KUWA na hedhi ni jambo la kawaida kutokea kila mwezi. Japo hedhi hutarajiwa hasa kwa wale wanaojua kuhesabu siku zao, kuna wakati ambapo kipindi hiki hutokea bila kutarajiwa.

Kuna mambo fulani yanayohusiana na uzazi ambayo yaweza kuchochea kuchelewa au kutokomea kwa hedhi.

Kwa mfano:

Matumizi ya dawa za kupanga uzazi

Kumeza tembe hizi siku chache kabla ya siku ya kawaida ya hedhi, kunaweza ahirisha kipindi hiki. Pia, tembe hizi zimeonekana kukomesha hedhi mara moja hasa iwapo umevuja damu nyingi kupita kiasi. Lakini haya lazima yafanywe baada ya kuzingatia ushauri kutoka kwa daktari.

Tembe za ‘progestogen’

Ingawa wanawake wengi hutumia tembe hizi kuzuia mimba, zaweza athiri siku zako za hedhi pakubwa. Zaweza kupunguza hedhi, kuongeza au hata kufanya zikatokomea kwa muda. Kutokana na madhara haya, tembe hizi sio muafaka kutumiwa kukomesha hedhi.

Tembe za ‘Nerothisterone’

Nerothisteone ni aina za homoni ambazo hutumiwa na wanawake wanaokumbwa na tatizo la kuvuja damu kwa wingi siku zao za hedhi zinapotimia.

Ikiwa kwa sasa hautumii tembe hizi, basi jipe ilani ya siku tatu au nne. Hii itakuwezesha kupunguza siku za hedhi kwa hata wiki mbili.

Lazima upate ushauri kutoka kwa daktari kabla ya kuafikia uamuzi wa kuzitumia.

Ujauzito na kunyonyesha

Kushika mimba bila shaka kunakupa hakikisho la kutokuwa na hedhi kwa miezi tisa. Ingawa ujauzito unakupa starehe za kutoshughulikia siku za hedhi kwa muda huu wote, kunakuacha na mzigo wa kuwa mzazi.