Miguna aahidi kuzima ufisadi Nairobi

Na CHARLES WASONGA

MWANASHERIA mbishani anayeishi uhamishoni Miguna Miguna ametangaza kuwa atawania kiti cha ugavana wa Nairobi katika uchaguzi mdogo utakaofanyika Februari 18.

Akijipigia debe kwenye mahojiano na runinga ya Diaspora TV, Dkt Miguna anayeishi nchini Canada aliahidi kuleta mabadiliko makubwa katika uongozi wa kaunti ya Nairobi kwa manufaa ya wakazi wa jiji.

“Nawasalimu nyote watu wa Nairobi na Wakenya kwa ujumla. Huyu ni Jenerali Miguna akiongea akiwa uhamishoni. Nitagombea nafasi ya ugavana wa Nairobi katika uchaguzi mdogo ujao,” akasema.

“Nitatokomeza ufisadi, na kuteleta mabadiliko katika jiji kwa kuendeleza uongozi wenye maadili,” akaongeza kwenye mohajiano hayo ambayo video yake ilisambazwa mitandaoni.

Hata hivyo, Bw Miguna Miguna ambaye amezuiwa mara kadha kurejea nchini kwa madai kuwa hana stakabadhi hitajika, hakuelezea ikiwa atakubali kutii masharti ya idara ya uhamiaji ili aweze kurejea Kenya kwa ajili ya kushiriki uchaguzi huo.

Vile vile, haikujulikana ni vipi ahatakikisha kuwa stakabadhi zake za uteuzi zimefikia Tume Huru ya Uchaguzi na Mipaka (IEBC), ikiwa serikali itaendelea kumzuia kuingia nchini.

Mwanasheria huyo ana uraia wa Cananda japo ni raia wa Kenya kwa misingi ya kuzaliwa Kenya. Hata hivyo, jaribio lake la kurejelea Kenya mapema 2019 liligonga mwamba alipodinda kujaza stakabadhi hitajika ili kurejesha uraia wake wa Kenya.

Miguna Miguna alifurushwa nchini kwa kosa la kuongoza kiapo bandia ya kiongozi wa ODM Raila Odinga mnamo Januari 31, 2018 kuwa “Rais wa Wananchi” katika hafla iliyofanyika katika bustani ya Uhuru, Nairobi.

Mapema Jumatatu, Desemba 28, 2020 ilidaiwa kuwa chama cha Thirdway Alliance kimemdhamini kuwa mgombeaji wake katika kinyang’anyiro hicho.

Hata hivyo, barua ambayo ilifichua habari hizo na ambayo ilidaiwa kuandikwa na mwenyekiti wa chama hicho Miruru Waweru ilibainika kuwa feki.

Miguna amezea ugavana Nairobi licha ya visiki

NA WANGU KANURI

WAKILI mbishi aliyenyimwa kibali cha kuingia nchini Kenya, Dkt Miguna Miguna, ametangaza kuwa atawania kiti cha ugavana wa Kaunti ya Nairobi katika uchaguzi mdogo ujao baada ya Mike Sonko kutimuliwa na Seneti. Wakili huyo alichapisha hayo kupitia mtandao wake wa kijamii wa Twitter.

“Baada ya kupokea ushauri  wa kina wa kisheria kutoka kwake @waikwawanyoike Desemba 19, 2020, mimi Miguna Miguna, Mkenya wa kuzaliwa na mpigakura aliyesajiliwa katika Kaunti ya Nairobi, ninatangaza uwaniaji wangu wa gavana wa Nairobi katika uchaguzi mdogo ujao. Watakaojitolea kunisaidia wamekaribishwa,” aliandika.

Lakini mwanasheria huyo anaishi jijini Toronto, Canada ambapo ana uraia wa mataifa mawili, huku Wakenya wakishangaa iwapo atakubaliwa kuwania ugavana na Tume Huru ya Mipaka na Uchaguzi (IEBC).

Mapema mwaka huu, Mkenya aliye na uraia wa Amerika Mwende Mwinzi alikumbana na changamoto katika azma yake kuwa balozi wa Kenya nchini Korea Kusini kutokana na uraia wake wa mataifa mawili.

Juhudi za Dkt Miguna za kurejea nchini Kenya baada ya kufurushwa zimegonga mwamba huku ikiwa kama kinyang’anyiro cha mwenye nguvu mpishe kati yake na serikali.

Hata ingawa hajaweza kurejea nchini, maswali ya jinsi atakavyofanya kampeni za kuwania kiti hicho cha ugavana zinavitinga vichwa vya wakenya wengi huku wakiwa na hamu ya kujua kitakachoendelea.

Hali kadhalika tangazo lake limeibua hisia tata katika mtandao wa kijamii wa Twitter.

“Je, hamfahamu kuwa ina maana gani iwapo atajileta nyumbani kwanza? Ama ataongoza Nairobi akiwa mbali kama kifaa cha Bluetooth?” akauliza @GodlovesRandom.

“Unastahili kuwa gavana wa Nairobi lakini hujasajiliwa kama mpigakura wa Nairobi na hilo litafanya uondolewe kwenye kinyanganyiro,” akasema EkaiLokaale.

“Una kura yangu kila wakati utakapowania nafasi yoyote nchini Kenya. Itakuwa furaha yangu kuchagua uongozi murua ulio na maono. Asante kwa nafasi nyingine ya kuthibitisha usaidizi wangu. Siwezi ngoja kupiga kura,” akaeleza @brunoclifford.

“Wakazi wa Nairobi hii ni nafasi yetu ya kuonyesha kuwa mamlaka yana watu. Tafadhali tumpigie kura Miguna kama gavana,” akasema @kennedymulinge.

“Miguna hatawasilisha kazi ipasavyo, atawanyanyasa masekretari watakaofanya kazi katika ofisi yake. Alifanya kazi katika ofisi ya Raila na wengi walipata ugonjwa wa shinikizo la damu! Miguna Miguna ni mwenye matusi mengi na asiye mstaarabu,” akaandika @zepphimobby78.

“Ninafikiri kabila si kikwazo kikuu katika kinyang’anyiro cha kiti cha ugavana cha Nairobi. Pesa hali kadhalika kwani unaweza toa hongo na upate njia ya kuwa gavana,” akaeleza @KarimWaiyaki.

“Ninaidhinisha @MigunaMiguna katika kinyang’anyiro kijacho cha kiti cha ugavana cha kaunti ya Nairobi. Wakati umewadia wa kusimama na uongozi wa kweli na si uongozi wa wastani kisa ushirika wa chama. Ninakuunga mkono Miguna Miguna,” akaandika @MillicentOmanga.

Miguna akunja mkia na kurudi Canada

Na RICHARD MUNGUTI

WAKILI Miguna Miguna Jumanne alikunja mkia na kuamua kurudi Canada baada ya kukwama Ujerumani kwa siku 16, kufuatia hatua ya serikali kumzuia kurejea nchini.

Bw Miguna alitangaza uamuzi huo huku Mwanasheria Mkuu, Paul Kihara Kariuki akieleza Mahakama Kuu kwamba Serikali haijamkataza kurejea nchini.

Wakili huyo alifukuzwa nchini na Serikali mnamo 2018 kutokana na msimamo wake wa kisiasa ikidai hakuwa raia wa Kenya mbali wa Canada.

Maafisa wa Serikali walimfukuza Bw Miguna nchini kwa mabavu licha ya mahakama kuagiza akubaliwe kukaa Kenya.

Kupitia mtandao wa Twitter, Dkt Miguna alisema: “Nimechoka kusubiri maafisa wakuu serikalini watii maagizo ya mahakama ndipo nirudi Kenya bila vikwazo. Sina budi ila kurudi Canada ninakoishi. Sitachoka kupigania haki yangu. Mapambano yanaendelea!”

Bw Kariuki alisema katika ripoti iliyowasilisha kortini kwamba muda wa pasipoti ya Dkt Miguna kutumika uliisha Machi 23, 2019 na hivyo alitakiwa kuomba pasipoti mpya ama atumie kitambulisho chake cha kitaifa kuingia nchini.

Alipowasili Berlin mnamo Januari 7, 2020 alipata serikali ya Kenya ilikuwa imetoa onyo kwa mashirika ya ndege kutomsafirisha hadi Nairobi.

Bw Kariuki aliwatetea maafisa wa serikali na kumlaumu Dkt Miguna kwa masaibu yaliyompata.

“Naomba mahakama itilie maanani mfumo wa kisheria unaopaswa kufuatwa katika utoaji wa pasipoti. Dkt Miguna hajaomba pasipoti mpya baada ya ile yake kuisha muda wake Machi 23, 2019,” akasema Bw Kariuki.

Wakili wa Serikali, Bw Emmanuel Mbita, jana aliwapiga chenga mawakili wa Dkt Miguna, Dkt John Khaminwa na Harun Ndubi kwa kuwasilisha ripoti ya Bw Kariuki mbele ya Jaji Weldon Korir bila kuwaarifu. Kitendo hicho kiliwaudhi mawakili hao na wale wa Tume ya Haki za Binadamu nchini (KHRC).

Mawakili hao walilalamikia Jaji Korir wakisema kesi hiyo ilikuwa imeorodheshwa kutajwa saa tano jana lakini Bw Mbita akajificha na kuomba korti itenge sik mpya ya kusikizwa.

Wakili Khaminwa alisema atawasilisha ombi leo kuhusu tabia hiyo ya afisi ya mwanasheria mkuu.

Bw Mbita aliomba mahakama itenge kesi hiyo kusikizwa Machi 23, 2020.

‘Kurejea kwa Miguna sasa ni kitendawili’

Na RICHARD MUNGUTI

KUREJEA nchini kwa mwanaharakati Dkt Miguna Miguna hakujulikani baada ya mwanasheria mkuu Paul Kihara kutofika mahakamani Jumanne kutoa mwangaza kuhusu masuala kadha ya kisheria.

Kutofika kortini kwake kulimwacha Dkt Miguna katika hali ya sintofahamu iwapo atawahi rudi nchini ama la.

Lakini Jaji John Mativo alimwamuru Bw Kihara afafanue kuhusu masuala yaliyokanganya kuhusu maagizo ya kumtaka afike kortini.

“Kile hii mahakama ilitaka ni Bw Kihara kufafanua iwapo maafisa wanaohusika watafanikisha kurudi kwa Dkt Miguna au la,” alisema Jaji Mativo.

Jaji huyo alieleza katika uamuzi wa jana kwamba mwanasheria mkuu ndiye mshauri mkuu wa maafisa wa serikali katika masuala yote ya kisheria.

Pia alisema mwanasheria mkuu ni rafiki wa mahakama na anatakiwa kutoa mwelekeo kuhusu masuala nyeti ama yale yanayokanganya ya kisheria.

“Mwanasheria mkuu kama mshauri wa Serikali yuko na ufahamu mpana wa masuala ya kisheria kwa hivyo kufika kwake kortini kutatoa mwanga anayepasa kutekeleza maagizo ya korti,” alisema Jaji Mativo.

Hivyo basi alimtaka mwanasheria mkuu afike kortini mwenye ama amtume mwakilishi wake Januari 21 2020 kueleza kilicho kigumu katika kutekeleza agizo la korti.

Mahakama ilisema iwapo maagizo ya mahakama yatakiukwa jinsi inavyoendelea basi hali na suinto fahamu itakumba nchi hii.

Bw Kihara hakufika kortini jana kama alivyoagizwa Ijumaa mbali alimtuma wakili wa Serikali Bw Emmanuel Mbita kufafanuliwa kile mwanasheria huyu mkuu alitakiwa kufanya.

Jaji Mativo alifafanua kwamba , Bw Kihara au mwakilishi wake wanatakiwa kueleza sababu ya maafisa wakuu wa Serikali kukaidi agizo wafanikishe kurudi kwa Dkt Miguna.

Dkt Miguna yuko mjini Berlin Ujerumani anakosubiri Serikali itekeleze agizo la mahakama kuu ifanikishe kurudi kwake.

“Wakenya wenzangu mnaouliza hali yangu, nataka kuwaarifu mimi niko mzima kama kigogo.Niko mjini Berlin, Ujerumani nikisubiri maafisa wakuu serikalini watii agizo la mahakama kufanikisha kurejea kwangu Kenya,” Dkt Miguna alisema katika ujumbe aliotuma kwa mtandao wa Twitter.

Kufuatia agizo la Mahakama Dkt Miguna afanikishiwe kurudi msemaji wa Serikali , Kanali (mstaafu) Cyrus Oguna alimtaka mwanaharakati huyo awasiliane na mabalozi ya Kenya ng’ambo kupewa pasipoti nyingine.

Jaji Mativo aliamuru kesi hiyo itajwe Januari 13 2020 kwa maagizo zaidi.

Miguna: Serikali yaitwa kortini Januari 21

Na Richard Munguti

KIZUGUMKUTI kinakumba marejeo ya mwanaharakati Dkt Miguna Miguna baada ya mwanasheria mkuu Paul Kihara kutofika mahakamani Jumatatu kutoa mwangaza kuhusu masuala kadha ya kisheria.

Kutofika kortini Bw Kihara kulimwacha Dkt Miguna katika hali ya sintofahamu iwapo atawahi kurudi nchini.

Lakini Jaji John Mativo alimwamuru Bw Kihara afafanue kuhusu masuala yaliyokanganya kuhusu maagizo ya kumtaka afike kortini.

“Kile hii mahakama ilitaka ni Bw Kihara kufafanua iwapo maafisa wanaohusika watafanikisha kurudi kwa Dkt Miguna au la,” alisema Jaji Mativo.

Jaji huyo alieleza katika uamuzi wa jana kwamba mwanasheria mkuu ndiye mshauri mkuu wa maafisa wa serikali katika masuala yote ya kisheria.

Pia alisema mwanasheria mkuu ni rafiki wa mahakama na anatakiwa kutoa mwelekeo kuhusu masuala nyeti ama yale yanayokanganya ya kisheria.

“Mwanasheria mkuu kama mshauri wa Serikali yuko na ufahamu mpana wa masuala ya kisheria kwa hivyo kufika kwake kortini kutatoa mwanga anayepasa kutekeleza maagizo ya korti,” alisema Jaji Mativo.

Hivyo basi alimtaka mwanasheria mkuu afike kortini mwenyewe ama amtume mwakilishi wake Januari 21 2020 kueleza kilicho kigumu katika kutekeleza agizo la korti.

Mahakama ilisema iwapo maagizo ya mahakama yatakiukwa jinsi inavyoendelea basi hali na suitafahamu itakumba nchi hii.

Bw Kihara hakufika kortini jana kama alivyoagizwa Ijumaa bali alimtuma wakili wa Serikali Bw Emmanuel Mbita kufafanua kile mwanasheria huyu mkuu alitakiwa kufanya.

Jaji Mativo alifafanua kwamba , Bw Kihara au mwakilishi wake wanatakiwa kueleza sababu ya maafisa wakuu wa Serikali kukaidi agizo wafanikishe kurudi kwa Dkt Miguna.

Dkt Miguna yuko mjini Berlin Ujerumani anakosubiri Serikali itekeleze agizo la mahakama kuu ifanikishe kurudi kwake.

“Wakenya wenzangu mnaouliza hali yangu, nataka kuwaarifu mimi niko mzima kama kigongo. Niko mjini Berlin, Ujerumani nikisubiri maafisa wakuu serikalini watii agizo la mahakama kufanikisha kurejea kwangu Kenya,” Dkt Miguna alisema katika ujumbe aliotuma kwa mtandao wa Twitter.

Kufuatia agizo la Mahakama Dkt Miguna afanikishiwe kurudi msemaji wa Serikali , Kanali (mstaafu) Cyrus Oguna alimtaka mwanaharakati huyo awasiliane na mabalozi ya Kenya ng’ambo kupewa pasipoti nyingine.

Jaji Mativo aliamuru kesi hiyo itajwe Januari 13 2020 kwa maagizo zaidi.

Miguna: Korti yaita Kihara afafanue ukaidi wa serikali

Na Richard Munguti

MWANASHERIA Mkuu Paul Kihara ameagizwa afike mahakamani Jumatatu kueleza kwa nini Serikali haijafanikisha kurudi kwa wakili na mwanaharakati Dkt Miguna Miguna kama ilivyoagizwa na korti.

Dkt Miguna yuko jijini Berlin Ujerumani anakosubiri Serikali itekeleze agizo la mahakama kuu kuhusu kurejea kwake.

“Wakenya wenzangu mnaotaka kujua hali yangu, nataka kuwaarifu kuwa ni mzima kama kigongo. Niko jijini Berlin, Ujerumani nikisubiri maafisa wakuu serikalini watii agizo la mahakama kufanikisha kurejea kwangu Kenya,” Dkt Miguna alisema katika mtandao wake wa Twitter.

Katika mahakama kuu jana, Jaji John Mativo alimwamuru Bw Kihara afike kortini kueleza sababu ya kutotii agizo la mahakama.

Ombi la aidha Bw Kihara ama wakili mkuu wa serikali Kennedy Ogetto afike kortini lilitolewa kutokana na ombi la wakili wa mwanaharakati huyo Dkt John Khaminwa.

“Ni Bw Kihara ama wakili mkuu wa Serikali Bw Kennedy Ogetto wanaoweza kueleza hii mahakama kwa nini maagizo yake hayatekelezwi,” alisema Dkt Khaminwa.

Wakili huyo alisema tangu 2018 maagizo ya korti kumhusu Dkt Miguna yamepuuzwa.

Jaji Mativo alitahadharisha kwamba mahakama haitachukulia kwa mzaha madai kuwa maagizo yake yanapuuzwa.

“Wakati umewadia hii mahakama itumie mamlaka na nguvu iliyopewa na Katiba,” alisema Jaji Mativo.

Jaji huyo alisema suala la Dkt Miguna kurudi nchini linapasa kutatuliwa kabisa.

“Licha ya kupokea maagizo ya kufanikisha kurudi kwa Dkt Miguna nchini, maafisa wakuu wa Serikali wameyakaidi kwa madharau,” alisema Dkt Khaminwa.

Dkt Miguna alifurushwa nchini Kenya 2018 baada ya kumwapisha kinara wa upinzani Raila Odinga kuwa “ rais wa wananchi.”

Lakini wakili wa Serikali alikariri kuwa Serikali haipingi kurudi kwa Dkt Miguna.

Mahakama ilielezwa kwamba Dkt Miguna anatakiwa kuenda katika afisi ya Ubalozi wa Kenya, ng’ambo kupewa pasipoti ya kutumia kurejea nchini.

Mahakama ilielezwa kwamba Serikali bado haijafutilia mbali arifa kumhusu Dkt Miguna kwa mashirika ya ndege za kimataifa kwamba yasimruhusu aabiri ndege zao.

Agizo hilo la jana linajiri baada ya uamuzi uliotolewa wiki iliyopita na Jaji Weldon Korir kwamba Serikali ifanikishe kurudi nchini kwa mwanaharakati huyo.

Wadai Kuria amekamatwa kwa kusema Miguna afaa kuruhusiwa nchini

Na SAMMY WAWERU

WABUNGE wanaohusishwa na mrengo wa ‘Tangatanga’ sasa wanadai kukamatwa kwa mbunge wa Gatundu Kusini Moses Kuria kunahusishwa na hatua yake kutetea wakili Miguna Miguna aruhusiwe kurejea nchini.

Mbunge huyo alikamatwa mapema Ijumaa na maafisa ambao hawakuwa na sare rasmi za polisi katika mkahawa mmoja jijini Nairobi kwa madai ya kumpiga mwanamke mmoja Desemba 2019.

Akizungumza nje ya kituo cha polisi cha Kilimani, Nairobi, ambako Kuria amezuiliwa, mbunge wa Kikuyu Bw Kimani Ichung’wa amesema mojawapo ya sababu zilizofanya Kuria akamatwe ni hatua yake kutetea Miguna arudi nchini.

“Kutetea Miguna Miguna aruhusiwe kurejea nchini tunaamini ni miongoni mwa sababu zake kukamatwa,” akasema Ichung’wa, kwa niaba ya wabunge wenza wa Tangatanga.

Alikuwa ameandamana na wabunge Mohammed Ali wa Nyali, Ndindi Nyoro (Kiharu), miongoni mwa wengine.

Mbunge huyo alisema Tangatanga haitababaishwa na yeyote katika kile alitaja kama “kueleza ukweli wa mambo”.

Ichung’wa akitoa ‘ujumbe wa Kuria’ alisema, “Kuria ameshikilia kwamba atabeba mzigo wa chochote kitakachoibuka kwa kusema ukweli”.

“Sote tunamuunga mkono na hatutababaishwa na yeyote kwa kusema ukweli. Huu ni mwaka wa kuambiana ukweli,” Bw Ichung’wa akasema.

Wiki hii, Kuria aliicharura serikali kwa kumkataza wakili Miguna kurudi nchini, akisema inakiuka haki zake kisheria.

Miguna alifurushwa nchini 2018 kwa kumuapisha kiongozi wa ODM Raila Odinga kama Rais wa Wananchi.

Wakili huyo ana uraia wa mataifa mawili; Kenya na Canada. Alipaswa kurejea nchini mapema wiki hii, lakini serikali ikatuma ilani kwa mashirika ya ndege aliyokata ada ya usafiri, dhidi ya kumsafirisha nchini. Miguna anahangaishwa licha ya mahakama kuu kuamuru aruhusiwe kurejea nchini.

Katika suala la kukamatwa kwa Kuria, mwanamke Joyce Wanja anadai Desemba 8 mwaka uliopita, mbunge huyo alimdhulumu baada ya kutofautiana kuhusu ripoti ya tume ya maridhiano ya BBI katika mdahalo ulioandaliwa na kituo kimoja cha runinga nchini.

Wazee walaani serikali kumtesa Miguna

Na GEORGE ODIWUOR

KUNDI la wazee wa jamii ya Waluo limeitaka serikali kukoma kumhangaisha wakili Miguna Miguna, ambaye amekwama Uropa baada ya kuzuiliwa kusafiri kurudi nyumbani Kenya.

Wazee hao wakiongozwa na Mzee Nyandiko Ongadi na Walter Ambasa, walieleza kukerwa na namna serikali imekuwa ikimuhangaisha Dkt Miguna.

Bw Ongadi aliitaka serikali kutangaza msimamo wake kuhusiana na kurejea kwake nchini.

“Kumkataza Miguna kuja Kenya ni kukiuka haki zake za kimsingi. Hafai kuendelea kuhangaika katika mataifa ya kigeni,” akasema Mzee Ongadi alipokuwa akihutubiwa wanahabari jana mjini Kendu Bay katika Kaunti ya Homa Bay.

Alisema kuwa Dkt Miguna alizaliwa nchini Kenya hivyo hafai kuzuiliwa kuja nyumbani.

Bw Miguna alisafirishwa kwa nguvu na serikali ya Kenya hadi nchini Canada mnamo Februari 2018 siku chache baada ya ‘kumwapisha’ kinyume cha sheria kiongozi wa ODM, Raila Odinga kuwa ‘rais wa wananchi’.

Dkt Miguna alisafirishwa, kwa mara ya pili, hadi Canada mnamo Machi 29, 2018 baada ya kuzuiliwa katika Uwanja wa Ndege wa Kimataifa wa Jomo Kenyatta (JKIA) kwa saa 72.

Desemba 2018, mahakama iliagiza serikali kumlipa Miguna fidia ya Sh7 milioni kwa kumhangaisha bila hatia.

Jaji Chacha Mwita pia aliagiza arejeshewe paspoti yake iliyotwaliwa na serikali alipofurushwa kwa nguvu.

Wakili huyo alikuwa amepanda kuwasili nchini Jumanne wiki hii akitumia ndege ya shirika la Lufthansa lakini akazuiliwa kuendelea na safari alipowasili nchini Ujerumani.

Alizuiliwa kuabiri ndege kuja humu nchini baada ya serikali ya Kenya kutoa ilani ikisema kuwa hatakiwi nchini.

Jaribio lake la kutaka kutumia ndege ya Ufaransa ya Airfrance lilitibuka pale alipoondolewa ndani ya ndege hiyo muda mfupi kabla ya kupaa.

Shirika la Air France lilisema kuwa lilipokea agizo kutoka kwa serikali ya Kenya iliyotishia kuzuia ndege hiyo kutua katika uwanja wa JKIA endapo ingembeba Dkt Miguna.

Serikali ingali inasisitiza kuwa wakili huyo ni sharti atume maombi katika ubalozi wa Kenya apewe paspoti mpya.

Wazee wa jamii ya Waluo walimtaka kinara wa ODM Raila Odinga kumsihi Rais Uhuru Kenyatta ili aruhusu Miguna kurejea humu nchini.

Mzee Ongadi alisema kuwa wakili Miguna hana nia ya kutatiza amani ambayo Wakenya wanafurahia tangu Rais Kenyatta kukubali kufanya kazi na Bw Odinga.

“Mwafaka wa kisiasa baina ya Rais Kenyatta na Bw Odinga unafaa kuwanufaisha watu wote. Dkt Miguna ni miongoni mwa watu wanaofaa kunufaika na handisheki badala ya kuhangaishwa,” akasema.

Miguna anajikaanga mwenyewe – Wadadisi

Na WANDERI KAMAU

MSIMAMO mkali wa wakili mbishi Miguna Miguna ndicho chanzo cha masaibu yanayomwandama, wamesema wadadisi.

Dkt Miguna alizuiwa kurudi Kenya mnamo Jumanne baada ya Shirika la Ndege la Ufaransa kudai kupokea agizo kutoka kwa serikali ya Kenya kutomsafirisha nchini.

Masaibu yake yamezua hisia mseto, huku baadhi ya viogozi wakiilaumu serikali kwa kumhangaisha kimakusudi.

Kwenye mahojiano na ‘Taifa Leo’, Maprofesa Peter Kagwanja na Macharia Munene wanasema kuwa Dkt Miguna ni mwanasheria mwenye uwezo mkubwa, hasa kimasomo, ingawa anautumia vibaya.

“Nimefanya kazi na Bw Miguna kwa muda, na ni mwanasheria mwenye uwezo mkubwa kiakili. Vile vile, ni mwandishi mwenye mawazo mapevu ambayo yangekuwa yenye manufaa makubwa kwa nchi, ikiwa angeyaelekeza katika juhudi za kuifaa jamii,” akasema Prof Kagwaja.

Mdadisi huyo anasema kuwa ni sababu hiyo ambapo kinara wa ODM Raila Odinga alimchukua kuwa mshauri wake mkuu alipohudumu kama Waziri Mkuu kati ya 2007 na 2013 kwenye Serikali ya Muungano kati yake na Rais Mstaafu Mwai Kibaki.

Bw Miguna alihudumu katika wadhifa huo kati ya mwaka 2009 na 2011.

“Kimsingi, Bw Odinga alimdhamini sana Bw Miguna kutokana na uelewa wake mpevu wa masuala ya sheria na siasa. Hata hivyo, mojawapo ya udhaifu wake mkubwa ni hasira na kutokubali kukosolewa,” asema Prof Kagwanja.

Naye Prof Munene anasema kuwa lazima wakili huyo atii sheria.

Mvutano kati yake na serikali ulizidi kutokota jana, baada ya Msemaji wa Serikali Kanali Cyrus Oguna kudai kwamba wakili huyo atakubaliwa nchini tu ikiwa atakuwa na stakabadhi zifaazo, ikiwemo paspoti.

Vile vile, alisema kuwa sababu kuu ya mashirika ya ndege ya Lufthansa (Ujerumani) na Ufaransa kumkataza kusafiri ilitokana na mienendo yake ambayo inakiuka kanuni za kimataifa kuhusu usafiri wa ndege.

“Lazima abiria anayesafiri kwa ndege azingatie sheria na kanuni zote zilizowekwa. Tatizo lake [Dkt Miguna] ni kukiuka sheria hizo,” akasema kwenye taarifa.

Hata hivyo, Chama cha Wakenya Wanaoishi Ughaibuni (KDA) kiliikosoa vikali serikali, kikitaja sababu hiyo kama kisingizio tu cha kumzuia kurejea nchini.

“Tunafahamu kuhusu sheria mpya za usafiri wa ndege ambazo zimeanza kutekelezwa. Hata hivyo, hakuna ushahidi wowote kwamba Dkt Miguna amekiuka sheria hizo kutokana na mienendo yake,” akasema Dkt Shem Ochuodho ambaye ndiye mwenyekiti wa chama hicho.

Dkt Miguna alifutwa kazi na Bw Odinga mnamo Septemba 2011 kwa tuhuma za “kiburi na kutowaheshimu wafanyakazi wenzake.” Alirejeshwa kazini baada ya miezi miwili lakini akakataa.

Tangu kurudishwa kwa lazima na serikali nchini Canada mnamo 2018, amekuwa akitoa jumbe zake kali kupitia mitandao ya Twitter na Facebook, huku akifuatwa na mamilioni ya watu.

Amekuwa akitumia mitandao hiyo kama majukwaa ya kuwasiliana na wafuasi wake nchini.

Masaibu yake pia yalivuta hisia za baadhi ya viongozi, huku mbunge wa Kandara Alice Wahome akimlaumu Waziri wa Usalama wa Ndani Dkt Fred Matiang’i kwa masaibu yanayomwandama wakili huyo.

Miguna anavyojikaanga mwenyewe

Na WANDERI KAMAU

MSIMAMO mkali wa wakili mbishi Miguna Miguna ndicho chanzo cha masaibu yanayomwandama, wamesema wadadisi.

Dkt Miguna alizuiwa kurudi Kenya mnamo Jumanne baada ya Shirika la Ndege la Ufaransa kudai kupokea agizo kutoka kwa serikali ya Kenya kutomsafirisha nchini.

Masaibu yake yamezua hisia mseto, huku baadhi ya viogozi wakiilaumu serikali kwa kumhangaisha kimakusudi.

Kwenye mahojiano na ‘Taifa Leo’ Jumatano, Maprofesa Peter Kagwanja na Macharia Munene wanasema kuwa Dkt Miguna ni mwanasheria mwenye uwezo mkubwa, hasa kimasomo, ingawa anautumia vibaya.

“Nimefanya kazi na Bw Miguna kwa muda, na ni mwanasheria mwenye uwezo mkubwa kiakili. Vile vile, ni mwandishi mwenye mawazo mapevu ambayo yangekuwa yenye manufaa makubwa kwa nchi, ikiwa angeyaelekeza katika juhudi za kuifaa jamii,” akasema Prof Kagwaja.

Mdadisi huyo anasema kuwa ni sababu hiyo ambapo kinara wa ODM Raila Odinga alimchukua kuwa mshauri wake mkuu alipohudumu kama Waziri Mkuu kati ya 2007 na 2013 kwenye Serikali ya Muungano kati yake na Rais Mstaafu Mwai Kibaki.

Bw Miguna alihudumu katika wadhifa huo kati ya mwaka 2009 na 2011.

“Kimsingi, Bw Odinga alimdhamini sana Bw Miguna kutokana na uelewa wake mpevu wa masuala ya sheria na siasa. Hata hivyo, mojawapo ya udhaifu wake mkubwa ni hasira na kutokubali kukosolewa,” asema Prof Kagwanja.

Naye Prof Munene anasema kuwa lazima wakili huyo atii sheria.

Mvutano kati yake na serikali ulizidi kutokota jana, baada ya Msemaji wa Serikali Kanali Cyrus Oguna kudai kwamba wakili huyo atakubaliwa nchini tu ikiwa atakuwa na stakabadhi zifaazo, ikiwemo paspoti.

Vilevile, alisema kuwa sababu kuu ya mashirika ya ndege ya Lufthansa (Ujerumani) na Ufaransa kumkataza kusafiri ilitokana na mienendo yake ambayo inakiuka kanuni za kimataifa kuhusu usafiri wa ndege.

“Lazima abiria anayesafiri kwa ndege azingatie sheria na kanuni zote zilizowekwa. Tatizo lake [Dkt Miguna] ni kukiuka sheria hizo,” akasema kwenye taarifa.

Hata hivyo, Chama cha Wakenya Wanaoishi Ughaibuni (KDA) kiliikosoa vikali serikali, kikitaja sababu hiyo kama kisingizio tu cha kumzuia kurejea nchini.

“Tunafahamu kuhusu sheria mpya za usafiri wa ndege ambazo zimeanza kutekelezwa. Hata hivyo, hakuna ushahidi wowote kwamba Dkt Miguna amekiuka sheria hizo kutokana na mienendo yake,” akasema Dkt Shem Ochuodho ambaye ndiye mwenyekiti wa chama hicho.

Dkt Miguna alifutwa kazi na Bw Odinga mnamo Septemba 2011 kwa tuhuma za “kiburi na kutowaheshimu wafanyakazi wenzake.” Alirejeshwa kazini baada ya miezi miwili lakini akakataa.

Tangu kurudishwa kwa lazima na serikali nchini Canada mnamo 2018, amekuwa akitoa jumbe zake kali kupitia mitandao ya Twitter na Facebook, huku akifuatwa na mamilioni ya watu.

Amekuwa akitumia mitandao hiyo kama majukwaa ya kuwasiliana na wafuasi wake nchini.

Masaibu yake pia yalivuta hisia za baadhi ya viongozi, huku mbunge wa Kandara Alice Wahome akimlaumu Waziri wa Usalama wa Ndani Dkt Fred Matiang’i kwa masaibu yanayomwandama wakili huyo.

Mahakama yaamuru serikali ijibu kesi ya Miguna

Na RICHARD MUNGUTI

MAWAKILI wa mwanaharakati na wakili mwenye tajiriba ya juu Dkt Miguna Miguna anayekumbwa na matatizo ya usafiri Jumatano wameomba Mahakama Kuu ishurutishe Serikali kufanikisha kurudi kwake nchini Kenya.

Dkt Miguna aliyetarajiwa kuingia nchini Jumatano angali jijini Paris, Ufaransa akisubiri Serikali ya Kenya itoe agizo la kumruhusu kuabiri ndege arudi nyumbani.

Dkt Miguna ambaye pia ni raia wa Canada alitarajiwa kurudi nchini Januari 7/8, 2020, lakini angali anakumbwa na matatizo ya usafiri.

Baada ya Dkt Miguna kuwafahamisha mawakili Dkt John Khaminwa na Nelson Havi matatizo yanayomkabili, waliwasilisha kesi chini ya sheria za dharura wakiomba Serikali ishurutishwe kumruhusu aingie nchini.

Alipofika mbele ya Jaji Weldon Korir , Dkt John Khaminwa aliomba mahakama iamuru Serikali imruhusu Dkt Miguna arudi nchini.

“Licha ya agizo lako la Ijumaa wiki iliyopita ukiamuru serikali ifanikishe kurudi kwa Dkt Miguna bado anakumbwa na matitizo ya kurudi nchini baada ya Serikali kutotoa ilani yake kwa mashirika ya ndege ya kimataifa,” alisema Dkt Khaminwa.

Wakili huyo aliambia mahakama Dkt Miguna angali Ufaranza na mashirika ya ndege ya kimataifa hayataki aabiri ndege zao kurudi Kenya.

“Licha ya hakikisho la serikali kwamba haipingi Dkt Miguna akirudi nchini bado anakabiliwa na matatizo ya usafiri,” Dkt Khaminwa alieleza korti.

Jaji Korir alimwamuru Dkt Khaminwa aikabidhi idara husika nakala za kesi ndipo iwasilishe ushahidi na kufika kortini kesho kusikiza hiyo.

Dkt Khaminwa aliambia Mahakama alizugumza na Waziri wa Usalama Fred Matiang’i aliyemweleza Serikali haipingi Dkt Miguna akirudi.

Mahakama Jumatatu ilitoa agizo la kuishurutisha serikali kufanikisha Dkt Miguna kurejea nchini Jumanne.

Jaji Korir aliwaamuru; Mkurugenzi wa Idara ya Uhamiaji, Mkurugenzi wa Idara ya Uchunguzi wa Jinai na Inspekta Jenerali wa Polisi wasimtatize mwanaharakati huyo.

Dkt Miguna alifurushwa nchini mwaka 2018 baada ya kumwapisha kinara wa chama cha Orange Democratic Movement (ODM) Raila Odinga kuwa ‘Rais wa wananchi’.

Jaji Korir amemwamuru Msajili wa Mahakama Kuu amrudishie Dkt Miguna pasipoti yake kupitia kwa wakili wake ama afisa wa tume ya kutetea haki za binadamu nchini (KNCHR).

Punde tu Mahakama Kuu ilipotoa agizo hilo Jumatatu, serikali ilitangaza itafanikisha kurudi kwake mradi awe na hati zilizo sahihi.

Msemaji wa Serikali Kanali (mstaafu) Cyrus Oguna alisema ushauri wa Rais Uhuru Kenyatta kuhusu kurudi kwa Dkt Miguna unazingatiwa.

Lakini Kanali Oguna alibainisha Dkt Miguna atakaguliwa kama wananchi na wasafiri wale wengine na lazima awe na hati halisi za usafiri.

Watumiaji mitandao ya kijamii wakashifu hatua ya Miguna kuzuiwa kuabiri ndege

Na SAMMY WAWERU

HISIA mseto zimetolewa na Wakenya wakiwemo watumiaji wengine wa mitandao ya kijamii kufuatia madai kuwa wakili Joshua Miguna Miguna amezuiwa kuabiri ndege ya shirika la Lufthansa, Frankfurt, Ujerumani ambapo alitarajiwa kurejea nchini.

Miguna alifurushwa nchini mwaka 2018 na juhudi zake kurudi ziligonga mwamba pale alihangaishwa katika Uwanja wa Ndege wa Kimataifa wa Jomo Kenyatta (JKIA).

Mtumiaji mmoja ameshangazwa na hali mkanganyiko na drama zilizoshuhudiwa licha ya serikali Jumatatu kusema haikutarajia purukushani.

“Kwa nini kumhangaisha kiasi hicho? Idara ya uhamiaji ilikuwa imeahidi kufanikisha safari yake nchini. Kumbe ni mchezo wa basketiboli kwenye uga wa soka,” amechapisha Joyce Gichuhi, kufuatia masaibu yanayomzingira kiongozi huyo aliyethubutu kujitangaza kiongozi wa vuguvugu la NRM na lililopigwa marufuku na serikali.

Ronald Langat ameishutumu serikali kwa hatua hiyo, akidai inajishughulisha kuhujumu raia halali wa Kenya.

“Inajua kuzuia Miguna Miguna lakini hailindi wananchi dhidi ya mashambulizi ya al-Shabaab,” asema Langat.

“Kwa nini anyimwe haki yake kikatiba kuwa nchini? Serikali ya hujuma tu,” amechapisha Japheth Kivuitu.

Shaky Maina anaicharura serikali, “Wakenya wanaoshangilia kuzuiwa kwa Miguna Miguna, serikali iyo hiyo ndiyo itaiba na kufuja mali ya umma iyatumie kufanya maendeleo hewa na kuagiza bidhaa bandia,” akisisitiza wananchi wanapaswa kufumbua macho.

Kwenye mitandao, wakili huyo amekuwa akichapisha maandalizi yake kurejea nchini kufuatia agizo la mahakama kuu. Alitarajiwa kusafiri leo, na kutua katika Uwanja wa Kimataifa wa Ndege wa Jomo Kenyatta, JKIA, jijini Nairobi mwendo wa saa tatu na dakika ishirini na tano jioni.

Hata hivyo, Jumanne asubuhi kwenye mahojiano na kituo cha redio cha Hot96 FM kwa simu, Miguna alisema shirika la ndege la Lufthansa limemzuia kusafiri kutoka Frankfurt, Ujerumani, kwa kile anadai kama ilani kutolewa asirudi Kenya wala taifa lolote katika Bara la Afrika.

“Niko katika uwanja wa Lufthansa na wanasema idara ya usalama Kenya imenizuia kurejea Kenya. Inasema serikali ya Kenya imeagiza nirudishiwe ada ya usafiri na kwamba nisiruhusiwe kutua nchi yoyote Afrika,” akanukuliwa wakili huyo.

Aliendelea kueleza kwamba shirika hilo la ndege linasema sharti serikali ya Kenya itume ujumbe kufuta ilani iliyotolewa ili aruhusiwe kuabiri ndege.

Muda na saa ya kutoka Ujerumani

Kwa mujibu wa maelezo ya Dkt Miguna kwenye chapisho lake mitandaoni, alipaswa kuondoka Ujerumani Jumanne saa tano na dakika ishirini asubuhi na kutua JKIA saa tatu na dakika ishirini na tano jioni.

Baadhi ya Wakenya hata hivyo, wanahisi wakili Miguna Miguna alipaswa kupanga safari yake kisiri. “Jenerali ninakushauri upange mambo yako kwa siri,” anasema Abas Njuguna, na katika uo huo Nicholas Kitonga akitaka majibu kwa nini azuiwe kurudi alikozaliwa.

Abednego Malia amezua utani, ‘akishangaa’ kitakapopelekwa chakula alichoandaliwa kumkaribisha.

“Tumemuandalia mapochopocho ya mlo, tutaupeleka wapi?” akatania.

Msemaji wa serikali Kanali mstaafu Cyrus Oguna amesema Miguna yuko huru kuingia nchini, kupitia hakikisho la Rais Uhuru Kenyatta. Amesema idara ya uhamiaji itashughulikia ilani inayosemekana kutolewa.

Dkt Miguna ambaye aliwania kiti cha ugavana Nairobi 2017, ingawa hakufua dafu, alifurushwa nchini mara ya kwanza Februari 7, 2018. Juhudi zake kurejea nchini Machi 28 mwaka huo hazikufanikiwa. Ana uraia wa mataifa mawili, Kenya na Canada.

Aidha, masaibu yake yalianza alipomuapisha kiongozi wa ODM Raila Odinga kama ‘Rais wa Wananchi’. Bw Odinga kwa sasa anashirikiana na serikali ya Jubilee sako kwa bako, baada ya salamu za maridhiano Machi 2018, maarufu kama ‘Handisheki’.

Miguna aitaka Jubilee imuombe radhi mara 21!

Na VALENTINE OBARA

MWANAHARAKATI wa upinzani aliyetimuliwa nchini na Serikali ya Jubilee, Dkt Miguna Miguna sasa anataka serikali imwombe msamaha mara 21 kwa jinsi alivyofurushwa.

Kwenye kesi mpya aliyowasilisha katika Mahakama Kuu, ambapo ameshtaki maafisa 25 wa serikali, Dkt Miguna anataka mahakama iagize kwamba msamaha huo uchapishwe kwenye magazeti matatu ya kitaifa kwa siku saba mfululizo.

Vilevile, anataka serikali iagizwe kumlipa ridhaa kwa uharibifu uliofanywa nyumbani kwake alipokuwa akitafutwa.

Dkt Miguna alikuwa mmoja wa wanachama wakuu wa Muungano wa NASA waliokuwa wakaidi zaidi dhidi ya utawala wa Jubilee kabla Uchaguzi Mkuu wa 2017.

Alihusika pakubwa katika shughuli ya kumlisha kiapo Kiongozi wa Chama cha ODM, Bw Raila Odinga ndipo serikali ikadai alikuwa nchini kiharamu kwa vile ni raia wa Canada.

Maafisa wakuu wa serikali ambao ameshtaki upya wanajumuisha Waziri wa Usalama wa Ndani, Dkt Fred Matiang’i, Mwanasheria Mkuu Paul Kihara Kariuki, aliyekuwa Mkurugenzi wa Uhamiaji na Usajili wa Watu Gordon Kihalangwa, Mkurugenzi wa Idara ya Kuchunguza Uhalifu (DCI) George Kinoti na aliyekuwa Inspekta Jenerali wa Polisi Joseph Boinnet.

“Mnamo Desemba 2017, washtakiwa walishirikiana kuunda genge…lililoagizwa kufuatilia mienendo yangu kinyume cha sheria, kuchunguza nyumba yangu na kunijeruhi, kunitesa kwa nia ya kuniua,” akadai wakili huyo.

Alilalamika kwamba wakati mwingi alipokamatwa, serikali ilimchukulia kama mhalifu na kumwaibisha mbele ya umma ilhali hakuwa na hatia yoyote.

Kulingana naye, washtakiwa pia walishirikiana kukaidi maagizo ya mahakama yaliyotaka aachiliwe huru alipokamatwa mapema mwaka wa 2018, wakazidi kumfunga katika seli chafu bila mahitaji muhimu ikiwemo chakula na maji.

Mnamo Machi 26, 2018, Dkt Miguna alijaribu kurudi nchini lakini akazuiliwa katika Uwanja wa Kimataifa wa Ndege wa Jomo Kenyatta (JKIA) ambako anadai alifungiwa chooni na akakosa kuoga wala kupiga mswaki kwa siku tatu.

Miguna Miguna asimulia yaliyomkuta

Na SAMMY WAWERU

WAKILI Miguna Miguna amesema akipata pasipoti yake hatasita kurejea nchini mara moja ili kuendelea kutetea haki za wananchi.

Bw Miguna amesema kinachomzuia kuwa nchini ni kutokuwa na hati hiyo ya usafiri na kwamba hakuna anachohofia kuwepo nchini.

Alifurushwa nchini mara mbili mwaka uliopita, 2018, katika kile kilitajwa kama kutekeleza kosa la uhaini kumuapisha kiongozi wa ODM Raila Odinga kama Rais wa Wananchi, na ambaye kwa sasa anashirikiana kwa karibu na serikali ya Rais Uhuru Kenyatta.

Wakati wa matukio hayo, kizaazaa kilishuhudiwa katika uwanja wa kimataifa wa JKIA.

Kwenye mahojiano na runinga ya Citizen kipindi cha JKL Jumatano usiku, Miguna alisema ni heri afe “kifo cha hadhi wakati akitetea haki za wanyonge sawa na mashujaa waliopigania uhuru”.

“Ni heri nife kihadhi nikitetea wanyonge ili katika wasifu yangu watu wajue nilikuwa mtu wa aina gani,” alisema, katika kipindi hicho kinachoendeshwa na mtangazaji Jeff Koinange. Mahojiano hayo yalipeperushwa moja kwa moja kutoka Washington D.C., Amerika.

Katika simulizi ya masaibu aliyopitia wakati wa kukamatwa kwa wahusika wakuu kumuapisha Bw Raila Januari 30, mwanaharakati huyu alisema mawakili wake walinyimwa fursa kumuona.

“Waikwa Wanyoike ambaye ni wakili tajika kutoka Canada alikatazwa kuniona. Badala yake waliruhusu Winnie Odinga (mwanawe Raila), ambaye si wakili. Nilimlalamikia kwa nini kinara wa muungano wa Nasa hakuonekana. Raila Odinga alipokuja, nilichofanya ni kumsalimu pekee, tukaelekea katika lango la kutoka lakini lilifungwa,” akasema, akionekana kutilia shaka ziara ya kiongozi wa ODM JKIA.

Bw Miguna Miguna alilalamikia mazingira duni aliyohifadhiwa, ikiwa ni pamoja na kusafirishwa kutoka kituo kimoja cha polisi hadi kingine Kiambu.

“Waliniibia kila kitu nilichokuwa nacho, kibeti changu kilikuwa na dola 1,500 za Marekani (sawa na Sh150,000 thamani ya Kenya). Wakati nikiwa JKIA, nilitiwa katika chumba ambacho nilipoteza fahamu nikajipata Dubai nisijue mahala pa kuanzia,” alieleza.

Alisema kurejea nchini bila pasipoti ya Kenya, hataruhusiwa kuendesha shughuli zozote hasa kushiriki siasa, licha ya kuwa raia wa Kenya kwa njia ya kuzaliwa. Unapozuru taifa lolote, unapaswa kuwa na pasipoti ya kukuruhusu kuingia humo.

Mwanaharakati huyu alijitangaza jenerali wa vuguvugu la NRM ambalo liliharamishwa na Wizara ya Usalama wa Ndani.

Baada ya uchaguzi mkuu wa 2017 uliohusisha mrengo wa Jubilee ulioongozwa na Rais Uhuru Kenyatta na Nasa chini ya kinara wake Raila Odinga, mvutano ulizuka kuhusu matokeo ya urais ya Agosti 8.

Nasa ilipinga matokeo hayo, ikidai yaliborongwa na Jubilee ili isalie madarakani.

Ni kufuatia mvutano huo Nasa ilielekea katika mahakama ya juu zaidi, kilele chake kikawa matokeo kuharamishwa na tume huru ya uchaguzi na uratibu wa mipaka IEBC kuagizwa kuandaa marudio ya uchaguzi kiti cha urais, ingawa muungano huo haukushiriki.

Ghasia zilizuka haswa katika ngome za Nasa, watu kadhaa wakiripotiwa kuuawa na hata kujeruhiwa vibaya wakati maafisa wa usalama wakishika doria.

Machi 9, 2018, kiongozi wa ODM Raila Odinga na Rais Uhuru Kenyatta walifanya salamu za maridhiano maarufu kama Handisheki, ambazo zilipunguza joto la kisiasa. Bw Raila kwa sasa anashirikiana sako kwa bako na serikali kufanya maendeleo.

Wafuatiliaji habari mitandaoni nusura wamle Miguna mzimamzima

Na CHARLES WASONGA

WAKILI asiyeisha vituko Miguna Miguna alishambuliwa Ijumaa katika mitandao ya kijamii kwa kumdhalilisha Gavana wa Mombasa Hassan Joho.

Mwanasiasa huyu aliyesafirishwa kwa lazima kutoka nchini Kenya na ambaye ana uraia wa Canada alijitangaza kwamba ni kinara wa vuguvugu la National Resistance Movement (NRM).

Aliandika ujumbe wa kumdunisha Joho katika tangazo la kujulisha watazamani wa Runinga ya Citizen kwamba Gavana huyo angehojiwa katika usiku huo saa tatu.

Katika ujumbe huo kupitia akaunti ya Twitter, Bw Miguna alimpuuzilia mbali Bw Joho ambaye ni naibu kiongozi wa ODM, akimtaja kama ambaye amefeli katika majukumu yake.

“Hahaha! Inachekesha. Kutoka mume wa kijamii (community husband) hadi Gavana aliyepata alama ya D-, stori ya Wakenya wawili ambao wamepungukiwa kimawazo,” akaandika Miguna.

Kauli ya Miguna ilikawakasirisha wafuatiliaji habari mitandaoni (netizens) waliomwonya dhidi ya kumtusi Joho.

Wengine walimtaka kuelezea jinsi elimu yake ya juu imemsaidia.

Sam Kiptoo akamuuliza: “Hahaha! Joho anahudumu muhula wake wa pili akiwa gavana lakini wewe mbona PhD yako haikukusaidia kushinda ugavana katika kaunti ya Nairobi mnamo mwaka 2017?

Fredrick Otieno naye akaandika: “Umekuwa msumbufu zaidi. Tafadhali jaribu kuwaheshimu watu wengine hata kama mwatofautiana kimawazo. Nawe utaheshimiwa hata huko Canada ulikotorokea.”

Kwa upande wake Rashid Mark alisema, “Upende usipende, sharti utahitaji kushirikiana na watu kama hao ambao walipata alama za D ili uendeleze ndoto zako za kisiasa. Ukiwa na fikra kama hii, itakuwa vigumu kwa Wakenya kukupigia kura.

Hata hivyo, Bw Miguna alieleza kuwa hamchukii Joho kwani ni “ukweli kwamba alipata D- masomoni.”

2018: Habari 10 zilizovutia wasomaji katika tovuti ya Taifa Leo

NA FAUSTINE NGILA

LICHA ya mwaka wa 2018 kukumbwa na mawimbi ya sakata nyingi za ufisadi, tukio la kiongozi wa ODM kujiapisha kuwa ‘rais wa wananchi’, Dkt Miguna kufurushwa nje ya nchi na hatua ya maridhiano ya Rais Uhuru Kenyatta na Raila Odinga, Wakenya walipendekezwa na habari tofauti, kama inavyoashiriwa na orodha ifuatayo.

 

  1. Kijana aliyetoroka Al Shabaab asimulia maisha yalivyokuwa akiwa gaidi

Hii ilikuwa simulizi baada ya Taifa Leo kukutana na kijana wa miaka 29 katika kaunti ya Kwale aliyerudi nchini 2015 baada ya kuchoshwa na kuwa mtumwa wa Al Shabaab.

Alialikwa na binamu yake mjini Lamu kwa ahadi kuwa angepata kazi nzuri. Aliishi kwa kwake kwa miezi mitatu kisha akamtambulisha kwa vijana wengine watatu kisha wakapewa Sh10,000 kila mmoja. Aliwahadaa wakaingia gari la kibinafsi wapelekwe mahala ambapo wangeanza kufanya kazi ya mshahara wa Sh40,000 kwa mwezi.

Lakini walijipata kwenye kambi iliyokuwa na vijana wapatao 200. Hapo ndipo alipong’amua kuwa alikuwa ndani ya kambi ya Al Shabaab nchini Somalia. Humo kambini walianza kupokea mafunzo ya kijeshi ambayo yalikuwa yachukue miaka miwili. Baadaye wangetumwa uwanja wa vita kupigana.

Mafunzo yalikuwa makali sana. Tulikuwa wakiamka saa kumi alfajiri ambapo walishiriki mafunzo na mazoezi hadi saa kumi na moja jioni.

Mafunzo yalihusisha jinsi ya kutumia silaha tofauti kama bunduki, gurunedi miongoni mwa nyingine. Pia walibebeshwa magunia mazito yaliyojaa mchanga. Ilikuwa ni lazima ushiriki mafunzo upende usipende.

Aligombana na kamanda na akapanga na Mkenya mwingine jinsi wangehepa. Walitoroka usiku wakiogopa kuuawa na wenzao wa Al Shabaab.

Baada ya kutembea kwa siku mbili msituni walipatana na mzee ambaye aliwasaidia kufika Mandera. Kisha waliingia lori lililotupeleka Garissa.

Simulizi hii ilivutia wasomaji wengi zaidi kwa kuwa walitaka kuelewa kuhusu mafunzo ya Al Shabaab na jinsi walifika Kenya.

 

  1. Kioja demu kuangua kilio baada ya bosi wake kukataa kumbusu

Hii ilikuwa mojawapo ya habari za ucheshi zinazochapishwa kwenye sehemu ya Dondoo kwenye gazeti.

Kioja hicho kilitokea mjini Kiambere ambapo ‘slay queen’ mmoja alishangaza wapangaji alipoanza kulia akimlaumu mdosi wake kwa kumnyima busu.

Kitendo hicho kiliwafanya wafanyakazi wenzake kubaini kwamba demu huyo alikuwa na uhusiano wa mapenzi na mdosi ambaye ana mke na watoto.

Yasemekana uhusiano huo ulikuwa umeanza kuingia baridi na demu akamwendea mdosi na kumtaka ambusu.

Wasomaji wa tovuti yetu mwaka uliopita walikita kambi kwa habari za Dondoo huku sehemu hiyo ikiibuka nambari tatu kwa vitengo vya habari vilivyosomwa zaidi.

 

  1. Zambia kuwasukuma jela watakaonaswa wakiwa na ‘Samantha’

Habari hii ilivutia hisia za wasomaji wakati ambao vinyago vya visura vilikuwa vinaundwa kwa wingi duniani na hata kufika Kenya na Zambia.

Lakini serikali ya Zambia ikaanzisha msako mkali dhidi ya madoli hayo ya mahaba na kuonya kuwa watakaopatikana nayo wangeadhibiwa kwa kusukumwa gerezani.

Hatua hiyo ilipelekea suala la madoli ya mahaba kugongwa vichwa vya habari kwa mwezi mzima wa Februari na kuibua mjadala mkali kwenye mitandao ya kijamii.

Wasomaji walishangaa ni vipi mwanamume mwenye akili zake timamu atanunua kinyago badala ya kusaka urafiki na msichana binadamu.

 

  1. Riba ya ‘Okoa Jahazi’ ya Safaricom ni haramu, wananchi waambia mahakama

Wakenya wengi husukumwa na makali ya gharama ya juu ya maisha kuchukua mkopo wa muda wa maongezi kutoka kwa kampuni ya Safaricom.

Hiyo ilichochea Wakenya wawili kuishataki Safaricom kuhusiana na huduma yake ya ‘Okoa Jahazi’ ambayo walisema hutozwa riba waliyodai ni haramu.

Ashford Koome na Eric Kithinji walidai kuwa kampuni hiyo haijapewa leseni ya kutoa huduma za benki, hivyo, riba wanayotoza huduma hiyo ilikuwa haramu.

Hata hivyo, kwa kujitetea, kampuni hiyo ilisema hiyo ni ada na sio riba kama walivyodai, kwa kuwa imeidhinishwa na Mamlaka ya Mawasiliano nchini (CA).

 

  1. Miguna Miguna: Raila ndiye aliniambia Jubilee ilimpa Magaya Sh30 milioni

WAKILI mbishi Miguna Miguna aliedai kwamba kinara wa ODM, Raila Odinga, alimweleza binafsi kwamba Bw Norman Magaya, alipokea Sh30 milioni kutoka kwa chama cha Jubilee.

Akihojiwa na kituo cha runinga cha TRT World jijini Toronto, Canada, Bw Miguna alikanusha madai kwamba alikuwa anampiga vita Bw Odinga.

“Ni kweli Bw Magaya alipokea Sh30 milioni kutoka kwa Jubilee ndipo aondoe kesi ya kupinga ushindi wa gavana wa Nairobi. Raila Odinga mwenyewe alinifahamisha hayo,” alidai Bw Miguna.

 

  1. Tutajiapisha kama Raila Odinga, upinzani nchini Venezuela wasema

Wanasiasa wa upinzani nchini Venezuela walitangaza kuwa wangemuiga Bw Raila Odinga kwa kuapisha mwaniaji wao ikiwa Rais Nicolas Maduro angeiba kura katika uchaguzi wa mwaka uliopita.

Mwanaharakati wa kisiasa wa upinzani David Smolansky alisema kuwa Bw Odinga alikuwa kielelezo kwao kwa kujiapisha kuwa ‘rais wa wananchi’ baada ya kuwepo kwa udanganyifu wa kura.

Bw Smolansky aliyekuwa akizungumza katika mahojiano na kipindi cha HARDtalk katika runinga ya BBC, alisema Upinzani pia ungesusia uchaguzi uliopangwa kufanyika Aprili 22, 2018.

 

  1. BI TAIFA JULAI 28, 2018

Wasomaji wetu pia hupendezwa na ukurasa wa tatu wa gazeti ambapo picha za wasichana warembo kutoka maeneo tofauti ya nchi huchapishwa. Wasomaji walipendezwa na picha za Bi Taifa kwa jina Cecilia Rioba aliyekuwa na miaka 25 mwaka 2018.

 

  1. BOBI WINE: Shinikizo kwa Museveni aachilie huru msanii zazidi

Wasomaji pia walitazama video ya maandamano yaliyofanyika Nairobi, huku Wakenya wakimshinikiza Rais Yoweri Museveni wa Uganda amwachilie huru Bobi Wine. Ilishangaza maandamano haya kufanyika Kenya maanake Bobi Wine si Mkenya.

 

  1. Kwaheri Volkswagen Beatle

Wapenzi wa magari ya Volkwagen walishtuka baada ya kampuni hiyo kutangaza kukomesha utengenezaji wa gari aina ya Beatle ambalo lilipata umaarufu ulimwenguni miaka ya zamani, na kusema itakuwa ikiunda magari ya kielektroniki.

 

  1. Waziri Echesa ashauriwa arudi shuleni kunoa maarifa

Waziri wa Michezo na Turathi Bw Rashid Echesa Muhamed alishauriwa kutumia nafasi yake ya uwaziri kurejea shule kujiendeleza kimasomo.

Lakini kiongozi wa wengi Aden Duale alisema uhitimu wa kimasomo siyo hitaji kuu kuliko uwezo wa mtu kutekeleza majukumu ya uwaziri.

“Kazi ya uwaziri haina uhusiano wowote na shahada za digrii au chuo kikuu ambacho mtu alisomea bali uwezo wake wa kutekeleza majukumu aliyopewa,” akasema Bw Duale.

Mahakama yaagiza Matiang’i na Kihalangwa wamlipe Miguna Sh7 milioni

Na RICHARD MUNGUTI

MWANASHERIA mbishi Dkt Miguna Miguna aliyefurushwa kutoka humu nchini Mnamo Machi 29, 2018 atalipwa fidia ya Sh7 milioni.

Mahakama Kuu iliwaamuru Waziri wa Usalama wa Ndani Dkt Fred Matiang’i na Mkurugenzi wa Idara ya Uhamiaji Meja Jenerali (mstaafu) Dkt Gordon Kihalangwa wamlipe Dkt Miguna fidia hiyo wenyewe na kwa kutumia pesa za walipa ushuru.

Jaji Enoch Chacha Mwita alisema Dkt Matiang’i na Dkt Kihalangwa walikaidi maagizo ya mahakama ya kutomtimua Dkt Miguna humu nchini.

Jaji Mwita alisema Dkt Miguna ni raia wa Kenya na pasipoti aliyonayo ya nchi ya Canada “haimfanyi kuwa raia wa kigeni.”

Jaji huyo alisema maafisa hao wawili wa serikali walikaidi kifungu nambari 6 cha katiba kinachoeleza kuwa mtumishi wa umma hapasi kujihusisha katika hali itakayoletea fedheha wananchi na pia serikali.

“Fidia hii italipwa na watumishi hawa wawili wakuu wa Serikali waliokandamiza haki za mlalamishi (Miguna),” aliamuru Jaji Mwita , akiongeza, “Kamwe kodi ya umma isitumike kugharamia makosa ya wakuu hawa.”

Na punde tu baada ya mahakama kutoa agizo hilo Dkt Miguna alituma ujumbe katika mtandao wa Twitter na kusema , “Jaji Chacha Mwita amesisitiza kile nimesema kila wakati kwamba maafisa hao wawili walikandamiza haki zangu na kunivunjia heshima. Mimi ni Mkenya na sijawahi  kupokonywa uraia wangu. Ahsante Dkt John Khaminwa.”

Mawakili Cliff Ombeta (kushoto) na Nelson Havi (kulia) waliomtetea Dkt Miguna Miguna. Picha/ Richard Munguti

Aliendelea kusema ,“Haki ya mwananchi ya kuzaliwa kamwe hawezi kupokonywa. Nawapongeza Wakenya wachache walio waaminifu na pia mawakili Dkt John Khaminwa , Waikwa Wanyoike, Stephen Ongaro na wakili wa tume ya kitaifa ya kutetea haki za binadamu -KHRC- Kamanda Mucheke pamoja na wote waliosimama nami wakati wa dhiki na tabu zangu. Nitarudi hivi karibuni. Mapambano yataendelea.”

Dkt Miguna alikamatwa na kupelekwa katika mahakama ya Kajiado kufunguliwa mashtaka kwa kumwapisha kinara wa muungano wa Nasa Raila Odinga kuwa “rais wa wananchi.”

Dkt Miguna pamoja na wakili Thomas Kajwang waliandaa taarifa ya kiapo cha Bw Odinga ambaye sasa ni ameteuliwa kusimamia Miundo Msingi barani Afrika.

Wawili hao walimwapisha Bw Odinga katika bustani ya Uhuru Park jijini Nairobi na kuhudhuriwa na mamilioni ya wafuasi wa Nasa.

Polisi walivamia makazi ya Dkt Miguna mtaani Runda jijini Nairobi na kumpeleka mahakamani Kajiado na kutoka hapo wakampeleka usiku uwanja wa ndege wa Jomo Kenyatta (JKIA) ambapo walimlazimisha kuabiri ndege ya kwenda Dubai na kutoka hapo akasafirishwa hadi Canada anakoishi.

Polisi walikuwa wamemzuilia Dkt Miguna ndani ya seli ndogo katika uwanja wa JKIA.

“Kufurushwa kwa Dkt Miguna kulitekelezwa kinyume cha katiba na maagizo ya mahakama.Haki zake pia zilikandamizwa.” Jaji Mwita.

Akitoa uamuzi wake Jaji Mwita alisema mlalamishi alithibitisha kwamba haki zake zilikandamizwa na Dkt Matiang’i na Dkt Kihalangwa walipoamuru avurushwe hadi Canada wakidai sio raia wa Kenya.

Wakili Aaron Ndubi (kulia anayesimama) akitoa ushahidi katika kesi ya Dkt Miguna. Picha/ Richard Munguti

Mawakili James Orengo, Dkt Khaminwa, Nelson Havi , Jackson Awele , Daniel Maanzo na Otiende Amolo walimshtaki Mwanasheria Mkuu (AG), Dkt Matiang’I, Dkt Kihalangwa, Inspekta Jenerali wa Polisi, Mkurugenzi wa Mashtaka ya Umma (DPP) na Mkurugenzi wa Uchunguzi wa Jinai (DCI).

Akisafirishwa kwa nguvu , Jaji Luka Kimaru alikuwa ameamuru Dkt Miguna afike kortini kujitetea dhidi ya madai alikaidi sheria kumwapisha Bw Odinga.

Wakili hiyo alimwapisha Bw Odinga kwa kushindwa uchaguzi mkuu wa 2018 akiwa na naibu wake Kalonzo Musyoka.

Jaji Mkuu David Maraga na majaji wengine sita wa Mahakama ya Juu walikuwa wamebatilisha uamuzi wa mwenyekiti wa tume huru ya uchaguzi na mipaka (IEBC) Wafula Chebukati kumtangaza Rais Uhuru Kenyatta kuwa mshindi wa uchaguzi huo wa 2017.

Mahakama iliamuru uchaguzi wa urais urudiwe tena Oktoba 2017 lakini Bw Odinga akakataa kushiriki jambo lililopelekea ghasia kutamalaki maeneo mengi nchini Kenya.

Kaunti tano hazikushiriki katika uchaguzi huo wa urais peke yake. Mamia ya wakazi wa kaunti hizi waliuawa na polisi.

Bw Miguna kupitia vuguvugu la National Resistance Movement (NRM) walipanga maandamano yaliyopelekea kuapishwa kwa Bw Odinga kuwa rais wa wananchi.

Mahakama ilisema Dkt Miguna hakupasa kufurusha na kuamuru alipwe fidia ya Sh7milioni na Sh200,000 gharama ya kesi.

Agizo hili kwamba Matiang’i na Kihalangwa walipe fidia hiyo inaamaanisha hawapasi sasa kuhudumu katika nyadhifa za umma.

Nitaunga mkono muafaka UhuRuto wakiomba radhi kwa kuiba kura – Miguna

Na BENSON MATHEKA

WAKILI mbishi Dkt Miguna Miguna ameapa kuwa hawezi kukubali muafaka wowote na viongozi wa serikali ya Kenya hadi wakubali kuwa waliiba kura kwenye uchaguzi mkuu wa 2017.

Dkt Miguna, aliyefurushwa Kenya kwa madai ya kukosa stakabadhi halali za uraia, alisema kwamba hawezi kuunga wito wa upatanishi nchini iwapo Rais Uhuru Kenyatta na Naibu Wake William Ruto hawatakiri hadharani kwamba waliiba kura na kuomba msamaha.

Wakili huyo anaonekana kuwa mtu wa pekee anayezungumzia suala la haki katika uchaguzi baada ya muafaka wa kiongozi wa upinzani Raila Odinga na Rais Uhuru Kenyatta.

“Siku ambayo @UKenyatta na @WilliamsRuto wataomba msamaha hadharani kwa kuiba kura, kukubali uchunguzi huru wa sava za @IEBCKenyandiyo nitaunga juhudi zao,” Bw Miguna anayeishi Canada aliandika kwenye Twitter.

Wakili huyo alikataa wito wa serikali wa kuhalalisha uraia wake Kenya akisema hakuukana alipopata uraia wa Canada.

Amekuwa akisisitiza kuwa yeye ni raia wa kuzaliwa nchini Kenya na kwamba serikali imekuwa ikikadamiza haki zake.

Alijipata matatani baada ya kuongoza hafla ya kumuapisha Raila Odinga kuwa “rais wa wananchi” mnamo Januari 30 katika bustani Uhuru Park.

Raila alipatana na Rais Kenyatta na wakazika tofauti zao na kuanza juhudi za kuunganisha Wakenya.

Bw Miguna amekuwa akipinga muafaka huo akidai Raila alilipwa na Rais Kenyatta ili kuacha kupinga serikali yake na kutetea Wakenya.

“ Msikubali kupotoshwa kwa zoezi la uhusiano mwema. Enezeni ukweli. Hakuna kiwango cha propaganda kitazuia mageuzi. Msiogope kueneza ukweli. Sambaratisheni uongo unaoenezwa,” aliandika Bw Miguna

Mwezi jana, alitangaza kuwa angerejea nchini baada ya Septemba 24 licha ya kukataa kutuma maombi ya kuhalalisha uraia wake Kenya.

Nitawapa ‘Miguna’ mwingine, Sonko aonya wanaompa shinikizo

Na PETER MBURU

GAVANA wa Nairobi Mike Mbuvi Sonko ametahadharisha wanaomsukuma kuteua naibu wake, akiwataka kutompa ‘presha’ la sivyo ateue ‘Miguna mwingine’.

Gavana Sonko, ambaye miezi michache iliyopita alimteua wakili mtatanishi Miguna Miguna kuwa naibu wake wakati Bw Miguna akiwa Canada baada ya kutimuliwa humu nchini, sasa amesema akizidi kusukumwa, atafanya uteuzi mwingine wa aina hiyo ili apate muda zaidi wa kufikiria.

Akizungumza katika hafla ya kuadhimisha miaka mitatu tangu kufariki kwa babake, gavana huyo alisema kwamba anafaa kupewa muda kushauriana na chama cha Jubilee kabla ya kufanya uamuzi mwingine usio na msingi.

“Mimi nilichagua naibu wa gavana miezi michache iliyopita, jina likaenda katika bunge la kaunti na kutupiliwa mbali, sasa ningependa mnipe muda wa kutafuta ushauri kwani sitaki kuleta mtu hapa anisumbue,” akasema Gavana Sonko mnamo siku ya Alhamisi.

Gavana huyo alisema kwamba anahitaji muda kushauriana na Rais Uhuru Kenyatta pamoja na maafisa wa Jubilee kabla ya kufanya uamuzi.

Alikosoa wanaomharakisha kuteua naibu wake kuwa hataki kusumbuliwa kwa sasa, ama wakizidi awape dawa yao ndipo apate muda zaidi.

“Kwa sababu mimi ni mtu wa Jubilee nashauriana na chama na Rais. Saa hivi hakuna ‘presha’, ule wakati walinipa ‘presha’ niliwapatia Miguna. Mimi sitaki kupewa presha kwa sababu nikipewa presha nitawaletea Miguna mwingine mmuangushe kwa hivyo tutangoja Rais arudi tushauriane,” akasema Sonko.

Mwezi mmoja uliopita, Gavana Sonko alichapisha majina manne ya wanawake kwenye ukurasa wake wa Facebook akisema ndio alioafikia kuwa bora na kuongeza kuwa alikuwa amewasilisha majina yao kwa chama cha Jubilee.

Hata hivyo, bunge la kaunti lilipuuzilia mbali hatua yake likisema alikuwa akifanya hila ili kupata muda zaidi, badala ya kuwasilisha jina la mteuliwa kukaguliwa.

Hata hivyo, katika hafla hiyo ya Alhamisi, Sonko aliandamana na msaidizi wa Kenyatta Jomo Gecaga ambaye alidokeza kuwa huenda akamteua.

“Hata yeye ningependa awe naibu wa gavana lakini bado tunashauriana,” akasema Gavana Sonko alipokuwa akimjulisha kwa wageni.

Nitarudi Kenya Septemba 4, mpende msipende – Miguna

Na BENSON MATHEKA

WAKILI mbishi Dkt Miguna Miguna aliyefurusha nchini mara mbili baada ya kuongoza hafla ya kumuapisha Raila Odinga kuwa “rais wa wananchi”, amesema kwamba atarejea nchini baada ya Septemba 4, 2018.

Kupitia ujumbe wa Twitter Alhamisi, Dkt Miguna anayeishi Canada, alitangaza kuwa hakuna kitakachomzuia kurejea Kenya licha ya serikali kumpokonya paspoti yake ya Kenya na kuiharibu.

“Nitarudi baada ya Septemba 4, shime,” aliandika kwenye Twitter.

Hili litakuwa jaribio la tatu la wakili huyo kurudi Kenya tangu Februari alipotimuliwa Kenya mara ya kwanza.

Mnamo Machi 16, Dkt Miguna alitangaza kuwa angerejea Kenya lakini hakufanya hivyo.

Alifurushwa Kenya Februari 6 siku sita baada ya kumuapisha Bw Odinga katika bustani ya Uhuru Park. Serikali ilidai kuwa alipoteza uraia wake wa Kenya na kwamba alikuwa nchini kinyume cha sheria.

Wakili huyo amekuwa akishikilia kuwa hajawahi kukana uraia wake wa Kenya, nchi aliyozaliwa na kwamba serikali ilikiuka agizo la mahakama kwamba arejeshewe paspoti yake na kuruhusiwa kuingia nchini.

Waziri wa usalama Fred Matiang’i alisema Miguna ambaye ana uraia wa Canada anapaswa kuomba upya uraia wake ili apate paspoti ya Kenya na kuruhisiwa kuingia Kenya.

Kulingana na serikali, Bw Miguna alipata paspoti iliyotwaliwa kinyume cha sheria.

Wakili Miguna amekataa kujaza fomu kuomba uraia wa Kenya akisema mtu hawezi kupoteza uraia wake wa kuzaliwa.

Amekuwa akikosoa muafaka kati ya Rais Kenyatta na Rais Kenyatta anaotaja kama usioweza kutatua shida zinazowatatiza Wakenya.

Kupitia jumbe za Twitter, Miguna amekuwa akidai kwamba Bw Odinga aliwasaliti wafuasi wake kwa kukubali kushirikiana na serikali.

Bw Odinga amenukuliwa akisema kwamba wakili huyo ni mtu asiyeweza kusaidiwa kwa sababu ya msimamo wake mkali.

Kwenye ujumbe wa kutangaza kurejea nchini mwezi ujao, Miguna alimlaumu Raila na Rais Kenyatta kwa masaibu yake.

“Mliharibu paspoti yangu ya Kenya na nyumba yangu, mkanikamata na kunitesa kabla ya kunifurusha, mnaweza kuandika haya kwa wino usiofutika: Nitarejea baada ya Septemba 4,” alisema.

Miguna kujulikana kama atateuliwa naibu gavana wiki hii

Na VALENTINE OBARA

HATIMA ya uteuzi wa mwanaharakati wa upinzani Miguna Miguna kuwa naibu gavana wa Kaunti ya Nairobi inatarajiwa kujulikana wiki hii wakati mswada kuhusu uteuzi huo utawasilishwa kwa bunge la kaunti.

Spika wa bunge hilo, Bi Beatrice Elachi, Jumatatu alisema uteuzi huo uliofanywa na Gavana Mike Sonko utashughulikiwa inavyohitajika kisheria hata kama Dkt Miguna hayuko nchini.

“Tutawasilisha mswada wa uteuzi huo katika bunge la kaunti juma hili. Singependa kuzungumzia suala hili kwa mapana kwa sababu ni suala linalohitajika kujadiliwa mbele ya bunge la kaunti,” akasema Bi Elachi jana alipohojiwa kwenye runinga ya Citizen.

Dkt Miguna, ambaye alidai hakufahamishwa rasmi kuhusu uteuzi wake lakini hajafafanua kama atakubali uteuzi huo au la, alitimuliwa nchini na serikali kwa madai kwamba si raia wa Kenya baada ya kumwapisha Kiongozi wa upinzani Raila Odinga kuwa ‘rais wa wananchi’.

Uteuzi wake kuwa naibu gavana wa jiji kuu la Kenya mwezi uliopita uliibua utata hasa katika Chama cha Jubilee kwani viongozi wengi wa chama hicho walilalamika kuwa lazima naibu gavana awe ni mwanachama wa Jubilee na akubalike kwa wanachama na kwa viongozi wakuu wa chama.

Hata hivyo, baadaye viongozi mbalimbali chamani hasa madiwani walisema gavana huyo ana haki kumteua mtu yeyote anayetaka kuwa naibu wake kwani ameruhusiwa kisheria.

Bw Sonko alitetea hatua yake na kusema anaamini Dkt Miguna ndiye ana uwezo wa kukabiliana na matapeli anaodai wanamhangaisha anapojaribu kufanya mabadiliko ya kuboresha jiji.

Bi Elachi jana alisema mwelekeo halisi kuhusu hatua zitakazochukuliwa kwa uteuzi huo utabainika wiki hii.

“Wakati uteuzi utakapowasilishwa kwa bunge la kaunti wiki hii, mswada utaendelea mbele kama inavyohitajika katika sheria za bungeni,” akasema.

Nilimteua Miguna kuzima presha – Sonko

Na LEONARD ONYANGO

GAVANA wa Nairobi, Mike Sonko amesema uamuzi wake wa kumteua wakili mbishi Miguna Miguna kuwa naibu wake ulichochewa na presha ambayo amekuwa nayo kutoka kwa baadhi ya maafisa wa juu katika serikali kuu.

Gavana Sonko, aliyekuwa akizungumza kwa mara ya kwanza mara baada ya kurejea jijini Nairobi kutoka nyumbani kwake katika Kaunti ya Machakos, alikoenda kutokana na kisingizio kwamba maisha yake yalikuwa hatarini, alisema viongozi wa ngazi za juu serikalini walikuwa wakimshinikiza kuteua wandani wao kuwa naibu wake.

“Nimesumbuliwa na makatibu wa wizara, mawaziri na watu wafisadi serikalini. Kila mtu alikuja na mtu wake akiniambia Sonko chagua huyu, katibu wa wizara anakwambia chagua huyu naye waziri anakwambia chagua huyu, ilhali rais mwenyewe hajasema kitu,” akasema Bw Sonko aliyekuwa akizungumza katika kanisa la African Independent Pentecostal Church (AIPCA) katika eneo la Njiru, eneobunge la Kasarani.

Gavana Sonko alisema alimteua Dkt Miguna ili kunyamazisha baadhi ya maafisa wa ngazi ya juu serikalini.

“Mimi nilipoona wakinisumbua nilisema potelea mbali! Wacha Miguna ambaye alinitukana aje awe naibu wangu anisaidie kupigana na hao watu katika Jumba la Harambee,” akaongeza.

“Nilijua hiyo ndiyo dawa ya kuwaweza hao maafisa walio katika Jumba la Harambee kwa sababu wao ndio walimpa Dkt Miguna paspoti na kitambulisho cha kitaifa na hata wakamuidhinisha kuwania ugavana katika uchaguzi wa Agosti 8 mwaka 2017,” akaongezea.

Gavana Sonko, aliyekuwa ameandamana na baadhi ya madiwani na mawaziri wake, alisema uamuzi wa kuidhinisha au kukataa jina la Dkt Miguna uko mikononi mwa Bunge la Kaunti ya Nairobi.

Baadhi ya viongozi wa Jubilee wakiongozwa na naibu mwenyekiti David Murathe wamekuwa wakishinikiza kutimuliwa kwa Bw Sonko kutokana na kigezo kwamba ameshindwa kutekeleza majukumu yake.

Lakini Jumapili, gavana huyo aliwashambulia wanaoshinikiza atimuliwe akisema madiwani wana imani na uongozi wake.

Kwa wiki moja Bw Sonko amekuwa akiendeshea shughuli za serikali ya Kaunti ya Nairobi nyumbani kwake katika eneo la Mua Hills, Kaunti ya Machakos akidai kwamba maisha yake yako hatarini baada ya kupunguziwa walinzi hadi watano.

Alisema kuwa kiongozi wa ODM Raila Odinga ni miongoni mwa viongozi ambao walimpigia simu wakimtia moyo wa kuendelea kuhudumu bila uwoga.

“Napenda kumshukuru aliyekuwa Waziri Mkuu Bw Odinga kwa kunipigia simu akiniambia kuwa niwe imara na wala nisibababaike,” akasema Gavana Sonko.

Miguna amrushia Raila makombora makali zaidi

Na WAANDISHI WETU

WAKILI Miguna Miguna Jumatatu aliendeleza mashambulizi yake dhidi ya kiongozi wa ODM, Raila Odinga akimtaja kama “mnafiki” ambaye amemezwa na utawala wa Jubilee.

Bw Miguna alitaja kuwa kinaya kwa Bw Odinga kujitakasa mbele ya Wakenya, ilhali ndiye kiini kikuu cha masaibu yanayomkumba kuhusu paspoti yake.

Kwenye ujumbe alioweka mtandaoni kutoka Canada jana, Bw Miguna alisema amemfanyia kazi Bw Odinga kwa muda mrefu na hivyo anafahamu bayana kwamba ana uraia halisi wa Kenya.

“Nimemfanyia kazi Bw Odinga kwa kushikilia nyadhifa mbalimbali tangu niliporejea Kenya. Ningefanya haya bila Bw Odinga kufahamu kwamba mimi si raia wa Kenya?” akashangaa Bw Miguna.

Wakili huyo alionyesha kukasisirishwa na msimamo wa Bw Odinga kuhusu suala lake la kurejeshewa paspoti yake ya Kenya akimtaja kigogo huyo wa upinzani kama asiye na msimamo imara.

“Wakati Raila alipoenda kortini kulalamikia matokeo ya uchaguzi mkuu wa 2017, alisisitiza kila mtu aheshimu uamuzi wa mahakama. Imekuwaje sasa Raila huyo huyo hataki maafisa wa serikali kuheshimu maagizo 13 ya mahakama kuhusu suala la paspoti yangu,” alishangaa Bw Miguna.

Wakili huyo amekuwa akimshambulia Bw Odinga kwa siku kadhaa sasa kufuatia matamshi ya kiongozi wa ODM kuwa wakili huyo aliyemwapisha kuwa “rais wa wananchi” mnamo Januari 31 anafaa tu kujaza fomu ya kuomba uraia wa Kenya.

Hapo Jumatatu, Bw Miguna, ambaye wiki jana aliteuliwa na Gavana Mike Sonko wa Nairobi kuwa naibu wake, alisisitiza yeye ni raia wa Kenya kikatiba na akashangaa ilikuwaje akaanza kuambiwa si Mkenya licha ya kukubaliwa kupiga kura tangu 2002: “Nilipiga kura 2002, 2007 na 2017. Pia niligombea ugavana wa Nairobi.

Nilipewa vyeti na idara husika kabla ya kuwania ugavana. Pia nimekuwa nikilipa ushuru kama Mkenya. Sina rekodi yoyote ya uhalifu tangu nizaliwe.”

 

Raila alitumia paspoti za Uganda na TZ

Aliendelea: “Raila alipotoroka Kenya alitumia paspoti ya Uganda. Alipoenda Ujerumani Mashariki alitumia ya Tanzania. Kwani mimi si binadamu kama wengine?”

“Sijatoka familia kubwa. Huenda sikurithi chochote. Lakini nina akili timamu na sitakubali yeyote kuninyima haki zangu za kibinadamu na nitaendelea kutetea utawala wa haki,” akasema.

Alidai kuwa nia ya kumtaka kuomba upya uraia wa Kenya ni kumzuia kugombea cheo kikubwa 2022 kwa sababu Katiba inataka mgombeaji awe na uraia wa Kenya kwa miaka 10 au zaidi, ambayo hatakuwa amefikisha akipewa uraia sasa.

Wakati huo huo, Mwenyekiti wa chama cha Wiper, ambaye pia ni Gavana wa Makueni, Kivutha Kibwana, amesema mwafaka kati ya Rais Uhuru Kenyatta na kiongozi wa ODM Raila Odinga hautafaidi upinzani bali Bw Odinga peke yake.

Bw Kibwana pia amemshauri kinara wa Wiper, Kalonzo Musyoka kusahau mkataba aliofanya na Bw Odinga 2017.

“Tungependa kumuuliza Bw Kalonzo kwamba kuanzia sasa, asiwe na yeyote wa kushauriana kwa niaba yake. Kusalimiana kunaweza tu kuwa kati ya watu wawili.

Kusalimiana kwa Raila ni kwake yeye tu. Nasema haya nikiwa na heshima kubwa kwa Raila. Lakini sasa Kalonzo lazima aunde mwelekeo wake wa kisiasa baada ya 2017,” Prof Kibwana alisema.

 

Muungano bila Raila 

Katika taarifa yake ambapo anatazama hali ya kisiasa nchini siku zijazo kufuatia mkataba baina ya Rais Kenyatta na Bw Odinga, Profesa Kibwana anasema kuwa upinzani unastahili kuungana na kuwa dhabiti hata bila Bw Odinga.

Raila alijitenga na vinara wenza katika muungano wa NASA na kuzungumza na Rais Kenyatta ambapo waliafikiana kushirikiana.

Lakini Bw Odinga amekuwa akidai NASA ingali imara japo wadadisi wanasema muungano huo ulisambaratika.

Profesa Kibwana ambaye alisaidia kuunda mkataba kati ya Bw Musyoka na Bw Odinga kabla ya uchaguzi mkuu wa mwaka jana, alitoa maoni yake kuhusiana na hatima ya muungano wa upinzani hasa kufuatia uhusiano wa Bw Odinga na chama tawala cha Jubilee.

Iliaminika kuwa sehemu ya mkataba, ambao pia ulishuhudiwa na msomi Profesa Makau Mutua, Bw Odinga anafaa kuunga mkono azima ya Bw Kalonzo ya kuwania urais 2022.

“Tunashukuru kuwa salamu za kwanza zilibadilisha mazingira ya kisiasa ya Kenya. Kilikuwa kitendo cha ujasiri na uzalendo. Lakini maoni yangu ni kuwa Bw Kalonzo, Mudavadi na Wetang’ula lazima waunde maisha yao wenyewe ya kisiasa bila kuhusisha yaliyojiri 2017. Kipindi hicho sasa kimefungwa,” alisema Bw Kibwana.

Kulingana na gavana huyo, Bw Musyoka lazima afanye miungano na makundi mengine ya wapigaji kura nchini na kuanzisha mazungumzo na Rais Kenyatta, Naibu Rais William Ruto na viongozi wengine wote wa kitaifa.”

“Wacha afanye salamu na hata kuzua ‘misukosuko ya moyo’ ambayo itatufaidi sisi na Kenya,” alisema Bw Kibwana.

Aliongeza: “Ni uamuzi wa Mhe Raila Odinga kuamua wakati ukifika ikiwa atalipa deni lake la kisiasa kwa wenzake wa NASA 2017. Lau sivyo, lazima tuwe tayari kupata ushindi bila kuhisi vibaya.”

Wiki mbili zilizopita Wiper kilimpatia Bw Musyoka idhini ya kuzungumza na vyama vingine kwa lengo la kuungana kabla ya uchaguzi mkuu wa 2022.

Bw Musyoka amekuwa akisema kwamba atakutana na viongozi tofauti kwa lengo la kuunganisha Wakenya.

Ripoti ya WANDERI KAMAU, PIUS MAUNDU Na BENSON MATHEKA

 

Raila alifika JKIA akiwa mlevi chakari – Miguna Miguna

Na CHARLES WASONGA

MWANAHARAKATI wa upinzani Miguna Miguna ameanzisha vita vya maneno dhidi ya mlezi wake kisiasa Raila Odinga, kwa kumtelekeza wakati alihitaji usaidizi wake hali iliyochangia kufurushwa kutoka nchini.

Dkt Miguna pia alimkejeli Bw Odinga kwa kujifanya kuwa mzalendo ilhali ni dikteta mkubwa.

“Anaongea kana kwamba alizuiliwa pamoja nami ilhali alifika katika Uwanja wa Ndege wa Kimataifa wa Jomo Kenyatta (JKIA) akiwa mlevi chakari. Alishindwa kuongea… isitoshe hangesimama kwa miguu yake miwili,” akaongeza.

Bw Odinga hakujibu madai hayo, kutokana na ushauri kutoka kwa mkurugenzi wake mawasiliano wa chama cha ODM Philip Etale.

Bw Etale alimshauri kutomjibu Bw Miguna “kwa sababu sio mtu wa tabaka lako, kisiasa.”

Bw Miguna alisema Wakenya wengi ambao waliunga mkono mageuzi katika mfumo wa uchaguzi na haki bado wanauliza ni kwa nini aliachana na kampeni za mageuzi na kuungana na serikali.

“Maridhiano ambayo Raila anatetea akiwa pamoja na Uhuru Kenyatta inakwenda kinyume cha kampeni za kutetea haki katika uchaguzi, haki ya kijamii, heshima kwa katiba na uhuru wa idara ya mahakama,” akaongeza.

Kulingana na Bi Miguna, mpango wa Raila wa kujenga madaraja kwa ushirikiano na Serikali ya Jubilee hauwezi kusuluhisha changamoto zinazoikabili taifa hili.

“Hatuwaogopi Raila na Kenyatta…. tutakabiliana na hulka ya kudharau sheria bila woga wowote,” akasema.

“Huu mpango wa maridhiano utafeli kwa sababu ni njama ya watu wawili kuwahadaa Wakenya ili wasahau makosa ambayo waliwafanyia. Hawa sio viongozi wenye maoni na Wakenya wenye nia njema wanafaa kuwakataa,” akafoka.

Shambulio la Miguna dhidi ya Raila lilijiri saa chache baada ya kiongozi huyo wa upinzani kudai kuwa masaibu yaliyompata mwanaharakati huyo yalitokana na hali kwamba alikataa kushirikiana na maafisa wa Idara ya Uhamiaji katika JKIA.

Bw Odinga alisema hayo Jumamosi alipotoa mhadhara katika Chuo Kikuu cha Cambridge, nchini Uingereza.

MZAHA WA SONKO: Miguna akataa uteuzi

Na WAANDISHI WETU

GAVANA wa Nairobi Mike Sonko, alionekana kuwachezea shere wakazi wa Nairobi na taifa kwa jumla alipotangaza Jumatano usiku kuwa amemteua wakili mbishi Dkt Miguna Miguna kuwa naibu wake.

Hii ni kwa sababu alipotoa tangazo hilo, Gavana Sonko alifahamu uwezekano finyu wa Dkt Miguna kuwa naibu wake na hivyo tangazo hilo lilijitokeza tu kama mzaha ama lililokuwa na nia ya kuafikia malengo fulani ya kisiasa.

Kwa kufahamu tangazo lilikuwa la kuchezewa, Dkt Miguna alipuzilia mbali uteuzi huo akiutaja kama mbinu ya kumkanganya katika juhudi zake za kupigania kurudishiwa paspoti yake na vita vyake dhidi ya utawala anaosisitiza ni wa kidikteta.

Bw Sonko alifahamu kuwa hata kama Dkt Miguna angekubali uteuzi wa kuwa naibu wake jijini Nairobi, angekuwa ameanza safari isiyoelekea kokote. Kiti hicho kiliachwa wazi na Polycarp Igathe alipojiuzulu Februari.

Tatizo la kwanza ambalo Dkt Miguna angekumbana nalo ni kuwa kwa sasa Serikali inasisitiza hana uraia wa Kenya, ambao sharti awe nao ili kuhudumu katika wadhifa wa Naibu Gavana. Juhudi zake awali kutambuliwa kama raia zimegonga mwamba.

Bw Miguna, ambaye pia ana uraia wa Canada, alifukuzwa nchini Februari na alipojaribu kurejea mwezi uliofuata alikatazwa kuingia na badala yake akarudishwa Canada. Alikuwa amesema atakuja Kenya Jumatano lakini hakufanya hivyo kutokana na suala la paspoti yake.

Idara ya uhamiaji imesisitiza sharti Dkt Miguna afuate kanuni ili apate uraia wa Kenya ambao inasema aliukana alipochukua wa Canada kulingana na Katiba ya awali.

 

Uraia kwanza

Spika wa Bunge la Kaunti ya Nairobi, Beatrice Elachi alisema sharti wakili huyo angepata uraia wa Kenya kabla ya madiwani wa Nairobi kumpiga msasa kama inavyotakikana kisheria.

“Kwa sasa Dkt Miguna ni raia wa Canada. Ni sharti asuluhishe utata wa uraia wake na serikali,” alisema Bi Elachi.

Na iwapo Bw Miguna angeondolewa kizingiti cha uraia, angekabiliwa na kibarua kigumu cha kuwashawishi Bunge la Nairobi kuidhinisha uteuzi wake hasa ikizingatiwa Jubilee ina wingi wa wajumbe.

Alhamisi, Spika Elachi na Seneta Johnston Sakaja walipuzilia mbali uwezekano wa wakili huyo kuidhinishwa na bunge la kaunti. “Miguna hatakuwa Naibu Gavana wa Nairobi. Nawahakikishia hilo,” alisema Bw Sakaja.

Tatizo lingine ambalo angekumbana nalo ni kuwa yeye si mwanachama wa Jubilee. Kiongozi wa wengi katika Kaunti ya Nairobi, Bw Abdi Guyo alisema jana kuwa wazo la Dkt Miguna kuwa Naibu Gavana ni ndoto tu.

 

Wanasiasa wa misimamo mikali

Suala lingine ni kuwa hata kama miujiza ingetendeka na ateuliwe, ingekuwa vigumu kwake kufanya kazi na Bw Sonko ikizingatiwa tofauti kali za misimamo baina yao.

Wawili hao wamekuwa wakirushiana cheche kali za maneno na kutofautiana vikali kuhusu uongozi wa Nairobi.

Mnamo Mei 2016, Bw Sonko alisema licha ya Dkt Miguna kumshambulia kila mara, atakapochaguliwa kuwa gavana atampa wadhifa katika serikali yake. Bw Miguna alijibu: “Ndugu yangu Sonko siwezi kuhudumu chini au pamoja na jambazi. Unaelewa?”

Wakati wa mdahalo wa wawaniaji wa ugavana Nairobi, Dkt Miguna aliwakabili vikali Bw Sonko na mtangulizi wake Dkt Evans Kidero kwa kile alichosema ni kushirikiana na wakora kufuja fedha za kaunti.

Kwa upande wake, Bw Sonko alimjibu Dkt Miguna kwa kumtaja kama ‘mtu mwenye akili punguani.’

Hauwezi kumlazimishia Miguna jambo – Ombeta

Na RICHARD MUNGUTI

WAKILI Cliff Ombeta alithibitisha Alhamisi kuwa Gavana Mike Sonko alimteua mwanaharakati na wakili Dkt Miguna Miguna kuwa naibu gavana wake Jumatano jioni.

Bw Ombeta aliambia Taifa Leo kuwa Gavana Sonko alimwita kisha akampa idhini ya kuandika barua ya uteuzi iliyowasilishwa kwa Spika wa bunge la kaunti, Beatrice Elachi.

“Ni kweli, Bw Sonko aliandika barua hiyo,” alisema Bw Ombeta.

Alisema alimtumia mteja wake (Dkt Miguna) nakala ya barua hiyo mtandaoni akiwa nchini Canada.

“Je, unafikiri Dkt Miguna atakubali uteuzi huu ama itaonekana ni kuchezewa akili ni Bw Sonko?” alihoji mwanahabari.

“Itetegemea na Dkt Miguna mwenyewe. Wajua tena Miguna Miguna si mtu ambaye unaweza kumlazimishia jambo. Yeye mwenyewe ataamua na kuambia umma uamuzi wake. Ikiwa atakubali au kukataa, hiyo ni haki yake,” akajibu.

Mwanaharakati huyo alikuwa akiwania kiti cha Ugavana Nairobi kwa tikiti ya chama cha Orange Democratic Movement na kushindwa na Bw Sonko.

Tangu Bw Polycarp Igathe ajiuzulu Bw Sonko amekuwa akishinikizwa amteue naibu wake.

Bunge la kaunti ya Nairobi limempa siku saba kufanya hivyo.

NAIBU GAVANA NAIROBI: Jina la Miguna lawasilishwa kwa spika Elachi

Na CHARLES WASONGA

SPIKA wa Bunge la Kaunti ya Nairobi Beatrice Elachi amethibitisha kwamba Gavana wa Nairobi Mike Sonko amemteua mwanasheria mbishi Miguna Miguna kuwa naibu wake.

“Gavana ametupea jina la mtu aliyempendekeza kwa wadhifa wa naibu gavana. Tutafuata sheria. Katiba inasema wazi kuwa naibu gavana anapaswa kuwa Mkenya,” akasema Bi Elachi

“Ningependa kumshauri Miguna kusuluhisha masuala yake na Serikali ya Kenya kwanza kwani yeye ni Raia wa Canada. Utaratibu huo unaweza kuchukua muda wa miezi mitatu au minne,” akaongeza Bi Elachi alipokuwa akihojiwa kwenye kituo cha redio cha Hot 96 FM.

Mnamo Jumatano jioni wakili wa Dkt Miguna, Cliff Ombeta alithibitisha kuwa Bw Sonko amemteua mwanasiasa huyo mbishani kuwa Naibu wake.

Hatua hiyo iliwashangaza wengi ikizingatiwa kuwa Miguma ni mmoja wa wakosoaji wakubwa wa Gavana Sonko.

Mkurugenzi wa Mawasiliana katika Kaunti ya Nairobi Elkana Jacob alisambaza barua ya uteuzi wa Miguna katika ukurasa wake wa Facebook lakini wengi walishuku uhalali wake.

Maafisa wakuu katika makao makuu ya kaunti ya Nairobi, City Hall, hawakuwa tayari kuthibitisha habari hizo.

Hata hivyo, kufikia sasa, Dkt Miguna hajakubali wala kukataa uteuzi.

Gavana Sonko amekuwa akishinikizwa kumteua naibu wake baada ya Polycarp Igathe kujiuzulu mapema mwaka huu akidai kunyimwa “uhuru wa kutekeleza majukumu yangu kwa manufaa ya wakazi wa Nairobi.”

Bw Ombeta alisema jina la Miguna limewasiliwashwa kwa Spika wa Bunge la Nairobi kwa uchunguzi na madiwani.

“Ndio ni kweli, na naelekea City Hall asubuhi ya kuchukua barua ya uteuzi wa Miguna,” akasema Bw Ombeta.

Bw Miguna, ambaye yuko nchini Canada baada ya kufurushwa kutoka nchini, aliwania ugavana wa Nairobi katika uchaguzi mkuu wa 2017.

Mwanasiasa huyo alikuwa ametangaza kuwa angerejea nchini Jumatano lakini akaahirisha safari hiyo. Hii ni baada ya Idara ya Uhamiaji kukataa kushikilia kuwa sharti ajaze fomu za kumrejeshea uraia wa Kenya kabla ya kupewa paspoti halali.

Mahakama Kuu ilikuwa imeiamuru Idara ya Uhamiaji kumsaidia Dkt Miguna kurejea humu nchini baada ya kufutilia mbali amri ya Waziri wa Masuala ya Ndani Fred Matiang’i ya kumtaja kama mhamiaji asiyekubaliwa nchini.

“Nilikuwa nikitarajia kufika nyumbani kulingana na mpangilio wangu. Lakini nikaahirisha safari hiyo hadi wakati mwingine,” akasema Bw Miguna.

Utata unaozingira suala la uraia wa Dkt Miguna bado unaendelea huku wakili huyo akisubiriwa kufuata masharti ya serikali.

MIGUNA MIGUNA: Ajipiga kifua kisha kukunja mkia na kusalia Canada

Na WYCLIFFE MUIA

MWANASIASA na wakili mbishi aliyefurushwa nchini, Dkt Miguna Miguna alikunja mkia kuhusu kurejea Kenya Jumatano licha ya kusisitiza awali kuwa angerejea nchini, ije mvua au jua.

Bw Miguna, ambaye amejitangaza kiongozi wa vuguvugu la National Resistance Movement (NRM) hakutoa sababu maalum ya kukatiza safari licha ya msimamo wake awali kuwa alikuwa amepanga safari yake kikamilifu na angewasili uwanja wa JKIA mwendo wa saa kumi alasiri Jumatano.

Kwenye ujumbe alioweka kwenye mitandao akitangaza kuahirisha safari yake, Bw Miguna alisema muungano wa NASA umekufa na ODM sio chama cha upinzani tena kwani kimejiunga na Jubilee, na kuwa sasa NRM ndicho chama kipya cha upinzani.

Pia aliwahimiza wafuasi wake kuendeleza uwazi hadi atakaporuhusiwa kurudi nchini.

Alisema Idara ya Uhamiaji imekataa kutii agizo la mahakama la kumpa uraia wa Kenya na kuwa mawakili wake walimshauri asubiri.

Mnamo Machi, wakili huyo ambaye pia ana uraia wa Canada alizua vionja uwanjani JKIA aliporudi Kenya lakini akakatazwa kuondoka uwanjani humo.

 

Sindano ya kumlemaza

Alizima juhudi za kumwondoa kwa kuzua sarakasi za kila aina lakini hatimaye alirudishwa Dubai kabla ya kuelekea Canada. Alidai alidungwa sindano ya kumlemaza aliporudishwa Canada.

Hiyo ilikuwa mara ya pili kwake kufukuzwa nchini mwaka huu, mara ya kwanza ikiwa ni alipofurushwa muda mfupi baada ya kumwapisha Raila Odiniga kama “rais wa wananchi” mnamo Februari 28.

Kwa hatua yake ya jana, Bw Miguna aliwavunja moyo baadhi ya wafuasi wake ambao walikuwa wamesisimka kumpokea tena nchini.

Kabla ya kutangaza kusitisha kurejea kwake jana, alikuwa ameapa kurudi nchini liwe liwalo, na kudai hatua ya Kenya kumnyima pasipoti ili atumie ya Canada ni mtego.

Mapema mwezi huu, wakili huyo aliapa kurejea nchini: “Narudi Kenya Mei 16. Mimi ni Mkenya kwa kuzaliwa. Sharti serikali itekeleze maagizo ya mahakama ya kunipatia pasipoti yangu bila masharti.”

 

Aombe uraia upya

Hata hivyo, Idara ya Uhamiaji imesisitiza sharti wakili huyo ajaze fomu za kuomba uraia wa Kenya kabla ya kuomba pasipoti.

Mawakili wake pamoja na Tume ya Kutetea Haki za Kibinadamu (KNCHR), wamekuwa wakishinikiza serikali impe pasipoti ili arejee nchini.

“Kwa sababu Idara ya Uhamiaji imekataa kunipa pasipoti na kunirejesha nchini bila masharti kama ilivyoagizwa na korti, nimeagiza mawakili wangu waripoti kwa mahakama kuwa serikali imekaidi maamuzi yake,” alisema katika ujumbe wake Jumatano akiwa Canada.

Naibu mwenyekiti wa KNCHR George Morara alisema korti inasubiriwa kutoa mwelekeo kufikia Ijumaa hii.

Wiki iliyopita, Katibu wa Idara ya Uhamiaji, Gordon Kihalangwa alisema bado Bw Miguna si Mkenya hadi atume maombi ya uraia.

“Idara haitampa pasipoti Miguna kwa sababu hajatuma maombi. Lazima kwanza apate uraia wa Kenya kabla ya kupata pasipoti,” alisema Kihalangwa.

Masaibu ya Dkt Miguna yalianza baada ya kuongoza kuapishwa kwa kinara wa upinzani Raila Odinga kama ‘rais wa wananchi’ mnamo Januari 30.
Siku chache baada ya kiapo hicho, Miguna alikamatwa na kupelekwa Canada.

 

Sarakasi JKIA

Mnamo Aprili 29, wakili huyo alifurushwa hadi Dubai baada ya siku tatu za sarakasi katika uwanja wa ndege wa JKIA, Nairobi.

Baadaye alisafiri kutoka Dubai hadi Canada ambapo amekuwa akiishi.

Dkt Miguna amekuwa akimshtumu Bw Odinga kwa kumtelekeza baada ya kumuapisha.

“Muafaka wao wa kisiasa unapasha kurejesha uongozi wa kisheria na wala si kelele za refaranda,”alisema Miguna

Wakili huyo alikana madai kuwa anapanga kutumia ‘vichochoro’ kuingia nchini adai ni njia ya kutaka kumuua.

“Wale wanapendekeza nipitie katika mipaka ya Tanzania au Ugandan kisiri wametumwa na Uhuru Kenyatta na Raila Odinga. Wanataka kutumia maafisa wa usalama wa Uganda, Tanzania na Kenyan kuniteka nyara, waniue na wanizike katika makaburi fiche au wanitupe Ziwa Victoria.”