WAKAZI wa Kisumu wameheshimu wosia wa marehemu Raila Odinga wa kuhimiza mazungumzo kati ya vijana na wazee kuhusu changamoto za kijamii, kisiasa na kiuchumi zinazokabili jamii.

Hafla  hiyo iliyoleta pamoja wazee na vijana. ilifanyika katika Ukumbi wa Ofafa Memorial, kama sehemu ya shughuli za siku tatu za kuadhimisha maisha na urithi wa Raila kabla ya mwaka mmoja tangu kifo chake Alhamisi, Oktoba 15, 2026.

Mwenyekiti wa Kamati ya Kitaifa ya Maadhimisho ya Raila, Prof Adams Oloo, alisema ilikuwa muhimu kuanzisha shughuli hizo kwa kuwakutanisha wazee waliomfahamu Raila na vijana waliovutiwa na ujasiri na uzalendo wake.

Mwenyekiti wa Baraza la Wazee wa Luo, Ker Odungi Randa, aliwahimiza vijana kujifunza mila na desturi za jamii yao, akisema kuporomoka kwa mifumo ya jadi kumevuruga malezi na ushauri kwa vijana.

Alitaja mifumo kama Siwindhe, iliyotumiwa kuwaandaa wasichana kuhusu ndoa, na Duol, ambako wavulana walifundishwa majukumu yao katika familia na jamii.

Randa pia aliwataka vijana kudumisha amani na kuepuka kutumia simu kutukana viongozi, akionya kuwa tabia hiyo inaweza kuwaweka hatarini.

Mwakilishi wa vijana, Victoria Adwet, alisema mitandao ya kijamii imechangia pengo kati ya vizazi kwa sababu vijana hawapati nafasi za kutosha kujifunza tamaduni zao.

Aliomba wazee na vijana washirikiane, huku akitaka mitandao ya kijamii itumiwe kuwafikia vijana na kuwahamasisha kushiriki shughuli za kitamaduni.

Vijana pia walipendekeza kuanzishwa kwa Baraza la Vijana wa Luo ili kuwawezesha kushirikiana na wazee na kushiriki masuala ya jamii.

Askofu Joseph Ouko wa Evangelical Youth Alliance, Nyanza, alisema vijana watahitaji uwazi, vita dhidi ya ufisadi na uteuzi huru na wa haki wa wagombea wa vyama.

Mjane wa aliyekuwa Ker wa Luo, Willis Otondi, Lillian Otondi, aliwataka kina mama kurejea katika malezi ya jadi na kuwafundisha wasichana kuhusu familia, ndoa na malezi ya watoto.

Shughuli hizo zitahitimishwa Alhamisi, Oktoba 15, katika uwanja wa Migwena, Bondo, ambako Rais William Ruto na viongozi wengine wanatarajiwa kuhudhuria.

Kabla ya hapo, Jumatano, Oktoba 14, kutakuwa na hafla ya kimataifa ya kuwasha mishumaa Kang’o ka Jaramogi kuanzia saa kumi na mbili jioni, ikiongozwa na Mama Ida Odinga. Wanafunzi wa vyuo vikuu na taasisi za ufundi pia watashiriki zoezi la kutoa damu mjini Kisumu.