Waislamu wakemea serikali kuhusu utekaji wa washukiwa wa ugaidi

WINNIE ATIENO na BRIAN OCHARO

VIONGOZI wa Kiislamu wameishutumu serikali kwa kuongezeka kwa visa vya kupotezwa kwa washukiwa wa ugaidi nchini.

Baraza Kuu la Waislamu nchini Kenya (Supkem), Muungano wa jamii ya Wasomali, Mbunge wa Mvita Abdulswamad Nassir, Seneta Mohammed Faki badala yake wanaitaka serikali iwe ikiwapeleka kortini washukiwa.

Baadhi ya walioteweka kwa kutekwa nyara ni Abdulhakim Salim Sagar (Mombasa), Prof Abdiwahab Sheikh (Nairobi), Yassir Ahmed (Lamu), Alfani Juma (Mombasa) na Abdisatar Islam (Mombasa).

Wakizungumza mjini Mombasa, walisema kutoweka kwa mfanyibiashara Sagar kumeibua maswali mengi.Kamanda wa Polisi wa Mkoa wa Pwani, Bw Manase Mwania Musyoka alisema Bw Sagar, ambaye anahusishwa na ugaidi, hakukamatwa na kitengo chochote cha Huduma ya Polisi ya Kitaifa (NPS).

Katika sakabadhi za kortini, Bw Musyoka alikana kufahamu kuhusu kukamatwa kwa mshukiwa na maafisa wa polisi.

‘Hakuna wakati wowote Bw Sagar alikamatwa na au kuzuiliwa na polisi,’Lakini familia ya Sagar kupitia wakili Mbugua Murithi imeshutumu polisi kwa kushindwa kutoa maelezo ya mahali alipo mtu huyo.

“Maelezo ya gari hayapo katika mfumo wa Mamlaka ya Kitaifa ya Uchukuzi na Usalama (NTSA). Hili ni gari la nani ambalo NTSA haitaki kutoa maelezo yake? ” aliuliza wakili huyo.

Bw Sagar, 40, alitoweka mwezi uliopita akitokea Msikitini jioni wakati anadaiwa kukamatwa na watu wasiojulikana.

Kulingana na kakake Faris, watu takriban saba walimkabili Sagar na kumweka kwenye gari la Toyota Hilux lililokuwa likisubiri kabla ya kuondoka kwa kasi.

Familia yake inadai kuwa Bw Sagar alikuwa amepokea vitisho kabla ya kutekwa kwake.Sagar alikuwa na kesi ya ugaidi katika Korti ya Shanzu na amekuwa akiripoti kwa mpelelezi mara moja kwa mwezi.

Amerika yafungia Taliban pesa

Na MASHIRIKA

AMERIKA imefunga akaunti za Benki Kuu ya Afghanistan zenye Sh950 bilioni ili kuuzuia utawala mpya wa Taliban kupata fedha kuiendesha serikali yake.

Kulingana na afisa mmoja wa ngazi za juu wa serikali ya Amerika, taifa hilo pia limesimamisha shughuli za usafirishaji wa fedha nchini Afghanistan.

Afisa huyo vile vile alisema Amerika itashikilia mali yoyote inayomilikiwa na benki hiyo, hivyo kuuzuia utawala wa Taliban kuifikia kwa namna yoyote ile.

Taliban ni miongoni mwa makundi ambayo yamewekewa vikwazo vya kifedha na Amerika. Makundi mengine ni Hizbollah, Al-Qaeda, Hamas, Boko Haram kati ya mengine.

Kaimu Afisa Mkuu wa benki hiyo, Ajmal Ahmady, alisema alifahamu mapema wiki hii kwamba Amerika imesimamisha shughuli zozote za kusafirisha fedha nchini humo.

Fedha hizo zinatajwa kuwa muhimu katika kuiwezesha Taliban kuendeleza utawala wake ikiwa ingefaulu kuzipata.Vikwazo hivyo vinamaanisha huenda utawala wa Taliban usifanikiwe kuzifikia fedha hizo kwa vyovyote vile.

Sehemu kubwa ya mali inayomilikiwa na benki haipo Afghanistan, kulingana na maafisa wakuu wanaosimamia shughuli zake.Wizara ya Fedha ya Amerika ilikataa kutoa taarifa yoyote kuhusiana na hatua hiyo.

Hatua hiyo inajiri huku kamanda mkuu wa kundi la Haqqani Network, Annas Haqqani, akikutana na aliyekuwa rais wa taifa hilo, Hamid Karzai, kwa mazungumzo maalum.

Kundi hilo lina uhusiano wa karibu na Taliban.Duru zilisema mazungumzo hayo yaliangazia juhudi za wapiganaji hao kubuni serikali.

Karzai alikuwa ameandamana na mjumbe mkuu wa amani katika uliokuwa utawala wake, Abdullah Abdullah.

Hakuna maelezo zaidi yaliyotolewa kuhusu kikao hicho.Kundi la Haqqani limekuwa likilaumiwa kwa kuwasaidia wapiganaji wa Taliban kutekeleza mashambulizi kwenye mpaka wa Afghanistan na Pakistan kwa miaka mingi.

Wakati huo huo, Waziri Mkuu wa Uingereza, Boris Johnson, amesema utawala wa Taliban utaaminiwa kwa vitendo vyake wala si ahadi unazotoa.Wanamgambo hao wamesema wanataka amani, na hawatalipiza kisasi dhidi ya maadui wao wa jadi.

Wamesema pia wataheshimu haki za wanawake, japo kwa misingi ya sheria na kanuni za dini ya Kiislamu.Hata hivyo, maelfu ya raia wa taifa hilo wanahofia kuwa huenda wapiganaji hao wakakosa kutimiza ahadi zao. Wengi wao tayari wameanza kuondoka na kutorokea nchi jirani.

“Tutauamini utawala huu kulingana na vitendo na sera itakazoanza kutekeleza. Tutafuatilia jinsi utakavyoshughulikia masuala muhimu kama ugaidi, ulanguzi wa mihadarati, hali ya kibinadamu na haki za wanawake kupata elimu,” akasema Johnson, kwenye hotuba maalum aliyotoa kwa Bunge.

Nchi mbalimbali duniani zimetoa ahadi za kuwapa hifadhi raia wa taifa hilo wanaotoroka kwa hofu ya kudhulumiwa na utawala huo.

Shambulizi la bomu 1998 lilivyomtosa kwa usanii

NA ABDULRAHMAN SHERIFF

AKIWA miongoni mwa Wakenya walioathiriwa wakati wa maafa ya bomu la Balozi wa Marekani jijini Nairobi mnamo Agosti 7, 1998 angali anakumbuka siku hiyo ambayo hivi leo imefikia miaka 23.

Caroline Muthoka aliyekuwa mmoja wa wale waliobahatika kuokoka, ameamua kutoa wimbo wa kumbukumbu ya tukio hilo ambayo ilizinduliwa rasmi siku ya Ijumaa na ana imani ujumbe wake utawafikia wengi walioathirika na ambao wengi wao akiwemo yeye hawajalipwa chochote hadi sasa.

Wimbo wa ‘Poleni’ aliouimba na Caroline ambaye ni msanii aliyehamia nchini Marekani alishirikiana na msanii mashuhuri wa Tanzania Rose Mhando, ulizinduliwa hapo jana bila kuwako kwake sababu hivi sasa anaishi Marekani.

“Nina matarajio makubwa kuwa wimbo wangu huu wa ‘Poleni’ utaitikiwa hasa na wale wote walioathirika kwa njia moja ama nyingine na bomu hilo na ambao wangali wanakumbuka siku hiyo.

Caroline anasema ameuimba wimbo huo kwa huzuni na akawa na matarajio walioathirika watakumbukwa na kusaidiwa ili waweze kujikimu kimaisha. “Nina huzuni kuwa japo kuna baadhi yetu tunajisaidia, wako wasiojiweza kabisa wanastahili kusaidiwa,” akasema.

Akikumbusha yaliyompata, Caroline anasema yeye binafsi alikuwa katika jumba la Co-operative lilokuwa jirani na balozi hiyo ya Marekani huku akiwa na mimba ya miezi saba na akaambiwa kuwa mtoto wake hatakuwa salama kwa sababu ya tumbo lake lilikatikakatika.

“Lakini ninamshukuru Mungu mbali na kuumia vibaya, nilifurahikia kwa kumzaa mtoto wangu salama salmini!,” akasema msanii huyo mzaliwa wa Kenya ambaye hivi sasa ni raia wa Marekani.

Caroline anajivunia kuwa mwanawe anaendelea vizuri na masomo na amepewa jina la Lucky Baraka. Mbali na kuendelea vizuri na masomo yake, mtoto wake huyo pia ana kipawa cha kuimba na anaongoza kanisani.

Caroline Muthoka ni mmoja wa wale waliobahatika kuponea mauti katika mkasa wa 1998 wa shambulizi la bomu. PICHA/ ABDULRAHMAN SHERIFF

Baadhi ya maneno kwenye nyimbo yake huo ya ‘Poleni’ uliozinduliwa jana yalikuwa: “Pole pole Mungu awape nguvu tena, Pole bado kuna tumaini tena, Ingawa mengi mmeyapitia, Tena magumu kusimulia.

“Lakini bado kuna tumaini tena, Vita magonjwa mmepitia, Wengine kutengwa na kutelekezwa, Bado kuna tumaini tena, Mungu mbinguni ameskia kilio chenu ameskia, Nasema mtakumbukwa tena.

“Wengine kwenu vita haviishi, Magonjwa mengi hayaishi, Lakini bado kuna tumaini tena, Tarehe saba mwezi wa nane tisini na nane, Wengine wetu tuliumia kwa bomu, Wengine wetu waliaga, Mungu tuhurumie Mungu.

“Wengine tulipigwa na mabomu, Mifupa yetu nayo ikaumizwa, Lakini kuna tumaini tena, tukakosa wa kutuhurumia, Tukakosa wakutusaidia, lakini bado kuna tumaini tena, Mungu mbinguni naye aliskia, Machozi yetu akatufutia,” hayo ni baadhi ya maneno yaliyhoko kwenye kibao hicho.

Baadhi ya nyimbo alizoimba mwimbaji huyo ni pamoja na ‘Mimi ni Mzalendo’, One diaspora one nation,’ ‘Arusi’, ‘Bwana Mungu’, ‘This is the Lord’s Doing’, ‘Christmas na ‘Thina ni wa Kavinda’.

Aliambia Taifa Leo Dijitali kuwa nyimbo yake iliyowika zaidi ni ile ya ‘Wambumya vaasa’ aliyoimba pamoja na Stephen Kasolo alipokuja Kenya mwezi wa Januari mwaka huu.

Nyimbo zake nne mpya alizozizindua mwezi uliopita wa Julai, mbili alizoimba na Rose Muhando ni ‘Poleni’, na ‘Step by step’ na nyengine mbili za ‘Ndeto ya muthya’ na ‘Nitashinda yote’ aliimba na Kasolo.

Caroline anasema kwake ana nia ya kufika mbali kimuziki. “Ninaazimia kuendelea na bidii yangu ya kuhakikisha nimefanikiwa kutambulika kote duniani,” akasema mwanamuziki huyo.

Amewaomba mashabiki wa muziki wake waendelee kusikiliza nyimbo zake huku akiwaahidi kuwa ana vibaio kemkem anavyoazimia kuvitoa hivi karibuni. “Nina hamu ya kutaka kuwapa burudani tosha wapenzi wa nyimbo zangu,” akasema Caroline.

Fumbo kuhusu mauaji ya mfanyabiashara Bashir

NA MARY WAMBUI

MASWALI yanaendelea kuibuka iwapo mfanyabiashara Mohamud Bashir aliyeuawa katika hali ya kutatanisha, alikuwa akisakwa na maafisa wa usalama au wahalifu sugu waliotaka kumuua kwa sababu ambazo bado ni fumbo.

Mwili wa Bashir ulitambuliwa na jamaa zake katika hospitali ya Kerugoya baada ya kutekwa nyara mtaani Lavington, Nairobi mnamo Mei 16. Mwili wake ulipatikana ukielea ndani ya mto Nyamindi Mei 16 kabla ya kupelekwa hospitalini humo kama mtu ambaye hakutambulika.

Kwa mujibu wa polisi eneo la Kirinyaga, mwili wake ulipatikana ukiwa uchi pamoja na majeraha mabaya usoni yalitokana na kupigwa risasi mbili. Mwili huo ulipatikana kabla ya mawikili wa mfanyabiashara huyo kuwasilisha kesi mahakamani kuilazimisha idara ya usalama kufichua iwapo alikuwa akizuiliwa na maafisa wa serikali au la.

“Tulikuwa tumejiandaa kuwasilisha kesi hiyo mahakamani Ijumaa lakini korti ikafunga mapema. Kinachoshangaza ni kwamba, mnamo Jumamosi, tulipokea habari mbaya kuhusu kifo chake,” akasema wakili wa Bw Bashir Charles Madowo.

Maafisa wa usalama nchini hata hivyo, wamesalia kimya na haifahamiki iwapo mfanyabiashara huyo alikuwa akifuatiliwa kwa tuhuma za kushiriki ugaidi au kwa sababu za uhalifu.

Kamanda wa polisi Nairobi Augustine Nthumbi alieleza Taifa Leo kwamba, uchunguzi unaendelea kuhusu mauaji hayo lakini kufikia jana, hawakuwa wamepiga hatua yoyote.

Mawakili wake walisema uchunguzi wa post mortem kwenye mwili wake unatarajiwa kufanyika leo kabla hajafanyiwa mazishi kulingana na itikadi ya dini ya Kiislamu.

Marehemu alikuwa mfanyabiashara mtajika ambaye alikuwa akimiliki kampuni ya ujenzi ya Infinity. Alikuwa akimiliki kampuni hiyo pamoja na wafanyabiashara wengine Kenya na ilikuwa ikiendeleza biashara Nairobi, Mogadishu na Milki ya Kiarabu.

Kati ya miradi aliyokuwa akiendeleza ni ujenzi wa kituo cha kisasa cha kibiashara cha Uhuru kwa kima cha Sh600 milioni jijini Kisumu. Pamoja na Rais Uhuru Kenyatta, walikagua mradi huo mnamo Oktoba 22 mwaka jana. Pia kampuni yake ilijenga kasri la Rais wa Somalia.

Corona yasukuma watoto kushiriki katika ugaidi – UN

Na MASHIRIKA

NEW YORK, AMERIKA

JANGA la corona linasukuma watoto kutoka familia masikini katika maeneo yanayokumbwa na mizozo, hasa barani Afrika, kujiunga na makundi yenye silaha yakiwemo ya kigaidi, afisa wa cheo cha juu wa Umoja wa Mataifa alionya Ijumaa.

Idadi ya watoto wanaosajiliwa na makundi ya wapiganaji haijulikani lakini kulingana na takwimu za Umoja wa Mataifa, mnamo 2019 pekee, watoto wapatao 7,740 baadhi wakiwa na umri wa miaka sita, walisajiliwa na makundi ya waasi kutumiwa kama wapiganaji au kutekeleza majukumu mengine.

Akizungumza wakati wa maadhimisho ya siku ya kimataifa dhidi ya watoto kutumiwa kama wapiganaji, maarufu kama Red Hand Day, Mwakilishi maalumu wa Umoja wa Mataifa kuhusu watoto na Mizozo yenye silaha, Virginia Gamba, alisema idadi ya watoto wanaosajiliwa na makundi haramu huenda ikaongezeka kutokana na hali ngumu inayosababishwa na corona.

“Kuna tisho halisi kwamba jamii zinapokosa ajira na nyingi kuendelea kutengwa kwa sababu ya athari za corona kwa uchumi na jamii, tutashuhudia idadi ya watoto wanaosajiliwa na makundi haramu ikiongezeka,” alisema.

Akaongeza: “Watoto wengi watavutiwa au mara nyingine kuambiwa na wazazi wao waende tu na kujiunga na makundi hayo kwa sababu lazima wawe na mtu wa kuwalisha.”

Wavulana na wasichana wenye umri mdogo bado wanalazimishwa kujiunga na makundi yenye silaha kama wapiganaji, wapishi au watumwa wa ngono.

Umoja wa Mataifa umeorodhesha nchi 14 zikiwemo Jamhuri ya Demokrasia ya Congo, Sudan Kusini na Somalia miongoni mwa nchi ambazo watoto wanasajiliwa kujiunga na makundi yenye silaha.

Mwaka jana, shirika hilo lilihimiza mapigano yasitishwe kote ulimwenguni kusaidia kukabili corona lakini makundi yenye silaha yanaendelea kupigana.

Gamba aliambia Thomson Reuters Foundation kwamba, janga hili limetatiza juhudi za kulinda watoto katika maeneo yanayokumbwa na vita.

Afisa huyo alisema, ana wasiwasi kuhusu mashambulizi ya magaidi dhidi ya watoto katika nchi za eneo la Ziwa Chad na jangwa la sahara. Magaidi wa Kiislamu wamekuwa wakiwateka, kuwaua watu wakiwemo watoto na kuwafanya wengi kutoroka makwao.

“Kwa kuwa watoto hawako shuleni, wanalengwa waliko ili watekwe au kusajiliwa kujiunga na makundi hayo,” alisema Gamba. Kabla ya janga la corona, makundi hayo yalikuwa yakishambulia shule na kuteka wanafunzi wanaowafanya wapiganaji au kuwashirikisha katika shughuli nyingine haramu.

Walimu waililia serikali iwalinde dhidi ya ugaidi

Na Manase Otsialo

CHAMA cha Walimu nchini (KNUT) kimeitaka serikali ihakikishe usalama unaimarishwa Kaunti ya Mandera ili masomo yarejee kama maeneo mengine nchini.

Akihutubia walimu baada ya kuchaguliwa tena, Katibu Mkuu wa KNUT eneo hilo, Bw Mohammed Kulo, alisema serikali ina jukumu la kuhakikisha masomo yanarejea katika mji kaunti hiyo ya mpakani iliyoathiriwa na vita baina ya majeshi ya Somalia na Jubbaland.

“Serikali ya Kitaifa lazima ihakikishe usalama unaimarishwa Mandera ili walimu wafanye kazi yao bila kusumbuliwa. Kukataa kutekeleza wajibu hao na kisha kuhamisha walimu ni kuhujumu elimu ya watoto wetu,” akahoji Bw Kulo.

Afisa huyo alisema serikali imekuwa ikiibagua kaunti hiyo kwa kuwa kuwapa walimu uhamisho hadi maeneo mengine badala ya kumakinikia usalama wao kazini.

‘Serikali ina jibu kwa kila tatizo nchini. Kukataa kuwahakikishia walimu usalama wao hapa Mandera kisha kuwahamisha ni kuhujumu elimu ya watoto wetu,’ akasema Bw Kulo huku akitoa wito walimu wengi waajiriwe katika kaunti hiyo.

Mandera inakumbwa na uhaba wa walimu 1894 katika shule za msingi na 517 katika shule za upili.

 

 

Unyama magaidi wakilipua ambulensi ya mjamzito

Na MARY WAMBUI

MTU mmoja alifariki baada ya magaidi kushambulia ambulensi ya Serikali ya Kaunti ya Mandera usiku wa kuamkia Jumatano.

Kulingana na polisi, ambulensi hiyo aina ya Toyota Land Cruiser ilikuwa ikimsafirisha mwanamke mjamzito kutoka hospitali ya Kotulo kuelekea Elwak ilipovamiwa katika eneo la Dabacity na watu wanaoaminika kuwa wanamgambo wa Al-Shabaab.

Washambuliaji hao walimpiga risasi mume wa mwanamke huyo na kumuua papo hapo kabla ya kulipua gari hilo kwa kutumia kilipuzi.

Walitoweka punde baada ya tukio hilo.Wengine waliokuwamo ni dereva wa ambulensi hiyo, mamake mwanamke huyo na nesi aliyekuwa akiandamana na mgonjwa.

Mkuu wa Polisi eneo la Kaskazini Mashariki Rono Bunei alisema mwanamke huyo yumo hospitalini lakini katika hali mahututi.

Wakati huo huo, polisi katika eneo la Mandera wanamzuilia mshiriki wa Al Shabaab aliyekamatwa na polisi waliokuwa wakipiga doria katika eneo la Banisa Jumatano.

Jijini Nairobi, washukiwa wawili wa kigaidi walikamatwa na polisi mnamo Jumanne saa kumi na moja jioni baada ya raia kuripoti kuwaona watu wa kutiliwa shaka katika Soko la Mbuzi, Kiamaiko.

Raia huyo wa Yemen na Mkenya waliwekwa katika kizuizi cha polisi wakisubiri uchunguzi kufanywa.

 

Ugaidi Lamu ulipungua 2020

Na KALUME KAZUNGU

WAKAZI wa kaunti ya Lamu wana matumaini makubwa kwamba vita dhidi ya magaidi wa Al-Shabaab vitamalizwa eneo hilo ifikapo mwaka 2021.

Wakazi wanaimiminia sifa serikali kwa jinsi ambavyo imesaidia pakubwa kupunguza visa vya magaidi hao kushambulia na kuua raia na walinda usalama katika mwaka 2020.

Kinyume na ilivyokuwa katika miaka ya awali, ambapo Lamu ingeshuhudia visa vingi vya mashambulizi kutoka kwa Al-Shabaab, mwaka wa 2020 ndio ulioshuhudia visa vichache zaidi vya wanamgambo hao kushambulia na kuua wananchi na walinda usalama.

Mnamo Januari 2 mwaka huu, magaidi wa Al-Shabaab walivamia mojawapo ya mabasi ya usafiri wa umma katika eneo la Nyongoro, kwenye barabara kuu ya Lamu kuelekea Mombasa, ambapo waliua abiria watatu na kujeruhi wengine watatu.

Masaaa machache baadaye, maafisa wa usalama wa;litekeleza msako mkali dhidi ya wahalifu hao, ambapo walifaulu kuua wanne na kumkamata mwingine akiwa hai.

Januari 5 mwaka huu, kundi la magaidi wa Al-Shabaab waliokuwa wamejihami kwa silaha hatari walivamia kambi ya jeshi la Kenya na lile la Marekani eneo la Manda, kaunti ya Lamu.

Wakati wa uvamizi huo wa alfajiri, wanajeshi walifaulu kuwaua wanamgambo watano wa Al-Shabaab huku mmoja akikamatwa akiwa hai.

Desemba 20 mwaka huu, walinda usalama walitibua jaribio la Al-Shabaab kuvamia na kuliteka nyara gari la polisi wa kushika doria mipakani (BPU) katika eneo la Nyongoro kwenye barabara ya Lamu kuelekea Mombasa.

Kisa cha hivi punde zaidi kushuhudiwa Lamu ni kile cha Desemba 27, ambapo wanajeshi wa Kenya (KDF) walivamia maficho ya Al-Shabaab kwenye eneo la Bodhai, msituni Boni ambapo waliua wanamgambo kadhaa wa kundi hilo na kujeruhi wengine wengi.

Wakati wa uvamizi huo, mmoja wa wanamgambo wa Al-Shabaab alikamatwa akiwa hai ilhali zana mbalimbali za kivita zinazotumiwa na magaidi hao zikinaswa.

Katika mahojiano na Taifa Leo juma hili, wakazi waliimiminia sifa kochokocho serikali hasa kwa kuanzisha operesheni ya usalama ya Linda Boni inayoendelezwa ndani ya msitu wa Boni.

Operesheni hiyo ilizinduliwa Septemba, 2015, dhamira kuu ikiwa ni kuwamaliza magaidi wa Al-Shabaab wanaojificha ndani yam situ wa Boni.

Bw Hemed Abdi alisema matarajio yake ni kwamba mwaka wa 2021 uwe wa amani na ambao hautashuhudia tukio lolote la kigaidi.

“Nafurahi kwamba mwaka 2020 umekuwa mwaka mwema uliokosa visanga vingi vya Al-Shabaab kinyume na miaka iliyopita. Ni matarajio yangu kwamba vita dhidi ya Al-Shabaab vitamalizwa kabisa ili mwaka wa 2021 uwe wa amani na utulivu,” akasema Bw Abdi.

Ali Salim alisema anatarajia kwamba safari za usiku ambazo zilikatizwa kwenye barabara kuu ya Lamu kuelekea Mombasa kutokana na kero la Al-Shabaab zitarejelewa ifikapo 2021.

Alisema watumiaji wengi wa barabara ya Lamu kuelekea Mombasa kwa sasa wamebadili misimamo yao, ambapo baadhi yao husafiri kwa ndege ili kuepuka kuvamiwa na Al-Sahabaab.

“Ombi letu ni kwamba vita vya Al-Shabaab vizikwe katika kaburi la sahau ili tukiingia mwaka 2021 uwe wa amani n ahata hizi safari za usiku barabarani zirejelewe. Kusafiri kwa ndege ni ghali mno na wengi wamelazimika kufanya hivyo ili kuepuka kuvamiwa barabarani na Al-Shabaab,” akasema Bw Salim.

Kwa upande wake aidha, Kamishna wa Kaunti ya Lamu, Irungu Macharia, aliwahakikishia wakazi usalama wao msimu huu wa sherehe za Krismasi na Mwaka Mpya.

Alisema kila mahali, ikiwemo barabarani, angani, baharini n ahata kwenye msitu kunalindwa vilivyo.

“Tumeongeza doria za KDF na polisi kila mahali. Hakuna sababu ya wananchi kuhofia kwani tumedhibiti vilivyo usalama wao,” akasema Bw Macharia.

Ugaidi wafanya vijiji Lamu visalie mahame

Na KALUME KAZUNGU

MAGAIDI wa Al-Shabaab wamevuruga maisha ya wakazi kwenye vijiji kadha vya Lamu ambavyo miaka iliyopita vilishuhudia mashambulizi ya kila mara.

Baadhi ya vijiji vimeachwa mahame ilhali vingine vikisalia na idadi ndogo ya watu.

Miongoni mwa vijiji ambavyo viliathirika na mashambulizi ya Al-Shabaab kaunti ya Lamu ni Maleli, Nyongoro, Kaisari, Mavuno, Poromoko na Mararani.

Utafiti uliofanywa na Taifa Leo ulibaini kuwa kijiji kama vile Kaisari, kimeachwa ganjo baada ya wakazi kuhamia maeneo salama, ikiwemo Kibaoni na Mpeketoni, karibu kilomita 60 kutoka kijiji hicho.

Mnamo Julai, 2014, wiki chache baada ya Al-Shabaab kuvamia mji wa Mpeketoni na kuua wanaume 60, kuteketeza mali ya mamilioni, magaidi hao hao walivamia kijiji cha Kaisari ambapo waliwatoa watu kwa nyumba zao na kuwachinja wanaume 16.

Januari, 2016, magaidi wa Al-Shabaab walivamia kijiji hicho cha Kaisari kwa mara ya pili ambapo waliwachinja wanaume watatu na kuteketeza nyumba.

Hali hiyo ilifanya wakazi kuhama kutoka kijiji hicho ambacho kilionekana kuwa cha laana kufuatia masaibu yaliyokuwa yakiwakumba.

Katika kijiji cha Mararani kilichoko ndani ya msitu wa Boni, hali ya upweke inazidi kuandama kijiji hicho baada ya idadi kubwa ya wakazi kutoroka kijijini humo.

Kulingana na mzee wa kijiji cha Mararani, Bw Hassan Mahadhi, ni familia tano pekee kati ya 80 zilizosalia kijijini humo.

Bw Mahadhi alisema kijiji hicho kimevamiwa karibu mara tano na Al-Shabaab kati ya 2014 na 2015.

“Hali ya upweke imetanda hapa Mararani. Kabla mashambulizi ya kila mara ya Al-Shabaab kutekelezwa, zaidi ya familia 80 zilikuwa zikiishi hapa. Tumesalia familia tano pekee. Yote hayo yameletwa na hofu ya Al-Shabaab,” akasema Bw Mahadhi.

Katika kijiji cha Maleli, asilimia 60 ya wakazi waliokuwa wakiishi kijijini humo walihama na kuapa kutordi tena eneo hilo.

Mnamo Agosti, 2017, kijiji cha Maleli kiligonga vichwa vya habari magaidi wa Al-Shabaab walipovamia kijiji hicho na kuua watu wanne.

Kwa sasa wakazi wengi wa kijiji cha Maleli wamehamia eneo la Katsaka Kairu ambako wamepiga kambi huko tangu 2017.

Katika vijiji vya Mavuno na Poromoko vilivyoko Wadi ya Mkunumbi, Kaunti ya Lamu, wakazi wamevigeuza vijiji hivyo kuwa mashamba yao, ambapo wamekuwa wakifika kulima na kulisha mifugo na kurudi Mpeketoni na Kibaoni.

“Hatuwezi kuishi vijijini humo tena. Tunaenda tu kulima na kurudi Mpeketoni. Vijiji vyetu hivyo vilikuwa vikitumiwa kama njia za Al-Shabaab na hilo limetutia woga,” akasema Bi Mary Kamau.

Hata hivyo, Kamishna wa Kaunti ya Lamu, Bw Irungu Macharia, alisema usalama umeimarishwa vilivyo kote Lamu na akawataka wakazi wasiwe na wasiwasi.

Atupwa ndani kwa kujigamba kuwa gaidi sugu

Na TITUS OMINDE

MWANAMUME aliyejigamba kuwa gaidi na kukiri mashtaka mawili ya kujifanya afisa wa polisi na kughushi cheti cha tabia njema, amefungwa jela miaka mitatu na mahakama ya Eldoret.

Mnamo Agosti 31, Mathew Kiplangat Ng’eno, maarufu kama Jamal Mohammed, alikiri kosa la kughushi stakabadhi za polisi kwa kujifanya afisa wa polisi kutoka kitengo cha Upelelezi wa Makosa ya Jinai DCI.

Alipofika mbele ya Hakimu Mkazi Mkuu wa Eldoret, Bi Emily Kigen, mshtakiwa alikiri kosa la kughushi stakabadhi husika.

Upande wa mashtaka uliiambia korti kuwa, mshtakiwa ana rekodi ya uhalifu ikiwa ni pamoja na wizi ambapo mahakama kuu ilikuwa imemwondolea kifungo cha maisha baaada ya kukata rufaa dhidi ya kifungo husika.

Mahakama iliambiwa kuwa, mnamo Mei 22 alipatikana akighushi cheti cha tabia nzuri kinachodaiwa kutolewa na huduma ya polisi ya Kitaifa kupitia Afisi ya Mkurugenzi wa Upelelezi wa Jinai (DCI).

Shtaka lingine lilisema mshtakiwa pamoja na wengine ambao hawakuwa kortini alipatikana akimiliki cheti cha tabia njema kikiwa na jina lake akidai alipokea kutoka kwa huduma ya polisi nchini.

Mtuhumiwa alifikishwa katika korti ya Eldoret kwa sababu ya mashtaka mengine ya ugaidi. Kesi hiyo itatajwa Septemba 24.

Aliyekamatwa kwa dai la kuzua hofu ya ugaidi apewa dhamana

JOSEPH WANGUI na MARY WAMBUI

ALIYEKUWA meneja wa jengo la Doctors Park, Nairobi, ambalo wiki jana lilifanyiwa upekuzi wa kina na wataalamu wa kutegua mabomu, Jumatatu alishtakiwa na kuachiliwa kwa dhamana ya Sh200,000.

Bi Meera Dinesh Patel alikatamatwa jana asubuhi kwa kushukiwa kuandika kijikaratasi kilichokuwa na maelezo kwamba, bomu lilikuwa limetegwa kwenye jengo hilo lililo eneo la Parklands.

Aliachiliwa baadaye na mahakama ya Milimani jijini Nairobi.

Bi Patel alikana mashtaka kwamba aliandika kijikaratasi hicho kilichopatikana kwenye lango la kuingia ofisi za ghorofa ya tano za jumba hilo.

Wataalamu kutoka Idara ya Makosa ya Jinai (DCI) na Polisi wa Kupambana na Ugaidi(ATPU) ndio walikumbana na kijikaratasi hicho walipokuwa wakifanya ukaguzi.

Kulingana na nakala ya mashtaka, alidaiwa kutenda kosa hilo Januari 30 na kusababisha taharuki miongoni mwa wananchi.

Awali, DCI ilitumia ushahidi ulionaswa kwenye kamera za CCTV ambao uliashiria kwamba, Bi Patel alihusika na ukora huo na kusema alipaswa kuchunguzwa zaidi.

“ Tunatoa onyo kwa mtu yeyote akome kushiriki vitendo vya kutatiza amani au utangamano kwa raia. Watakaoshiriki watachukuliwa hatua kali,” ikasema DCI kupitia ukurasa wake wa Twitter.

Kwa mujibu wa Idara hiyo, kijikaratasi kilikuwa na maandishi haya, “Kesho ni Ijumaa. Sisi tabomoa Doctors Park yenu. Mimi bado niko kwa building yenu…chungeni Wahindi wote mtachomewa ndani.”

Mshukiwa alidaiwa kukiangusha siku mbili baada ya kustaafu kutoka kwa wadhifa wake akilenga kuteuliwa meneja wa jengo hilo la kibiashara.

“Bi Patel alikuwa ameonyesha nia ya kujaza nafasi ya meneja wa jengo hilo lakini hakufaulu,” ikaongeza taarifa ya DCI.

Hali ya mshikemshike ilitanda jengoni humo wiki jana huku wafanyabiashara waliokodisha vyumba wakilazimika kuondoka na kuwapisha maafisa hao kufanya msako na uchunguzi kubaini iwapo kwa kweli kulikuwa na bomu lililotegwa.

Kisa hicho kilitokea wakati taifa lipo kwenye tahadhari kutokana na uwezekano wa kutokea kwa shambulizi la kigaidi.

Washukiwa 43 wa ugaidi kukaa kizuizini siku 2

Na RICHARD MUNGUTI

WASHUKIWA 43 wa ugaidi waliokamatwa siku mbili zilizopita watazuiliwa katika makao makuu ya Polisi wa Kupambana na Ugaidi (ATPU) ili kuhojiwa kuhusu uhusiano wao na magaidi wa Al Shabaab.

Hakimu mwandamizi, Bi Zainab Abdul alisema Polisi wanahitaji kupewa muda kubaini iwapo washukiwa hao wana uhusiano wowote na kundi la kigaidi la Al Shabaab.

Mahakama ilipunguza muda wa wiki moja ambao polisi waliomba hadi siku mbili.

Washukiwa hao walikamatwa mnamo Junuari 21,2020 katika Chuo cha Alison & Atlas kilichoko mtaani Eastleigh Nairobi. Wakurugenzi wa chuo hicho ni Bi Asha Ali Sarat na Ali Yusuf Ali.

Asha na Ali watashtakiwa kwa kumiliki chuo bila kukisajili katika wizara ya Elimu chini ya idara ya TVET na bila leseni.

Mameneja wanne waliokamatwa pamoja na wakurugenzi hao ni Nasra Noor Ibrahim, Omar Muhumed Yahya, Mohamed Issa Mohamed na Edward Odinga Mulumba.

Akiamuru washukiwa hao miongoni mwao mvulana wa miaka 14, Bi Abdul alisema “lazima polisi wapewe muda wa kutosha kusaka uhalali wa hati zilizopatikana na washukiwa”.

Hakimu huyo alikubali ombi la Inspekta Richard Ngatia kutoka idara ya ATPU lililotaka washukiwa wazuiliwe na kuhojiwa.

“Ijapokuwa Polisi waliomba muda wa siku tano, mahakama hii itawaruhusu wawazuilie washukiwa kwa muda wa siku mbili tu,” alisema hakimu.

Hakimu huyo alisema lazima haki za washukiwa pamoja na maslahi mengine ya umma yatiliwe maanani ndipo “ haki itendeke.”

Hakimu alisema mawasilisho ya Inspekta Ngatia yaliegemea mno kuhusu hati za usafiri , vitambulisho na vifaa vya mawasiliano ambavyo polisi walitwaa kutoka kwa washukiwa walipowatia nguvuni Januari 21, 2020.

“Mahakama hii inakubaliana na wakili Shadrack Wambui kwamba polisi hawahitaji kukaa na washukiwa hao kubaini wakati paspoti, vitambulisho, vifaa vya elektroniki vikikaguliwa,” alisema Bi Abdul.

Hakimu alisema licha ya tetezi zote za wakili huyo kupinga washukiwa kuzuiliwa, polisi wanahitaji kupewa fursa ya kuhakikisha iwapo washukiwa hao wana uhusiano wowote na magaidi wa Al Shabaab au la.

Washukiwa 5 wa ugaidi wanaswa wakila njama

LEONARD ONYANGO na KALUME KAZUNGU

WASHUKIWA watano wa ugaidi walikamatwa wikendi wakidaiwa kuchunguza eneo la burudani jijini Nairobi kwa lengo la kutekeleza shambulio.

Washukiwa hao walinaswa Jumamosi na maafisa wa Kitengo cha Kukabiliana na Ugaidi (ATPU), wakikagua eneo la Whiskey River Lounge katika Barabara ya Kiambu. Walikuwa wakikagua eneo hilo kwa kutumia gari dogo jeupe, kulingana na polisi.

Wanajumuisha Mohamed Hassan Bario (raia wa Somalia), Mohamed Adan (dereva Mkenya), Hodan Abdi Ismail (raia wa Somalia), Ifrah Mohammed Abshir (raia wa Somalia) na Mohamed Abas Mohamud ambaye ni raia wa Amerika.

Walizuiliwa katika Kituo cha Polisi cha Pangani na wanatarajiwa kufikishwa mahakamani leo.

Polisi walisema washukiwa hao walipatikana na suruali ambayo ni sare ya wanajeshi wanahewa, tisheti na kofia ya kijeshi.

“Kadhalika, washukiwa hao walipatikana na fedha zilizojumuisha sarafu ya Kenya na dola ya Amerika, kipakatakilishi, paspoti ya Amerika, hundi na kitambulisho cha maafisa wa usalama wanaolinda ubalozi wa Amerika,” ikasema taarifa ya polisi.

“Picha za gari walilokuwa wameabiri zilisambazwa katika vituo vyote na baadaye likanaswa katika eneo la Pangani,” ikaongezea.

Huku hayo yakijiri, maafisa wa usalama katika Kaunti ya Lamu, jana walifanikiwa kutibua shambulio la kigaidi katika eneo la Pandanguo, Witu, baada ya kuwalemea magaidi zaidi ya 50 wa Al-Shabaab waliokuwa na silaha hatari.

Makabiliano baina ya polisi na magaidi hao yalidumu kwa muda wa saa tano kuanzia saa nne na nusu usiku, Jumamosi.

Mzee wa Kijiji cha Pandanguo Adan Golja, aliambia Taifa Leo kuwa magaidi hao walifika kijijini hapo saa nne usiku.

Inadaiwa kuwa magaidi hao waliwahoji baadhi ya wakazi kuhusu hali ya usalama katika eneo hilo.

“Baada ya kufahamishwa kuwa eneo hili lilikuwa likilindwa na maafisa wa GSU na wanajeshi wa KDF, magaidi hao walionekana kuingiwa na hofu. Hapo ndipo walisema kuwa hawakuwa katika eneo hilo kuzua vurugu bali kuvuna mahindi,” akasema Bw Golja.

Mmoja wa wakazi waliohojiwa na magaidi hao waliripoti kwa Bw Golja ambaye aliwafahamisha polisi wa akiba.

Kulikuwa na ufyatulianaji wa risasi baina ya magaidi hao na maafisa wa polisi wa akiba. Dakika chache baadaye maafisa wa GSU na KDF waliwasili katika eneo hilo.

“Mapigano kati ya maafisa wa usalama na magaidi yalianza nne na nusu usiku 1Jumamosi hadi saa tisa alfajiri, Jumapili. Magaidi hao walilemewa lakini walivuna mahindi yote katika shamba la ukubwa wa ekari moja na kisha kuingia mafichoni katika Msitu wa Boni,” akaelezea Bw Golja.

Kamishna wa Kaunti, Bw Irungu Macharia alithibitisha tukio lakini akasema hali ya utulivu imerejea.

Ugaidi: Familia yalia polisi imwache huru mwanao

Na FADHILI FREDRICK

Familia moja katika Kwale inawataka maafisa wa polisi kumweka huru kijana wao mwenye umri wa miaka 20 ambaye walimkamata kwa tuhuma za kuwa mwanachama wa kikundi cha kigaidi.

Bw Rashid Kombo, mwalimu wa madrassa katika kijiji cha Mulungunipa katika kauntindogo ya Msambweni, alikamatwa na polisi Alhamisi wiki iliyopita.

Kulingana na mama yake, Bi Mwanakmbo Abdulrahman, maafisa wa polisi walivamia nyumba yao na kudai kwamba waliiba Sh10,000.

“Walikuwa wanatafuta wanangu wawili lakini walifanikiwa kumkamata mmoja wakati alipokuwa akija nyumbani kwa baiskeli na kutumia nguvu kumtia mbaroni na kuondoka naye tusifahamu walikompeleka ” akasema.

Aliongeza kuwa walifanikiwa kupata kofia na viatu alivyokuwa amevaa siku hiyo ya purukushani.

Mama huyo alibubujikwa machozi kwa uchungu wakati akiongea na wanahabari katika mji wa Ukunda akiwa na familia na maafisa wa shirika la kutetea haki za binadamu la MUHURI.

Binamu yake Shamakame Rumba alisema serikali ndiyo inayojua vizuri kule walikompeleka kwa hivyo wanataka mtoto wao aliyechukuliwa na maafisa hao aachwe huru.

“Kama familia tunataka serikali imlete akiwa amekufa au hai kwa sababu tunasikitika na hatujui hatma yake,” akasema.

Kisa hicho kiliripotiwa katika Kituo cha Polisi cha Diani lakini familia hiyo imeshindwa kujua aliko licha ya kuwasiliana na maafisa wa polisi katika kituo hicho.

Afisa wa Muhuri, Bw Francis Ouma alishutumu maafisa wa polisi kwa kufanya kazi kwa udhalimu mkubwa licha ya sheria ya kulinda washukiwa.

Kamanda wa Polisi wa Kaunti ndogo ya Msambweni Bw Nehemia Bitok alisema hana habari juu kutiwa mbaroni kwa kijana huyo lakini aliahidi kufuatilia swala hilo.

Sh500 milioni kwa atakayefichua aliko Jehad Serwan Mostafa

Na MARY WAMBUI

Idara ya upelelezi ya Amerika (FBI), imetoa zawadi ya Sh500 milioni kwa yeyote atakayetoa habari zitakazofanikisha kukamatwa kwa Jehad Serwan Mostafa, raia wa nchi hiyo mwenye umri wa miaka 37 ambaye inaaminika amekuwa akifadhili shughuli za Al Shabaab, Afrika Mashariki.

Mostafa, anayezungumza Kiarabu, Kisomali na Kiswahili pia anajulikana kama Ahmed Emir Anwar, Ahmed Gurey, Anwar al-Amriki na Abu Adbullah al-Muhajir.

Ikimtaja kama mtu hatari, idara hiyo ilisema inaamini mshukiwa huyo ndiye raia wa cheo cha juu wa Amerika ambaye amekuwa akifadhili shughuli za kijeshi za kundi la Al Shabaab tangu 2006.

Majukumu yake katika Al Shabaab ni pamoja na kutoa mafunzo katika kambi za Al Shabaab, kueneza propaganda za kundi hilo, kuongoza mashambulizi ya vilipuzi na kuwa wakala kati ya kundi hilo na mashirika mengine ya kigaidi.

FBI inaamini kuwa, Moustafa ametembelea au anapanga kutembelea Somalia, Yemen, Kenya na mataifa mengine ya Afrika ili kuendeleza vitendo vya kundi hilo la kigaidi.

Anafunga ndevu kubwa na kufaa miwani na anatumia mkono wa kushoto na ana kovu katika mkono wake wa kulia.

“Ikiwa una habari zozote kuhusu mtu huyu, tafadhali wasiliana na ubalozi wa Amerika ulio karibu,” linasema tangazo katika tovuti ya FBI.

Tangazo hilo linasema alilelewa San Diego, California, ambako pia alisomea chuo kikuu.Inaaminika alihama alikozaliwa 2005.

Kizimbani kwa kupanga njama ya kushambulia makanisa

Na RICHARD MUNGUTI

MSHUKIWA wa ugaidi mwenye umri wa miaka 19 anayedaiwa alikuwa amepanga njama za kushambulia makanisa matatu moja ya Salvation Army jijini Nairobi alifikishwa kortini Jumanne.

Trevor Ndwiga Nyaga aliagizwa azuiliwe hadi Desemba 18, 2019 mahakama itakapoamua ikiwa ataachiliwa kwa dhamana au la.

Ombi la mshtakiwa azuiliwe liliwasilishwa na kiongozi wa mashtaka aliyeeleza mahakama mshtakiwa alikuwa ametoroka lakini polisi wakafaulu kumptia nguvuni.

Hakimu mkazi Bi Muthoni Nzibe alifahamishwa mshtakiwa alikuwa amepanga kutorokea nchini DRC Congo baada ya kutekeleza shambulizi dhidi ya Kanisa hilo la Salvation Army.

Mahakama iliambiwa baada ya mshtakiwa kutiwa nguvuni alikutwa na nakala za maandishi ya ugaidi ikiwa ni pamoja na yale ya ukataji watu vichwa.

“Mshtakiwa alikutwa akiwa na kisu maalum kilichodhaniwa kuwa cha kutekeleza uhalifu,” hakimu alifahamishwa na kiongozi wa mashtaka.: Hakimu alifahamishwa kwamba mshtakiwa alikutwa amehifadhi nakala nyingi za vitabu vya kuendeleza ugaidi.

Mahakama iliombwa imzuilie mshtakiwa kwa wiki mbili kuwezesha polisi kukamilisha mahojiano na mashahidi.

Mshtakiwa alikana shtaka moja la kupatikana na mali iliyodhaniwa aliitazamia kuitumia katika visa vya uhain

Pia alikutwa na nakala za ugaidi zikihimiza wahanga wakatwe vichwa

Mshukiwa wa ugaidi akanusha madai mahakamani

Na BRIAN OCHARO, MISHI GONGO na JOSEPH NDUNDA

MSHUKIWA wa ugaidi anayedaiwa kuwa na mizizi yake Syria, Somalia na nchi zingine tatu, amekanusha madai ya kuhusika na njama pamoja na utekelezaji wa mashambulizi ya kigaidi katika maeneo ya Kaskazini mwa Kenya na Pwani.

Salim Aboud Khalid alikanusha mashtaka hayo Jumanne katika mahakama ya Mombasa.

Maafisa wa kupambana na ugaidi walieleza korti kuwa Bw Khalid ambaye ameepuka mitego kadha, amekuwa katika orodha ya watu wanaosakwa sana na polisi kuanzia Juni 2018 kufuatia madai ya kuhusika na kundi la al-Shabaab.

“Mshukiwa amekuwa akikwepa maafisa wa polisi. Tumekuwa tukimchunguza kwa madai ya kupanga mashambulio katika maeneo ya Kaskazini mwa Kenya na Pwani,” alisema afisa wa kitengo cha kukabiliana na ugaidi Bw Dickson Indaru.

Mshukiwa huyo anakabiliwa na shtaka la kuwa katika kundi la al-Shabaab na kuzuia maafisa wa polisi kutekeleza kazi zao. Pia alidaiwa kujaribu kumshambulia Konsteboli wa polisi, Edapal Lowasa kwa kisu.

Hakimu Mkuu, Bi Edna Nyaloti alielezwa kuwa mshukiwa akiwa na nia ya kutekeleza mauaji, alijaribu kumdunga kisu afisa huyo wa polisi mnamo Septemba 11. Kulingana na maafisa hao waliiomba mahakama kumnyima mshukiwa dhamana wakidai kuwa mshukiwa huenda akakosa kufika mahakamani akiachiliwa kwa dhamana.

Walisema mshukiwa alitorokea Tanzania ambako alikuwa akijificha tangu 2013 baada ya wenzake wawili kupigwa risasi na kuuawa jijini Mombasa.

Pia waliambia korti kuwa awali kulikuwa na njama ya kutekeleza mashambulio ya kigaidi katika kanda ya Pwani ambayo yanadaiwa kupangwa na kundi la kigaidi , mshukiwa akiwa miongoni mwao.

“Kuna uwezekano wa mshukiwa kutoroka vikao vya mahakama ikizingatiwa kuwa alikuwa mafichoni tangu mwaka wa 2013,” walieleza korti.

Mahakama ilielezwa kuwa Bw Khalid pia alikuwa anachunguzwa kuhusu madai ya kuhusika kwake katika visa vya uhalifu, ambavyo ni pamoja na wizi wa pesa. Kesi hiyo itatajwa Oktoba 30.

Kwingineko, mwanamume mwenye umri wa miaka 22, ambaye alitisha kumuua mkewe waliyetengana, Jumanne alishtakiwa kwa kosa la kuharibu mali baada ya kuingia nyumbani kwa mwanamke huyo kwa nguvu.

Bw Elmelick Okari, ambaye hufanya kazi za vibarua, alishtakiwa katika mahakama ya Makadara, Nairobi kwa kuvunja vioo vya dirisha vyenye thamani ya Sh5,000 baada ya kuvamia nyumba ya Bi Mercy Kemunto Ondieki katika mtaa wa Mathare, mnamo Oktoba 28 mwaka huu.

Aidha, anakabiliwa na shtaka la kutisha kumuua Bi Ondieki.

Anadaiwa kusema hivi: “Sharti nimuue Mercy na baada ya hapo niko tayari kupelekwa jela. Sitaki kumwona maishani mwangu.” Alitoa matamshi hayo kabla ya kuvunja mlango wake na kuingia kwa nguvu alipodinda kufungua.

Jumanne, alikana mashtaka hayo mbele ya Hakimu Mkuu, Marisa Opondo huku akidai kuwa walikuwa wameoana kwa miaka miwili na wakajaaliwa mtoto mmoja aliyefariki.

“Tunaweza kuridhiana na kuishi pamoja kwa sababu bado namchukulia kuwa mke wangu,” akasema Bw Okari.

Aliachiliwa kwa dhamana ya Sh30,000 pesa taslimu. Kesi hiyo itasikizwa Machi 9, 2020.

Muturi, balozi McCater watofautiana kuhusu kujitolea kwa Amerika kuukabili ugaidi

Na CHARLES WASONGA

SPIKA wa Bunge la Kitaifa Justin Muturi na Balozi wa Amerika nchini Kyle McCater wametofautiana kuhusu suala la kujitolea kwa taifa hilo lenye nguvu duniani katika vita dhidi ya ugaidi.

Kulingana Bw Muturi kundi la al-Shabaab limekuwa likipokea ufadhili kutoka kwa mashirika mbalimbali ya kigeni kwa sababu kufikia sasa “Amerika haijalitangaza rasmi kuwa kundi la kigaidi.”

“Kwa sababu kufikia sasa Amerika haijatoa msimamo wake rasmi kwamba al-Shabaab ni kundi la kigaidi, ndiposa limeendelea kusawiriwa kama kundi la kijamii nchini Somalia. Na hivyo, linapokea misaada ya kifedha kutoka kwa mashirika ya kimataifa,” akasema Bw Muturi alipohutubu katika ukumbi wa KICC, Nairobi.

Akaongeza: “Ufadhili kwa kundi hili na makundi mengine ya wahalifu unapaswa kuzimwa ili ulimwengu uweze kushinda vita dhidi ya ugaidi.”

Hata hivyo, dai hilo la Bw Muturi lilipingwa na Bw McCater aliyejibu kuwa Amerika haijafeli kutangaza al-Shabaab kama kundi la kigaidi.

“Amerika iliunga mkono azimio nambari 751 la Umoja wa Mataifa (UN) ambalo linashikilia kuwa al-Shabaab ni kundi la kigaidi ambalo ulimwengu mzima unafaa kupambana nalo kwa kuwa ni tishio la usalama,” akasema.

Kongamano

Wawili hao walikuwa wakiongea wakati wa kongamano la kimataifa la wabunge kuhusu mikakati kupambana na uhalifu wa kimataifa.

Bw McCater alisema Amerika imekuwa ikifadhili juhudi za Kenya katika vita dhidi ya ugaidi kwa kiasi cha zaidi ya dola 100 milioni (Sh10 bilioni) kila mwaka, hatua inayoashiria kujitolea kwake kufanikisha vita hivyo.

“Hakuna tashwishi kwamba Amerika iko mstari wa mbele katika suala hili. Na tuna matumaini kuwa ulimwengu utashinda vita dhidi ya uhalifu huo,” akakariri.

Hata hivyo, Bw McCater alisema Amerika haijafurahishwa na tangazo lililotolewa na serikali ya Kenya kwamba huenda ikakata misaada ya kibinadamu kwa taifa la Somalia.

“Kenya inapaswa kuweka kando mpango huo kwa sababu utahujumu vita dhidi ya ugaidi,” akasema.

Mkutano huo unaoshirikisha wabunge na wataalamu mbalimbali katika nyanja ya usalama pia unajadili uhalifu wa kimtandao, ulanguzi wa fedha, ulanguzi wa dawa za kulevya, ufisadi miongoni mwa aina nyingine za uhalifu.

Wabunge wanajadili namna wanavyoweza kushirikiana na asasi husika za serikali kubuni sheria na sera wezeshi za kupambana na uhalifu.

Wajumbe wanaohudhuria mkutano huo, utakaotamatika Jumanne, wanatoka mataifa kama vile Amerika, Uingereza, Italia, Brazil, Ethiopia, Zimbabwe, Djibouti miongoni mwa mengine.

Polisi wahudumia mshukiwa wa ugaidi baada ya kumpiga risasi

Na WACHIRA MWANGI

WAKAZI wa mtaa wa Tudor Mwisho, Kaunti ya Mombasa jana walistaajabishwa na jinsi polisi walivyoepuka kumuua mshukiwa wa ugaidi, wakampa huduma ya kwanza ya matibabu baada ya kumpiga risasi mguuni alipokataa kujisalimisha.

Hofu ilitanda mtaani humo ghafla alfajiri wakati polisi walipoenda kumnasa mshukiwa huyo.

Wakazi waliozungumza na Taifa Leo walieleza jinsi milio ya risasi ilivyotanda kwa karibu dakika 20, polisi walipowaamuru wasitoke nje wakati wa oparesheni hiyo iliyofanywa mwendo wa saa kumi na mbili asubuhi.

Polisi hao wa kitengo cha kupambana na ugaidi (ATPU) hatimaye walifanikiwa kumpiga risasi mshukiwa huyo aliyetambuliwa kama Salim Aboud Khalid, 40, almaarufu kama Survivor, wakamjeruhi na kumpeleka hospitalini baada ya kumfanyia huduma ya kwanza ya matibabu.

Mkuu wa polisi wa Mombasa,Bw Eliud Monari alisema maisha ya mshukiwa hayamo hatarini kufuatia jeraha lake la risasi.

Mshukiwa alipigwa risasi mguuni akiwa mafichoni na inadaiwa alijaribu kuwashambulia maafisa wa ATPU waliomtaka ajisalimishe.

Watu walioshuhudia kisa hicho walisema kuwa maafisa wa ATPU wasiopungua 17 waliwasili katika eneo hilo wakiwa wameabiri magari matatu.

“Lengo lao halikuwa kuua. Hii ni kwa sababu mtu mmoja alipojaribu kutoroka nilisikia mmoja wao akiwaambia wenzake: ‘piga mguu’,” akasema shahidi aliyeomba jina lake libanwe.

Maafisa wa polisi walijigawa katika makundi matatu wakati wa oparesheni hiyo. Bw Monari alithibitisha kwamba mshukiwa huyo ambaye sasa yuko chini ya ulinzi mkali hospitalini ndiye alikuwa akisakwa na maafisa wa ATPU.

“Polisi walisikika wakimsihi mshukiwa aliyepigwa risasi kujisalimisha wakisema kwa sauti: ‘inua mikono juu tutakuua weeeee’,” akasema mkazi aliyeshuhudia tukio hilo.

Katika hali ambayo wakazi wengi waliona si ya kawaida, maafisa wa polisi walimpa mshukiwa huyo huduma ya kwanza ya matibabu kabla kumkimbiza hospitalini.

“Tunashukuru Mungu tumemkamata akiwa hai,” maafisa hao walisikika wakisema.

Haikubainika ni lini mshukiwa huyo atafikishwa kortini wala mashtaka yatakayomkabili.

Hata hivyo, duru zilisema wakati mwingi polisi wakiamua kutomuua mshukiwa wa aina yoyote ya uhalifu hata anapokataa kujisalimisha na kuwashambulia, huwa inamaanisha kuna habari muhimu wanazohitaji kutoka kwake.

Mbinu za kukabiliana na ugaidi kufunzwa shuleni nchini Kenya

Na CHARLES WASONGA

RAIS Uhuru Kenyatta ametangaza kuwa serikali itaanzisha mpango wa kutoa mafunzo kuhusu mbinu za kuzuia ugaidi katika shule za humu nchini baada ya miezi michache ijayo.

Akiongea Jumatano alipofungua rasmi kongamano kuhusu mipango ya kukabiliana na ugaidi katika makao makuu ya Shirika la Umoja wa Mataifa Kuhusu Mazingira (UNEP), Gigiri, Nairobi, Rais Kenyatta amesema mtaala wa mafunzo ya hayo na fani nyinginezo za usalama wa wanafunzi tayari umetayarishwa na Wizara ya Elimu.

“Lengo kuu la mpango huu ni kuwalinda watoto wetu dhidi ya vitisho vya ugaidi katika maisha yao. Pia masomo aina hiyo yatawakinga kutokana na uwezekano wa wao kusajiliwa kwa mafunzo ya kigaidi,” akasema.

Kumekuwa na visa vingi vya wanafunzi wa shule na vyuo vikuu na vile vya kadri kushawishiwa na wafuasi wa makundi ya kigaidi kwenda kupewa mafunzo ya kigaidi hasa katika taifa jirani la Somalia.

Ni vijana kama hawa ambao hutumiwa na wakuu wa wanamgambo hao wa al-Shabaab kupanga mashambulio ya kigaidi katika maeneo mbalimbali nchini hasa Kaskazini Mashariki na Pwani ya Kenya.

Mkakati

Rais Kenyatta aliongeza kuwa serikali imeandaa mkakati wa kupambana na ugaidi katika ngazi za kaunti kwa lengo la kupunguza visa vya mashambulio na kuimarisha usalama nchini.

“Vita dhidi ya ugaidi za vimegatuliwa kupitia kuandaliwa kwa Mipango ya Kuzuia Mashambulio katika ngazi ya Kaunti,” akasema.

Akaongeza: “Mipango imeundwa ili kuafiki mahitaji ya kila moja ya kaunti 47 na yanashirikisha vikosi vya usalama, maafisa wa utawala, makundi ya mashirika ya kijamaa na wananchi wa kawaida. Lengo hapa ni kutekeleza mipango hiyo katika muda maalumu.”

Rais Kenyatta amesema mataifa ya Afrika yanahitaji kuwa na mikakati thabiti ya kukabiliana na ugaidi na pia kuweka mipango ya kuwasitisha, kuwarekebisha na kuwarudisha katika jamii wale wanaokuwa na mawazo na mafunzo ya kigaidi.

Rais aliongeza kwamba ugaidi ni changamoto kwa Afrika na hivyo basi sharti Afrika ibuni suluhisho na mikakati ya pamoja dhidi ya uovu huo.

“Natoa wito kwa Umoja wa Afrika (AU) kuweka mkataba wa kisiasa wenye nguvu kukabiliana na kushinda ugaidi na namna zote za misimamo mikali yenye kusababisha ugaidi,” akasema Rais.

Kwa upande wake, Katibu Mkuu wa Umoja wa Mataifa (UN) Antonio Guterres amesema Umoja wa Mataifa umejitolea kikamilifu kufanya kazi na mataifa na mashirika yote katika vita dhidi ya ugaidi.

Shughuli hiyo pia ilihudhuriwa na Mwenyekiti wa AU Moussa Faki Mahamat.

Ashtakiwa kujiunga na Al-Shabaab, ISIS na ISIL

Na RICHARD MUNGUTI

MWANAFUNZI katika mojawapo ya vyuo vya teknolojia nchini alishtakiwa Jumanne kwa kuwa mwanachama wa makundi matatu ya ugaidi.

Job Kimathi Gitonga almaarufu Khaleed almaarufu Kim aliamriwa azuiliwe katika kituo cha polisi cha kupambana na ugaidi ATPU kwa muda wa siku saba kuhojiwa.

Kiongozi wa mashtaka Angela Odhiambo alimsihi hakimu mkuu Francis Andayi aamuru mshtakiwa azuiliwe hadi Juni 18 kuhojiwa na maafisa wa kupambana na ugaidi nchini.

Wakili David Ayuo anayemwakilisha mshtakiwa alipinga ombi hilo lakini mahakama ikaamuru azuiliwe kuwasaidia polisi kukamilisha uchunguzi.

Mahakama ilifahamishwa mshtakiwa alikutwa katika jengo la Norwich Union, jijini Nairobi akiwa na video, picha na taarifa za kigaidi.

Mshtakiwa alikana kuwa mwanachama wa makundi ya Al-shabaab, Islamic State of Iraq and Syria (ISIS) na Islamic State of Iraq and the Levante (ISIL) yaliyopigwa marufuku nchini.

“Utarudishwa mahakamani Juni 18 wakili wako atakapowasilisha ombi la kuachiliwa kwako kwa dhamana,” hakimu alimweleza mshtakiwa.

Polisi ange kuzima njama za kigaidi

Na MARY WAMBUI

MAAFISA wa polisi nchini wako macho kutokana na uwezekano wa kutokea kwa shambulizi la kigaidi kufuatia kukamatwa kwa washukiwa wanne wa ugaidi katika hoteli za Intercontintal na Hilton, Nairobi mnamo Jumanne na Alhamisi.

Vilevile kitengo cha usalama kiliripoti kwamba vilipuzi na zana hatari zilipatanikana Ijumaa iliyopita katika barabara kuu ya Narok-Bomet, hali inayozidisha hatari ya kiusalama.

Mnamo Jumanne, washukiwa wawili walikamatwa katika hoteli ya Hilton baada ya mienendo yao kuzua maswali huku wengine wawili wenye asili ya Kisomali pia wakinyakwa katika hoteli ya Intercontinental walikoenda kama wageni waliotaka kukodi chumba ilhali hawakuwa na stakabadhi maalum.

Akizungumza na Taifa Leo, Mkuu wa Polisi wa Nairobi Phillip Ndolo alisema maafisa wa usalama wamewekwa katika hali ya tahadhari kuhusu shambulio la kigaidi hata baada ya kukamilika kwa mwezi Mtukufu wa Ramadhan, wakati ambao onyo kuhusu matukio ya kigaidi lilitolewa.

“Onyo tulilolitoa bado linabakia hivyo na litaendelea kwa muda. Hata hivyo, halifai kuzingatiwa katikati mwa jiji pekee bali pia katika maeneo mengine nchini,” akasema Bw Ndolo.

Washukiwa walionyakwa wanaendelea kuhojiwa kuhusu mienendo yao katika vituo mbalimbali vya polisi ambavyo Bw Ndolo hakuvifichua kutokana na sababu za kiusalama.

“Uchunguzi bado unaendelea na huenda ukachukua muda zaidi. Hakuna aliye na stakabadhi za utambulisho kati yao na tunataka kujua walitoka wapi, walikuwa wakienda wapi na lengo lao lilikuwa nini,” akaongeza Bw Ndolo kuhusu washukuwa waliobambwa Nairobi.

Ingawa hivyo, alisema wanne hao huenda wasifunguliwe mashtaka ya kupanga shambulizi la kigaidi lakini watakabiliwa kisheria kutokana na makosa mengine punde tu uchunguzi utakapokamilishwa.

Kufuatia matukio hayo mawili jijini Nairobi, polisi walizidisha doria Jumamosi na Jumapili jijini humo na maeneo ya kuabudu.

Akizungumza akiwa Bomet, Msemaji wa Polisi Charles Owino alisema kuwa maafisa wa polisi siku za nyuma wametibua njama nyingi za kigaidi kwa sababu Wakenya wamekuwa wakiwapasha habari kuhusu watu wenye mienendo ya kutiliwa shaka.

Kenya, Uingereza kushirikiana katika vita dhidi ya ugaidi

Na CHARLES WASONGA

SERIKALI za Kenya na Uingereza zimesisitiza haja ya kushirikiana katika vita dhidi ya ugaidi.

Akiongea Alhamisi wakati wa sherehe ya kuzindua ujenzi wa Makao Makuu mapya ya Idara ya Polisi wa kukabiliana na Ugaidi (ATPU) mjini Mombasa, Balozi wa Uingereza nchini, Nick Hailey amesema taifa lake limejitolea kuisadia Kenya kukabiliana na uhalifu huo ili kuwalinda raia wake na Wakenya.

Amesema Uingereza inashirikiana na kuisadia Kenya katika kukabiliana na mashambulio ya kigaidi ambayo alisema ni kero ya kimataifa inayohitaji ushirikiano katika ngazi hiyo kuutokomeza.

Balozi Hailey amesema makao hayo makuu ni muhimu katika mchakato mzima wa kuharibu vituo vya magaidi na mashambulio ya kila mara katika eneo hili ambalo ni kitovu cha mafunzo ya kigaidi.

Inaaminika kuwa magaidi hao wana uhusiano wa karibu na kundi la al-Shabaab lenye makao yake nchini Somalia.

“Kero ya ugaidi imeathiri Uingereza pia. Hapa nchini imesababisha vifo vya Wakenya na Waingereza wengi hasa katika ukanda wa pwani ya Kenya. Tunajua hili ni tishio ambalo limevuka mipaka; tishio linalohitaji ubadilishanaji wa habari za kijasusi,” akasema.

Balozi Hailey amesema ushirikiano kati ya Uingereza na Kenya katika vita dhidi ya ugaidi ni moja katika ya wajibu mkuu wa nchi hiyo.

Hata hivyo, mwakilishi wa Malkia wa Elizabeth wa Uingereza amesisitiza kuwa vita dhidi ya ugaidi sharti viendeshwe kisheria.

“Hii itahakikisha kuwa magaidi hawakwepi mkono wa sheria kwa sababu ya makosa au ukosefu wa vifaa vya uchunguzi. Wapelekezi na waendesha mashtaka pia wanafaa kujenga kesi zenye mashiko katika ngazi kadha za utekelezaji wa haki,” Bw Hailey amesema.

Ujenzi wa makao hayo makuu ya ATPU umefadhiliwa na Uingereza iliyotoa kiasi cha Sh60 milioni.

Kwa upande wake mkurugenzi wa upelelezi George Kinoti ameishukuru serikali ya Uingereza kwa mchango wake na kushirikiana na Kenya katika masuala mbalimbali hasa usalama.

Kinoti amesema kupitia kwa msaada wa hapa nchini na wa kigeni kupitia ubadilishanaji habari za kijasusi, polisi wamefanikiwa kukabiliana na vitisho kadhaa vya ugaidi.

Naye Mkurugenzi wa Mashtaka ya Umma (DPP) Noordin Haji ambaye pia amehudhuria shughuli hiyo amesifu ujenzi wa makao hayo makuu akisema yatawasaidia polisi kukusanya ushahidi tosha dhidi ya washukiwa wa ugaidi.

Mradi huo umeratibiwa kukamilika Desemba 2019.

Walioasi ugaidi wasaidiwe – DPP

Na MOHAMED AHMED

UKOSEFU wa mpango murwa wa kuwarekebisha tabia na kuwarudisha kwenye jamii waliokuwa wamejiunga na makundi ya kigaidi, kunazorotesha vita dhidi ya uhalifu huo.

Hili liliibuka jana huku serikali ikifichua mbinu mpya zinazotumika na magaidi kuingiza vijana kwenye makundi yao.

Ilifichuka pia kuwa, licha ya Mombasa kuwa miongoni mwa maeneo yenye visa vingi vya kuhusiana na masuala ya ugaidi, hakuna hata kituo kimoja cha kurekebisha tabia kwa wale wanaoujinasua kutoka kwenye makundi hayo.

Mkurugenzi wa Mashtaka ya Umma (DPP), Noordin Haji alieleza kuwa kushuka kwa maadili katika jamii kumechangia pakubwa vijana kuingizwa kwenye makundi hayo.

Akizungumza wakati wa uzinduzi wa mpango wa kupambana na misimamo mikali katika hoteli ya Pride Inn, jijini Mombasa, Bw Haji alisema ukosefu wa mpango wa kutatua shida za vijana wanaorudi kutoka Somalia na kwingineko kunakosesha mwelekeo vita hivyo.

“Tumeona ongezeko la talaka, hali inayochangia vijana wetu kuingizwa kwenye makundi hayo kwa urahisi,” akasema Bw Haji.

Alieleza kuwa kuna haja ya kuondoa kasumba kuwa kila Muislamu ni gaidi, na kusisitiza kuwa Kenya ni nchi huru ambayo inazingatia umuhimu wa dini.

“Kama Waislamu tusipeane nafasi kwa wale wenye nia ya kuharibu jina la dini hii. Ni lazima tusimame wima ili kuondoa tatizo hili la ugaidi, ambalo linaleta picha mbaya kwetu,” akasema.

Mkurugenzi wa shirika la Haki Afrika, Hussein Khalid alisema kuwa, kuhusishwa kwa jamii ni njia kuu ya kupambana na magaidi ambao hueneza imani potovu miongoni mwa wananchi, hasa vijana.

Vitisho vya magaidi kuvamia Kiganjo, Nyeri na Nanyuki vyachunguzwa

Na NICHOLAS KOMU

USALAMA umeimarishwa eneo la Mlima Kenya kufuatia ripoti kwamba magaidi wanapanga kushambulia Chuo cha Mafunzo ya Polisi kilichoko Kiganjo na makanisa kadhaa katika Kaunti ya Nyeri.

Maafisa wa usalama walitoa tahadhari ya shambulizi la kigaidi huku uchunguzi ukiendelea kufuatia habari hizo.

Kamishna wa Kaunti ya Nyeri, Fredrick Shisia, Jumanne aliambia Taifa Leo kwamba mashirika kadhaa ya usalama yanaendelea kuchunguza vitisho hivyo.

“Kumekuwa na vitendo vya kigaidi ambavyo vimekabiliwa kufikia sasa. Mashirika husika yanaendelea kuchunguza vitendo hivyo na vilipoanzia,” alisema Bw Shisia.

Kulingana na duru za polisi, vitisho vya kwanza vilipokelewa Jumamosi vikidai kwamba kungekuwa na mashambulizi katika makanisa kadhaa ambayo hayakutajwa katika Kaunti ya Nyeri.

Kufuatia habari hizo, usalama uliimarishwa katika maeneo ya kuabudu katika kaunti hiyo.

Jumatatu usiku, polisi waliongeza doria mjini Nyeri baada ya wapelelezi kupata habari kwamba Chuo cha Kitaifa cha Mafunzo ya Polisi kilichoko Kiganjo kingeshambuliwa.

Maafisa wa polisi walitumwa kwa wingi kupiga doria karibu na chuo hicho katika juhudi za kuzuia shambulio hilo. Polisi walisema walikuwa wakichunguza chanzo cha habari hizo.

Hakuna aliyekamatwa kuhusiana na vitisho hivyo lakini Bw Shisia alisema wanafuatilia habari muhimu.

“Hili ni suala tunaloendelea kuchunguza tunapoimarisha usalama. Baadhi ya vitisho hivi vinalenga asasi muhimu kama taasisi za masomo na makanisa na maafisa wetu wanafanya kila wawezalo kuzuia shambulio la aina yoyote,” alisema Bw Shisia.

Ripoti za tisho hilo zilijiri siku chache baada ya mwanafunzi kukamatwa akiwa na vifaa vilichoshukiwa kuwa vilipuzi karibu na Chuo Kikuu cha Teknolojia cha Dedan Kimathi.

Bruce Ndegwa, ambaye anazuiliwa na polisi kwa siku saba kufuatia agizo la mahakama, alikuwa amejifunga vifaa hivyo mwilini, kiunoni na kifuani.

Usalama pia umeimarishwa mjini Nanyuki katika Kaunti ya Laikipia baada ya tisho la kigaidi kuripotiwa katika eneo ambalo halikutajwa.

Kamishna wa Kaunti hiyo Onesmus Musyoki alithibitisha kuwa polisi wanachunguza vitisho hivyo lakini hakufichua zaidi.

“Kumekuwa na vitisho, baadhi ni uvumi lakini tunazichukulia kwa uzito sana. Uchunguzi unaendelea kuhusu habari tulizopokea,” alisema Bw Musyoki.

Maafisa wa NTSA wanaoshukiwa kuhusika kwa mauaji ya DusitD2 waachiliwa

Na RICHARD MUNGUTI

MAAFISA watano wa Mamlaka ya Kitaifa ya Usalama wa Uchukuzi (NTSA) waliotiwa nguvuni na kuzuiliwa kuhusishwa na shambulizi la hoteli ya DusitD2 ambapo watu 21 waliuawa waliachiliwa Ijumaa.

Hakimu mkazi Bi Muthoni Nzibe alifahamishwa na upande wa mashtaka kwamba hakuna ushahidi uliopatikana kuwahusisha moja kwa moja maafisa hao wa NTSA na shambulizi hilo lililotekelezwa na magaidi wa Al Shabaab mtaani Westlands, Nairobi.

Bi Nzibe alikuwa ameamuru watumishi hao sita wa wazuiliwe kwa muda wa siku 30 kuwasaidia polisi kukamilisha uchunguzi.

“Naomba hii mahakama iwaachilie washukiwa kwa vile hakuna ushahidi wa kuwahusisha na shambulizi hilo,” kiongozi wa mashtaka alimweleza Bi Nzibe Ijumaa alasiri.

Hakimu aliombwa awaachilie washukiwa hao watano kisha awaamuru wawe wakipiga ripoti kwa afisi ya kupambana na ugaidi ATPU kila Alhamisi hadi maagizo mengine yatolewe.

Hakimu alifahamishwa wafanyakazi hao wa NTSA walishukiwa waliwasaidia magaidi hao kwa kuandikisha magari mawili tofauti wakitumia nambari moja ya usajili – KCN 240E.

Gari hili muundo wa Toyota Ractis, ndilo lilitumiwa na magaidi hao kwenda DusitD2 mnamo Januari 15, 2019.

Watano kati ya maafisa hao sita wanadaiwa kuhusika kwenye kashfa ya kutengeneza nambari feki za usajili wa magari.

Bi Nzibe alielezwa na kiongozi wa mashtaka Bw Duncan Ondimu kuwa maafisa hao wa NTSA waliwasaidia magaidi hao kwa kuwapa nambari feki ya usajili.

“Naomba hii mahakama iwaruhusu polisi wawahoji washukiwa hawa kwa siku 30 ndipo ukweli ujulikane kuhusu kashfa ya utoaji nambari feki za usajili wa magari,” Bw Ondimu alimweleza hakimu washukiwa walipofikishwa mahakamani wiki iliyopita.

Wakili Dunstan Omari aliyewatetea maafisa hao wa NTS. Picha/ Richard Munguti

Lakini ombi hilo lilipingwa vikali na mawakili Dunstan Omari na Jotham Arwa waliosema muda unaoombwa na polisi ni mwingi na uchunguzi unaotakiwa kufanywa sio mwingi vile.

“Kuwapa polisi muda huo wa siku 30 ni ukandamizaji wa haki za washukiwa,” alisema Bw Omari.

Bw Arwa alimweleza hakimu kuwa mkurugenzi wa mashtaka ya umma anatakiwa kuwafikisha kortini washukiwa baada ya kukamilisha uchunguzi.

Bi Nzibe alikubalia ombi la DPP akisema polisi wanahitaji muda kukamilisha zoezi hilo.

Waliozuiliwa ni Bw Anthony Kadu, anayefanya kazi katika idara ya usajili. Kazi yake ni kuandikisha magari kwa wanunuzi wapya. Bi Jacqueline Githinji, mkurugenzi wa usajili na utoaji leseni, Bw Cosmas Ngeso, ambaye ni naibu wa Bi Githinji.

Wengine ni Bw Irving Irungu, Bw Stephen Kariuki, karani anayehusika na upeanaji wa nambari za usajili na Bw Charles Ndung’u anayefanya kazi katika idara ya utoaji wa hatimiliki za magari.

Wa mwisho ni Bw Augustine Mulwa Musembi aliyefikishwa kortini Jumatano. Polisi walikubaliwa kumzuilia Bw Musembi kwa muda wa mwezi mmoja.

Uchunguzi wa polisi ulibaini nambari ya usajili ya gari hilo -Toyota Ractis nambari ya usajili KCN 240E –  lililotumiwa na magaidi watano waliouawa limesajiliwa na gari lingine muundo tofauti lililopatikana Kitengela, Kaunti ya Kajiado.

Polisi wanasema usajili wa gari moja ni feki ama ulifanywa kwa njia ya udanganyifu.

Bw Musembi anahofiwa ndiye alisaidia katika usajili huo feki ilhali Bw Kadu anadaiwa ndiye alimwamuru Musembi kuandikisha tena nambari hiyo iliyotumiwa na magaidi hao.

Polisi waliomba muda kuwahoji maafisa hao wa NTSA na kuendeleza uchunguzi mwingine wa kina.

“Ni muhimu polisi kupewa muda kukamilisha uchunguzi na kubaini utengenezaji na utoaji wa nambari ya usajili inayopewa magari mawili tofauti,” korti iliombwa.

Hakimu aliamuru kesi hiyo itajwe Februari 28, 2019.

WASONGA: Walinzi wapewe bunduki lakini iwe kwa masharti

Na CHARLES WASONGA

NI jambo la busara kwa serikali kubadili mikakati yake ya kukabiliana na utovu wa usalama nchini, hususan, mashambulio ya kigaidi.

Hii ni kwa sababu bila kuwepo kwa usalama serikali haitaweza kutimiza malengo yake makuu ya maendeleo kwa manufaa ya wananchi..

Hii ndio maana naunga mkono wazo la kuwapa walinzi wa kibinafsi, almaarufu askari gongo, bunduki kuanzia mwezi wa Julai mwaka huu.

Hii ni kwa sababu wakati wowote tukio la utovu wa usalama linapotokea, kama vile shambulio la kigaidi katika hoteli ya DusitD2 jijini Nairobi wiki iliyopita, walinzi ndio huwa wa kwanza kulengwa au kukabiliana na wahusika.

Lakini mpango huo uliotangazwa wiki jana na Mkurugenzi wa Mamlaka ya Kudhabiti Kampuni za Kibinafsi za Ulinzi (PSRA), Bw Fazul Mohamed unafaa kutekelezwa kwa makini kabisa ili kuzuia visa ambapo bunduki hizo zinaweza kutumiwa visivyo.

Kwanza, serikali na kampuni husika zinapasa kutenga pesa za kutosha za kuhakikisha kuwa takriban walinzi 500,000 ambao wameajiriwa na zaidi ya kampuni 1,000 zilizosajiliwa wamepewa mafunzo upya kuhusu matumizi ya silaha hizo.

Na sio mafunzo tu, kampuni husika pamoja na mamalaka ya PSRA zinapasa kuhakikisha kuwa ni askari wenye maadili mema pekee wanaopatiwa mafunzo hayo ya kutumia bunduki.

Nasema hivi kwa sababu kumekuwepo na visa ambapo polisi waliopewa mafunzo ya hali ya juu wametumia silaha zao kuwahangaisha wananchi wasio na hatia au kuzikodisha kwa wahalifu. Hii ni kwa sababu maafisa kama hawa huwa wamepotoka kimaadili.

Pili, sheria inapasa kubuniwa itakayoongoza matumizi ya bunduki katika sekta ya ulinzi wa kibinafsi. Chini ya mwavuli wa sheria hiyo, mamlaka huru ya kusimamia matumizi ya bunduki na silaha zingine hatari katika sekta ya kibinfisi inafaa kubuniwa na kupewa ufadhili wa kutosha.

Ni mamlaka kama hii ambayo itatwikwa jukumu la kushirikisha mafunzo kwa askari na kuwapiga msasa wale ambao wanapasa kupewa bunduki. Isitoshe, ni mamlaka kama hii ambayo itahifadhi habari na maelezo kuhusu bunduki zote zinazotumika na askari wa kampuni mbalimbali za ulinzi.

Kupitia njia hii, itakuwa rahisi kwa serikali kutambua askari ambao watatumia silaha zao kuendeleza uhalifu, kama vile kuzikodisha kwa wezi na wakora wengine.

Ni mamlaka kama hii ambayo vile vile itaweka viwango vya kuhitimu kwa askari ambao watapewa mafunzo ya matumizi ya bunduki.

Kwa hivyo, kamati ya bunge kuhusu usalama wa ndani inapasa kushirikiana sako kwa bako na mamlaka ya PSRA inayosimamiwa ili kuunda mswada kuhusu mabadiliko katika sekta ya ulinzi wa kibinafsi.

Mswada huo unapasa kuandaliwa mapema ili uweze kuwasilishwa bungeni mwezi ujao Bunge litakaporejelea vikao vyake baada ya likizo ndefu.

Hii ndio njia ya kipekee ya kuhakikisha kuwa mpango huu unachangia kuimarishwa kwa usalama nchini hasa nyakati hizi ambapo mashambulio ya kigaidi yameanza kutokea tena.

TAHARIRI: Tusilenge Waislamu katika vita dhidi ya ugaidi

NA MHARIRI

Shambulio la wiki jana kwenye hoteli ya DusitD2 lilishtua si tu Kenya, bali ulimwengu mzima kwa namna magaidi walivyoivamia hoteli hiyo na kuua zaidi ya watu 20.

Ni tukio ambalo linapaswa kukashifiwa na kila Mkenya mpenda amani. Shambulio hilo lisitumiwe kupaka tope dini ya Kiislamu na Waislamu ambao tumeishi nao na miaka na mikaka. Tumetangamana nao kwa wema na hata kuoana na kuendeleza kizazi na wao.

Kudai kwamba Uislamu unaunga mkono ugaidi ni upotofu na kukosa kumakinikia matamshi yanayoweza kuvuruga umoja na udugu wetu kama Wakenya. Maafisa wa Usalama wanaosaka magaidi wasiwahangaishe waumini wa Kiislamu ambao hawana hatia, bali wawafichue magaidi hao na kuwaweka katika mizani ya haki, ili waathiriwa nao wapate haki yao.

Katika tukio la hivi majuzi na matukio mengine ya ugaidi kama vile lile la Westgate na Chuo Kikuu cha Garissa, ndugu zetu Waislamu waliungana na raia wengine nchini kuyakashifu matendo hayo ya kinyama yasiyo na utu.

Vyombo vya habari vilisaidia kusambaza ujumbe huu wa kizalendo. Ugaidi haujui dini wala kabila. Miongoni mwa waathiriwa wa ugaidi juzi walikuwa ndugu zetu Waislamu kwa majina Abdallah na Feisal nao walikuwa Waislamu, au sio?

Tumeona majina ya washukiwa wakuu katika shambulio la DusitD2 na mashambulio mengine yakiwa si majina ya Kiislamu pekee. Hivi ni kusema kwamba mtu yeyote aweza kupewa mafunzo ya itikadi kali akawa gaidi.

Kama ilivyoshadidia serikali na mashirika ya umma, sote tunapaswa kukaa ange na kuwafahamu majirani wetu ili kukitokea matukio kama haya, iwe rahisi kuwatambua. Tuheshimu dini zetu zote kwa manufaa ya kila mmoja.

Mola awape subira waliopoteza wapendwa wao katika uvamizi wa hivi punde, na waliojeruhiwa wapate nafuu ya haraka. Tuakatae kukatishwa na magaidi hawa hayawani na tushikamane tuwe ngao dhidi ya wale wanaotaka kutugawanya kwa misingi ya dini na kabila.