TIMU ya Kenya ya wasichana wasiozidi umri wa miaka 17, Junior Starlets, inatarajiwa kukabiliwa na mtihani mgumu itakapomenyana na Marekani katika mechi ya pili ya Kundi E kwenye Kombe la Dunia nchini Morocco leo, katika uwanja wa Mohammed VI Football Academy, mjini Salé, kuanzia saa tatu usiku saa za Kenya.

Starlets wanaonolewa na Mildred Cheche, walianza kampeni yao kwa kichapo cha mabao 3-0 dhidi ya China Jumatatu katika uwanja huohuo. Matokeo hayo yamewaweka katika hali ngumu huku wakisaka tiketi ya kufuzu 16 bora.

Mshambuliaji Xu Yue aliipa China bao la kuongoza dakika ya 12 baada ya kutumia mwanya katika safu ya ulinzi ya Kenya. Xu Xiaotang alifunga mabao mengine mawili dakika za 49 na 52 na kuihakikishia China ushindi.

Sasa Wakenya wanakabiliwa na Marekani ambayo ilianza kampeni yake kwa kishindo baada ya kuichabanga Samoa mabao 17-0 Jumatatu, matokeo yaliyoweka rekodi ya ushindi mkubwa zaidi katika historia ya mashindano hayo.

Marekani itakuwa ikisaka ushindi mwingine ili kujiweka katika nafasi nzuri ya kufuzu kwa hatua ya 16 bora. Timu mbili za kwanza katika kila kundi pamoja na timu nne bora zilizomaliza katika nafasi ya tatu ndizo zitakazofuzu kwa hatua hiyo.

Hata hivyo, Junior Starlets wanahitaji kuboresha mchezo wao, hasa katika safu ya ulinzi na kiungo, ili kukabiliana na kasi, nguvu na presha ya wapinzani wao.

Marekani ina safu hatari ya ushambuliaji inayojumuisha Maddie DiMaria, Amari Manning na Deus Stanislaus. Viungo Loradana Paletta na Mia Corona pia walichangia pakubwa katika ushindi mnono dhidi ya Samoa.

Kwa upande wa Kenya, minda lango Mishel Okoyo na mabeki wenzake watalazimika kuwa makini zaidi huku viungo wakihakikisha hawawapi Wamarekani nafasi ya kutumia mianya kati ya safu hizo mbili.

Aidha, washambuliaji Tabitha Wambui na Brenda Achieng wanatarajiwa kutumia vyema nafasi zitakazopatikana katika mashambulizi ya kushtukiza.

Marekani ina historia kubwa katika mashindano haya ikilinganishwa na Kenya, ambayo inashiriki kwa mara ya pili baada ya kucheza kwa mara ya kwanza mwaka 2024 katika Jamhuri ya Dominican.

Wamarekani wanashiriki kwa mara ya nane, baada ya kukosa makala ya mwaka 2010 na 2014.

Katika mechi yao ya kwanza mwaka 2008 nchini New Zealand, Marekani ilifika fainali. Baadaye iliondolewa katika hatua ya makundi mwaka 2012, 2016 na 2018, kabla ya kufika robo-fainali mwaka 2022 na kumaliza katika nafasi ya tatu mwaka 2024.

Marekani, inayofunzwa na Ciara Crinion aliyechukua usukani mwaka jana, pia imetwaa ubingwa wa mashindano ya CONCACAF ya wanawake wasiozidi umri wa miaka 17 mara sita, katika miaka ya 2008, 2012, 2016, 2018, 2022 na 2024.

Mara ya mwisho Marekani kukutana na timu ya Afrika katika Kombe la Dunia la wanawake wasiozidi umri wa miaka 17 ilikuwa mwaka 2024, ilipoilaza Nigeria mabao 2-0 katika robo-fainali.

Kenya na Marekani hazijawahi kukutana katika kiwango hiki, hivyo mechi ya leo itakuwa ya kihistoria kwa Junior Starlets.