Raila ataka serikali ilegeze masharti ya ibada

Na CHARLES WASONNGA

KIONGOZI wa ODM Raila Odinga ameunga mkono pendekezo la baadhi ya viongozi wa kidini kwamba waruhusiwe kurejelea ibada zao kawaida wakiahidi kuendelea kuzingatia masharti ya kuzuia kuenea kwa corona.

Bw Odinga Alhamisi aliahidi kuwa atawasilisha ombi rasmi kwa serikali ili makanisa yapewe nafasi ya kuendesha ibada zao na shughuli nyinginezo.

“Nakubaliana nanyi kwamba wakati huu ambapo shule na taasisi zingine za kielimu zimeruhusiwa kurejelea masomo, makanisa pia yafunguliwe kikamilifu huku yakizingatia kanuni za Wizara ya Afya za kuzuia kuenea kwa Covid-19. Kwa hivyo, nitawasilisha ombi rasmi kwa serikali kuhusu suala hili,” Bw Odinga akasema alipokutana na baadhi ya viongozi wa dini za Kikristo na Kiislamu, Nairobi, kuwarai kuunga mkono mchakato wa marekebisho ya katiba kupitia mpango wa BBI.

Akiwasilisha ombi hilo kwa niaba ya viongozi hao wa kidini, Askofu Kepha Omae wa Kanisa la Redeemed Gospel Church, alisema makanisa yamejitolea kuzingatia masharti ya kuzuia kuenea kwa corona kwa manufaa ya waumini wao.

“Tunakuomba uingilie kati ili serikali iweze kuruhusu makanisa yetu kuendesha kurejelea taratibu za kawaida za ibada zetu ili kufanikisa wajibu wetu kama kanisa. Kama viongozi wa kidini, tuko tayari kuhakikisha kuwa kanuni zote za Wizara ya Afya za kuzuia kuenea kwa corona zinazingatiwa na waumini wetu,” akasema.

Mnamo Januari 25, Mwenyekiti wa Baraza la Kidini kuhusu Covid-19 Askofu Mkuu Anthony Muheria alilegeza masharti ya kudhibiti kuenea kwa Covid-19 katika maeneo ya ibada kwa kuruhusu sala za watoto (Sundaye School) na Madrassa.

Hata hivyo, Askofu Muheria aliagiza kuwa wasimamizi wa makanisa la misikiti sharti wahakikishe kuwa masharti ya Wizara ya Afya kama vile watoto kuvalia barakoa, kunawa kila mara na kukaa umbali wa mita moja, yanazingatiwa.

Masharti ya ibada makanisani na misikitini yalegezwa kiasi

Na SARAH NANJALA

MAENEO ya ibada yaliyo na nafasi kubwa sasa yataruhusiwa kuwa na waumini zaidi ya 100 kwa kila ibada kulingana na nafasi iliyopo.

Pia umri wa watakaoruhusiwa kuhudhuria ibada umebadilishwa hadi zaidi ya miaka sita na chini ya miaka 65, kutoka kiwango cha awali cha kuanzia umri zaidi ya miaka 13 hadi chini ya miaka 58.

Tangazo hilo limejiri karibu mwezi mmoja baada ya maeneo ya ibada kufunguliwa tena mnamo Julai 14, huku Baraza la Makundi ya Kidini likisema uamuzi huo ulifanywa kuambatana na masharti yaliyokuwepo wakati wa awamu ya kwanza.

Akihutubia wanahabari Jumanne, mwenyekiti wa baraza hilo Askofu Anthony Muheria, alielezea kuridhika na matokeo ya kuzingatia masharti ya ibada, jambo alilosema linaashiria uongozi mzuri wa kidini.

“Baada ya kuona uzingativu wa kiwango cha juu kuhusu masharti katika sehemu za ibada, tumeshawishika kuwa Wakenya watafuata masharti hadi kiwango kifaacho,” akasema Askofu Muheria.

Mabadiliko hayo ni afueni kuu kwa viongozi wa kidini waliokuwa wamelalamikia hatua ya mwanzo ya kupunguza idadi ya waumini hadi 100 kwa kila ibada, ilhali majengo yao yangeweza kuwa na waumini zaidi.

Askofu Muheria, aliyeandamana na wanachama 14 wa baraza hilo, alieleza kuwa taifa liko tayari kwa awamu ya pili ya ufunguzi kuanzia Agosti 18.

MUDA KUONGEZWA

Awamu hiyo kando na kuwezesha maeneo ya ibada kuwa na waumini zaidi, pia itaongeza muda kutoka dakika 60 hadi dakika 90 kwa kila ibada.

Idadi itategemea umbali wa kujitenga wa mita moja unusu na nafasi iliyopo, ambapo maeneo makubwa ya ibada yataweza kuwa na watu zaidi ya 100 kwa kila ibada huku sehemu ndogo zikisalia na kiwango cha awali cha watu 100.

Haijabainika ni vipi makanisa yatachukulia masharti hayo mapya ikizingatiwa idadi ya visa vya Covid-19 vinaendelea kuongezeka.

Huku Wizara ya Afya ikiashiria kuongezeka zaidi kwa maambukizi katika majuma kadhaa yajayo, tahadhari zaidi itahitajika huku maeneo ya ibada yakiendelea kufunguliwa kwa awamu.

Licha ya ibada kuruhusiwa upya, waumini wengi wamekuwa wakiepuka kuhudhuria kwa hofu ya kuambukizwa virusi vya corona.

Waumini wagomea ibada wakiogopa corona

Na BENSON MATHEKA

WAUMINI wa makanisa mengi nchini walikosa kuhudhuria ibada makanisa yalipofunguliwa jana, huku idadi ya watu walioambukizwa virusi vya corona nchini kwa siku moja ikiendelea kuwa juu.

Wizara ya Afya ilitangaza kuwa watu 603 waliambukizwa na kufikisha idadi ya jumla hadi 13,353.

Idadi ya wagonjwa waliopona ilitimia 5,122 baada ya watu 682 kuthibitishwa kuwa wamepona. Hata hivyo, wengine tisa walifariki na kufikisha idadi ya jumla hadi 234.

Wizara ya afya ilisema kwenye taarifa kwamba watu 562 miongoni mwa waliopona walikuwa wakiuguzwa wakiwa nyumbani.

“Miongoni mwa waliopona, 562 walikuwa wakitibiwa nyumbani huku 129 wakiruhusiwa kuondoka kutoka hospitali mbalimbali,” ikasema taarifa.

Idadi ya maambukizi ya virusi vya corona imekuwa ikiongezeka kwa kasi tangu masharti ya kuzuia kusambaa kulegezwa Julai 6.

Mwigizaji wa vipindi vya runinga Charles Bukeko, maarufu kama Papa Shirandula ambaye ni miongoni mwa waliofariki kwa corona atazikwa leo. Kutokana na hali inavyoonekana kuzidi kuwa mbaya, Kiongozi wa Kanisa Katoliki nchini Kadinali John Njue, jana aliwahimiza Wakristo kutumia kufunguliwa kwa makanisa kuomba Mungu amalize janga la corona.

Alikuwa akiongoza misa ya kwanza mbele ya waumini baada ya miezi mitatu katika Kanisa la Holy Family Basilica jijini Nairobi, ambayo pia ilihudhuriwa na watu wachache wasiozidi 100.

“Imekuwa zaidi ya miezi mitatu ambayo hatukuweza kukutana kwa ibada hata siku za Jumapili kama hii kwa sababu ambazo kila mtu anafahamu. Lakini tunashukuru Mungu, kwamba tumeweza kuwa na ibada ana kwa ana kama hii. Tunawakaribisha kwa misa hii, tunatambua na tunajua ni baraka,” aliwaambia waumini wasiozidi 100 waliohudhuria misa hiyo.

Aliwataka maaskofu na mapadre wa Kanisa Katoliki kuzingatia kanuni za wizara ya afya za kuzuia msambao wa virusi vya corona.

Mnamo Julai 6, Rais Uhuru Kenyatta alitangaza maeneo ya ibada kufunguliwa kwa awamu kufuatia mwongozo uliotayarishwa na baraza la viongozi wa Kidini.

Makanisa yatumia teknolojia kusajili waumini kwa ibada

Na BENSON MATHEKA

MAKANISA yamelazimika kutumia teknolojia kusajili waumini kuhudhuria ibada kufuatia kanuni mpya za kuzuia maambukizi ya virusi vya corona.

Baadhi ya makanisa yamebuni programu za mitandao ambazo waumini wanatumia kujisajili watengewe viti kanisani.

Hii inasaidia kuhakikisha wamechagua watu 100 wanaopaswa kuhudhuria kila ibada kwa wakati mmoja.

Katika mwongozo wa kufungua maeneo ya ibada, baraza la viongozi wa kidini liliagiza watu wasizidi 100 katika kila ibada na waketi umbali wa mita moja na nusu kutoka kila mmoja.

Kulingana na wasimamizi wa Kanisa la Deliverance mtaani Waithaka, waumini wanatakiwa kujisajili katika programu maalumu ya kanisa hilo ili watengewe vita kanisani.

“Hii inahakikisha hakuna msongamano watu waking’ang’ania nafasi 100 wahudhurie ibada. Kila anayejisajili anatengewa nafasi ya kuketi katika mojawapo ya ibada,” amesema pasta Amos Warui wa kanisa hilo.

Programu hiyo ilibuniwa na kamati ya kudhibiti corona ya kanisa hilo.

Baraza la viongozi wa kidini, iliagiza kila eneo la ibada kuunda kamati ya kuhakikisha mwongozo wa kufungua makanisa na misikiti unafuatwa.

Makanisa mengi yanatumia mtandao wa kijamii wa WhatsApp kupanga ibada.

Yaliwataka waumini kujisajili wapange idadi ya ibada ikizingatiwa kuwa kila moja inapaswa kuchukua muda wa saa moja.

“Kwa sababu watu wengi wanatumia mtandao wa WhatsApp, tuliutumia kufahamisha waumini mikakati yetu ya kufungua kanisa. Kwa sababu tumekuwa tukiutumia mwa muda kuwasiliana na waumini, tuliweza kupanga ibada zetu kwa urahisi kwa kuzingatia kanuni za Wizara ya Afya,” akasema mwenyekiti wa kamati ya kanisa Katoliki mjini Machakos Dominic Kaleli.

Makanisa yaliyo na chini ya waumini 100 hayakutatizika kupanga ibada japo yalizingatia kanuni za wizara ya afya.

Viongozi wa kamati za kuzuia msambao wa corona katika makanisa mengj kaunti ya Machakos hayakuruhusu watu kukusanyika baada ya ibada ilivyokuwa ikifanyika kabla ya corona kuripotiwa nchini.

Serikali ilipofunga makanisa, mengi yalianza kutoa ibada kupitia mitandao.

Baada ya baraza la viongozi wa kidini kutangaza kufunguliwa kwa maeneo ya ibada, baadhi ya makanisa yalisema hayatafungua.

Makanisa Kiambu yajiandaa vilivyo kuwapokea waumini

Na LAWRENCE ONGARO

HUKU Covid-19 ikizidi kusambaa nchini, makanisa yanaendelea kujizatiti kuona ya kwamba yanajipanga kupokea waumini kwa maombi.

Kasisi wa kanisa katoliki la St Francis mjini Ruiru Bw Charles Njoroge, alisema wanajipanga kuwa na ibada sita kwa siku mbili.

“Tutaanza na ibada ya kwanza mnamo Jumamosi jioni halafu Jumapili tutakuwa na ibada zingine tano ili kutosheleza mahitaji ya waumini kadhaa,” alisema Kasisi Njoroge.

Alisema hata ingawa wamepanga hivyo, bado kuna washirika wengi ambao watakosa kupata nafasi ya kuhudhuria ibada ya Jumapili.

Bw Stanley Ngure wa Kanisa la Deliverance Church mjini Juja anasema watafanya juhudi kufanikisha awamu tatu za ibada mnamo Jumapili.

Alisema bado wako na changamoto katika juhudi zao za kupanga ratiba hiyo.

“Hata ingawa mambo ni magumu kufuatia janga la Covid-19, tutajaribu kadri ya uwezo wetu ili kuwapa washirika wetu chakula cha kiroho,” alisema mchungaji Ngure.

Serikali ilitoa mwongozo ya kwamba waumini wasiozidi 100 ndio watakubaliwa kushiriki katika maombi kanisani.

Hata hivyo, wachungaji wengi wanaendelea kulalamika wakisema ya kwamba hatua hiyo ya serikali haitawafaa kama wachungaji.

Wanazidi kudai ya kwamba waumini wengi watakosa kumuabudu Mungu kama walivyozoea hapo awali.

Serikali bado imeweka vikwazo kwa wazee wa umri wa zaidi ya miaka 58 na zaidi na watoto wa umri wa miaka 13 kwenda chini ikiwakataza kuhudhuria ibada kanisani ili kuzuia maambukizi ya Covid-19.

Hata hivyo, swali nzito ni jinsi wachungaji watakavyowateua waumini wao 100 na kuwaacha wale wengine kuwa nje ya kanisa.

Masharti ya kuzima wazee yazua kizuizi kwa ufunguzi wa makanisa

TITUS OMINDE, DIANA MUTHEU na MAUREEN ONGALA

IBADA ndani ya makanisa na misikiti huenda zikaathirika, baada ya viongozi wa kidini kusema mojawapo ya masharti ya ufunguzi inawazuia wao kushiriki.

Kwenye kikao na wanahabari mjini Eldoret, Jumapili, viongozi hao walisema sharti la kuzuia watu wa zaidi ya miaka 58 linawazuia wengi wao kushiriki ibada hizo.

“Sharti la kuzuia wazee wa umri wa miaka zaidi ya 58 kuhudhuria ibada ni pigo kwa kanisa. Makanisa yetu mengi yanaongozwa na wazee. Vijana wamepotelea katika pombe na hawana ufahamu wa mambo ya dini,” akasema kiongozi wa muungano huo wa waumini, Askofu Wilson Kirui.

Walidai vikwazo vilivyowekwa vina nia fiche ya kulemaza kanisa, hivyo basi hawakubaliani na kamati iliyohusika kutoa mapendekezo hayo kwa Rais Uhuru Kenyatta.

“Kuzuia wazee kuhudhuria ibada ni sawa na kuacha kondoo bila mchungaji,” akasema Askofu Kirui.

Naye Kasisi Boniface Simani wa kanisa la Bread Of Life, aliitaka serikali iondoe vikwazo hivyo, akisema hata kuzuia watoto kuhudhuria ibada ni sawa na kulemaza kanisa la siku za usoni.

Naye mhubiri maarufu Askofu J.B. Masinde wa kanisa la Deliverance Umoja jijini Nairobi alisema kanisa hilo halitafunguliwa kwa ibada na wataendelea kutoa mahubiri kupitia intaneti.

Askofu David Oginde wa CITAM pia ametangaza kuwa hawatafungua.

Wakuu wengi wa dini nchini ni wazee wa umri wa kuanzia miaka 60.

Katika kaunti ya Mombasa, waumini wengi Jumapili walidinda kuhudhuria ibada, hata baada ya Rais Uhuru Kenyatta kutangaza kuwa makanisa yako huru kufunguliwa.

Wakizungumza na Taifa Leo, walisema sheria ambazo makanisa yaliagizwa kufuata ni ngumu.

Kwa maoni yake, Bw Simon Mwaniki ambaye ni mshirika wa kanisa la Jesus Celebration Centre (JCC), alisema kuwa alijihisi salama zaidi kufuatilia ibada akiwa nyumbani.

“Kwa maoni yangu, sheria hizo ni nyingi sana. Tumepewa jukumu la kujikinga wenyewe kutokana na virusi hivi na ni heri nisalie tu nyumbani ambapo bado nahubiriwa mtandaoni. Natuma sadaka kwa njia ya simu na cha muhimu zaidi, afya yangu nimeilinda,” akasema Bw Mwaniki.

Kwa upande wake, Collins Omondi ambaye ni mshirika wa kanisa la LifePoint, Mombasa alisema bado ana uwoga wa kutangamana na watu wengine.

Lakini katika Kaunti ya Kilifi, Mbunge wa Kilifi Kusini Ken Chonga, alianzisha shughuli ya kunyunyuzia dawa makanisani, huku akiitaka serikali iwakumbuke wahubiri ambao wanaendelea kuathiriwa na maambukizi ya corona.

Akizungumza katika eneo la Mtepeni alipowagawia chakula cha zaidi ya wahubiri 600 Bw Chonga alisema viongozi wa kidini wameathiriwa mno na kufungwa kwa makanisa, japo wengi wao wamekataa kujitokeza kuomba misaada.

Changamoto kuzuia wazee katika ibada

Na BENSON MATHEKA

UAMUZI wa serikali kwamba wazee wa zaidi ya umri wa miaka 58 wasikubaliwe kuingia katika maeneo ya ibada umeacha viongozi wa dini mataani.

Katika madhehebu mengi nchini, wahubiri na wasimamizi wakuu wa maeneo ya ibada huwa ni wa umri mkubwa. Hitaji hilo lilitangazwa Jumatatu, wakati Rais Uhuru Kenyatta alipotangaza kanuni mpya kuhusu kudhibiti virusi vya corona, ambapo pia watoto wa chini ya miaka 13 hawatakubaliwa kuingia maeneo ya ibada.

Jana, Baraza la Mashirika ya Kidini lilisema maeneo ya ibada yataanza kufunguliwa Jumanne ijayo lakini kila dhehebu litajiamulia kuhusu viongozi wa dini waliopita miaka 58.

Wataalamu wa afya husema wazee na wagonjwa wamo hatarini zaidi kuathirika sana na virusi vya corona.

“Viongozi wa maeneo hayo watakuwa na jukumu la kuhakikisha mwongozo wa kuzuia maambukizi ya corona utazingatiwa kikamilifu,” alisema mwenyekiti wa baraza hilo Askofu Mkuu wa dayosisi ya Nyeri ya kanisa Katoliki Antony Muheria.

Iliamuliwa kuwa ibada zitakuwa zikichukua saa moja pekee na kuhudhuriwa na watu wasiozidi 100 kwa wakati mmoja.

Ili kuhakikisha masharti ya kuzuia kusambaa kwa corona yatazingatiwa, kutakuwa na kamati ya viongozi wa dini mbali mbali katika kila kaunti ndogo na pia katika kiwango cha kaunti.

Kila eneo la kuabudu litakuwa na kamati ya kukabiliana na corona.

“Litakuwa jukumu la viongozi wa kidini kuhakikisha kuwa mwongozo wa kufungua eneo lao la ibada na kanuni za wizara ya afya na Shrika la Afya Ulimwenguni (WHO) zitazingatiwa,” alisisitiza Askofu Muheria.

Aliwahimiza viongozi wa kidini kutoharakisha kufungua maeneo yao ya kuabudu kabla ya kuweka mipango inayofaa.

Kulingana na mwongozo uliotolewa na baraza hilo, maeneo ya kuabudu ni sharti yawe na maji ya waumini kuosha mikono au sanitaiza, waumini kuketi umbali wa mita moja na nusu kutoka kila mmoja, kuosha maeneo hayo mara kwa mara.

Waumini wote watakuwa wakipimwa viwango vya joto kabla ya kuruhusiwa kuingia makanisani na misikitini na kila mmoja lazima avalie barakoa.

Askofu Muheria aliwataka Wakenya kutumia kufunguliwa kwa maeneo ya kuabudu kuombea nchi na ulimwengu wakati huu wa janga la corona.

Aliyeingia Ikulu akitaka kushauriana na Uhuru kuhusu ibada aachiliwa

Na RICHARD MUNGUTI

MAHAKAMA ya Milimani imemwachilia huru mwanamume aliyeingia Ikulu ya Nairobi akidai anataka kushauriana na kujadiliana na Rais Uhuru Kenyatta jinsi ya kutekeleza ibada kupata thawabu kutoka kwa Allah.

Hakimu mwandamizi Bw Daniel Ndungi alimkabidi Luqman Ali Mahmmoud kwa mjomba wake Bw Saudi Abdallah ampeleke hospitali kutibiwa maradhi ya akili.

Na wakati huo huo Bw Ndungi alimuonya Bw Abdallah kwamba atashtakiwa kortini endapo atamwachilia Luqman kurudi Ikulu ya Nairobi mara nyingine.

“Utakamatwa na kushtakiwa endapo utamwachilia Luqman kurudi Ikulu ya Nairobi akitaka kushauriana na Rais Kenyatta masuala ya ibada kwa Allah,” Bw Ndungi alimtahadharisha Bw Abdallah.

Saudi Abdallah, mjomba wa Luqman Ali Mahmmoud. Picha/ Richard Munguti

Mahakama ilimwagiza Luqman ashirikiane na mjomba wake apate tiba ya maradhi ya ubongo anayougua.

Bw Ndungi alimwachilia mshtakiwa chini ya kifungu cha sheria nambari 87(a) cha sheria za uhalifu.

Alimtahadharisha mshtakiwa kwamba “endapo atathubutu kurudi Ikulu ya Nairobi tena akisingizia anataka kufanya mashauriano na Rais Kenyatta atakiona cha mtema kuni kwa vile atafikishwa kortini tena na kuadhibiwa vikali.”

“Umeelewa vile nimekueleza?” Bw Ndungi alimwuliza mshtakiwa.

Luqman akajibu.

“Ndio nimeelewa kabisa. Sitarudi Ikulu ya Nairobi tena,” Luqman alimhakikishia hakimu.

“Basi mahakama imekukabidhi kwa Bw Abdalla baada ya upande wa mashtaka kutamatisha kesi hii inayokukabili,” Bw Ndungi alimweleza mshtakiwa.

Hakimu mwandamizi Bw Daniel Ndungi akiwa mahakamani jijini Nairobi Ijumaa, Juni 26, 2020. Picha/ Richard Munguti

Hakimu alimwachilia mshtakiwa baada ya kukabidhiwa ripoti kutoka kwa hospitali ya kutibu maradhi ya ubongo iliyosema: “Luqman amekuwa akiugua maradhi ya ubongo kwa muda mrefu.”

Bw Ndungi alisema mjomba aliomba korti imruhusu amchukue Luqman ampeleke hospitalini na kukaa chini ya ulinzi na uangalizi wake.

“Hii mahakama haiwezi kukataa ombi la Bw Abdallah,” alisema hakimu.

Luqman alitiwa nguvuni baada ya kukaidi agizo la maafisa watatu wa polisi wakitaka asimame afanyiwe ukaguzi kabla ya kuingilia lango nambari D.

Maafisa waliomsimamisha Luqman ni Konstebo Duncan Orero, Konstebo Winston Abwawo na Koplo Alex Sirongo.

Mshtakiwa aliyekuwa akiendesha gari aina ya Volkswagen Polo nambari ya usajili KCP 048Y aliingia Ikulu mwendo wa saa kumi na nusu kwa nguvu.

Hakimu alielezwa ilibidi polisi wapige risasi magurudumu ya gari alilokuwa anaendesha mshtakiwa ndipo lisimame.

Luqman pia alikabiliwa na shtaka la kuingia pahala pasiporuhusiwa umma kuingia.

Mnamo Juni 19, 2020, Luqman alishtakiwa kwamba aliingia Ikulu ya Nairobi ambapo mmoja hawezi kuingia bila idhini.

Mshtakiwa alikiri shtaka dhidi yake huku akieleza korti lengo lake kuingia Ikulu lilikuwa kushauriana na kuelewana na Rais Kenyatta kuhusu masuala ya utekelezaji ibada kwa Allah.”

Uwanja ambapo ibada hufanyika wakati wa corona

Na SAMMY WAWERU

Ni zaidi ya siku 100 tangu kisa cha kwanza cha maambukizi ya Covid – 19 kiripotiwe nchini Kenya, mnamo Machi 13, 2020.

Kudhibiti maambukizi, sheria na mikakati maalum ilitolewa chini ya maelekezi ya Wizara ya Afya kwa mujibu wa vigezo vya Shirika la Afya Duniani, WHO.

Inajumuisha uvaliaji barakoa ndiyo maski katika maeneo ya umma, kuzingatia umbali wa zaidi ya mita moja na nusu kati ya mtu na mwenzake, unawaji mikono kila wakati, na pia kuepuka maeneo ya umma.

Mikusanyiko au makongamano katika maeneo ya kuabudu, mabaa na vilabu, na mikutano ya hadhara kijumla, ilipigwa marufuku kwa muda, ili kuzuia kusambaa kwa virusi hatari vya corona, ambavyo kwa sasa ni kero la ulimwengu mzima.

Kimsingi, ni mikakati ambayo imetajwa kuchangia kudorora kwa uchumi, japo serikali inashikilia haina budi ila kuhakikisha inatekelezwa kwa kile inahoji “maisha ya Wakenya ni muhimu zaidi kuliko uchumi”.

Licha ya maeneo ya kuabudu kupigwa marufuku Machi 2020 kwa muda usiojulikana, imebainika baadhi ya watu wanakongamana kisiri ili kulishwa chakula cha kiroho na wachungaji wao.

Mtaa wa Membley, ulioko katika eneo la Ruiru, kaunti ya Kiambu, na karibu na Thika Super Highway ni wa kifahari na unaoishi mabwanyenye, kwa mujibu wa taswira ya nyumba zilizojengwa humo, sawa na kasri la mfalme.

Katika mtaa huo, pembezoni ni uga mkubwa ulioshikana na Thika Road, kati ya Chuo Kikuu cha Kenyatta (K.U) na Bypass – Ruiru.

Kufika katika uwanja huo, unaingilia eneo maarufu la Clayworks. Ni katika uwanja huohuo ambapo kila Jumapili makundi mbalimbali ya watu hukongamana kusifu, kuabudu Mungu na kupokea chakula cha kiroho.

Katika uchunguzi wa Taifa Leo Dijitali wa muda wa wiki tatu mfululizo, imefichuka shughuli hiyo imekuwa ikiendeshwa kwa zaidi ya mwezi mmoja na nusu.

Mojawapo ya Jumapili, tunaungana na kundi moja la washirika, tukiarifiwa kwamba kila kundi linawakilisha kanisa.

Mwendo wa saa tano hivi za asubuhi, tunatua eneo la Clayworks, na katika uga huo tunakaribishwa na sauti za ngoma, nyimbo za kuabudu na maombi ya toba, matukio yanayohinikiza anga tua hiyo. “Huwa tunakongamana humu kila Jumapili na Alhamisi kukata kiu cha chakula cha kiroho,” mmoja wa muumini anadokeza.

Uwanja huo umegawanywa mara mbili na barabara inayoelekea mtaa wa kifahari wa Membley. Pia, reli ya zamani inayounganisha jiji la Nairobi na Nanyuki na ambayo inafufuliwa imepitia humo.

Kwa kupepesa macho, kila uga una makundi tofauti ya washirika, ambao wamekusanyika kwa kuunda umbo la mviringo.

Kabla ya ibada kuanza katika kundi lililotualika, washirika na makuhani wanaingia katika maombi yanayochukua muda wa takriban dakika thelathini. “Kila siku huwa tunatangaziwa maambukizi mapya ya virusi vya corona na pia wagonjwa waliofariki. Ni kwa neema ya Mwenyezi Mungu sisi kuwa hai, na huwa tunakusanyika hapa kumshukuru,” pasta anayejitambua kwa jina Muia anaiambia Taifa Leo Dijitali.

Baada ya kusali, pasta mkuu anaanzisha ibada. Inashirikisha ulishaji wa chakula cha kiroho kwa waumini na pia nyimbo za kumtukuza Mungu.

“Mambo ni magumu, ila tunaelekeza macho yetu kwa Mwenyezi Mungu atuondolee janga la corona. Licha ya ugonjwa huu kuwa kikwazo, hatutakoma kumshukuru,” mhubiri anaeleza katika mahubiri.

Aidha, anashirikisha waumini kadhaa kutoa ushuhuda na pia kuhubiri.

Gladys Wambura, anasimulia masaibu aliyopitia baada ya kupoteza wapendwa wawili na anaungama Mungu aliwawezesha kuwapumzisha licha ya changamoto zilizopo.

“Sote tukifuata na kuiga maandiko katika kitabu cha pili cha Timothy 2 : 20 – 21 tutaishi kufurahia neema za Mungu,” kijana Samuel Muigai anahimiza katika mahubiri.

Kipindi cha kutukuza kwa njia ya nyimbo, ndicho kinaibua maswali. Kigezo cha umbali kati ya mtu na mwenzake, kinakiukwa, ikizingatiwa kuwa ni vigumu kuzuia watu kutangamana wakati wa kuimba.

Washirika wote wanatumbuiza bila kukumbuka hatari inayowakodolea macho, kuambukizwa virusi vya corona endapo kuna mgonjwa miongoni mwao. “Hii ni fursa ya kipekee ambayo huwa haipatikani kwa urahisi, hivyo basi tujiwachilie kwa kusifu,” pasta mkuu anaeleza.

Ibada ya misa inaendelea, na pia matoleo ya sadaka yanafanyika, katika kundi hilo la kanisa ambalo lilikuwa na washirika wapatao 43. 

Ni taswira inayoshuhudiwa katika makundi mengine, na kulingana na hesabu yalikuwa zaidi ya 20.

Kundi moja la dhehebu la Akorino, kamwe washirika hawazingatii umbali kati ya mtu na mwenzake. Wanatangamana bila wasiwasi, watoto wakiwemo.

Isitoshe, hakuna aliyevalia barakoa, na kadhaa kifaa hiki muhimu kuzuia kuambukizwa Covid – 19 kinaning’inia kwenye kidevu.

Katika uwanja huo ambao pia hutumika katika soka na michezo mingineyo, kuna wanaoshiriki maombi wakiwa binafsi.

Ni mikusanyiko ambayo inatekelezwa licha ya serikali kupiga marufuku makongamano ya aina yoyote yale.

Mnamo Jumapili Juni 21, 2020, siku 100 baada ya Kenya kuthibitisha kuwepo kwa virusi vya corona nchini, Waziri wa Afya Mutahi Kagwe alisisitiza kwamba mikusanyiko ya watu ingali marufuku. “Hakuna mikusanyiko ya aina yoyote ile inayokubalika katika Jamhuri ya Kenya kipindi hiki, kwa sababu inahatarisha maisha ya watu wetu,” Waziri Kagwe akasema.

Baraza laundwa kufungua ibada

CHARLES WASONGA na SAMMY WAWERU

HATIMAYE serikali imedhihirisha kujitolea kwake kufungua maeneo ya ibada kwa kubuni baraza maalum la viongozi wa kidini litakaloandaa mwongozo wa kufanikisha mpango huo.

Hata hivyo, ufunguzi huo utatekelezwa kwa awamu huku masharti yaliyowekwa na serikali ya kuzuia maambukizi ya ugonjwa wa Covid-19 yakihitajika kuzingatiwa.

Katika tangazo lililochapishwa kwenye toleo maalumu la gazeti la serikali, Waziri wa Usalama Fred Matiang’i na mwenzake wa Afya Mutahi Kagwe, walisema baraza hilo litaongozwa na Askofu Mkuu wa Kanisa Katoliki dayosisi ya Nyeri, Anthony Muheria.

“Kufuatia agizo lilitolewa na Rais Uhuru Kenyatta katika hotuba yake ya nane kwa Taifa kuhusa janga la Covid-19, na kutokana na mashauriano na viongozi wa madhehebu mbalimbali, tumeteua baraza la viongozi wa kidini watakaoongoza mchakato wa ufunguzi wa maeneo ya ibada,” likasema tangazo lililoidhinishwa na mawaziri hao.

Wanachama wengine wa baraza hilo ni pamoja na Kasisi Rosemary Mbogo, Pasta Samuel Makori, Al Haji Hassan Ole Naado, Sheikh Sukyan Hassan Omar, Sheikh Abdulatif Abdulkarim na Kasisi Joseph Mutie.

Pia kuna Askofu David Oginde, Kasisi Connie Kivuti, Sujata Kotamraju, Kasisi Samuel Thiong’o Mwangi na Sheikh Ali Saidi Samojah.

Hayo yakiendelea, watu 90 zaidi walithibitishwa kuwa na ugonjwa wa Covid-19, hivyo kufikisha 3,305 idadi ya jumla ya maambukizi nchini.

TF Body text: Hii ni baada ya sampuli 2,419 kufanyiwa uchunguzi ndani ya kipindi cha saa 24 zilizopita. Idadi jumla ya sampuli ambazo zimepimwa nchini kufikia sasa imetimu 108,666

Akitoa taarifa ya kila siku kuhusu hali ya janga hilo nchini, Waziri Msaidizi wa Afya Rashid Aman alisema wagonjwa 72 zaidi wamepona na kuruhusiwa kwenda nyumbani. Hii imefikisha 1,164 idadi ya wale ambao wamepona corona kufikia Ijumaa.

Kuhusiana na maambukizi mapya Nairobi inaongoza kwa visa 36, Mombasa inafuata kwa visa 34 huku Busia ikishikilia nambari tatu kwa visa 12.

Kutoa damu

Dkt Aman pia alitumia jukwaa la Ijumaa jijini, Nairobi, kuzindua mpango wa kitaifa wa kutoa damu.

Kiwango cha damu inayokusanywa nchini ili kusadia wagonjwa wenye mahitaji kinawakilisha asilimia 1 ya jumla ya idadi ya Wakenya, taifa hili likiwa na takriban watu milioni 50.

Huku Kenya ikijiandaa kuungana na mataifa mengine ulimwenguni kuadhimisha sikukuu ya utoaji msaada wa damu duniani 2020, mnamo Jumapili, inayoadhimishwa Juni 14 kila mwaka, Wizara ya Afya Ijumaa imesema kiwango hicho ni cha chini mno kikilinganishwa na mahitaji ibuka.

Waziri Msaidizi katika Wizara hiyo Dkt Rashid Aman, amesema kulingana na Shirika la Afya Duniani, WHO, kwa mujibu wa idadi jumla ya Wakenya, shirika hilo linapendekeza ukusanyaji wa paili 500,000 za damu kila mwaka, kiwango hiki kikiwa takriban paili 1,370 kwa siku.

Dkt Aman hata hivyo alisema Kenya hukusanya paili 160,000 kwa mwaka, kiwango hiki akikitaja kuwa cha chini mno kikilinganishwa na pendekezo la WHO ili kukithi mahitaji ya damu nchini.

“Kiwango hicho kinaashiria hukusanya paili 450 za damu kila siku. Ni cha chini mno, na kama taifa tunahitaji kufanya busara kukiongeza,” Dkt Aman akasema.

Wakati huu janga la Covid-19 linaendelea kuhangaisha, Wizara ya Afya inasema utafiti unaonyesha kiwango cha utoaji damu ulimwenguni kimeshuka kwa baina ya asilimia 70 na 80.

Hapa nchini, utoaji wa msaada wa damu ambao ni shughuli ya hiari umeshuka kutoka paili 450 hadi 250, Dkt Aman akisema upungufu huo umechangiwa na athari za virusi vya corona.

Hata hivyo, waziri amesema Wizara ya Afya inafanya kila juhudi kuhakikisha upungufu wa damu nchini unaangaziwa.

Akizungumza Ijumaa katika bustani ya ukumbi wa KICC, ambako kampeni ya kuhamasisha watu kujitolea kutoa msaada wa damu imeanza kwa minajili ya maadhimisho ya sikukuu ya usambazaji damu duniani 2020, Dkt Aman alisema serikali imeweka mikakati kabambe kuimarisha shirika la kitaifa kukusanya damu, KNBTS.

“Tumeliongezea wahudumu wengine 22 zaidi. Pia, kwa ushirikiano na Benki Kuu ya Dunia, tutafadhili KNBTS kwa Sh1 bilioni ili kuimarisha huduma zake,” akaeleza, akisema kwamba mikakati iliyowekwa itasaidia kuhakikisha shirika hilo lina vifaa vya kutosha kukusanya damu.

Aidha, aliongeza kusema kwamba serikali na wadau husika, wanapania kutumia mitandao ya kijamii kama vile Facebook kuhamasisha wachangiaji kujitokeza kutoa misaada ya damu.

Kufikia sasa, Dkt Aman alisema Kenya ina jumla ya vituo 33 vya kutoa na kukusanya damu.

Wakristo sasa wafanya ibada milimani na mapangoni kisiri

Na TITUS OMINDE

BAADA ya serikali kupiga marufuku ibada katika makanisa na mikutano ya kidini kama njia moja ya kukabiliana na kuenea kwa virusi vya corona, imefichuka kwamba baadhi ya waumini sasa wameamua kukongamana na kuendeleza maombi katika milima na mapango kisiri.

Maombi haya ya faragha yanaendeshwa kwa zamu miongoni mwa madhehebu mbalimbali katika maeneo ya Magharibi na Rift Valley.

Baadhi ya wale ambao wanaendesha maombi hayo walijitetea kwamba wanaiga Yesu Kristo, ambaye Biblia inasema alienda mlimani kuomba na kufunga kwa ajili ya uponyaji na kupata nguvu zaidi za kukabiliana na nguvu za maovu.

“Nimeamua kuendeleza maombi hapa mlimani kama alivyofanya Yesu ili kutafuta uponyaji kutokana na janga hili la virusi vya corona,” alisema Bw Joseph Kiptoo, ambaye huendesha maombi yake katika Mlima wa Kapsoya mjini Eldoret.

Bw Kiptoo alisema hatua hiyo haipaswi kuchukuliwa kama kukaidi agizo la serikali, bali ichukuliwe kama moja ya ambazo Wakristo wanatumia kushirikiana na serikali katika vita dhidi ya virusi hivyo.

Mtindo huu wa kwenda kinyume na masharti ya serikali umefichuka wakati ambapo baadhi ya viongozi wa kidini wanashinikiza serikali kulegeza masharti kuhusu marufuku ya kukongamana makanisani, na katika sehemu nyingine za ibada.

Mnamo Ijumaa, wahubiri watatu waliishtaki serikali wakitaka mahakama iondoe agizo hilo, na badala yake kuwepo mwongozo utakaohakikisha waumini hawajiweki katika hatari ya kuambukizana corona wakiwa makanisani.

Hali sawa na hiyo ya maombi ilionekana katika Mlima wa Maili Nne katika Kaunti ya Uasin Gishu, ambapo waumini wa madhehebu tofauti ya Ukristo wamejificha mapangoni na vichakani wakiomba.

Unapofika katika mlima huu kile unachosikia ni watu wengi wakiomba kwa sauti za juu.

Wale ambao wanafika katika mlima huu ambao unamilikiwa na Kanisa la IVC mjini Eldoret, wanasisitiza kwamba wamezingatia masharti yote ya kujikinga na virusi kwani kuna maji ya kunawa mikono, sanitaiza, na dawa za kuua viini, na sabuni katika lango la kuingia mlimani humo.

Katika Mlima wa Likuyani maarufu kama Likuyani Prayer Mountain katika Kaunti ya Kakamega, hali ni sawa na hiyo ambapo Wakristo kutoka maeneo mbalimbali ikiwa ni pamoja na Kaunti Ndogo ya Likuyani, Kakamega Mjini, Trans Nzoia na kaunti jirani ya Uasin Gishu hukusanyika kwa maombi.

Katika mahojiano na Taifa Jumapili, Wakristo hao waliomba serikali kutoingilia hatua ambazo wanachukua kuendeleza maombi ya faragha kwani wanasema maombi yao ni kwa lengo la kukabiliana na janga la corona ambalo linakumba ulimwengu wote.

“Silaha ambayo tuko nayo kama Wakristo ni maombi. Serikali isitufuate msituni tunampotafuta Mungu ili atupiganie katika janga hili,” akasema mmoja wa waumini hao ambaye aliomba asitajwe jina.

Aliendeleai kusema kuwa, mbali n maombi ya faragha, wao wanazingatia sheria za afya ya umma katika vita dhidi ya janga hilo.

Waliahidi kuzingatia kanuni zote zilizowekwa na serikali katika vita dhidi ya virusi vya corona.

Serikali iliagiza kufungwa kwa makanisa, misikiti na maeneo mengine ya ibada mwezi jana katika jitihada za kuzuia ueneaji wa ugonjwa huo uliozuka nchini China mwaka jana.

Pia imeweka kafyu ya usiku kote nchini, kufunga maeneo ya burudani na kuweka marufuku ya kuingia na kutoka kaunti za Nairobi, Mombasa, Kilifi na Kwale ambazo zinaongoza kwa idadi ya juu ya visa vya virusi hivyo.

Kufikia jana watu 191 walikuwa wamethibitishwa kuugua ugonjwa huo hapa nchini, 24 kati yao wakitangazwa kupona.

Ugonjwa huo umesambaa katika mataifa 210 kote duniani, ambapo watu zaidi ya milioni 1.7 walikuwa wameambukizwa kufikia jana na elfu 103 kati yao kufariki.

Maradhi hayo yamelemea zaidi mataifa ya Uropa na Amerika, ambayo kufikia jana kulikuwa na watu nusu milioni walioambukizwa na elfu 18 kufariki.

Corona yapangua ibada, sadaka kutolewa kwa kutumia M-Pesa

Na FAITH NYAMAI

KWA mara ya kwanza katika historia ya Kenya, makanisa mengi yamesitisha ibada zao za Jumapili kote nchini na kuwaruhusu waumini kufuatilia ibada zao mitandaoni.

Haya yanajiri huku Kenya ikiweka mikakati kabambe ya kudhibiti kusambaa kwa virusi vya corona ambavyo vimetangazwa kama janga la kimataifa.

Makanisa, badala yake, yameagiza wafuasi wake kukaa nyumbani na kuwataka kulipa zaka na sadaka zao pamoja na matoleo mengine kupitia M-Pesa na huduma nyinginezo za malipo kielektroniki.

Wale ambao hawajasitisha ibada zao wamegeukia kunyunyizia majengo ya makanisa yao dawa ya kuua bakteria na virusi.

Wengine wameahidi kutumia sabuni za kusafisha mikono, jeli na dawa za kuua viini kwenye mikono ili kuzuia kuenea kwa virusi hivyo miongoni mwa wafuasi wake.

Wahubiri wa Kanisa la Redeemed Christian Church of God Solution Centre Prince na Esther Obasike waliwaagiza wanachama wao kufuatilia ibada zao mtandaoni na kutoa nambari ya Paybill kwa wafuasi wao kulipa sadaka na zaka kupitia M-Pesa na huduma za mitandaoni.

Kanisa la Anglikana Kenya(ACK) pia limesitisha ibada zake zote za Jumapili kwa siku 30 zijazo kuambatana na amri ya kuzuia kusambaa kwa virusi vya corona.

Kanisa hilo lilitangaza kwamba askofu Jackson Ole Sapit atakuwa akiongoza ibada maalum zitakazotangazwa Jumapili saa mbili asubuhi na Jumatano jioni.

Kanisa la Presbyterian Church of East Africa (PCEA) pia limesitisha ibada zake za Jumapili na shughuli nyinginezo za kanisa kwa siku 21 zijazo kulingana na Katibu Mkuu wa PCEA, Mhubiri Peter Kaniah.

Kongamano la Maaskofu Wakatoliki Kenya lilisema misa zitaendelea katika makanisa yake yote lakini likasema limeweka mikakati ya kuhakikisha viwango vya juu vya usafi na umbali wa kutangamana kijamii wa mita moja vimezingatiwa.

Makanisa mengine ambayo yamesitisha ibada zake za Jumapili ni pamoja na Christ is The Answer Ministries (CITAM), Nairobi Gospel, City Church, Kenya Assemblies of God na mengineyo.

Katibu wa Kanisa la Africa Inland Church Kenya (AIC) Pasta John Kitala kupitia notisi kwa makanisa yake yote nchini, alisitisha mikutano yote ya ushirika na shughuli katikati ya wiki na kuwataka wafuasi kuzingatia umbali unaoruhusiwa wa kutangamana.

Kanisa la Redeemed Gospel la Askofu Arthur Gitonga lilisema limesitisha ibada zote na mikutano katikati mwa wiki, kesha lakini ibada za Jumapili zitasalia.

Apostle Julius Suubi wa Exploits Worship Centre alisema watanyunyizia makanisa yao dawa za kuua viini na kuwahimiza Wakenya kusimama imara kwa maombi.

Msikiti wa Jamia Nairobi pia ulisitisha ibada zake kufuatia amri ya serikali.

RAMADHANI: Mambo yanayoweza kuharibu saumu

Na MOHAMED KHAMIS

TUNAPOINGIA siku ya sita katika ibada ya saum mwezi huu wa Ramadhan, inawezekana kuna baadhi yetu ambao wanajiunga tu na wengine kwenye ibada bila ya kufahamu mambo muhimu ya kuzingattiwa.

Saumu, sawa na ibada nyingine, ina masharti yanayostahili kuzingatiwa, ambapo bila hivyo, ibada ya kufunga huharibika.

1. Kula au kunywa kimakusudi.
Hakuna tafauti ikiwa kitu kile kinaliwa kama mkate au maji, au hakiliwi kama udongo au mafuta ya taa. Pia haijalishi kama unakula au kunywa kwa mdomo kama desturi au kwa pua, au kwa njia ya kudungwa sindano.

Lakini kupenyeza dawa kwa njia ya sindano katika mikono au paja au mahala popote pa kiwiliwili haitadhuru saumu. Mtu aliyefunga akila au kunywa kwa kusahau saum yake haiharibiki.

Hata hivyo, inampasa awache punde tu akigundua kuwa yuko kwenye saum. Kutafuna chakula kwa ajili ya watoto au ndege, na kuonja chakula (kwa wapishi) ambao kwa desturi hakifiki kooni hakuna makosa.

2. Kuingiliwa mtu na utupu
Kufanya tendo la ndoa hufanya wote wawili kuwa hawajafunga, hata kama hawakutoa manii (shahawa). Ikiwa mtu katika hali ya saumu amelala akaota usingizini na akatokwa na manii, saum yake hubaki pale pale. Muhimu ni kuwa itampasa kuoga janaba anapotaka kusali.

3. Kuzamisha kichwa chote katika maji makusudi
Hakuna tofauti ikiwa kiwiliwili kipo ndani au nje ya maji. Ikiwa umepiga mbizi kwa kusahau tu, haitabatilika saumu. Iwapo aliyefunga atataka kuingia kwenye kidimbwi cha maji, itakuwa vyema kama atajiepusha na kupiga mbizi kwa kuingiza kichwa chote ndani ya maji.

Kukaa na janaba hadi alfajiri makusudi hukuoga ni haramu.

Ikiwa mtu amelala kwa dhamiri ya kuoga kabla ya alfajiri na usingizi ukamchukua mpaka asubuhi, saumu yake haibatiliki.

Mambo yavunjao saumu ni mengi tu yafaa tuhudhurie darsa (hotuba) misikitini ili tujifunze mengi. Mwenyezi Mungu atuongoze na atukubalie funga zetu.