Pigo kwa Serikali korti ikiruhusu Miguna kurejea

Na RICHARD MUNGUTI

SERIKALI imepata pigo tena baada Mahakama ya Rufaa kuruhusu mwanaharakati, na wakili mbishi, Dkt Miguna Miguna aliyefurushwa chini baada ya kumwapisha kinara wa ODM Raila Odinga kurejea nchini kutoka Canada anakoishi.

Mnamo Juni 4, majaji watatu wa Mahakama ya Rufaa Roselyn Nambuye, Wanjiru Karanja na Mohammed Warsame walitupilia mbali ombi la Mwanasheria Mkuu Kihara Kariuki kubatilisha uamuzi wa Jaji Enock Mwita wa kuharamisha kufurushwa kutoka nchini kwa Dkt Miguna Februari 2018.

Majaji Nambuye, Karanja na Warsame walisema Serikali ilishindwa kuthibitisha haikukandamiza haki za Dkt Miguna ilipofutilia mbali paspoti yake na kufuta uraia wake ilhali ni raia wa Kenya aliyezaliwa eneo la Nyando, Kaunti ya Kisumu mwaka wa 1962.

Majaji hao walisema serikali ilishindwa kuthibitisha jinsi ‘ilivyoathiriwa na uamuzi wa Jaji Mwita kwamba iliharibu nyumba ya Miguna Feburuari 2, 2018 alipokamatwa na maafisa wa polisi na kuzuiliwa katika vituo kadhaa vya polisi’.

‘Serikali kupitia kwa Waziri wa Usalama na Masuala ya Kigeni imeshindwa kuwasilisha ushahidi kuthibitisha jinsi agizokuwa Miguna akubaliwe kurudi nchini na alipwe fidia ya Sh7.2 milioni litakavyoiathiri,’ majaji Nambuye, Karanja na Warsame walisema katika uamuzi wao.

Mwanasheria mkuu na Mkurugenzi wa Mashtaka ya Umma (DPP) kupitia kwa Mkurugenzi wa Idara ya Uhamiaji Alexander Muteshi, walisema endapo agizo la mahakama kuu halitasitishwa, huenda maafisa sita wakuu serikalini akiwemo Dkt Matiang’i wakashtakiwa kwa kudharau na kukaidi maagizo ya mahakama.

Dkt Matiang’i, aliyekuwa Mkurugenzi wa Idara ya Uhamiaji, Meja mstaafu Gedion Kihalangwa, aliyekuwa Inspekta Jenerali wa Polisi Joseph Boinnet, Mkurugenzi wa DCI George Kinoti, Afisa Msimamizi wa Polisi wa uwanja wa ndege wa JKIA, Afisa aliyesimamia kikosi cha Flying Squad na mwanasheria mkuu (AG) walishtakiwa kwa kukandamiza haki za Miguna.

Ni maafisa hawa sita wakuu serikalini waliowasilisha masuala 14 ya kuamuliwa katika rufaa waliyowasilisha mbele ya majaji hao watatu wa mahakama ya rufaa.

‘Tunaomba mahakama ibatilishe maagizo kwamba tulikandamiza haki za Miguna.

Alipwe fidia ya Sh7.2 milioni, apewe pasipoti, arudi nchini na atambuliwe kuwa raia wa Kenya,’ Mwanasheria Mkuu alirai Mahakama ya Rufaa Vile vile, Jaji Mwita alisema kufurushwa kwa Dkt Miguna kutoka nchini hadi Canada baada ya Polisi kuagizwa imfikishe katika mahakama kuu ni ukaidi wa hali ya juu na ukiukaji wa haki za kimsingi za mwanasiasa huyo.

Kufuatia vitendo hivyo, Jaji Mwita aliamuru Serikali imlipe Dkt Miguna fidia ya Sh7. 2 milioni kwa kukandamiza haki zake.

Pia Jaji Mwita aliamuru Dkt Miguna alipwe Sh270, 000 kwa kuharibiwa kwa makazi yake katika mtaa wa kifahari wa Runda, Nairobi.

Baada ya kufurushwa kutoka Kenya shirika la kutetea haki za binadamu nchini (KNHRC) and chama cha wanasheria nchini (LSK) ziliwashtaki maafisa wakuu serikali na kuomba idara ya uhamiaji impe Miguna pasipoti nyingine na kumruhusu arudi nchini kwa vile ni raia wa Kenya.

Katika kesi hiyo LSK na KNHRC waliomba mahakama iamue ikiwa Mkenya anaweza kupoteza uraia wake kwa kupata uraia wa nchi nyingine.

Katika uamuzi wao majaji watatu walisema hili ni suala nyeti ambalo lapasa kuamuliwa katika kesi aliyowasilisha mwanasheria mkuu.

Miguna aahidi kuzima ufisadi Nairobi

Na CHARLES WASONGA

MWANASHERIA mbishani anayeishi uhamishoni Miguna Miguna ametangaza kuwa atawania kiti cha ugavana wa Nairobi katika uchaguzi mdogo utakaofanyika Februari 18.

Akijipigia debe kwenye mahojiano na runinga ya Diaspora TV, Dkt Miguna anayeishi nchini Canada aliahidi kuleta mabadiliko makubwa katika uongozi wa kaunti ya Nairobi kwa manufaa ya wakazi wa jiji.

“Nawasalimu nyote watu wa Nairobi na Wakenya kwa ujumla. Huyu ni Jenerali Miguna akiongea akiwa uhamishoni. Nitagombea nafasi ya ugavana wa Nairobi katika uchaguzi mdogo ujao,” akasema.

“Nitatokomeza ufisadi, na kuteleta mabadiliko katika jiji kwa kuendeleza uongozi wenye maadili,” akaongeza kwenye mohajiano hayo ambayo video yake ilisambazwa mitandaoni.

Hata hivyo, Bw Miguna Miguna ambaye amezuiwa mara kadha kurejea nchini kwa madai kuwa hana stakabadhi hitajika, hakuelezea ikiwa atakubali kutii masharti ya idara ya uhamiaji ili aweze kurejea Kenya kwa ajili ya kushiriki uchaguzi huo.

Vile vile, haikujulikana ni vipi ahatakikisha kuwa stakabadhi zake za uteuzi zimefikia Tume Huru ya Uchaguzi na Mipaka (IEBC), ikiwa serikali itaendelea kumzuia kuingia nchini.

Mwanasheria huyo ana uraia wa Cananda japo ni raia wa Kenya kwa misingi ya kuzaliwa Kenya. Hata hivyo, jaribio lake la kurejelea Kenya mapema 2019 liligonga mwamba alipodinda kujaza stakabadhi hitajika ili kurejesha uraia wake wa Kenya.

Miguna Miguna alifurushwa nchini kwa kosa la kuongoza kiapo bandia ya kiongozi wa ODM Raila Odinga mnamo Januari 31, 2018 kuwa “Rais wa Wananchi” katika hafla iliyofanyika katika bustani ya Uhuru, Nairobi.

Mapema Jumatatu, Desemba 28, 2020 ilidaiwa kuwa chama cha Thirdway Alliance kimemdhamini kuwa mgombeaji wake katika kinyang’anyiro hicho.

Hata hivyo, barua ambayo ilifichua habari hizo na ambayo ilidaiwa kuandikwa na mwenyekiti wa chama hicho Miruru Waweru ilibainika kuwa feki.

Miguna amezea ugavana Nairobi licha ya visiki

NA WANGU KANURI

WAKILI mbishi aliyenyimwa kibali cha kuingia nchini Kenya, Dkt Miguna Miguna, ametangaza kuwa atawania kiti cha ugavana wa Kaunti ya Nairobi katika uchaguzi mdogo ujao baada ya Mike Sonko kutimuliwa na Seneti. Wakili huyo alichapisha hayo kupitia mtandao wake wa kijamii wa Twitter.

“Baada ya kupokea ushauri  wa kina wa kisheria kutoka kwake @waikwawanyoike Desemba 19, 2020, mimi Miguna Miguna, Mkenya wa kuzaliwa na mpigakura aliyesajiliwa katika Kaunti ya Nairobi, ninatangaza uwaniaji wangu wa gavana wa Nairobi katika uchaguzi mdogo ujao. Watakaojitolea kunisaidia wamekaribishwa,” aliandika.

Lakini mwanasheria huyo anaishi jijini Toronto, Canada ambapo ana uraia wa mataifa mawili, huku Wakenya wakishangaa iwapo atakubaliwa kuwania ugavana na Tume Huru ya Mipaka na Uchaguzi (IEBC).

Mapema mwaka huu, Mkenya aliye na uraia wa Amerika Mwende Mwinzi alikumbana na changamoto katika azma yake kuwa balozi wa Kenya nchini Korea Kusini kutokana na uraia wake wa mataifa mawili.

Juhudi za Dkt Miguna za kurejea nchini Kenya baada ya kufurushwa zimegonga mwamba huku ikiwa kama kinyang’anyiro cha mwenye nguvu mpishe kati yake na serikali.

Hata ingawa hajaweza kurejea nchini, maswali ya jinsi atakavyofanya kampeni za kuwania kiti hicho cha ugavana zinavitinga vichwa vya wakenya wengi huku wakiwa na hamu ya kujua kitakachoendelea.

Hali kadhalika tangazo lake limeibua hisia tata katika mtandao wa kijamii wa Twitter.

“Je, hamfahamu kuwa ina maana gani iwapo atajileta nyumbani kwanza? Ama ataongoza Nairobi akiwa mbali kama kifaa cha Bluetooth?” akauliza @GodlovesRandom.

“Unastahili kuwa gavana wa Nairobi lakini hujasajiliwa kama mpigakura wa Nairobi na hilo litafanya uondolewe kwenye kinyanganyiro,” akasema EkaiLokaale.

“Una kura yangu kila wakati utakapowania nafasi yoyote nchini Kenya. Itakuwa furaha yangu kuchagua uongozi murua ulio na maono. Asante kwa nafasi nyingine ya kuthibitisha usaidizi wangu. Siwezi ngoja kupiga kura,” akaeleza @brunoclifford.

“Wakazi wa Nairobi hii ni nafasi yetu ya kuonyesha kuwa mamlaka yana watu. Tafadhali tumpigie kura Miguna kama gavana,” akasema @kennedymulinge.

“Miguna hatawasilisha kazi ipasavyo, atawanyanyasa masekretari watakaofanya kazi katika ofisi yake. Alifanya kazi katika ofisi ya Raila na wengi walipata ugonjwa wa shinikizo la damu! Miguna Miguna ni mwenye matusi mengi na asiye mstaarabu,” akaandika @zepphimobby78.

“Ninafikiri kabila si kikwazo kikuu katika kinyang’anyiro cha kiti cha ugavana cha Nairobi. Pesa hali kadhalika kwani unaweza toa hongo na upate njia ya kuwa gavana,” akaeleza @KarimWaiyaki.

“Ninaidhinisha @MigunaMiguna katika kinyang’anyiro kijacho cha kiti cha ugavana cha kaunti ya Nairobi. Wakati umewadia wa kusimama na uongozi wa kweli na si uongozi wa wastani kisa ushirika wa chama. Ninakuunga mkono Miguna Miguna,” akaandika @MillicentOmanga.

Miguna awajibu watumiaji mitandao ya kijamii kuhusu mwonekano wake wa ‘kukonda’

Na MARY WANGARI

MWANASIASA aliyefurushwa nchini Miguna Miguna amefungua moyo kufuatia hisia za baadhi ya watumiaji wa mitandao ya kijamii kuhusu hali yake ya kiafya.

Wakili huyo anayefahamika kwa ujasiri wa kueleza hisia zake, alijitokeza kuwakabili wanamitandao wadadisi kufuatia picha aliyochapisha mnamo Ijumaa, Julai 13, 2020, ambapo alionekana kubadilika pakubwa.

Ili kuwaondolea shaka wafuasi na wakosoaji wake mitandaoni, Bw Miguna aliamua kufafanua sababu zake za kupunguza uzani na mvi kujitokeza, akisema ilikuwa ishara ya afya njema na jambo la kawaida katika umri wake.

“Kupunguza uzani ni vyema kiafya. Unene mnaochukulia kuwa ishara za ufanisi ni dalili za kifo kinachojongea kutokana na maradhi ya shinikizo la damu, kisukari na mengineyo,”alihoji Bw Miguna kwenye mtandao wa kijamii wa Twitter.

Aidha, aliwapuuzilia mbali washindani wake kisiasa akidai wao hupaka rangi nywele zao ili kuficha mvi kwa sababu ya kukosa kujithamini.

“Mwanamme yeyote mwenye umri wa zaidi ya miaka 40 ana mvi. Waporaji wenu hupaka rangi mvi na ndevu zao kutokana na kutothamini nafsi zao,” alisema.

Yote hayo yalianza baada ya mwanaharakati huyo kuchapisha kwenye Twitter, picha yake akiwa pamoja na Mkurugenzi wa Afrispain, mnamo Ijumaa, Julai 10, 2020.

Katika picha hiyo, Bw Miguna, anayefahamika kwa kimo chake kirefu na umbo lake nene, alikuwa amevalia shati la samawati na kaptura nyeusi, na alionekana kupunguza uzani pakubwa huku mvi zikijitokeza kidevuni mwake.

“Nilikutana na Bw Jackson Igbinosun katika Black Gold Think Tank usiku wa jana jijini Toronto. Ndevu za chumvi na pilipili zinajitokeza vyema,”Bw Miguna alinukuu picha yake.

Hata hivyo, wanamitandao hawakuchelewa kugundua mabadiliko hayo kwenye maumbile ya yake na wakafurika upesi kwenye ukurasa wake kuelezea hisia zao.

Baadhi hawakuchelea kumweleza wazi mwanasiasa huyo anayefahamika kama ‘jenerali’ miongoni mwa wafuasi wake, kwamba alikuwa amebadilika sana.

“Jenerali unaonekana umekonda,” alisema Shady Magero

“Yaonekana umerejea na kichwa kilichojaa mvi jenerali?”

“Wewe si jenerali niliyekuwa nikimjua,” alieleza Ibrahim Adow

Baadhi ya wafuasi wake walielezea wasiwasi wao kwamba Bw Miguna angekosa nguvu za kuendelea kupigania mageuzi huku wengine wakimtahadharisha kuhusu athari ya kupunguza uzani.

Na jenerali umekonda? Utaweza kutuongoza hadi katika nchi ya ahadi kweli?” alisaili Yoh Bruh.

“Miguna unapoteza uzani haraka sana. Bila shaka unafanya mazoezi wakati huu wa janga. Kumbuka mwanamme aliyekonda hatiliwi maanani nchini Kenya,” alishauri Lamborghini A.

Kuna walitoania kuwa wakili huyo alikuwa akifanya mazoezi ya kujiandaa kurejea nchini kwa kishindo.

Bw Miguna ambaye ni mkosoaji sugu wa serikali ya Rais Uhuru Kenyatta na handisheki kati ya Kiongozi wa Taifa na aliyekuwa waziri mkuu Raila Odinga, alitimuliwa nchini 2018, baada ya kuongoza uapishaji wa Bw Odinga kama “rais wa umma.”

Kwa sasa wakili huyo ametafuta hifadhi Canada baada ya juhudi zake za kurejea nchini kugonga mwamba mara mbili.

Miguna adai amezuiwa kuabiri ndege ya kutoka Frankfurt hadi Nairobi

Na IBRAHIM ORUKO

WAKILI Miguna Miguna ambaye anatarajiwa Kenya baada ya kukaa nchini Canada kwa muda karibu ya mwaka mmoja amedai kwamba amezuiwa kuabiri ndege ya kutoka uwanja wa ndege wa Frankfurt, Ujerumani hadi Nairobi kwa sababu ya kikwazo cha Kenya.

Nayo Kenya kupitia kwa msemaji wa serikali Cyrus Oguna inasema kwamba wakili huyo yuko huru kurejea, likiwa ni hakikisho la Rais Uhuru Kenyatta na kwamba Wizara ya Masuala ya Kigeni inalishughulikia suala hilo la ‘kizuizi’.

Alitarajiwa Jumanne asubuhi kuabiri ndege ya shirika la Lufthansa lakini akazuiwa; ikiwa ni pigo kwake ikizingatiwa alikuwa amekamilisha awamu ya kwanza kwa kusafiri kutoka Canada hadi nchini Ujerumani ili aunganishe safari hadi jijini Nairobi.

Katika ‘kizuizi’ ofisi ya Rais ilikuwa imeonya shirika dhidi ya kumsafirisha wakili huyo hadi nchini Kenya au taifa lolote la Bara la Afrika.

 

Tunaandaa habari kamili…

Serikali yasema haitarajii drama kurejea kwa Miguna Miguna

Na MARY WAMBUI

SERIKALI imekariri kwamba hakutarajiwa drama na mvutano wowote wakili Miguna Miguna akitarajiwa kutua nchini Kenya akitokea nchini Canada.

Aidha, Idara ya Uhamiaji imesema itafanikisha kurejea nchini kwake ikiwa sehemu ya kutii maagizo yaliyotolewa na mahakama mwaka 2018.

Machi 2019 wakili huyu alilazimishwa kusafiri hadi nchini Canada ambako ana uraia pia.

Dkt Miguna ambaye tayari ameabiri ndege ya shirika la Lufhthansa kuelekea jijini Nairobi ametangaza atatua katika Uwanja wa Ndege wa Kimataifa wa Jomo Kenyatta (JKIA) Jumanne saa 9.25 usiku baada ya kukaa Canada karibu kipindi cha mwaka mmoja.

Akizungumza na ‘Taifa Leo’, Msemaji wa Serikali Kanali Cyrun Oguna amesema Jumatatu kwamba kauli ya Rais Uhuru Kenyatta kuhusu kurejea kwa Dkt Miguna inazingatiwa kikamilifu.

Amesema wakili huyo ataruhusiwa nchini kama tu raia yeyote mwingine.

“Kiongozi wa nchi alitangaza kwamba (Miguna) yuko huru kurudi na huo ungali msimamo wa serikali,” amesema Kanali Oguna.

Rais Uhuru Kenyatta kwenye mazishi ya mpiganiaji uhuru wa pili Charles Rubia katika Kaunti ya Muran’a, alisema kila raia ana uhuru wa kutoa kauli zake na vilevile akasema Miguna yuko huru kurejea nchini.

“Nimesikia kuna wale wanapanga kusafiri kuja humu nchini; nawaambia wako huru kufanya hivyo,” akasema kiongozi wa nchi.

 

Ingawa hivyo, Kanali Oguna amesema anatarajia Miguna kutii kanuni na utaratibu wote muhimu kwa wasafiri kumaanisha kwamba asijichukulie kuwa ni mtu spesheli anayehitaji angalizo maalum.

“Ni sharti awe na stakabadhi muhimu zinazohitajika,” amesema Oguna.

Jumatatu mchana Mkurugenzi wa Uhamiaji Alexander Muteshi amesema watahakikisha watafanikisha kurejea kwa Miguna.

“Idara imefahamishwa kwamba Dkt Miguna Miguna atasafiri kuingia nchini Kenya mnamo Jumanne, Januari 7, 2020,” amesema Muteshi katika taarifa.

Akaongeza: “Hii ni sehemu mojawapo ya kutii maagizo yaliyotolewa na mahakama Desemba 14, 2018.”

Miguna alipokuwa nchini Kenya mara ya mwisho alionekana machoni pa serikali ya Jubilee kama kitisho kwa usalama wa nchi.

Kupitia akaunti yake ya mtandao wa kijamii wa Twitter, Miguna amesema Jumatatu asubuhi kwamba hatarajii kuchukuliwa kama mtu spesheli.

“Ninapigania haki zangu na ninataka ziheshimiwe. Ninataka paspoti yangu ya Kenya tena ikiwa katika hali nzuri. Ninataka maagizo yaliyotolewa na mahakama yakiheshimiwa. Ninafaa kuingia nchini Kenya bila vikwazo kwa sababu mimi ni raia halisi,” ameandika Miguna.

Ombi la wakili huyo lilikubalika ambapo mahakama iliagiza arejee nchini kupitia utambulisho wa kitambulisho cha kitaifa au paspoti yake inayoshikiliwa na serikali.

Miguna aitaka Jubilee imuombe radhi mara 21!

Na VALENTINE OBARA

MWANAHARAKATI wa upinzani aliyetimuliwa nchini na Serikali ya Jubilee, Dkt Miguna Miguna sasa anataka serikali imwombe msamaha mara 21 kwa jinsi alivyofurushwa.

Kwenye kesi mpya aliyowasilisha katika Mahakama Kuu, ambapo ameshtaki maafisa 25 wa serikali, Dkt Miguna anataka mahakama iagize kwamba msamaha huo uchapishwe kwenye magazeti matatu ya kitaifa kwa siku saba mfululizo.

Vilevile, anataka serikali iagizwe kumlipa ridhaa kwa uharibifu uliofanywa nyumbani kwake alipokuwa akitafutwa.

Dkt Miguna alikuwa mmoja wa wanachama wakuu wa Muungano wa NASA waliokuwa wakaidi zaidi dhidi ya utawala wa Jubilee kabla Uchaguzi Mkuu wa 2017.

Alihusika pakubwa katika shughuli ya kumlisha kiapo Kiongozi wa Chama cha ODM, Bw Raila Odinga ndipo serikali ikadai alikuwa nchini kiharamu kwa vile ni raia wa Canada.

Maafisa wakuu wa serikali ambao ameshtaki upya wanajumuisha Waziri wa Usalama wa Ndani, Dkt Fred Matiang’i, Mwanasheria Mkuu Paul Kihara Kariuki, aliyekuwa Mkurugenzi wa Uhamiaji na Usajili wa Watu Gordon Kihalangwa, Mkurugenzi wa Idara ya Kuchunguza Uhalifu (DCI) George Kinoti na aliyekuwa Inspekta Jenerali wa Polisi Joseph Boinnet.

“Mnamo Desemba 2017, washtakiwa walishirikiana kuunda genge…lililoagizwa kufuatilia mienendo yangu kinyume cha sheria, kuchunguza nyumba yangu na kunijeruhi, kunitesa kwa nia ya kuniua,” akadai wakili huyo.

Alilalamika kwamba wakati mwingi alipokamatwa, serikali ilimchukulia kama mhalifu na kumwaibisha mbele ya umma ilhali hakuwa na hatia yoyote.

Kulingana naye, washtakiwa pia walishirikiana kukaidi maagizo ya mahakama yaliyotaka aachiliwe huru alipokamatwa mapema mwaka wa 2018, wakazidi kumfunga katika seli chafu bila mahitaji muhimu ikiwemo chakula na maji.

Mnamo Machi 26, 2018, Dkt Miguna alijaribu kurudi nchini lakini akazuiliwa katika Uwanja wa Kimataifa wa Ndege wa Jomo Kenyatta (JKIA) ambako anadai alifungiwa chooni na akakosa kuoga wala kupiga mswaki kwa siku tatu.

Mahakama yaagiza Matiang’i na Kihalangwa wamlipe Miguna Sh7 milioni

Na RICHARD MUNGUTI

MWANASHERIA mbishi Dkt Miguna Miguna aliyefurushwa kutoka humu nchini Mnamo Machi 29, 2018 atalipwa fidia ya Sh7 milioni.

Mahakama Kuu iliwaamuru Waziri wa Usalama wa Ndani Dkt Fred Matiang’i na Mkurugenzi wa Idara ya Uhamiaji Meja Jenerali (mstaafu) Dkt Gordon Kihalangwa wamlipe Dkt Miguna fidia hiyo wenyewe na kwa kutumia pesa za walipa ushuru.

Jaji Enoch Chacha Mwita alisema Dkt Matiang’i na Dkt Kihalangwa walikaidi maagizo ya mahakama ya kutomtimua Dkt Miguna humu nchini.

Jaji Mwita alisema Dkt Miguna ni raia wa Kenya na pasipoti aliyonayo ya nchi ya Canada “haimfanyi kuwa raia wa kigeni.”

Jaji huyo alisema maafisa hao wawili wa serikali walikaidi kifungu nambari 6 cha katiba kinachoeleza kuwa mtumishi wa umma hapasi kujihusisha katika hali itakayoletea fedheha wananchi na pia serikali.

“Fidia hii italipwa na watumishi hawa wawili wakuu wa Serikali waliokandamiza haki za mlalamishi (Miguna),” aliamuru Jaji Mwita , akiongeza, “Kamwe kodi ya umma isitumike kugharamia makosa ya wakuu hawa.”

Na punde tu baada ya mahakama kutoa agizo hilo Dkt Miguna alituma ujumbe katika mtandao wa Twitter na kusema , “Jaji Chacha Mwita amesisitiza kile nimesema kila wakati kwamba maafisa hao wawili walikandamiza haki zangu na kunivunjia heshima. Mimi ni Mkenya na sijawahi  kupokonywa uraia wangu. Ahsante Dkt John Khaminwa.”

Mawakili Cliff Ombeta (kushoto) na Nelson Havi (kulia) waliomtetea Dkt Miguna Miguna. Picha/ Richard Munguti

Aliendelea kusema ,“Haki ya mwananchi ya kuzaliwa kamwe hawezi kupokonywa. Nawapongeza Wakenya wachache walio waaminifu na pia mawakili Dkt John Khaminwa , Waikwa Wanyoike, Stephen Ongaro na wakili wa tume ya kitaifa ya kutetea haki za binadamu -KHRC- Kamanda Mucheke pamoja na wote waliosimama nami wakati wa dhiki na tabu zangu. Nitarudi hivi karibuni. Mapambano yataendelea.”

Dkt Miguna alikamatwa na kupelekwa katika mahakama ya Kajiado kufunguliwa mashtaka kwa kumwapisha kinara wa muungano wa Nasa Raila Odinga kuwa “rais wa wananchi.”

Dkt Miguna pamoja na wakili Thomas Kajwang waliandaa taarifa ya kiapo cha Bw Odinga ambaye sasa ni ameteuliwa kusimamia Miundo Msingi barani Afrika.

Wawili hao walimwapisha Bw Odinga katika bustani ya Uhuru Park jijini Nairobi na kuhudhuriwa na mamilioni ya wafuasi wa Nasa.

Polisi walivamia makazi ya Dkt Miguna mtaani Runda jijini Nairobi na kumpeleka mahakamani Kajiado na kutoka hapo wakampeleka usiku uwanja wa ndege wa Jomo Kenyatta (JKIA) ambapo walimlazimisha kuabiri ndege ya kwenda Dubai na kutoka hapo akasafirishwa hadi Canada anakoishi.

Polisi walikuwa wamemzuilia Dkt Miguna ndani ya seli ndogo katika uwanja wa JKIA.

“Kufurushwa kwa Dkt Miguna kulitekelezwa kinyume cha katiba na maagizo ya mahakama.Haki zake pia zilikandamizwa.” Jaji Mwita.

Akitoa uamuzi wake Jaji Mwita alisema mlalamishi alithibitisha kwamba haki zake zilikandamizwa na Dkt Matiang’i na Dkt Kihalangwa walipoamuru avurushwe hadi Canada wakidai sio raia wa Kenya.

Wakili Aaron Ndubi (kulia anayesimama) akitoa ushahidi katika kesi ya Dkt Miguna. Picha/ Richard Munguti

Mawakili James Orengo, Dkt Khaminwa, Nelson Havi , Jackson Awele , Daniel Maanzo na Otiende Amolo walimshtaki Mwanasheria Mkuu (AG), Dkt Matiang’I, Dkt Kihalangwa, Inspekta Jenerali wa Polisi, Mkurugenzi wa Mashtaka ya Umma (DPP) na Mkurugenzi wa Uchunguzi wa Jinai (DCI).

Akisafirishwa kwa nguvu , Jaji Luka Kimaru alikuwa ameamuru Dkt Miguna afike kortini kujitetea dhidi ya madai alikaidi sheria kumwapisha Bw Odinga.

Wakili hiyo alimwapisha Bw Odinga kwa kushindwa uchaguzi mkuu wa 2018 akiwa na naibu wake Kalonzo Musyoka.

Jaji Mkuu David Maraga na majaji wengine sita wa Mahakama ya Juu walikuwa wamebatilisha uamuzi wa mwenyekiti wa tume huru ya uchaguzi na mipaka (IEBC) Wafula Chebukati kumtangaza Rais Uhuru Kenyatta kuwa mshindi wa uchaguzi huo wa 2017.

Mahakama iliamuru uchaguzi wa urais urudiwe tena Oktoba 2017 lakini Bw Odinga akakataa kushiriki jambo lililopelekea ghasia kutamalaki maeneo mengi nchini Kenya.

Kaunti tano hazikushiriki katika uchaguzi huo wa urais peke yake. Mamia ya wakazi wa kaunti hizi waliuawa na polisi.

Bw Miguna kupitia vuguvugu la National Resistance Movement (NRM) walipanga maandamano yaliyopelekea kuapishwa kwa Bw Odinga kuwa rais wa wananchi.

Mahakama ilisema Dkt Miguna hakupasa kufurusha na kuamuru alipwe fidia ya Sh7milioni na Sh200,000 gharama ya kesi.

Agizo hili kwamba Matiang’i na Kihalangwa walipe fidia hiyo inaamaanisha hawapasi sasa kuhudumu katika nyadhifa za umma.

MIGUNA MIGUNA: Ajipiga kifua kisha kukunja mkia na kusalia Canada

Na WYCLIFFE MUIA

MWANASIASA na wakili mbishi aliyefurushwa nchini, Dkt Miguna Miguna alikunja mkia kuhusu kurejea Kenya Jumatano licha ya kusisitiza awali kuwa angerejea nchini, ije mvua au jua.

Bw Miguna, ambaye amejitangaza kiongozi wa vuguvugu la National Resistance Movement (NRM) hakutoa sababu maalum ya kukatiza safari licha ya msimamo wake awali kuwa alikuwa amepanga safari yake kikamilifu na angewasili uwanja wa JKIA mwendo wa saa kumi alasiri Jumatano.

Kwenye ujumbe alioweka kwenye mitandao akitangaza kuahirisha safari yake, Bw Miguna alisema muungano wa NASA umekufa na ODM sio chama cha upinzani tena kwani kimejiunga na Jubilee, na kuwa sasa NRM ndicho chama kipya cha upinzani.

Pia aliwahimiza wafuasi wake kuendeleza uwazi hadi atakaporuhusiwa kurudi nchini.

Alisema Idara ya Uhamiaji imekataa kutii agizo la mahakama la kumpa uraia wa Kenya na kuwa mawakili wake walimshauri asubiri.

Mnamo Machi, wakili huyo ambaye pia ana uraia wa Canada alizua vionja uwanjani JKIA aliporudi Kenya lakini akakatazwa kuondoka uwanjani humo.

 

Sindano ya kumlemaza

Alizima juhudi za kumwondoa kwa kuzua sarakasi za kila aina lakini hatimaye alirudishwa Dubai kabla ya kuelekea Canada. Alidai alidungwa sindano ya kumlemaza aliporudishwa Canada.

Hiyo ilikuwa mara ya pili kwake kufukuzwa nchini mwaka huu, mara ya kwanza ikiwa ni alipofurushwa muda mfupi baada ya kumwapisha Raila Odiniga kama “rais wa wananchi” mnamo Februari 28.

Kwa hatua yake ya jana, Bw Miguna aliwavunja moyo baadhi ya wafuasi wake ambao walikuwa wamesisimka kumpokea tena nchini.

Kabla ya kutangaza kusitisha kurejea kwake jana, alikuwa ameapa kurudi nchini liwe liwalo, na kudai hatua ya Kenya kumnyima pasipoti ili atumie ya Canada ni mtego.

Mapema mwezi huu, wakili huyo aliapa kurejea nchini: “Narudi Kenya Mei 16. Mimi ni Mkenya kwa kuzaliwa. Sharti serikali itekeleze maagizo ya mahakama ya kunipatia pasipoti yangu bila masharti.”

 

Aombe uraia upya

Hata hivyo, Idara ya Uhamiaji imesisitiza sharti wakili huyo ajaze fomu za kuomba uraia wa Kenya kabla ya kuomba pasipoti.

Mawakili wake pamoja na Tume ya Kutetea Haki za Kibinadamu (KNCHR), wamekuwa wakishinikiza serikali impe pasipoti ili arejee nchini.

“Kwa sababu Idara ya Uhamiaji imekataa kunipa pasipoti na kunirejesha nchini bila masharti kama ilivyoagizwa na korti, nimeagiza mawakili wangu waripoti kwa mahakama kuwa serikali imekaidi maamuzi yake,” alisema katika ujumbe wake Jumatano akiwa Canada.

Naibu mwenyekiti wa KNCHR George Morara alisema korti inasubiriwa kutoa mwelekeo kufikia Ijumaa hii.

Wiki iliyopita, Katibu wa Idara ya Uhamiaji, Gordon Kihalangwa alisema bado Bw Miguna si Mkenya hadi atume maombi ya uraia.

“Idara haitampa pasipoti Miguna kwa sababu hajatuma maombi. Lazima kwanza apate uraia wa Kenya kabla ya kupata pasipoti,” alisema Kihalangwa.

Masaibu ya Dkt Miguna yalianza baada ya kuongoza kuapishwa kwa kinara wa upinzani Raila Odinga kama ‘rais wa wananchi’ mnamo Januari 30.
Siku chache baada ya kiapo hicho, Miguna alikamatwa na kupelekwa Canada.

 

Sarakasi JKIA

Mnamo Aprili 29, wakili huyo alifurushwa hadi Dubai baada ya siku tatu za sarakasi katika uwanja wa ndege wa JKIA, Nairobi.

Baadaye alisafiri kutoka Dubai hadi Canada ambapo amekuwa akiishi.

Dkt Miguna amekuwa akimshtumu Bw Odinga kwa kumtelekeza baada ya kumuapisha.

“Muafaka wao wa kisiasa unapasha kurejesha uongozi wa kisheria na wala si kelele za refaranda,”alisema Miguna

Wakili huyo alikana madai kuwa anapanga kutumia ‘vichochoro’ kuingia nchini adai ni njia ya kutaka kumuua.

“Wale wanapendekeza nipitie katika mipaka ya Tanzania au Ugandan kisiri wametumwa na Uhuru Kenyatta na Raila Odinga. Wanataka kutumia maafisa wa usalama wa Uganda, Tanzania na Kenyan kuniteka nyara, waniue na wanizike katika makaburi fiche au wanitupe Ziwa Victoria.”

Miguna aapa kurejea nchini hapo Mei 16

Na WYCLIFFE MUIA

WAKILI Dkt Miguna Miguna anakusudia kurejea nchini mwezi huu japo haijabainika iwapo serikali ya Kenya imemrudishia pasipoti yake ili kufanikisha usafiri wake kutoka Canada.

Kupitia mtandao wake wa Twitter, Dkt Miguna alisisitiza kuwa yeye ni Mkenya na kuwa tayari mahakama ya imetoa maagizo wazi kwa serikali kumrejesha nyumbani.

“Nitarudi Kenya Mei 16, 2018. Mimi ni raia wa Kenya kwa kuzaliwa. Mahakama Kuu imewaagiza Dkt Fred Matiangi, Kihalangwa, Joseph Boinnet na George Kinoti mara 13 wanipe pasipoti ya Kenya na pia waweke mipango kamili ya kunirejesha nchini Kenya bila masharti,”aliandika Dkt Miguna katika Twitter yake.

Mwezi uliopita, Jaji Chacha Mwita wa Mahakama Kuu, Nairobi alitoa maagizo kwa serikali kumrejesha Dkt Miguna nchini ili kutoa ushahidi moja kwa moja mnamo Mei 18.

Wakili Miguna amekuwa akimkabili kinara wa ODM Raila Odinga kwa kushindwa kutumia muafaka aliyotia saini na Rais Uhuru Kenyatta kumrudisha humu nchini ili kudhihirishia Wakenya kuwa analenga kuleta umoja.

Wakili huyo alimtaka Bw Odinga kuelezea Wakenya kwa nini muafaka wake na Rais Kenyatta haujamwezesha kurejea nchini kutoka Canada licha ya kuwaahidi kuwa atahakikisha amerejea.

“Kama nilituhumiwa kwa kukuapisha, kwa nini haukukamatwa na kufurushwa kutoka Kenya kama mimi…? Iwapo muafaka wako na Uhuru unalenga kuunganisha nchi, kwa nini sijarudishwa Kenya? Elezea Wakenya wazi wazi,” Miguna alimwambia Bw Odinga kupitia Twitter.

Inasubiriwa kuonekana iwapo serikali itatii amri ya mahakama na kukubali Miguna kurejea nchini kufikia Mei 18 ili kutoa ushuhuda wake kuhusiana na uraia wake tata.

Tumia muafaka kunirejesha Kenya, Miguna amlilia Raila

Na WYCLIFFE MUIA

WAKILI Miguna Miguna sasa anamtaka kinara wa ODM Raila Odinga kutumia muafaka aliyotia saini na Rais Uhuru Kenyatta kumrudisha humu nchini ili kudhihirishia Wakenya kuwa analenga kuleta umoja.

La sivyo, Bw Miguna anamtaka Bw Odinga kuelezea Wakenya kwa nini muafaka wake na Rais Kenyatta haujamuwezesha kurejea nchini kutoka Canada licha ya kuwaahidi kuwa atahakikisha amerejea.

Mnamo Machi 9, Bw Odinga na Rais Kenyatta waliafikiana kufanya kazi pamoja lakini siku chache baadaye Bw Miguna akafurushwa hadi Canada na serikali ya Kenya kuhusiana na utata wa uraia wake.

“Kama nilituhumiwa kwa kukuapisha, kwa nini haukukamatwa na kufurushwa kutoka Kenya kama mimi…? Kama salamu zako na Uhuru zinalenga kuunganisha nchi, kwa nini sijarudishwa Kenya? Elezea Wakenya wazi wazi,” Miguna alimwambia Bw Odinga kupitia mtandao wake wa Twitter.

 

JAMVI: ‘Jenerali’ kutua nchini bila gwaride wala fataki…

Na LEONARD ONYANGO

MWANASIASA wa Upinzani Miguna Miguna atarejea humu nchini Jumatatu huku kukiwa na dalili kwamba hatalakiwa kwa mbwembwe na wafuasi wa National Super Alliance (Nasa).

Umaarufu wa Dkt Miguna ambaye amekuwa mkosoaji mkuu wa serikali ya Jubilee ulididimia mara tu baada ya kinara wa NASA Raila Odinga kutangaza kuwa atafanya kazi na Rais Uhuru Kenyatta wiki mbili zilizopita.

Dkt Miguna ambaye amejitangaza kuwa kiongozi wa vuguvugu la NASA, National Resistance Movement (NRM), alifurushwa na serikali kwa nguvu kutoka Kenya hadi Canada mwezi jana kutokana na madai kuwa hakuwa Mkenya.

Kabla ya kufurushwa, mwanaharakati huyo wa NASA alikamatwa na kuzuiliwa katika vituo mbalimbali vya polisi katika kaunti za Kiambu na Nairobi na kisha kufikishwa katika mahakama ya Kajiado baada ya siku tatu ambapo alifunguliwa mashtaka ya uhaini.

Bw Miguna ndiye aliapisha Bw Odinga kuwa ‘Rais wa Wananchi’ uwanjani Uhuru Park mnamo Januari 30, mwaka huu. Hata hivyo, serikali ilisisitiza kuwa kiapo hicho kilikuwa haramu na kisha kuwapokonya bunduki, paspoti na walinzi baadhi ya wanasiasa wa NASA huku vuguvugu la NRM likiharamishwa.

Tangu kusafirishwa nchini Canada kwa lazima, Dkt Miguna amekuwa akizunguka katika mataifa ya Amerika, Uingereza na Ujerumani ambapo amekuwa akihutubia makundi mbalimbali kuhusiana na hali ya kisiasa ya Kenya na yaliyojiri wakati wa uchaguzi wa Agosti 8 na Oktoba 26, mwaka jana.

“Machi 24, 2018, vuguvugu la NRM litakuwa jijini London, Uingereza kabla ya kutua jijini Nairobi Machi 26,” akasema Dkt Miguna.
Mwanaharakati huyo alitangaza kurejea wiki mbili baada ya Mahakama ya Rufaa kumwondolea vikwazo huku ikisema kuwa yuko huru kurejea.

Wafuasi wa NASA walimkumbatia DktMiguna na kumtaja shujaa alipojitokeza kukabiliana na serikali ya Jubilee huku akidai kuwa uchaguzi wa mwaka jana uligubikwa na dosari chungu nzima.

Lakini tangu Bw Odinga kukubali kushirikiana na Rais Uhuru Kenyatta, wafuasi wa NASA wameonekana kumtelekeza Miguna huku wengi wakiunga mkono hatua ya kiongozi wa Upinzani kukubali kushirikiana na serikali.

Wengi wa wafuasi wa NASA wamemchukulia Bw Odinga kama mpenda amani huku baadhi wakimwona kama msaliti kwa kuamua kushirikiana na serikali.
Bw Odinga pia ameonekana kujitenga naye tangu Miguna alipopasua mbarika kuwa baadhi ya maafisa wa NASA walipokea fedha za hongo kutoka kwa Jubilee kabla ya kuapishwa kwa Bw Odinga Januari 30.

Tangu Bw Odinga kukubali kushirikiana na Rais Kenyatta, Dkt Miguna amekuwa mkosoaji mkubwa wa kiongozi wa Upinzani huku akimtaja kuwa msaliti kwa wafuasi wake.

Amesisitiza kuwa vuguvugu la NRM litandelea kupigania haki katika masuala ya uchaguzi licha ya Bw Odinga ‘kujiunga’ na serikali.

“Kwa kukubali kufanya kazi na Rais Kenyatta ‘aliyemwibia’ ushindi wake, Bw Odinga amesaliti mamia ya Wakenya waliouawa na kuhataraisha maisha yao baada ya uchaguzi wa Agosti 8 na Oktoba 26,” akasema Dkt Miguna.

Mwanaharakati huyo pia alitangaza kuongoza maandamano katika maeneo mbalimbali nchini kuanzia kesho ili kushinikiza kufanyika kwa mageuzi katika mfumo wa uchaguzi huku akisema kuwa: “ushindi haupatikani kwa kusalimiana (kwa Rais Kenyatta na Bw Odinga) katika chumba cha mikutano katika afisi ya rais kwenye Jumba la Harambee.”

Dkt Miguna ambaye alibwagwa na Mike Sonko katika kinyang’anyiro cha ugavana wa Nairobi katika uchaguzi wa Agosti 8, huenda akajizolea maadui zaidi; kutoka upande wa Jubilee na chama cha ODM atakaporejea kesho humu nchini.

Kulingana na aliyekuwa waziri na mwaniaji wa urais 2013, James Ole Kiyiapi, Dkt Miguna atakabiliwa na upinzani kutoka kwa Jubilee na ODM kutokana na mtindo wake wa kutaka kusema ukweli.

“Miguna Miguna anasema mambo ambayo wanasiasa hawataki kusikia uwe upande wa Jubilee au NASA. Miguna ni mwaminifu na ndiye kiongozi anayefaa kuongoza Kenya,” alisema Prof Kiyiapi.

Miguna Miguna: Raila ndiye aliniambia Jubilee ilimpa Magaya Sh30 milioni

Na BENSON MATHEKA

WAKILI mbishi Miguna Miguna sasa amedai kwamba kinara wa NASA, Raila Odinga, alimweleza binafsi kwamba Afisa Mkuu wa muungano huo Norman Magaya, alipokea Sh30 milioni kutoka kwa chama cha Jubilee. 

Akihojiwa na kituo cha runinga cha TRT World jijini Toronto, Canada mnamo Jumanne usiku, Bw Miguna alikanusha madai kwamba anampiga vita Bw Odinga na viongozi wengine wa NASA.

“Ni kweli Bw Magaya alipokea Sh30 milioni kutoka kwa Jubilee ndipo aondoe kesi ya kupinga ushindi wa gavana wa Nairobi. Raila Odinga mwenyewe alinifahamisha hayo,” alidai Bw Miguna.

Wiki iliyopita, Bw Miguna alimlaumu Bw Magaya na mwanamikakati wa NASA, David Ndii, akisema wanatumiwa na Jubilee kuvuruga NASA. Alidai kwamba Bw Ndii alipinga kuapishwa kwa Bw Odinga kuwa “rais wa wananchi”.

Siku iliyofuata Bw Odinga aliwatetea maafisa hao akisema wanatekeleza wajibu muhimu katika NASA na kuwataka wafuasi wa muungano huo kumpuuza Bw Miguna.

Lakini wakili huyo aliambia kipindi cha Newsmakers cha runinga ya TRT World kwamba kwa kumpuuza, Raila anahatarisha hatima yake ya kisiasa.

 

‘Huwezi kunipuuza’

“Huwezi ukampuuza Bw Miguna. Hata Raila Odinga hawezi. Vijana walio Nairobi hawatakusikiliza, vijana wa Kenya hawatakusikiliza, kwa sasa wanamwamini sana Miguna Miguna,” alisema.

Alisema serikali ya Jubilee ilimfukuza nchini kwa sababu inafahamu ushawishi wake wa kuongoza raia kudai haki.

“Jubilee wanajua kwamba sisemi jambo nisiloweza kutimiza. Nilisema nitamuapisha Bw Odinga na nikafanya hivyo mbele ya mamilioni ya watu.

Nilipowataka Wakenya kuchoma picha za Rais Kenyatta, nilikamatwa na kuzuiliwa kwa wiki moja kinyume cha sheria kabla ya kutimuliwa pia kinyume cha sheria,” alisema.

Alisisitiza kuwa atarejea Kenya mwezi ujao kuendeleza kampeni ya vuguvugu lililoharamishwa la NRM.

“Ninatarajia kurudi Kenya mwezi ujao baada ya kuzuru miji ya hapa Canada, Amerika, Uropa, Uarabuni na Afrika,” alisema Bw Miguna.

 

 

Miguna Miguna alikuwa hatari kwa usalama wa nchi, mahakama yaambiwa

Mawakili James Orengo (kulia) , Dkt John Khaminwa na Nelson Havi wanaomwakilisha Dkt Miguna Miguna na wakili wa Serikali Emmanuel Mbittah. Picha/ Richard Munguti

Na RICHARD MUNGUTI

KUTIMULIWA kwa mwanaharakati Dkt Miguna Miguna humu nchini kumeendelea kuibua masuala mbalimbali huku Serikali ikiambia Mahakama Kuu kwamba alikuwa tisho kwa usalama wa nchi.

“Kabla ya uamuzi wa kumfurusha Dkt Miguna kutoka humu nchini, Mkurugenzi wa Idara ya Uhamiaji Bw Gordon Kihalangwa alikuwa amepashwa habari na maafisa wa upelelezi kwamba alikuwa tisho kwa usalama wa kitaifa,” Jaji Enock Mwita aliambiwa na Wakili wa Serikali Emmanuel Mbittah.

Na wakati huo huo Jaji Mwita alifahamishwa mwaka wa 2003 , Dkt Miguna alipata uraia wa Canada na kurudishwa kwake kwao na hakuna makosa yoyote kutokana na ufichuzi kwamba alikuwa anajihusisha na vitendo ambavyo ni hatari kwa usalama wa kitaifa.

Bw Mbittah alimweleza Jaji Mwita kufurushwa kwa Dkt Miguna ni kwa manufaa ya kila mwananchi.

“Bw Kihalangwa alipokea habari kutoka kwa maafisa wa uchunguzi wa jinai kwamba Dkt Miguna alikuwa anajihusisha na visa vilivyo tisho kwa usalama wa kitaifa na ilifaa arudishwe nchini Canada,” Bw Mbittah alisema.

Wakili huyo wa Serikali aliambia mahakama taarifa hizo za wapelelezi zilizojulishwa Bw Kihalangwa, zilielezewa Waziri wa Usalama Dkt Fred Matiang’i ambaye mara moja Dkt Miguna alimtangaza kuwa “mtu asiyetakikana humu nchini.”

Bw Mbittah alisema hakuna sheria yoyote ambayo serikali ilivunja ama kukaidi haki za Dkt Miguna katika kufutilia mbali cheti cha kusafiria cha Dkt Miguna na kumtangaza mtu asiyetakikana.

“Uamuzi wa kumfurusha Dkt Miguna uliochukuliwa na Bw Kihalangwa na Dkt Matiang’i haupasi kukosolewa kwa vile ulikuwa kwa mujibu wa sheria,” Jaji Mwita alifahamishwa.

Mahakama itatoa uamuzi Feburuari 23, 2018.

Wakili wa Miguna kizimbani kwa dai alihepa ‘vuta pumzi’

Wakili Aaron Ndubi aliyemwakilisha Dkt Miguna Miguna. Alitiwa nguvuni Februari 9 usiku mwendo wa saa mbili na nusu akielekea nyumbani katika barabara ya Jakaya Kikwete jijini Nairobi. Picha/ Maktaba

Na RICHARD MUNGUTI 

Kwa Muhtasari:

  • Bw Ndubi alitiwa nguvuni Ijumaa usiku mwendo wa saa mbili na nusu akielekea nyumbani katika barabara ya Jakaya Kikwete
  • Alikaidi agizo la afisa wa polisi kumtaka apulize kifaa cha kuwatambua madereva walevi almaarufu ‘vuta pumzi’
  • Mawakili 20 walifika mbele ya Hakimu Riany kumwakilisha mshtakiwa huyo
  • Pia alikabiliwa na shtaka la kuyazuia magari mengine kwenye barabara hiyo

MMOJA wa mawakili 15 waliokuwa wanamtetea mwanaharakati na wakili mwenye tajriba kuu Dkt Miguna Miguna aliyefurushwa nchini kinyume cha maagizo ya Mahakama Kuu alishtakiwa Jumatatu kwa kukataa kupuliza kifaa cha kuwatambua madereva walevi.

Bw Aaron Ndubi aliyefikishwa mbele ya hakimu mkazi katika mahakama ya Milimani, Bi Elector Riany na kukanusha mashtaka mawili dhidi yake alikuwa mstari wa mbele kukashifu maafisa wa polisi waliokaidi agizo la Jaji Luka Kimaru kumfikisha Dkt Miguna katika mahakama Kuu.

Kutokana na kutiwa nguvuni kwa Bw Ndubi, mawakili 20 walifika mbele ya Bi Riany kumwakilisha mshtakiwa huyo.

Wakiongozwa na wakili Dkt John Khaminwa, mawakili hao walidai kuwa hakuna shtaka halisi lililokuwa mbele ya mahakama lenye mashiko ya kisheria.

“Wakati ukiwadia tutaithibitishia hii mahakama kwamba hakuna shtaka halisi liliwasilishwa dhidi ya afisa huyu wa hii mahakama,” Dkt Khaminwa alimweleza hakimu.

 

Siku tatu ndani

Alisema kwamba wakili Ndubi alitiwa nguvuni Ijumaa usiku mwendo wa saa mbili na nusu akielekea nyumbani katika barabara ya Jakaya Kikwete na kuzuiliwa katika korokoro ya polisi hadi Jumatatu alipofikishwa kortini.

“Naomba hii mahakama imwachilie mshtakiwa ambaye ni wakili mwenye tajriba ya juu kwa dhamana,” alirai Dkt Khaminwa.

Bi Riany alifahamishwa kuwa mshtakiwa ni wakili wa mahakama na “anaelewa na kujua anachopaswa kufanya kama mtaalamu wa masuala ya sheria.”

Mahakama iliombwa pia iamuru mshtakiwa apewe nakala za mashahidi aandae utetezi wake.

“Naomba hii mahakama iamuru tupewe ushahidi wote pamoja na nakala za taarifa walizoandikisha mashahidi,” Dkt Khaminwa alimsihi hakimu aagize upande wa mashtaka.

 

Kukaidi agizo

Ombi hilo la halikupingwa na kiongozi wa mashtaka alimweleza hakimu kwamba atampa Dkt Khaminwa nakala zote za mashahidi na taarifa zitakazotegemewa kwa ushahidi wa kuthibitisha kwamba Bw Ndubi alikaidi agizo la afisa wa polisi kumtaka apulize kifaa cha kuwatambua madereva walevi.

Bw Riany alikubali ombi la mshtakiwa na kuamuru alipe dhamana ya pesa tasilimu ya Sh30,000. Pia aliamuru apewe nakala zote za ushahidi aandae utetezi wake.

Mashtaka dhidi ya Bw Ndubi ni kwamba alikataa agizo la afisa wa polisi akiwa amevalia sare rasmi ya kazi alipotakiwa kupuliza kifaa cha kuwatambua walevi.

Pia alikabiliwa na shtaka la kuyazuia magari mengine kwenye barabara hiyo ya Jakaya Kikwete mnamo Feburuari 11, 2018. Kesi imeorodheshwa kusikizwa Feburuari 23.

 

Wakenya waandamana Amerika kupinga serikali kuhangaisha upinzani

Na CHRIS WAMALWA na RICHARD MUNGUTI

KIKUNDI kikubwa cha Wakenya wanaoishi Amerika kiliandamana Jumamosi nje ya makao makuu ya Umoja wa Mataifa kupinga dhuluma za serikali dhidi ya viongozi wa upinzani nchini na wanahabari.

Waandamanaji hao ambao wengi ni wafuasi wa Muungano wa NASA wanaoishi katika eneo la Tri-State lililoko New York, Connecticut, New Jersey na Pennsylvania walivumilia mvua kubwa, upepo na baridi.

Walibeba mabango na kusoma taarifa za malalamishi ambazo baadaye ziliwasilishwa kwa maafisa wa UN.

“Tunataka jamii ya kimataifa ijue kuhusu matukio yanayoendelea nchini Kenya ambapo ukiukaji wa sheria na ukosefu wa heshima kwa mahakama, uhuru wa vyombo vya habari na sheria unachukuliwa kama jambo la kawaida. Jamii ya kimataifa hasa mataifa ya magharibi hayafai kunyamazia ukiukaji huu,” akasema Bi Beatrice Oduor, kwenye taarifa yake.

Serikali ya Rais Uhuru Kenyatta na naibu wake William Ruto, ilikosolewa na wengi waliozungumza katika maandamano hayo wakisema matukio yanayoshuhudiwa ni ufufuzi wa kukandamiza wakosoaji wa serikali jinsi ilivyokuwa katika utawala wa kiimla wa rais mstaafu Daniel arap Moi.

 

Ukiukaji wa haki

Kulingana nao, tukio la kufurushwa kwa Bw Miguna Miguna nchini halikutokea ghafla bali ni mambo ambayo yamekuwa yakiendelea kutokana na ukiukaji wa haki za uchaguzi, ufisadi, ukiukaji wa sheria na ukwepaji wa sheria.

Wakati huo huo, mawakili wa Miguna wameishtaki Serikali wakiomba akubaliwe kurudi nchini bila vikwazo, arudishiwe pasi na kutosumbuliwa tena.

“Wakenya walijitahidi sana kujiondolea kutoka minyororo hiyo. Makovu ya enzi hizo bado yanaonekana kitaifa ndiposa tumeamua kwa pamoja kwamba hatutaruhusu tena udikteta urejee Kenya,” akasema Bw Nick Ogutu, wa shirika la kutetea haki za kibinadamu la Amnesty International, tawi la Amerika.

Walisema serikali ambayo haina hatia na iliyo halali haiwezi kuchukua hatua kama hizo dhidi ya wananchi wake isipokuwa iwe inajishuku.

“Afisi ya rais ndiyo imekuwa mkiukaji mkubwa zaidi wa sheria za taifa. Ikiwa uvunjaji wa sheria unaendelea kuwa jambo la kawaida, kutakuwa na machafuko,” akasema Bw Jackton Ambuka, kutoka Neww Jersey.

Maandamano hayo yaliandaliwa na mashirika ya kutetea haki za kibinadamu ya Amnesty International (Amerika), Kenya Yetu Initiative na Muungano wa Wakenya walio Ughaibuni Amerika.

Miguna Miguna: Nilivyokula samaki ‘kwa macho’ katika kituo cha polisi

Wakili mbishi aliyefurushwa humu nchini Dkt Miguna Miguna. Ameapa kurudi Kenya ‘haraka iwezekanavyo’. Picha/ Maktaba

Na LEONARD ONYANGO

Kwa Muhtasari:

  • Dkt Miguna asema aliletewa ugali, samaki na mboga lakini akalazimishwa kuingia katika gari la polisi kabla ya kuanza kula
  • Alizuiliwa kwa zaidi ya siku tano katika vituo mbalimbali vya polisi
  • “Nilisikia polisi niliokuwa nao ndani ya gari wakijigamba namna walivyofanikiwa kuwachezea shere wanahabari”
  • Aliketi ndani ya gari kwa zaidi ya saa tano na baadaye polisi walitokea na tiketi ya ndege na stakabadhi zilizoonyesha alikuwa mhamiaji haramu

MWANAHARAKATI wa NASA Miguna Miguna amevunja ukimya kuhusu mateso aliyopitia mikononi mwa polisi huku akielezea alivyokula samaki ‘kwa macho’ katika Kituo cha Polisi cha Inland Container Depot, Barabara ya Mombasa, Nairobi.

Kupitia mtandao wa Facebook, Dkt Miguna alisema aliletewa ugali, samaki na mboga ya kienyeji kwa ajili ya chakula cha jioni lakini akalazimishwa kuingia katika gari la polisi na kuelekea katika uwanja wa ndege wa JKIA kabla ya kuanza kula.

“Nilipokuwa nakijiandaa kula mlo wa samaki, ugali na mboga za kienyeji nilioletewa na msimamizi wa kituo (OCS) muungwana, maafisa wa polisi wakatili walijitokeza na kuniambia “tunaondoka sasa”. Huo ndio ulikuwa mlo wangu wa siku lakini niliacha na kuondoka,”| akasema Dkt Miguna.

 

Siku tano ndani

Dkt Miguna aliyekamatwa mnamo Februari 2, kwa kumwapisha kinara wa NASA Raila Odinga kuwa ‘rais wa wananchi’, alizuiliwa kwa zaidi ya siku tano katika vituo mbalimbali vya polisi jijini Nairobi na Kaunti ya Kiambu kabla ya kusafirishwa nchini Canada kutokana na kigezo kwamba si Mkenya.

“Nilipoingia ndani ya gari, dereva aliendesha kwa kasi  kutoka katika Kituo cha Polisi cha Inland Container Depot na dakika 25 baadaye tulikuwa katika Uwanja wa Ndege wa Jomo Kenyatta (JKIA),” akasema.

Dkt Miguna alikuwa amezuiliwa katika kituo cha polisi Inland Container Depot kabla ya kupelekwa katika Mahakama ya Kajiado kufunguliwa mashtaka ya kushiriki katika uhaini.

Baada ya kusomewa mashtaka katika mahakama ya Kajiado alirejeshwa tena katika kituo hicho huku kinara wa NASA Raila Odinga na wafuasi wake wakimngojea katika Mahakama ya Milimani Nairobi hadi saa tatu usiku.

Mara baada ya kukamatwa, Dkt Miguna alipelekwa katika Kituo cha Polisi cha Githunguri  na baadaye akahamishiwa kwenye kituo cha Lari katika Kaunti ya Kiambu.

Huu ndio msururu wa matukio kwa mujibu wa Dkt Miguna:

  • Februari 2 saa 5a.m, maafisa 35 wa polisi wavamia nyumbani kwa Miguna na kulipua lango kuu na mlango wa choo kwa kilipuzi.
  • Polisi wanampokonya Miguna simu na kutishia kumfunga macho kwa kitambaa na kisha kumpeleka katika Kituo cha Polisi cha Githunguri
  • Saa 5pm mawakili wake Edwin Sifuna, Waikwa Wanyoike na Willis Otieno wanaenda katika Kituo cha Polisi cha Githunguri
  • Usiku wa manane  polisi wakamtoa Bw Miguna katika Kituo cha Githunguri na kumpeleka katika Kituo cha Polisi cha Lari. “Kituoni Lari nilisimama seli kwa muda wa saa 24 bila kulala wala kuketi”

 

  • Februari 5 mchana: Polisi wanawasili na kumuagiza kuingia ndani ya gari. Magari matatu yanawafuata. Polisi wanafanikiwa kuwachanganya wanahabari na wafuasi wa NASA ambao walifuatilia gari tofauti. “Nilisikia polisi niliokuwa nao ndani ya gari wakijigamba namna walivyofanikiwa kuwachezea shere wanahabari.
  • Gari alilokuwemo Miguna linafululiza hadi katika Kituo cha Depot Police katika eneo la Embakasi Mashariki. “Kituoni hapa kwa mara ya kwanza napewa chakula kizuri, maji safi ya kuoga, mswaki na blanketi mbili zilizochakaa”.

 

  • Februari 6 asubuhi: maafisa wa polisi 15 wenye miraba minne wanawasili na kumwagiza  kuingia kwenye gari waliendesha gari hadi katika kituo cha mafuta katika eneo la Athi River na baadaye wakaendesha kwa kasi katika Barabara ya Kajiado.
  • Hatimaye alijipata katika mahakama ya Kajiado.
  • Nilipelekwa mbele ya hakimu ambaye aliagiza nipelekwe katika Mahakama ya Milimani Nairobi kabla ya saa tisa unusu mchana.
  • Badala ya kumpeleka katika Mahakama ya Milimani, polisi walimrejesha katika kituo cha Container Depot.
  • Hata hivyo, walipofika kituoni walimfungia ndani ya gari kwa takribani saa tano na kumpokonya paspoti yake ya Kenya.
  • Baadaye walimtoa nje ya gari na kumtaka kwenda kando kuzungumza. Kabla ya kuzungumza aliomba ruhusa ya kwenda chooni. “Walikubali niende chooni ila wakanipa maafisa watano wa kunisindikiza”.
  • Alipotoka chooni alizungukwa na maafisa 10 ambao walianza kumpekua mifukoni ambapo walipata paspoti yake ya Canada.
  • Takribani saa moja baadaye, aliletewa mlo lakini kabla ya kuanza kula, aliingizwa ndani ya gari na kupelekwa kwa kasi katika uwanja wa ndege wa JKIA.
  • Aliketi ndani ya gari kwa zaidi ya saa tano na baadaye polisi walitokea na tiketi ya ndege na kumkabidhi simu yake iliyokuwa imeharibika pamoja na stakabadhi zilizoonyesha kwamba alikuwa mhamiaji haramu asiyetakiwa.
  • Miguna asafiri kuelekea Canada.

Miguna aapa kurudi Kenya kwa lazima

Wakili mbishi aliyefurushwa humu nchini Dkt Miguna Miguna. Ameapa kurudi Kenya ‘haraka iwezekanavyo’. Picha/ Maktaba

Na CHRIS WAMALWA na BENSON MATHEKA

Kwa Muhtasari:

  • Miguna asema hata Rais Uhuru Kenyatta hawezi kumzuia kurudi Kenya kuendelea kutetea haki za uchaguzi
  • Asema atarejea nchini haraka itakavyowezekana
  • Aitaka jamii ya kimataifa kuongeza shinikizo kwa serikali ya Kenya kuheshimu utawala wa kisheria na uhuru wa wanahabari

MWANASIASA mbishi Miguna Miguna, ambaye wiki iliyopita alifukuzwa Kenya na kurudishwa Canada kwa kuhusika katika kiapo cha kinara wa NASA Raila Odinga, amesema anapanga kurudi Kenya hivi karibuni licha ya serikali kumpiga marufuku.

Kwenye mahojiano na Taifa Leo katika ofisi za kampuni yake ya uwakili jijini Toronto, Canada mwishoni mwa wiki, wakili huyo aliyejitangaza jenerali wa vuguvuvu lililoharamishwa la National Resistance Movement (NRM), alisema hata Rais Uhuru Kenyatta hawezi kumzuia kurudi Kenya kuendelea kutetea haki katika uchaguzi.

“Nimepokea ripoti kuwa Uhuru Kenyatta na William Ruto wanasema haijalishi idadi ya maagizo nitakayopata. Hata nipate maagizo milioni moja hawataniruhusu kuingia Kenya tena. Ujumbe wangu kwa Uhuru Kenyatta na William Ruto ni huu; Kenya sio mali yenu na nitarudi. Samahani,” alisema.

 

Haraka iwezekanavyo

Alipoulizwa ni lini anafikiria kurudi nyumbani, Bw Miguna alisema: “Haraka itakavyowezekana. Ninajua mke wangu hatafurahi kusikia hayo lakini unafaa kuamua unavyotaka kuishi maisha yako na kumbukumbu unayotaka kuacha.

Tunavyoongea sasa, mawakili wangu wamewasilisha kesi katika Mahakama Kuu wakiomba unaodaiwa kuwa uamuzi wa kunipokonya uraia ubatilishwe,” alisema Bw Miguna.

Ilipomfurusha, serikali ya Kenya ilisema hakuwa Mkenya na kwamba hakufuata sheria kupata paspoti yake ya Kenya. Alikamatwa na kuzuiliwa kwa siku tano kufuatia hatua aliyotekeleza katika kiapo ambacho Bw Odinga alikula Januari 30 kuwa Rais wa Wananchi.

 

Mapuuza kuhusu demokrasia

Bw Miguna aliitaka jamii ya kimataifa kuongeza shinikizo kwa serikali ya Kenya kuheshimu utawala wa kisheria na uhuru wa wanahabari akisema serikali za nchi za bara Ulaya na Amerika hujifanya kutetea demokrasia, uwazi na uhuru wa wanahabari lakini wanapuuza umuhimu wa masuala hayo Afrika na nchi zinazoendelea.

“Hizi serikali zinazoitwa zilizoendelea, zinafaa kufanya zaidi ya kuliko maneno tu kuhusu mambo haya,” alisema Bw Miguna.

Alisema yaliyompata mikononi mwa serikali yanafaa kuwagutusha Wakenya wanaoishi ng’ambo ili wafuatilie yanayoendelea nyumbani.  Alisema ujumbe wake kwa Wakenya walio ng’ambo ni kuungana na kutokuwa na woga.

“Eleweni kwamba Kenya ni yetu sisi sote,” alisema.

 

 

KINAYA: Naona ni heri tuiuze Kenya kila mtu agawiwe hela arudi kwao

Wakili mbishi na mwanasiasa wa NASA aliyefurushwa kutoka humu nchini na kurudishwa nchini Canada, Dkt Miguna Miguna. Picha/ Maktaba

Na DOUGLAS MUTUA

Kwa Muhtasari:

  • Ikiwa huna kwenu kwingine, anza kuuliza wazee wako mlitoka wapi kabla ya kuja Kenya
  • Hapa ndipo siasa za uapisho na uhamiaji zilipotufikisha. Nikizingatia hali hii, naona Kisiwa cha Migingo kikikabidhiwa Uganda rasmi
  • Mashtaka atakayofungua Miguna, ikiwa tayari hajayafungua, yatakushangaza

KENYA ni ya nani? Nauliza tu kwa sababu yumkini kuna watu walio na hatimiliki ya nchi hii – kama ya shamba au ploti hivi – wanaoweza kukwambia ufunganye.

Ikiwa huna kwenu kwingine, anza kuuliza wazee wako mlitoka wapi kabla ya kuja Kenya kwa maana hakuna hakika huku kutasalia kwetu daima.

Binafsi sina wasiwasi; walikotoka mababu wa mababu zangu, ndani ya misitu ya Jamhuri ya Kidemokrasia ya Kongo (DRC) kungalipo, tena hakujalimwa na yeyote.

Nahitaji tu kumsadikisha Rais Joseph Kabila kwamba haja yangu ni pahali pa kuita nyumbani, aniruhusu nipenyeze hadi katikati ya msitu na kujenga msonge wa Kikamba.

Nitaukandika kwa udongo na kuuezeka kwa nyasi, nile matunda na mizizi ya porini kabla ya kuanza shughuli za kilimo, niendelee na maisha yangu mbali na usumbufu wa serikali.

Hapo ndipo siasa za uapisho na uhamiaji zilipotufikisha. Nikizingatia hali hii, naona Kisiwa cha Migingo kikikabidhiwa Uganda rasmi, Wakenya fulani waambiwe wahamie huko na wasiote wakirudi Kenya.

Lakini Migingo ni ndogo sana, umati wa watu nilioona katika Bustani ya Uhuru Park wakati wa sarakasi ya uapisho wa ‘Baba’ hawawezi kutoshea hapo.

 

Kurudi Nigeria

Ikiwa watu wanarudishwa kunakodhaniwa kwao, hata kama hawataki, nitawashauri wafuasi wa ‘Baba’ wajiandae kuvuka mpaka kuingia Sudan, njiani kurudi Nigeria.

Kila mtu akirejeshwa kwao, tutaona mrejeshaji watu atakalia nani kimabavu. Ni uraibu wa binadamu wakati wote kuwa na mtumwa wa aina fulani.

Nimesema mara nyingi hapa kwamba nakubaliana na wachekeshaji wanaopendekeza tuuze Kenya, tugawane hela kila mtu atie zake kibindoni na kujiondokea.

Ikiwa tunachukiana kiasi cha kutoweza kuishi pamoja kwa amani wala kujitawala, ikizingatiwa kwamba Kenya si ya mama wa mtu, mbona tusiigeuze pesa na kuzigawana?

 

Sote tuko sawa

Nasema hivi kwa sababu naamini kwa dhati ya moyo wangu kwamba hakuna Mkenya bora kuliko mwingine, sote tuko sawa machoni pa Mwenyezi Mungu na Katiba.

Unapotoka pale unaponitishia eti kwa sababu nina nyumba Marekani, Canada, Uingereza, Tanzania au Uganda, unajiona bora kunizidi katika ushirika huu uitwao Kenya.

Nakumbuka nikiijadili Katiba ya sasa na mwendazake Mutula Kilonzo, aliyekuwa waziri wa masuala ya kikatiba, muda mfupi baada ya sheria hiyo kuu kupitishwa.

Alinihakikishia kuwa niko radhi iwapo ningetaka kuhama Kenya kuishi nchi za watu kwa maana hakuna anayeweza kunipokonya haki ya uzawa!

Katiba yenyewe inanihakikishia haki hiyo, hivyo kondo langu la nyuma lililozikwa Kenya nilipotoka tumboni mwa mama haliwezi kufukuliwa likaletwa Marekani ninakoishi; Kenya ni kwetu.

Bila shaka umejionea ya Miguna, yule bwana anayetumia jina moja mara mbili.

 

Mshangao unakusubiri

Nisikize kwa makini: mashtaka atakayofungua Miguna, ikiwa tayari hajayafungua, yatakushangaza.

Atatushtaki sote, waliotaka ahamishiwe Canada na waliomtaka asalie Kenya kama ‘jenerali’ wao, hata wahudumu ndani ya ndege, sikwambii hata Malkia wa Uingereza atashtakiwa kwa maana ndiye mkuu wa Jumuiya ya Madola!

Polisi watatakikana kueleza vilikokwenda viatu vyake, akalazimika kuingia ndani ya ndege na champali za kwendea msalani.

Nitakukariria alivyopenda kusema Jakaya Mrisho Kikwete enzi zake akilala Ikulu ya Tanzania pindi maji yalipokaribia kuzidi unga: “Upepo utapita tu.”

Dhamira kuu ya Miguna Miguna yaonekana ni kujitakasa apate umaarufu kisiasa

Wakili maarufu na mwanasiasa wa NASA aliyefurushwa humu nchini hadi nchini Canada Dkt Miguna Miguna. Picha/ Maktaba

Na WANDERI KAMAU

Kwa Muhtsari:

  • Wachanganuzi wasema kwamba urejeo wa Dkt Miguna katika kambi ya Bw Odinga huenda ukawa hatua ya kujijenga upya kisiasa
  • Viongozi wengi ambao wanalenga kumrithi Bw Odinga walinyamaza wakati Dkt Miguna akiziuiliwa na polisi
  • Dkt Miguna hajapokelewa vizuri katika eneo la Nyando anakotoka, kwa madai ya kuwa “msaliti mkubwa”
  • Baadhi ya watu wanamwona kama mnafiki, anayelenga kujijenga kisiasa kwa kutumia jina la Bw Raila Odinga

HATUA ya wakili mbishi na kiongozi wa vuguvugu la National Resistance Movement (NRM), Dkt Miguna Miguna kujitokeza kama ‘mtetezi mkuu’ wa kinara wa NASA Raila Odinga, ni mkakati wa kurejesha umaarufu wake miongoni mwa jamii ya Waluo.

Wachanganuzi wanasema kwamba urejeo wa Dkt Miguna katika kambi ya Bw Odinga huenda ukawa hatua ya kujijenga upya kisiasa, hasa baada ya kushindwa kwenye kinyang’anyiro cha ugavana katika Kaunti ya Nairobi mnamo Agosti 8, 2017.

Dkt Miguna Miguna amewahi kuwa mkosoaji mkuu wa Bw Odinga, ila ni baada ya Agosti 8, ambapo alirejea katika kambi yake, akiapa kupigania ‘haki’ baada NASA kudai kwamba ‘ilinyang’anywa’ ushindi wake na mrengo wa Jubilee.

“Maamuzi ya Miguna Miguna kumtetea Odinga ni mkakati wa kuimarisha umaarufu wake kitaifa, na kurejesha urafiki na jamii yake ya Waluo. Hii ni kwa kuwa kwa mtazamo wa wengi alikuwa ‘amepoteza’ mwelekeo kisiasa, hasa baada ya kukosana na Bw Odinga mnamo 2011,” asema Wycliffe Muga, ambaye ni mchanganuzi wa masuala ya kisiasa.

Kulingana na Bw Muga, hatua ya Bw Miguna kujitokeza kama kiongozi wa pekee mwenye “ushujaa” katika kumlisha kiapo Bw Odinga mnamo Januari 30, ni mkakati mpana wa mchakato wa urithi wa kisiasa wa Bw Odinga.

Bw Miguna alirejeshwa kwa lazima nchini Canada na Serikali  Jumatano usiku, kwa sababu ya kushiriki katika kiapo hicho, ambacho kimefasiriwa kama “tishio kwa usalama wa kitaifa.”

Aidha, mchanganuzi huyo anarejelea “ukimya” uliodhihirika miongoni mwa viongozi wakuu wa NASA, akiwemo Bw Odinga mwenyewe, Seneta James Orengo wa Siaya, wabunge Junet Mohammed (Suna Mashariki), John Mbadi kati ya wengine kama ishara ya wazi kuhusu ‘tishio za kisiasa’ wanazokabiliwa kutoka kwa kupanda kwa nyota ya Bw Miguna.

 

NASA haikumtetea

Kama kile kinaonekana kudhihirisha hayo, wakili Edward Sifuna, ambaye alimwakilisha Bw Miguna, alikubali kwamba viongozi wengi ambao wanalenga kumrithi Bw Odinga walinyamaza wakati akiziuiliwa na polisi.

“Hatukuchukua juhudi za kutosha kama Bw Miguna. Alibaki kujitetea peke yake huku baadhi yetu tukitazama tu,” akasema Bw Sifuna, aliyeonekana kutoridhishwa na mikakati ya NASA kumtetea Bw Miguna.

Kwa hayo, wachanganuzi wanafasiri ukimya huo kama hofu iliyo na baadhi ya viongozi hao kuhusu umaarufu mkubwa ambao Bw Miguna amepata kutokana na ujasiri wake kumwapisha Bw Odinga.

Mchanganuzi wa kisiasa Edward Kisiang’ani  asema kwamba NASA haikuonyesha umoja kamili na kujitolea kwake, wakati mmoja wao alijipata taabani.

“Ni dhahiri kwamba viongozi wa NASA hudumisha umoja mkubwa, kila wakati mmoja wao anapokamatwa, au anakabiliwa kisiasa kwa njia yoyote. Tulitarajia kuwaona akina Orengo, Muthama kati ya wengine wakijitokeza vikali kuilaumu serikali dhidi ya ‘maonevu dhidi ya mmoja wao. Lakini hali ilikuwa tofauti. Walinyamaza!” asema mchanganuzi huyo.

Kwenye Uchaguzi Mkuu wa Agosti 8, Bw Miguna alishindwa kunyakua ugavana katika Kaunti ya Nairobi, alipowania kama mgombea huru.

 

‘Msaliti mkubwa’

Bw Miguna pia hajakuwa akipokelewa vizuri katika eneo la Nyando (anakotoka), Kisumu katika eneo la Nyanza, kwa madai ya kuwa “msaliti mkubwa” wa Bw Odinga, hasa baada ya kuandika vitabu Peeling Back the Mask: A Quest for Justice in Kenya na Kidneys for The King: De-forrming the Status  Quo’ ambavyo vilimkosoa sana Bw Odinga.

Kwa wakati mmoja, aliyekuwa mbunge wa eneo hilo Bw Fred Outa, aliwaongoza wakazi kuandamana dhidi ya Bw Miguna, ambapo pia walichoma mfano wa “jeneza” lake kwa kuwa msaliti.

Kwa upande wake, Bw Miguna alikosoa vikali kisa hicho, akikifananisha na “amri iliyotolewa” na Bw Odinga.

Hata hivyo, hali imeonekana kuwa tofauti mara hii, ambapo wakazi waliandamana vikali wakiilaumu serikali dhidi ya kumhangaisha Bwe Miguna, waliyemtaja kuwa “mtoto wao.”

Hivyo, wachanganuzi wanasema kwamba ingawa huenda Bw Miguna hatimaye akafaulu kupata uungwaji mkono katika jamii hiyo, juhudi zake hazitakosa pingamizi, hasa kutoka kwa viongozi ambao watahisi kutishwa na urejeo wake.

 

Hajakubalika kama ‘Jenerali’

Mdadisi wa kisiasa Kiprotich Mutai asema kwamba makovu ya usaliti wa Bw Odinga na Bw Miguna, hasa baada ya matamshi yake ya awali dhidi ya Bw Odinga. “Kuna viongozi ambao bado hawajamkubali Bw Miguna kama ‘Jenerali’  wao wa kisiasa.

Baadhi wanamwona kama mnafiki, anayelenga kujijenga kisiasa kwa kutumia jina la Raila, kama wengi ambavyo wamekuwa wakifanya ili kupata upenyu katika siasa za kitaifa,” asema Bw Mutai.

Licha ya hayo, Bw Miguna amekuwa akijinadi kama “mwanamapinduzi” anayelenga kuhakikisha kwamba haki kamili imepatikana kwa wale ambao wamekuwa wakibaguliwa kisiasa.

“Lengo langu ni kulainisha mfumo wa kisiasa nchini. Tulipigana na utawala wa rais mstaafu (Moi) na kumshinda. Kamwe hatutakubali kutishwa na uongozi wa Rais Uhuru Kenyatta na naibu wake Willam Ruto,” akasema Bw Miguna.

MWANASIASA wa NASA, Miguna Miguna (aliyevaa kofia) akiwa katika Mahakama ya Kajiado jana asubuhi. Bw Miguna alionekana kwa mara ya kwanza alipofikishwa katika mahakama hapo jana, siku tano baada ya kukamatwa na polisi. Picha/KANYIRI WAHITO

Hatimaye Miguna Miguna aonekana hadharani baada ya siku tano

Bw Miguna Miguna alipofikishwa katika mahakama ya Kajiado Februari 6, 2018. Picha/ KANYIRI WAHITONa BENSON MATHEKA

HATIMAYE mwanasiasa Miguna Miguna alionekana hadharani kwa mara ya kwanza Jumanne, siku tano baada ya kukamatwa nyumbani kwake mtaani Runda Kaunti ya Nairobi.

Bw Miguna alionekana alipofikishwa katika mahakama ya Kajiado chini ya ulinzi mkali wakati kundi la mawakili wake walipokuwa mbele ya Jaji Luka Kimaru wa Mahakama Kuu ya Nairobi kufuatilia agizo alilotoa afikishwe mbele yake.

Mwanasiasa huyo ambaye ni wakili alionekana akizama kwenye mawazo alipokuwa akisubiri hakimu kuwasili kortini. Mawakili waliotumwa kumwakilisha walibishana na mkuu wa upelelezi katika kaunti ya Kajiado (DCIO), Bw Daniel Musangi, ambaye aliwazuia kuzungumza na Bw Miguna.  Hata hivyo, baadaye waliruhusiwa kuzungumza naye.

Bw Miguna alikataa kujibu mashtaka matatu ya kuhudhuria na kushuhudia “kiapo” ambacho kinara wa NASA Raila Odinga alikula Januari 30 katika bustani ya Uhuru Park, Nairobi.Shtaka la pili lilisema kwamba alihudhuria mkutano haramu bila kuarifu maafisa wa polisi jijini Nairobi na la tatu ni la kuwa mwanachama wa kundi haramu la National Resistance Movement (NRM).

“Sitajibu mashtaka yasiyo na maana. Huu ni ukiukaji wa haki zangu. Nimefungiwa kwa siku tano bila kuwasiliana na mawakili wangu na bila kuwasiliana na familia yangu. Nimeagizwa kufika mbele ya Mahakama jijini Nairobi,” alisema.
Wakili Koin Lompo alimwakilisha Bw Miguna.

Kulikuwa na mawakili wengine watatu na hakimu alipotaka kujua walikuwa wametumwa na nani Bw Miguna alizua kicheko kortini aliposema wote walikuwa wakimwakilisha. Koin alifahamisha mahakama kwamba Jaji Kimaru alikuwa ameagiza Bw Miguna afikishwe mbele yake na kwamba kumpeleka Kajiado kulikuwa ukiukaji wa haki zake. Kulingana na wakili Koin, hatua hiyo ilikuwa dharau kwa agizo la Jaji Kimaru.

Kwenye uamuzi aliotoka mwendo wa saa nane na nusu baada ya kukabidhiwa agizo la mahakama kuu, hakimu aliagiza Miguna kupelekwa mbele ya Jaji Kimaru kabla ya saa tisa alasiri kisha arejeshwe mbele yake kusomewa mashtaka Februari 14.

Alipokuwa akipelekwa seli, Bw Miguna alisikika akisema angali imara na hatishwi na mashtaka yanayomkabili.
Alipokuwa njiani kuelekea Nairobi, mawakili wake wakiongozwa na Dkt John Khaminwa walikuwa mbele ya Jaji Kimaru ambaye Ijumaa iliyopita aliamuru kuwa Miguna aachiliwe huru kwa dhama ya Sh50,000.

Alisema kuwa hangeondoka katika majengo ya mahakama hiyo hadi amri yake itakapotekelezwa. Jumanne asubuhi kundi la mawakili wanaomtetea Dkt Miguna walimuomba Jaji Kimaru asisite kuwasukuma jela Inspekta Jenerali wa Polisi (IG) Joseph Boinnet na Mkurugenzi wa Idara ya upelelezi wa jinai (DCI) George Kinoti kwa kukaidi na kudharau agizo la mahakama.

 

MWANASIASA wa NASA, Miguna Miguna (aliyevaa kofia) akiwa katika Mahakama ya Kajiado jana asubuhi. Bw Miguna alionekana kwa mara ya kwanza alipofikishwa katika mahakama hapo jana, siku tano baada ya kukamatwa na polisi. Picha/KANYIRI WAHITO

Mahakama yaagiza polisi wasinase wakuu wa NASA

 

MWANASIASA wa NASA, Miguna Miguna (aliyevaa kofia) akiwa katika Mahakama ya Kajiado jana asubuhi. Bw Miguna alionekana kwa mara ya kwanza alipofikishwa katika mahakama hapo jana, siku tano baada ya kukamatwa na polisi. Picha/KANYIRI WAHITO
MWANASIASA wa NASA, Miguna Miguna (aliyevaa kofia) akiwa katika Mahakama ya Kajiado Februari 5, 2018 asubuhi. Bw Miguna alionekana kwa mara ya kwanza alipofikishwa katika mahakama, siku tano baada ya kukamatwa na polisi.
Picha/KANYIRI WAHITO

Na RICHARD MUNGUTI na WANDERI KAMAU

VIONGOZI wa NASA waliokuwa kwenye hatari ya kukamatwa na polisi kuhusiana “uapisho” wa kinara wao Raila Odinga kama “rais wa wananchi” walipata afueni Jumanne baada ya Mahakama Kuu kuagiza Serikali isiwatie mbaroni. Continue Reading