DEREVA wa matatu na kondakta wake wamefungwa kifungo cha miaka 10 gerezani baada ya kuwapata na hatia ya kumuua mwanafunzi wa chuo aliyekuwa na umri wa miaka 21 ambaye alianguka kutoka kwa gari lao lililokuwa likiendeshwa kwa kasi katika Barabara ya Thika takriban miaka minane iliyopita.

Mahakama iliwahukumu Amos Muigai Mwangi na Alex Musembi Musyoka, ikisema kuwa vitendo vyao vya Juni 13, 2018, vilionyesha uzembe mkubwa na kutothamini maisha ya binadamu, hali iliyochangia moja kwa moja kifo cha Doreen Kinya.

Kesi hiyo ilitokana na tukio lililohusisha matatu ya kampuni ya Zamzam 45 Limited iliyokuwa ikihudumu katika eneo la Githurai.

Kulingana na rekodi za mahakama, Doreen alikuwa akisafiri ndani ya matatu hiyo ilipofika eneo la Kanisa la Queen of Apostles katika Barabara ya Thika.

Alianguka kutoka kwa gari hilo lililokuwa likiendeshwa kwa kasi na kupata majeraha mabaya yaliyosababisha kifo chake.

Katika uamuzi wake, mahakama ilisema kuwa wahudumu hao wawili walihusika moja kwa moja na kifo hicho kwa kuendesha gari kwa kasi huku mlango wa gari ukiwa wazi.

Jaji alisema dereva na kondakta walijua, au walipaswa kujua, kwamba abiria anayeshuka kutoka kwa gari linaloendeshwa alikuwa katika hatari kubwa ya kufariki au kupata majeraha mabaya.

“Kwa kuendelea kuendesha gari kwa kasi huku mlango wa abiria ukiwa wazi, walijua au walipaswa kujua kuwa abiria yeyote angejaribu kushuka angeweza kupata majeraha makubwa au hata kufa. Huo ulikuwa uzembe mkubwa na kutojali kabisa usalama na maisha ya marehemu,” mahakama ilisema.

Jaji alisema mwenendo wa wanaume hao wawili ulizidi kiwango cha uzembe wa kawaida.

Upande wa mashtaka uliomba mahakama itoe kifungo kitakachotoa funzo kwa wengine, ukieleza mwenendo wa washtakiwa hao kuwa wa “ukatili na kutojali” na kwamba mazingira ya kesi hiyo yalihalalisha kifungo kikubwa.

Hata hivyo, upande wa utetezi uliomba mahakama ipunguze adhabu.

Wakili wao aliambia mahakama kuwa wanaume hao wawili walikuwa wakitegemewa na familia zao.

Wakili huyo alisema mshtakiwa wa pili, ambaye ni kondakta mwenye umri wa miaka 34, alikuwa akimtunza mama yake mgonjwa na hivyo alistahili “nafasi ya pili maishani”.

Kuhusu dereva, wakili alisema alikuwa akisumbuliwa na tatizo la kusikia ambalo linazidi kuwa mbaya.

Utetezi pia uliomba mahakama izingatie muda ambao wawili hao walikuwa tayari wamekaa rumande.

Mahakama ilielezwa kuwa walizuiliwa rumande tangu walipokamatwa Juni 2018 hadi Desemba 2019 walipoachiliwa kwa dhamana.

Mahakama pia ilizingatia ripoti za maafisa wa uangalizi wa jamii zilizoandaliwa na Afisa Mkuu wa Uangalizi wa Jamii Mercy Kanyangi.

Ripoti hizo zilitoa taswira isiyowapendelea washtakiwa hao wakati wa adhabu.

Ingawa mahakama ilikubali kuwa wawili hao walikuwa wakosaji wa mara ya kwanza, iliamua kuwa adhabu isiyohusisha kifungo gerezani isingetimiza matakwa ya haki.

“Mauaji ni kosa kubwa la jinai,” jaji alisema, akibainisha kuwa mahakama zina mamlaka ya kutoa adhabu inayofaa kufuatia mabadiliko ya kisheria yaliyokomesha hukumu ya lazima ya kifo kwa makosa ya mauaji.