HOFU na simanzi zimetanda katika kijiji cha Mumbu, eneo bunge la Kigumo, Kaunti ya Murang’a, baada ya mwanamume mwenye umri wa miaka 54 kudaiwa kumkata kichwa mvulana wa miaka mitatu kabla ya kushambuliwa na kuuawa na wananchi wenye hasira.

Kisa hicho cha kutisha kilitokea Jumatatu na kimezua hofu kuwa huenda mtoto huyo aliuawa kwa sababu za ushirikina.

Mshukiwa, Joseph Kimani, anadaiwa kumshawishi mtoto Ian Ndung’u kuingia nyumbani kwake baada ya mtoto huyo kutoka kucheza na watoto wengine jirani.

Muda mfupi baadaye, jamaa wa mtoto walisikia mayowe yakitoka ndani ya nyumba hiyo na walipofika walikuta damu ikitiririka.

Kamanda wa Polisi wa Kigumo, Hassan Bashir, alisema familia ilivunja mlango baada ya mshukiwa kutoroka.

“Walipoingia ndani walimkuta mtoto akiwa amekatwa kichwa kabisa na kifua chake kikiwa kimepasuliwa,” alisema Bw Bashir.

Habari ziliposambaa, wakazi wenye hasira walianza kumfukuza Kimani ambaye alikimbilia kijiji jirani cha Kandani. Hata hivyo, alinaswa na kupigwa hadi kufa.

Polisi walilaani mauaji hayo ya umma wakisema hakuna mtu anayepaswa kujichukulia sheria mkononi.

“Hatutaki washukiwa wauawe. Wanapaswa kukamatwa na kukabidhiwa polisi. Tukiwatambua waliohusika na mauaji hayo watafikishwa mahakamani,” alisema Bw Bashir.

Mjomba wa marehemu, Peter Kibandi, alisema walishtuka walipoona hali ya mwili wa mtoto ndani ya nyumba hiyo.

Kupatikana kwa sufuria yenye maji yaliyokuwa yakichemka ndani ya nyumba ya mshukiwa kumeongeza hofu kuwa mauaji hayo huenda yalihusishwa na imani za kishirikina.

Wakazi walieleza Kimani kama mtu aliyekuwa na historia ya ukatili na matatizo ya tabia.

Mzee wa kijiji Stephen Waweru alisema mshukiwa aliwahi kufungwa mara kadhaa kwa madai ya ubakaji na mashambulizi.