakwe zake.

Wakati wa kuandaa kikao cha faragha ulipowadia, wazee wa familia ya demu walishangaza jamaa alipowaleta vijana barobaro kuzungumzia suala nzima la mahari ya binti yao.

Wazee walianza kulalamika wakidai walikuwa wamedhalilishwa na jamaa huyo. “Hawa ndio wazee wako? Unatufanyia mzaha kwa nini? Mbona unatuletea watu wasio wa rika letu kuzungumzia suala la mahari. Marafiki hawa wako wanajua nini kuhusu ndoa na kulipa mahari. Kama unataka msichana wetu rudi ukatuletee wazee wa rika letu,” mwakilishi wa familia ya demu alisema.

Inasemekana jamaa na marafiki wake walizusha lakini waliambulia patupu. “Mnatudharau kwa nini? Haja yenu ni mahari ama ni wazee? Vijana kama sisi tuna uwezo wa kufanya kikao cha faragha kama wazee,” jamaa mmoja aliwaambia wazee.

Inasemekana licha ya vijana hao kujitetea wazee walisisitiza ilikuwa ni mwiko kwa barobaro kuhusishwa na masuala ya kujadili na kulipa mahari. “Mnatupotezea muda. Kulingana na kanuni zetu hatuwezi kuandaa kikao na vijana kama nyinyi. Mnataka laana?” mzee mmoja aliongeza.

Ilibidi jamaa na marafiki wake kufanya walivyoambiwa.

Hata hivyo, hawakuruhusiwa kuondoka boma la wakwe hivi hivi.

“Waliachiliwa kuondoka baada ya kutozwa faini ya Sh30,000 kwa kuwapotea wazee muda,” alisema mdokezi.

Ndumba yazima uchu wa jombi

Na JOHN MUSYOKI

KABATI, KITUI

KALAMENI mwenye tamaa ya kunyemelea wake wa wanaume wengine aliwachekesha wenzake nusra wavunjike mbavu alipowaeleza jinsi alivyotishika alipomuona mume wa mwanamke aliyekuwa akichepuka naye akitoka nyumba ya mganga.

Kalameni alikuwa na mazoea ya kuchepuka na mke wa mtu na licha ya kuonywa hakubanduka.

Mume wa mwanamke huyo alikuwa amemuonya na hata kumtumia wazee lakini kalameni akapuuza na kumwambia waziwazi kuwa iwapo alikuwa hamkolezi mkewe uroda, hakuwa na budi kumsaidia.

“Bwana wee, mke wa mtu huchezewa na mwanamume asiyetaka kuishi. Iwapo huyathamini maisha yako, endelea kuchezea mke wangu,” mume alimwonya.

“Kama ungekuwa ukimpa anachokikosa, asingenitafuta. Nitaendelea kumlevya kwa mahaba maanake ananipenda,” kalameni alisema.

“Haina tabu. Endelea kufanya ufanyalo utajua hujui, ” mume alimwonya kwa mara ya mwisho, hasira za mkizi zikimpanda.

Juzi aliwasiliana na mke wa jamaa na wakapanga wakutanie mahali fulani mjini. Walitembea kuelekea lojing’i moja lakini kabla ya kufika, walipomuona mume wa demu akitoka nyumba ya mganga maarufu.

“Hebu mtazame mumeo. Nionavyo ameamua kunimaliza,” kalameni alimwonesha demu sehemu aliyosimama mumewe na mganga.

“Kweli yule ni mume wangu. Kitu gani ameshikilia mkononi?”

“Zile ni ndumba za kutufunga. Unakumbuka mganga huyu ndiye aliyewafanya jamaa mwengine na mke wa mtu kukwama wakifanya ufuska?” kalameni aliuliza alitetemeka.

“Una woga mwingi bwana. Twende unikate kiu ya mahaba,” demu alirai.

“Siwezi kuunyanyua mguu wangu. Sitaki aibu itakayotazamwa na ulimwengu katika runinga na kusikika redioni. Sitaki kula nyasi mie,” kalameni alieleza akigeuka kuondoka.

“Sina hamu. Imeniisha kabisa. Afadhali tusitishe haya tuyafanyayo mafichoni. Natamani kuiona kesho,” kalameni alisema akieleza wenzake aliondoka na kumwacha demu akizubaa.

Fundi mjengo afichua siri kali ya buda

Na NICHOLAS CHERUIYOT

GELEGELE, SOTIK

KULIKUWA kioja katika boma moja la hapa fundi mmoja alipofika na kumdai buda malipo baada ya kumjengea kimada wake nyumba.

Duru zasema hali ilikuwa shwari katika boma la buda hadi fundi alipofika akihema, nyundo mkononi.

Buda alijua siri zake zingefichuliwa na akamsihi fundi atulie ili watatue mambo hayo.

“Mimi najua maneno yako kabisa na ninataka ukae hapa ili upewe kopo la chai kisha tuongee na kuelewana kama wanaume. Kila tatizo lina suluhu,” mzee akamlilia fundi.

“Eti nipewe chai? Unadhani utanibembeleza kwa kunipa chai? Sahau! Nilimaliza kazi kitambo na hadi sasa umekuwa ukinihepa ili usilipe deni langu. Utajua hujui,” fundi akazusha kwa uchungu.

Mke wa buda aliyekuwa akifuatilia tukio kwa ukaribu sana alitaka kujuzwa kulikoni.

“Nini kinaendelea hapa? Umetujengea nini na ni wapi hapo? Acha kupayuka ovyo, nieleze kuhusu deni hilo,” mama akasema.

“Leo ni leo, nitasema kila kitu. Huyu jamaa ana kimada mbali na hapa na alinituma nimjengee nyumba akiniahidi kunilipa lakini amedinda kufanya hivyo,” fundi alipasua mbarika na kushangaza mwanamke huyo.

Kisanga kilizidi buda na mke waliporushiana cheche za maneno huku fundi akisubiri kumkaba koo jamaa alipe deni.

“Hata huyo msichana ni yule ulinishauri nikae mbali naye lakini ibilisi alinihadaa nikamfanya awe mpenzi kwa muda mfupi tu. Kwa sasa amenitema hata,” jamaa alijitetea.

Hatimaye, buda alimlipa fundi kwa kumtumia pesa kwa simu naye jamaa akaondoka akiwa amewasha moto wa majibizano kati ya mke na mumewe.