Serikali kutumia vijana na wanabodaboda kuendesha kampeni ya amani kuelekea 2022

Na CHARLES WASONGA

SERIKALI itatumia makundi ya vijana na waendeshaji bodaboda kuendesha mipango ya kudhibiti ghasia zinazohusiana na uchaguzi katika maeneo mbalimbali nchini kuelekea uchaguzi mkuu wa Agosti 9, 2022.

Waziri wa Usalama wa Ndani Fred Matiang’i, Jumatano alisema wanachama wa makundi haya mawili watakodiwa kushiriki katika mipango ya kuhubiri amani na kutoa elimu ya uraia.

“Makundi hayo ya vijana na wanabodaboda watashirikiana na mashirika ya kidini na wadau wengine kuendesha shughuli hizo kuanzia ngazi za vijijini hadi mijini,” Dkt Matiang’i akaeleza huku akitoa hakikisho kuwa serikali itadhibiti usalama kote nchini katika kipindi hicho cha uchaguzi.

Waziri alisema kampeni hiyo ya kuhubiri amani italenga maeneo ambayo yametambuliwa kuwa katika hatari ya kushuhudia machafuko na maeneo mengine ambako utafiti wa kiusalama unaendeshwa.

“Sisi katika sekta ya usalama, huwa hatuendeshi chaguzi, tunaandaa mazingira kwa IEBC kuendesha shughuli hizo. Sharti tuhakikishe kuwa uchaguzi unafanywa kwa usalama sawa na upokezaji wa kimamlaka. Tumejitolea kuhakikisha kuwa hakuna risasi itakayofyatuliwa na hakuna raia atakayejeruhiwa; Wakenya wote watasaidiwa kushiriki katika mpango wa kuunda uongozi na demokraasia ya nchi yetu,” Dkt Matiang’i akaongeza.

Waziri huyo alisema hayo katika Kongamano la 64 la Baraza Kuu la Baraza la Kitaifa la Makanisa Nchini (NCCK) lililofanyika katika Ukumbi wa Mikutano ya Limuru, Kaunti ya Kiambu.

Dkt Matiang’i aliongeza kuwa washirika wa kimaendeleo pia watahimizwa kufadhili kampeni za vijana kuhubiri amani nchini “ili kuzima kabisa kero ya fujo ambazo hugubika chaguzi nchini kila mara.”

Waziri ambaye alikuwa ameandamana na mawaziri wasaidizi Mercy Mwangangi (Afya), David Osiany (Biashara) na Zack Kinuthia (Michezo) alitoa changamoto kwa vijana kujisajili kwa wingi kuwa wapigakura ili wawanie nyadhifa za uongozi katika uchaguzi ujao.

Kaunti ya Nyeri yalenga kuchanja wanabodaboda 2,000

Na SAMMY WAWERU

KAUNTI ya Nyeri inalenga kuwapa wahudumu wapatao 2, 000 wa afya chanjo ya Homa ya virusi vya Corona. Gavana wa Kaunti hiyo, Bw Mutahi Kahiga amesema shughuli ya utoaji wa chanjo hiyo aina ya AstraZeneca tayari imeanza.

“Nyeri inalenga kuchanja wahudumu 2, 000 wa afya,” akasema Bw Kahiga.

Licha ya hofu kuibuka miongoni mwa Wakenya kuhusu usalama wa chanjo inayotolewa, Gavana Kahiga alisema watakaopokea Nyeri itakuwa kwa hiari.

“Utoaji wa chanjo ni kwa hiari, hakuna atakayelazimishwa. Hata hivyo, ninahimiza wahudumu wa afya wajikinge,” akasema.

Bara Uropa imesimamisha utoaji wa chanjo ya AstraZeneca, kufuatia visa kadha vya maafa ya wahudumu wa afya, baada ya kuchanjwa.

Nchi za Bara Ulaya zilizosimamisha utoaji wa chanjo hiyo ni pamoja na Norway, Denmark, Iceland, Bulgaria, Ireland, Netherlands, France, Italy na Germany.

Denmark na Norway wameandikisha visa kadha vya maafa baada ya wahudumu wa afya kuchanjwa.

Rais Uhuru Kenyatta hata hivyo amewahakikishia Wakenya kwamba wahudumu wa afya wako macho kushughulikia hali zozote ambazo huenda zikatokea, baada ya kupata chanjo.

Gavana Kahiga alisema baada ya wahudumu wa afya Nyeri kupata chanjo, serikali yake itaelekea kwa walimu na maafisa wa usalama kaunti hiyo.

Nyeri imeandikisha zaidi ya visa 1, 300 vya maambukizi ya Covid-19, huku 50 wakiripotiwa kuangamizwa na ugonjwa huo.

MAUYA OMAUYA: Serikali idhibiti wanabodaboda, vinginevyo tutajuta

Na MAUYA OMAUYA

Siku moja taifa hili litagutuka na kupata miji na vijiji vimetekwa na magenge yanayojulikana wazi lakini serikali itakuwa imepoteza uwezo wa kuyang’oa au kuyadhibiti kikamilifu.

Haya ni magenge ya vijana wa bodaboda wanaozidi kupenyeza mizizi yao katika barabara na mitaa kote nchini. Sekta hii kwa sasa inachipukia popote bila maelekezo ya kitaaluma au mwongozo wa sheria unaolainisha biashara na utendakazi wao.

Ramli za wachanganuzi zinaonyesha kwamba tunakoelekea, sekta hii itageuka kuwa jinamizi la usalama na kuleta majuto kwa jamii. Jukumu kuu la serikali yoyote duniani ni kuhakikisha kwamba maisha katika mipaka yake yanaendeshwa kulingana na taratibu za kisheria na maelekezo yanayokubalika kwenye jamii husika.

Ilivyo nchini Kenya kwa sasa, serikali imeshindwa au imejitia hamnazo katika juhudi za kulainisha uwepo wa bodaboda barabarani. Kila siku mpya sekta hii inakua kwa haraka na licha ya kuwa kitega uchumi kwa wahusika, sekta hii pia imechochea maovu na kuleta madhara yanayoatua nyoyo za wengi.

Zaidi ya Wakenya milioni 14 hutumia mbinu hii ya usafiri kila siku.

Kuna yapata bodaboda nusu milioni za kibiashara kwenye barabara zetu na pato la kila siku kwa wahusika ni takriban Sh450 milioni.

Katika nchi ambako uchechefu wa hela na uhaba wa ajira ni janga, inaeleweka kwa urahisi kwa nini biashara hii imewavutia maelfu ya vijana.

Hata hivyo sekta hii sasa inaelekea kuwa chimbuko la maovu iwapo serikali haitatia guu chini, kuilainisha na kuiweka ndani ya mabano ya sheria.

Mwanzo ni ukiukaji wa taratibu za usalama barabarani, jambo ambalo limesababisha vifo vingi ambavyo vingeepukika.

Kufikia sasa ajali za bodaboda huua idadi kubwa ya watu barabarani kushinda magari, jambo ambalo halingedhaniwa miaka michache iliyopita.

Ukitembelea hospitali nyingi nchini utapata wodi iliyotengewa majeruhi wa ajali za bodaboda. Hali yao ni ya kuhuzunisha sana.

Taswira ya misongamano ya bodaboda katikati mwa miji na barabarani inachukiza mno na inachangia mazingira duni na hali mbovu ya hewa.

Wanaotembea kwa miguu na waendeshaji magari hukumbana na madhila ya bodaboda hawa ambao wamenyakua kila nafasi barabarani. Wepesi wa kupenya na kuhepa huwapa fursa ya kuvunja sheria za barabarani bila kujali matokeo.

Majuma mawili yaliyopita walichukua sheria mikononi mwao na kuteketeza gari la naibu gavana wa Kisii, Joash Maangi baada ya kuhusika kwenye ajali eneo la Narok. Kufikia sasa wahusika hawajashtakiwa. Mijini na vijijini, pikipiki hizi zimegeuzwa vyombo vya kutekeleza uhalifu na kisha kutoweka kwa haraka.

Kufikia sasa hakuna mfumo mwafaka wa serikali kuhakikisha kwamba kila mwanabodaboda amesajiliwa rasmi, ana ujuzi, stakabadhi zifaazo na kituo rasmi cha kutekeleza biashara na vifaa vyote vinavohitajika.

Ukosefu wa udhibiti umeruhusu magugu kuota katika shamba hili. Umefungua lango kwa wahalifu kujificha humo na baadhi ya polisi kusherehekea rushwa inayozidisha uozo na maangamizi kwenye jamii.

Vijana wengi wanaoacha masomo wameambulia kwenye sekta hii kwa sababu ya urahisi wa kuingia na ukosefu wa taratibu rasmi.

Hata ushuru wanaotakiwa kulipa unayeyuka tu kwa sababu ya kuzembea kwa serikali.

Imebainika pia vijana husika wanatumiwa visivyo katika ulanguzi wa mihadarati, wahamiaji haramu, usafirishaji wa magaidi na kutekeleza mikwaruzano ya kisiasa na wanasiasa.

Ukuaji wa makundi haramu kama Mungiki au ghasia za bodaboda barabarani unawezekana tu kufuatia ulegevu wa serikali iliyopuuza majukumu yake.

Sekta ya bodaboda imesambaa kote nchini kama moto nyikani. Ukosefu wa udhibiti na mwongozo thabiti wa sheria umefanya bodaboda kugeuka jinamizi kila ujao.

Tusipoziba ufa, tutajenga ukuta halafu!

mauyaomauya@live.com

Tunatoa huduma muhimu, tupewe chanjo ya corona, wasema wanabodaboda

Na LAWRENCE ONGARO

WAHUDUMU wa bodaboda mjini Thika wameitaka serikali kuwajumuisha kwa vikundi vitakavyopokea chanjo ya Covid-19.

Kiongozi wao Bw Maina Irungu alidai wanabodaboda wapo katika hatari kubwa ya kuambukizwa corona kutokana na huduma wanayotekeleza kwa umma.

Alieleza kuwa miongoni mwa vikundi vilivyopendekezwa kupokea chanjo hiyo kama wahudumu wa Afya, walinda usalama na walimu, wao pia wangetamani kujumuishwa kwani wanatoa huduma muhimu za kila siku.

Aidha, alieleza kuwa kazi yao ni muhimu kwa sababu wanawabeba watu wa tabaka mbalimbali.

Bw Stephen Kiragu ambaye pia ni mhudumu wa BodaBoda alidai wananchi popote walipo wanastahili kufuata maagizo ya afya ili kuzuia corona.

“Siku hizo watu wengi hawazingatii kuvalia barakoa na kunawa mikono. Ni vyema wakufuata maagizo ya wizara ya afya, ” alisema Bw Kiragu.

Aleleza ya kwamba wananchi wameonyesha kulegeza kamba dhidi ya kupambana na covid-19.

Kulingana na ripoti ya serikali dosi milioni moja za chanjo hiyo zilifika nchini Jumanne usiku kabla ya kusambazwa katika maeneo yaliyopendekezwa.

Lakini kulingana na Waziri wa Afya Bw Mutahi Kagwe, bado itachukua muda fulani kabla ya chanjo ya kutosha wakenya wote kuwasili hapa nchini.

Wataalam wa kiafya wamesema ya kwamba virusi vya covid-19 vinaendelea kuenea huku wananchi wakishauriwa kufuata maagizo ya afya ya kuvalia barakoa, kunawa mikono na kuweka nafasi ya mita moja unusu kutoka kwa mwenzako.

Wanabodaboda Kiambu waahidiwa mikopo ya riba nafuu

Na LAWRENCE ONGARO

KAUNTI ya Kiambu imeweka mikakati ya kuwainua wanabodaboda kibiashara kutokana na matukio ya hali ngumu ya kiuchumi kutokana na makali ya virusi vya corona.

Gavana wa Kiambu Dkt James Nyoro amesema kuna haja ya kuwajali wafanyibiashara wa chini ili waweze kujikwamua kutokana na hali ngumu ya maisha.

Aliyasema hayo Ijumaa eneo la Githurai, Ruiru  alipowahutubia wanabodaboda huku akiwaonya wajichunge kutokana na corona ambayo imeingia kwa awamu ya pili.

Alisema wanaelewa vyema biashara nyingi zilikwama wakati wa homa ya corona na kwa hivyo ni vyema kuingilia kati kuona biashara za chini zinainuka tena.

Alifichua kuwa tayari wamezungumza na benki kadha ili ziweze kutoa mikopo ya riba ya nchini kwa wafanyabiashara.

“Tutakubaliana nao ili waweze kutoka riba ya asilimia 7 badala ya asilimia 13. Tunataka kuona biashara zikiinuka tena kama hapo awali,” alisema gavana huyo.

Alisema kuna mipango inayoendelea kuona ya kwamba wanabodaboda wanapitia mafunzo kadha ili kuhamasishwa jinsi ya kuzuia ajali nyingi zinazoshuhudiwa kila mara.

 

 

LEONARD ONYANGO: Viongozi wasiwatumie wanabodaboda, wanahatarisha usalama wao

Na LEONARD ONYANGO

TAKWIMU za Mamlaka ya Usalama Barabarani (NTSA) zinazoonyesha idadi ya wahudumu wa bodaboda walioangamia katika ajali za barabarani imeongezeka kwa karibu asilimia 50 mwaka huu ikilinganishwa na mwaka jana, zinaogofya.

Kwa mujibu NTSA, wahudumu wa bodaboda 884 walifariki katika ajali za barabarani kati ya Januari 1 na Oktoba 31, mwaka huu.

Hiyo ni sawa na ongezeko la asilimia 48 ikilinganishwa na 594 waliofariki barabarani mwaka jana.

Idadi ya abiria wa bodaboda ambao waliangamia barabarani kati ya Januari 1 na Oktoba 31 mwaka huu, imeongezeka kwa asilimia 26 hadi 360 kutoka 277 mwaka jana.

Iwapo hatua madhubuti hazitachukuliwa, idadi ya wahudumu wa bodaboda watakaoangamia barabarani itaongezeka maradufu mwaka huu, haswa ikizingatiwa kuwa ajali nyingi hutokea Desemba.

Ongezeko la ajali za bodaboda linasababishwa na hatua ya serikali kuonekana kulemewa kudhibiti sekta hiyo.

Wahudumu wa bodaboda wanaendesha pikipiki kiholela bila kuzingatia sheria za barabarani.

Hii ni kwa sababu wahudumu wa bodaboda wamegeuka mboni ya macho ya wanasiasa – hawaguswi.

Wahudumu wa bodaboda – ambao wanakadiriwa kuwa milioni 1.2 – husaidia pakubwa wanasiasa kupata kura. Baadhi ya wanasiasa wanakodisha wahudumu wa bodaboda wawasindikize katika mikutano ya kisiasa ili waonekane kwamba wanapendwa.

Bodaboda pia wanaweza kukodishwa kuzua vurugu dhidi ya wapinzani wa mwanasiasa aliyewakodisha.

Wagombeaji wa kisiasa; kuanzia udiwani, ubunge, useneta na ugavana, hutumia wahudumu wa bodaboda wakati wa kusaka kura.

Katika siku za hivi karibuni, Rais Uhuru Kenyatta na naibu wake William Ruto wamekuwa waking’ang’ania wahudumu wa bodaboda kwa malengo ya kisiasa.

Masharti makali ambayo yamekuwa yakiwekwa na serikali ili kudhibiti sekta ya bodaboda, yamekuwa yakilegezwa au kutupiliwa mbali ili kuepuka kuwakwaza wahudumu hao.

Wanasiasa wanahitaji kura kutoka kwa wahudumu wa bodaboda na wala hawana haja na usalama wao.

Serikali imegeuka kuwa jibwa linalobweka tu bila kung’ata wahudumu wa bodaboda wanaovunja sheria za barabarani.

Mwaka jana, serikali ilitishia kuwakamata wahudumu wa bodaboda wanaobeba abiria bila kuwa na helimeti, bima, mavazi ya kuaksi mwangaza, nakadhalika. Lakini masharti hayo yalilegezwa baadaye.

Mwezi uliopita, serikali ilitangaza kuwa inalenga kutoa mafunzo ya wiki moja kwa wahudumu wa bodaboda ambao watakiwa kulipia Sh750.

Kwa mujibu wa serikali, hakuna bodaboda ataruhusiwa kuhudumu bila cheti cha mafunzo hayo yatakayotolewa na Shirika la Huduma ya Vijana kwa Taifa (NYS).

Mpango huo pia huenda ukasambaratika kabla ya kutekelezwa.

Wahudumu wa bodaboda wataendelea kuangamia barabarani mpaka lini?

AKILIMALI: Mchana mkulima, jioni mwanabodaboda

NA SAMMY WAWERU

Ukizuru eneo la Ngoingwa, Thika utalakiwa na mandhari ya hadhi ya juu kutokana na majumba ya kifahari yaliyojengwa.

Hata ingawa mengi ni ya kibinafsi, kuna kadha ya kupangisha ili kusitiri wenye mapato ya kadri na yale madogo. Ni katika eneo lilo hilo barabara kuu inayoungisha mji wa Thika na Naivasha na Limuru imepitia.

Licha ya sifa hizo za kipekee, Ngoigwa ambayo inapatikana katika kaunti ya Kiambu, ina mashamba yanayoendeleza shughuli za kilimo. Hii ina maana kuwa mabwanyenye na wakazi kwa jumla, hawahangaiki kupata mazao ya kilimo. Isitoshe, wanapata mazao yanayotoka moja kwa moja shambani.

Katika mojawapo ya mgunda tunapatana na kijana Eric Mutunga, anayekuza mseto wa mboga. Aidha, huzalisha sukuma wiki, spinachi, mboga za kienyeji kama vile mnavu almaarufu sucha au managu, ikiwa ni pamoja na mchicha (terere).

Bw Mutunga, 27, pia hukuza broccoli – mboga nadra kupatikana na yenye manufaa chungu nzima kisiha, pilipili mboga (wengi wanaifahamu kama hoho) na vilevile nyanya.

Barobaro huyo anayetoka Masaku, Kaunti ya Machakos anasema alihamia eneo la Thika miaka kadha iliyopita, ili kusukuma gurudumu la maisha. Kabla kuingilia shughuli za kilimo, gange iliyomkaribisha ni ya ukeateka wa jumba la kupangisha la bwanyenye mmoja eneo hilo.

Kwa kuwa ni kazi yenye muda mwingi wa ziada kupumzika hasa baada ya shughuli za usafi majira ya asubuhi, Mutunga anasema aliwaza na kuwazua jambo analoweza kufanya ili kupiga jeki mapato yake. Kulingana na simulizi yake, wazo lililomjia ni kununua punda na kijigari chake (mkokoteni), na punde si punde akaanza kubebea watu mizigo.

“Wateja wengi walikuwa wakulima na kina mama wa sokoni niliowasafirishia mazao kutoka shambani hadi sokoni,” adokeza kijana huyo. Uchukuzi kwa njia ya punda pia ulijumuisha wenye maduka na mikahawa, kubebewa bidhaa.

Hata hivyo, mwaka uliopita, jitihada zake nusra zizimwe alipohusika katika ajali mbaya na punda wake. “Nilivunjika mguu baada ya kuangushwa na punda nikiwa kwenye mkokoteni,” anasimulia.

Maisha lazima yangesonga mbele, familia yake; mkewe na mtoto mmoja wapate riziki, na kwa kuwa alikuwa ametangamana na wakulima wengi alishawishika kuingilia kilimo, alipopata nafuu.

Miaka miwili baadaye, Mutunga hajutii kamwe, badala yake ana kila sababu ya kutabasamu. Mtaji wa takriban Sh20, 000 aliowekeza katika ukuzaji wa mimea mseto, sasa unamuingizia mapato yasiyopungua Sh1, 500 kila siku, akiondoa gharama ya matumizi.

Aidha, gharama ni ununuzi wa pembejeo kama vile mbegu, mbolea na fatalaiza ya kuimarisha mazao, na dawa dhidi ya wadudu na magonjwa. Shughuli za kulima, upanzi, palizi na kupulizia dawa yeye ndiye hujifanyia. “Kwa siku nikijilipa leba Sh500 ninasalia na faida ya Sh1, 000. Nimeratibu shamba langu kiasi kwamba halikosi mazao,” anaiambia Akilimali.

Wakati wa mahojiano tulipata amepamba shamba lake kwa spinachi, sukuma wiki, broccoli, mboga za kienyeji – sucha na mchicha. Pia ameanzisha ukuzaji wa mbilingani maarufu kama eggplant, kiungo cha mapishi kinachowiana na matango

“Mvua kubwa inayoendelea kushuhudiwa imesababisha nyanya na pilipili mboga kulemewa na magonjwa yanayojiri kupitia maji mengi,” akasema. Mvua inapokunya kupindukia nyanya na mimea inayoorodheshwa katika familia moja (na ya nyanya) huhangaishwa na maji, yanayosababisha minyanya na mazao kuoza.

Powdery mildew na downy mildew ni magonjwa sugu yanayoathiri minyanya na matunda yake, na yanajiri kupitia baridi na ukungu. “Ili kukabiliana na changamoto za aina hiyo, tunahimiza wakulima kukumbatia mbegu zinazoweza kustahimili magonjwa ya baridi na ukungu,” ashauri Emmah Wanjiru, mtaalamu wa masuala ya kilimo.

Hata ingawa mbegu za aina hiyo ni ghali kwa ajili ya hulka na ustahimilivu wake, mdau huyo anatahadharisha kuwepo kwa mbegu bandia na za hadhi ya chini sokoni. “Wawe makini kuepuka matapeli, kwa kuwa soko limesheheni zile ghushi. Wanunue mbegu za kampuni zilizopigwa msasa na kuidhinishwa na asasi husika,” asisitiza Bi Wanjiru.

Wateja wa Eric Mutunga ni wa kijumla, hususan kina mama wa soko kutoka Ngoigwa na mazingira yake, ikiwamo masoko ya Thika. Ni kupitia kilimo, kijana huyo ameweza kununua pikipiki.

“Mchana huwa shambani na jioni ninafanya kazi ya uanabodaboda,” aeleza. Anaongeza kusema kuwa wateja wake shambani pamoja na wakulima wenza humpa kazi ya kuwabebea mazao, hatua anayosema humuingizia mapato mazuri.

Baba Yao atumia Sh6m kuwatibu wanabodaboda waliopata ajali

Na LAWRENCE ONGARO

WAHUDUMU wa bodaboda wapatao 55 waliopata ajali watanufaika na ufadhili wa matibabu kutoka kwa Serikali ya Kaunti ya Kiambu.

Gavana wa Kiambu, Bw Ferdinand Waititu, alisema tayari serikali yake imetoa Sh6 milioni zitakazogharimia matibabu na vifaa vyote vinavyohitajika katika matibabu ya wanabodaboda hao.

“Baadhi ya wale walioletwa katika hospitali ya Thika Level 5 na ile ya Kiambu Level 5 wamekamilisha zaidi ya miezi miwili na hawana jinsi ya kupata matibabu kwa ukosefu wa fedha,” alisema Bw Waititu.

Aliyasema hayo jana, alipozuru hospitali ya Thika Level 5, alipotoa amri wahudumu hao watibiwe halafu serikali ya Kiambu ilipie gharama hiyo yote.

Dkt David Ndegwa anayewatibu wagonjwa wa mifupa hospitali ya Thika Level 5 alisema hatua hiyo ya kaunti ni ya kusifiwa kwa sababu walioathirika watapokea matibabu ya haraka na chini ya siku nne hivi wataweza kujitembeza wakitumia mikongojo.

“Hospitali imelazimika kununua vifaa muhimu vinavyohitajika ili kufanikisha mpango huo. Sasa tutafanya upasuaji wa dharura na kuona ya kwamba mhusika anapata nafuu haraka iwezekanavyo,” alisema Dkt Ndegwa.

Baadhi ya wahudumu waliopata majeraha mabaya walishukuru hatua ya Bw Waititu, wakisema wanatumaini kurejea makwao hivi karibuni.

AJALI KIKOPEY: Wanabobaboda waitaka serikali ikarabati barabara

NA RICHARD MAOSI

Waendeshaji bodaboda kutoka eneo la Kikopey Kaunti ya Nakuru wanaomba serikali kuu iwasaidie kuongeza matuta barabarani,ili kupunguza visa vya ajali za kila mara.

Msimamizi wao Benjamin Waweru aliambia Taifa Leo Dijitali kuwa,wamesahaulika licha ya viongozi kutoa ahadi wakati wa kampeni za 2013 kuwa usalama barabarani ungekuwa kipaumbele..

Alieleza kuwa wanafunzi na wapita njia.wamekuwa wakihangaika kwa sababu barabara ya Kikopey kutoka Gilgil ni mteremko na malori kutoka Nairobi kuelekea Nakuru yamekuwa yakipoteza mwelekeo yanapokata breki.

Wanaovuka njia wamekuwa wakigongwa na wakati mwingine malori kuingia ndani ya vibanda au nyumba za watu zilizo karibu na njia,na huenda hali ikazidi kuwa mbaya hasa wakati huu wa mvua nyingi,ambapo barabara ni telezi.

Benjamin anasema barabara ya Kikopey ni nyembamba na magari yanayoenda masafa marefu hupakia kando ya njia wakati wa usiku kwa sababu hakuna eneo maalum la kuegesha magari.

Wanabodaboda katika eneo la Kikopey wakisubiri wateja. Picha/ Richard Maosi

“Mfumo wa usalama barabarani utaokoa maisha ya watu wengi kwanza endapo washikdau wataweka sheria kali za kukabiliana na wachuuzi wanaong’oa na kuuza vyuma vya kudhibiti magari yasiondoke njiani,” äkasema Benjamin.

Biashara ya kuuza vyuma kuukuu katika barabara ya Nakuru-Nairobi imeshamiri.

Upuuzaji wa alama za barabarani na ukosefu wa vidhibiti mwendo katika baadhi ya magari,akiamini ndio tatizo linlowaponza wakazi.

Benjamin anaona kuwa ajali nyingi za Kikopey zimeleta umaskini mwingi kwa sababu watoto wengi wamekuwa wakiwapoteza wazazi na kubakia mayatima..

Miezi miwili iliyopita msanii maarufu wa nyimbo za injili kutoka Nakuru Christomph Wanjiru alikuwa ni miongoni mwa abiria 14 waliopoteza maisha Kikopey.

Mteremko katika eneo la Kikopey barabara ya Nakuru-Nakuru, magari mengi yamekuwa yakikata breki yanapoteremka. Picha/ Richard Maosi

Ingawa baadhi ya waendeshaji pikipiki wanapendekeza kuwa vyumba vinavyopatikana karibu na njia kubomolewa ili kutoa nafasi ya kupanua barabara.

“Ninaunga swala la kuvunja baadhi ya nyumba kando ya njia ili kutenganisha maeneo ya wapita njia na sehemu za kufanyia biashara,” Alfred Keter aliongezea.

Wiki tatu zilizopita Alfred alinusurika kifo,lori la kubeba miti lilipomkosa kiduchu akielekea Gilgil kuchukua mteja.

Anasema katika kipindi cha miezi sita iliyopita amekuwa akishuhudia ajali kila siku ya punde zaidi ikiwa Machi 22 ambapo jumla ya watu 14 walipoteza maisha yao.

“Ni vyema raia kuziheshimu alama za barabarani,ingawa hazipo na zile zinazopatikana hazieleweki, madereva pia wanastahili kuwa makini kila wanaposhika usukani,” aliongezea.

Vyuma vya usalama katika barabara ya Kikopey vimengólewa na wachuuzi wanaoendesha biashara ya kuuza vyuma kuukuu. Picha/ Richard Maosi

Mhandisi John Otiato mkurugenzi anayesimamia barabara katika Bonde la Ufa,kuanzia Kabarak,Marigat,Nyahururu,Eldama Ravine na sehemu nzima ya Kaskazini kusini(South Rift) anasema njia nyingi zipo katika hali nzuri.

“Shughuli nyingi zinaendelea ili kuhakikisha barabara ni salama kwa wapita njia na magari kwa mfano kazi inaendelea katika barabara ya Lanet – Dundori,” akasema.

Otiato anasema tatizo kubwa ni pale madereva wanapoendesha magari kwa kasi kupita kiasi na wakati mwingine kubeba mizigo mizito zaidi ya kiwango kinachohitajika kwa mujibu wa sheria.

Pia anawalaumu baadhi ya wakulima ambao wamekuwa wakihatarisha maisha yao kwa kufanya shughuli za kilimo kando ya njia.

Hata hivyo serikali imejaribu kulainisha mambo lakini imekuwa ikipata upinzani kutoka kwa umma,inayolindwa na wanasiasa wanaoendeleza ajenda zao kisiasa.

Madereva wasiozingatia sheria za barabarani wamekuwa wakitozwa faini ya 240,000 katika kila tani ya ziada, anasema hali hii ni kwa uzuri wa umma ili kuhakikisha barabara zinabakia kuwa katika hali nzuri.

Eneo la Kikopey ambalo halina sehemu maalum ya kuegesha magari. Wakazi wanapendekeza baadhi ya mijengo kubomolewa ili barabara iweze kupanuliwa. Picha/ Richard Maosi

Tarehe 20 Februari 2018 watu 5 walipoteza maisha yao katika ajali mbaya ya barabara, iliyohusisha lori la uchukuzi na matatu ya usafiri wa umma.

Taifa Leo Dijitali ilitembelea eneo la hospitali ndogo ya Kikopey ambapo muuguzi Tabitha Wangare alitubainishia kuwa wamekuwa wakishughulikia ajali za majeraha madogo madogo.

Muuguzi Tabitha alisema wanaopata majeraha mabaya huelekezzwa kwenye hospitali ya St Marys au ile ya Rufaa ya Gilgil.

Wengi wao wakiwa ni waendeshaji boda wanaoendesha pikipiki wakiwa walevi au kwa kasi kupita kiasi.

Baadhi yao hawajajatilia maanani kuvalia vifaa vya usalama kama vile kofia na glavu, na jezi za reflectors.

Hata hivyo anawshauri waendeshaji boda kuwa makini kila mara wanapotumia barabara kuu.Anawahimiza kupata ujuzi wa kutosha kwanza kabla ya kuchukua pikipiki.

Hili linajiri miezi michache baada ya waziri Matiang’i kupendekeza kuanzishwa mfumo wa faini za papo kwa hapokwa mtu yeyote anayevunja sheria.