NAIBU wa Rais Prof Kithure Kindiki anatumia baraka za wazee waliomteua kuwa msemaji wa eneo la Mlima Kenya kupanua ushawishi wake katika Mlima Kenya Magharibi, ambako utawala wa Rais William Ruto unakabiliwa na upinzani mkali wa kisiasa.

Prof Kindiki aliidhinishwa na wazee katika uwanja wa Kirigiti, Kaunti ya Kiambu, Septemba 19, 2026, na mara moja akaanza kampeni ya kujijenga kisiasa katika eneo la Mlima Kenya Magharibi, akilenga kulinyakua kutoka kwa aliyekuwa Naibu wa Rais Rigathi Gachagua.

Baada ya kung’atuliwa mamlakani mnamo Oktoba 2024, Bw Gachagua alianzisha kampeni kali dhidi ya Dkt Ruto, akidai kuwa Rais alikuwa amewasaliti wakazi wa eneo hilo.

Chama cha Bw Gachagua cha Democracy for the Citizens Party (DCP) sasa kina ushawishi mkubwa katika kaunti za Nyeri, Kirinyaga, Murang’a na Nyandarua, ambako chama cha UDA kimepoteza uungwaji mkono mkubwa.

Kwa miezi mitatu iliyopita, Prof Kindiki amekuwa akijikita katika kuimarisha ushawishi wake katika Mlima Kenya Mashariki, unaojumuisha Embu, Tharaka Nithi na Meru, lakini sasa ameelekeza nguvu zake magharibi.
Mwezi uliopita, alitembelea Murang’a, Nyeri, Kirinyaga na Kiambu, akisisitiza kuwa jukumu lake kama msemaji wa Mlima Kenya ni kuunganisha eneo hilo.

Pia ameanzisha ajenda ya maendeleo na kampeni ya umoja, huku akiongoza juhudi mpya za kukabiliana na pombe haramu.

Jana alitembelea eneobunge la Othaya, ikiwa ni ziara yake ya tano katika Kaunti ya Nyeri ndani ya mwezi mmoja.
Alisema serikali haitavumilia wahuni na ghasia, akionya wanasiasa wanaofadhili vurugu katika mikutano kuwa siku zao zinahesabika.

“Nimewaona watu wakipiga mawe magari ya wengine, huku wengine wakichoma maduka makubwa na biashara. Mzee anaweza kuwa amewekeza katika duka ili kuhudumia watoto wake, lakini mtu analipa vijana kulipora na kuchoma biashara hiyo. Huo ni upumbavu,” akasema.

Alisisitiza kuwa wakazi wa Mlima Kenya ni watu wanaofanya kazi kwa bidii ili kujenga utajiri, wala si kuharibu mali.
“Tutahakikisha kuwa kiongozi yeyote anayechochea ghasia, uhalifu wa wahuni au uharibifu wa mali analipa gharama kubwa, bila kujali cheo chake. Hatutakubali hali hiyo,” akasema.

Akiwa Othaya, Prof Kindiki alikagua barabara ya Gathunguri-Waihara-Kabebero iliyokamilika na kuzindua mradi wa kusambaza umeme katika maeneo ya Kihuro-Kirio-Kianjogu. Barabara hiyo ni sehemu ya ile ya kilomita 775 iliyotengewa Sh45 bilioni kwa ajili ya kuwekwa lami katika Kaunti ya Nyeri.

Mradi wa umeme ni sehemu ya mpango wa Sh650 milioni unaolenga kuunganisha nyumba nyingine 12,000 na huduma hiyo. Alisema barabara na umeme ni muhimu katika kukuza uchumi, kuunda nafasi za kazi, kuongeza uzalishaji wa kilimo na kuboresha maisha ya wananchi.

Prof Kindiki alisema miradi ya masoko ya mazao, nyumba za gharama nafuu na makazi ya wanafunzi yenye thamani ya Sh17 bilioni inaendelea kutekelezwa Nyeri, huku miradi mingine ya Sh5 bilioni ikipangwa.

Aliongeza kuwa Hospitali ya Rufaa na Mafunzo ya Mwai Kibaki Level Six, Othaya, na Hospitali ya Nyeri PGH Level Five zimepokea Sh1 bilioni kila moja ili kuboresha huduma zake. Alisema viwanja vya Ruring’u na Othaya viko katika hatua za mwisho za ujenzi, kwa gharama ya Sh900 milioni na Sh55 milioni mtawalia.

Kuhusu umoja wa kisiasa, Prof Kindiki alisema wazee waliomuidhinisha kuwa msemaji wa jamii za Mlima Kenya walimtaka kuhimiza mshikamano kati ya Wakenya wote. Aliwataka wakazi kukataa wanasiasa wanaotaka kuwagawanya Wakenya na kuchochea migogoro kwa kisingizio cha siasa.

Alisema uchaguzi si vita na kwamba wanasiasa wanapaswa kushindana kwa hoja, sera na mipango ya maendeleo, huku wanaoshindwa wakisubiri nafasi nyingine.

Naibu huyo wa Rais pia aliahidi kuwa serikali itakabiliana vikali na watengenezaji wa pombe haramu wanaochanganya vinywaji hivyo na kemikali zenye sumu zinazohatarisha afya za watumiaji.

 “Tutachukua hatua kali bila huruma dhidi ya wote wanaouza pombe hiyo hatari. Hili si suala la siasa, bali ni kulinda taifa na jamii zetu ili vijana wetu washiriki katika shughuli za uzazi na kusaka riziki,” alisema.

Profesa Kindiki aliandamana na Seneta wa Nyeri Wahome Wamatinga, wabunge Wambugu Wainaina (Othaya) na Duncan Mathenge (Nyeri Mjini), Katibu Mkuu katika Wizara ya Kawi Alex Wachira, mwenzake wa Jumuiya ya Afrika Mashariki Dkt Carol Karugu na madiwani kadhaa.