Uganda yaalika Rwanda uhusiano kati yao ukidorora

Na Ivan R Mugisha, The East African

Uganda imealika Rwanda kwa mkutano wa kujadili na kuthibitisha utekelezaji wa mkataba ambao nchi hizi mbili zilitia saini 2019 kumaliza uhasama wa miaka mingi.

Barua ya mwaliko iliyotumwa na waziri wa mashauri ya kigeni wa Uganda Jenerali Jeje Odongo, ilipokelewa na mwenzake wa Rwanda, Vincent Biruta, Agosti 30, duru kutoka serikali za nchi hizo mbili zilithibitisha.

Hata hivyo, Rwanda ilikanusha kuwepo kwa mipango ya mkutano “ kwa wakati huu.” “Hakuna mkutano uliopangwa kwa sasa lakini Rwanda iko tayari kufuatilia mazungumzo kuhusu masuala yaliyotajwa. Hata hivyo, tatizo bado lipo kwa kuwa Uganda inaendelea kuteka, kukamata, kutesa na kuwafukuza raia wa Rwanda,” msemaji wa serikali ya Rwanda Yolande Makolo, aliambia The EastAfrican.

“Kama tunavyosema kila mara, hali itaimarika iwapo Uganda itakoma kusaidia makundi ya kisiasa na yenye silaha kwa Rwanda na kukoma kueneza habari za uongo kuhusu mzozo kati ya nchi zetu mbili.”

Haya yanajiri wakati ambao nchi hizi mbili zinaendelea kuzozana kuhusu madai ya ujasusi, kusaidia waasi na kutesa raia wa pande zote.

Marais wa nchi hizo hivi majuzi walirushiana lawama kwenye runinga katika kile kinachoonekana ishara kubwa ya kuvunjika tena kwa uhusiano wa kidiplomasia.

Kwenye mahojiano na runinga ya France 24 mnamo Septemba 8, Rais Yoweri Museveni wa Uganda alisema, “ Tulizungumza zamani kupitia upatanishi wa Angola. Sijaona mpaka ulifunguliwa,” alipoulizwa wakati mpaka wa nchi hizo mbili utafunguliwa.

Rais Museveni, pia alipuuza madai kwamba amekuwa akitumia mtandao wa kimataifa wa Pegasus kufanya ujasusi Rwanda.

“Sikufuatilia, lakini ni kupoteza wakati. Ujasusi wa kufanya nini? Nikitaka siri, hautajua kwa sababu siri ziko kwa akili yangu, haziko kwa vinasa sauti,” akasema.

Madai ya ujasusi yalizidi juzi wakati msomi mzaliwa wa Rwanda aliyekuwa akifunza chuo kikuu nchini Uganda alikamatwa na maafisa wa kijeshi kwa kushukiwa kufanyia Rwanda ujasusi.Mapema Septemba 5, Rais Paul Kagame alilaumu serikali ya Uganda kwa kuzoea kuteswa raua wake wanaoishi Uganda.

“Hakuna raia wa Uganda anayepata shida Rwanda lakini karibu raia wote wa Rwanda nchini Uganda wana wasiwasi. Baadhi wamejuta kutembelea Uganda huku wengine wakifanywa vilema baada ya kukamatwa na kuteswa,” alisema Kagame.

“Inaonekana vitendo hivi sasa ni sehemu ya siasa zao, sasa hawafichi ukweli huu.”Rais Kagame na Rais Museveni wamekutana mara nne tangu 2019, hasa kutatua tofauti zao chini ya upatanishi wa Angola na DRC, huku maafisa wa nchi zote mbili wakikutana mara kadhaa kutekeleza maazimio ya marais wao.

Museveni akemea mapinduzi Guinea

Na AFP

KAMPALA, UGANDA

RAIS wa Uganda Yoweri Museveni ametoa wito kwa wanajeshi wa Guinea waliofanya mapinduzi dhidi ya serikali mapema wiki hii wajiondoe serikalini kwa kuwa wanalirejesha taifa hilo nyuma.

Kiongozi huyo alikemea mapinduzi hayo, aliyosema hayakufaa na inaonyesha tu tamaa ya wanajeshi ya kutawala Guinea.

“Waliotekeleza mapinduzi hayo wanafaa wajiondoe kwa sababu wao ni sehemu ya matatizo yanayozonga nchi hiyo. Mapinduzi yamekuwa yakifanyika tangu miaka ya 60 na yamechangia changamoto mbalimbali zinazolikumba bara la Afrika. Nawakemea wote waliohusika,” akasema Rais Museveni.

Rais wa Guinea Alpha Conde ambaye ameongoza taifa hilo kwa mihula mitatu aliondolewa mamlakani mnamo Jumapili na wanajeshi kutoka kitengo spesheli cha kijeshi.

Kiongozi huyo alilaumiwa kwa kushiriki ufisadi na kutumia vibaya fedha za umma.

Ingawa hivyo, raia wengi wa Guinea wamekemea mapinduzi hayo na kusisitiza kuwa wanaunga mkono Rais Conde ambaye ana umri wa miaka 83.

Rais Museveni pia alisema kuwa uamuzi wake wa kuwakubali wakimbizi kutoka Afghanistan ulitokana na kuguswa na madhila waliokuwa wakiyapitia baada ya kundi la Taliban kuchukua usukani.

Amani: Museveni aombwa atumie busara Sudan Kusini

Na AFP

SHIRIKA la Maendeleo na Tawala za Kieneo (IGAD) limemwomba Rais wa Uganda Yoweri Museveni atumie hekima na uzoefu wake katika masuala ya uongozi ili kusaidia kutatua ukosefu wa usalama nchini Sudan Kusini.

Taifa hilo changa limekuwa likikabiliwa na utovu wa usalama huku makabila yakipigana na kuzozania rasilimali za kitaifa. Kando na hilo, Sudan Kusini imekuwa ikipitia misukosuko ya uongozi kati ya wanasiasa wakuu wa nchi hiyo.

Mjumbe wa IGAD wa Sudan Kusini Ismail Wais jana alimrai Rais Museveni ambaye ameongoza Uganda tangu 1986, aingilie kati na kuipa Sudan Kusini ushauri kuhusu mbinu za kupata amani.

“Hili eneo linakuhitaji mheshimiwa Rais. Kutokana na uzoefu wako na ushauri wako, Sudan Kusini itakuwa mwanachama wa Jumuiya ya Afrika Mashariki kama mataifa mengine. Nchi yetu lazima iwe na mabadiliko na tunakuomba utusaidie kwa hili,’ akasema Wais jijini Kampala.

Mjumbe huyo alisema kuwa vita vya kikabila vimelemaza maendeleo nchini humo, huku pia akimtaka Rais Salva Kiir ashirikiane na viongozi wengine wa kimataifa kusaidia kujenga upya nchi hiyo na kuzima ghasia za kikabila kupitia mazungumzo.

Sudan Kusini ndiyo taifa changa zaidi Afrika baada ya kujitenga na Sudan na kuwa nchi huru mnamo 2011. Hata hivyo, kumekuwa na mzozo wa uongozi kati ya Rais Kiir na Naibu wake Riek Machar.

Uhasama wa kisiasa umeiponza nchi hiyo pakubwa huku Machar akiunda jeshi la upinzani maarufu kama SPLA-IOKwa upande wake, Rais Museveni alionekana kuridhia ombi hilo ila akasema suluhu ya kudumu ni kuandaliwa kwa uchaguzi wenye uwazi ambao hautaingiliwa na mrengo wowote wa kisiasa.

‘Kama kiongozi huwezi kushinda uchaguzi iwapo unaeneza chuki za kikabila kujitafutia umaarufu. Anayesaka uongozi lazima atakuwa kwenye muungano na viongozi wa maeneo mbalimbali. Atapataje kura miongoni mwa makabila ambako anahubiri chuki na kuyagonganisha?’ akauliza Museveni.

‘Sudan Kusini iandae uchaguzi huru inayofuata katiba na mshindi halali apatikane. Jeshi lisitumike kuwalazimisha raia wapige kura kwa mkondo fulani nakuvuruga kura. Hiyo ndiyo suluhu inayohitajika Sudan Kusini,’ akaongeza.

Aidha kiongozi huyo alishauri Sudan Kusini ianze kuwapa mazoezi ya kijeshi, wanajeshi wote kwa pamoja huku akisema hilo litasaidia kuzima mirengo inayochipuka ya maasi.

“Hapa hatukulipa jeshi kwa sababu hatukuwa na fedha zozote. Badala ya pesa, hakikisha wanajeshi wanatimiziwa masuala ya kimsingi kisha na pia kuraiwa wawe wazalendo,’ akasema Rais Museveni.

Museveni afokea Raila

Na LEONARD ONYANGO

CHAMA tawala nchini Uganda, National Resistance Movement (NRM), kinachoongozwa na Rais Yoweri Museveni kimeshutumu vikali ODM chini ya Raila Odinga kwa kudai kuwa kinalenga kushirikiana na Naibu wa Rais William Ruto kuzua machafuko humu nchini.

Katibu Mkuu wa NRM Richard Todwong jana alisema kuwa Rais Museveni hana nia ya kuingilia uchaguzi wa Kenya kumwezesha Dkt Ruto kumrithi Rais Uhuru Kenyatta 2022.

Kupitia barua yake, Bw Todwong alionekana kumshambulia mkurugenzi wa mbunge wa Suna Junet Mohamed licha ya taarifa ya kukashifu NRM Jumatano ilitolewa na wabunge kadhaa wa ODM.

“Ninakuandikia kuhusiana na kauli chafu ambayo wewe pamoja na wenzako mlitoa kuhusiana na chama cha NRM na kumkosea heshima Rais Museveni.

“Matamshi hayo labda yalitokana na tofauti zenu za kisiasa nchini Kenya. Tunaamini kuwa kauli yenu sio msimamo wa chama cha ODM,” akasema Bw Bw Todwong.

Jumatatu, Naibu wa Rais Ruto alizuiliwa kusafiri kuelekea nchini Uganda kutokana na kigezo kwamba hakupata idhini kutoka kwa Rais Kenyatta.

Baadaye, mbunge wa Kapseret Oscar Sudi alikiri kuwa Dkt Ruto analenga kujumuisha washauri wa siasa wa Rais Museveni katika kikosi chake cha kampeni anapojiandaa kuwania urais 2022.

Bw Sudi aliambia Taifa Leo kuwa walienda Uganda kujifunza kutoka kwa chama NRM ambacho kimekuwa mamlakani kwa miaka 35 chini ya Rais Museveni.

Kundi la wabunge wa ODM, Jumatano, walishutumu Dkt Ruto kwa kukiri kuwa na uhusiano wa karibu na chama cha NRM.

Wakiongozwa na mwenyekiti wa ODM John Mbadi na Bw Mohamed amabaye pia ni mkurugenzi wa uchaguzi wa chama hicho, wabunge hao walidai Dkt Ruto anapanga kutumia NRM kusababisha machafuko nchini endapo atapoteza katika uchaguzi wa urais 2022.

Wabunge hao pia walidai kuwa urafiki kati ya Dkt Ruto na Rais wa Uganda Yoweri Museveni unalenga kumsaidia Naibu huyo wa Rais kutumia mbinu ‘chafu’ kuingia mamlakani.

“Tunafahamu fika jinsi huyo rafiki wake aliingia mamlakani na namna ambavyo amehujumu demokrasia na haki za kibinamu nchini Uganda akiwa mamlakani kwa zaidi ya miongoni mitatu. Ruto anataka kuleta udikteta kama huo nchini Kenya,’” Bw Junet akasema, akisoma taarifa kwa niaba ya wenzake 10 katika majengo ya bunge, Nairobi.

Kauli hiyo ilionekana kukera viongozi wa NRM ambao jana walisema kuwa chama hicho kimekuwa na rekodi njema katika haki za kibinadamu.

“Mnasema kwamba chama cha NRM hakifai kuigwa, je, nadhani mnakumbuka ni nini kilisababisha ghasia za baada ya uchaguzi wa 2007/2008 ambapo watu zaidi ya watu 1,000 walifariki ndani ya siku chache.

“NRM imeweza kuongoza Uganda kwa miaka 35 kwa sababu ya kuendeleza haki za kibinadamu na kupigania amani,” akasema Bw Todwong.

Katibu Mkuu wa NRM alipuuzilia mbali madai kwamba nchini Uganda hakuna demokrasia huku akisema kuwa kila kijiji nchini kinaongozwa na viongozi waliochaguliwa na wananchi kupitia vyama mbalimbali.

“Rais wetu mliyemtusi amechaguliwa na raia wa Uganda kwa njia ya kidemokrasia kutokana na maono yake,” akasema.

Bw Todwong alisema kuwa Uganda ina vituo vya redio 300 na runinga 50 ‘hivyo madai kwamba nchini Uganda hakuna uhuru wa vyombo vya habari hazina mashiko’.

Alisema kuwa tofauti na Kenya, Uganda haingozwi na siasa za ukabila bali wameungana.

“Ripoti ya hivi karibuni ilionyesha kwamba Uganda ndilo taifa lenye watu wenye furaha zaidi katika ukanda huu. Hiyo ndiyo maana wakimbizi, wakiwemo raia wa Kenya wanakimbilia nchini Uganda,” akadai.

Kiongozi wa ODM Bw Odinga na Rais Museveni wamekuwa na tofauti kwa muda mrefu.

Aliyemuua Rais Museveni mitandaoni anaswa Uturuki

Na THE EAST AFRICAN

MWANABLOGU aliyeshukiwa kwa kueneza taarifa kuwa Rais Yoweri Museveni alifariki kwa kuugua virusi vya corona, alikamatwa Uturuki wiki hii.

Maafisa wa usalama mnamo Jumanne walimkamata Fred Lumbuye ambaye mwandani wa Kiongozi wa Upinzani nchini Uganda Robert Kyagulanyi maarufu kama Bobi Wine, kwa kuhusika na kueneza habari hizo ambazo zilikuwa za uongo.

Pia inadaiwa alihusika na kutengeneza kisha kusambaza habari kuwa Mfalme wa Buganda Ronald Mutebi alikuwa amefariki dunia.

Maelezo kuhusu jinsi Lumbuye alivyokamatwa hata hivyo yalikinzana. Ripoti kutoka Uturuki ziliarifu alinyakwa alipokuwa akirejea katika makazi yake mnamo Jumanne jioni.

Hata hivyo, taarifa nyingine kutoka Uturuki zilisema kwamba alikamatwa katika ubalozi wa Uganda alipoenda kurefusha muda wa kutumia pasipoti yake ya usafiri.

Serikali inadai kuwa Lumbuye ambaye ni mfuasi sugu wa Kyagulanyi alieneza habari za uongo ambazo ziliharibia Uganda sifa machoni mwa jamii ya kimataifa.

Anadaiwa kueneza habari hizo kabla na baada ya uchaguzi mkuu mapema mwaka huu.Mnamo Juni na Julai mwaka huu habari zilienea mitandaoni kuwa Rais Museveni alikuwa amefariki kutokana na virusi vya corona na jeshi lilikuwa likipanga kutwaa mamlaka hadi azikwe kisha uchaguzi mkuu mwingine uandaliwe.

Habari hizo zilienea wakati ambapo kiongozi huyo aliweka masharti makali ikiwepo kafyu na kufunga shule kama njia ya kuzuia kuenea kwa virusi hivyo hatari.

Habari hizo zilizoshabikiwa sana na viongozi wa upinzani, zilienea zaidi hata baada ya Rais Museveni kuonekana hadharani katika maeneo ya Munyonyo na Bombo akiwa ameandamana na Naibu Rais wa Kenya Wiliam Ruto wakizindua miradi ya maendeleo.

‘Tunatarajia kwamba atasafirishwa hapa nchini na kushtakiwa kwa kosa la kueneza habari za uongo zilizoharibia nchi sifa. Lazima awe tayari kupata adhabu kali kutokana matendo yake yasiyozingatia sheria,’ akasema Waziri wa Masuala ya Kigeni Okello Oryem jijini Kampala.

“Nilifikiria kama wanahabari mngefurahia kuwa amekamatwa ila ni wazi mnamwonea huruma. Yeye ni nani ashindwe kukabili mashtaka kwa kukosea taifa? Lazima aadhibiwe vikali,’ .

hivyo, chama cha upinzani NUP kimesema Uganda na Uturuki hazina mkataba wa maelewano unaoruhusu Lumbuye kusafirishwa hadi Uganda kushtakiwa.

Ikulu nayo inasisitiza lazima arejeshwe na kushtakiwa katika mahakama ya Uganda.

Museveni ataka nchi zote za Afrika zitumie Kiswahili

Na MASHIRIKA

RAIS wa Uganda Yoweri Museveni ameyataka mataifa ya Bara Afrika yatumie lugha ya Kiswahili kudhihirisha umoja wao badala ya kuendelea kusifia na kuchangamkia lugha za kigeni.

Kiongozi huyo ambaye ameongoza Uganda kwa miaka 35 ameyataka mataifa ya Afrika yaungane pamoja na kuyapa kipaumbele maslahi ya raia wao badala ya kila mara kutegemea nchi za Wazungu kwa kila jambo.

“Wazungu wanapotaka waungane, wao hujiuliza lugha ambayo wanafaa waitumie. Je, watumie Kitaliano, Kihispania, Kiingereza au Kijerumani. Hata hivyo, barani Afrika tunaweza kutumia Kiswahili ambacho hakibagui na ni lugha ambayo haimilikiwi na mtu yeyote,” akasema Rais Museveni.

Kiongozi huyo alikuwa akizungumza katika Ikulu ya Entebe wakati wa mkutano wa kuadhimisha siku ya utangamano barani Afrika.

“Afrika tayari wameungana na hatufai kugawanyika kamwe. Ni rahisi sana kwa Waafrika kuungana kuliko wazungu ila hatujakuwa tukizingatia hilio. Tukiendelea kugawanyika basi hatutatimiza maazimio yetu,” akaongeza Museveni.

Katika miaka ya hivi karibuni, Uganda imechukua hatua za kimakusudi wa ajili ya kukuza na kuendeleza lugha Kiswahili.

Kwa mfano mnamo Oktoba, 2019 Serikali ya nchini hiyo iliidhinisha kuundwa kwa baraza la kitaifa la Kiswahili ambalo mojawapo ya wajibu wake ulikuwa kuweka mikakati ya kupandishwa hadhi ya Kiswahili kuwa lugha rasmi ya pili Uganda.

Waziri wa Jinsia, Ajira na Maendeleo ya Kijamii Peace Mutuzo aliwaambia wanahabari kwamba Kiswahili pia ni lugha inayotambuliwa na katiba ya nchi hiyo.

‘Katika siku za nyuma Kiswahili kilikuwa kikitumiwa na majeshi, wezi, waliokuwa wakikitumia vibaya na kufanya vurugu kwa watu na (watu) hawakukipenda Kiswahili sana. Lakini leo, tumekuwa watu wamoja katika Afrika Mashariki na tungependa kuendeleza Kiswahili’.

Bw Mutuzo alieleza kuwa uundwaji wa baraza hilo ulikuwa umepata idhini ya asasi mbalimbali za serikali na “itaanza kazi mara moja.”

“Hii ni hatua muhimu katika taifa letu kwa sababu lugha ya Kiswahili ina uwezo wa ‘kukuza jumuiya yetu na utamaduni kwani mambo mengi yanayozungumza kwa kiswahili ni mambo yanayojulikana na lugha nyingine za hapa Uganda’.

Waziri huyo alielezea imani Uganda itafanikiwa katika ndoto yake ya kuieneza na kuikuza Kiswahili, lugha ambayo tayari linafundisha katika taasisi za elimu nchini humo.’

Tuna walimu wengi ambao wamefunzwa Kiswahili na wana vyeti lakini hawajapata kazi,na tutazungumza na wizara ya elimu kuwapatia kazi waweze kufundisha Kiswahili shuleni na kwenye redio na televisheni’, akasema Waziri Mutuzo.

Baraza hilo pia lilitwikwa wajibu wa kutunga sera, mwongozo wa kisheria na kitaasisi na kuweka viwango vya kuhimizwa ipasavyo kando na kuendeleza lugha ya Kiswahili katika nyanja zote.

Museveni ajitokeza hadharani baada uvumi kuhusu afya yake

Na MASHIRIKA

ENTEBBE, UGANDA

RAIS wa Uganda, Yoweri Museveni Jumapili alionekana hadharani siku mbili baada ya uvumi kuenea kwamba kiongozi huyo mkongwe alilazwa hospitalini Kenya au Ujerumani akiugua maradhi yasiyojulikana.

Ripoti hizo ziliibuka siku moja baada ya Museveni, 76, kuamua kuongeza masharti makali zaidi ya kuzuia maambukizi ya virusi vya corona nchini humo.

Hii ni baada ya taifa hilo kushuhudia ongezeko la visa vya maambukizi ya ugonjwa huo hatari kutokana na msambao wa aina mpya ya virusi hivyo.

Watumiaji kadha wa mitandao ya kijamii ya twitter na Facebook walituma jumbe zilizodai kuwa Rais huyo wa Uganda alisafirishwa nje kwa matibabu baada ya afya yake kudhoofika.

Baada ya kubainika kuwa habari hizo hazikuwa za ukweli, Shirika moja la habari nchini Uganda lilishauri umma kuzipuuzilia mbali. Liliomba msamaha kwa kuweka taarifa kuhusu suala hilo kwa mtandao wake wa twitter.

Lakini Jumapili, Rais Museveni alionekana akihutubu katika Mkahawa wa Speke Resort katika kitongoji cha Munyonyo ulioko karibu na Uwanja wa Ndege wa Kimataifa wa Entebbe. Alikuwa amepangiwa kufungua rasmi mkutano wa kikanda wa viongozi wa muungano wa Afya Ulimwenguni (World Health Summit).

Kiongozi huyo alionekana akiingia ndani ya ukumbi wa mkutano akiandamana na mkewe, Janet Museveni.

Mkutano huo wa viongozi umepangwa na Chuo Kikuu cha Makerere kwa ushirikiano na serikali ya Uganda. Baadhi ya masuala yanayojadiliwa katika mkutano huo yanayohusu juhudi za Afrika kutimiza Malengo ya Umoja wa Mataifa kuhusu Maendeleo Endelevu na mpango wa afya kwa wote (UHC).

Mada zinazojadiliwa ni pamoja na; Afya ya Vijana Afrika, Ukumbatiaji wa Teknolojia katika sekta ya Afya Afrika, Mbinu za Kupambana na Magonjwa ya Kuambukiza, Udhibiti wa Magonjwa yasiyo ya Kuambukiza, miongoni mwa mada zingine.

Wakati huo huo, Rais Museveni ametangaza kuwa Uganda haitahitaji misaada ya chanjo ya Covid-19 kwa sababu iko katika hatua za mwisho za kuanzisha mradi wa kuzalisha chanjo hiyo kivyake.

Kufikia sasa, Uganda imepokea dozi milioni moja za chanjo aina ya AstraZeneca kutoka kwa mpango wa kutoa msaada wa chanjo kwa mataifa masikini, COVAX, na serikali ya India.

Nchi hiyo inalenga kutoa chanjo hiyo kwa karibu raia wake 26 milioni ili kuwakinga dhidi ya maambukizi ya ugonjwa huu hatari.

Kulingana na Rais Museveni, nchini hiyo itaanza kuzalisha chanjo ya corona kwa wingi zaidi mnamo Oktoba mwaka huu.

“Hatutaki misaada ya chanjo. Kile tunahitaji ni malighali pekee. Tutanunua malighali hiyo na kuanza kujitengenezea chanjo yetu hivi karibuni,” akasema mbele ya viongozi wa ulimwengu wanaohudhuria mkutano huo. Uganda inaandaa mkutano huo kwa mara ya kwanza.

Covid: Uganda kuanza kuunda chanjo yake – Rais Museveni

Na DAILY MONITOR

RAIS Yoweri Museveni amesema Uganda itaanza kutengeneza chanjo yake ya corona, baada yake kufunga kabisa taifa hilo la Afrika Mashariki kutokana na ongezeko la maambukizi ya virusi hivyo.

Museveni alisema mipango ya kutengeneza chanjo hiyo iko karibu kukamilika.

Hospitali nchini humo zimejaa huku madaktari wakisema wamelemewa na idadi kubwa ya wagonjwa wa Covid-19, inayosababishwa na virusi vya corona.

“Tunajiandaa kutengeneza chanjo yetu. Kwa hakika itakuwa bora kuliko zote sababu itakabili aina zote za virusi vya corona,” alifichua Museveni alipotangaza hatua kali za kuzuia msambao wa virusi hivyo mnamo Ijumaa.

Kulingana na rais huyo, utengenezaji wa chanjo hiyo ya Uganda ulicheleweshwa na ukosefu wa wagonjwa wa Covid-19.

“Hapo Agosti tulikuwa na shida. Hatukuwa na wagonjwa wa kutosha. Sasa kuna wagonjwa wengi (wa kufanyia majaribio),” alisema na kuongeza kuwa anawasiliana na wadau kadhaa kote ulimwenguni kusaidia katika mzozo wa chanjo.

Museveni aliendelea: “Chanjo tulizopata zinatoa kinga kwa aina chache tu za virusi, kama ile ya kwanza ya Wuhan na iliyoanzia India. Chanjo zilizoko huenda zikose kutoa kinga kamili.”

Alisema kuwa Uganda pia inatengeneza aina mbili za dawa za kutibu Covid-19.

“Hazijachapishwa bado, lakini nina aina mbili za dawa zinazotengenezwa na watu wangu kimyakimya tu. Katika moja, wametibu watu 70 na 58 wamepona,” akahoji.

Rais huyo alidokeza kuwa wanatarajia kufikia Juni 25 wanasayansi wa Uganda watakuwa wamefanya majaribio kwa watu 120 wanaohitajika ili dawa iweze kuidhinishwa.

Kulingana na Museveni, kufikia 2022 Uganda itakuwa ikijitegemea kwa matibabu baada ya kuona ilivyo hatari kutegemea mataifa mengine.

“Kufikia mwaka ujao, Uganda haitakuwa ikitegemea mataifa ya kigeni kwa dawa. Tutakuwa na dawa zetu na chanjo,” alisisitiza.

Huku maswali kuhusu uwezo wa mitishamba katika kutibu Covid-19 yakiibuka, kiongozi huyo alisema: “Tuko na wanasayansi waliosoma ambao wanafahamu matibabu ya kitamaduni. Mmoja wao anafahamu mimea inayotumiwa kutibu surua na maambukizi ya aina tofauti ya virusi.”

Museveni, ambaye Ijumaa alifunga nchi yake kwa siku 42 kufuatia ongezeko la maambukizi ya corona, alidai kwamba mmoja wa wataalamu wake aliponya wagonjwa 30 kwa kutumia mitishamba.

“Corona ilipofika hapa, nilizungumza naye na akaniarifu kwamba alitumia mitishamba yake kwa watu 30, na wote walipona,” alisema.

Takwimu za hivi punde kutoka wizara ya afya nchini humo zinaonyesha kuwa kufikia Juni 19, maambukizi ya corona Uganda yalipanda hadi watu 70,176.

Serikali ilisema watu 42 walifariki ndani ya saa 24. Kwa Museveni, “suluhu ya mwisho ya virusi hivi vya corona ni watu wetu kupata chanjo.”

Covid: Serikali yakana wandani wa Museveni walipewa chanjo

Na DAILY MONITOR

KAMPALA, Uganda

IMEIBUKA wandani wa karibu wa Rais Yoweri Museveni wa Uganda walipewa chanjo dhidi ya virusi vya corona, aina ya Sinopharm kutoka China, miezi kadhaa kabla ya wahudumu wa afya na makundi mengine nchini humo kufikiwa.

Ripoti hizo zilifichuliwa Alhamisi iliyopita na gazeti la The Wall Street Journal la nchini Amerika.

Kulingana na gazeti hilo, juhudi hizo ni sehemu ya serikali ya China kuitafutia soko chanjo yake, kama ilivyofanya katika nchi za Peru na Ufilipino.

Gazeti lilieleza kuwa nchini Peru, karibu watu 500 wenye ushawishi kisiasa walipewa chanjo hiyo kisiri, ijapokuwa inaendelea kufanyiwa majaribio. Miongoni mwao ni rais wa zamani, Martin Vizcarra.

Hata hivyo, Afisa Mkuu wa Mawasiliano wa Rais Museveni, Don Wanyama, alikanusha madai hayo, akisema nchi hiyo bado haijapokea chanjo dhidi ya virusi. Badala yake, alisema wahudumu wa afya ndio watakaopewa kwanza, mara tu zitakapowasili.

“Wanamaanisha nini wanaposema ‘watu wa karibu’? Hayo si kweli hata kidogo. Raia wa Uganda bado hawajapokea chanjo yoyote dhidi ya corona,” akasema Wanyama, kwenye mahojiano na gazeti la Daily Monitor Jumatano.

Akaongeza: “Rais ameeleza wazi kwamba tunatarajia kupata chanjo hizo hivi karibuni. Zitakapowasili, ishawekwa wazi kuwa wahudumu wa afya na watu walioathirika kiafya ndio watakaopewa kwanza. Hakuna kundi linaloitwa ‘washirika wa karibu’.”

Msemaji wa Wizara ya Afya, Emmanuel Ainebyoona, pia alikanusha kufahamu ripoti kama hizo.

“Hakuna lolote kama hilo,” akaeleza.

Juhudi za kuufikia Ubalozi wa China nchini humo hazikufua dafu.

Mnamo Desemba mwaka uliopita, serikali ya Uganda iliiruhusu jamii ya Liao Shen kutoka China kuingiza dozi 4,000 za chanjo hiyo nchini kwa matumizi yake binafsi. Jamii hiyo inaishi katika eneo la Kapeeka, wilaya ya Nakaseke, inakoendesha shughuli za kibiashara.

Waziri wa Afya, Ruth Jane Aceng, aliliambia gazeti hilo kuwa wakati huo, chanjo hiyo bado ilikuwa ikifanyiwa majaribio na ilikusudiwa kutumiwa na raia wa China pekee.

“Walitaka kuitumia wao wenyewe. Tuliwaagiza wahakikishe wanaitumia wao pekee, kwani hatutaki iwafikie raia wale wengine. Uganda huwa inaagiza chanjo ambazo zimeidhinishwa na Shirika la Afya Duniani (WHO) pekee kwa matumizi ya binadamu,” akasema.

Alipoulizwa jinsi serikali itahakikisha chanjo hiyo haitawafikia raia, waziri alisema itasafirishwa nchini kwa kiwango kidogo kidogo, na kuwasilishwa moja kwa moja kwa ubalozi wa China.

Msimamizi Mkuu wa jamii ya Liao Sheng, Zhang Hao, alisema chanjo hiyo haikuwa ikilenga kutumika kwa majaribio ya kimatibabu, lakini ya matumizi ya raia wa China pekee.

Uganda yarukia EU kwa kutaka iwekewe vikwazo

Na MASHIRIKA

KAMPALA, Uganda

UGANDA imeukashifu Umoja wa Ulaya (EU) kwa kuingilia masuala yake ya ndani baada ya bunge la umoja huo kupendekeza iwekewe vikwazo kwa kuwadhulumu na kuwakamata wanaopinga ushindi wa Rais Yoweri Museveni katika uchaguzi uliofanyika Januari.

Rais Museveni, 86, ambaye amekuwa mamlakani tangu 1986 alipata asilimia 59 ya kura katika uchaguzi huo uliofanyika Januari 14 lakini mpinzani wake wa karibu Robert Kyangulanyi, almaarufu Bobi Wine, amepinga matokeo hayo.

Mnamo Alhamisi, Bunge la EU lilipitisha uamuzi uliosema kuwa uchaguzi huo haukuendeshwa kwa njia ya kidemokrasia likiongeza kuwa polisi na wanajeshi walitumia nguvu kupita kiasi.

Bunge hilo liliitaka serikali ya Uganda kuwaachilia huru wanasiasa na raia waliokamatwa kipindi cha uchaguzi huo.

“Kuuliza Uganda kuwaachilia washukiwa ambao tayari wako mbele ya mahakama ni sawa kuingilia kazi halali ya idara ya mahakama,” msemaji wa serikali Ofwono Opondo aliaambia shirika la habari la Reuters.

“Tunachukulia uamuzi wa bunge la EU dhidi ya Uganda kama usiozingatia usawa na ukweli. Hatujabaini nia ya uamuzi huo,” akaeleza.

Bw Wine amewasilisha kesi ya katika Mahakama ya Juu kupinga matokeo ya uchaguzi huo.

Wakati wa kampeni za kuelekea uchaguzi huo, maafisa wa usalama walisambaratisha mikutano ya kampeni ya Wine kwa kutumia vitoa machozi, risasi na kuwapiga wafuasi wake.

Serikali ilisema mikutano hiyo ilitibuliwa kwa sababu ilipangwa kinyume na kanuni za kuzuia msambao wa virusi vya corona huku ikiisuta kambi ya Wine kwa “kuhatarisha maisha ya wananchi.”

Karibu watu 54 waliuawa katika makabiliano kati ya wafuasi wa upinzani na maafisa wa usalama huku watu wengine 600 walitiwa mbaroni.

“Uchaguzi huo haukuendeshwa kwa njia ya kidemokrasia na uwazi,” likasema bunge la EU katika uamuzi wake.

Umoja huo ulilaani maafisa wa usalama kuwa kutekeleza vitendo vya ukatili na kuingilia shughuli za kisiasa huku ukiilamu serikali ya Uganda kwa kutumia Covid-19 kama kisingizio cha kuendeleza udhalimu.

“Sharti vikwazo viwekwe dhidi ya watu na asasi zilizohusika na uvunjaji wa haki za kibinadamu nchini Uganda,” wabunge kutoka mataifa 27 wanachama wa EU wakasema katika uamuzi huo.

Rais Museveni, 76, amekuwa mwandani wa mataifa ya Magharibi ambayo yamekuwa wakiipa Uganda misaada ya kifedha huku ikituma wanajeshi wake katika mataifa yanayokumba na misukosuko ya Sudan Kusini na Somalia.

Hata hivyo, kusalia kwake mamlakani kwa miaka mingi na mienendo yake ya kuwadhulumu wapinzani wake, imekasirisha mataifa hayo fadhili.

Museveni akabidhiwa nakala za kesi ya Bobi Wine kutaka ushindi wake ufutiliwe mbali

DAILY MONITOR Na SAMMY WAWERU

Mawakili wa kiongozi wa chama cha NUP, Robert Kyagulanyi wamemkabidhi Rais Yoweri Museveni (NRM) nakala za kupinga ushindi wake, kufuatia kesi waliowasilisha katika mahakama ya juu zaidi Uganda mnamo Jumatatu.

Bw Kyagulanyi, maarufu kama Bobi Wine anaitaka mahakama kufutilia mbali ushindi wa Rais Museveni, akidai shughuli ya uchaguzi mkuu nchini humo uliofanyika mnamo Januari 14, 2021, ilisheheni utapeli na wizi wa kura.

Kulingana na matokeo yaliyotangazwa rasmi Januari 28 na tume ya uchaguzi Uganda, UEC, Bw Museveni aliibuka kidedea kwa zaidi ya kura milioni sita (asilimia 58 ya kura zilizopigwa), akifuatwa na Wine ambaye alizoa kura 3.6 sawa na asilimia 35.

Katibu Mkuu wa chama cha NRM, na ambacho kinaongozwa na Rais Museveni, Bi Justine Kasule Lumumba, alipokea nakala za kesi hiyo katika afisi za mahakama ya juu zaidi zilizoko Kololo, Kampala.

Aidha, imebainika kuanzia Jumanne mawakili wa Bobi Wine wamekuwa wakijaribu kumfikia Rais Museveni binafsi wampokeze nakala hizo bila mafanikio.

Bi Lumumba hata hivyo alisema isingewezekana kumfikia Rais kwa sababu hakuwa ameamuru kampuni ya mawakili itakayomwakilisha kupokea nakala za kesi hiyo.

“Kisheria hawapaswi kumkabidhi mgombea, ikiwa hajaagiza wakili au mawakili wake. Kufikia Jumanne, hakuna yeyote aliyekuwa amepata agizo kutoka kwa mgombea,” alisema katibu huyo mkuu wa NRM.

Mawakili wa Wine wameeleza kupata afueni baada ya NRM kupokezwa nakala za kesi kupinga ushindi wa Rais Museveni.

“Hatimaye tumepata afueni, tulikuwa tumezunguka Kampala nzima tukitafuta mpokezi wa kwanza tumkabidhi nakala yeye binafsi kwa mujibu wa sheria,” wakasema.

Rais Museveni ana makataa ya hadi Ijumaa, Februari 5, 2021 kujibu madai ya Wine.

Wengine waliopokezwa nakala za kesi hiyo ni tume ya uchaguzi Uganda, UEC na mwanasheria mkuu.

Akitetea malalamishi yake, anayoshikilia zoezi la uchaguzi halikuwa la huru, haki na wazi, Bobi Bobi Wine anadai maafisa wa jeshi Uganda walikuwa wakiingia kwenye vituo vya kupigia kura na kutia karatasi za kura zilizo na alama ya kuchagua Museveni, kwenye masunduku.

Rais huyo ambaye ametawala Uganda kwa kipindi cha muda wa miaka 34 mfululizo, kuanzia 1986, umetajwa kama wa kimabavu na kidikteta kutokana na anavyohangaisha wapinzani wanaomletea ushindani katika uchaguzi.

Tangu Wine atangaze azma yake kuwania urais, amekuwa akikamatwa mara kwa mara na maafisa wa usalama Uganda na kupitia mateso.

Bobi Wine afika mahakamani kupinga ushindi wa Museveni

DAILY MONITOR Na SAMMY WAWERU

Mawakili wa kiongozi wa upinzani nchini Uganda, Bobi Wine wamewasilisha kesi katika mahakama ya juu zaidi kupinga kuchaguliwa kwa Rais Yoweri Museveni, kufuatia uchaguzi tata uliofanyika mwezi uliopita.

Bw Wine amepinga uhalisia wa matokeo yaliyotangazwa na tume ya kusimamia uchaguzi Uganda, akisema shughuli nzima ya uchaguzi haikuwa ya huru, haki na wazi.

Mwanasiasa huyo ambaye majina yake halisi ni Robert Kyagulanyi, aliibuka wa pili katika uchaguzi huo wa mnamo Januari 14, nyuma ya Rais Museveni.

Zoezi hilo limetajwa kuwa mbaya zaidi katika historia ya Uganda, kufuatia ghasia zilizozuka na kusababisha maafa na umwagikaji wa damu.

Bw Medard Sseggona, ambaye ni mmoja wa mawakili wa Wine alisema uchaguzi wowote Rais Museveni hushiriki hauwezi ukawa wa amani, wala wa huru na haki.

“Tunataka matokeo ya uchaguzi huo yafutiliwe mbali. Hatutaki Museveni ashiriki uchaguzi mwingine siku za usoni,” Bw Sseggona akaambia wanahabari nje ya majengo ya mahakama ya juu zaidi Uganda, Kampala.

Rais Museveni, 76, na ambaye ametawala nchi hiyo kwa muda wa miaka 34, tangu 1986, katika uchaguzi wa 2021 aliibuka mshindi kwa kuzoa asilimia 59 ya kura zilizopigwa kutawala, awamu ya sita.

Alitetea kuhifadhi kiti chake kwa tiketi ya chama cha NRM. Bw Wine, 38, alipata asilimia 35 ya kura, akitaja zoezi hilo kama lililokumbwa na utapeli na wizi wa kura.

Chini ya Katiba ya Uganda, Wine ana siku 15 pekee kukata rufaa tangu tume ya uchaguzi, UEC, ilipotangaza rasmi matokeo. Mahakama ya juu zaidi nchini humo ina chini ya siku 45 pekee kusikiliza kesi na kutoa maamumizi.

Kesi za wagombea urais waliobwagwa Uganda miaka ya awali, wanaopinga matokeo hazijawahi kufua dafu. Wakili Sseggona alisema wanajeshi walikuwa wakiingia kwenye vituo vya kupigia kura na kujaza masunduku kwa kura za kumchagua Museveni.

Wakili huyo pia alidai sajili za wapiga kura katika baadhi ya vituo zilikuwa zimehitilafiwa. “Museveni hawezi kuachiliwa kuiba kura kisha awe huru,” Sseggona akasema.

Rais Museveni kwa upande wake amesema uchaguzi wa 2021 ulikuwa wa huru, haki na uwazi zaidi ukilinganishwa na chaguzi za awali na katika historia ya Uganda.

Kabla, wakati na baada ya zoezi hilo, vurugu na ghasia zilishuhudiwa. Novemba 2020, zaidi ya wafuasi 54 wa Bobi Wine waliuawa kwa kupigwa risasi na maafisa wa usalama, wakati wakiandamana kushinikiza aachiliwe huru.

Kiongozi huyo wa chama cha NUP amekuwa akikamatwa mara kwa mara na kuhangaishwa na serikali ya Museveni.

Baada ya uchaguzi, makazi yake yalizingirwa na maafisa wa kijeshi Uganda, makama nchini humo ikiwaamuru waondoke mara moja.

Kuanzia Jumatatu, wanajeshi wamekuwa wakionekana kushika doria katika barabara mbalimbali Uganda.

Rais Museveni anaendelea kukosolewa kutokana na uongozi wake unaotajwa kuwa wa kimabavu, kukiuka demokrasia ya wapinzani wake.

CHARLES WASONGA: Museveni amesaidia Uganda licha ya utawala wake wa kiimla

Na CHARLES WASONGA

INGAWA ni kweli kwamba Rais Yoweri Museveni ameongoza Uganda kwa udikteta kwa zaidi ya miongo mitatu, nchi hiyo jirani imefurahia kiwango fulani cha utulivu chini ya kiongozi huyo mkongwe.

Tofauti na enzi za marais wa zamani wa Uganda kama vile Idi Amin na Milton Obote, Museveni amefaulu kujenga uhusiano wa kidiplomasia kati ya nchi hiyo na mataifa jirani ya Afrika Mashariki, Afrika na Ulimwengu kwa ujumla.

Isitoshe, chini ya uongozi wa Museveni, Uganda imekuwa mshirika mkubwa katika shughuli za Umoja wa Afrika (AU) na Jumuiya ya Afrika Mashariki (EAC) na Shirika la Maendeleo katika kanda hii (IGAD).

Muhimu zaidi kwetu kama Wakenya ni kwamba chini ya uongozi wa Museveni, biashara kati ya Kenya na Uganda imenawiri zaidi kuliko ilivyokuwa chini ya tawala za hapo nyuma.

Wakenya wengi pia wanasoma katika vyuo vikuu nchini Uganda huku wengine wakiendesha biashara jijini Kampala na miji mingine mikubwa.

Kulingana na takwimu zilizotolewa kwenye ripoti ya hali ya uchumi nchini mwaka jana, 2020 (Economic Survey, 2020) Kenya iliuza bidhaa za thamani ya Sh64.1 bilioni nchini Uganda mnamo mwaka wa 2019.

Uganda nayo iliuza bidhaa za thamani ya Sh43 bilioni nchini Kenya, ishara tosha kwamba Kenya imekuwa ikifaidi zaidi katika biashara kati yake na taifa hili jirani.

Hii ina maana kuwa Kenya itaendelea kufaidi zaidi kibiashara kufuatia kuchaguliwa tena kwa Rais Museveni katika uchaguzi uliokamilika wiki jana, licha ya madai ya wizi wa kura yaliyoibuliwa na mgombeaji wa upinzani Robert Kyangulanyi.

Isitoshe, hii ndio sababu serikali ya Kenya, sawa na vyombo vya habari nchini, itakuwa ikifuatilia kwa makini hali nchini Uganda baada ya uchaguzi huo kwa matumaini kwamba amani itaendelea kudumu.

Sasa ni wajibu wa Rais Museveni kuhakikisha kuwa amani imedumu nchini humo ili aweze kutekeleza ajenda zake za maendeleo katika nyanja ya elimu, afya na kilimo, alivyosema katika hotuba yake kwa taifa saa chache baada ya kutangazwa mshindi Jumamosi.

Akome kutumia nguvu kupita kiasi dhidi ya viongozi wa upinzani, wafuasi wao, wanahabari na wakosoaji wake wengine alivyofanya kabla na wakati wa uchaguzi huo wa Januari 14.

Kama mmoja wa marais wakongwe zaidi barani Afrika, Museveni sasa anafaa kubadili mtindo wake wa uongozi kwa kukomesha vitendo vya udhalimu ili uongozi wake uweze kuwa wenye manufaa zaidi kwa raia wa Uganda na wale wa mataifa jirani.

BENSON MATHEKA: Museveni amegeuza Uganda kuwa mali ya kibinafsi

Na BENSON MATHEKA

UCHAGUZI wa urais wa wiki jana katika nchi jirani ya Uganda, una mafunzo mengi yanayoweza kuwazindua raia wa nchi hiyo na kuwakomboa kutoka minyororo ya utawala wa Rais Yoweri Museveni.

Kutokana na matukio ya kabla na baada ya uchaguzi huo ni wazi kwamba Museveni alijipatia miaka mingine mitano mamlakani baada ya kuhakikisha uchaguzi ulifanyika katika giza. Hii ni kwa sababu siku mbili kabla ya Januari 14, aliagiza serikali kuzima intaneti hatua ambayo ilififisha matumaini ya uwazi na haki katika uchaguzi huo.

Hapa ndipo kuna funzo la kwanza kwa raia wa nchi hiyo. Sio kwa sababu kuzima intaneti kulitia doa udilifu wa uchaguzi huo, mbali pia kuliwanyima mamilioni ya raia fursa ya kufanya kazi zao za kila siku.

Kuzima huduma za mitandao kulizima maisha ya raia wa Uganda kwa siku nne mfululizo kwa sababu shughuli za kikazi hazingeendelea enzi hizi ambazo biashara na huduma zinategemea intaneti.

Wanachopaswa kujifunza raia wa nchi hiyo na hasa wafuasi wa Museveni ni kwamba rais huyo hawajali kamwe, anawachukulia kuwa wajinga na watumwa wake.

Kama angekuwa anawajali, hangechukua hatua ambayo ingelemaza shughuli zao na kukatiza mawasiliano yao na maeneo mengine ulimwenguni.

Funzo la pili ambalo raia wa Uganda wakiwemo maafisa wa usalama ambao anaendelea kutumia kunyanyasa viongozi wa upinzani na wafuasi wao ni kwamba adui mkubwa wa Uganda ni Museveni na familia yake na sio viongozi wa upinzani au mataifa ya kigeni anayodai yanawafadhili.

Anachowafanya raia wa nchi hiyo kuamini ni kwamba ni yeye tu au watu wa familia yake wanaofaa kuongoza Uganda.Kwa wafuasi wa chama chake cha National Resistance Movement, viongozi wa upinzani ni maadui wao ingawa ukweli wa mambo ni kuwa kiongozi huyo ni sumu kwao nchi hiyo.

Ni wazi kuwa nchi hiyo imekuwa tulivu kwa miaka 36 ambayo amekuwa mamlakani lakini hatua yake ya kukwamilia mamlakani kupitia udaganyifu katika uchaguzi, inaiweka katika hatari kubwa atakapoondoka usukani.

Katika nchi ambayo asilimia 80 ya raia wake ni vijana walio na umri wa chini ya miaka 30, Museveni anafaa kufahamu kuwa hatawakwamilia enzini milele.

Funzo la tatu ambalo raia wa Uganda wanafaa kufahamu ni kwamba Museveni anaweza kuwaacha waangamie huku akitangazia ulimwengu kwamba kila kitu ni shwari nchini humo. Hili lilijitokeza wazi serikali yake ilipowazuia wanahabari na wachunguzi wa kimataifa kufuatilia uchaguzi huo. Kiongozi asiyetaka uwazi ni hatari kwa raia wake.

Tano, raia wa Uganda wanafaa kufahamu bila chembe la shaka kuwa Museveni sio mwanademokrasia. Anachoita uchaguzi nchini humo ni mbinu ya kuwataka raia kuidhinisha uongozi wake wa kiimla na kwa kuwa huwa wanakataa kufanya hivyo, huwa anatumia udaganyifu na vitisho.

Hakuna demokrasia katika nchi ambayo wanajeshi hutumiwa kutisha na kuhangaisha upinzani na raia. Ukweli usioweza kupingwa ni kwamba alianza vyema alipoingia mamlakani 1986 lakini anayetawala kwa wakati huu sio Museveni aliyekosoa marais wanaokwamilia mamlakani. Kwa sasa, Uganda ni mali yake, na raia ni watumwa wake.

Facebook yazima ujumbe wa Uhuru kwa Museveni

Na MWANDISHI WETU

MTANDAO wa Facebook jana uliweka onyo kwenye ujumbe wa Rais Uhuru Kenyatta ukidai kwamba ulikuwa wa kupotosha.

Baada ya onyo hilo, Ikulu ya Nairobi ililazimika kufuta ujumbe huo ambao Rais Kenyatta alikuwa amempongeza mwenzake wa Uganda Yoweri Museveni kwa kushinda uchaguzi wa urais.

Kwenye ujumbe huo, Rais Kenyatta alieleza, kupitia ukurasa rasmi wa Ikulu katika Facebook, kwamba ‘ushindi wa Museveni ulidhihirisha kwamba raia wa Uganda wana imani na uongozi wake’.Ikitoa onyo kuhusu ujumbe huo, Facebook ilidai kwamba ulichunguzwa na kubainika ulikuwa feki.

“Ujumbe huo ulichunguzwa kwingine na wachunguzi huru na ikabainika ni feki,” lilisema onyo la Facebook.

Hatua hiyo ilijiri baada ya mpinzani mkuu wa Museveni, Robert Kyagulanyi anayefahamika kwa jina maarufu la kisanii kama Bobi Wine, ambaye aliibuka wa pili, kudai kwamba uchaguzi ulikumbwa na udaganyifu.

Bw Museveni ametawala Uganda kwa miaka 35 na ataongoza kwa kipindi cha miaka mingine mitano kufuatia ushindi wake kwenye uchaguzi wa Januari 14.Wine, ameahidi kwamba atathibitisha madai yake hivi karibuni.

Tume ya uchaguzi nchini Uganda ilitangaza kuwa Museveni alishinda kwa kura milioni 5.8 huku Wine akifuata kwa kura milioni 3.48.

Onyo la Facebook ni pigo maradufu kwa Rais Kenyatta ambaye alifunga na kufuta anwani zake za kibinafsi za mitandao ya kijamii miaka miwili iliyipota.

Baada ya kuzifuta alidai kwamba alifanya hivyo kwa kuwa watu wanatumia mitandao ya kijamii kueneza udaku na kumtusi.

Museveni aahidi kujali zaidi maslahi ya maskini

Na Eriasa Mukiibi Sserunjogi

RAIS Yoweri Museveni ameapa kuwapa kipaumbele maskini katika jamii anapoingia mamlakani tena, badala ya kusimamia utawala ambao hunufaisha mabwanyenye wachache nchini.

Aliahidi kuhakikisha elimu bila malipo, huduma za matibabu bila malipo katika hospitali za umma na kujitahidi kuimarisha sekta ya uchumi nchini humo katika soko la ulimwengu.

Alikuwa katika hali ya kivita huku akivalia koti lake la kijeshi wakati wote mnamo Jumamosi usiku alipokuwa akihutubia taifa hilo saa kadha baada ya kutangazwa mshindi katika uchaguzi wa Januari 14.

Wahudumu wa Rais wanasema Rais anapovalia magwanda ya kijeshi, huwa wanajua mambo si kama kawaida na kwamba amekasirika.Museveni alisema tatizo moja sugu nchini Uganda limekuwa udanganyifu katika chaguzi, ambao alisema hufanywa kupitia kujaza masanduku ya kura, kupiga kura mara kadhaa na mbinu nyinginezo.

Alisema uhalifu huo ulipunguzwa pakubwa na mashine za utambulishaji zilizotumiwa katika uchaguzi wa hivi punde nchini humo.

 

MIAKA 40: Museveni ashinda urais kwa mara ya sita mfululizo

Na CHARLES WASONGA

TUME ya Uchaguzi Uganda (UEC) imetangaza Rais Yoweri Kaguta Museveni kama mshindi wa uchaguzi wa urais baada ya kuzoa kura 5,851,037 kulingana na mwenyekiti wa tume hiyo Jaji Simon Byabakama.

Hii ni sawa asilimia 58.64 ya kura zote za urais zilizopigwa katika uchaguzi huo uliofanyika Alhamisi, Januari 14, 2021.

Mgombea wa chama cha upinzani cha National Unity Platform (NUP) Robert Kyagulanyi, almaarufu Bobi Wine, alizoa jumla ya kura 3,475,298. Hii ni sawa na asilimia 34.83 ya idadi jumla ya kura za urais zilizopigwa.

Bw Museveni sasa ataongoza Uganda kwa muhula wa sita mfululizo, na kufikisha miaka 40, idadi ya miaka ambayo atakuwa rais wa Uganda.

“Namtawaza Yoweri Museveni Tibuhaburwa, kuwa rais ya wa Jamhuri ya Uganda baada ya kupata kura nyingi zaifi katika uchaguzi uliofanyika Januari 14, 2021,” akasema Jaji Byabakama.

Mgombeaji wa chama cha Forum for Democratic Change (FDC) Amuriat Oboi alishikilia nambari tatu kwa kupata kura 323,536, zinazowakilisha asimilia 3.24 za kuwa ilhali wagombeaji wengine walipata chini ya asilimia moja ya kura.

Wagombeaji wengine, kama vile Mugisha Muntu wa chama cha Alliance for National Transformation alipata kura 65,334 (sawa na asilimia 0.65), Norbert Mao wa Democratic Party aliyepata kura 55,665 (asimilia 0.56) huku Joseph Kabuleta ambaye ni mgombeaji huru akipata kura 44,3000 (asilimia 0.44).

Wagombeaji wengine huru Nancy Kalembe alipata kura 37,469 (asimilia 0.38), John Katumba alipata kura  35,983 (0.36%), Willy Mayambala alipata  kura 14,657 (0.15%), Fred Mwesigye alipata kura   24,673 (0.25%) na  Henry Tumukunde akapata kura 50,141 (0.50%).

Hata hivyo, akiongeza na wanahabari awali Bw Kyagulanyi alipinga matokeo hayo yaliyotangazwa na EC akisema kulikuwa na udanganyifu katika upigaji kura na ujumuisha kura.

“Leo asubuhi jinsi mlivyoona matokeo ya awali ya tume Ya uchaguzi yanaonyesha kuwa Museveni alipata asilimia 63.92 ya kura na sisi tumepatiwa asilimia 28.32. Tunapinga matokeo hayo kwa sababu tumeona udanganyifu uliokuwa ukiendelea tangu kipindi cha kampeni, hadi upigaji kura na ujumuisha wa kura hizo,” Bw Kyangulanyi akasema Ijumaa.

Akaongeza: Maajenti wetu katika wilaya mbalimbali magharibi na kaskazini mwa Uganda haswa Magharibi mwa Nile, walikamatwa lakini EC ikaendelea kusoma matokeo bila wao kuyathibitisha. Tunaamini kuwa tumemishinda Museveni katika uchaguzi huu.”

Akijibu matokeo hayo mwenyekiti wa Tume ya Uchaguzi alisema madai ya Bw Kyangulanyi hayawezi kuthibitishwa.

‘Matokeo yote yaliyotangazwa yalikuwa yamethibitishwa na maajenti wa wagombeaji wote ambao walitia saini fomu maalum kutoka vituo vyote 34,684 vya kupigia kura. Mheshimiwa Kyangulanyi ana fomu hizo zote, na hivyo awaambia wananchi ni jinsi ipi udanganyifu ulitokea,” akasema Jaji Byabakama.

Museveni kifua mbele Bobi Wine akipinga matokeo ya mapema

 Na MASHIRIKA

RAIS wa Uganda Yoweri Museveni amepata uongozi wa mapema katika kinyang’anyiro cha urais, kulingana na matokeo ya awali yaliyotolewa na tume ya uchaguzi Ijumaa, huku mpinzani wake Bobi Wine tayari akipinga matokeo hayo.

Kiongozi huyo mkongwe amepata kura 1,536,205 (sawa na asilimia 65.02) huku mpinzani wake mkuu Robert Kyagulanyi, maarufu kama Bobi Wine akipata kuta 647,146 kutoka kwa vituo 8,310 ambazo kura zake zimekwisha kuhesabiwa.

Taifa la Uganda lina jumla ya vituo 34,684 vya kupigia kura. Bobi Wine tayari amedai kuwa kulikuwa na udanganyifu mwingi na fujo katika uchaguzi huo mkuu uliofanyika Alhamisi.

Hata hivyo, hakutoa ushahidi wa kuthibitisha madai yake. Vile vile, alidai kuwa baadhi ya maajenti wake walikamatwa na maafisa wa usalama

Lakini serikali ya Uganda imesema kuwa uchaguzi huo uliendeshwa katika mazingira ya amani na kwa njia huru na haki.

Mnamo Alhamisi Mwenyekiti wa Tume ya Uchaguzi Uganda (UEC) Simon Mugenyi Byabakama naye alitaja uchaguzi huo wa urais na ubunge kama uliofanikiwa zaidi.

Akiongea na wanahabari katika jiji kuu, Kampala, Bw Byabakama alisema kuwa wapiga kura walijitokeza kwa wingi na wakapiga kura kwa amani licha ya changamoto zilizosababishwa na janga la virusi vya corona.

Hata hivyo, kulishuhudiwa visa ambapo masanduku ya kupigia kura yaliwasili katika baadhi ya vituo kuchelewa. Vile vile, mitambo ya kuwatambua wapiga kura kieletroniki pia ilifeli katika baadhi ya vituo.

Lakini Bw Byabakama akitaja visa hivyo kama “vichache ambavyo athari zake ni finyu.”

Akihojiwa na kituo cha CNN Jumatatu, Rais Museveni ambaye ameongoza Uganda kwa miaka 35 tangu 1986, akisema ataondoka mamlakani ikiwa atashindwa “kwa njia ya haki.”

Mshindi wa urais Uganda kujulikana kesho

NA DAILY MONITOR

TUME Huru ya Uchaguzi nchini Uganda inatarajiwa kumtangaza mshindi wa kiti cha Urais hapo Jumamosi baada ya kuandaa uchaguzi wake mkuu Alhamisi.

Sheria ya tume hiyo inasisitiza kuwa matokeo ya uchaguzi lazima yatangazwe saa 28 baada ya upigaji kura kumalizika. Shughuli za uhesabu wa kura bado zinaendelea kote nchini na matokeo ya awali yanaanza kupokelewa leo kutoka vituo mbalimbali vya kupiga kura.

Zaidi ya wapigakura milioni 18 walimiminika katika vituo mbalimbali kumchagua Rais mpya huku ushindani mkali ukitarajiwa kuwa kati ya Rais Yoweri Museveni na Mwanasiasa mwanamuziki Robert Kyagulanyi maarufu kama Bobi Wine.

Huduma za mitandao nazo zilisalia kuzimwa kwa siku ya pili mfululizo hatua iliyochukuliwa na serikali ili kuzuia raia kueneza habari ambazo zingezua taharuki na ghasia.

Pia kulikuwa na visa vya mashine za kielektroniki za kuwatambua wapigakura kufeli kufanya kazi katika Wilaya ya Wakiso na pia masanduku ya kupiga kura yalichelewa kufika katika baadhi ya maeneo ya mashinani na hata kwenye baadhi ya vituo jijini Kampala.

Katika kituo cha polisi Gayaza, shughuli za upigaji kura hazikuwa zimeanza kufikia saa tatu asubuhi baada ya mashine za kielektroniki za kuwatambua wapiga kura kukosa kufanya kazi.

“Nimetembelea vituo vingi vya kupiga kura na hakuna chochote kinachoendelea. Baadhi wameondoka kwa hasira huku wengine nao wakiwazomea maafisa wa uchaguzi,” akasema mmoja wa waangalizi Lydia Ainomugisha.

Katika Manispaa ya Kira, watu walisusia kupiga kura baada ya kugundua masunduku yaliyokuwa na karatasi za kupiga kura yalikuwa yamefunguliwa.

Vijana katika kituo cha Wandegeya, nao walikataa kuwapisha wazee na akina mama wajawazito kutangulia kupiga kura wakisema kuwa hata wao walikuwa na haraka ya kutekeleza majukumu yao ya kikatiba.

“Tumekuwa tukiwaruhusu wazee hawa na akina mama kutangulia kila mwaka wa uchaguzi kisha wanawapigia kura viongozi wakongwe wasiotusaidia kitu. Leo hatutawahurumia wazee hao kwa sababu watakufa hivi karibuni na kutuacha hapa tukiteswa na viongozi hao ilhali wao ndio waliwachagua. Tumekuwa tukiwaheshimu lakini leo wapange laini au warejee nyumbani,” akasema kijana mmoja.

Hapo Alhamisi, usalama uliimarishwa katika vituo mbalimbali vya kupiga kura hasa jiji la Kampala ambalo kwa miaka mingi imekuwa ngome ya upinzani.

Baadhi ya maafisa wa polisi walionekana wakipanda kwenye paa ya majumba marefu wakiwa wamejihami vikali kupambana na utovu wowote wa usalama.

Katika mtaa wa mabanda wa Kamwokya ambako Bobi Wine alilelewa, foleni ndefu zilishuhudiwa huku nao polisi wakiwa ange kuhakikisha kuwa raia wanasimama umbali wa mita moja unusu kuzuia maambukizi ya corona.

“Niko hapa kupiga kura ili kubadilisha uongozi wa nchi. Mara nyingi utawala wa sasa umekuwa ukidai utabadilisha maisha yangu lakini hali bado ni ile ile,” akasema dereva Joseph Ndung’u aliyekuwa kati ya watu wa kwanza kupiga kura.

Mwaniaji huru Henry Tumukunde ambaye alipiga kura yake katika kituo cha Kisementi, jijini Kampala naye alisema hatukubali matokeo hata kabla ya kura kuhesabiwa akisema uchaguzi huo ulijaa udanganyifu.

“Angalia nimepiga kura lakini baada ya kutumia sanitaiza, mkono umekuwa safi na wino umefutika. Watu wanaweza kupiga kura hata zaidi ya mara moja hasa ikizingatiwa mashine nazo zinafeli. Sitakubali matokeo hayo,” akasema.Rais Yoweri Museveni, Wine na wawaniaji wote walipiga kura kwenye uchaguzi huo ambao ulishirikisha nyadhifa za ubunge na udiwani.

TAFSIRI NA CECIL ODONGO

Jeshi lamwagwa miji mikuu uchaguzi mkuu ukinukia

NA MASHIRIKA

JESHI la Uganda limeimarisha usalama jijini na nje ya Kampala kabla ya uchaguzi wa urais na bunge uliopangiwa kufanyika kesho. Wanajeshi wanashika doria barabarani huku wengine wakidhibiti hali katika mitaa inayofahamika kama maeneo hatari ya vurugu.

“Muda wa kampeni unaelekea kufika kikomo na sasa tunasonga katika hatua nyingine ya kupiga kura. Sasa tumeimarisha usalama wetu na kuwatuma maafisa wa polisi ambao wanasaidiwa na jeshi. Usalama ni muhumi kuhakikisha haki ya kila mtu kupiga kura na kudumisha imani katika uchaguzi salama na wazi,” Msemaji wa Polisi Jijini Kampala Patrick Onyango, alieleza vyombo vya habari nchini humo.

Aidha, kuna idadi kubwa ya polisi na jeshi wanaotumia magari kushinda ilivyowahi kushuhudiwa katika msimu wa uchaguzi katika taifa hilo la Afrika Mashariki.’

“Kuna makundi ya maafisa wa usalama wanaopiga doria kwa miguu, pikipiki na magari. Tumefanya mazoezi kuhusu matukio kadhaa ikiwemo ghasia za kikatili, makundi ya vijana wenye itikadi kali, dhuluma za kimtandao, mapigano kati ya makundi hasimu na kadhalika. Timu hizo zitakabiliana na aina yoyote ya dharura,” alisema.

Wakuu wa mashirika ya kulinda usalama mnamo Ijumaa yalitoa onyo kwa wote wanaopanga kusababisha vurugu wakati na baada ya uchaguzi kwamba wataadhibiwa ipasavayo.

Adolf Mwesige, waziri wa ulinzi na masuala ya wanajeshi waliostaafu alisema, wagombeaji wa kisiasa ni sharti wakubali uamuzi wa watu utakaotangazwa na Tume ya Uchaguzi.

“Mchakato wa pekee tu unaoweza kutumia kupinga matokeo ni mahakama wala si vurugu. Hii si mara ya kwanza kwetu kushiriki uchaguzi,” alisema Mwesige.

Mashirika ya kigeni nchini humo tayari yametahadharisha raia wake kuwa waangalifu zaidi wakati na baada ya uchaguzi, yakionya dhidi ya uwezekano wa kuzuka kwa ghasia za uchaguzi.

“Polisi kwa kawaida huwa wanatumia nguvu kupita kiasi, ikiwemo vitoa machozi, risasi za mipira na risasi halisi kutawanya maandamano. Maandamano Uganda huenda yakasalia jambo la kawaida na kuna uwezekano wa michafuko kuzidi,” Ubalozi wa Amerika uliwatahadharisha Waamerika ukiwahimiza kuepuka maandamano na mikusanyiko ya watu.

Kipindi cha kampeni za urais kilichoanza mwanzoni mwa Novemba na kukamilika jana Januari 12, kimeandamwa na ghasia mbaya za kikatili ambazo baadhi zimesababisha vifo.

Kukamatwa kwa mgombea urais wa chama cha upinzani, Robert Kyagulanyi mnamo Novemba 18 kulizua maandamano katika baadhi ya sehemu za nchi hiyo na kusababisha vifo vya watu 54 waliouawa na maafisa wa usalama.

Rais aliye mamlakani kwa sasa, Yoweri Museveni alipokuwa akizungumza kuhusu maandamano hayo alijutia vifo hivyo akiahidi kuanzisha uchunguzi.

Facebook yaadhibu wafuasi wa Museveni

Na DAILY MONITOR

KAMPALA, Uganda

WATU zaidi ya 50 ambao wamekuwa wakimpigia debe Rais Yoweri Museveni mitandaoni wamezuiliwa kutumia mtandao wa Facebook, siku tatu kabla ya kufanyika kwa Uchaguzi Mkuu Alhamisi, wiki hii.

Wafuasi wa chama tawala cha National Resistance Movement (NRM), wikendi walidai kuwa akaunti zao za Facebook walizokuwa wakitumia kuwashambuliwa wapinzani wa Rais Museveni zilifungwa katika hali ya kutatanisha.

“Ni aibu kwa mataifa ya Magharibi ambayo yanadhani kwamba yanaweza kuwalazimishia Waganda kiongozi ambaye ni kikaragosi chao. Hata wakifunga akaunti za Facebook za wanaharakati wa chama cha NRM, Rais Kaguta Museveni bado atashinda uchaguzi mkuu ujao,” Don Wanyama, mkuu wa kitengo cha mawasiliano cha rais, aliambia wanahabari wikendi.

Wanyama alidai kuwa mataifa ya kigeni yanafadhili wawaniaji wa upinzani kwa lengo la kutaka kumng’oa Rais Museveni kutoka mamlakani.

Wafuasi wa Museveni walidai kuwa kampuni ya Facebook iliondoa akaunti zao kufuatia ombi la mwaniaji wa urais kupitia chama cha National Unity Platform (NUP) Robert Kyagulanyi, maarufu Bobi Wine.

“Facebook walifunga akaunti zetu baada ya Bobi Wine kuwaomba kufanya hivyo,” akadai mmoja wa wanablogu wa chama cha NRM.

Wanaharakati hao wa NRM sasa wanataka Rais Museveni kupiga marufuku matumizi ya Facebook nchini Uganda wakati wa uchaguzi.

Lakini katibu mkuu wa NUP Lewis Rubongoya alikanusha madai kuwa Bobi Wine alishirikiana na Facebook kufunga akaunti za wanaharakati wa NRM.

“Tumekuwa na shughuli nyingi hivi karibuni na hatuna wakati wa kujihusisha na siasa chafu,” akasema.

Waganda sasa wameelezea wasiwasi wao kuwa huenda wakazimiwa intaneti wakati wa uchaguzi.

Wakati wa uchaguzi mkuu wa 2016, serikali pia ilizima inteneti kutokana na madai ya kujaribu kuzuia usambazaji wa taarifa ambazo huenda zingesababisha kuzuka kwa fujo.

Miongoni mwa watu ambao akaunti zao za Facebook zimezimwa ni ile ya mshauri wa rais Jennifer Nakangubi, maarufu Full Figure.

Baada ya kuzuiliwa kukutana na watu ili kuepuka kusambaza virusi vya corona, Bobi Wine amekuwa akiendesha kampeni zake kupitia mitandao ya kijamii kama vile Facebook, Twitter na Instagram.

Lakini mara kadhaa chama cha NUP kimekuwa kikilalamikia chama tawala cha NRM kwa kujaribu kudungua akaunti zake.

Iwapo atachaguliwa, Museveni, 76, atapata fursa ya kuongoza taifa hilo la Afrika Mashariki kwa muhula wa sita.

Mbali na Bobi Wine, Rais Museveni anamenyana na wawaniaji wengine 10, akiwemo mwanamke mmoja.

Kwa kawaida Facebook huondoa akaunti mtumiaji anapochapisha mambo yanayosababisha uhasama au vurugu haswa wakati wa uchaguzi.

Facebook, wiki iliyopita, ilifunga akaunti ya kiongozi wa Amerika anayeondoka Donald Trump kwa kuchapisha kauli zilizochochea wafuasi wake kuvamia jengo la Bunge la Capitol.

Kampuni ya Facebook haijatoa taarifa kuhusu sababu yake ya kufunga akaunti za wafuasi wa NRM.

Binti akasirisha baba kwa kuamua kumpinga kisiasa

Na DAILY MONITOR

HUKU joto la uchaguzi likiendelea kupanda nchini Uganda, mwanasiasa mmoja amemuasi bintiye aliyetangaza azma ya kumpinga katika kinyang’anyiro cha wadhifa wa uenyekiti wa Baraza la Mji wa Kasaali.

Bw Godfrey Kimera ambaye ni mwenyekiti wa Baraza la Mji wa Kasaali, wilayani Kyotera, alitaja uamuzi wa bintiye, Reginah Nakiweewa, kuwania kiti hicho kama kitendo cha utovu wa heshima kwake.

Alisema bintiye angewania kiti kingine katika uchaguzi huo, wa mwaka ujao, badala ya kiti hicho anachokishikilia wakati huu.

“Nimemshauri (Nakiweewa) mara kadha ajiondoe katika kinyang’anyiro cha kiti cha uenyekiti wa baraza la mji lakini amekataa. Siwezi nikamvumilia binti kama huyo ambaye hana heshima kwa wazee. Atafute baba mwingine,” Bw Kimera akasema kwa hasira.

Lakini Bi Nakiweewa anasema babake, ambaye ni mwanachama wa chama cha Democratic Party (DP), aliahidi kutowania kiti hicho baada ya kuhudumu kwa mihula miwili. Hii ni baada yake kuchaguliwa kwa mara ya kwanza katika uchaguzi wa 2011.

Wakati huo Kasaali ilikuwa kaunti ndogo lakini ikapandishwa hadhi kuwa baraza la mji mnamo Julai 2017 baada ya Kyotera kutangazwa kuwa wilaya.

“Nilipokuwa mdogo babangu alikuwa akituambia kuwa sisi ndio viongozi wa kesho. Sasa nimekomaa na niko tayari kuchukua usukani kutoka kwake,” Bi Nakiweewa akasema kwenye mahojiano na wanahabari.

“Yeye (Kimera) pia ndiye mmoja wa wale ambao husema Rais Museveni ameongoza kwa muda mrefu na anapaswa kuwapisha viongozi vijana. Je, anataka pia kufuata mkondo huo wa Rais Museveni?” akauliza.

Bi Nakiweewa mwenye umri wa miaka 30 alisema hatavunjwa moyo na vitisho kutoka kwa babake akisisitiza kuendelea na mipango yake ya kuwania kiti hicho.

Anapanga kuwania kiti cha uenyekiti wa Baraza la Mji wa Kasaali katika uchaguzi mkuu wa Januari 2021 kwa tiketi ya chama cha Justice Forum (JEEMA).

“Sina uhasama wowote na Bw Kimera kama mtu binafsi. Atasalia kuwa babangu. Nia yangu ni kuondoa yule mtu ambaye amefeli kutimiza ahadi zake,” akasema.

Katika kisa kingine sawa na hicho, Bw Paul Ssekandi, mwanahabari wa kujitegemea Wilayani Lyatonde, pia ametofautiana na mjomba wake, Bw Elia Ssewandigi.

Hii ni baada ya mwanahabari huyo kutangaza nia ya kushindania kiti kimoja cha kisiasa na Bw Ssewandigi katika uchaguzi mkuu wa 2021.

“Nilinunua mbwa wa kiume mapema mwezi huu na nikampa jina Paul….. Nilikuwa wa kwanza kutangaza azma ya kuwania kiti hicho (uenyekiti) na nitamshinda,” Bw Ssewandigi akasema.

Bw Ssewandigi na Ssekandi watashiriki kinyang’anyiro cha uenyekiit wa Baraza la Mji wa Lyantonde pamoja na mshikilizi wa wadhifa huo sasa Bw Mustapha Kalule.

TAHARIRI: EAC waungane kukabili corona

Na MHARIRI

HATUA ya Rais Uhuru Kenyatta kutangaza kufunga mipaka ya Kenya na nchi za Tanzania na Somalia mnamo Jumamosi, ni jambo zuri, linaloonyesha jinsi serikali inayajali maisha ya Wakenya.

Serikali ilichukua hatua hiyo baada ya kubainika kuwa maeneo ya mipakani yameibukia kuwa vitovu vipya vya maambukizi ya virusi hivyo.

Bila shaka, uwepo wa virusi unaendelea kuitikisa Kenya na dunia nzima, hasa baada ya visa 57 zaidi kuthibitishwa jana, hilo likifikisha idadi ya watu walioambukizwa nchini kuwa 887.

Hata hivyo, imeibuka kwamba huenda hatua ya Kenya ikazua taharuki kati yake na nchi hizo mbili, kwani bado haijabainika ikiwa kulikuwa na mashauriano kati ya marais husika.

Ingawa serikali haikueleza utaratibu iliyofuata katika kufikia hatua hiyo, ni muhimu kwa Rais Kenyatta kujitokeza wazi kueleza ikiwa alishauriana na marais John Magufuli (Tanzania) na Mohamed Farmajo (Somalia).

Hii ni kwa kuwa uamuzi huo una athari kwa raia wa mataifa hayo matatu. Bila shaka, si mara moja ambapo tumeona taharuki zikizuka, hasa kati ya Kenya na Tanzania, kuhusu masuala yanayohusu ushirikiano wa kibiashara.

Kwa mara kadha, imeripotiwa kuwa maafisa wa Tanzania wametwaa bidhaa za wafanyabiashara kutoka Kenya na kuziharibu au hata kuzichoma, kwa kisingizio cha kuingia nchini humo bila kufuata taratibu za kisheria zifaazo.

Ni vitendo ambavyo vilizidisha uhasama kati ya mataifa hayo mawili, hali iliyowalazimu marais Kenyatta na Magufuli kukutana ili kusuluhisha tofauti hizo.

Uwepo wa corona unaonekana kuturudisha tulikokuwa. Tanzania imelaumiwa na nchi kadhaa, ikiwemo Amerika, kwa hatua inazochukua katika kukabili janga hilo.

Viongozi kadha pia wamemlaumu Rais Magufuli kwamba, hachukui hatua zifaazo kuiwezesha nchi yake kukabili virusi, ndipo visa vinaongezeka sana huko.

Ikizingatiwa kuwa Kenya na Tanzania ni majirani na wanachama wa Jumuiya ya Afrika Mashariki (EAC), kuna haja ya viongozi wake kushirikiana ili kuimarisha mikakati ya kukabili janga hili.

Kuelekezeana lawama hakufai kwa sasa, kwani kando na corona, kuna masuala mengi muhimu yatakayohitaji ushirikiano wa mataifa hayo.

Mwanamke aliyetupwa ndani kwa kumtusi Museveni aachiliwa

Na DAILY MONITOR

MAHAKAMA nchini Uganda imemwachilia huru mwanaharakati Dkt Stella Nyanzi ambaye alikuwa amefungwa jela miaka 18 Agosti mwaka jana kwa kumtusi Rais Yoweri Museveni.

Jaji Peter Henry Adonyo wa kitengo cha uhalifu wa kimataifa katika Mahakama Kuu alisema mahakama ya ngazi ya chini haina mamlaka ya kumtuhumu Dkt Nyanzi kwa kumdhulumu Museveni kupitia jumbe za mitandaoni.

“Upande wa Mashtaka haukuthibitisha aina ya kifaa kilichotumiwa kutuma habari hizo kupitia mitandaoni,” jaji huyo akasema.

Mahakama hiyo pia ilisema kuwa kundi la mawakili wa Dkt Nyanzi hawakupewa muda wa kutosha kujiandaa. Vile vile, shahidi wa upande wa mashtaka hakutoa ripoti ya kuonyesha kuwa Dkt Nyanzi alitenda kosa hilo.

Jaji Adonyo baadaye alitoa amri kwa Dkt Nyanzi ambaye ni mkosoaji mkubwa wa serikali ya Rais Museveni aachiliwe huru mara moja, hatua ambayo ilichangamkiwa na watu waliokuwa mahakamani.

Lakini taharuki na wasiwasi ilishuhudiwa katika mahakama hiyo pale Dkt Nyanzi alipozirai alipokuwa akisadiwa kutia saini stakabadhi ya kumwachilia huru. Iliwabidi askari jela kumbeba na kumwenda ndani ya gari lao na wakaondoka.

Alirejeshwa katika gereza la wanawake la Luzira ili apumzike kabla ya kuruhusiwa kuondoka.

Mnamo Septemba 2018, Dkt Nyanzi alichapisha shairi iliandikwa kwa maneno machafu ya kumkosea heshima Museveni na mamake mzazi akimlaumu kwa utawala wa kidhalimu kwa zaidi ya miaka 30.

Tafsiri: CHARLES WASONGA

Museveni alivyowavunja mbavu Wakenya

Na PETER MBURU

RAIS wa Uganda Yoweri Museveni jana aliwachangamsha Wakenya pamoja na wageni waliohudhuria ibada ya wafu ya kumuaga Rais Mstaafu Daniel arap Moi, kwa rambirambi zake ambazo ziliibua ucheshi mara kwa mara.

Katika hotuba yake ya takriban dadika nane, Rais Museveni alimmiminia Mzee Moi sifa, akimtaja kuwa kiongozi aliyedumisha amani Kenya, aliyependa kutatua mizozo na aliyepigania umoja wa Afrika Mashariki.

Rais Museveni alisema kuwa ni sifa hizo ambazo zinamfanya Mzee Moi kusherehekewa hadi sasa, kwani kinyume na Uganda iliyokumbwa na vita kwa miaka kadhaa, Kenya imekuwa na amani tangu ilipopata uhuru.

“Kifo kwa binadamu ni lazima; tofauti ni kujibu swali ‘umefariki baada ya kufanya nini?’. Kama ulifanya mambo ovyo…baas, tunakusahau au tunakukukumbuka kwa mabaya uliyofanya.

“Kenya mmekuwa kwa amani tangu mlipopata uhuru, hamjapata vita na misukosuko isipokuwa michache tu iliyotokea hapa iliyokuwa kama mchezo tu,” akasema Rais Museveni, matamshi yaliyowachekesha waliohudhuria.

Rais huyo aliendelea kutoa historia ya jinsi Mzee Moi alivyokuwa miongoni mwa waliovunja chama cha Kadu ili kujiunga na Kanu mnamo 1964, akisema hatua hiyo ilihakikisha kuwa Kenya ilisalia kwa umoja.

“Mnakumbuka… nyinyi? hamkumbuki! nyinyi ni watoto wadogo. Sisi ambao tulikuwapo tunajua palikuwapo vyama vya Kanu na Kadu. Mnamo 1964, Mzee Moi na wenzake waliokuwa Kadu walijiunga na Kanu na kukifanya chama kimoja. Hiyo inamaanisha walikuwa wamegundua umuhimu wa umoja na hiyo ilisaidia Kenya kusalia na amani miaka hii yote,” akasema, akiendelea kuwachekesha watu.

Rais Museveni pia alikumbuka jinsi Mzee Moi alivyowahi kufunga mpaka wa Kenya na Uganda baada ya kuchochewa wakati yeye (Museveni) alipoingia uongozini, lakini baadaye akakubali kuufungua.

“Baada ya sisi kuingia kwa serikali kule, wafanya-fujo wakawa wanamdanganya hapa kuwa sisi si watu wazuri… Mzee Moi akakasirika nasi na akafunga mpaka lakini baadaye tukapatana na Wateso wa Kenya na tukamaliza hiyo shida yote,” akasema.

Akiashiria kuwa Mzee Moi alikuwa kiongozi mwema kwa Kenya, alisema barani Afrika viongozi ni dawa na kuwa wanatibu matatizo ya nchi zao, akisema Kenya ilipata viongozi wema.

“Waganga wenu hapa, viongozi wenu waligundua ugonjwa wenu na wakawapa dawa inayofaa. Mzee Moi pamoja na Mzee wetu wa zamani Kenyatta walikuwa na dawa iliyotibu shida za Kenya na za Afrika Mashariki. Dawa ya kwanza ilikuwa uzalendo ndani ya Kenya,” akasema.

Vilevile, alikumbuka jinsi wakati mmoja Mzee Moi alivyomuomba kumpeleka katika kanisa moja la AIC nchini Uganda, katika eneo la Arua.

Museveni akemewa wazee kumpigia magoti kijijini

Na MASHIRIKA

KIONGOZI wa Uganda Rais Yoweri Museveni ameshutumiwa vikali baada ya video kuchipuza mtandaoni ikionyesha wazee wakimpigia magoti kabla ya kuwapa fedha.

Video hiyo inaonyesha watu wakiimba na kupiga ngoma huku wazee wakijitokeza mmoja baada ya mwingine wakipiga magoti na kisha kupokea bahasha inayoaminika kusheheni fedha.

Kulingana na Rais Museveni, wazee waliopewa fedha hizo walimsaidia kupigana msituni na kufanikiwa kutwaa uongozi wa nchi hiyo kutoka kwa mtangulizi wake, Apollo Milton Obote.

Kiongozi wa upinzani Kizza Besigye alikashfu Rais Museveni akisema kuwa alidhalilisha wazee hao.

“Ni aibu kwa wazee kupiga magoti ili kupata fedha kidogo kwenye bahasha. Ili kukomesha aibu hii, msimchague Museveni katika uchaguzi mkuu wa 2021,” akasema.

Mtumiaji mwingine wa Twitter Bireete Sarah alisema: “ Museveni ambaye amekuwa mamlakani kwa miaka 34 amejionea mwenyewe umasikini alioletea Waganda.”

 

Museveni ahimiza wazazi kuwa washauri wa kwanza kwa wana wao

Na SAMMY WAWERU

MZAZI anapaswa kuwa mshauri wa kwanza kwa mtoto au watoto ili kuchangia ukuaji na maadili mema.

Rais wa Uganda Yoweri Museveni amesema ni jukumu la kila mzazi kuhakikisha mtoto amekua kwa njia ifaayo, katika malezi yake.

Akihutubu mapema Jumanne katika Kongamano la Idadi ya Watu na Maendeleo linaloendelea katika Ukumbi wa Mikutano wa Kimataifa wa Kenyatta, KICC, jijini Nairobi, Rais huyo amesema mienendo ya vijana itaimarishwa ikiwa wazazi watatumia pengo lao kama walezi kwa kuwashirikisha kwenye ushauri nasaha.

“Mimi ndiye mume, baba na babu wa wajukuu wangu pamoja na mpiganiaji uhuru shujaa (akimaanisha nchini Uganda), na ninahusishwa sana kwa ninachomiliki. Tunapaswa kushauri watoto wetu. Mimi ndiye mshauri wa karibu wa watoto na wajukuu wangu,” akafafanua Rais huyo wa Uganda.

Maelezo yake yameoonekana kulenga visa ambapo wazazi wananyooshewa lawama kwa kutelekeza majukumu yao katika malezi. Baadhi ya vijana, hususan kizazi cha kisasa wamepotoka kimaadili, wazazi wao wakitajwa kutoshughulika kuwalea ipasavya.

“Hakuna kisichohitaji ushauri au maelekezo katika jamii,” akasisitiza Rais Museveni.

Amesema serikali imejifunga nira kuimarisha wasichana na jinsia ya kike kwa jumla, ikiwa ni pamoja na kuangazia suala tete la mimba za mapema na vita vya kijinsia.

Rais Uhuru Kenyatta wa Kenya, alifungua rasmi kongamano hilo mapema Jumanne.

Aidha, juhudi za kuimarisha wanawake zinapigiwa upatu. Licha ya baadhi ya wadau husika kukosoa kongamano hilo, ukeketaji wa wasichana (FGM), mbinu za upangaji uzazi na mimba za mapema, ni miongoni mwa masuala yatakayojadiliwa.

Mbali na Rais Kenyatta na Museveni, kiongozi mwingine aliyehutubu wakati wa ufunguzi wa kongamano hilo ni Rais wa Ushelisheli Danny Faure.

Muungano mkuu wa upinzani wanukia nchini Uganda

Na DAMALI MUKHAYE

KAMPALA, UGANDA

HARAKATI za kumbandua mamlakani Rais wa Uganda Yoweri Museveni zimepamba moto huku majadiliano kati ya wapinzani wake wawili wakuu ambao ni aliyekuwa mgombea urais Dkt Kizza Besigye na Mbunge Robert Kysangulanyi yakifikia kilele.

Hii ni baada ya kuibuka kwamba mazungumzo kati ya Dkt Besigye na kiongozi wa People Power na mbunge wa Kyadondo Mashariki, Kyagulanyi, maarufu ‘Bobi Wine’, kuhusu mpango wa kuungana pamoja kwa sababu ya Uchaguzi Mkuu mwaka 2021 yamefikia hatua za mwisho, kulingana na chama cha Opposition Forum for Democratic Change (FDC).

Akizungumza Jumanne na wanahabari katika afisi za makao makuu ya FDC mjini Najjanankumbi, mwenyekiti wa chama Bw Waswa Biriggwa, alisema watatangaza makubaliano kuhusu mazungumzo hayo hivi karibuni.

Vilevile, alisema wawili hao wanafanya kazi kwa pamoja ili kuibandua serikali ya NRM katika uchaguzi ujao.

“Tumekutana mara mbili na kundi la People Power na tutakutana tena kujadiliana kuhusu namna ya kushinda utawala wa sasa. Tutafahamisha umma kuhusu mipango yetu ya mwisho hivi karibuni,” alisema Biriggwa.

“Japo FDC kama chama bado hakijashiriki mazungumzo hayo, Dkt Besigye anayafanya kwa niaba yetu na kama chama, tuko tayari kuungana na makundi mengine yenye malengo sawa,” alisema.

Mnamo Mei, Besigye na Kyagulanyi walianza mikutano isiyo rasmi kuhusu kuungana pamoja kwa lengo la kushinda chama cha National Resistance Movement Party na Rais Museveni, ambaye amekuwa mamlakani tangu 1986.

Mgombea mmoja

Baadhi ya mipango hiyo inajumuisha kumsimamisha mgombea mmoja katika kinyang’anyiro cha urais 2021.

Rais Museveni, ambaye sasa ana umri wa miaka 74, pia anatarajiwa kuwania awamu ya sita ya urais.

Biriggwa pia aliwaeleza wanahabari kwamba, FDC haitajiunga na kundi la Democratic Party (DP) inayoongozwa na Norbert Mao kwa sababu si muungano usioogemea pande maalumu, hivyo hawatajihusisha nao.

“Sawa na jinis ambavyo Bw Mao hawezi kujiunga na FDC, sisi pia hatuwezi kujiunga na DP. Ikiwa wanataka tuungane, acha waunde chama kipya kinachoweza kuruhusu vyama vyote lakini si kundi la DP,” alisema Biriggwa.