Waiguru ateuliwa kati ya wanawake 100 bora bara Afrika

Na KENYA NEWS AGENCY

GAVANA wa Kirinyaga, Jumatatu aliteuliwa na Kituo cha Habari cha Avance kati ya wanawake 100 bora wenye ushawishi mkubwa Afrika.

Bi Anne Waiguru aliteuliwa pamoja na viongozi mbalimbali Afrika ambao wamekuwa na ushawishi na mafanikio makubwa kwa umma.

Kampuni ya Avance inahusika na kubadilisha simulizi kuhusu Waafrika kupitia ukadiriaji na viwango vya ushawishi kwa umma. Nia ya uteuzi huo ni kuonyesha na kusherehekea mafanikio ya wanawake 100 bora barani Afrika.

Uteuzi huo unajumuisha uongozi bora, utendakazi, mafanikio ya kibinafsi na uwezo wa kushawishi jamii.

Miongoni mwa viongozi walioteuliwa ni aliyekuwa rais wa Liberia, Ellen Johnson Sirleaf, rais wa Ethiopia, Sahle-Work Zedwe, rais wa Tanzania, Samia Suluhu Hassan, rais wa Ligi ya Wanademokrasia wa Kongo, Angele Makombo, aliyekuwa naibu rais wa Gambia, Aja Fatouma Tambjang, katibu mkuu wa Umoja wa Mataifa (UN), Amina J Mohamed, jaji mkuu, Martha Koome na gavana wa Kitui, Charity Ngilu.

Kituo hicho cha Avance kilisema walioteuliwa watatoa mafunzo kwa wanawake viongozi kupitia programu ya ‘Be a Girl’.

Mnamo 2017, Bi Waiguru alichaguliwa kati ya magavana watatu wa kwanza wanawake nchini.

Baadaye mwaka huo huo, alichaguliwa kama Makamu Mwenyekiti wa Baraza la Magavana na pia kuwa mwanamke wa kwanza kuwahi kushika wadhifa huo.

Waiguru alia kuhangaishwa tena na EACC

Na WANDERI KAMAU

GAVANA Anne Waiguru wa Kiringaga amedai kuwa ameanza kuhangaishwa na washindani wake kisiasa baada ya kusema anatathmini mwelekeo wa kisiasa atakaofuata, uchaguzi mkuu wa 2022 unapoendelea kukaribia.

Hapo jana, Bi Waiguru alisema ameagizwa na Tume ya Maadili na Kupambana na Ufisadi (EACC) kufika katika afisi zake, kwa madai ya “matumizi mabaya” ya Sh52 milioni.Kulingana na Bi Waiguru, matumizi ya fedha hizo yaliidhinishwa na Bunge la Kaunti ili kulipa deni ambalo kaunti hiyo imekuwa nalo tangu mwaka 2010.

Alisema deni hilo lilitokana na ugavi wa ardhi ulioendeshwa katika eneo la makazi la South Ngariama, lenye zaidi ya ekari 7,000.

“Ni kinaya kwa EACC kuniagiza nifike katika afisi zake ilhali inafahamu hili ni deni ambalo serikali ya Kaunti imekuwa nalo kwa muda mrefu,” akajitetea gavana huyo kwenye taarifa.Bi Waiguru alihusisha maagizo hayo na “vitisho vya kisiasa” ambavyo amekuwa akipokea tangu Mchakato wa Kubadilisha Katiba (BBI) ulipoanza.

“Harakati za kuipigia debe BBI zilipoanza, nilisema nitatangaza msimamo wangu baada ya muda. EACC ilivamia afisi zangu. Majuzi, nilisema ninatathmini mwelekeo wa kisiasa nitakaofuata, sasa nimepewa maagizo hayo. Je, hii ni sadfa ama ni vitisho ambavyo vimekuwa vikiendeshwa dhidi yangu?” akashangaa.

Hata hivyo, wadadisi wa siasa wanasema kuna uwezekano patashika hizo zinatokana na mwelekeo wa siasa za 2022 katika eneo hilo.

Ingawa Bi Waiguru ametangaza atatetea kiti chake cha ugavana, amekuwa akionekana kuwa miongoni mwa viongozi walio na nafasi kubwa kumrithi Rais Uhuru Kenyatta kama msemaji wa Mlima Kenya.

Baadhi ya viongozi ambao wametangaza nia ya kuwania ugavana katika kaunti hiyo ni Katibu wa Wizara ya Usalama wa Ndani Karanja Kibicho, Mwakilishi wa Wanawake Wangui Ngirichi, kiongozi wa Narc-Kenya Martha Karua kati ya wengine.

Kwa muda sasa, Bi Waiguru amekuwa akimlaumu Dkt Kibicho kwa kutumia ushawishi wake kuingilia utendalazi wa serikali ya kaunti.Hata hivyo, Dkt Kibicho amekuwa akijitenga na madai hayo, akisisitiza yeye ni mtumishi wa serikali na hana azma yoyote ya kujitosa kwenye siasa.

Nilishtuka mno kuamshwa na watu wakisaka ushahidi kwa nyumba yangu – Waiguru

Na MARY WANGARI

Gavana wa Kaunti ya Kirinyaga Anne Waiguru yamkini amekerwa baada ya makachero wa EACC kuvamia makao na afisi yake mapema Alhamisi, Agosti 20, 2020.

Kupitia taarifa kwa vyombo vya habari, bosi huyo wa kaunti alitaja kisa hicho kama njama za kisiasa zinazochochewa na siasa za urithi katika eneo la Mlima Kenya.

Kulingana naye, kisa hicho kililenga kuwafumba macho Wakenya ili waache kuuliza maswali kuhusu uporaji uliokithiri wa mali ya umma katika siku za hivi karibuni.

“Hizi ni njama zilizodhamiriwa kuwatatiza watu ambao hivi majuzi wamekuwa wakiuliza maswali ya haki kuhusu jinsi kiasi kikubwa cha fedha za umma kimekuwa kikitumika,” ilisema taarifa.

Gavana huyo alisisitiza kwamba kwa mara nyingine, alikuwa akitumiwa kama chambo huku akisema kuwa njama hizo zitagonga mwamba sawa na jinsi zilivyokosa kufaulu hapo awali.

“Nimekuwa hapa hapo mbeleni. Nimetumika kama chambo mbeleni. Njama hizo zilifeli na zitafeli hata sasa. Madai yasiyo na msingi yanarushwa kiholela na kuambulia patupu bila hata ushahidi thabiti. Huu ni mtego,” alisema.

Kiongozi huyo alishangaa ni kwa nini EACC ililazimika kutuma kundi la makachero waliojihami katika uvamizi huo alfajiri ili kutwaa tu kitabu cha hundi ilhali angekiwasilisha kirahisi endapo angehitajika kufanya hivyo.

“Hivyo basi hakuna chochote unachoweza kutafuta katika nyumba ya mtu kama ushahidi wa usimamizi wa matumizi. Ni jambo la kushtusha kuamshwa na kundi la maafisa waliojihami kikamilifu wakivamia nyumba yangu kutafuta ushahidi kuhusu hela za matumizi.

“Kwa hakika, hukuhitaji kikosi cha maafisa wa polisi waliojihami kwa bunduki, kuvamia boma langu gizani ili kutwaa kitabu cha hundi! Kingepatikana kupitia agizo rahisi tu,” alihoji.

Waiguru alieleza kuwa tayari alikuwa amewasilisha stakabadhi husika wakati wa kikao cha Seneti kuhusu jaribio la kumng’atua mamlakani, kilichopeperushwa moja kwa moja kupitia vituo vya televisheni.

Aidha, alisaili kuhusu mabadiliko katika kiasi cha hela alizohusishwa nazo katika kikao hicho cha Seneti mnamo Mei kutoka Sh22 milioni hadi Sh10 milioni.

Viongozi wa kidini waombea Waiguru na madiwani wapatane

Na GEORGE MUNENE

VIONGOZI wa kidini sasa wameamua kuombea Gavana wa Kirinyaga Anne Waiguru na madiwani wa kaunti hiyo ili wamalize mzozo unaotisha kulemaza huduma katika kaunti hiyo.

Wakati wa maombi waliyofanya mjini Kutus na kushirikisha madhehebu mbalimbali, viongozi wa kidini walisema kuwa wananchi ndio wanaathiriwa na vita hivyo.

Walitoa wito kwa wanasiasa hao kupatana kwa ajili ya amani na maendeleo katika kaunti hiyo.Wakiongozwa na Askofu wa Kanisa la Kianglikana dayosisi ya Kirinyaga, Joseph Kibucwa, viongozi hao walielezea hofu kwamba vuta nikuvute hiyo inaathiri utendakazi wa serikali ya kaunti.

Wabunge wote wa kaunti hiyo hawakuhudhuria shughuli hiyo isipokuwa Mbunge Mwakilishi wa Wanawake, Wangui Ngirici na madiwani watatu kati ya jumla ya 33.

Gavana Waiguru pia hakufika katika mkutano huo wa maridhiano japo aliwakilishwa na waziri wa ardhi katika Kaunti ya Kirinyaga, Kasisi Samuel Kanjobe.

Hata hivyo, mkutano huo ulihudhuriwa na Mwenyekiti wa Jubilee tawi la kaunti ya Kirinyaga Mureithi Kang’ara ambaye alisifu maombi hayo.

Viongozi hao walikariri umuhimu wa kuwepo kwa umoja miongoni mwa viongozi waliochaguliwa ili kuwe na mazingira bora ya utekelezaji wa miradi ya maendeleo yenye manufaa kwa wakazi.

Walisema wanasikitika kuwa viongozi wanalumbana huku wananchi wakiteseka kwa kukosa huduma katika takriban idara zote za serikali hiyo.

“Viongozi wakipigana na wananchi huumia,” akasema Askofu Kibucwa.Waliwataka Gavana Waiguru na Madiwani hao kusameheana na kukomesha malumbano ili amani irejee katika kaunti ya Kirinyaga.

Viongozi hao wa kidini walielezea hofu ya kaunti hiyo kushindwa kuweka mikakati ya kudhibiti janga la Covid-19 ikiwa gavana huyo na madiwani wataendelea kuzozana.

Waiguru sasa adai Kibicho ndiye chanzo cha masaibu yake

Na WANDERI KAMAU

MZOZO wa kisiasa katika Kaunti ya Kirinyaga jana ulizidi kutokota, baada ya Gavana Anne Waiguru kudai kuwa Katibu katika Wizara ya Usalama wa Ndani, Dkt Karanja Kibicho, anawafadhili madiwani kuvuruga serikali yake.

Kwenye barua ya wazi aliyomwandikia Jumatano, Bi Waiguru alimchemkia vikali Dkt Kibicho, akimtaja kuwa chanzo kikuu cha masaibu yote yanayoikumba serikali yake.

Bi Waiguru alidai kwamba Katibu amekuwa akiwapa maagizo madiwani kuhakikisha kuwa wanavuruga uongozi wake kwa kutumia kila njia.Alisema ni kutokana na maagizo ya Dkt Kibicho ambapo walijaribu kumng’oa mamlakani, na mzozo wa sasa, ambapo wamekataa kupitisha bajeti.

Kwenye barua hiyo, Bi Waiguru alidai kuwa na habari za kuhusu mkutano ambapo Dkt Kibicho alifanya na madiwani zaidi ya 20 kuhusu mpango wa “kusambaratisha kabisa utendakazi wa serikali yake.”

“Baada ya kufeli kwa njama za kuniondoa uongozini, sasa nimeshangaa kufahamu kuhusu mkutano uliofanya na zaidi ya madiwani 20 ambapo uliwarai kuendelea kuwa pamoja ili kusambaratisha serikali yangu,” akasema gavana huyo.

Alidai kuwa Katibu amewaahidi madiwani kutekeleza miradi ya maendeleo katika wadi zao, ambayo itafadhiliwa na serikali ya kitaifa.

Kulingana na Bi Waiguru, miradi hiyo ni uchimbaji wa visima vya maji katika kila wadi na ujenzi wa barabara utakaofadhiliwa na Mamlaka ya Ujenzi wa Barabara katika Maeneo ya Mashambani (KeRRA).

Gavana pia alimlaumu Dkt Kibicho kwa mpango wa “kuuteka” mchakato wa kampeni za Mpango wa Maridhiano (BBI) ili kumtenga kisiasa.

“Ninafahamu maagizo uliyowapa madiwani kuwa lengo lako kuu ni kutwaa uendeshaji wa mpango wa BBI mkiwa na Seneta Charles Kibiru (Kirinyaga),” akadai.

Hii ni mara ya kwanza kwa Bi Waiguru kumtaja hadharani Dkt Kibicho kuwa mhusika mkuu kwenye masaibu yanayomwandama.

Mwezi uliopita, madiwani 23 kati ya 33 walipiga kura na kupitisha hoja kumng’oa mamlakani Bi Waiguru, wakimlaumu kwa ufisadi na matumizi mabaya ya mamlaka.Hata hivyo, Bi Waiguru alinusurika baada ya Seneti kufutilia mbali hoja hiyo.

Lakini sarakasi hiyo ilionekana kuendelea, baada ya madiwani kwenda katika Mahakama Kuu, wakiitaka kufutilia mbali uamuzi wa Seneti.

Kupitia wakili Ndegwa Njiru, madiwani walisema kuwa Seneti haikuzingatia kwa kina ushahidi waliowasilisha kwake, licha ya kuthibitisha mashtaka yote.

“Uamuzi wa Seneti unaonekana kuwa na mapendeleo ya wazi. Tutafanya kila juhudi kuhakikisha tumewaokoa wakazi wa Kirinyaga dhidi ya kiongozi ambaye hajali maslahi yao,” akasema Bw Njiru.

Tayari, madiwani wamekataa kupitisha bajeti ya mwaka huu, wakimlaumu Bi Waiguru kwa “kutoyapa kipao mbele” maslahi ya wananchi.

Mapema mwezi huu, Bi Waiguru alitangaza kundi maalum la watu saba kumsaidia kusuluhisha mzozo huo lakini akaondoa majina hayo baadaye.

Wadadisi wanasema kuwa mzozo katika kaunti hiyo unaonekana kuchangiwa na siasa za kinyang’anyiro cha ugavana mwaka 2022.

Kando na Dkt Kibicho, baadhi ya watu wanaoonekana kumezea mate nafasi hiyo ni Mwakilishi wa Wanawake Wangui Ngirichi, kiongozi wa Narc-Kenya Martha Karua, balozi wa Kenya nchini Amerika, Bw Robinson Githae kati ya wengine.

Upatanisho wa Waiguru na MCAs watatizika

GEORGE MUNENE na KENNEDY KIMANTHI

JUHUDI za kupatanisha Gavana Anne Waiguru na wawakilishi wa Bunge la Kaunti ya Kirinyaga zilipata pigo jana, baada ya MCAs kukataa jopo linalodaiwa kubuniwa kwa ajili ya kuwaleta pamoja.

Mmoja wa wanaosemekana kuteuliwa kwenye jopo hilo la watu saba, Askofu Mkuu Anthony Muheria wa Dayosisi ya Nyeri ya Kanisa Katoliki, alisema hakuwa na habari ya kuwepo kwa jopo hilo.

“Hakuna yeyote aliyewasiliana nami kunijulisha kuhusu jambo hilo. Sijafahamishwa na gavana. Nitasubiri nione kama atanipigia kunijulisha kuhusu jopo hilo,” Askofu Muheria akaambia Taifa Leo kwa njia ya simu.

Ijumaa, gavana Waiguru alitoa taarifa iliyoeleza kuhusu kubuniwa kwa jopo la watu saba, akidai watakuwa na jukumu la kumpatanisha yeye na mahasimu wake wa kisiasa.

Mbali na Askofu Mkuu Muheria, wengine ni Makatibu wa Wizara Paul Maringa (Miundomsingi), Nancy Karigithu (Bahari), Mary Kimonye (Huduma za Umma, Vijana na Jinsia) na aliyekuwa Katibu Mkuu, Bw J.S Mathenge.

Wengine ni John Njiraini (Aliyekuwa Kamishna Mkuu wa KRA) na Bw Charles Ndegwa, ambaye ni pasta kutoka eneo la Mwea.

Pasta Ndegwa wa kanisa la Jesus is Lord for All Church, pia alisema hakuwa amefahamishwa kuhusu kuteuliwa kwake kwenye jopo hilo. Hata hivyo, alisema yupo tayari kushiriki kwenye upatanishi huo kwa manufaa ya wakazi wa kaunti yake.

“Ni wazo zuri, japo sijafahamishwa na wala sina habari kwa sasa. Nimesikia sasa kwamba jina langu limetajwa lakini sijapigiwa simu wala kuandikiwa ujumbe. Nataka niseme kuwa niko tayari kushiriki katika kurejesha utulivu katika uongozi wa kaunti. Uhusiano huo mbaya kati ya gavana na MCAs unarejesha nyuma maendeleo ya Kirinyaga,” akasema.

Gavana Waiguru na sehemu kubwa ya MCAs wa Kirinyaga waliojaribu kumtimua kazini, wamekuwa hawasikizani.

MCAs wakiongozwa na Kiongozi wa Wengi, Bw Kamau Murango walisisitiza kutoshiriki kwenye mazungumzo hayo ya upatanisho.

Wiki jana, Bi Waiguru alinusuriwa na Bunge la Seneti, baada ya kamati ya watu 11 iliyoongozwa na Seneta wa Kakamega, Cleophas Malala kusema hakuwa na makosa. Gavana kwenye ujumbe wake jana, alisema walioteuliwa kuleta mapatano ni watu wasioegemea mirengo ya kisiasa na kwamba wanatoka eneo hilo.

Bi Waiguru hakupatikana ili kumfichua aliyependekeza majina hayo, na kwa nini alifahamu yeye kwanza kabla ya walioteuliwa.

Waiguru atarajia maseneta ‘kumtendea haki’

CHARLES WASONGA na GEORGE MUNENE

HATIMAYE Gavana wa Kirinyaga, Bi Anne Waiguru amezungumzia masaibu yanayomkabili akielezea matumaini kwamba maseneta watazingatia kweli, haki na sheria watakapoanza kuchunguza hoja ya kumtimua afisini.

Bi Waiguru alisema hayo huku vijikaratasi vyenye maandishi ya kuwahimiza wakazi kufanya maandamano dhidi yake jana asubuhi vikisambazwa katika miji kadha ya kaunti ya Kiranyaga.

Kwenye taarifa fupi, kupitia akaunti yake ya twitter, dakika chache baada ya mawakili wake kuwasilisha stakabadhi zenye majibu yake kwa seneti Jumamosi jioni, Bi Waiguru alisema yu tayari kujitetea mbele ya kamati ya seneti Jumatano.

“Kama hatua ya kutimiza ombi la Seneti leo nimewasilisha majibu yangu kwa hoja iliyopitisha na Bunge la Kaunti ya Kirinyaga kuniondoa afisini. Naamini ukweli, haki na utawala wa sheria utadumishwa,” Bi Waiguru akasema.

Vijikaratasi vilivyoandikwa maneno “Waiguru Must go” (sharti Waiguru aondoke) vilisambazwa katika miji ya Kerugoya, Kimbimbi, Kianyaga, Kutus, Ngurubani an Kagio.

“Tuliamka asubuhi na kupata vijikaratasi vimetapakaa sehemu mbalimbali mjini,” mkazi mmoja wa Kimbimbi aliambia Taifa Leo.

Waandishi na wasambazaji wa vijikaratasi hivyo kuanzia Jumamosi usiku hawakujulikana.

Hiyo ndio ilikuwa taarifa ya kwanza, Gavana Waiguru kutoa tangu madiwani 23 kati ya 33 wa kaunti ya Kirinyaga walipopitisha hoja hiyo mnamo Juni 9, 2020; kwa tuhuma za kukiuka Katiba na matumizi mabaya ya mamlaka ya afisi yake.

Jumamosi jioni mawakili wa Waiguru, wakiongozwa na Kamotho Waiganjo, waliwasilisha katoni 40 zilizojaa stakabadhi kwa afisi ya karani wa Seneti, Jeremiah Nyengenye.

“Tumewasilisha majibu yote kwa tuhuma zilizoelekezewa gavana,” Bw Waiganjo ambaye pia ni mumewe Waiguru, aliwaambia wanahabari katika majengo ya bunge.

“Tumewasilisha stakabadhi zenye majibu yote. Gavana atafiki mbele ya Kamati ya Seneti juma lijalo kufafanua yaliyomo kwenye stakabadhi hizo,” akaongeza Bw Waiganjo.

Kamati hiyo maalum ya wanachama 11 na inayoongozwa na Seneta wa Kakamega Cleophas Malala ilibuniwa kuendesha uchunguzi kwa lengo la kubaini ikiwa mashtaka dhidi ya gavana huyo yana mashiko au la.

Kamati hiyo imemualika Spika wa Bunge la Kirinyaga Anthony Gathumbi kufika mbele yake mnamo Jumanne, Juni 23, kufafanua madai yaliyopelekea kupitishwa kwa hoja ya kutimua Gavana Waiguru.

Katika barua iliyoandikwa Juni 17 kwa Bw Gathumbi, kamati hiyo ilimshauri Spika huyo kuandamana na angalau madiwani watatu katika kikao hicho.

Aidha, kamati hiyo ilimtaka Spika huyo kutoa angalau nakala 200 za stakabadhi zote ambazo bunge hilo litatumia kuthibitisha makosa ambayo lilidai Waiguru alitenda.

Isitoshe, Bunge hilo lInahitajika kuwasilisha majina ya watu ambao watatoa ushahidi zaidi kuhusu suala hilo mbele yake.

Naye Bi Waiguru na kundi la mawakili wake wamealikwa kufika mbele ya Bw Malala, na wenzake, mnamo Jumatano, Juni 13, kujitetea.

Wameonywa kwamba endapo watakosa kufika, kamati hiyo itaendelea na shughuli zake na hatimaye kutoa uamuzi bila kushirikisha utetezi wao.

Mivutano ya UhuRaila, Tangatanga kuwanyima haki watu wa Kirinyaga

Na CHARLES WASONGA

MCHAKATO wa kuchunguza madai yaliyotolewa dhidi ya Gavana Anne Waiguru na madiwani wa Kirinyaga wanaotaka abanduke tayari umetekwa na mvutano wa siasa kati ya Rais Uhuru Kenyatta na Naibu Rais William Ruto.

Hali hii inatarajiwa kuvuruga haki katika mchakato huo.

Wadidisi wanasema inasikitisha kuwa madai ya ufisadi dhidi ya Bi Waiguru sasa yamegubikwa na siasa za ubabe kati ya mirengo ya ‘handisheki’ na ‘tangatanga’ ilivyodhihiri katika Seneti mnamo Jumanne wakati wa kubuniwa kwa kamati ya kusikiza madai dhidi ya Bi Waiguru.

Maseneta waligawanyika kwa misingi ya mirengo hiyo miwili, ambapo Jubilee na Nasa walitetea kuundwa kwa kamati maalum ya kuchunguza madai dhidi ya Waiguru na ukaibuka mshindi kwa kura 45.

Nao upande uliotaka suala hilo lishughulikiwe katika kikao kizima cha Seneti ulijumuisha wandani wa Naibu Rais William Ruto, ambao walilemewa baada ya kupata kura 14 pekee.

Taswira iliyojitokeza ni kwamba Gavana Waiguru alipata ushindi wa kwanza kutokana na kuwa ni rahisi kwa wanachama 11 wa kamati hiyo “kushawishiwa” kwa urahisi kumtakasa Bi Waiguru.

Kimsingi, suala hilo sasa limechukua mwelekeo wa siasa za kitaifa, wala sio masuala yanayowahusu wakazi wa Kirinyaga, haliambayo itayeyusha masuala muhimu katika hoja hiyo.

Wakili na mchanganuzi wa masuala ya kisiasa George Ogola, anaonya kuwa uwepo wa mivutano kuhusu suala hilo lenye uzito kwa wakazi wa Kirinyaga itawanyima haki.

“Inasikitisha kuwa tayari kuna madai kuwa makundi haya mawili yalifanya mikutano ya kujadili namna ya kufanikisha malengo yao. Mrengo wa handisheki ulisemekana kukutana kupanga namna ya kumnusuru Waiguru huku wapinzani wao wakipanga namna ya kumsulubisha,” anasema.

Siku chache kabla ya hoja hiyo kusomwa rasmi katika Seneti, Bw Odinga, na wandani wake, waliripotiwa kukutana na Gavana Waiguru katika mkahawa mmoja mtaani Karen kupanga mikakati ya kumwondolea lawama.

Ingawa Bw Odinga alikana ripoti hizo, mwandani wake wa karibu, Junet Mohammed, alitangaza hadharani kuwa chama cha ODM kimeamua “kusimama” na Bi Waiguru bila kujali madai dhidi yake.

Siku moja baada ya mkutano huo, Dkt Ruto naye aliongoza mkutano wa maseneta 16 katika makazi yake rasmi katika mtaa wa Karen, ambapo ajenda kuu ilikuwa na suala lilo hilo la hoja ya kumtimua Bi Waiguru afisini.

Duru kutoka mkutano huo zilisema kuwa Naibu Rais aliwataka maseneta hao, wakiongozwa na seneta wa Elgeyo Marakwet Kipchumba Murkomen, kuhakikisha kuwa “Waiguru anaangushwa au kuokolewa kwa misingi ya namna atakavyojitetea dhidi ya makosa aliyodaiwa kutenda.”

Wanaodaiwa “kudhamini” msukumo wa kutimuliwa kwa Waiguru mashinani katika kaunti ya Kirinyaga ni pamoja na Naibu wake Peter Ndambiri, Mbunge Mwakilishi wa Wanwake Wangui Ngirici, kiongozi wa Narc Kenya Martha Karua na Katibu wa Wizara ya Usalama Karanja Kibicho.

Hata hivyo, Dkt Kibicho amekana madai hayo akisema yeye ni mtumishi wa umma na haruhusiwi kushiriki mieleka ya kisiasa.

HANDISHEKI KIZINGITI KWA UTAWALA BORA

Mchanganuzi wa masuala ya kisiasa, Javas Bigambo anakubaliana na kauli ya Wakili Ogola kwamba misimamo kinzani ya kisiasa ndiyo inatilia shaka uwezekano wa seneti kuishughulikia suala hilo kwa njia huru.

“Madai ya Seneta Orengo kwamba wale wanaotafuta kichwa cha Waiguru hawako katika bunge la kaunti ya Kirinyaga bali wako kwingineko, yalikuwa mazito mno,” anasema Bw Bigambo.

Madai ya Seneta huyo wa Siaya yamewatia hofu madiwani wa Kirinyaga, viongozi wa eneo hilo na mrengo wa Tangatanga ndani na nje ya seneti, kwamba mrengo Rais Kenyatta, Odinga na Kalonzo Musyoka utatumia ushawishi wake kumnusuru Gavana Waiguru.

Hii ndio maana madiwani 23 wakiongozwa na kiongozi wa wengi Kamau Murango walisema hata kama Seneti itamwokoa Bi Waiguru watapambana naye mashinani.

“Tunaweza kuwasilisha hata hoja kumi za kumwondoa mamlakani; hatutachoka,” akasema.

Naye diwani wa wadi ya Mutira David Kinyua Wangui, aliyedhimini hoja hiyo akaongeza: “Ni wazi kwamba kuna njama ya kutupilia mbali uamuzi wetu kama bunge la Kirinyaga. Uhuru na Raila wanafaa kuelewa kuwa hata kama wakimwokoa Waiguru katika Seneti atarudi nyumbani na tutamfunza adabu”.

Kwa upande wake, Mwenyekiti wa Narc-Kenya Bi Martha Karua, anataja mipango ya kumnusuru Gavana Waiguru kama ithibati kuwa muafaka kati ya Rais Kenyatta na Bw Odinga hauna nia ya kusaidfia katika vita dhidi ya ufisadi na maovu mengine ya kiutawala.

“Sasa ni wazi kuwa wao ndio kizingiti kikuu katika vita dhidi ya ufisadi,” anaongeza.

Huku wingu la siasa likigubika mchakato wa kusaka ukweli kuhusu madai dhidi ya Bi Waiguru kupitia Seneti, Tume ya Maadili na Kupambana na Ufisadi (EACC) imeanza kumchunguza gavana huyo na bunge la kaunti ya Kirinyaga kuhusiana na sakata ya upeanaji zabuni na ulipaji marupurupu kinyume cha sheria.

Meneja wa tume hiyo katika eneo la Kati, Charles Rasugu wiki jana aliwaambia wanahabari kuwa malalamishi dhidi ya Bi Waiguru yanahusiana na utoaji wa zabuni ya thamani ya Sh50 milioni na kupokea malipo ya Sh10.6 milioni ya safari hewa ya kigeni.

Watu wa Kirinyaga sasa watasubiri matokeo ya uchunguzi huu wa EACC kupata ukweli kuhusu sakata hiyo kwani mchakato wa Seneti tayari umezamishwa ndani ya bahari ya siasa.

Hatima ya Waiguru kujulikana Juni 26

Na CHARLES WASONGA

HATIMA ya Gavana wa Kirinyaga Anne Mumbi Waiguru sasa itajulikana Ijumaa wiki ijayo Juni 26 kamati maalum iliyoteuliwa kuchunguza tuhuma dhidi yake itakapowasilisha ripoti yake kwa Seneti.

Akiongea na wanahabari Jumatano baada ya kuchaguliwa kuwa mwenyekiti wa kamati hiyo, Seneta wa Kakamega Cleophas Malala alisema wawakilishi wa bunge la kaunti ya Kirinyaga watawasilisha ushahidi wao mbele ya kama hiyo Jumanne.

Kisha Jumatano Gavana Waiguru atafiki mbele ya kamati hiyo ya wanachama 11 kujitetea kabla ya kamati hiyo kufanya kikao cha faragha kuandaa ripoti yake ya mwisho.

Bw Malala alihakikishia umma na pande zote husika katika suala hilo kwamba kamati yake itahakikisha kuwa kamati hiyo itaendeshwa majukumu yake kwa haki, uwazi na kwa kuzingatia sheria.

“Tunafahamu fika kwamba suala hili limefuatiliwa kwa makini na Wakenya wote; kando na watu wa Kirinyaga. Kwa hivyo, tunawahakikishia kuwa tutaendesha kazi hii kwa haki na uwazi. Pande zote husika zitapewa muda tosha wa kutetemea misimamo yao mbele yetu,” akasema Seneta huyo wa ODM ambaye ni naibu kiongozi wa wachache katika Seneti.

Seneta Maalum Abshiro Halake (Kanu) alichaguliwa kuwa naibu mwenyekiti baada ya kumbwaga Seneta wa Nyandarua Mwangi Githiomi.

Mnamo Jumanne, juhudi za baadhi ya maseneta kutaka mashtaka dhidi ya Gavana Waiguru yashughulikiwe katika kikao kizima cha seneti bali sio katika kamati maalum, zilifeli baada ya wenzao wanaunga mkono handisheki kuwapiga kura ya kupinga wazo hilo.

Hiyo ilionekana kama ushindi wa kwanza dhidi ya mahasimu wa Bi Waiguru, na viongozi wa Kirinyaga, wanaohisi kuwa kuna uwezekano wa kuingiliwa watu fulani wanaotaka gavana huyo anusurike.

Maseneta hao wakiongozwa na Kipchumba Murkomen (Elgeyo Marakwet) na Charles Kibiru (Kirinyaga) walioelezea hofu kwamba wakereketwa wa handisheki na BBI “watatumia kamati hiyo kumtaka Gavana Waiguru na hivyo kuwanyima wakazi wa Kirinyaga haki.”

Tayari chama cha ODM kimemtetea gavana huyo sawa na Waziri wa Utumishi wa Umma Profesa Margaret Kobia, Katibu Mkuu wa COTU Francis Atwoli miongoni mwa wengine

Bunge la Kaunti ya Kirinyaga lilipitisha hoja ya kung’oa mamlakani Gavana Waiguru kwa tuhuma za kutumia vibaya mamlaka ya afisi yake na ukiukaji wa sheria za ununuzi kwa kutoa zabuni kinyume cha sheria. Pia madiwani hao walidai gavana huyo alitumia Sh10 milioni akidai ni marupurupu ya usafiri ilhali hakuenda popote.

Madiwani waapa kupambana na Gavana Waiguru

Na WAANDISHI WETU

UAMUZI wa maseneta kuunda kamati maalumu ya kuamua hatima ya Gavana wa Kirinyaga, Bi Anne Waiguru, umeibua hasira miongoni mwa mahasimu wake wa kisiasa.

Mnamo Jumanne, maseneta 45 walipiga kura kukubali kamati iundwe, tofauti na 14 ambao walipendekeza kikao kizima cha Seneti kikae kumhoji Bi Waiguru kuhusu madai yaliyotolewa dhidi yake na madiwani wa Kirinyaga wanaotaka abanduke.

Jana, madiwani 23 wa Kirinyaga wakiongozwa na Kiongozi wa Wengi katika bunge la kaunti hiyo, Bw Kamau Murango walisema hata kama Seneti itamwokoa Bi Waiguru, watapambana naye mashinani.

Wanahofia kuwa huenda hakutakuwa na uamuzi wa haki katika kamati.

“Tuliudhika sana. Sisi hatutafanya kazi na gavana ambaye anakaidi bunge la kaunti kila mara na anayekiuka sheria,” akasema.

Aliyeandaa mswada wa kumng’atua Bi Waiguru katika bunge la Kirinyaga, Kinyua wa Wangui alitaja matukio ya Seneti kama “ukora na unafiki.”

“Ni wazi kumeandaliwa njama ya kutupuuza kama bunge la Kaunti na Uhuru na Raila wanafaa waelewe kuwa hata wakimwokoa Waiguru katika Seneti, bado atakuja hapa Kirinyaga na tutawafunza adabu za kutuheshimu,” akasema.

Kiongozi wa Chama cha Narc-Kenya, Bi Martha Karua alisema imebainika wazi hakuna uwezekano wa ushirikano kati ya Rais Uhuru Kenyatta na Kiongozi wa ODM Raila Odinga kuwafaa Wakenya katika vita dhidi ya ufisadi na maovu mengine ya kiutawala.

“Kwa sasa ni wazi kuwa hata wao ni visiki katika vita dhidi ya ufisadi,” akasema.

Hata hivyo, kamati maalumu ambayo itasimamiwa na Seneta wa Kakamega, Bw Cleophas Malala, ilisisitiza itatenda haki katika maamuzi yake.

Baada ya kuchaguliwa jana kuongoza kamati hiyo, Bw Malala alisema hatima ya Bi Waiguru itajulikana Ijumaa wiki ijayo watakapowasilisha ripoti kwa Seneti.

Malala alisema wawakilishi wa bunge la kaunti ya Kirinyaga watawasilisha ushahidi wao mbele ya kama hiyo Jumanne.

Kisha Jumatano Gavana Waiguru atafika mbele ya kamati hiyo ya wanachama 11 kujitetea kabla ya kamati hiyo kufanya kikao cha faragha kuandaa ripoti yake ya mwisho.

“Tunafahamu fika kwamba suala hili limefuatiliwa kwa makini na Wakenya wote; kando na watu wa Kirinyaga. Kwa hivyo, tunawahakikishia kuwa tutaendesha kazi hii kwa haki na uwazi. Pande zote husika zitapewa muda tosha wa kutetemea misimamo yao mbele yetu,” akasema Seneta huyo wa ODM ambaye ni naibu kiongozi wa wachache katika Seneti.

Seneta Maalum Abshiro Halake (Kanu) alichaguliwa kuwa naibu mwenyekiti baada ya kumbwaga Seneta wa Nyandarua Mwangi Githiomi.

Kufikia sasa, Bi Waiguru amepata utetezi kutoka kwa Chama cha ODM, serikali kuu kupitia kwa Waziri wa Utumishi wa Umma Profesa Margaret Kobia, na viongozi wengine wenye ushawishi kama vile Katibu Mkuu wa Muungano wa Vyama vya Wafanyakazi (COTU), Bw Francis Atwoli.

Ikiwa Kamati iliyobuniwa itabaini kuwa mashtaka dhidi ya Gavana Waiguru yana mashiko, itaandaa ripoti na kuiwasilisha kwa kamati ya maseneti wote ili ijadiliwe.

Na ikiwa angalau wanachama sita wa kamati hiyo watatupilia mbali tuhuma dhidi ya Gavana Waiguru, suala hilo litakomea hapo. Hata hivyo, ripoti itawasilisha kwa Seneti kwa ajili ya rekodi pekee.

Ripoti za George Munene, Charles Wasonga na Mwangi Muiruri

Seneta Malala kusimamia mchakato wa kumtetea Waiguru Seneti

IBRAHIM ORUKO

Seneta wa Kakamega Cleophas Malala alichaguliwa kuwa katibu wa wanakamati 11 watakao chunguza kung’olewa mamlakani kwa Gavana wa Kirinyaga Anne Waiguru .

Alichaguliwa bila kupingwa katika mkutano wa kwanza wa kamati hiyo Jumatano asubuhi.

Seneta mteuliwa Abshiro Halake alichaguliwa kuwa naibu katibu wa kamati hiyo. Alipata kura tano huku mwenzake wa Nyandarua , Mwangi Githiomi akipata kura nne .

Senator Malala alisema kwamba kamati hiyo itahakikisha usawa na haki kati ya wanaohusika.

“Tutahakikisha usawa na haki bila mapendeleo; nchi yote inatuangalia. Wahusika wote watashughulikiwa kwa usawa,” alisema Bw Malala.

Ishara zote zaonyesha Waiguru ataepuka balaa

CHARLES WASONGA na VALENTINE OBARA

WANDANI wa Rais Uhuru Kenyatta na Kiongozi wa ODM, Bw Raila Odinga, Jumanne walionyesha ishara za nia ya kumwokoa Gavana wa Kirinyaga, Bi Anne Waiguru dhidi ya kung’olewa mamlakani.

Katika ushindi wao wa kwanza dhidi ya mahasimu wa Bi Waiguru, walifanikiwa kumwepushia kibarua cha kujitetea mbele ya kikao kizima cha seneti na badala yake wakapiga kura kwa wingi ili kamati maalumu iundwe kuamua suala hilo.

Majibizano makali yalishuhudiwa jana kati ya maseneta wanaounga mkono handisheki na wale wanaoegemea upande wa Naibu Rais William Ruto ambao walikuwa wanapigia debe hoja ya kumng’oa gavana huyo iamuliwe na seneti nzima.

Seneta wa Siaya, Bw James Orengo ambaye pia ndiye Kiongozi wa Wachache alitoa ishara kwamba chama hicho kitamtetea Bi Waiguru hadi mwisho.

“Kuna watu hawatafuti haki. Kichwa cha Waiguru hakitafutwi na bunge la Kaunti ya Kirinyaga bali ni watu wengine wanaomtafuta. Nina ushahidi kuhusu hilo,” akadai.

Kwa upande wake, Seneta wa Pokot Magharibi aliye Kiongozi wa Wengi, Samuel Poghisio, alitetea uundaji wa kamati maalumu akisema kamati hiyo itawakilisha msimamo wa Seneti nzima.

Lakini wafuasi wa Tangatanga waliotaka hoja ya Bi Waiguru isikizwe na kikao kizima cha Seneti walilalamika.

“Wakazi wa Kirinyaga wamekuwa wakishuku kuwa uamuzi tayari umfanywa kuunda kamati ya kumhoji Waiguru na matamshi ya Orengo yamethibitisha hilo. Kama kamati ya kumtakasa Waiguru iliundwa tuambiwe mapema,” akasema Seneta wa Elgeyo Marakwet, Bw Kipchumba Murkomen.

Katika uamuzi uliotolewa, maseneta 45 walipiga kura kukubali kamati iundwe nao 14 wakapinga huku mmoja akasusia kura.

Hii ni licha ya wakazi wa Kirinyaga kuandamana mjini Kerugoya wakitaka Seneti iwatendee haki bila kushawishiwa na mamlaka za nje.

Wanachama wa kamati iliyoundwa watahitajika kushughulikia hoja hiyo ndani ya siku 10.

Wanajumuisha Paul Mwangi Githiomi (Nyandarua), Michael Mbito (Trans Nzoia), Anuar Loitiptip (Lamu), Philip Mpaayei (Kajiado), Cleophas Malala (Kakamega), Stewart Madzayo (Kilifi) na Moses Kajwang (Homa Bay). Wengine ni Maseneta Maalum Beatrice Kwamboka, Judith Pareno, Abishiro Halake, na Beth Mugo.

Bi Waiguru ataponea chupuchupu ikiwa angalau wanachama sita watatupilia mbali tuhuma dhidi yake baada ya kupokea ushahidi na gavana kujitetea.

Kamati hiyo itafanya vikao vya hadhara ambapo wawakilishi wa pande zote mbili wataalikwa. Bunge la Kirinyaga linaweza kuwakilishwa na wakili wao, spika au madiwani walioteuliwa na wenzao.

Watahitaji kuwasilisha ushahidi walio nao dhidi ya Gavana Waiguru kwa kamati hiyo kupitia afisi ya karani wa seneti Bw Jeremiah Nyengenye saa 24 kabla ya kufika mbele ya kamati.

Gavana Waiguru atahitajika kufika binafsi mbele ya kamati hiyo kujitetea, atume wakili wake, au afike akiandamana na wakili wake.

Ikiwa Kamati hiyo itabaini kuwa mashtaka dhidi ya Gavana Waiguru yana mashiko, itaandaa ripoti na kuiwasilisha kwa kamati ya maseneti wote ili ijadiliwe.

Sura mbili za Raila kuhusu masaibu ya Waiguru

Na WAANDISHI WETU

MCHAKATO wa kuamua hatima ya Gavana Anne Waiguru unapoanza leo katika bunge la seneti, macho yote yanaelekezwa kwa kiongozi wa ODM, Raila Odinga, kujua iwapo atamtetea kinara huyo wa Kaunti ya Kirinyaga au la.

Kwa upande mmoja Bw Raila amekuwa akipinga tetesi kuwa ana mpango wa kumuokoa Bi Waiguru kwa kuwashawishi maseneta wa ODM kuzuia juhudi za kumng’oa gavana huyo huku wabunge wa chama hicho wakiongozwa na Bw Junet Mohamed wakisema ODM itafanya juhudi zote kumwepusha gavana huyo kubanduliwa mamlakani.

Jana, Bw Raila aliruka msimamo wa chama chake kwamba kitamtetea Gavana Waiguru (pichani) dhidi ya kung’olewa mamlakani.

Awali duru zilikuwa zimesema Bw Odinga alikutana na Bi Waiguru wiki iliyopita kujadiliana jinsi atakavyotumia mamlaka yake kumnusuru.

Ijapokuwa Bw Odinga alikanusha ripoti hizo, Bw Junet wikendi alisema ODM imeamua kuwa itamtetea gavana huyo ambaye bunge la kaunti yake lilipitisha hoja ya kumtimua. Lakini, jana Bw Odinga alisisitiza kuwa hajajaribu kuingilia suala hili kushawishi matokeo yake.

“Masenea wafanye kazi waliyopewa na Wakenya, waone haki imetendeka kwa kila Mkenya. Kama mtu atajiokoa mwenyewe ni kulingana na ukweli uliopo,” akasema baada ya kuthibitishwa kutoambukizwa virusi vya corona katika kituo cha afya cha Mbagathi.

Mgawanyiko umeibuka miongoni mwa maseneta kuhusu iwapo hoja hiyo ishughulikiwe kupitia kamati maalum au maseneta wote.

Maseneta wawili ambao walipendekezwa kuwa wanachama ya kamati hiyo ya wanachama 11 jana walikataa mkondo huo wakitaka uamuzi ufanywe na maseneta wote.

Kiranja wa Wengi Irungu Kang’ata alifafanua kuwa maseneta leo wataamua iwapo suala hilo litashughulikiwa kupitia kamati au maseneta wote.

Seneta wa Nairobi Johnson Sakaja na mwenzake wa Kitui Sammy Wambua walisema mfumo huo ambao ulitumiwa kuamua hatima ya aliyekuwa gavana wa Kiambu Ferdinand Waititu utahakikisha haki kwa pande zote.

“Suala hili sasa limechukua mwelekeo wa kisiasa, itakuwa bora iwapo maseneta wote watashirikishwa kuliamua,” akasema Bw Wambua.

Mnamo Ijumaa kamati ya kuratibu shughuli za seneti (SHBC) ilipendekeza majina ya wanachama ambao wataketi katika kamati hiyo.

Wao ni Gideon Moi (Baringo), Beth Mugo (Seneta Maalum), Anwar Oloitiptip (Lamu), Mohamed Mahammud (Mandera), Johnson Sakaja (Nairobi) na Abshiro Halakhe (seneta maalum).

Kwa upande wa upinzani waliopendekezwa ni Moses Kajwang (Homa Bay), Cleophas Malala (Kakamega), Enoch Wambua (Kitui), Beatrice Kwamboka (seneta maalum) na Judith Pareno (seneta maalum).

Baadhi ya wadau katika siasa za Kirinyaga wameteta vikali kuhusu tetesi kwamba kuna juhudi zinazoendelezwa kumwokoa Bi Waiguru visivyo.

Wamesema kuwa baada ya bunge hilo kumng’atua Waiguru Jumanne iliyopita, sasa kuna njama na hila za kumrudisha mamlakani. Aliyekuwa mpinzani wa Waiguru katika kinyang’anyiro cha ugavana 2017, Bi Martha Karua alilaumu upande wa upinzani kwa kushirikiana na serikali kuu katika njama hizo.

“Ni vyema katiba ifuatwe na kuwe na uwajibikaji wa taasisi za kusaidia taifa hili kutawaliwa kwa mujibu wa sheria wala sio kwa mujibu wa urafiki na mapenzi,” akasema.

Naibu Gavana wa Kirinyaga Peter Ndambiri alisema kuwa “kaunti yetu inangojea tu kuona kile kitafanyika na tutakumbatia maamuzi yote ambayo yatawekwa wazi kama matokeo ya mkondo huu wa kung’atuliwa kwa gavana wetu.”

Ripoti za Charles Wasonga, Valentine Obara na Mwangi Muiruri

Waiguru alivyoingiza Raila ‘boksi’

Na CHARLES LWANGA

CHAMA cha ODM kinachoongozwa na Bw Raila Odinga, kimesema kuwa kitasimama kidete kumtetea Gavana wa Kirinyaga, Anne Waiguru anayekabiliwa na hoja ya kumtimua mamlakani kwa madai ya ufisadi na utumizi mbaya wa mamlaka.

Kiranja wa wachache katika Bunge la Kitaifa, Junet Mohamed alitangaza jana kuwa ODM kitamtetea Bi Waiguru kwa hali na mali kwa kuwa wamegundua “anaonewa”.

Alisema kuwa chama cha ODM kinathamini uongozi wa wanawake na kitawapatia nafasi sawa.

“Kuna baadhi ya watu ambao wanaamini wanawake hawawezi kuongoza na sisi kama chama cha ODM tunaamini uongozi wa wanawake na tutasimama naye kwa sababu wanawake wanafaa kupewa nafasi sawa uongozini,” akasema akiwa Tana River.

Juma lililopita, madiwani wa kaunti ya Kirinyaga walipitisha hoja ya kumbandua Bi Waiguru kwa madai ya ufisadi na utumizi mbaya wa mamlaka.

Seneti imependekeza kamati ya maseneta 11 kushughulikia madai hayo, ingawa uamuzi unatarajiwa kufanywa kesho kuhusu iwapo watadumisha kamati, au kutumia kamati inayohusisha bunge lote la Seneti.

Mbunge huyo wa Suna Mashariki, alisema hayo alipotembelea waathiriwa wa mafuriko eneo bunge la Garsen, Kaunti ya Tana River ambapo aliandamana na Mbunge wa eneo hilo Ali Wario, Mbunge wa Galole Said Hirbae na Mbunge wa Isiolo Rehema Jaldesa.

Mbunge huyo pia alionekana kuashiria kuwa kinara wa chama hicho alikutana na Bi Waiguru kama ilivyoripotiwa magazetini akisema kuwa wana haki ya kukutana na kujadili.

“Kwani Waiguru na Raila wakikutana kuna shida gani? Waiguru ni gavana na Raila ni kiongozi humu nchini na wana haki ya kukutana mahali popote wakati wowote hapa nchini,” alisema.

Lakini huku chama hicho kikipanga kumtetea, wabunge watatu watatu wa Chama cha Jubilee (JP) katika Kaunti ya Kirinyaga, wanataka hoja ya kung’olewa mamlakani kwa gavana huyo kujadiliwa na Seneti nzima.

Wabunge Kabinga Thayu (Mwea), Gichimu Githinji (Gichugu) na Munene Wambugu (Kirinyaga ya Kati) walisema kuwa ili wakazi wa kaunti hiyo waridhike, lazima maseneta wote washirikishwe kwenye mjadala kuhusu hoja hiyo.

Wakiongozwa na Seneta Charles Kibiru, wabunge hao walipinga mpango wa mchakato huo kuendeshwa na Kamati Maalum ya Seneti yenye wanachama 11.

Walieleza hofu kuwa huenda kamati hiyo ikawa na mapendeleo,.

Wabunge hao walisema kuwa wakazi wa Kirinyaga walizungumza kupitia madiwani wao, hivyo Seneti inapaswa kuheshimu uamuzi wao.

“Suala la Bi Waiguru linapaswa kuendeshwa na Seneti kama ilivyoendesha hoja dhidi ya aliyekuwa Gavana wa Kiambu, Bw Ferdinard Waititu ili kuhakikisha watu wa Kirinyaga wamepata haki,” akasema Bw Kabinga.

Pia walimwonya Kiranja wa Wengi, Bw Irungu Kang’ata dhidi ya kuendesha mpango wowote wa kumwokoa Bi Waiguru.

Bw Wario alisema anaunga mkono hatua ya vyama kuwaadhibu wanasiasa waasi ambao wamekuwa wakiuka amri ya vyama na kwenda kinyume na maagizo ya Rais Kenyatta na Bw Odinga.

“Ninaunga mkono hatua ya kuwaadhibu wanasiasa waasi kwani tunataka siasa ya maendeleo na amani kupitia kwa maridhiano ya Rais Kenyatta na Bw Odinga, ” alisema.

Naye Bw Hirbae aliwakashifu viongozi wanaoeneza chuki katika kaunti ya Tana River akisema huenda yakaleta vita.

“Hapa Tana River haswa Tana Delta tumeshuhudia amani kwa miaka mingi ambapo jamii ya Pokomo imekuwa ikiishi pamoja na jamii ya Oroma bila balaa, na hatutakubali viongozi waanze siasa ya kugonganisha jamii,” akasema.

Kwa upande wake, mwakilishi wa wanawake Isiolo aliwasihi wakazi waishi kwa amani na kukumbatia maridhiano.

Madiwani wa Kirinyaga walifuata sheria kumng’oa Waiguru – Korti

NA MAUREEN KAKAH

Maakama Kuu imetupilia mbali ombi la Gavana wa Kirinyaga Anne Waiguru la kutaka kutupiliwa mbali kung’atuliwa kwake mamlakani na madiwani wa kaunti hiyo.

Jaji Weldon Korir aliamuru kwamba madiwani wa Kaunti ya Kirinyaga hawakukiuka amri zozote za korti na walifuata sheria kufanya hivyo.

Bi Waiguru alienda kortini kuiomba korti kusimamisha kung’atuliwa kwake mamlakani akidai madiwani hao walikiuka amri ya korti.

Gavana huyo alijijtetea kuwa madiwani hao walikiuka amri ya korti akidai korti ilikuwa tayari imesimamisha kwa muda madiwani hao kujadili kung’atuliwa kwake kwa sababu ya janga la virusi vya corona.

Bi Waiguru alikuwa ameiomba korti itupilie mbali uamuzi huo wa madiwani hao lakini ombi lake likakataliwa. Madiwani 23 kati ya 33 waliunga mkono kutolewa kwa Waiguru kutoka kiti cha ugavana huku suala hilo sasa likielekea katika Bunge la Seneti.

Hatima ya Waiguru ni seneti lakini yeye afika mahakamani kupinga kuondolewa kwake

SAMMY WAWERU na MAUREEN KAKAH

SPIKA wa bunge la seneti Ken Lusaka amethibitisha Jumatano kwamba amepokea barua ikielezea hoja ya kumtimua Gavana wa Kirinyaga Anne Waiguru ambayo ilipata uungwaji mkono unaotosha.

Waiguru analaumiwa kwamba ana mienendo mibaya na anatumia afisi vibaya.

Jumanne, madiwani 23 kati ya 33 walipitisha hoja ya kumng’oa gavana Waiguru licha ya kuwepo kwa amri ya mahakama iliyozuia kujadiliwa kwake.

Akithibitisha kupokea hoja hiyo iliyowasilishwa kwake na spika wa bunge la Kirinyaga Antony Gathumbi, Bw Lusaka Jumatano katika kikao na wanahabari katika afisi yake Nairobi, aliwaambia kuwa tayari imepokezwa timu ya wanasheria.

“Tumeipokea na kuikabidhi kikosi cha wanasheria baada ya kuikagua Kwa sasa wanapaswa kuanza kuishughulikia,” Spika Lusaka akasema.

Gavana huyo wa zamani Bungoma, alisema amethibitisha nakala ya hoja hiyo, pamoja na sahihi za madiwani walioipitisha.

Ikizingatiwa kuwa seneti inajukumika kufuatilia utendakazi wa serikali za ugatuzi, alihakikisha kuwa bunge hilo litasikiliza pande zote mbili na uamuzi wa haki na uwazi kutolewa.

“Seneti ni bunge adilifu; Ni kama korti. Tutasikiliza pande zote mbili, pia tutampa gavana nafasi ya kujieleza na kujitetea. Madiwani wamefanya jukumu lao kama walinzi wa serikali ya kaunti,” Bw Lusaka amesema.

Hoja yenyewe inajiri wakati ambapo taifa linapambana na janga la Covid-19, na baadhi ya viongozi wanawake nchini wamejitokeza kukashifu hoja hiyo, wakidai inalenga kuduwaza uongozi wa wanawake nchini.

Spika Lusaka anatarajiwa kuteua kamati ya muda ya maseneta watakaojadili hoja hiyo.

Wakati huo huo, Waiguru amefika mahakamani kupinga kuondolewa kwake na bunge la Kaunti ya Kirinyaga.

Anasema ni hatua inayokiuka sheria kwa sababu mahakama kuu ilikuwa imesitisha japo kwa muda mchakato wa kumuondoa mamlakani kwa sababu ya changamoto za janga la Covid-19.

Endapo kamati hiyo itaridhishwa na uamuzi wa bunge la Kirinyaga, Waiguru atatemwa kama gavana, sawa na ilivyoshuhudiwa kwa aliyekuwa gavana wa Kiambu Ferdinand Waititu.

Waiguru hata hivyo, anaweza kuelekea mahakamani kukata rufaa.

Viongozi wanawake wamtetea Waiguru

CHARLES WASONGA na SAMMY WAWERU

VIONGOZI wanawake wamemtetea Gavana Anne Waiguru saa chache baada ya hoja ya kumwondoa afisini kupitishwa katika Bunge la Kaunti ya Kirinyaga.

Waziri wa Utumishi wa Umma na Masuala ya Kijinsia na Mbunge Mwakilishi wa Wanawake wa Homa Bay Gladys Wanga wamedai kuwa hatua hiyo haifai kwani inalenga kudumaza uongozi wa wanawake nchini

Prof Kobia amelaani madiwani wa Kirinyaga waliopitisha hoja ya kumwondoa afisi Gavana Waiguru hawathamini uongozi wa wanawake.

Mnamo Jumanne madiwani 23 kati ya 33 walipitisha hoja hiyo, licha ya kuwepo kwa amri ya mahakama ya kuzuia kujadiliwa kwake, na sasa uamuzi huo unasubiriwa kuwasilisha kwa Seneti baada ya siku tatu.

“Muhula wa uongozi wa Gavana Waiguru unakatizwa na kura hiyo ambayo haikuwasilishwa kwa njia halali. Hii ina maana kuwa kuna watu ambao hawathamini uongozi madhubuti wa wanawake,” Profesa Kobia akasema kwenye taarifa.

“Inavunja moyo kwamba Gavana huyo anaondolewa mamlakani katika kipindi hiki cha vita dhidi ya Covid-19, ambayo imeathirika pakubwa maendeleo katika nyanja zote nchini,” taarifa hiyo ikaongeza.

Naye Bi Wanga akasema kupitia ujumbe katika akaunti yake ya Twitter: “Hoja hiyo ilidhaminiwa na baadhi ya viongozi ambao wanauenea wivu utendakazi mzuri wa Bi Waiguru kwa sababu yeye ni mwanamke,”

“Bunge la Seneti inapasa kutupilia mbali uamuzi huo kwa sababu ulifikia kutokana na sababu zisizo na mashiko,” akaongeza Bi Wanga.

Mbunge huyo, ambaye alisema yeye ni mtetezi sugu wa Ajenda ya Wanawake Nchini Kenya (COWA) aliongeza kuwa utaratibu wa kisheria haukufuatwa wakati wa kujadiliwa na kupitishwa kwa hoja hiyo.

Mwingine ni Gavana wa Kaunti ya Kitui Charity Ngilu ambaye amemfariji na kumtaka awe ngangari katika kuhudumia wakazi wa Kirinyaga.

“Ni miongoni mwa njia zisizo halali zilizotumiwa na mitandao ya kumuondoa madarakani, tunakashifu hayo,” Gavana Ngilu amechapisha katika ukurasa wake wa Twitter na Facebook.

 

Spika wa bunge la kaunti ya Kirinyaga Antony Gathumbi anatarajiwa kuwasilisha mapendekezo ya bunge hilo kumbandua Waiguru kwa spika wa seneti Ken Lusaka, ambapo seneti itajadili mswada huo na kutoa uamuzi.

Endapo seneti itaridhishwa na hoja za bunge la kaunti ya Kirinyaga kumuondoa afisini, Waiguru anaweza kuelekea mahakamani kukata rufaa.

Lakini Rais wa Chama cha Mawakili Nchini (LSK) Nelso Havi alipuuzilia mbali kauli ya Waziri Kobia akisema Waiguru alichaguliwa baada ya ufaafu wake kukaguliwa sawasawa.

“Kama utetezi wake wa jinsia ya kike ni halali, basi awasilishe ombi kwa Jaji Mkuu David Maraga afutilie mbali bunge kwa kutotimiza hitaji la kikatiba kuhusu usawa wa kijinsia,” akasema Bw Havi kupitia Twitter.

Mnamo Jumanne madiwani 23 waliopiga kura ya kumwondoa afisini Gavana Waiguru kwa misingi ya mienendo mibaya na matumizi mabaya ya afisi

Hoja hiyo iliwasilishwa na Diwani wa Wadi ya Mutira David Kinyua Wangui. Madiwani wanne walisusia upigaji kura na wengine sita hawakuhudhuria kikao hicho cha bunge la Kaunti ya Kirinyaga.

Mapema vurugu zilizuka katika bunge hilo baada ya madiwani Athony Munene (wa wadi ya Karumandi) na diwani maalum Lucy Njeri, ambao ni wandani wa Waiguru, kufurushwa kutoka ukumbini.

Waiguru ametoa taarifa akilaani hatua ya madiwani waliopitisha hoja hiyo aliyoitaja kama inayokwenda kinyume na sheria “kwa kujadiliwa licha ya mahakama kutoa amri kwamba isitishwe.”

Waiguru afika kortini kupinga kutimuliwa kwake

NA MAUREEN KAKAH

Gavana wa Kaunti ya Kirinyaga Anne Waiguru ameenda kortini kusimamisha kung’olewa kwake mamlakani na madiwani wa kaunti hiyo.

Bi Waiguru alisema kwamba madiwani hao walipuuza amri ya korti kwa sabau korti ilikuwa imesimamisha maswala ya kujadiliana kuhusu kung’atuliwa kwake mamlakani kwa sababu ya janga la corona.

Waiguru aliiomba korti kufutilia mbali kung’olewa kwake mamlakani mpaka kesi hiyo isikizwe.

Madiwani walivyopigana wakizozania kumng’oa Waiguru

NA GEORGE MUNENE

Purukushani ilizuka kati ya madiwani katika bunge la Kaunti ya Kirinyaga Jumanne wakati mjadala wa kumng’oa mamlakani Gavana Anne Waiguru ulipokuwa ukiendeshwa.

Madiwani hao walipigana asubuhi huku wakitatiza kikao hicho kwa muda lakini Sajini wa Ulinzi alirudisha utulivu kwenye kikao.

Matatizo yalianza pale diwani wa Mutira Kinyua Wangui alisema hoja ya kumtoa mamlakani Waiguru lazima ipitishwe.

Madiwani wawili wanaomuunga mkono Gavana Waiguru Bw Antony Munene (Karumandi) na Lucy Njeri alisimama na kudai kwamba sahihi zao zilikuwa ghushi kwani majina yao yalitokea kwenye orodha ya waliotaka Bi Waiguru atolewe mamlakani.

Wawili hao walikabiliana na Bw Wangui, wakiapa kwamba hawataruhusu mjadala huo uendelee.

Kulikuwa na machafuko kwenye kikao hicho huku madiwani hao wawili wakipiga kelele na kumpiga Bw Wangui. Hapo ndipo wenzao waliokuwa wakiunga mkono mjadaja huo walijaribu kuwatupa nje wawili hao na vita vikali vikazuka.

Makundi hayo mawili yalipigana na kurushiana mateke na kurushiana viti. Kulikuwa na mvutano kati ya pande hizo mbili, walikuwa wakiunga Gavana Waiguru na waliompiga uliopelekea Spika Bw Antony Gathumbi kusalia ameduwaa.

Waiguru akataa kuidhinisha fedha za ziada kwa bajeti ya corona

NA GEORGE MUNENE

Gavana wa Kaunti ya Kirinyanga Ann Wainguru amekataa kuidhinisha mabadiliko yaliyowekwa kwenye bajeti ya kukabiliana na janga la corona na madiwani wa kaunti hiyo.

Bi Waiguru aliwalaumu madiwani hao kwa kupenedekeza mabadiliko yatakayowaumiza walipa ushuru wa kaunti hiyo.

Gavana huyo alisema kwamba bajeti hiyo ilipaswa kuwa ya Sh20 milioni na ilifaa kufadhili mikakati ya  kupunguza kusambaa kwa Covid-19.

Badala yake madiwani hao walipendekeza bajeti ya Sh100 milioni ambayo awali ilikuwa imetengewa hospitali ya Kerugoya na Sh30 milioni zilizotengewa mafuta na miradi ya wadi.

“Tulikuwa tumetenga pesa za kupambana na janga la corona lakini sasa madiwani wamekekuwa kikwazo kwa kuanzisha mabadiliko ili wajitengee pesa zaidi ,’’alisema Waiguru.

Waiguru alalama wapinzani wake wanamhujumu

WANDERI KAMAU na GEORGE MUNENE

GAVANA Anne Waiguru wa Kirinyaga, amejitetea vikali kuhusu utendakazi wake, akiwalaumu mahasimu na washindani wake katika Chama cha Jubilee (JP) kwa masaibu yanayomkumba.

Mnamo Jumatano, mamia ya wakazi katika kaunti hiyo walifanya maandamano katika mji wa Ngurubani wakishinikiza gavana huyo kung’olewa mamlakani.

Wakazi hao walimlaumu kwa kujikokota kutekeleza miradi ya maendeleo na kuchelewesha mishahara ya wafanyakazi.

Lakini kwenye mahojiano na kituo kimoja cha redio Alhamisi, gavana huyo alihusisha masaibu yake na “watu wenye ushawishi” katika chama hicho, aliodai wanampiga vita kwa kumtumia Naibu Gavana Peter Ndambiri na madiwani katika Bunge la Kaunti ya Kirinyaga.

“Kuna watu katika Jubilee ambao wamekuwa wakimtumia naibu wangu na madiwani kunipiga vita kisiasa kutokana na rekodi yangu nzuri ya maendeleo. Sina hofu hata kidogo. Niko tayari kuwakabili,” akasema.

Uhasama

Kumekuwa na tofauti kali kati ya gavana na naibu wake, akisema anaendesha njama za kichinichini kumwondoa mamlakani, akilenga kuwania nafasi hiyo mnamo 2022.

Gavana pia amekuwa akiwalaumu Katibu katika Wizara ya Usalama wa Ndani, Dkt Karanja Kibicho na Mwakilishi wa Wanawake, Bi Wangui Ngirici, kuwa miongoni mwa watu “wanaoingilia” utendakazi wake.

Kwenye maandamano hayo, wakazi walimlaumu gavana kwa kuchelewesha mishahara ya wahudumu wa afya.

Wakazi hao wenye ghadhabu waliacha shughuli zao za kawaida katika mji wa Ngurubani, ili kushiriki maandamano hayo.

Hali ya taharuki ilitanda katika eneo hilo, kwani baadhi yao waliwazuia waendeshaji magari kuendelea na safari zao huku wengine wakiwahangaisha.

Wakiwa wamebeba mabango, waliilaumu serikali ya Bi Waiguru kwa kukosa kuimarisha hali ya barabara na kutowalipa wafanyakazi mishahara yao.

“Lazima Waiguru aende! Lazima Waiguru aende!” akasema mmoja wa wakazi.

Wakiongozwa na Bw Michael Chomba, walimlaumu gavana kwa kutoshughulikia malalamishi ya wafanyakazi, huku wakilitaka Bunge la Kaunti kumng’oa mamlakani.

“Barabara ziko katika hali mbaya huku wahudumu wa afya wakiwa hawajalipwa mishahara kwa miezi miwili. Serikali hii pia haishughulikii masaibu ya watu walioathiriwa na mafuriko katika kijiji cha Githogondo kati ya maeneo mengine,” akasema.

Hata hivyo, Bi Waiguru alisema ucheleweshaji huo ulichangiwa na “matatizo kadhaa” yaliyotokea kwenye Hazina Kuu ya Serikali.

“Binafsi, mshahara wangu ulichelewa kwa miezi miwili. Lazima wafanyakazi waelewe wakati mwingine matatizo haya hutokea. Hata hivyo, hawawezi kunyimwa mishahara yao hata ichelewe kwa kwa muda upi,” akasema.

Wakati huo huo, imebainika kwamba huenda madiwani 11 walioshiriki kwenye mchakato wa jaribio la kumng’oa mamlakani Bi Waiguru wakafukuzwa katika Jubilee.

Kulingana na mwenyekiti wa chama hicho katika kaunti hiyo, Bw Muriithi Kang’ara, huenda madiwani wakachukuliwa hatua kama walivyofanyiwa aliyekuwa Kiongozi wa Wengi kwenye Seneti, Bw Kipchumba Murkomen na aliyekuwa Kiranja wa Wengi, Bi Susan Kihika.

CORONA: Waiguru aponea kung’atuliwa mamlakani

Maureen Kakah na George Munene

GAVANA Anne Waiguru wa Kirinyaga, Jumanne alipata afueni baada ya mahakama kusimamisha kwa muda kujadiliwa kwa hoja ya kumwondoa mamlakani.

Jaji Weldon Korir wa Mahakama Kuu aliagiza kuwa bunge la kaunti hiyo linapaswa kusitisha mpango huo hadi janga la corona litakapodhibitiwa nchini.

Kwenye agizo hilo, jaji huyo alisema kuwa kujadiliwa kwa hoja hiyo kwa sasa kutakuwa sawa na kuingilia haki za kisiasa za Bi Waiguru.

“Kwa maoni yangu, hali ilivyo inahitaji mahakama kuingilia kati mpango wa bunge, hasa wakati huu nchi inapokabili virusi vya corona. Mpango huo unatishia haki zake na hitaji la ushirikiano wa taasisi za serikali kuyakabili majanga,” ikaagiza mahakama.

Bi Waiguru alisema anatekeleza agizo la Serikali ya Kitaifa kwa maafisa wake kufanyia kazi kutoka majumbani mwao.

Jaji Korir alisema kwamba utaratibu huo unamhitaji gavana na wakili wake kuwepo kwenye bunge.

Vile vile, mahakama ilisema kuwa ushirikishi wa wananchi kwenye hoja hiyo utaathiriwa na kanuni zinazowazuia watu kukongamana katika maeneo ya umma.

“Sioni sababu yoyote maalum kwenye madai kwamba hoja hiyo inapaswa kusimamishwa kwani haijazingatia taratibu zifaazo za sheria. Hata hivyo, suala la virusi vya corona ni lenye uzito na linapaswa kuchukuliwa kwa makini,” akasema Jaji Korir.

Jaji alitoa uamuzi huo kwenye kesi ambapo Bi Waiguru alilishtaki bunge hilo na Spika wake Jumanne iliyopita ili kusimamisha mpango wa kumwondoa mamlakani.

Bunge linamlaumu gavana kwa madai ya ufisadi, matumizi mabaya ya mamlaka na kutoishirikisha kwenye masuala muhimu yanayohusu uongozi wa kaunti.

Huenda Waiguru akang’olewa mamlakani

NA GEORGE MUNENE

GAVANA wa Kirinyaga Bi Anne Waiguru huenda akang’atuliwa mamlakani baada ya notisi ya kupiga kura ya kutokuwa na imani na uongozi wake kufikishwa katika bunge la kaunti hiyo Jumatano.

Mswada huo uliwasilishwa na diwani wa Mutira Bw Kinyua Wangui ambaye alimshutumu gavana huyo kwa kuvunja sheria za Katiba.

Gavana huyo amekejeliwa kwa kuenda kinyume na sharia kwa kudinda kutoa hotuba ya kila mwaka kwa bunge la kaunti hiyo, kitendo ambacho Bw Wangui alisema kilivunja sheria za serikali kuu na kaunti.

Bw Wangui pia alikasirishwa na gavana huyo kwa kuvunja Sheria ya Utoaji wa Kandarasi na Uzoaji wa Mali kwa kudhalilisha mamlaka ya afisa wa uhasibu, kwa kuunda kamati ya kupitisha zabuni iliyojaa ‘wafanyakazi wake’ kwa manufaa yake mwenyewe.

Bi Waiguru pia amejipata matatani kwa kutumia afisi yake kujilipa Sh10.6 milioni kama marupurupu ya usafiri ilhali hakusafiri popote.

Bunge la kaunti liliambiwa gavana huyo pia alikuwa anawapa kandarasi marafiki zake na kampuni anazohusika nazo.

“Inashangaza sana baadhi ya kandarasi zilipewa kampuni inayohusishwa na afisa mmoja katika serikali ya Bi Waiguru,” akasema Bw Wangui.

Kabla ya kwasilishwa kwa mswada huo, gavana huyo alifokea wawakilishi wa wadi kwa kupanga njama ya kumtoa mamlakani.

Aliwataka madiwani hao kukoma kuangazia mambo yasiyo na maana badala ya kuangazia vita dhidi ya virusi vya corona

“Inasitikisha sana wakati taifa la Kenya na dunia nzima inapambana na janga la virusi vya corona mawakilishi wa wadi wengine wanangazia mambo ya kisiasa yasiyo na maana na mswada wa kunitoa mamlakani usiokuwa na misingi,” alisema Bi Waiguru.

Bi Waiguru alijitetea dhidi ya habari kwamba amekuwa akifaidika na kandarasi za serikali.

“Hizi ni propaganda za kujitafutia umaarufu.”

Wawakilishi wadi hao pia wanamshutumu Bi Waiguru kwa kujinunulia gari la Sh15 milioni bila kufuata sheria za kandarasi.

Alielezea kuwa alinunua magari hayo kulingana na sheria za kandarasi za serikali zinazowiana na zile za Wizara ya Kazi za Umma na “hayo si matumizi mabaya ya pesa za umma.”

“Madiwani hawa wanapaswa kusoma na kuelewa maana ya utumizi mbaya wa pesa za umma kabla ya kunishutumu kwa ubadhirifu wa pesa,” alijitetea.

Alipuuzilia mbali madai kwamba kuwa sekta ya afya iko katika hali mbaya karika kaunti hiyo.

Alidai kuwa mswada huo wa kumtoa mamlakani umefikishwa bungeni kwa sababu alikataa kuwapa kandarasi madiwani hao.

IMETAFSIRIWA NA FAUSTINE NGILA

JAMVI: Siasa fiche za Waiguru, Kibicho kuhusiana na Kemri

Na WANDERI KAMAU

MVUTANO mkali unatokota kati ya Gavana Anne Waiguru wa Kirinyaga na Katibu wa Wizara ya Usalama Dkt Karanja Kibicho, kuhusu udhibiti wa siasa wa kaunti hiyo na ukanda wa Mlima Kenya kwa jumla.

Hilo limechangiwa na utata kuhusu uendeshaji wa mradi tata wa Taasisi ya Utafiti wa Kimatibabu Kenya (Kemri) wenye thamani ya Sh15 bilioni. Mradi huo tata umo katika ardhi ya ekari 100 katika eneo la Makutano, eneobunge la Mwea.

Hata hivyo, wadadisi wanasema kuwa sababu kuu ya vita hivyo baina yao ni ushindani wa udhibiti wa siasa za Mlima Kenya, hasa urithi wa Rais Uhuru Kenyatta.

Hili ni baada ya kuibuka kwamba Dkt Kibicho anapanga kuwania ugavana katika kaunti hiyo, hatua inayoonekana kumpa wasiwasi Bi Waiguru.

Kando na Dkt Kibicho, wadhifa huo umewavutia watu kadhaa wenye ushawishi mkubwa, baadhi yao wakiwa balozi wa Kenya nchini Amerika Bw Njeru Githae, kiongozi wa Narc-Kenya Bi Martha Karua, aliyekuwa gavana wa kaunti hiyo Bw Joseph Ndathi, Mwakilishi wa Wanawake Bi Wangui Ngirichi kati ya watu wengine maarufu.

Na kwa kuwa Bi Waiguru anapania kuwania mojawapo ya nyadhifa kuu za kitaifa ikiwa Wakenya watapitisha ripoti ya Mpango wa Maridhiano (BBI), wadadisi wanasema kuwa tashwishi kuhusu hatima ya mchakato huo ndiyo inaonekana kumpa wasiwasi wa kisiasa.

“Bi Waiguru ametangaza wazi kwamba analenga kupata mojawapo ya nyadhifa kuu ambazo ripoti ya BBI imependekeza kubuni; baadhi zikiwa Waziri Mkuu ama Naibu Waziri Mkuu. Hata hivyo, lazima ahakikishe kuwa ametetea na kulinda nafasi yake ya ugavana ikiwa mpango huo hautafaulu,” asema Bw Wycliffe Muga, ambaye ni mchanganuzi wa siasa.

Ingawa ni mapema, ujio wa Dkt Kibicho, Bw Githae na Bi Ngirichi umetajwa kumnyima usingizi Bi Waiguru, ikizingatiwa kwamba kando na ushawishi mkubwa wa kisiasa, wana uwezo mkubwa kifedha.

Tangu kuanza kuhudumu kama gavana, Bi Waiguru amekuwa akifanya mikakati kujinadi kama mrithi wa kisiasa wa Rais Uhuru Kenyatta kama kiongozi wa Mlima Kenya, ikiwa atastaafu uongozini mnamo 2022.

Mara tu baada ya kuchaguliwa kama gavana, alichaguliwa kuwa Naibu Mwenyekiti wa Baraza la Magavana (CoG), akiwa mwanamke wa kwanza kuchukua nafasi hiyo.

Baadaye, alianza harakati za kuipigia debe ripoti ya BBI kupitia kundi la ‘Embrace’ lililowashirikisha viongozi wa kisiasa wanawake, waliodai kuunga mkono handisheki kati ya Rais Kenyatta na kinara wa ODM Bw Raila Odinga.

Wachanganuzi wanasema kuwa lengo la Bi Waiguru kutwaa nafasi ya Uwaziri Mkuu ama naibu wake, ndiyo sababu kuu ambapo anamkabili kiongozi yeyote anayeonekana kuwa tishio ama kuingilia karata zake kisiasa.

Wiki iliyopita, gavana huyo alijibizana vikali na Dkt Kibicho kuhusu mradi wa Kemri, huku akimlaumu (Dkt Kibicho) kwa “kutumia ushawishi wake kuingilia kati utendakazi wa serikali ya Kirinyaga.”

Utata huo ulianza baada ya Bi Waiguru kusema kwamba lazima wenyeji wa kaunti hiyo watengewe angaa asilimia 30 ya nafasi za ajira mradi huo utakapokamilika, la sivyo serikali yake haitatoa hatimiliki ya ardhi hiyo.

Bi Waiguru alisema kuwa lazima hilo lifikiwe kupitia mwafaka utakaoandikwa kati ya serikali yake na taasisi hiyo.

Hata hivyo, Dkt Kibicho alimjibu kwa kusema kuwa ndiye kikwazo kikuu kwa mradi huo kuanza, kwani hautawafaa wenyeji wa kaunti hiyo pekee.

“Tusianze kumwaga tunapojaza. Ni ujinga. Sasa tunasema hawa (Kemri) waandike muafaka wao. Hata mkikosa kuajiriwa, si ni nyiyi mtakuwa mkuwauzia chakula? Si wale wanakunywa pombe watanunua kutoka kwenu? Hata yule angetaka kuoa, si ataoa hapa tu?”

Kauli hiyo ilimkasirisha vikali Bi Waiguru, akisema Dkt Kibicho anaingiza siasa kwenye suala hilo ili kujifaidi.

“Dkt Kibicho sasa amemzidi mamlaka Rais Kenyatta? Mbona anaingiza maslahi yake binafsi kwenye mradi huu? Ikiwa anataka kujiingiza kwenye siasa, basi anapaswa kujiuzulu wadhifa wake na kujiunga na wengine kwenye kampeni za mapema. Kwa sasa, anapaswa kuhakikisha kuwa kila Mkenya ana usalama wa kutosha,” akasema.

Januari 2020 Rais Kenyatta aliagiza suala hilo kusuluhishwa mara moja, kwa pande hizo kutia saini mwafaka ambao utakubaliwa na kila mmoja.

“Sisi hatuna shida na mradi huu. Ni mradi mkubwa. Hatutaki kuchelewesha ujenzi wake. Kwako gavana (Waiguru), maliza kutayarisha mwafaka ambao utatiwa saini na pande zote. Huu ni mradi utakaoifaa Kenya yote,” akasema Rais Kenyatta.

Hata hivyo, baadhi ya viongozi wanamlaumu Bi Waiguru kwa “kupotoshwa” na baadhi ya washirika wake wa karibu.

Miongoni mwa viongozi hao Bi Ngirichi, wabunge Kabinga Thayu (Mwea), Gichimu Githinji (Gichugu) kati ya wengine.

Wabunge hao wanaegemea mrengo wa ‘Tangatanga’ ambao unamuunga mkono Naibu Rais William Ruto kuwania urais mnamo 2022.

Duru zinaeleza kuwa makabiliano zaidi ya kisiasa yanatarajiwa, kwani mabwanyenye kadhaa wamekita kambi katika kaunti hiyo ili kuwafadhili wanasiasa watakaoendeleza maslahi yao.

Waiguru amezea mate cheo cha juu

Na NDUNGU GACHANE

GAVANA Anne Waiguru wa Kirinyaga ameeleza nia ya kutaka kushikilia mojawapo ya nyadhifa kubwa katika serikali ijayo, ikiwa mapendekezo ya ripoti ya Jopo la Maridhiano (BBI) yatapitishwa.

Kwenye mahojiano ya kipekee na ‘Taifa Leo,’ Bi Waiguru alisema kuwa ikizingatiwa kwamba kutakuwa na Rais, Naibu Rais na Waziri Mkuu, mwanamke anapaswa kuhudumu angaa katika mojawapo ya nafasi hizo.

Bi Waiguru alisema kuwa anaamini ana uwezo wa kuhudumu kwenye mpangilio huo mpya wa utawala ikiwa mapendekezo hayo yatapitishwa na kutekelezwa.

Aliisifu ripoti ya BBI, akisema itahakikisha usawa kwenye uwakilishi wa maeneo mbalimbali serikalini.

“Kuhusu siasa za 2022, ninatathmini nafasi zilizopo. Nitashiriki kwenye mchakato wa maandalizi ya utaratibu wa kubuniwa kwake kwani ninatamani kuchangia katika uongozi wa nchi hii. Ninaamini kwamba nina uwezo wa kuwahudumia watu wetu,” akasema.

“Tunatarajia kwamba tutakuwa na viongozi wawili watakaokuwa manaibu waziri mkuu. Hilo linamaanisha kuwa kutakuwa na nafasi tano kuu katika uongozi wa kitaifa. Ni lazima thuluthi moja ya nafasi hizo itengewe wanawake,” akasema.

Kuhusu siasa za Mlima Kenya, Bi Waiguru alieleza kwamba anaamini atakuwa amejizolea ushawishi wa kutosha katika eneo hilo kufikia 2022, ambao atatumia kuwaraia wakazi kuwachagua viongozi wanaofaa.

“Ninatarajia kuutumia ushawishi wangu kuwarai wanawake kuwania nafasi za kisiasa. Mbali na hayo, nitalishinikiza eneo hilo kuwachagua viongozi wanaofaa,” akasema.

Katika siku za majuzi Gavana Waiguru amekuwa akihusika sana katika shughuli za siasa za Mlima Kenya katika kile kinachojitokeza kuwa mbinu ya kujiweka katika nafasi ya kupata ushawishi baada ya Rais Uhuru Kenyatta kuondoka madarakani 2022.

Hii ni kutokana na kuwa eneo hilo halina kiongozi ambaye amejitokeza wazi kuweza kutoa mwelekeo kwa jamii ya eneo hilo baada ya Rais Kenyatta kung’atuka.

Gavana Kamotho motoni kwa kutaka kumrithi Uhuru

NDUNG’U GACHANE, DPPS Na CHARLES WASONGA

GAVANA Anne Mumbi Kamotho wa Kirinyaga amejipata motoni kwa kuchukua kazi ya Rais Uhuru Kenyatta ya kutangaza msimamo wa kisiasa wa eneo la Mlima Kenya.

Wakosoaji wake wanasema Bi Kamotho amejifanya msemaji wa eneo hilo, wajibu ambao unatambuliwa kuwa wake Rais Kenyatta.

Naibu kiranja wa wengi katika Seneti, Irungu Kang’ata alisema matamshi ya gavana huyo kuwa eneo la Mlima Kenya liko tayari kumuunga mkono kiongozi wa ODM, Raila Odinga katika kinyang’anyiro cha urais 2022 ni yake binafsi.

Bw Kang’ata, ambaye pia ni Seneta wa Murang’a, alisema eneo hilo lina kiongozi mmoja pekee ambaye ni Rais Kenyatta, ambaye ndiye atawashauri viongozi wa kisiasa kuhusu yule wanayepasa kuunga mkono kwa wadhifa wa urais.

Alisema Bi Kamotho, au kiongozi yeyote yule hapaswi kujifanya kuzungumza kwa niaba ya eneo hilo, akisema matamshi kama hayo ni ya kibinafsi na hayawakilishi msimamo wa eneo zima la Mlima Kenya.

“Maoni yaliyowasilisha na gavana wa Kirinyaga ni yake kama mtu binafsi. Wengine wetu kutoka eneo hili tunasubiri kupata mwelekeo na ushauri kutoka kwa Rais Kenyatta. Kufikia sasa hajatuonyeshwa yule ambaye tunayepaswa kuunga mkono,” akasema Bw Kang’ata.

Wiki jana, Bi Kamotho alinukuliwa akisema kuwa eneo hilo liko tayari kubuni muungano wa kisiasa na Bw Odinga kuelekea uchaguzi mkuu wa 2022.

Gavana huyo pia alisema kuwa yuko tayari kuunganisha eneo hilo kisiasa na kuwa msemaji wake.

Kwingineko, baadhi ya wabunge wa chama cha Jubilee kutoka Mlima Kenya wamemshambulia Bw Odinga wakisema anadanganya kuwa hafanyi siasa, huku akiendeleza mikakati ya kujitayarisha kugombea urais 2022.

Wabunge hao walioandamana na Dkt Ruto katika Kaunti ya Meru jana, walisema Jubilee pia inapasa kuanza kujiandaa kwa ajili ya 2022 kama ODM inavyofanya.

Viongozi hao walikuwa ni Seneta Mithika Linturi (Meru), wabunge Mugambi Rindiki (Buuri), Halima Mucheke (kuteuliwa), Charity Kathambi (Njoro), Rigathi Gachagua (Mathira), Catherine Waruguru (Laikipia) na Jayne Kihara (Naivasha).

Wengine walikuwa John Muchiri (Manyatta), John Paul Mwirigi (Igembe Kusini) na Gichunge Kabeabea (Tigania Mashariki).

Bw Linturi alisema wakati umefika kwa Jubilee kufanya uchaguzi wake wa kitaifa ili kuimarisha maandalizi yake ya uchaguzi wa 2022.

Naye Bi Waruguru alisema handisheki inatumiwa vibaya kusaidia Bw Odinga kisiasa: “Tulimkaribisha Bw Odinga nyumbani kwetu kwa ajili ya kuunganisha Wakenya. Lakini sasa ni wazi ilikuwa mbinu ya kumsaidia kuchukua madaraka 2022.”

Dkt Ruto alisema haogopi kupambana na Bw Odinga kwenye uchaguzi wa urais 2022.

Ingawa alikariri kwamba kwa sasa hana haja kuzungumzia masuala kuhusu Uchaguzi Mkuu wa 2022, Dkt Ruto alimtaka Bw Odinga kwanza atangaze wazi kuwa atakubali uamuzi wa Wakenya endapo atashindwa tena uchaguzini.

“Sina shida yoyote kushindana na Bw Odinga 2022, lakini kwanza ahakikishie Wakenya kwamba endapo atashindwa, atakuwa muungwana na kukubali uamuzi wa Wakenya,” akasema alipozuru Kaunti ya Meru.

Matamshi yake yalitokea siku moja baada ya kuripotiwa kwamba Bw Odinga alitangaza nia ya kuwania urais ifikapo 2022.

Lakini Bw Odinga jana alipuuzilia mbali ripoti hizo na kusema kile anachokipa kipaumbele wakati huu ni mchakato wa kupalilia umoja nchini kupitia muafaka kati yake na Rais Uhuru Kenyatta.

Kwenye taarifa iliyotumwa kwa vyumba vya habari na msemaji wake Dennis Onyango, mwanasiasa huyo alisema wito aliotoa kwa wafuasi wa ODM Jumamosi ni kwamba wajiandae kwa uchaguzi wa mashinani wala si uchaguzi wa urais.

Bw Odinga alisema wakati huu ambapo imesalia miaka mitatu kabla ya uchaguzi mkuu ujao, wajibu wake ni kuangazia masuala muhimu yanayowakumba Wakenya kama vile kuzorota kwa uchumi, kukithiri kwa ufisadi, changamoto zinazokabili serikali za kaunti na mageuzi katika sekta ya elimu.

Kesi ya Karua dhidi ya Gavana Kamotho yagonga mwamba

Na RICHARD MUNGUTI

JUHUDI za kiongozi wa chama cha Narc-Kenya Bi Martha Karua za kumng’oa mamlakani Gavana wa Kirinyaga Anne Mumbi Kamotho ziligonga mwamba Jumanne Mahakama ya Juu ilipotupilia mbali rufaa aliyokuwa amewasilisha mwaniaji huyo wa zamani wa kiti cha urais.

Kutupwa kwa rufaa hiyo kulikuwa pigo kubwa kwa Bi Karua kwa vile kulizamisha ndoto yake kuwa Gavana wa Kirinyaga.

Bi Karua amepoteza mara tatu kesi ya kumtimua mamlakani Bi Kamotho aliyefunga ndoa ya kitamaduni mnamo Julai 13 na wakili Kamotho Waiganjo katika shule moja ya msingi Kirinyaga.

Mahakama ya juu ilisema katika uamuzi uliosomwa na Jaji Isaac Lenaola kwamba kesi ya Bi Karua ilikuwa imepitwa na wakati na haingelisikizwa. Walisema rufaa ilicheleweshwa kwa muda wa siku 60

Jaji Mkuu David Maraga na majaji Mohammed Ibrahim, Jackton Ojwang, Smokin Wanjala , Njoki Ndung’u na Lenaola walisema sheria iwazi kwamba kesi inayocheleweshwa kushtakiwa itupiliwe mbali.

“Rufaa ya Bi Karua iliwasilishwa mahakamani baada ya muda wa siku 60 uliowekwa kisheria kumalizika.Hivyo basi rufaa hii imepitwa,” walisema majaji hao wa mahakama ya upeo.

Waliitupilia mbali rufaa hiyo na kutangaza kwamba Bi Waiguru ndiye mshindi halisi wa kiti cha Ugavana wa Kirinyaga.

Baada ya kufikia uamuzi Bi Kamotho alikishinda kiti hicho kwa mujibu wa sheria mahakama iliamuru tume huru ya uchaguzi na mipaka imkabidhi cheti cha ushindi mshtakiwa.

Bi Kamotho alikishinda kiti cha Ugavana wa Kirinyaga kwa kuzoa kura 153,353 naye Bi Karua akajinyakulia kura116,626.

Aliyekuwa Gavana Bw Joseph Ndathi aliweza kuzoa kura 4,496.

Katika malalamishi yake Bi Karua alisema hakupewa fursa ya kuwasilisha ushahidi kuthibitisha kwamba kura zilipigwa vibaya katika vituo 100.

Kesi ya Bi Karua ilitupiliwa mbali na Mahakama Kuu na Mahakama ya Rufaa.

Baada ya kutupwa kwa kesi hiyo ya Mahakama kuu Kerugoya majaji watatu wa mahakama ya rufaa Jaji Mohammed Warsame, Jaji Daniel Musinga na Jaji William Ouko waliamuru kesi hiyo isikizwe upya wakisema “ Bi Karua hakutendewa haki.”

Hata hivyo kesi hiyo ilitupiliwa mbali tena na akakata rufaa mjini Nyeri kisha ikatupwa.

Bi Karua mwenye bidii ya mchwa aliwasilisha tena kesi hiyo katia mahakama ya upeo akitazamia kumng’oa mamlakani Bi Waiguru.

Hata hivyo ndoto yake Bi Karua iliambulia patupu rufaa hiyo kutupwa. Sasa atasubiri uchaguzi mkuu wa 2022 kujaribu bahati yake tena.

Nitatetea kiti changu 2022 – Gavana Mumbi Kamotho

NA SAMMY WAWERU

Naibu Rais Dkt William Ruto amekuwa akihimizwa kuteua mgombea mwenza kutoka eneo la Mlima Kenya ili kufanikisha azma yake kumrithi Rais Uhuru Kenyatta 2022, chini ya mrengo tawala wa Jubilee.

Ni mchakato ambao umekuwa ukiendeshwa na baadhi ya wanasiasa katika kundi la Tanga Tanga, na linalomuunga mkono Dkt Ruto.

Gavana Anne Mumbi Kamotho wa Kirinyaga (awali Bi Waiguru), ni mmoja wa viongozi ambao wamekuwa wakipendekezwa.

Mnamo Jumanne pindi tu baada ya mahakama ya juu zaidi nchini kufutilia mbali kesi ya kiongozi wa Narc Kenya, Martha Karua, iliyopinga kuchaguliwa kwa Gavana Kamotho, gavana huyu kwenye maelezo yake alisema huenda akatetea kuhifadhi kiti chake 2022.

“Anapaswa kuruhusu watu wa Kirinyaga waongozwe na viongozi waliowachagua, 2022 akiona anataka kiti tukutane kwa debe,” alisema Gavana Kamotho, akimtaka Martha Karua kuitikia uamuzi wa mahakama ya upeo.

Pia, alimtaka kiongozi huyo kuungana naye katika jitihada za kufanya maendeleo Kirinyaga. “Hili suala aliweke kando, aungane nasi katika kufanya maendeleo. Limekuwa lenye kuchokosha na gharama,” akasema.

Ingawa Naibu Rais Ruto hajatangaza atakayemsaidia kupeperusha bendera kuwania urais 2022, kauli ya gavana huyo ni ishara kuwa shinikizo la wanasiasa wanaomtaka awe mgombea mwenza liko kwenye njia panda.

Kufuatia uamuzi wa mahakama, Mumbi alisema kwa sasa anacholenga ni kufanyia kazi wakazi wa Kirinyaga kwa mujibu wa ahadi zake kabla kuchaguliwa gavana.

Siasa za urithi wa Ikulu 2022 zimekuwa zikisakatwa licha ya salamu za maridhiano kati ya Rais Kenyatta na kiongozi wa Orange Democratic Movement (ODM) Raila Odinga, Machi mwaka uliopita, maarufu kama Handisheki.

Hata ingawa haijabainika wazi mkataba kati ya viongozi hao, wamekuwa wakikashifu siasa za aina hiyo wakihoji lengo la Handisheki ni kuunganisha taifa. Makundi ya Tanga Tanga na Kieleweke-linaloegemea upande wa Rais na Bw Raila, yamekuwa yakirushiana maneno.