MAMA mmoja na wanawe watatu kutoka eneo la Bahati, kaunti ya Nakuru, wamekamatwa kwa kushukiwa kuhusika na mauaji ya kikatili ya mumewe.

Bw Peter Mwangi, 73, alipatikana akiwa ameshambuliwa ndani ya nyumba iliyofungwa kutoka nje mnamo Februari 16 mwaka huu.

Siku hiyo, mkaza mwana wake, Joyce Wanjiru alikuwa akiendelea na shughuli zake za kawaida za asubuhi nyumbani kwake, umbali wa mita chache kutoka kwa boma hilo, simu yake ilipopigwa ghafla.

Aliyepiga alikuwa mmoja wa mafundi wa ujenzi aliokuwa ameajiri kwa mradi wa kujenga ndani ya boma ya baba mkwe.

Fundi huyo alimweleza kuwa hawakuweza kupata vifaa vya ujenzi kwa sababu stoo iliyohifadhi saruji na vifaa vingine ilikuwa imefungwa.

Kwa Wanjiru, hali hiyo haikuwa ya kawaida. Baba mkwe wake alijulikana kwa kuamka mapema sana, hata kabla ya saa kumi na mbili alfajiri, na mara nyingi ndiye aliyekuwa wa kwanza kufungua milango na kuanza shughuli za shamba.

“Nilihisi kuna jambo halikuwa sawa kwa sababu baba huamka mapema kuliko sisi sote. Siku hiyo hakukuwa na dalili zozote za yeye kuamka. Nilikimbia hadi kwake kuangalia kama bado alikuwa amelala,” alisimulia Wanjiru.

Alipowasili, alikuta nyumba ikiwa imefungwa kwa nje. “Hilo lilinipa wasiwasi zaidi. Nilijaribu kufungua mlango na nikafaulu. Nilipoingia ndani, nilikumbana na tukio la kutisha. Baba mkwe alikuwa amelala sakafuni kwenye dimbwi la damu, akiwa hajitambui na mwili wake ukiwa na majeraha makubwa,” alisema kwa sauti ya huzuni.

Alieleza kuwa kulikuwa na dalili za wazi za mapambano. Viti vilikuwa vimetupwa ovyo, vyombo vikiwa sakafuni, na damu ikiwa imetiririka kutoka chumbani hadi kitandani.

“Nilimwita ‘Baba, Baba,’ lakini hakuitika. Nilitetemeka na kupigwa na butwaa. Nilijua mara moja alikuwa ameshambuliwa vibaya,” aliongeza.

Kwa haraka, aliomba msaada kutoka kwa majirani na jamaa waliokuwa karibu. Baadhi yao walijaribu kumpa huduma ya kwanza huku wengine wakitafuta usafiri wa kumpeleka hospitalini.

Mwangi alikimbizwa katika Hospitali ya Rufaa na Mafunzo ya Nakuru, ambako madaktari walipambana kuokoa maisha yake.

Hata hivyo, juhudi hizo hazikufaulu. Madaktari walithibitisha kuwa alifariki dunia kutokana na majeraha makubwa ya kichwa yaliyosababishwa na kifaa butu.

Kifo hicho kilibadilisha tukio la shambulio kuwa kesi ya mauaji.

Kesi hiyo iliripotiwa katika Kituo cha Polisi cha Keronga kabla ya maafisa wa Idara ya Upelelezi wa Jinai (DCI) kuchukua jukumu la uchunguzi.

Afisa mmoja wa DCI alisema walipofika eneo la tukio, walikuta ushahidi unaoashiria shambulio lililopangwa kwa makusudi.

“Kulikuwa na damu sakafuni na kitandani, hali inayoonyesha shambulio la karibu. Pia tulipata vipande viwili vya mbao vilivyokuwa na damu, vilivyotupwa kwenye choo cha shimo karibu na nyumba hiyo,” alisema.

Maafisa walichukua sampuli za damu na kuzipeleka kwa Mkemia wa Serikali kwa uchunguzi zaidi.

Ndani ya saa chache, watu wanne walikamatwa: mke wa marehemu Tabitha Mwangi, binti yake Rahab Muthoni, mwanawe Samwel Mwangi na Joseph Michiri.

Kamanda wa Polisi Nakuru Kaskazini Lilies Wachira, alisema washukiwa walifikishwa katika mahakama ya Nakuru ambapo wapelelezi walipewa ruhusa ya kuwazuilia kwa siku 21 kukamilisha uchunguzi.

Polisi wanachunguza iwapo kulikuwa na mzozo wa kifamilia au wa ardhi ulioweza kusababisha tukio hilo.

Pia wanachunguza uwezekano kuwa huenda mtu wa nje alihusishwa kutekeleza shambulio hilo kwa niaba ya mtu mwingine.

Majirani walimtaja Mwangi kama mzee mtulivu lakini mwenye msimamo, aliyekuwa akiheshimiwa katika jamii.

“Hakuwa mtu wa fujo. Ni vigumu kuelewa kilichotokea hadi kufikia hatua hii,” alisema jirani mmoja.

Kifo chake kimeacha familia na jamii kwa mshangao na majonzi makubwa.

Maswali mengi bado hayajajibiwa: Je, lilikuwa tukio la ghafla lililotokana na mzozo wa ndani, au mpango wa makusudi?

Wapelelezi wanaendelea kuchambua ushahidi ili kubaini ukweli na kuhakikisha haki inatendeka kwa marehemu.