CHAMA cha Democracy for the Citizens Party (DCP) kinachoongozwa na aliyekuwa naibu rais Rigathi Gachagua kilivuna katika chaguzi ndogo za Alhamisi, kwa kujinyakulia viti vitatu vya uwakilishi wa wadi.

DCP ilishinda katika Wadi za Kariobangi North, Narok Town na Kisa East, mafanikio makubwa kwa chama kilichozinduliwa Mei 2025, miezi sita pekee kabla ya uchaguzi huo.

Katika Kariobangi North, mgombeaji wa DCP David Warui aliibuka mshindi kwa kura 2,282, akifuatiwa kwa karibu na mgombea huru John Katua aliyepata kura 1,956. Ouma Majua wa ODM alipata 1,351, huku Njoka Maina wa UDA akipata 955.

Katika Kisa East, Aduda Okwiri wa DCP alishinda kwa kura 1,952, akifuatiwa na Joel Ongoro wa chama cha MDG aliyepata kura 1,541.

Kiti hicho kilikuwa wazi baada ya aliyekuwa MCA, Peter Maloba, kushambuliwa na watu wasiojulikana mwaka 2024 na kufariki kutokana na majeraha.

Katika Narok Town, Douglas Masikonde wa DCP ndiye aliibuka mshindi kwa kura 6,007, akiwashinda Kanyike Ole Kudate wa UDA aliyepata kura 4,479.

Kanyike ni mwanawe marehemu Lucas Kudate, aliyekuwa MCA kabla ya kufariki Februari 2025 kutokana na ugonjwa.Kupitia ujumbe wake wa pongezi, Gachagua aliwasifu wapiga kura kwa “kusimama dhidi ya vitisho na kukataa hongo za kisiasa,” akisema DCP imeonyesha uwezo wake licha ya kuwa chama kipya.

“Chama chetu, kikiwa na umri wa miezi saba pekee, kimebwaga vyama vilivyodumu zaidi ya miongo miwili,” alisema Gachagua.

Wadi ya Narok Town ilikuwa moja ya maeneo yaliyoshuhudia ushindani mkubwa, ambapo Gachagua alifanya kampeni binafsi.

Katika siku ya mwisho ya kampeni, Novemba 24, Gachagua alirushiwa vitoa machozi na polisi, na kudai alishambuliwa na makundi ya vijana wenye silaha aliohusisha na serikali.

Alidai kupokea taarifa kuwa maisha yake yalikuwa hatarini, na hivyo akaonekana hadharani akiwa amevalia jaketi la kuzuia risasi na kofia ya kivita.

Baada ya Masikonde kutangazwa mshindi, Gachagua alidai kuwa serikali ilituma “wahuni na polisi” kuchoma masanduku ya kura.

Kabla ya chaguzi hizo, Gachagua alikuwa ametuma mfululizo wa barua akidai kuwa serikali ilipanga kuiba kura kwa kushirikisha polisi na baadhi ya maafisa wa IEBC.

“Ni juu ya tume yenu kujenga tena imani ya wananchi. Sifa zenu ziko mashakani kuelekea uchaguzi mkuu wa 2027,” aliandika kwa Mwenyekiti wa IEBC, Erastus Ethekon, mnamo Novemba 25.