SHEREHE iliyolenga kuwawezesha vijana, wanawake na watu wenye ulemavu mjini Homa Bay iligeuka kuwa vurugu baada ya kundi la vijana kuvamia hafla iliyohudhuriwa na Waziri wa Vyama vya Ushirika Wycliffe Oparanya na kuondoka na baadhi ya vifaa.

Hafla hiyo iliandaliwa na Mbunge Mwanamke wa Homa Bay Joyce Osogo, maarufu Bensuda, katika Uwanja wa Raila Odinga.

Lengo lilikuwa kupatia vikundi vifaa vya kuanzisha au kupanua biashara, huku vifaa vilivyotolewa vikijumuisha mashine za kushona, na kusaga, pampu za kuosha magari na vifaa vingine.

Hafla ilipokaribia kumalizika, baadhi ya vijana waliingia uwanjani na kuanza kubeba vifaa vilivyokuwa vimepangwa kugawiwa vikundi.

Oparanya alijaribu kuwatuliza bila mafanikio.

“Kwa nini mnaiba vitu ambavyo vimeletwa kuwasaidia? Tumeleta vitu vingi kuwasaidia wananchi. Hakuna haja ya kuiba,” alisema.

Katika tukio jingine, kikundi kilipopewa mashine, baadhi ya vijana walijaribu kuinyakua.

“Linda mashine uliyopewa. Ukipoteza hii, hutapewa nyingine,” Oparanya alionya.

Bensuda aliamuru baadhi ya vifaa vilivyosalia vipakiwa kwenye magari na kuwekwa mahali salama.

Baadaye alidai mmoja wa waliopanga vurugu hizo ni mfanyakazi wa Serikali ya Kaunti ya Homa Bay.

Viongozi wa eneo hilo walilaani tukio hilo, wakisema linaweza kuwa ishara ya kuongezeka kwa vurugu za kisiasa kuelekea Uchaguzi Mkuu wa 2027.

Seneta wa Homa Bay Moses Kajwang alisema vijana hao wanapaswa kudhibitiwa mapema.

“Tuna kizazi ambacho ni kigumu kukabiliana nacho. Tusipowadhibiti sasa, tutakumbana na hali ngumu baadaye,” alisema.

Kamanda wa Polisi wa Homa Bay Lawrence Koilem alisema hakukuwa na ripoti rasmi ya wizi iliyowasilishwa, lakini alithibitisha kuwa polisi walifika baada ya kupata taarifa za vurugu na wakaagiza vifaa vilivyosalia kuwekwa mahali salama.