RAIS mstaafu Uhuru Kenyatta amejiuzulu rasmi kama mwenyekiti wa Baraza la Muungano wa Azimio la Umoja, hatua inayofungua ukurasa mpya katika juhudi za kuunda upya muungano wa upinzani kuelekea uchaguzi wa 2027.

Uhuru alitangaza kujiuzulu kupitia barua ya Oktoba 5, 2026, huku muungano huo ukibadilisha jina na sasa kujulikana kama The Ukombozi Alliance (TUA).

Kiongozi wa Wiper Patriotic Front, Kalonzo Musyoka, anaendesha mchakato wa kuwarai viongozi wengine wa upinzani, akiwemo kiongozi wa DCP Rigathi Gachagua na Gavana wa Siaya James Orengo.

Majina ya Gachagua na Orengo yalijadiliwa katika mkutano wa muungano huo Jumatano ulioongozwa na Kalonzo.

“Mashauriano yanaendelea kuhusu nani atashikilia nafasi hiyo. Kwa kiasi kikubwa tumekubaliana iwe Gachagua au Gavana Orengo,” alisema afisa mmoja aliyehudhuria mkutano huo.

Orengo anadaiwa kukubali kuchukua nafasi hiyo, huku jina la Gachagua likiibuka kutokana na nafasi yake katika siasa za upinzani.

Juhudi za kumshawishi Gachagua zinafanyika wakati ambao DCP imekuwa ikionyesha nia ya kujenga ngome yake kisiasa kabla ya kufanya mazungumzo na vyama vingine vya upinzani.

Vilevile, kundi la Linda Mwananchi linaloongozwa na Seneta wa Nairobi Edwin Sifuna limewahi kukataa mwaliko wa kujiunga na muungano huo.

Mzozo mkubwa ni kipengele cha makubaliano ya muungano kinachotaja kiongozi wa chama kuwa mgombea wake wa urais moja kwa moja.

Kalonzo aliteuliwa na Uhuru kuwa kiongozi wa muungano huo Februari, akichukua nafasi ya marehemu Raila Odinga, aliyekuwa mgombea wa urais wa Azimio katika uchaguzi wa 2022.

Katika barua yake, Uhuru alisema kujiuzulu hakumaanishi ameondoka katika safari ya kisiasa ya upinzani.

“Nasalia, kama kawaida, mwanachama aliyejitolea wa familia ya Azimio, tayari kuunga mkono taasisi hiyo kutoka safu za chini na kutoa ushauri nitakapohitajika,” alisema.

Kalonzo alisema Uhuru amekuwa nguzo muhimu ya muungano huo na bado ni mwanachama wake.

Alisema jina The Ukombozi Alliance limehifadhiwa na Ofisi ya Msajili wa Vyama vya Kisiasa (ORPP), huku mchakato wa kutimiza masharti ya usajili ukiendelea.

Muungano huo unalenga kutumia mfumo unaofanana na ule wa NARC uliomsaidia Mwai Kibaki kushinda urais mwaka 2002.

Chini ya mfumo huo, vyama vitaendelea kuhifadhi majina yao lakini kuunga mkono mgombea mmoja wa urais na ajenda ya pamoja.

Mchambuzi wa siasa Prof David Monda alisema mafanikio ya mpango huo yatategemea iwapo viongozi wengine wa upinzani watakubali kujiunga na muungano huo na kumuunga mkono Kalonzo kama mgombea wa urais.

Alisema hatua ya kubadili jina inalenga kuupa muungano sura mpya na kujaribu kuwavutia vijana kuelekea uchaguzi wa 2027.