Mganga ataka shirika limrejeshee Sh18.5m

Na BRIAN OCHARO

MGANGA wa kienyeji, Bw Stephen Vicker Mangira amewasilisha ombi mahakamani kutaka shirika la serikali la kuzuia mali za ulaghai (ARA), liagizwe kumrudishia mamilioni ya pesa na mali zake zilizozuiliwa kwa madai zilipatikana kwa njia za uhalifu.

Hii ni baada ya mahakama kumpata bila hatia katika tuhuma za utapeli wa pesa na ulanguzi wa dawa za kulevya.

Bw Mangira sasa anataka korti iamuru arudishewe Sh18.5 milioni na magari kadhaa ambayo yalizuiliwa na ARA.

Kupitia kwa wakili Kinyua Kamundi, anasema kwamba kwa kuwa ameachiliwa, anapaswa kuregeshewa mali zake, na kuongezea kuwa ARA haikutafuta amri yoyote ya kushikilia vitu hivyo baada ya kuachiliwa huru.

Wakili huyo amekosoa ARA kwa kuendelea kushikilia vitu hivyo akisema huo ni ukiukaji wa sheria unaotoa dhana ya kuwa ana hatia.

“Korti ilisema hana hatia na ikamuachilia huru na uamuzi huo haukuacha nafasi yoyote ya kushikilia mali ya mtu asiye na hatia,” akasema Bw Kamundi.

Bw Mangira aliweka ombi hilo mwezi mmoja baada ya kuachiliwa huru kwa mashtaka 12 ya ulanguzi wa dawa za kulevya, utakasaji wa pesa haramu, na kushukiwa kupata mali kinyume cha sheria.

Alishtakiwa pamoja na washukiwa wengine watatu.

Bw Mangira alitoa ushahidi katika kesi hiyo ya jinai kwamba yeye ni mtaalam wa dawa asili na alipata mali zake kupitia kazi hiyo.

Ili kuendeleza biashara yake, alisema anapata dawa zake kutoka kwa misitu na milima na pia kwa kuelekezwa na ‘malaika’.

Kulingana na rekodi ya korti, mtaalam huyo ana wateja nchini Kenya na ulimwenguni kote, ambao wamethamini kazi yake kwa kumpa pesa taslimu au magari ya kifahari kulipia gharama za matibabu.

Siku ya kukamatwa, Bw Mangira alimwambia Hakimu Mkuu wa Shanzu Florence Macharia kuwa alikuwa na mtoto wake wa miaka 10 wakati alipovamiwa na maafisa wa polisi waliojumuisha wale kutoka Huduma za Kitaifa za Ujasusi (NIS).

Siku hiyo, alipaswa kukutana na marafiki wengine kwenye Hoteli ya Reef, na kwa kuwa mtoto wake alipenda kuogelea, alilipia chumba katika hoteli hiyo.

Alikuwa na Sh20 milioni na kati ya hizo, Sh600, 000 ilipaswa kulipwa kama ada ya shule kwa mtoto wake.

“Fedha zilikuwa kwenye mifuko miwili kwenye buti ya gari langu,” alisema.

Alikana kuwafahamu washtakiwa mwenzake Bw Nabil Loo Mohamed, Bakari kali Bakari na Lilian Martin kabla ya kukamatwa na kushtakiwa kortini mnamo 2017.

Kulingana na ushuhuda wake mbele ya hakimu huyo, polisi walichukua Sh20 milioni iliyokuwa ndani ya mifuko hizo miwili, lakini waliwasilisha tu Sh18.5 milioni kortini.

Alikana kushiriki katika vitendo vyovyote vya uhalifu na kuelezea kuwa alipata utajiri wake kutoka kwa wateja wake ambao walimpa pesa na magari baada ya kuridhika na huduma zake.

Bw Mangira alikanusha kupatikana au kufanya biashara ya dawa za kulevya, kufadhili ugaidi au utapeli wa pesa na kwamba utajiri wake haukuwa unatokana na uhalifu.

Upande wa mashtaka uliita mashahidi 19 kwa jaribio la kuthibitisha makosa 12 ambayo Bw Mangira na washtakiwa wenzake watatu walikuwa wanakabiliwa nayo.

Serikali ilidai Bw Mangira alipata utajiri wake kupitia uhalifu kwa kuhusika katika ulanguzi wa dawa za kulevya.

Upande wa mashtaka ulidai kuwa wanne hao walikamatwa baada ya ripoti ya ujasusi kuwahusisha na biashara haramu ya dawa za kulevya huko Nyali.

Hata hivyo, Bi Macharia alisema kuwa upande wa mashtaka ulishindwa kuthibitisha mashtaka 12 waliyoweka dhidi ya washukiwa hao.

Kwa kosa la utapeli wa pesa, korti ilibaini kuwa upande wa mashtaka ulishindwa kudhibitisha kuwa washukiwa walifanya uhalifu na kufaidika moja kwa moja au kwa njia nyingine na uhalifu huo.

Mimi si mchawi – Raila Odinga

LEONARD ONYANGO na DERICK LUVEGA

KIONGOZI wa ODM, Bw Raila Odinga jana aliendeleza juhudi za kuimarisha uhusiano kati yake na viongozi wa kidini huku akisisitiza kwamba hatumii nguvu za kishirikina kujijenga kisiasa kama inavyodaiwa na wapinzani wake.

Kwa miezi miwili sasa, Bw Odinga amekuwa akiendeleza kampeni ya ‘kujitakasa’ dhidi ya madai ya wapinzani wake, hasa Naibu Rais, Dkt William Ruto, ambao humwita ‘mganga’.

Alipozungumza jana akiwa kanisani katika Kaunti ya Busia, alisisitiza kuwa yeye ni Mkristo wa dhati ingawa hapendi kujiganba kuhusu imani yake, tofauti na viongozi wengine wanavyopenda kufanya.

Alipopewa nafasi kuhutubia waumini katika Kanisa Katoliki la St Stephens, Lwanya katika eneo la Mundika, Kaunti ya Busia, alitoa ushuhuda kwamba Mungu amemtendea miujiza mingi maishani mwake hivyo hawezi kuongozwa na nguvu za giza.

Aliwaeleza waumini kuhusu namna Mungu alivyoyanusuru maisha yake baada ya jaribio la mapinduzi ya serikali ya Rais Daniel arap Moi mnamo 1982.

Aliwaambia waumini pia namna alivyotorokea nchini Uganda kupitia Ziwa Victoria huku amevalia mavazi ya kasisi, akaponyoka minyororo ya utawala wa giza kwa nguvu za Mungu.

“Wanaendelea kuniita ‘mganga’. Mimi si mchawi. Huwa ninaenda kanisani mara kwa mara na Mungu amenitendea miujiza mingi,” akasema Bw Odinga aliyebatizwa na kiongozi wa Kanisa la Repentance and Holiness, Dkt David Owuor mnamo 2009.

“Tofauti yangu na wengine ni kwamba mimi sijigambi kuhusu Ukristo wangu. Ninaomba Mungu atusaidie tuunganishe nchi yetu,” akasema Bw Odinga.

Mwezi uliopita, wakati wa hafla ya kumtawaza rasmi Askofu Michael Odiwa kuwa kiongozi wa Parokia ya Homa Bay, Bw Odinga alimtaka Naibu wa Rais kukoma kumrejelea kama mganga.

“Kuna watu wanaoniita mtu wa vitendawili au mganga. Waganga ni watu wanaotibu wagonjwa. Sioni shida yoyote kuitwa mganga lakini nataka mjue kwamba mimi ni Mkristo halisi. Kanisa limehusika pakubwa katika ukombozi wa nchi hii na haki za kibinadamu,” akasema.

Alipokutana na viongozi wa makanisa katika Jumba la Ufungamano jijini Nairobi, mnamo Januari, mwaka huu, Bw Odinga aliwasili akiwa amebeba Biblia kudhihirisha Ukristo wake.

Suala la imani ya Bw Odinga limekuwa likiibuliwa na wapinzani wake kila uchaguzi mkuu unapokaribia. Wapinzani wake wamekuwa wakimhusisha na ushirikina. Katika uchaguzi mkuu wa 2017, wanasiasa wa Jubilee waliokuwa wakiongozwa na Rais Uhuru Kenyatta, walidai kuwa maneno ya ‘Tibiim’ na ‘Tialala’ yaliyokuwa yakitumiwa na muungano wa NASA kumpigia debe Bw Odinga, yalikuwa na maana fiche ya kishirikina.

Siku chache baada ya Rais Uhuru kutangaza kushirikiana na Bw Odinga, almaarufu handisheki, mnamo 2018, Seneta Maalum Beth Mugo, alionya msanii Joseph Onyango Ochieng’ (Onyi Jalamo) dhidi ya kuingiza jina la Rais kwenye wimbo wake wa ‘Tibiim’.

“Kuna wimbo ambao unahusisha Rais Kenyatta na maneno ‘Tialala’ na ‘Tibiim’. Sisi hatujui maana ya maneno hayo na asili yake. Rais Kenyatta ni Mkristo wala hafai kuhusishwa na maneno hayo,” akasema Bi Mugo alipokuwa akihutubu katika Kanisa la PCEA Runda, Machi 26, 2018.

Hapo jana, Bw Odinga ndiye mwanasiasa pekee aliyeruhusiwa na Padri Moses Langiri kuhutubia waumini ndani ya kanisa hilo huku wengine wakishauriwa kuzungumzia nje ya kanisa baada ya ibada.

“Bw Odinga ndiye mgeni wetu atakayetuhutubia na wengine watazungumzia huko nje baada ya ibada,” akasema Padri Langiri.

Baada ya ibada, Bw Odinga alifanya vikao mbalimbali katika Kaunti ya Busia ambapo alipigia debe mswada wa marekebisho ya katiba, akisema Dkt Ruto ameingiwa baridi ndiposa hataki kutangaza msimamo wake kuhusu kama anaunga mkono au kupinga Mpango wa Maridhiano (BBI).

Mganga aliyefumaniwa akiwa uchi kukaa rumande zaidi

Na Lucy Mkanyika

MGANGA wa dawa za kienyeji mwenye umri wa miaka 71 katika Kaunti ya Taita Taveta, jana alishtakiwa katika mahakama ya Wundanyi kwa kupatikana akitembea akiwa uchi kwenye boma la mtu mmoja.

Duncan Masaka ambaye anayo leseni ya kuendesha tiba kwa kutumia dawa za mitishamba, alitenda kosa hilo katika kijiji cha Ronge eneo la Kishau majuma mawili yaliyopita.

Siku ya tukio, iliwalazimu polisi waingilie kati na kumwokoa baada ya umati kumvamia ukimlaumu kwa kuendeleza urogi nyumbani kwa mtu huyo. Bw Masaka pia ni mganga ambaye anaaminika kuwa na uwezo wa kuleta mvua hasa nyakati za ukame.

Hapo jana, akiwa mbele ya hakimu mkazi Emmily Nyakundi, alikubali mashtaka hayo ya kuvuruga amani ya watu na sasa atazuiliwa kwa miezi miwili kama njia ya kumhakikishia usalama wake, kwani raia bado wanadaiwa kumwinda.

Ripoti iliyowasilishwa mbele ya Bi Nyakundi ilibainisha kuwa mzee huyo amekuwa akiwaletea wenyeji mvua na kutoa tiba kwa kutumia miti-shamba tangu 1987.

Pia ilidaiwa amekuwa akifanya kazi na serikali ya kaunti ambapo yeye hushauriwa mara kwa mara kuhusu masuala ya kitamaduni.

Hata hivyo, kwenye ripoti hiyo Bw Masaka alifichua kwamba alikuwa amebugia pombe. Pia alidai ni wakazi ndio walimvua nguo kisha wakamshutumu kwa kushiriki urogi.

Mganga azirai mkewe alipookoka

Na John Musyoki

KAVATI, Kitui

MGANGA wa hapa alianguka na kuzirai baada ya kugundua kwamba mke wake alikuwa ameokoka katika njama ya kuvuruga biashara yake.

Inaarifiwa kuwa mke wa mganga huyo aliokoka muda mfupi baada ya kuzozana na mume wake akisema hangeendelea kuishi maisha ya giza ambayo mumewe alipenda.

Inasemekana wakati mke wa mganga alipokuwa akitoa ushuhuda kanisani, mume wake alipashwa habari kwamba mkewe alikuwa ameokoka na kutangaza kuwa angemuombea ili aache kazi ya uganga.

Mganga huyo aliposikia hivyo, alianguka na kuzimia. Mke wa jamaa alipofika nyumbani alipigwa na mshangao alipopata majirani wakimpa mume wake huduma ya kwanza. Alipowadadisi walidai mume wake alizimia baada ya kufahamishwa kwamba alikuwa ameokoka.

“Mchukue mume wako huyu. Amezimia punde tu ulipoamua kuokoka na kutangaza kusambaratisha biashara yake kupitia maombi,” jirani mmoja alisema.

Inasemekana licha ya demu kufahamishwa kilichokuwa kimejiri, alipuuza tu.

“Kama ni kuokoka kwangu kunakomfanya azimie, shauri yake. Amelala tu na usingizi wake ukiisha ataamka,” aliwajibu majirani.

Alisisitiza kuwa ataomba hadi mumewe aache kazi ya uganga na kukumbatia maisha ya nuru ya wokovu.

“Hata nyinyi ambao ni wateja wake nitawaombea muokoke,” mama alisema. Majirani waliendelea kumpa mganga huyo huduma ya kwanza licha ya kupuuzwa na mkewe. Jamaa aliporudiwa na fahamu alisema kwamba alihofia mkewe alitoboa siri zake kanisani.

Mkewe alimweleza kwamba alichofanya ni kuwataka waumini waungane naye katika maombi ili naye aokoke na kuacha kazi ya uganga. Jamaa alisema alirithi kazi hiyo kutoka kwa babu yake na hangeiacha kamwe.

Haikujulikana kilichojiri baada ya kioja hicho.

Mganga ataka nguo za marehemu

Na JOHN MUSYOKI

KYETENI, MASINGA

KIOJA kilishuhudiwa baada ya mazishi hapa mganga alipotimuliwa mbio alipotaka akabidhiwe nguo za marehemu.

Inasemekana baada ya mazishi mganga huyo alibaki nyumbani na kuelezea watu wa boma kwamba alitaka mavazi ambayo marehemu alikuwa akivaa alipokuwa hai.

Watu wa familia kusikia hivyo, walipigwa na mshangao mkubwa na kuanza kumkabili mganga huyo licha ya kutoa vitisho.

“Wewe ni nani na unataka mavazi ya marehemu! Hatukujui na marehemu hakuwa na uhusiano na wewe. Toka na uende kabisa,” mzee mmoja alimwambia mganga.

Mganga alianza kutoa vitisho vyake lakini hakufua dafu.

“Mtu asijaribu kunifukuza. Marehemu alikuwa mteja wangu wa karibu na tulikuwa marafiki. Tuliahidiana kwamba nitakuwa ninavaa mavazi yake. Mkikataa mtajilaumu wenyewe. Kila nguo ya marehemu ina hirizi niliyompa na haifai kuvaliwa na mtu mwingine isipokuwa mimi tulivyokubaliana naye,” mganga alifoka.

Inasemekana kila mtu katika boma hilo alichukua kila aina ya silaha; si mawe, si panga, si rungu, si nyahunyo na hata kuni kumtwanga jamaa huyo.Baadhi yao walisikika wakilia kwamba huenda jamaa huyo alisababisha kifo cha mpendwa wao ili achukue mavazi yake.

Mganga alipoona maisha yake yalikuwa hatarini na hakuna mtu aliyekuwa na huruma na yeye, alitoka shoti na kupotea..

Watu walibaki kunong’onezana kuhusu kisa hicho huku watu wa boma wakiapa kumchukulia mganga huyo hatua. Mjane wa marehemu alisema hakufahamu mumewe alikuwa akimtembelea mganga kwa miaka zaidi ya 25 waliyokuwa kwenye ndoa.

Hata hivyo haikujulikana iwapo familia ya marehemu ilimwandama mganga huyo.

Afuta harusi kugundua baba mkwe ni mganga

NA JOHN MUSYOKI

KIRITIRI, EMBU

JAMAA wa hapa alikatiza mpango wa kuoa kwa harusi alipogundua kwamba baba ya demu aliyekuwa akichumbia alikuwa mganga.

Penyenye zinasema jamaa hakuwa ameenda kuwaona wazazi wa demu. Juzi, aliandamana na demu hadi kwao kupata baraka za wazazi na akapigwa na butwaa kupata baba ya demu akiendelea kuwahudumia wateja wake.

Inasemekana baada ya mazungumzo na mzee huyo, jamaa aliondoka akiwa na mawazo kwa sababu hakutarajia kuwa baba ya mpenzi wake alikuwa mganga.

Jamaa aliporejea kwao alishangaza watu kwa kutangaza kwamba hangeendelea na mipango ya harusi. “Samahani, arusi haitafanyika kama ilivyopangwa. Kuna jambo ambalo ningependa kulitatua kabla ya arusi kufanyika,” jamaa aliwaambia wazazi na marafiku wake.

Wazazi wa jamaa walipigwa na mshangao na kutaka kujua ni kwa nini mwanao hakutaka arusi ifanyike.

“Tumejiandaa kwa muda mrefu. Ni kwa nini umeanza kuharibu mambo. Umepata msichana mrembo wa kuoa, kulikoni?” mama yake alimuuliza.

Inasemekana jamaa alifunguka na kuelezea sababu ya kufutilia mbali arusi yake. “Juzi nilipotembelea wazazi wa demu nilipigwa na mshangao nilipogundua baba yake ni mganga. Kwa sasa nahofia kuoa msichana wake kwa sababu huenda nikaandamwa na nuksi,” jamaa alisema.

Watu kijijini walishangazwa na uamuzi wa jamaa huyo. Inasemekana wazazi na majirani wa jamaa huyo walimshawishi aoe demu huyo lakini jamaa alikataa katakata.

“Sitamuoa kwa sababu hakunifahamisha mwenyewe kwamba baba yake ni mganga. Hii inaonyesha sio wa kuaminika,” jamaa alisema

Hata hivyo, haikujulikana kilichojiri baada ya kioja hicho.

Mganga wa TZ anayedai kufufua maiti akamatwa Taveta

Na LUCY MKANYIKA

POLISI mjini Taveta, Kaunti ya Taita Taveta wamemtia mbaroni mwanamume aliyedai kumfufua kijana aliyefariki miaka miwili iliyopita.

Maafisa wa polisi walilazimika kuingilia kati baada ya umati mkubwa wa watu kufurika katika kijiji cha Bura Ndogo ili kuona maajabu hayo.

Mkuu wa polisi wa Taveta, Bw Lawrence Marwa, alisema kuwa wanamhoji mwanamume huyo ambaye anadaiwa kuwa mganga kutoka nchi jirani ya Tanzania.

Bw Marwa alisema kuwa kulingana na stakabadhi za uhamiaji za mwanamume huyo, aliingia humu nchini ili kufanya ukulima.

Polisi tayari wameanzisha uchunguzi kuthibitisha ikiwa kijana anayedaiwa kufufuliwa mnamo Jumapili alikuwa amefariki na kuzikwa.

“Chifu na maafisa wa polisi wamezuru kaburi la marehemu na kuthibitisha kuwa halijafukuliwa. Vilevile tumeona kijana ambaye inadaiwa alifufuliwa,” akasema.

Afisa huyo alisema kuwa kulingana na rekodi za polisi, kijana anayedaiwa kuwa alifufuliwa alijinyonga na serikali kutoa kibali cha mazishi.

“Rekodi zinaonyesha kuwa kijana alijinyonga na polisi wakaenda wakathibitisha kisa hicho. Haya ya yeye kuwa amefufuka hatuelewi,” akasema.

Wanakijiji vilevile walisema kuwa marehemu alifariki mnamo 2017 baada ya kujinyonga.

Walioshuhudia kisa hicho walisema kuwa kijana huyo wa miaka 16 alizikwa katika makaburi ya Taveta miaka miwili iliyopita.

“Hatutamwachilia mwanamume huyu hadi pale tutakuwa tumemaliza uchunguzi wetu,” akasema Bw Marwa.

Alisema kuwa familia inayodai kuwa mwana wao alifufuliwa itahojiwa ili kusaidia katika uchunguzi.

Mganga aonya pasta kwa kumchomea biashara

Na TOBBIE WEKESA

HAMISI, VIHIGA

KIOJA kilizuka eneo hili baada ya mganga kumshambulia pasta akimlaumu kwa kumharibia jina.

Kulingana na mdokezi, mganga alienda moja kwa moja hadi kwa boma la pasta na kuanza kumfokea huku akitishia kumwadhibu vikali.

Duru zinaarifu kwamba pasta alikuwa akiwakashifu wale waliopenda kutafuta huduma za mganga huyo.

Katika mahubiri yake, pasta alikuwa akimkemea mganga huyo huku akimuita ibilisi mkubwa anayewapora watu.

Habari zilipomfikia mganga alikasirika. “Una ujinga sana. Mbona usishughulike na mambo yako nami nishughulike na yangu,” mganga alimshtumu pasta.

Inasemekana pasta alimkemea mganga huyo huku akimtaka aondoke kwake mara moja. “Acha kuleta mashetani wako hapa. Ondoka haraka,” pasta alimkemea mganga.

Inadaiwa mganga alimuonya pasta kuacha kutaja jina lake kabisa. “Kila mtu afanye kazi yake. Kama unaona yako haikupi riziki basi njoo nikufunze yangu badala ya kuniharibia jina,” mganga alimshauri pasta.

Penyenye zinasema pasta alitishia kuwaita waumini wa kanisa lake kumtimua mganga.

“Ukitaka kuwaita waite. Usipokomesha uchochezi, walahi hutaamini kitakachokufanyikia na utakuja kwangu kunitafuta,” mganga alimtishia pasta.

Majirani wa pasta walibaki vinywa wazi. “Mwambieni huyu mtu wenu aachane na jina langu. Kanisani mwake hawezi kutamatisha mahubiri yake kama hajalitaja jina langu kwa ubaya. Nashuku ni pasta bandia,” mganga aliwaeleza majirani.

Inasemekana pasta aliudhika sana na semi za mganga. “Shetani ashindwe. Unadai kuwaponya watu lakini ni uongo mtupu. Umewahadaa watu wengi humu kijijini,”pasta alimfokea mganga.

Aliendeleza, “Siku ya nyani kufa inakaribia, nakwambia inakaribia kwa jina la Yesu, ondoka hapa.”

Mganga amchemsha mtoto mchanga na kumuua akidai ni tiba

Na GERALD BWISA

POLISI mjini Kitale, Kaunti ya Trans Nzoia wamemkamata daktari wa kienyeji ambaye anatuhumiwa kumuua mtoto wa mwaka mmoja, baada ya kumtia ndani ya maji ya kuchemka ili kumponya ugonjwa wa cerebral palsy ambao husababisha matatizo ya kiakili.

Kamanda wa Polisi wa kaunti hiyo, Bw Ayub Ali alithibitisha wanamzuilia mganga huyo, Millicent Akinyi, 22, anayetoka eneo la Tuwan, huku uchunguzi kuhusu kifo cha mtoto huyo ukiendelea.

“Tulimkamata na tukamfikisha kortini. Korti ilituruhusu kumzuilia kwa siku 14 ili tukamilishe uchunguzi,” Bw Ali akasema.

Kulingana naye, daktari huyo alichemsha maji yakatokota, akatia chumvi na dawa za kienyeji kisha akamtumbukiza mtoto ndani, akidai alikuwa akimponya.

Alisema mtoto huyo alianza kulia lakini daktari huyo akamhakikishia mamake kuwa kilio kilikuwa ishara ya mapepo kuondolewa kutoka ndani ya mtoto.

“Alipomtoa mtoto kutoka ndani ya maji, tayari ngozi ilikuwa imebambuka tumboni ndipo mamake mtoto akatoka ndani ya nyumba hiyo akilia,” akasema Bw Ali.

Ni majirani ambao walikimbia katika boma hilo na kumchukua mtoto kisha wakamkimbiza katika Hospitali ya Rufaa ya Kaunti ya Kitale kwa matibabu.

Alilazwa katika hospitali hiyo lakini baada ya siku mbili akazidiwa na maumivu na kukata roho.

Wakati Taifa Leo ilizuru mtaa wa Kisumu Ndogo ambapo familia hiyo inaishi, hali ya huzuni ilikuwa imetanda, mamake mtoto huyo, Bi Judy Gideon akiwa bado hajaamini hali iliyomkumba.

Alisema mtoto wake ambaye alimzaa Februari mwaka uliopita kwa njia ya upasuaji alikuwa sawa, hadi alipohitimisha miezi miwili ambapo alianza kupata matatizo ya kiafya kwa kudhoofika shingoni na mguu wake wa kulia.

“Hakuwa akisimama kwa uthabiti na nilipomsimamisha alikuwa akianguka,” akasema Bi Judy, na kuongeza mtoto wakati fulani alikuwa mkavu na kutetemeka.

Ni hapo ambapo alifahamishwa kuhusu daktari wa kienyeji na majirani, ambaye angemsaidia kusuluhisha shida yake, baada yake kumpeleka mwanawe katika hospitali ya rufaa ya Kitale bila mafanikio.

Jumatatu wiki iliyopita, mama huyo alimpeleka mwanawe kwa daktari huyo wakiwa pamoja na mwanamke mwingine, ambaye naye alikuwa ameenda kutafuta suluhu ya ndoa yake, kutokana na hali ya mumewe kuwa na jicho la nje.

“Tulipofika nyumbani kwa daktari huyo wa kienyeji, tulimpata akiwa amechemsha maji na akayatoa motoni. Alitia chumvi, akaongeza dawa nyingine na akaniagiza nimpe mtoto ili amtibu. Nilimpa mtoto na mara moja akamtia katika maji, ambayo yalikuwa yamechemka. Mtoto aliungua vibaya,” akasema mama huyo.

Jirani ya daktari huyo kwa jina Francisca Erokodi alisema kuwa amekuwa akiuza dawa za kienyeji na kudai kuwa ana uwezo wa kuponya magonjwa tofauti kwa dawa hizo.

“Nimekuwa nikiona watu wakiingia katika nyumba yake na kuongoka tangu alipokuja eneo hili,” akasema.

Lakini mwanaharakati wa kutetea masuala ya jinsia Tuwan Edward Omondi alilaani kitendo hicho na akawataka wanawake kupeleka wanao hospitalini wanapokuwa wagonjwa.

Mganga alazimika kurudisha mbuzi wa mteja

 Na MIRRIAM MUTUNGA

NJUKINI, TAITA TAVETA

MGANGA wa hapa alijipata pabaya baada ya jamaa kupiga kambi kwake akimtaka amrudishie mbuzi wake kwa sababu hirizi aliyompa haikufanya kazi.

Jamaa alidai kwamba mganga huyo hakumsaidia kamwekupata mke na lazima arudishe mbuzi aliyempa kama malipo.

Penyenye zinaarifu kuwa juzi jamaa alimwendea ‘daktari’ huyo na kumtaka amtibu hili kupata jiko kwa haraka.

Inasemekana kuwa jamaa alitaka kuasi ukapera baada ya kuishi bila mchumba kwa muda mrefu. Mganga alimwitisha mbuzi mweusi na kumpa hirizi na kumuahidi kwamba angepata mke baada ya miezi mitatu.

Hata hivyo jamaa aliendelea kukaukiwa hata baada ya miezi sita.? Siku ya tukio, jamaa alifika nyumbani kwa mganga huyo akiwa mwingi wa hasira huku akilalamika kuwa huduma zake zilikuwa feki.

Jamaa alimuangalia mganga kwa macho makavu na dharau tokea utosini hadi kwenye miguu na kuanza kumfokea akimtaka amrudishie mbuzi wake.

“Kazi yako ni kupora watu tu, tangu nilipotoka hapa kwako sijaona mabadiliko hata kidogo. Sasa nataka unirudishie mbuzi niliyekuletea mara moja,”jamaa alisema.

Mganga kuona hayo alianza kumzima jamaa na kumwambia arudi nyumbani kisha asubiri wiki moja na mambo yatakuwa sawa. Hata hivyo jamaa alikataa maneno hayo na kumwambia mganga kuwa hatabadilisha msimamo wake.

“Mzee, usinipotezee wakati, mimi nimesema na siongei tena, nipe mali yangu na ubaki na dawa yako, siitaki tena,” jamaa aliendelea kusema kwa hasira.

Mganga hakuwa na la kufanya ila kumrudishia jamaa mbuzi wake. Jombi aliondoka huku akimrushia maneno mganga huyo na kusema kuwa hatawahi kutia guu lake kwa mganga tena.

Mganga atibua njama ya stima yake kukatwa

 Na DENNIS SINYO

Majengo, Sabatia

AJENTI wa nyumba za makazi mtaani hapa aliyeenda kukata stima katika nyumba ya mganga, aliondoka ghafla baada ya kufanyiwa mazingaombwe.

Jamaa aliona giza alipokutana na mganga huyo na ikabidi aondoke.? Inasemekana jamaa huyo alifika kwa piki piki kwenye jumba alilokuwa akiishi mganga huyo ili kukata stima. Inadaiwa mganga hakuwa akilipa bili ya stima kwa muda mrefu jambo?ambalo lilisababisha mhudumu huyo kufika kuikata.

Hata hivyo, juhudi zake hazikufua dafu alipoarifiwa kwamba?alikuwa akicheza na moto. Mara tu alipofika kwenye lango la jumba hilo, mkazi mmoja alimtaka aondoke kwani alikuwa akijitia mashakani.

“Usicheze na huyo mtu.Kama huna habari ujue kwamba huyu mtu ni mganga hatari sana kutoka nchi jirani. Kila mtu hapa anamuogopa kwani akiamua kukufanyia kisanga, utajuta maishani mwako,” jamaa aliambiwa.

Hata baada ya kupewa maelezo hayo, mhudumu huyo hakusikia la mwadhini wala la mteka maji msikitini. Aliyatia masikio yake nta Na kuingia ndani ya jengo. Hapo alikutana ana kwa ana na mganga mwenyewe akijiandaa kuwahudumia wateja wake.

Punde tu baada ya kueleza alikuwa amefika kukata stima, jamaa huyo alipewa onyo kali. Alishauriwa?kuondoka mara moja la sivyo ajute maishani.

“Kama unataka?amani, tafadhali nakupa dakika mbili uondoke la sivyo hutaamini kitakachotokea,’’alionya mganga huyo.? Jamaa alianza kutoa jasho kila mahali na kuamua kuwasha piki?piki yake kuondoka kwenye jengo hilo kwa kasi.

Inasemekana aliendesha piki piki hiyo bila kutazama nyuma akihofia kisanga ambacho kingempata.

Kulingana na mdokezi, jamaa huyo alisema alikuwa ameanza kuona giza mara tu alipopewa onyo kuondoka kwa mganga. Baadaye mganga alilipa bili yote bila kushurutishwa.

Kipusa taabani kuuza mali apate hela za mganga

Na TOBBIE WEKESA

Kapolok, Teso

KIPUSA aliyekuwa ameolewa na polo mmoja wa eneo hili alitolewa kijasho alipotakiwa kuelezea sababu zilizomfanya kwenda kwa mganga kila wakati.

Inasemekana kipusa alishindwa kujieleza kwani maswali yaliyoibuliwa na ndugu za mumewe yalionekana kuwa magumu kwake.

Kulingana na mdokezi, makalameni walikasirishwa zaidi walipogundua kwamba kipusa alikuwa akiuza mali ya ndugu yao kisiri ili kupata hela za kumpa mganga.

Penyenye zinasema licha ya kipusa kufanya hivi kwa siri mumewe aligundua na kuwaarifu ndugu zake. ? “Hebu tuambie, unatafuta nini kwa mganga? Una njama gani kwa ndugu yetu,” makalameni walimuuliza kipusa. ? Kipusa aliamua kukaa kimya.

“Tumekuchunguza kwa muda mrefu. Juma halipiti kama hujaenda kwa mganga. Na huyo mganga tunamjua. Watafuta nini huko?” makalameni walimuuliza. ? Kipusa aliwaeleza kwamba alikuwa akienda huko kutafuta maombi.

“Huyo si mganga. Ni muombaji na huwa anakinga watu dhidi ya kukumbwa na majanga,” kipusa alieleza alipobanwa na maswali. ? Makalameni hawakutaka kusikia maelezo ya kipusa.

“Eti si mganga lakini anakinga watu dhidi ya kupatwa na matatizo. Huyo ni muombaji sampuli gani! Isitoshe huyo mtu unayedai tunamjua vizuri sana,” makalameni walishangaa.

Inadaiwa makalameni hao walimpa kipusa dakika tano atoe maelezo ya kuridhisha la sivyo wamtimue.

“Hapa kwetu umeona nani anahitaji maombi? Sema haraka,” makalameni walimshurutisha kipusa.

Kulingana na mdokezi, kipusa alikuwa akiuza mali ya polo apate nauli ya kwenda kwa mganga na pesa za kumlipa mganga huyo. ? Inadaiwa alipokosa jibu mwafaka, aliamua kuomba msamaha.

“Hatutaki msamaha wako. Ulipokuja hapa mali ilikuwa nyingi. Ndugu wetu hata jogoo peke yake hana. Umepelekea mganga,” makalameni walimkaripia kipusa.

Ushahidi dhidi ya mganga wa Kangundo wakosekana, aachiliwa huru

NA RICHARD MUNGUTI

MGANGA maarufu wa Kangundo, Kaunti ya Machakos, Bi Annah Mutheu Ndunda (pichani) aliyekamatwa wiki iliyopita kwa tuhuma za kushiriki katika wizi wa magari na visa vya uhalifu aliachiliwa Alhamisi na Mahakama ya Nairobi baada ya polisi kukosa ushahidi wa kumfungulia mashtaka.

Hakimu mkazi Bi  Electer Rianyi alimwachilia Bi Mutheu baada ya afisa aliyekuwa anachunguza kesi hiyo kusema “sikupata ushahidi wa kutosha kuweza kumfungulia mashtaka mshukiwa.”

Mutheu alitiwa nguvuni mnamo Oktoba 9, 2018 pamoja na Bw John Macharia Kiragu.

Maafisa wa Polisi wa kitengo cha kupambana na uhalifu almaarufu Flying Squad (FS) walimtia nguvuni Mutheu na kumsafirisha kutoka Tala, kaunti ndogo ya Kangundo.

Alisafirishwa hadi makao makuu ya FS kumchunguza ikiwa alikuwa anashiriki katika uhalifu baada ya polisi kupata magari matano likiwemo lori.

Bali na magari hayo muundo wa Toyota na Isuzu, Mutheu alikutwa na Vitambulisho vya kitaifa 112.

Afisa aliyekuwa anachunguza kesi hiyo Konstebo James Mwangi alimfikisha Mutheu na Bw Kiragu mbele ya Bi Rianyi na kuomba aamuru wazuiliwe kwa muda wa siku 10 ndipo akamilishe uchunguzi.

“Naomba hii mahakama iamuru washukiwa hawa wazuiliwe katika kituo cha polisi kuhojiwa na kuwasaidia Polisi kuchunguza iwapo magari yaliyokutwa katika makazi ya Mutheu yameibwa ama yameripotiwa kupotea,” alisema Konstebo Bw Mwangi Oktoba 9 2018.

Pia alieleza korti kuwa anataka kuwasiliana na idara ya usajili wa magari na mamlaka ya uchukuzi NTSA kubaini wenye magari hayo.

Afisa huyo pia alimweleza hakimu kuwa atachunguza vitambulisho hivyo kuwatambua wenyewe katika idara ya usajili wa watu.

Pia polisi walikuwa wanachunguza vitambulisho hivyo kubaini ikiwa ni halali. Mutheu na Kiragu walipinga wakizuiliwa kwa muda wa siku 10 na kuomba waachiliwe kwa dhamana.

Bi Rianyi aliwaachilia kwa dhamana ya Sh150,000. Polisi wamekamilisha uchunguzi lakini hawakupata ushahidi wa kutosha kuwawezesha kumfungulia mashtaka Mutheu na Kiragu.

Mutheu alijipatia umaarufu kwa kuwafanya watu waliotekeleza uhalifu kukamatwa na walalamishi ama kurudisha mali waliyodaiwa wameiba.

Kioja pasta kusaka tiba kwa mganga

Na DENNIS SINYO

Kaimosi, Vihiga

WAUMINI wa kanisa moja eneo hili walimlaumu mke wa pasta wao kwa kumshawishi mumewe wampeleke mtoto wao mgonjwa kwa mganga.

Inasemekana mtoto huyo alikuwa ameugua kwa muda mrefu bila kupona. Yadaiwa alikuwa amepelekwa hospitali nyingi huku hela nyingi zikitumika lakini hakupona. Baadhi ya washiriki walitaka kufanya maombi maalum kutafuta nafuu.

Hata hivyo, mke wa pasta alipinga wazo hilo akisema kwamba alikuwa akijua aina ya ugonjwa ambao mtoto alikuwa akiugua. “Mimi ninajua huu ugonjwa. Si ugonjwa wa kupelekwa hospitalini, tiba ni kutafuta mganga kutatua shida hii,” alisema mama huyo.

Duru zasema kwamba mama huyo alimshawishi pasta kwamba wampeleke mtoto kwa mganga kwa madai mtoto alikuwa amefanyiwa mazingaombwe na watu wenye jicho mbaya na njia ya kumwokoa ilikuwa tu kutafuta huduma za mganga.

Yasemekana pasta alikubali ushauri wa mkewe ampeleke mwanawe kwa mganga mmoja mtaani humu. Mtoto alipohudumiwa na mganga afya yake ilidorora hata zaidi.

Hali hiyo iliwakera sana baadhi ya washiriki waliolaani kitendo hicho. Walidai kwamba mama huyo alikuwa amefanya makosa makubwa kumpeleka mtoto kwa mganga badala ya kumuombea.

“Kwani imani yako iko wapi wewe mama? Badala ya kuongoza maombi maalum, unakuwa wa kwanza kumbeba mtoto wa pasta wetu kwenda kuinamia mganga?” alifoka mshiriki mmoja.

Walikemea kitendo hicho huku kila mtu akitaka mama huyo aondolewe kwenye kanisa lao. Hali ya mtoto huyo ilipozidi kuwa mbaya, washiriki walimrejesha hospitalini na hata kuandaa maombi maalum kumwombea.

Baadhi ya waumini walianza kufunga na kuombea uponyaji wa mtoto na afya yake ikaimarika.

…WAZO BONZO…

 

Mganga wa Kangundo ndani kwa wizi wa magari

Na GASTONE VALUSI

MGANGA mashuhuri mjini Tala katika eneo la Kangundo, Kaunti ya Machakos, Jumanne alitiwa nguvuni na maafisa wa polisi kwa madai ya kuhusika katika wizi wa magari.

Zaidi ya maafisa 35 walivamia makazi ya Bi Anne Mutheu (pichani kushoto) mwendo wa saa tano usiku mnamo Jumatatu wakiongozwa na mkuu wa kitengo cha Flying Squad, Musa Yego, ambapo walipekua yake nje mjini Tala hadi jana mwendo wa saa sita adhuhuri.

Maafisa hao waliwahoji watu kadhaa wakiwemo wa familia ya mganga huyo na wafanyakazi wake kuhusu magari yaliyoshukiwa ni ya kuibwa kutoka maeneo tofauti nchini na vilevile vipuri vya magari.

Jana asubuhi, wakazi wa eneo hilo walifika katika makazi ya mganga huyo baada ya kudokezewa kuhusu uvamizi huo.

Maafisa hao wa polisi walikuwa wamejihami vikali na walifika katika makazi hayo wakitumia magari saba.

Bi Mutheu alionekana akitembea kutoka kona moja hadi nyingine ya makazi yake akiandamwa na maafisa wa polisi huku akingea kwa simu.

Akiwahutubia wanahabari baada ya operesheni hiyo, Bw Yego alisema walimtia mbaroni Bi Mutheu na mshukiwa mwingine.

“Tumepata injini kadhaa za magari, vipuri na vitambulisho 130 vya kitaifa vya watu tofauti ndani ya makazi hayo. Inashangaza kupata vitambulisho hivyo hapa na tunaendelea kuchunguza vilifika hapa kwa njia gani,” akasema Bw Yego.

Bi Mutheu amekuwa akigonga vichwa vya habari kwa umaarufu wake wa kuwa na utajiri mkubwa.

Watu mashuhuri wakiwemo wanasiasa wamekuwa wakitafuta huduma zake za uganga.

Mganga asakwa kwa dai la ‘kufunga’ mvua

Na DENNIS SINYO

Mlima Elgon, Bungoma

MGANGA mmoja aliyekuwa akihudumu eneo hili alilazimika kujificha kwenye mapango baada ya wanakijiji kumvamia wakidai alikuwa amezuia mvua kunyesha.

Inasemekana mganga huyo kutoka taifa jirani alikuwa akidai kwamba alikuwa na uwezo wa kufanya mvua kunyesha au kuzuia isinyeshe.

Penyenye zasema kwamba jamaa huyo alikuwa amehudumia mkazi mmoja aliyekataa kumlipa Sh5,000 kisha akatisha kufanya jambo ambalo wanakijiji wote wangejutia maishani mwao.

“Kama sitapata pesa zangu kwa muda wa siku saba, mjue kila mtu hapa atajuta. Sitaki kujua utatoa wapi pesa ila mimi ninataka kulipwa kabla ya juma kumalizika,’’ alitishia mganga huyo.

Inasemekana kiangazi kilianza kushuhudiwa eneo hili huku wakazi wakishangaa shida ilikuwa nini. Wanakijiji walianza kutamauka mimea yao ilipoanza kunyauka na kuharibika.

Hapo ndipo iliposhukiwa ni mganga aliyekuwa chanzo cha masaibu hayo hasa kufuatia vitisho vyake baada ya kutolipwa deni.

Kulingana na mdokezi, wanakijiji waliandamana hadi kwa mganga huyo wakiimba nyimbo za kumkejeli na kutishia kumpa funzo la mwaka.

Baada ya kupata fununu kwamba maisha yake yalikuwa hatarini, jamaa huyo alichomoka kupitia dirisha la nyuma na kutimua mbio kuelekea mapango yaliyo milimani. Wanakijiji walipofika kwake, hawakumpata kwani alikuwa

tayari ametorokea usalama wake na kujificha kwenye mapango.

Wakazi hao waliapa kutumia njia zote kumsaka na kumcharaza mganga huyo kwa kuwaletea mateso.

“Hatutalia wakati mtu anakuja hapa na kutuletea shida. Atakiona cha mtema kuni. Nimepoteza kila kitu shambani kutokana na ukosefu wa mvua. Hasara niliyopata ni zaidi ya Sh300,000,’’ alisema mkulima mmoja.

Kisanga polo kufumania mganga akichovya asali yake

Na TOBBIE WEKESA

Kibabii, Bungoma

Kalameni mmoja kutoka hapa, alimtimua mganga baada ya kubaini kwamba alikuwa paka asiyeachiwa maziwa.

Kulingana na mdokezi, polo alimualika mganga kwa boma lake amgangue mkewe. Duru zinasema mara kwa mara jamaa alikuwa akimuacha mganga na mkewe mgonjwa ili atibiwe.

Inasemekana mkewe alikuwa ametaabika mno kutokana na ugonjwa ambao haukujulikana na madaktari wa hospitali zote alizozuru.

“Polo aliamua kumtembelea mganga ambapo walisikilizana asafiri hadi kwa boma,,” alieleza mdokezi.

Penyenye zinasema polo alianza kupata fununu kwa majirani kwamba mganga alikuwa akichovya asali kabla ya kuanza kumtibu mkewe.

Inadaiwa siku ya tukio, polo alimdanganya mganga kwamba angerudi jioni. Alimsihi aendelee kumhudumia mkewe.

Jamaa alienda na kujificha kwa nyumba ya jirani.

Kulingana na mdokezi, mganga alianza shughuli zake naye jamaa akawa anachungulia kwa dirisha.

“Hakuamini alichoona. Mganga alikuwa juu ya mzinga akirina asali,” alieleza mdokezi.

Duru zinasema mganga aliangushiwa makofi kadhaa na polo.

“Ilikuwa ni leo pekee. Sijawahi kufanya hivyo tena. Tafadhali nisamehe,” mganga alimrai polo.

Majirani walimzomea mganga huku wakitoa siri zote za mganga huyo.

“Kila wakati huwa unajifungia ndani ya nyumba. Juzi uliwafukuza watoto waliokuwa wakicheza hapa,” jirani alidai.

Inasemekana ilibidi mganga kukiri kosa asiangamizwe. Kwa kusikia hivyo, polo alimpa mganga dakika tano afunganye virago na kuondoka.

Mganga alilazimika kutoroka mbio kwani alihofia gadhabu ya majirani.

Haikujulikana ikiwa baadaye polo alisikilizana na mkewe au la kuhusu kitendo alichofanya na mganga. Hadi wa leo haikujulikana ugonjwa aliougua mke wa jamaa huyo.

Kakangu huenda kwa mganga akitaka kuniangamiza, polo aambia kijiji

Na TOBBIE WEKESA

NYATIKE, MIGORI

Kalameni mmoja kutoka hapa aliwashangaza wazee alipowaambia kwamba ndugu yake huenda kwa mganga akitaka kumwangamiza amrithi mkewe.

Kulingana na mdokezi, polo aliitisha kikao na wazee ili kujadili mienendo ya ndugu yake. Polo alidai kwamba mtu fulani aliyejitambulisha kama mganga maarufu alimpigia simu na kumtahadharisha dhidi ya kula pamoja na ndugu yake.

“Sijui mganga huyo alipata wapi nambari yangu. Lakini aliniambia kwamba ndugu yangu humtembelea akitaka nipatwe na ugonjwa mbaya ili nilemazwe,” polo alidai.

Polo, alidai kwamba ndugu yake hufanya haya yote ili apate wakati mzuri wa kumrithi mke wake. Vicheko vilisikika kikaoni huku wazee wakimtaka polo afafanue zaidi kuhusiana na madai aliyoibua.

“Hata nyinyi nimeona mmeungana na huyu mtu. Kama ni hivyo acha mkutano huu ukamilike na nimshughulikie jinsi nijuavyo,” polo aliwafokea wazee.

Inasemekana ndugu yake alisimama na kuwaeleza wazee kwamba polo alikuwaa amepagawa. “Huyu jamaa ninashuku ameingiwa na mashetani. Kama sio hivyo, basi ameanza kuvuta bangi,” ndugu ya polo alidai.

Lakini jamaa alidai kwamba si simu ya mganga pekee ambayo ilimfanya kushuku ndugu yake. Alisema mara kwa mara amekuwa akipokea simu kutoka kwa majirani wakimueleza jinsi polo alivyopenda kuingia kwa boma lake.

“Nikiwa kazini huwa ninapata hadithi nyingi sana. Yeye hufanya nini na mke wangu?” polo alichemka.

Inadaiwa wazee walimshauri polo afanye uchunguzi wa kina bila kumhusisha mtu yeyote. “Hakuna uchunguzi nitafanya,” polo alipandwa na mori na kumzaba kaka kofi. Wazee wote walilazimika kutorokea usalama wao.

…WAZO BONZO…

Mganga mashakani ndumba zake kushindwa kunasa vipusa

KORINDA, BUSIA

Na DENNIS  SINYO

MGANGA mmoja mtaani hapa alitoroka  sokoni baada ya wateja wake kumvamia kutaka kumchapa wakidai alikuwa akiwachezea shere.

Jamaa huyo alikuwa sokoni kwenye mishemishe za kutafutia familia posho wakati vijana wawili walipofika na kumfokea. Vijana hao walidai alikuwa amewatapeli Sh10,000 kwa kuwauzia hirizi bandia. Walidai  jamaa huyo aliwashawishi kwamba alikuwa na dawa  za kuwawezesha wajipatie vidosho bila kutoa jasho.

Vijana hao waliamua kumpa jamaa huyo hela zao na kisha akawapa hirizi kuvalia kila mara wanapowaona vidosho hao. Licha ya kuhakikishiwa matokeo mazuri, vijana hao walitamauka ndumba  zilipokosa kufanya kazi.

Kijana wa kwanza alidai alifuata maagizo ya kalameni  lakini nusura ajitie mashakani. Alidai kipusa aliyekuwa akimezea mate alimgeukia na kutaka kumchapa kofi mbele ya watu.

“Wewe ni mkora sana. Unakula pesa zetu eti unatupa dawa kumbe ni uongo,’’ alifoka kijana huyo. Kijana wa pili naye alichemka vikali pia akidai alichezwa shere.

Vijana hao walitaka kumpa jamaa kichapo wakitaka kurudishiwa pesa zao. Hata hivyo alifaulu kupenyeza  kwenye umati na kuhepa ili kuepuka gadhabu za watu. Jamaa huyo alikuwa akitumia ujanja kuwatapeli wakazi.

 

Wazazi wasaka waganga kutambua wanafunzi wanaochoma shule

NA KALUME KAZUNGU

WAZAZI wa shule ya Upili ya wavulana ya Lamu Bujra sasa wanautaka usimamizi wa shule hiyo kutafuta huduma za mpiga ramli na mtu wa kuapiza ili kuwatafuta na kuwatambua wanafunzi wanaojihusisha na visa vya kuchoma mabweni shuleni humo kama ilivyoshuhudiwa katika siku za hivi karibuni.

Mnamo Alhamisi wiki iliyopita, shule hiyo ilifungwa kwa muda usiojulikana baada ya moto kuzuka mara tatu na kuchoma mabweni katika kipindi cha juma moja pekee.

Mali ya mamilioni ya fedha, ikiwemo magodoro na vitanda zaidi ya 100, masanduku na nguo za wanafunzi viliunguzwa kwenye mikasa hiyo ya moto.

Wakizungumza na wanahabari shuleni humo Jumatatu aidha, baadhi ya wazazi walisema itakuwa vigumu kwa utawala wa shule hiyo kuwagundua wahusika wakuu wa visa vya moto.

Wakiongozwa na mzee Mohamed Shee Ali,60, wazazi waliushauri usimamizi wa shule hiyo kugeukia huduma za waganga, wapiga ramli na watu wa kuapiza ili kuwatambua wahusika na kuwaadhibu.

Bw Shee alisema wanafunzi wa shule hiyo wamedhihirisha utundu na kukosa nidhamu.

Alisema ni vigumu kwa wanafunzi hao kujitokeza na kuwataja kwa hiari wenzao wanaohusika na uchomaji wa mabweni na uharibifu wa mali ambao umekuwa ukiendelea shuleni humo.

Alisema anaamini iwapo mpiga ramli na mtu wa kuapiza ataletwa shuleni humo, maovu yataweza kugunduliwa kiurahisi kuliko kutiumia ngiuvu za polisi.

“Hawa wanafunzi wamedhihirisha utundu usio na kifani. Cha msingi ni usimamizi wa shule ufikirie kuleta waganga, wapia ramli na waapizaji hapa ili kuwasaka na kuwatambua hao wanafunzi wakaidi ili waadhibiwe kwa mujibu wa sheria.

Wakifanya hivyo ninaamini niodhamu itarejea hapa shuleni Bujra. Kutumia polisi ni kupoteza wakati kwani wanafunzi hawa ni watundu na kamwe hawawezi kutajana licha ya kwamba wanawajua wahusika wa mikasa ya moto,” akasema Bw Shee.

Kauli hiyo pia iliungwa mkono na Bi Mariam Mohamed, aliyesema kuna haja ya mbinu za kawaida zinazotumiwa kuwasaka washukiwa wa visa vya moto shuleni kubadilishwa kwanio hazijakuwa zikifanya kazi ipasavyo.

“Wanafunzi wa hapa shuleni Bujra wamezoea kwamba punde mikasa kama hiyo inapotokea, polisi wanaitwa kuwakamata baadhi yao na kisha kuachiliwa na kusahauliwa. Mara hii tuko tayari kwa waganga na wapiga ramli waitwe hapa shuleni ili kuwafichua hao wanafunzi watundu,” akasema Bi Mohamed.

Naye Mwenyekiti wa Halmashauri ya Wazazi (PTA) shuleni humo, Bw Feiswal Abdalla, aliwataka wazazi kuwa watulivu wakati bodi ya shule inapoendelea na uchunguzi kuhusiana na mikasa ya moto shuleni humo.

“Tuliafikia kuifunga shule ili kupisha uchunguzi kufanywa. Wazazi wawe watulivu huku usimamizi wa shule ukiendeleza harakati za kutafuta chanzo cha mikasa ya moto na pia wahusika wa uharibifu huo. Wanafunzi na wazazi watatangaziwa ni lini shule hiyo itafunguliwa punde uchunguzi utakapokamilika,” akasema Bw Abdalla.

Pasta aalika mganga atibu wanawe walevi

Na CORNELIUS MUTISYA

NZAIKONI, MACHAKOS

Pasta mmoja maarufu eneo hili, aliwaacha majirani wakiwa wameduwaa alipomualika mganga nyumbani kwake ili awagange wanawe waliokuwa wamezama katika ulevi wa kupindukia.

Kulingana na mpambe wetu, pasta alikuwa maarufu kwa mahuburi yake yaliyowagusa wengi wakabadili mienendo yao. Hata hivyo, licha ya pasta huyo kusifika  mitaani, wanawe  wawili walikuwa wakipenda pombe kupindukia.

Walikuwa wakirauka  asubuhi na mapema kila siku kwenda kubugia mvinyo na kushinda kwa mama pima mchana kutwa.

Inasemekana kila siku, walikuwa wakirejea nyumbani usiku wa manane wakibwabwaja maneno ya kilevi na kuwatusi majirani.

“Uraibu wa pombe wa wanawe ulimkera mno pasta huyo. Alishindwa hatua ambazo angewachukulia wanawe ili wakomeshe tabia ya ulevi huo wa chakari kwa sababu walikuwa wakimwaibisha,’’ alisema mdaku wetu.

Inasemekana kwamba pasta huyo alijitahidi kiasi cha uwezo wake kuwaombea wanawe wakomeshe ulevi bila mafanikio mpaka akakata tamaa.

Alipowaza na kuwazua, aliona ni heri atundike wokovu kando kwa muda ili atafute suluhisho la kudumu. Alikata kauli kutafuta huduma za mganga amtatulie masaibu yaliyowasibu wanawe.

“Pasta alimualika mganga maarufu kutoka kaunti jirani ili amsaidie kumaliza ulevi wa wanawe. Aliwaacha waumini, majirani na marafiki vinywa wazi kwa sababu kwao alikuwa mfano wa kuigwa,’’ alisema mdaku wetu.

Tunaarifiwa kwamba mganga alitekeleza vimbwanga vyake na kuondoka. Wakazi wanasubiri kuona iwapo vijana hao wataacha pombe.

“Pasta ameacha kuhubiri mitaani kama ilivyokuwa kawaida yake. Wakazi wanashuku huenda akaacha huduma kabisa baada ya kuonyesha imani tofauti na anayohubiri,’’ alisema mdaku wetu.

…WAZO BONZO…

Ajuta kukopa Sh700,000 kutoka kwa benki kulipa mganga

Na WAANDIDHI WETU

MWANAMUME aliyechukua mkopo kumlipa mganga amsaidie kumrudisha mkewe aliyetoroka, sasa anataka mganga huyo ashtakiwe baada ya mwanamke huyo kukosa kurejea nyumbani.

Bw Gathukia Kaana kutoka kijiji cha Makuyu eneobunge la Maragua, Kaunti ya Muranga, alijaribu kwenda kwa wakwe zake mara kadhaa akitaka kupatana na mkewe, Nancy Muthoni, lakini juhudi zake ziliambulia patupu baada ya mwanamke huyo kusema hangemrudia.

Alisema mapenzi yake kwa watoto wake watano yalimlazimisha kutafuta msaada wa mganga ambaye alimuahidi kwamba angemsaidia mkewe arudi nyumbani iwapo angefuata maagizo yake vyema.

“Baada ya kufukuzwa mara kadhaa na wakwe zangu licha ya kulipa mahari, mke wangu aliponiacha, nililazimika kutafuta msaada wa mganga ,” Bw Kaana aliambia Taifa Leo.

Alisema mganga huyo alimwambia ampe Sh50,000 na mkewe angerudi nyumbani baada ya miezi miwili na akampa pesa hizo.

Baadaye, alimpeleka katika nyumba moja na kuvunja yai akatoa noti ya Sh50 na kumweleza kuwa mizimu ya mababu ilikuwa ikiitisha pesa zaidi.

“Nilishtuka na kuandamana naye hadi mjini Kenol ambapo nilitoa Sh124,000 na nikampa,” akasema.

Kutoka siku hiyo, amempa mganga huyo zaidi ya Sh700,000. Baadaye alitafuta ushauri wa rafiki aliyemwambia amtege mwanamume huyo kwa kumuita aende kuchukua pesa zaidi.

Mwezi Februari, mganga huyo alimpigia simu akitaka pesa na kwa sababu hakuwa nazo walikubaliana aende nyumbani kwake kuchukua tanki la maji ambalo ndilo limebaki kwake na ndipo alipowafahamisha polisi wakamkamata.

Mkuu wa polisi eneo la Muranga Kusini (OCPD), John Onditi, alisema wanachunguza suala hilo na watamfungulia mganga huyo mashtaka ya kupokea pesa kwa udanganyifu.