Kaunti za Nairobi, Kajiado, Kiambu, Nakuru na Machakos zafungwa kuzuia corona

Na CHARLES WASONGA

RAIS Uhuru Kenyatta ameamuru kusitishwa kwa safari za kuingia na kuondoka katika kaunti za Nairobi, Kiambu, Machakos, Kajiado na Nakuru kama njia ya kuzuia kuenea kwa Covid-19 kipindi hiki cha mkumbo wake wa tatu.

Kaunti hizo zimefungwa kwa muda wa siku 30 zijazo kufuatia ushahidi ambao unaonyesha kuwa idadi ya maambukizi imepanda kwa kiwango kikubwa mno.

“Kaunti hizo zimetambuliwa kwa pamoja kama kitovu cha maambukizi ya ugonjwa. Kwa hivyo, serikali imechukua hatua hii ili kulinda maisha ya wananchi kufuatia ongezeko la idadi ya wanaombukizwa wakati huu ambapo Kenya inashuhudia wimbi la tatu la maambukizi,” akasema Rais Kenyatta kwenye hotuba kwa taifa kutoka Ikulu ya Nairobi, Ijumaa.

Kiongozi wa taifa pia ameongeza muda wa kafyu katika kaunti hizo tano ambapo utakuwa ukianza saa mbili za usiku hadi saa kumi za alfajiri. Kafyu imekuwa ikitekelezwa kuanzia saa nne za usiku hadi saa kumi alfajiri.

Rais Kenyatta pia amepiga marufuku biashara za baa na uuzaji wa pombe katika mikahawa sawa na vikao vya ana kwa ana katika bunge la kitaifa, seneti na mabunge yote 47 ya kaunti.

“Tumelazimika kuchukua hatua hii kufuatia ongezeko la viwango vya maambukizi ya corona kutoa asilimia 2.6 mnamo Januari hadi asilimia 22 mwezi huu wa Machi. Hii ina maana kuwa kwa kila watu 100 wanaopimwa corona, watu 20 wanapatikana na virusi vya corona,” akasema Rais.

“Hali ni mbaya zaidi katika kaunti ya Nairobi ambapo inachangia asilimia 60 ya idadi jumla ya maambukizi ya corona nchini kufikia sasa. Hii ina maana kuwa kati ya watu 10 wanaopatikana na Covid-19 nchini, sita wanatoka Nairobi,” akaongeza Rais Kenyatta.

Kiongozi wa taifa pia amepiga marufuku mikutano yoyote ya kisiasa katika kaunti za Nairobi, Kiambu, Kajiado, Nakuru na Machakos hadi wakati usiojulikana.

Rais Kenyatta pia amepiga marufuku ibada za ana kwa ana ndani ya kaunti hizo tano ambazo zimefungwa.

Katika kaunti 42 kafyu itaendelea kutekelezwa kwa muda wa kawaida wa kuanzia saa nne za usiku hadi saa kumi za alfajiri huku wakazi wa kaunti hizo wakitakiwa kuendelea kuzingatia masharti ya kawaida ya kuzuia kuenea kwa virusi vya corona.

Kuhusu hafla za mazishi na harusi, Rais Kenyatta ameamuru kuwa yahudhuriwe na watu wasiozidi 100 lakini ambao watazingatia masharti dhidi ya corona. Mikutano ya kijamii nayo imewekwa kuhudhuriwa na watu 15 pekee.

Rais Kenyatta pia amepiga marufuku shughuli zote za michezo na masomo ya ana kwa ana isipokuwa wanafunzi wanaofanya mitihani ya kitaifa.

‘Hakuna zuio la watu kutoruhusiwa ama kuingia au kuondoka katika baadhi ya kaunti’

Na CHARLES WASONGA

RAIS Uhuru Kenyatta amepuuzilia mbali uvumi kwamba anapanga ‘kufunga nchi’ kufuatia ongezeko la visa vya maambukizi ya virusi vya corona, akisema hana mipango kama hiyo.

Akituhubutia taifa Jumatatu, Julai 27, 2020, baada ya kufanya mkutano na magavana, kiongozi wa taifa alifafanua kwamba kufunga nchi hakutakuwa na faida yoyote, lakini ni wajibu wa kila mwananchi kujilinda mwenyewe.

“Serikali haiwezi kumpa kila raia daktari; serikali haiwezi kuweka polisi wa kuchunga kila Mkenya. Nilivyosema siku 21 zilizopita, wajibu wa kupambana na ugonjwa huu ni wa kila mwananchi kama mtu binafsi. Jilinde na ulinde mama yako, baba yako, dada yako na mtoto wako,” akaeleza Rais Kenyatta akiwa katika Ikulu ya Nairobi.

Alisema kufungwa kwa nchi au kaunti kadhaa wakati huu hakutasaidia kupunguza kusambaa kwa virusi vya corona.

“Kufunga nchi hakutasaidia,” Rais Kenyatta akasema.

Tangu wiki jana kumekuwa na uvumi kwamba magavana nchini, wakiongozwa na mwenyekiti wao Wycliffe Oparanya, walitaka kwamba Rais afunge Kaunti ya Nairobi na zingine ambazo zimeandikisha ongezeko kubwa la idadi ya maambukizi.

Ilidaiwa kuwa watu kutoka katika kaunti hizi ndio wamekuwa wakisambaza virusi vya corona hadi kaunti zingine kwa kufanya safari za kila mara.

Zuio la usafiri kuingia au kuondoka kwa baadhi ya kaunti kuondolewa?

Na CHARLES WASONGA

HUENDA vikwazo wa usafiri vikaondolewa hivi karibuni licha ya ongezeko kubwa la idadi ya visa vya Covid-19 nchini katika kipindi cha mwezi mmoja sasa.

Waziri wa Usalama Fred Matiang’i alisema Jumatano kwamba Wakenya wanafaa kuzoea kuendelea na maisha yao ya kawaida kwani imebainika kuwa virusi vya corona havitatokomezwa hivi karibuni.

“Sasa ni wazi kuwa virusi vya corona vitasalia nasi kwa muda mrefu na sharti tujiandae kuishi navyo na tuendelee na maisha yetu ya kawaida japo kwa tahadhari huku juhudi za kufatuta chanjo zikiendelea,” Dkt Matiang’i akasema katika jumba la KICC.

Alisema hayo alipowahutubia wadau katika sekta ya utalii wakati wa kuzinduliwa kwa mwongozo wa kuzuia maambukizi ya Covid-19 katika sekta ya utalii.

Dkt Matiang’i aliandamana na Waziri wa Utalii Najib Balala pamoja na Waziri wa Afya Mutahi Kagwe.

“Hatuwezi kunyamaza na kusubiri miujiza fulani itendeke kabla ya kurejelea maisha ya kawaida. Sharti tuanze kujifunze namna na kuanza kusafiri huku tukizingatia kanuni za afya zilizowekwa kwa ajili ya kuzuia maambukizi ya ugonjwa huu,” akasema.

Kauli yake iliungwa mkono na Bw Mutahi ambaye alisema Wakenya wanapaswa kujizoesha na virusi vya corona “kwa sababu dalili zinaonyesha kuwa janga hili litaisha nasi kwa kipindi kirefu.”

Bw Balala alisema mwongozo huo ndio utatumika wakati wa kufufuliwa kwa utalii wa humu nchini serikali itakapoondoa marufuku dhidi ya safari za ndege.

“Sekta ya utalii iliathirika pakubwa baada ya serikali kuzima safari za ndege za kuingia na kutoka nchini kuanzia mwezi Aprili. Kwa hivyo, mwongozo huu utasaidia kufufua sekta hiyo kwa kuruhusu usafiri wa ndege humu nchini,” akaeleza.

Watu 64 wakiwa kwa magari ya wamiliki binafsi wanaswa wakijaribu kukiuka zuio

Na LAWRENCE ONGARO

ABIRIA wapatao 64 walinaswa katika kizuizi cha Chania katika mpaka baina ya mji wa Thika na Kaunti ya Murang’a wakitoka jijini Nairobi.

Wakati huo pia magari madogo 10 ya wamiliki binafsi yalizuiliwa kwa sababu yalikuwa yamebeba abiria.

Kamanda mkuu wa polisi katika Kaunti ya Murang’a, Bw Josephat Kinywa, alisema maafisa wa polisi wataendelea kuweka doria ili kuwazuia wasafiri kuvuka kizuizi hicho kwa lengo la kupita.

Bw Kinywa alisema wasafiri hao walikosa stakabadhi maalum za kuwaruhusu kupitia katika kizuizi hicho.

“Baada ya kuhojiwa ilibainika ya kwamba wasafiri hao walitoka Nairobi kuelekea Nyeri, Meru, Isiolo, na maeneo mengine tofauti,” alisema afisa huyo.

Alisema hata kuna wasafiri wengine ambao walijaribu kupenya kizuizi hicho kwa kutumia bodaboda.

Alisema hata wengine walinaswa wakijaribu kuhonga maafisa wa polisi ili wapite kizuizi hicho cha Chania, kilichoko mpakani mwa Thika na Kaunti ya Murang’a.

Alisema wasafiri hao walionaswa watafikishwa mahakamani mara moja ili kujibu mashtaka ya kukiuka sheria za zuio la kusafiri baina ya baadhi ya maeneo wakati huu wa janga la Covid-19.

Afisa huyo alisema maafisa wa usalama hawatawaruhusu wasafiri kupitia vizuizi vinavyowekwa katika sehemu tofauti.

 

Baadhi ya wasafiri walionaswa kutoka kwa magari yao binafsi katika kizuizi cha Chania, eneo la Bluepost, Thika. Picha/ Lawrence Ongaro

“Tumegundua ya kwamba wahudumu wa bodaboda wanaendesha biashara ya kuwavukisha wasafiri katika barabara za vichochoroni. Yeyote atakayenaswa atajilaumu mwenyewe, kwani hatutawaruhusu kupita,” alisema afisa huyo.

Katika Kaunti ya Kiambu kuna vizuizi vitatu muhimu ambavyo vinalindwa kwa muda wa saa 24 na maafisa.

Vizuizi hivyo ni kile cha Maryhill hadi Gatundu, kingine ni cha Kilimambogo kuelekea Kaunti ya Machakos na Murang’a halafu hicho cha Chania eneo la Bluepost, mjini Thika, kuelekea Nyeri, Meru, Isiolo na kwingineko.

Serikali pia imechukua jukumu la kutumia mitambo ya droni ili kuwasaka watu wanaopitia njia za mkato ili kuhepa walinda usalama.

Marufuku ya kutoingia na kutoka jijini Nairobi, na Mombasa iliwekwa na serikali karibu miezi miwili sasa huku Wakenya wengi wakitarajia mambo kubadilika mwezi ujao wa Julai, 2020.

Huenda shughuli za kiuchumi zikafunguliwa kote nchini bila zuio na kafyu

Na MARY WANGARI

WAKENYA huenda wakarejelea maisha yao ya kawaida kipindi cha majuma machache yajayo pasipo kafyu na zuio la kuingia au kutoka katika baadhi ya kaunti, endapo kauli ya Rais Uhuru Kenyatta ni ya kuzingatiwa.

Akihutubia taifa kupitia taarifa iliyopeperushwa moja kwa moja kutoka Ikulu ya Nairobi mnamo Jumamosi, Mei 23, 2020, kiongozi wa taifa amesema wakati umewadia kwa taifa kurejelea maisha ya kawaida sawa na baadhi ya mataifa mengine duniani.

Rais ameeleza kwamba itakuwa muhimu Kenya kufungua tena shughuli zake za kiuchumi akifafanua kwamba taifa haliwezi kusalia katika hali ya kufungwa.

“Sisi kama serikali, kama serikali zingine za mataifa yote dunia nzima zimeanza kuona haja na hatuwezi kuendelea kusema Wakenya tukae nyumbani wala kuendelea kusema tu Wakenya msiende kufanya biashara, msiende kazini, namna hiyo,” amesema Rais Kenyatta.

Hata hivyo, ametahadharisha kwamba ili kufanikisha hatua hiyo, zitahitajika juhudi za kila Mkenya binafsi katika kuzingatia masharti yaliyotolewa na Wizara ya Afya.

Amewahimiza Wakenya kufuata masharti na kanuni za Wizara ya Afya ili kujikinga dhidi ya janga la virusi vya corona pamoja na kuwalinda Wakenya wenzao.

“Tukianza kupanua na kufungua uchumi wetu, wewe ujue ya kwamba, usipotii masharti yaliyopo sio wewe peke yako utaumia; unaumiza pia mwenzako kwa kazi ambayo unafanya. Ukienda nyumbani utaumiza mama na mtoto,” amesema.

Isitoshe, Rais amesema amejadiliana na maafisa wa afya na wadau wengine kwa lengo la kuhamasisha umma na kuandaa raia kurejelea maisha yao ya kawaida.

“Kwa hivyo, wakati umefika na nimeambia mawaziri na maafisa wetu wa afya waanze kuwaambia Wakenya kwamba hatuwezi kuendela na zuio – lockdown – na hatuezi kuendelea maisha na kafyu na tukifungua ni muhimu sote tuwe makini,” amesema.

COVID-19: Rais Kenyatta atarajiwa kutangaza hatima ya kafyu na zuio Jumamosi

CHARLES WASONGA na SAMMY WAWERU

RAIS Uhuru Kenyatta atawafahamisha Wakenya Jumamosi, Mei 16, 2020, ikiwa kafyu ya usiku kote nchini itaongezewa muda au la.

Vilevile, kiongozi wa taifa anatarajiwa kutangaza ikiwa amri ya kutotoka na kutoingia katika kaunti za Nairobi, Mombasa, Kilifi na Kwale itasitishwa au itadumishwa.

Hatua za mwanzo kiongozi wa nchi alizitangaza Machi 27, 2020, ambapo aliagiza zuio hilo la usafiri kwa siku 21 na mnamo Aprili 25, 2020, akatangaza kurefushwa kwa agizo hilo kwa siku 21 zaidi ili kuzuia kuenea kwa ugonjwa wa Covid-19 unaosababishwa na virusi vya corona.

“Jinsi mnavyofahamu, muda wa kutekelezwa wa baadhi ya masharti yaliyowekwa unaelekea kumalizika. Na suala hili sasa linazungumziwa. Kesho (Jumamosi) taarifa kamili kuhusu masharti hayo itatolewa,” Waziri Msaidizi wa Afya Rashid Aman amewaambia wanahabari Ijumaa katika makao makuu ya wizara hiyo, Nairobi.

“Taarifa hiyo itatolea na Mheshimiwa Rais katika Hotuba kwa Taifa kesho (Jumamosi),” ameeleza.

Serikali ilitangaza amri ya kutotoka nje na kuingia katika kaunti hizo nne baada ya kubaini kama ndivyo vitovu vya kusambaa kwa virusi vya corona.

Hata hivyo, kufikia sasa kaunti za Nairobi na Mombasa bado zinaendelea kuandikisha idadi kubwa ya maambukizi mapya.

Eastleigh na Mji wa Kale

Ni kutokana na hali hiyo ambapo maeneo ya Eastleigh (Nairobi) na Mji wa Kale – Old Town – (Mombasa) yalifungwa Jumatano wiki jana kwa lengo la kudhibiti kuenea kwa virusi hivyo.

Wizara imewapongeza wakazi wanaoishi mitaa ya Eastleigh na Mji wa Kale kwa kukubali kujitokeza kukaguliwa na kupimwa ugonjwa wa Covid-19.

Mnamo Mei 6, 2020, mitaa hiyo iliwekewa kafyu ya wiki mbili mfululizo kwa sababu ya idadi ya juu ya maambukizi ya virusi vya corona.

Shughuli za kuingia na kutoka humo zilisimamishwa.

Wizara imeeleza kuridhishwa kwake na ushirikiano wa wakazi wa mitaa hiyo kujitokeza kupimwa Covid-19.

“Wakazi wa Eastleigh jijini Nairobi na Mji wa Kale, Mombasa, ninawapongeza kwa ushirikiano mlioonyesha kujitokeza kupimwa,” amesema Dkt Aman.

Hali yaelekea kuwa nzuri katika kaunti za Kilifi na Kwale kwa sababu hazijagonga vichwa vya habari katika siku za hivi karibuni kuhusiana na kutokea kwa visa vipya vya maambukizi.

Mnamo Jumanne Gavana wa Kilifi Amason Kingi alisema kuwa watu wote sita kutokana kaunti hiyo ambao walikuw wakitibiwa wamepona na kuruhusiwa kwenda nyumba “na hatujashuhudiwa visa vingine.”

“Hata hivyo, bado tunawahimiwa raia kuendelea kutii masharti yaliwekwa na serikali ili tuweze kuzima kabisa janga hili,” akawaambia wanahabari.

Serikali imeweka zuio kwa manufaa yenu, Supkem yaambia wakazi Eastleigh na Mji wa Kale

Na CECIL ODONGO

BARAZA Kuu la Waislamu Nchini (Supkem) limeunga mkono hatua ya serikali kuweka kafyu ya kutotoka au kuingia katika mitaa ya Eastleigh na Mji wa Kwale kutokana na idadi kubwa ya maambukizi ya virusi vya corona katika maeneo hayo.

Mwenyekiti wa Supkem Hassan Ole Naado kupitia taarifa, amesema hatua hiyo ilichukuliwa ili kuzingatia maslahi ya kiafya ya wakazi wa mitaa hiyo.

Pia aliongeza kwamba hatua hiyo Itazima kuenea kwa virusi hivyo ambavyo vimesababisha vifo vya watu 29 nchini kwenye mitaa jirani.

Ikizingatiwa kwamba wengi wa wakazi wa maeneo hayo ni waumini wa dini ya Kiislamu, Bw Ole Naado amesema ni jukumu la Supkem kuhakikisha kwamba wanatii agizo la serikali bila purukushani zozote kushuhudiwa na pia wanaendelea na ibada zao nyumbani wakati huu wa mwezi mtukufu wa Ramadhan.

Waziri wa Afya Mutahi Kagwe mnamo Jumatano alitangaza kufungwa kwa mitaa hiyo miwili kwa muda wa siku 15 ijayo kutokana na maambukizi mengi ya virusi vya corona miongoni mwa wakazi.

“Tunawasikitikia na kuwaombea walioathirika na hali hii hasa wakati huu wa mfungo wa mwezi mtukufu wa Ramadhan. Hata hivyo, Supkem inaishukuru serikali kwa kutoa fursa kwa wanaotoa huduma spesheli kuendelea na kazi zao. Tunawatilia dua na kuwaombea utulivu kipindi hiki mitaa hii miwili umefungwa,” akasema Bw Ole Naado.

Ikizingatiwa mitaa hiyo miwili hukumbwa na uhabe wa maji, afisa huyo ameirai serikali iwape nafasi wafanyabiashara wanaochuuza bidhaa hiyo kwa kutumia mikokoteni ndipo maisha ya wakazi yasitatizike.

“Tumepokea ripoti kwamba familia kadhaa zinakosa maji baada ya wachuuzi wa bidhaa hiyo adimu kugomea kazi wakihofia kuadhibiwa na maafisa wa polisi. Huenda janga la kibinadamu likatokea kwenye mitaa hii iwapo maji yatakosekana,” akaongeza.

Ingawa hivyo, Bw Ole Naado ameiomba serikali ishirikiane na Supkem na viongozi wa Kiislamu kwenye mitaa hiyo iwapo patatokea suala lolote lisiloridhisha badala ya kuwakabili raia kupitia maafisa wa usalama wanaoshika doria katika mitaa hiyo.